شاف امه داخله عليه بحنانها ومشيتها التعبانه وكبر السن قربت من ولدها واقعدت احذاه بكل لهفه الام وخوفها على اعيالها "بدر يومه وش فيك يا ولدي من رجعت وانت متغير
بدر بصوت حزين"ما فيني الا العافيه يا الغاليه هذني جدامج بخير
وهي تمسح على شعره بحنان وحب"ولدي انت فيك تكذب على العالم كله بس انا لا وش فيك ياولدي انت تحبها صح
بهت وانذهل وانصدم وضل ساكت ومنزل راسه"من تقصدين يا الغاليه انتي تتوهمين يا يومه
بأبتسامه فيها الم على ولدها"انت غلطت يا ولدي وانت تعرفها زوجه لغيرك شلون تشوف حرمه رجال ثاني وانا امك ادري ان البنت تنحب وتنحط على الجرح يبرى طيب و اخلاق وفوق هذا جمال محد(ن)يفاصل عليه ومن شفتها وهي دشت خاطري وكان ودي بها لك من كلام اختك بس هذا امر الله وهذا النصيب
بدر قام بعيد عن امه "ارجوج يا الغاليه انا احاول انسى عمري ما نسيت انه حرمه لغيري وهذا الحب دفنته داخلي سامحيني ما قدرت ما كان قلبي يا يومه بيدي بس والله الي في سماه عمري ما فكرت اغلط واتعدى على حرمات الغير وانتي عارفتني بس قلوبنا مالنا حيله بها
بحنان كبير "اعرف وانا امك اعرف الي ربيته بيدي بش بغيتك تنسى وتعيش حياتك وترى بنت عمك مافي احسن منها
بدر"يومه والي يسلمج هذي السيره لا تفتحينها معاي وبنت عمي مرخوصه تاخذ غيري و الزواج انا ما افكر فيه الا بعد الدرسات العليا وهذا اخر كلام عندي
امه"على راحتك والي تبيه يصير بس كل الي اتمناه من هذي الدنيا اني اشوف اعيالك قبل لا يا خذ الله امانته و اختك بعد خايفه كثير عليها
بدر قرب منها وركع احذها وخذ يدها وحبها"الله يطول لنا في عمرج وتشوفين اعيال اعيالنا وفتون لا تخفين عليها هذي اختي وفي اعيوني وماراح اسمح لئي كان انه يضيمها وهذا ابوي موجود و اخواني يعني لا تشيلين همها
امه"الله لا يحرمني منك يا الغالي ولا من ابوك واخوناك اخليك الحين
بدر"الله معاج يا الغاليه ...
معقول صار شفاف الكل يشوف حبه لها الكل يعرف العشق الي استعمر احساسه وشعوره معقول الحب يحولنا الى بشر واضحين وضوح الشمس بهذا الحب ما ينخفي يعلن عن نفسه في كل لحظه في خلجه من خلجات انفسنا عمره ما خطر في باله انه يحب ويتعذب بهذا الحب يارب رحمتك وكلت امري لك يارب ارحمني برحمتك وعفوك
\
\
\
\
\
"فتون فكيني والله ان قلبي ماغصني وما اني مصدقه ان بكره اليوم المصيري حاسه برعب ونفضه لو توشوفيني ما تصدقين
فتون"هههههههههه خلاص بس قوليلي وصل الفستان
شمايل"اي وصل مره حلوووووو تدرين اول ما شفته حسيت صج اني عروس وكني نسيت كل شي الا اني بداخلي فرحه مثلي مثل اي بنت تفرح بهذا اليوم الي تنطره عمر
فتون"احساس حلووووو صح استمتعي فيه وانسي كل شي
شمايل"والله مو مخرب علي هذا الاحساس غير اني راح اتواجه معاه يا ويلي
فتون"هههههههه الحين صار يا ويلي وانتي ناويه تتنتقمين و مدري شو يلا شدي الهمه هههههههههه
شمايل بعصبيه"تمقتين و انتي وجههج وانا في حال يعلم به رب العباد ولعت كبدي من نسوان اخواني الي كل شوي مسوين لي شي الا القناع هذا الحمام هذا الا حطي ذي ولا ذي لين خلاص صارت روحي في خشمي اشوي وبقوم لهم حسبي الله على ابليسهم البارح نتفونين لين قلت بس عذاب والله والحين اشوف الحناء الي في يدي اقول حق روحي تراه خلاص صار صج اقول فتون ما دامج على ارضنا تعالي عندي وش رايج ويا ليت تباتين عندي بعد ودي
فتون"لا والله هذي فيها قصاب رقاب بكره انا من صبح عندج في الفندق وبعدين انتي محتاجه راحه ونوم طويل
شمايل بغصه "من وين لي الراحه والي في القلب في القلب
فتون"بس يا قلبي ليه تسوين في نفسج كذا حرام عليج انتي تعذبين نفسج انسي على الاقل وخلي هذا اليوم يمر على خير واستانسي فيه
شمايل بتعب"الله كريم بحاول
فتون"اخليج الحين وتصبحين على خير
شمايل "وانتي من هله وفي حفظ الله
سكرت عن فتون وطلعت من غرفتها البيت هادي والكل نايم قررت تطلع برع الجو شوي حلووو اليوم ما قالت لهلها ان اليوم جاها طلب عشان تقدم اورقها وخاصه ان المنصب الي بيحطونها فيه الكل يحلم و يتمنى ان يوصله و هذا شي يقوي من مكانتها وخاصه انها اصغر شخص يتولى هذا المنصب وتخصصها مطلوب ونادر والماجستير فيه يقوي من منصبها العلمي بس كل هذا راح ينهدم مع هذا الزواج امسحت على وجهها بتعب اقعدت على المرجوحه الخارجيه وهي تطالع النجوم وعيونها سارحه في ذاك الضلام الي يطوي معاه لحظات من السحر و العبق الناعم من النسيم الي يحرك شعرها ويبعثر خصلاتهاعلى خدها منظر كان ساحر مثل لوحه سحريه شدت الشخص الي كان طالع من الخيمه الخارجيه شده الضل الي يتمرجح وصوت همسات ناعمه وانفاس رقيقه ما قدر يشوف الوجه بس الجسد اسحره خطوط ناعمه لشكل ناعم والنسيم حمله عبق عطر ناعم ماقدر يصد عينه تعلقت بهذي الصوره سمع صوت علي يناديه رجع داخل وهذا الخيال شده واجذبه يا ترى من ؟؟؟
على"وين رحت يارجال انادي عليك من ساعه وانت مطنش وين رحت يا المعرس الي ماخذه عقلك
راكان بهدوء"موجود وين بروح بس حبيت اطلع شوي امدد ارجولي تعبت من القعده اقول الوقت تأخر وانا لزم اروح بكره وراي اشغال كثيره يعني يمديني اريح اشوي
علي"خلاص بروح وياك اوصلك يلا مشينا
\
\
\
\
\ الاستعدادات كانت على قدم وساق في بيت ابو ثاني خاصه ان عرس الارجال في البيت وبعد ما يخلص العشى بيطلعون مسيره لين الفندق الي فيه العرس وشمايل احجزوا سويت كامل في الريتز كرلتون وهي والكل اهناك من صبح و البنات مسوين حشره من استشوار ومكياج وضحك وسوالف شمايل كانت مع فتون في غرفه ابروحهم ومعاهم خبيره الميكب ارفظت اي حد يشوفها لين تخلص اما في الصاله تحت كانت امها وام راكان في استقبال الاضيوف كانت الطولات مزينه بقات الورد الجوري الابيض و الوردي و مزينه بالدنتيل و الستان الابيض و الفضي والمنصه كانت مزينه بنفس الطريقه وفيها كرسين كانت ما تبي تقعد جنبه عشان كذا خلتها كرسين وبينهم باقه كبيره وفي وحده من الطولات كانت ام نايف وبناتها الثنتين ريف بها قهر واصل حده وتهز رجولها بعصبيه وعين الناس كانت عليها بستنكار شديد لبسها عاري وفاضح بشكل مقزز تفكر نفسها حلوه بس للئسف الشكل عمره ما كان هو المهم كثر ماكانت حشمه البنت واحترامها لذتها ولغيرها هم الاهم
\
\
\
\
\
"ما شاء الله وتبارك الخلاق فيما خلق بتجنيني مدام
التفت على رفيجتها وهي تطالعها بنظره فيها اختلاط المشاعر الخوف و الفرح و الحزن "ها وش رايج ؟؟؟
انربط السانها وهي تشوف رفيجتها بفستنها الابيض والي موشى بالوردي الفاتح مخصر على جسمها ونازل لين تحت مع الذيل والصدر كورسيه وبدون ذرعات والضهر كان عاري وفيه خيوط مربطه على شكل اكس اما شعرها كان عليه تاج مسويته مخصوص من الماس الي فيه ورد صغيره ورديه مع الفضي والشعر مرفوع و منزل منه خصل كيرلي على طرف الخد و مكيجها كان ناعم وردي وطلعها ناعمه وطرحتها على طول فستنها من الدانتيل الناعم و المطرز بالفضي والوردي الفاتح كانت ملاك
فتون"تسئلين ما يحتاج شوفي نفسج وانتي تعرفين ...قربتها من المرايه الطويله
شمايل كانت تشوف انسانه ثانيه انسانه عمرها ما شافتها اعيونها فيها لمعه غريبه عليها وعلى شفيفيها بسمه خفيفيه مع نفضه ناعمه تعد بمستقبل جميل وحلوووووو بس لو هي تعطيه الفرصه والوقت
شمايل بصوت مبحوح "نادوا مي !!!
وافتحو الباب ومشت بهدوء طالعه الصاله وعيون البنات عليها نجديه وخواتها و ومناير و الجازي ضلت واقفه جدامهم وهم يتمقلون بها كل وحدها تحبها وتلوي عليها ويسمون عليها وسط حوستهم هذي ادخلت عليهم امها الي اعيونها امتلت ادموع وهي تشوف بنتها بثوب العرس حلم كل ام في الدنيا تشوف بنتها الي ربتها وسقتها من حنانها وحبها مره وزوجه وفي يوم من الايام راح تصير ام ضمت بنتها لصدرها الي لمها بحب عمر وكانت تصيح ...نجديه"الله يهديج يومه الحين بيخترب مكياجها شوفيها بتبكي
امها وهي تبعدها عن حظنها"لا هذني ما اصيح مبروك يا قلب امج قريتو عليها اقرو عليها المعوذات قبل ما يجون اخوانها و انتو تغطو الاعيال واصلين عشان اختهم ..كانت تصد ماسكه نفسها وشمايل ولا نطقت كلمه طول هذا الوقت عينها على امها الي تتهرب من اعيونها تبي حد بس يطمن قلبها الي ينتفظ وسط اضلوعها صارخ يبي الحمايه يبي الامان من المجهول والقدر
بصوت مخنوق بالعبره "يومه ...مشت لين امها وهي تسحب فستنها وقربت منها وحبتها على راسها ويدها وارتمت في حضنها وعبرتها تذبحها
امها"لا تصيحين يا قلب امج بيخترب كل شي هذول اخوانج جاين يلا اجهزي ربي يوفقج و يرزقج بأذنه بالذريه الصالحه يارب ويسخره لج زوج و رفيق دب وابو لعيالج حطيه في عيونج وحافظي عليه ما وصيج وانا امج
نجديه"يومه ثاني والاعيال برع
امها"خليهم يدخلون يا بنات انزلو تحت يلا الجازي شوفي طريق حق البنات
الجازي بفستنهاالاصفر طالعه صج جميله "ان شاء الله يومه
ادخلو البنات من الصوب الثاني عشان يطلعون من الباب وادخلوا خوانها مساكين انعجبو في جمال اختهم كانت على طبيعتها مازادت ولا بالغت كنت جمال طاغي وحياء احمرت وهي تشوف اخونها قربو من امهم يحبونها ويباركون لهاسلمو عليها واحد ورا الثاني حست بحبهم الطاغي لها
ثاني وهو يلمها له "مبروك يا الغلا كله ما تعرفين وش كثر فرحتي اليوم ان بنتي الاصغيره واختي عروس واحلى عروس شافتها اعيوني
علي وهو يدزه "وخر بس انا اجل وش اقول قزحه هانم صارت شي فنتج الله يعين الرجال ان اشهد انه بيروح فيها اليوم ههههههه
ضمها له بحب كبير وحبها علة جبينها بحنان اكبر وهي اختنقت بعبرتها وحب العالم كله تشوفه في عيونهم وتشوف فخرهم بها وغلاتها عندهم وبصوت فيه من العبره المغصوصه بداخلها الكثير"الله يبارك فيكم ويخليكم لي يارب وين سلطان ما اشوفه
علي"ههههههههههه انتي عارفه اخوج يقول مب داش عند النسوان تراه تحت بيسلم عليج ويطلع ميت من المستحى
شمايل"ما يحتاي وانت ابد فاصخ الحياء عادي عندك
جات نجديع بعباتها ومعها طرحه ثانيه بس ثقيله عشان يغطونها بها عشان ما يشوفها حد ولن اخو المعرس بعد بيدخل معاه "ثاني امسكها انت من اليمين وعلى من اليسار وتحملو عشان الفستان
علي"ههههههههه هلا والله فيج يا ام سلمان مبروك على اخو ج الي مرتبش اهناك الفال لسلمان والجازي
نجديه"الله يبارك في عمرك الفال لك قريب يارب
علي"فال الله ولا فالج انا مرتاح كذا ولا صدعتكم الي ما تخلص
نجديه"هههههههههه زين الحين امشو وبعدين لنا كلام ثاني
امسكوهامن يدها ويسعدونها وطلعو على القاعه وصلت عند باب القاعه وشالو عنها الغطى وعدلو لها طرحتها ورتبو شكلها وذيل فستانها وعطوها بقتها كلها ورد جوري ابيض وردي ونزل منها سلاسل حريريه نازله على طول يدها طلعت في اخونها الي مشو رادين عرس الارجال شافت مرت عمها جات تبارك لها ضمتها بحب وباركت لهاوعلى الاغنيه محمدعبده
ادخلت انفتحت الابواب و تسلطت الاضواء عليها وكل العيون انصبت عليها وهي تمشي بنعومه والورد ينثروه في طريقها والعيون تسمي من جمالها ونعومتها ودلالها كانت تمشي وقلبها يرقع واشوي بيوصل لين حلقها من الروع والربكه وكل شي فيها يرجف حتى ابتسمتها كانت مهزوزه وفتون وراها تعدل لها ذيل فستانها وصلت لين المنصه وابتدت خطوتها لعالم المجهول عالم كانت ولا زالت تهرب منه بس صار امر واقع وصلت الكرسي واقعدت عليه وعيونها تحتري امها وكل الي تحبهم بخوف وكمل الرقص والفرح بس في هذي الحظات في قلوب كانت شايله الغل وقلوب شايله الحزن واقلوب خايفه من افراق الاحبه اعيونها على الي يجون يسلمون عليها ويباركون كان خاطرها تشرد كانت حاسه انها وسط الموج يتلطمها يمين ويسار وما هي قادره تشوف بر الامان تلاطمها كان عنيف وتاخف تغرق فيه
اسمعت صوت شافت فتون"شمايل وين رحتي وش فيج ؟؟
شمايل "ما فيني شي بس مرعوبه وخايفه
فتون بصوت واطي"خليج طبيعيه يعني وش بيصير كل خير بس انتي انسي واستانسي
شمايل"اقول فتون ناديلي نجديه ابيها شوي
فتون"اي وحده فيهم ؟؟
شمايل "هذيك الي احذا امي ولبسه بنفسجي
فتون "طيب بس انتي خليج ريلاكس
فتون راحت لهم وسلمت عليهم "السلام عليكم يومه مبروك عليكم منه المال ومنها الاعيال
ام شمايل"هلا يومه فتون الله يبارك في عمرج الفال لج يارب
فتون بحياء"في حياتج يارب شلوج يا ام سلمان مبروك عليكم
نجديه"الله يبارك فيج انتي فتون صح
فتون بحياء"اي... ام سلمان شمايل تبغيج شوي اذا ما عليج امر
نجديه "ان شاء الله تعالي نروح لها
مشو لين عندها "هلا عروسنا وش بغيتي فديت روحج
شمايل وتطالع فيهم اثنتين"تعرفتو على بعض زين قصرتو علي الطريق
نجديه هذي هي عروس ولد ج الي قلتلج عنها فتون هذي ام ريلج المستقبلي ما كنت اقولج يمكن انتي الي تصيرين عندنا ها وش رايكم
نجديه تطالع في فتون بأبتسامه حلوووووووه"وهذي يبيلها كلام يوم الاقي لولدي مثل فتون هذي الساعه المباركه
فتون انخرست والحياء كان ماليها وهي تطالع شمايل بعتاب تحطها في موقف محرج وفجئه اعلنو ان المعرس بيدخل وعلى الحريم انهم يتغطون شمايل حست ان قلبها وقف في مكانه صارت ما تشوف شي ولا تسمع شي و الرعب ماليها وراحو يجبون غطالها الي يبين بس منه اعيونها الي كانت على الباب الي انفتح وهي تشوف ابوها واخونها وعمها وبندر اعيونها انشدت له تعلقت فيه كانت على ثمه ابتسامه روعه وشكله كان قمه في الرجوله والروعه مدنع يسمع كلام الاعيال ورفع عينه على الي كانت مغطاة مشى معاهم واعيونه عليها قربو منهم من امه ومرت عمه واخته نجديه وقف احذاها واعيونه فيها لكن الي خلاه يوقف كنه حجر هو العطر الي شمه منها نفس العطر الي تنسمه مع ذاك اليل و النسمه معقول تكون هي ضلت اعيونه في اعيونها ويشوف فيها نظره غريبه متمرده جامحه وغاضبه