[Cloud24]

*


" البارت الثاني والعشرون "


..ماقبل الاخير..


*



مشغل الشروق ..

تمارس هوايتها ع وجه عروس .. اليوم تحس انها مروقه
وكأنها تحررت من نواف فعلاً
اقتنعت ان الكتمان مايجيب خير .. لازم تقول الي بنفسك وتنتهي السالفه .. كذا تقدر تتجاوز ومايبقى شي

العروس كل شوي تناظر ساعتها بتوتر

شروق بهدوء : لاتخافين بخلصك بالوقت المحدد ماعليك

العروس : الله يعدي هاليوم ع خير امي وامه متهاوشات ترجيت امي تطول بالها وماتنكد فرحتي بس خايفه من امه

شروق حزنت ع حالها .. اصعب شي لما الاهل يكونون سبب في توتر علاقه الزوجين : حبيبتي توكلي ع الله ومابيصير شي ان شاءالله يمكن مايصير شي وبس ضيعتي فرحتك بالتوتر

العروس تنهد : مو بيدي والله

شروق : حوقلي وبأذن الله تمر هالليله سعيده

العروس : الله يسعدك ياشروق

شروق همست امين .. ومن كل قلبها اميين .. تبي السعاده
تبي العوض الحلوو وبأذن ربي مايخيب املها ..




*


جالسه ع كرسيها
والبنات الي معها يسولفون للحين ماتداخلت معهم بس شدتها السوالف ولفت تناظرهم ومستمعه

دلال : الدكتور الياس تراه مطلق مرتين خالي يعرف اهله امه هولنديه

لمى : اهاا وانا اول ماشفته قلت انه اجنبي انصدمت انه سعودي ولهجته مضبوطه

حسناء : عنده اطفال ؟

دلال تاكل من الحلا : لا اصلاً كل المرتين ماطول معهم

حسناء شهقت : اسكتوو هذا هو ع طاريه

اريج ع طول لفت بفضول ..
ماانصدمت لما شافته نفس الي صدمت فيه ذيك المره فعلاً حتى هي ظنته اجنبي
كان يمشي بشويش وبيده قهوه .. ناظرهم عادي
ووقفت نظراته عليها وبغى راسه يلف وهو يمشي بس انتبه ولف يناظر طريقه
وهمس مع نفسه : اووه عيون العسل موظفه هنا

جلس ع كرسي مكتبه وهو يحك ذقنه وبتردد سأل الممرضه المساعده : في موظفه جديده هنا تنظم مواعيد اي دكتور ؟

الممرضه السودانيه : ايوا امس كان اول دوام لها استلمت مواعيد الدكتور عادل

الياس : اهاا وش اسمها ؟

الممرضه : اريج ال..

الياس يسوي انه مو مهتم ويبدا بشغله ..




*


اجواء المزرعه حلووه مريحه للاعصاب ..

كان جالس يشوف منذر وعبدالله يطبخون .. له زمان ماشاف منذر يطبخ .. ايام زمان لما كان دب يطبخ لهم كبسات بالليل

منذر لف عليه : الشيخ مايبي يساعدنا

نواف : مااعرف والله

عبدالله : حط عنده حسابات وقيود يفلح

منذر يضحك وهو يقفل قدر الضغط : صدقت

نواف يحط راسه ع المركى : متى يجهز اكلكم بس ترا ميت جوع

منذر يناظر ساعته وهو ينتظر يصفر القدر : يعني تقريبا 40 دقيقه

عبدالله راح جاب الشاهي وجلس وصب لهم ..

نواف بعد فتره سكوت : انا قررت اكمل دراستي

منذر : ماشاءالله زيين

عبدالله يناظر نواف : لحظه احسه ماكمل

نواف يناظرهم بهدوء : ايه ابي اكمل برا

عبدالله : كييف حرام جدي مايقدر بدونك

نواف : البركه بمنذر انا ادرس وابعد

منذر حاس بشعوره لان حتى هو خاطره يبعد .. عشان يقدر ينسى ويكمل حياته : قلت لابوي وامي

نواف : لا باقي




*




يوم السبت ..
الصباح


جالسات مع جارتهم ام صالح والنوم بعيونهم ..
جايتهم ع الصبح .. بس كثر خيرها جايبه فطورها

ريميه تاكل وتناظر اكلها وبالها بعييد عن سوالف ام صالح .. نفسيتها كل مالها وتسوء هو من الحمل او ماتدري تعبت .. ليش كذا الحياه عمرها ماانصفتني .. مكتوب علي الشقى والتعب .. الانسان الوحيد الي ارتحت له وحبيته يطلع هو سبب كل الدمار الي انا فيه

ام صالح : وين امك كأنها تأخرت

اريج تناظر ساعتها : كلمتها انا قالت تخلص شغله بيدها وتجي

ام صالح تناظر هدوء البيت : اقول بيني وبينكم

اريج : ايه

ام صالح تناظر اريج الي مهتمه لها عكس ريميه الي كانها نايمه : يوم عرس امك شفت عندكم بنت عجبتني حيل وخاطري فيها لولدي بس مااعرف مين بنته

اريج عدلت جلستها : كيف شكلها

ام صالح : انا سألتها عن اسمها وقالت سماح

اريج .. سماح..!! : وصفيها لي

ام صالح : توقعت انكم ماتعرفوها قلت اكيد انها من جماعه سلوم الواجد البنت مبين شبعانه عباتها ازرق غامق ووجهها ابيض كانه البدر

اريج تذكرتها .. لانها استنكرت مين هذي .. بس اسمها سماح !؟ ..

ريميه .. ساكته تستوعب الوصف .. وصف اخت ذاك .. حبيبه منذر
قامت بسرعه مو قادره تستحمل .. تحس انها بتستفرغ

اريج راحت وراها تشوفهاا ..
وقفت عند المغسله تنتظرها تخلص وترتاح : وش فيك غثك فطورها ؟

ريميه تغسل وجهها بيدين ترجف : تقصد البنت هذيك

اريج : اي بنت

ريميه تحاول تتحكم برجفتهاا : اخته .. حبيبه م منذر .. هي هذي الي تقول عنها ام صالح سماح

اريج بانت الصدمه بوجهها .. حطت يدها ع فمها تحاول تربط .. سماح .. وشكل ضاري ذيك الليله مشككهاا
سماح حبيبه ضاري .. كيف صار منذر !!
ودعوة منذر على ضاري ..



*



صباح المزرعه .. الجو ضباب خفيف

منذر واقف عند سيارته ينتظر امه واخته فرح وبناتها .. ماسك جوال امه بيده يشد عليه عقله يقوله لا وقلبه يقوله عادي
وبسرعه فتحه وراح ع اسمها قبل يكنسل او يجون اهله ..

اتصل وحط الجوال ع اذنه ودقات قلبه تزيد .. بس يبي يسمع صوتها وبعده يكمل بعد وفراق
يهز رجله بتوتر وهمس : ردي عااد مو كل مره بتصل

لمح جود وبتول جايات .. قطع الاتصال وقفل الجوال ورجعه عند شنطه امه
ركب السياره .. وجت امه وفرح واكتملو .. وحرك وكان قدامهم نواف معه ابوه وسلمان
اما عبدالله راح هو وامه من البارح ..

امنه تناظر الطريق متضايقه من بعد ماقال لهم نواف انه بيدرس برا ..

منذر ياخذ يد امه ويبوسها : هاا الغاليه ساكته مين مزعلها

فرح : من البارح كذا زعلت من قرار نواف

امنه خانقتها العبره : ابيكم حولي ومبسوطين ماابي احد يبعد شلون بتطمن عليه وهو بيعيش بديار الكفار وبروحه

منذر مسد يدها : تبين راحته صح ؟ هو راحته بهالقرار ادعميه وانا عندك هااا ترا ازعل انا القعده مااكفي

امنه ضحكت وسط حزنها : القعده والبكر غلاكم واحد ولاابي تبعدون عني

فرح : ايييه لنا الله يالي بالنص

وضحكت هي وبناتها .. ومنذر يبوس يد امه ويناظر الطريق


شوي كذا هدى من سرعته لما شاف مجموعه بعارين يقطعون الاسفلت
ووقف ينتظر يخلصون .. وكل وحده تمشي ع اقل من مهلها

امنه لما شافته سفط السياره ع جنب وفتح الباب : وين !؟

منذر ينزل ويعصب شماغه ع راسه : اسوقهن بعيد عن الخط لاياذون المسلمين

بتول : يا ثقاله دم هالبعارين تمشي الوحده كنها عروس بالزفه

فرح تحاول توخر جود الي نايمه عن كتفها : لاحول ولاقوه الا بالله في كل مكان تنام

امنه استندت ع القزاز تناظره .. مهما حاول يبين انه عادي تدري ان فراق ريميه كاسره
غمضت عيونها بتعب ..
فتحت عيونها بسرعه ولفت تشوف الصوت المرعب الي سمعته .. وصراخ فرح وبتول !!
ثبتت دقايق تستوعب السياره الي نزل صاحبها يجري ..
الناقه فوق السياره .. منذر طايح ع الارض
منذر !!!


صدم منذر ...!!!!


فتحت الباب بسرعه ورجفه وراحت تجررري بخووف : منذذذذرر

بتول راحت تجري ورا جدتها .. عكس فرح الي نزلت وجلست ع ركبها عند السياره مو قادره تتحرك وكأن رجولها انشلت وتصارخ تنادي ع منذر وهي تشوفه طايح برعب .. وكأنها تترجاه يرد عليها

جود صحت مرعوبه من الصراخ تناظر حولها مو فاهمه شي !!

امنه وصلته وجلست ع الارض تتفقده ولاتشوف احد غيره والدموع اخذت مجراها ..
وعند كتفها وقفت بتول تناظره وتبكي ..

امنه مسحت ع راسه ورفعت يدها الي ترجف تشوف الدم مغطيهاا وهو ثابت بلا حركه : لااا تكفى منذررر لااا يارووح امك "وصرخت بااعلا صوتها ببكا"لااااا لاااا تموووت وتترك امك الله يخلليييك

بتول تحضن جدتها وهي تبكي باانهيار : الحين يقوم ياجده الحييين منذررر



*




وفي السياره جالسه وهي تعض اظافرها
ودموع صامته تنزل .. تناظر اريج الي تدق جرس البيت الفخم

فتحت الشغاله : نعم

اريج : سماح موجوده

الشغاله دخلتها وطلبت منها تنتظر لين تجيها سماح ..

اريج انتظرت ورفضت اي ضيافه من هالعايله .. هي جايه تفهم شي واحد وبس ..
رفعت عيونها تناظر سماح .. نفس الي بزواج امها
مدري بأي وجه حضرت وبصفتها ميين !؟

سماح رفعت حاجب بااستغراب لما عرفتها هذي الي قالت لها الحرمه انها طليقه ضاري : اهلين !

اريج بنفس جلستها ماوقفت : حضرتي زواجنا ولاتعرفنا عليك

سماح بدت تخاف من نظراتها الواثقه : كنت ماره فالحي وشفت الزواج قلت احضر

اريج : طفيليه

سماح : ايش !!

اريج بسخريه : الي يحضر زواج مو معزوم عليه بالادب اسمه طفيلي ههه

سماح : اهاا من الاخر انتِ وش تبين

اريج : جواب فقط .. ضاري قالي عنك بس ماكنت اعرف انك من هالعايله بس شلون منذر بعد !؟

سماح تلف شعرها ورا اذنها بملل: كثر خيره منذر خلصني من الي يقولون انه اخوي كنت بشكره لما شفته بس طلع وقح وطول لسانه علي وشفت ريميه الي انصدمت انه تزوجها هههه قلت خليني اطقطق فيهم شوي

اريج تحاول تمسك اعصابها : يعني كنت تكذبين بس عشان تخربين بينه وبين ريميه

سماح ناظرتها بوقاحه : يااه

اريج تشد يدها : وضاري ؟

سماح تلف فمها وكأنها تتذكر شي وبضحكه : ههه للاسف كان اول حبيب لطيف وبريء مايعرف يغطي ع طول كشفنا اخوي بسببه

اريج وقفت وهي خلاص قرفانه .. خاطرها تصفقها وتخليها تعض الارض بس تعرف هالنوعيه بايعتها وبتسحبها للمحاكم ولاهمتها سمعتها

سماح : وين بدري خل نسولف هههه

اريج تمشي وسماح وراها : ماعاد استحمل برجع الي ببطني

وطلعت لريميه .. ركبت السياره وحركتها بهدوء ..

ريميه تناظرها ويادوب قدرت تنطق : وش !؟

اريج : اعترفت ببساطه حبيبها كان ضاري ماهو منذر بس عشانه طردها تبلت عليه قدامك النذل والخسيس الي تسبب عليك هو ضاري "تحرك يدها قدامها" ياالله انا ماني قادره استوعب كيف يشوفها تتبلا ع منذر ويسكت تتطلقون وساااكت

ريميه تناظر قدام .. وكل مواقفها مع ضاري تمر مثل الشريط قدامها .. كف ورا كف وصدمتها توجع
موقفها بالمستشفى مع منذر اخر شي ..
كيف كان يشوفها تتكلم ع منذر .. وساكت !!
نظره منذر الاخيره ماتنساها .. حطت يدها ع قلبها من النغزات القويه الي تحسها
ودموعها تنزل .. ولاهي مركزه بكلام اريج
نظرات منذر تحس وكأنه يناظرها الحين بنفس الطريقه ..




*




نهايه البارت الثاني والعشرون ..