[لامارا]

البارت 26

-عزام-
فز من طلع الدكتور بعد مرور ساعات طويلة استغرقتها العملية
عزام بخوف : بشر ؟
الدكتور وهو يتنفس بتعب :الحمدلله العملية نجحت
تنهد عزام براحة ولف على الي وقفت بجنبه من راح الدكتور : وشقال ؟؟
عزام بابتسامة : نجحت العملية وبينقلونهم
استانست جوري وراحت تصحي امها الي غفت على كراسي الانتظار ، وتوجهوا لغرفة جابر ومزن بعد ما طلبهم عزام يحطونهم بغرفة وحده ، دخل الكل باستثناء عزام الي قعد برا ، لف على اهل جابر وعماته وبناتهم الي جو
غض بصره وهو يناظر الارض ، مسح على عيونه وهو حاس بالنعاس ، رفع راسه للي طلعت بالقهوة وحلا
وقفت قدامه وهي تصب له ، مدت له الحلا وهي حاسه بنظراته
خلص فنجانه وهزه وهو يعطيه اياها : بس ، سلمي لي على جابر ، انا رايح اريح وبروح للدوام ، بس برجعله لا خلصت
جوري :تمام ، وشكرا على وقفتك تعبناك معنا
عزام بضحكة: ادخلي ادخلي ، ولا سجلتي بالعسكرية علميني
ضحكت بخفيف وناظرته من تخطاها وراح ورجعت دخلت
—
صحت مزن قبل جابر وهي تناظرهم من حولها ، مسحت على عيونها ونطقت وهي تناظر جوري الي وقفت
بجنبها : وين جابر ؟
جوري : الحمدلله على سلامتك ، وجابر شوفيه بجنبك وبخير
لفت مزن وهي تناظره ، ارتاحت من شافته وانتبهت لام جابر وعماته من قربوا يسلمون عليها ويتحمدون بالسلامة
ام جابر وهي تكلم جوري : هيا خليك عندها بروح البيت اغير واسوي شي حار ياكلونه وبجي
هزت جوري راسها وقعدت بجنب مزن من راح الكل
مزن : جابر نايم ؟
جوري بكذب : ايه
مزن : عطيني مويه عطشانه
سحبت جوري الموية وهي تفتحها ومدتها لها ، شربت مزن وسرعان ما حطتها من فزت جوري وهي تركض لجابر : صحى صحى
لفت مزن وهي تناظره من فتح عيونه واول من شاف جوري ونطق بثقل وهو يسالها : مزن وينها ؟
جوري بابتسامة : بجنبك
لف جابر وهو يناظر مزن ونطق وهو يسالها : بطنك باقي يوجعك ؟

-قصيد-
كانت منغمسة بقراءة الكتاب وخلصت خمس رسايل وهي حابه الكتاب والرسايل واسلوب الطلب الي خلاها تطلع من جو الغرفة المعتمة ، وصارت تتحرك وتنفذ الي بالرسايل بكل حماس للرساله الي بعدها
قفلت الكتاب من دخلت ورد : قصيد امي تقول تعالي تقهوي معنا
ابتسمت قصيد : جايه
استانست ورد وهي حاسه انها رجعت قصيد الاولى
قامت قصيد وهي تحط الكتاب ونزلت وهي تقعد مع امها واختها بالصاله ، بدات تسولف معهم وتعطي وتاخذ بوسط فرحة امها ووناسه ورد من تغيرها وخروجها
ام قصيد : خلي على الاخبار خنسمع وش يقولون
ورد : يمه سماجة مالنا دخل فيها
ام قصيد : خليها لا تغيرين
حطت ورد على قناة الاخبار ولفت تسولف مع قصيد
ورد : بالله شرايك بالحلا ؟ بسويه لارحنا لخالتي
قصيد : حلو بس مكثره شوكولاته
ولفت وهي تناظر مكان ما ناظرت ورد ، وبلعت ريقها من شافته بالتلفيزيون ، توترت من شافت صورته وحطت ايدها على فمها وقامت وهي تركض لدورات المياة
استغرب الكل ولحقتها ورد بخوف : شفيك ؟
توترت قصيد : بطني يوجعني
ورد : بسم الله تعالي اشربي قهوة
مسحت قصيد على فمها ومشت مع ورد ، نست توترها من دخل سند وهو مستانس من شافها : اوووه قصيدوه صاحيه وتفر بالبيت
قصيد بضحكة : شقصدك ذبانه انا
سند بضحكة : تعالي تعالي الله جابك ، شيلي الاكياس معي
تقدمت وهي تشيل معها : اخس من متى تشتري ماركات
سند :راتبي نزل صرت كاش
شالت معه الاكياس وطلعت لغرفته وهي تفتحها وبدات تفتح الاكياس وتتخير بالتيشيرتات والبجايم
قصيد : ذا يجنن بسرقه
سند وهو يقيس الساعة على ايدها : لا اشوفك ماخذه شي دولابك كله ملابسي
سحبت التيشيرت وانحاشت ، ضحك وهو فرحان لنفسيتها الي تغيرت
صادفت رهام بطريقها واستانست وهي تحضنها
دخلوا الغرفة ورمت التيشيرت وهي تقعد مع رهام : الكتاب اعجبني ، والرسايل اكثر شي حبيته بالكتاب وحمسني
رهام بفرحة : صدق ؟؟ خلصتيه ؟
قصيد : لا باقي لي شوي ، بعدين تخيلي باخر الرسايل مكتوب حرف الميم تتوقعين هو ؟
توترت رهام : قصدك مين ؟ معن ؟
حطت قصيد يدها على فمها من جابت طاريه وركضت لدورات المياة وهي تستفرغ "اكرمكم الله"

-مزن-
ردت على جابر وهي تطمنه ان الوجع اختفى
لفوا على ام جابر الي دخلت بالاكل وهي مستعجلة : الزيارة خلصت ويالله لحقت ، جوري تقعدين مرافق لهم ؟
جوري وهي حاسه ان قعدتها معهم غلط وقالت بسرعه : لا بروح اغير وبرتاح ، بكره برجع
وطلعت مع امها وبقوا اثنينهم بالغرفة
قامت مزن لجل تصب لها شي حار ، وناظرت جابر من قام : اقعدي انا بصب
سبقته قبل ينزل من سريره وهو حاط ايده على بطنه
وقامت وهي تسحب الاكل لعنده وجلست على سريره : جبته لا تقوم
ناظرها وقال : انتي مسويه عملية لازم ترتاحين
مزن : ما عليك مرتاحة
وبدات تغرف له شوربة ومدته له ، وغرفت لها
وبداوا اثنينهم ياكلون ويتبادلون السوالف
-
بعد دقايق قاموا وهم يطلعون يمشون بالممر
مزن : بطنك يوجعك ؟
جابر بكذب : لا بس رجلي
مزن : اجل نرجع الغرفة احسن
جابر : لا ، كملي ابي امشي
وكملوا يمشون بالممر بكل هدوء
جابر : تبين نطلع بكره ؟
مزن : لا لين تسلم رجلك
جابر بوهقة : ما عليك وجعها خفيف وبيروح
مزن : بتداوم ولا بتاخذ اجازة ؟
جابر : لا باخذ اجازة كم يوم
مزن : خلنا نرجع الغرفة احسك تعبت
مشى معها ودخلوا الغرفة ، وناموا اثنينهم
—
بالصباح صحوا على صوت جوري
جوري : جبت لكم فطور بسرعه قوموا
حطت ايدها على عيونها من اشعة الشمس : قفلي الستارة
جوري : قومي قومي
وقاموا وهم يغسلون وجيهم وقعدوا وهم يفطرون
جوري : جابر اسمع بقولك شي
جابر : اسلمي
جوري بتوتر: انا فصلت من الجامعة
ناظروها بصدمه ونطقت مزن : تستهبلين صح ؟
جوري : لا ، معاد ابي اكمل جامعة وشسمه وابي اقدم على شي ثاني هو مو ابي ، انا قدمت اساسا بس حبيت اعلمك
جابر : وشهو ؟
بلعت ريقها وهي خايفة من ردة فعله : على العسكرية

"صلوا على محمد"

-قصيد-
لحقتها رهام وبكل خوف : شفيك ؟؟
قصيد وهي تغسل وجهها : بطني يوجعني شكلها بنت الكلب جايه
رهام : وقتها غلط
طلعت قصيد من دورات المياة وجلست مع رهام على السرير
رهام بتوتر: بخصوص حرف الميم ، مستحيل هو يمكن الكاتب حاط حرف من اسمه اختصار او علامة شهرة
قصيد وهي تسحب الكروت : يمكن ، شوفي خلصت سبع رسايل باقي ثلاث
رهام وهي تقرا الرسايل : تحسين انك تغيرتي من بعد الكتاب ؟ وتغيرت نفسيتك ؟
قصيد : ايه وكثير ، تغيرت نفسيتي كثير وحتى اهلي ملاحظين التغير
رهام : اذا خلصتي الكتاب علميني
قصيد : بخلصه اليوم اكيد ، حبيته كثير واكثر شي الرسايل بحفظها ، وكل ما زعلت برجع اقراها من اول وجديد واسوي المكتوب
ابتسمت رهام وقامت : والله ما تزعلين وانا بجنبك ، ويالله خليك جاهزة بجيك بالليل
وطلعت رهام وسحبت قصيد الكتاب وانسدحت وهي تقرا وتكمل الرسايل ، انتهت من الرساله الثامنة وكملت وهي ناوية تختم الكتاب ، تذكرت انها بتطلع مع رهام وقامت وهي تفتح دولابها والكتاب بايدها وتقرا وتلتفت للدولاب ، طلعت لبس وركضت للكنب من وصلت للرساله التاسعة وسحبت الكرت بكل حماس
حطت الكتاب وبدات تقرا الرسالة : توصلتي الى رسالتي التاسعة وهذا يمنحني الجرأة لتغيير ما كنت ادعيك به ، ف بعد ثمانِ رسائل اصبحتي حبيبتي ، لن اكتب طلب يتطلب منك اغلاق الكتاب ، ف طلبي بسيط ويعتبر من اواخر طلباتي حبيبتي ، ان كانت رسائلي لم تصنع ابتسامة على شفتيك ، ف ستنتهي طلباتي هنا بطلبك بالتبسّم وحتى ان كان متصنع ، فلا اريد ان انهي رسائلي بالفشل في جعلك تبتسمين ، وانا متاكد لست الوحيد الذي يحب ابتسامتك ، لم تنتهي رسائلي حبيبتي تنتظرك اخر رسائلي لكِ .م.
وانتهت الرسالة ورمت الكرت ، من جاء على بالها معن مسحت دموعها وهي تتذكر لما وصاها على ضحكتها وابتسامتها ، وبلعت ريقها وهي تحس بحرارة بصدرها ، قامت وهي تسحب عبايتها وخلصت وهي تسحب شنطتها ومتجاهله الكتاب ، وطلعت وهي تركب مع رهام
—-
طلع من المشروع وهو متجاهل الاجتماع والموظفين الي ينادونه
ركض وهو مستانس من اتصلت عليه رهام وقالت له ان قصيد حبت الكتاب وحبت الرسايل ، ووصلت لاخر الرسايل ، ركض للمواقف وهو متجاهل نظرات الموظفين من ركضه وسرعته ، ركب سيارته وهو مستانس وقلبه ينبض بسرعه من قالت رهام انها بيطلعون يتمشون ويمكن يمرون السينما ، وطلبها يقابلها ولو من بعيد ووافقت

-جوري-
ناظرت جابر الي سكت من بعد الي قالته ، وهو يصب له حليب
توترت من سكوته وهي خايفة من ردة فعله بعد البرود الي هو فيه
ناظرت مزن وهزت راسها بخوف ، عضت مزن على شفايفها وخافت مع جوري من سكوت جابر الي ارعبهم ، ولفوا وهم يناظرونه من نطق وهو يقطع الخبز : سجلتي على العسكرية اجل
بلعت ريقها جوري وردت : ايه ، الصدق ما قدرت اتقبل التخصص قبل ادخله ، وانا مابي اكمل مستقبلي في تخصص مابيه ولا احبه
جابر بهدوء: والعسكرية تخصص عاجبك وحابته ؟
انصدمت من سؤاله وناظرت مزن بتوتر ونطقت : ايه
جابر بحدة : اقسم بالله لا ما تشيلين الفكرة من راسك ، لا اكسره لك
جوري باصرار : وشفيها طيب ؟ انا ابي اسجل وراضيه بكلشي ، وما ابي اكمل الجامعة ومقتنعه
شهقت من قاطعها وهو يصارخ : صاحيه انتي ؟ شفت الويل بالعسكرية ، مهيب لعب ولا لبس بدلة ومسدس على خصرك ، مانك مسجلة لو تجلسين بالبيت دهر
قامت جوري وباصرار : والله عاد انا سجلت ، ولا قلت اني بروح للحد الجنوبي ، ترا كلها دورة بمكة وانتهينا
جابر بحدة : جوري ، لا تخليني احبسك بالبيت مثل قديمك وانتي عارفه وش اقصد ، سجلتك بالجامعة وقبلوك وانتي الي اخترتي الفصل بنفسك وتحملي قرارك والله لا ضربتك على ايدك ولا جبرتك تفصلين ، واعطيتك حقك بالدراسة بس تجين وتقولين عسكرية وتتركين مستقبلك والله ما تشوفينها ، وانا حلفت
وقام وهو يدخل دورات المياة ، وعصبت جوري وهي تضرب رجلها بالارض وتكلم مزن : ماله دخل ماله دخل بمستقبلي ، كيفي وانا حره
مزن : انتي من حط العسكرية براسك ؟
توترت جوري ونطقت بتصريف : انا ، كذا حسيت اني ابيها
مزن : اقول اهجدي لا رواتب ولا اجازات كلها كرف ، وانتي نفسك قلتي الله يسامح من دخل جابر العسكرية
جوري : وشفيها الرواتب ، شوفي راتب جابر يغطيني ويغطيك ، واذا عن الاجازات عادي مابي اجازة
طلع جابر وهو سامع كلامها وسحب مناديل : اخوك رتبته ضابط ، وما صار راتبه يغطيك الا بعد ما شاف جهنم بارض ربه ، انا عارف وش مخبيه لك العسكرية وانتي اختي وعارف مراح تتحملين الي بيجيك ، شيلي الفكرة من راسك وبكلم عمادة القبول يرجعونك للجامعة
تنرفزت جوري وسكتت ، بعد دقايق خلصوا وبدلت مزن وطلعوا من المستشفى ، وعلى طريقهم قابلوا عزام ، ناظرهم وهو يتحمد لهم بالسلامة ، انتبه للي وراء جابر بادلها النظرات لحتى طلعوا المستشفى

-قصيد-
كانت تتكلم عن اخر رسالة قارتها وهي شاكه : احس انه هو ، محد وصاني على ضحكتي غيره ، تخيلي هو الكاتب ؟
رهام بتوتر : لا وين ، ذا امير فاضي للكتب وراه دولة ومواطنين
قصيد : ما ادري ، ما حبيت اخر رساله ذكرتني فيه
رهام بضحكة: وش دعوه ، ترا كلها قال ابتسمي ، وهو صادق كلنا نحب ابتسامتك
ابتسمت قصيد وضحكت من كلامها وهي تتذكر
الرساله وتنهدت وهي ترجع تبتسم
رهام وهي تشغل اغنية : بسرعه وش تبين ؟
قصيد : افصلي انا بشبك
رهام : الله رجعتي فتحتي جوالك واخيرا
قصيد : ايه اقولك تغيرت ، وبرجع اصور استوريات تعرفين مشهورة
ضحكت رهام وفتحت جوالها وهي ترسل لمعن
—-
كان قاعد بسيارته وكل شوي يفتح جواله وينتظر رساله من رهام لجل يتحرك للسينما ، فز من صوت الاشعار وابتسم من قرا رسالتها وحرك باقصى سرعة وهو متلهف لشوفتها وحتى لو من بعيد
-
وصلوا البنات ونزلت قصيد وهي تدخل حسابها وابتسمت من رسايل متابعينها وصديقاتها ، بدات تصور من دخلوا السينما
ودخلوا بعد ما اختاروا الفيلم ، وهي منشغلة بالتصوير
-
وصل وهو يفتح درج سيارته وسحب كمام ونزل وهو يرسل لرهام ويسالها عن اسم الفيلم ، ودخل بسرعة وهو يدورها بنظراته
قرا رسالته رهام وعرف مقعدهم وتوجه وهو يقعد وراهم
زادت نبضات قلبه من سمع صوتها وضحكتها ، ما شال نظراته وهو يناظرها ، بدا الفيلم وقفلت جوالها وبدات تشاهد
كان كل الحضور مندمجين مع الفيلم باستثناء الي كان يناظرها وباله مو مع الفيلم ، كان وده يقوم ويحضنها ويعتذر ، لكن اختار انه يقعد مكانه ويناظرها ، في كل مرة تضحك على لقطة من الفيلم كان يتبسم معها ، وبوسط ضحكاته معاها اجتاحه تأنيب الضمير وهو يتذكر الي سواه فيها ، بلع ريقه وصد وهو حاس بالكتمة وحرارة صدره وزاد ندمه وتانيب ضميره وما قدر يتحمل شعوره الي سيطر عليه بعد كل لهفته وشوقه لشوفتها ، قام وهو يطلع ومتجاهل الي التفتوا عليه من قام ، توجه لسيارته وهو يرمي الكمام وصار يتنفس بسرعة ، حط وجهه على الدركسون وهو يكتم الصيحة الي بصدره ، غمض عيونه وهو يطلق تنهيداته
—-
انتهى الفيلم واستغربت رهام من طلع بوسط الفيلم
قصيد : اوف بعد الضحك الي ضحكته ، ابي اتروش وانام
توجهوا لبيت قصيد ونزلت وهي تطلع لغرفتها وتروشت وتقدمت بتنام وانتبهت على الكتاب وسحبته وبدات تقرا اخر صفحاته والفضول يتملكها لاخر رسالة ،جلست على الكنب من وصلت للرساله وهي تقراها

•صلوا على محمد"

-مزن-
وصلوا للبيت وكان باستقبالهم اعمام جابر وخالاته
طلعت مزن لغرفة البنات لجل تبدل ملابسها ،وخرجت وهي تنزل للمجلس وعلى دخولها كان النقاش حول سفرة العايلة
عم جابر : الجامعات قربت خلوها بالاجازة
ديم : يبه الجامعة باقي عليها اسبوعين ، نبي نغير جو قبل تجي
ديما : صدق انكتمنا
ضحك جابر بخفه من كلامها ونطق بخفيف : انكتمتي وانتي ترمين النقاب
عم جابر : قلت شي يا جابر ؟
جابر : لا سلامتك
ام جابر : ما يخالف ناخذ لنا يومين ولا ثلاثه ، لجل جابر ومزن تغيير نفسياتهم بعد العملية والمستشفى
جوري : يعني وش اخلصوا بتسافرون ولا لا
جابر : ما عندي مشكلة ، بس حددوا وجهتكم وعلموني متى بتمشون
وطلع جواله وهو يرسل لجوري : جهزي فراشي بالمجلس ما راح اقدر امشي بالدرج ، ولا احد يدري اني مسوي عملية
قرأت رسالته وقامت من بعد ما راحوا اعمامها ، وطلعت من المجلس وعلى طلعتها التفت للي تنحنح وهو واقف عند الباب
بادلته النظرات ، وانتبهت على صوت جابر من المجلس : اقلط اقلط
وركضت لغرفة جابر ، ودخل عزام للمجلس وهو يسلم على جابر
—
بغرفة البنات ، كانت تجهز ملابسها مع البنات
جوري : مزن روحي ارتاحي ، انا بحط ملابسك
مزن : لا ما عليك ، بجهز ملابسي وبروح اجهز ملابس جابر
جوري : ترا مسويه عمليه ، مو شي عادي ، لازم ترتاحين ، روحي نامي قالوا بنمشي باخر الليل ، يمديك ترتاحين وبس بنخلص بصحيك
ابتسمت مزن وقامت وهي تطلع لغرفة جابر ونامت
—
باخر الليل كان الكل يشيل شناطه وياخذ اغراضه
جابر : مزن وينها ما شفتها ؟
جوري : كانت نايمه وصحيتها
جابر : يالله اعجلوا ترا عزام بيروح معنا ، مانبي نتاخر عليه
توترت جوري والتفت على مزن الي نزلت من الدرج
تقدم لعندها وبابتسامة : عساك ارتحتي بنومتك ؟
مزن وهي تبادله الابتسامة : ايه ، انت نمت ؟
جابر : واحد ينام وعزام خويه
ضحكت مزن وهي فرحانه لعودة علاقتهم مثل قبل

يتبع.....