بسم الله الرحمن الرحيم
موضوعى باين من عنوانه هو نقاش حبيت افتحه معاكم واعرف رايكم فيه
تعالو ندردش شوية ونشوف
كل واحد مننا مر فى حياته بمواقف كتير واحاسيس مختلفة
كل واحد مننا قابل ناس وفارق ناس ناس حبهم وناس كرههم
ناس اتفق معاهم وناس اختلف معاهم
احيانا اكتشفنا اننا ظلمنا حد بدون قصد واحيانا جرحنا حد بيحبنا
واتمنينا الزمن يرجع بينا ونمنع الى حصل
مرت علينا عواطف كتيرة حبينا واتحبينا ممكن نكون اتمنينا الزمن يرجع ولا نحب ولا نتحب
واحيانا كمان ناس مننا محبوش فى حياتهم ولا اتحبوا
واتمنوا يرجع بيهم الزمن ويحبوا ويتحبوا
كتير اتحطينا فى مفترق طرق واترددنا وفى الاخر اخترنا
وبعد فترة فوجئنا ان اختيارنا كان غلط وان الفرصة الحقيقية ضاعت من بين ايدينا
احيانا بنتجاهل نصيحة من حد ونعمل عكسها
ويلف الزمن بينا ونضرب نفسنا 100 قلم ونقول ياريتنا خدنا بالنصيحة
كلنا بدون استثناء مرينا بكل الاحاسيس والمواقف دى
كلنا اكيد اتمنينا يرجع بينا الزمن ونغير حقيقة حصلت او تصرف طائش
وانا اولكم لو يرجع بيا الزمن هغير كتير بس الزمن مش بيرجع للاسف...
صحيح كل شىء نصيب وكل تصرفاتنا مكتوبة من قبل ما نتولد
بس هسالكم كده بينى وبينكم
لو الزمن رجع بيكم تانى ايه الى هتغيروه وايه التصرفات والقرارات الى هترجعوا تغيروها ؟؟؟؟
فى انتظار ردودكم