[Da3Do3]

البارت الثالث و العشرين***



.
.
.
.
.
**********

في الطيــــاره

جلست لميس جنب الشباك ورعد جنبها...

لميس ابتلشت في الحزام ماتعرف تسكره قبل كان رامي يسكره لها ....

التفت لرعد اللي ماعبرها ولاالتفت لها..شافته جالس ومسكرحزامه وماعطاها وجه..انقهرت منه وحاولت تسكره بنفسها ماقدرت..

رعدماكان يعرف إن لميس ماتعرف له ..التفت لها شافها متلعوزه فيه إبتسم وحب يقهرها وسفهها..

لميس ماقدرت عليه وتركته ..ماتبغى تطلب منه شئ..

حست فيه يفتح حزامه ويلف لها قرب منها وحبست انفاسها لماشافته قريب منها وريحة عطره وصلت لخياشيمها..

سكرحزامها وهويهمس:توني أعرف إنك بزر

رفع عيونه والتقت بعيونها لدقايق... لفت وجهها وهوأبعد عنها وسكر حزامه بصمت..

شدت إيديها بقوه وقلبها يدق لماحست بالطياره تقلع..

غمضت عيونها بخوف..تكره قلوع الطياره يخوفها..

فتحت عيونها لمااستقرت ..وتنفست بعمق ..التفت لرعد اللي فتح حزامه وعدل جلسته ومدإيده وفتح حزامها وهالمره ماناظرها..

سندت لميس راسها وهي تفكر بحياتها اللي بتنقلب أكثر من انقلابها هذا بعد ماصارت زوجته أو سجينته بالأصح..دمعت عيونها وغمضتها نزلت دمعتها ومسحتها..

رعد لاحظها وتنهد يعني بدينا بالدموع..

********

نزل فيصل من الدرج وهويدندن وشاف ريم معاها الجوال وشكلهاتوهامسكرته:شعندك

ريم :بروح لبيت عمي وقلت للسواق يجهزالسياره......إنت بتطلع

فيصل إبتسم داخله لماعرف إنهابتروح لأمل:أيوه بطلع....أنا بوصلك في طريقي ماله داعي تروحي مع السايق

ريم رفعت حواجبها باستغراب:غريبه إنت بتوصلني.

فيصل مشى طالع:بنتظرك بالسياره لاتتأخري

ناظرته بحيره وصعدت فوق بسرعه...

أزعجها كل شوي داق يستعجلها ماتدري ليه محترق يروح ويخليهاتروح مع السواق ويريح عمره...لبست بسرعه وسحبت شنطتها وعباتها ونزلت...

ركبت معصبه وسكرت الباب:اللحين إنت ليه ماتصبركان خليتني أروح مع السواق وارتحت

ماردعليها لأن جوالها رد وردت:هلا أمول...تمام ...أقول تراني جايه عندكم اللحين......(شهقت بقوه)إحلفــــــــي

فيصل:وجع قصري صوتك

سمعت صوته أمل وإرتعشت لماتذكرت اللي صاربينهم...

أشرت له ريم يسكت :احلفي ياربيه ماتزينت جايه لكم بكشتي....إيش أسوي فيصل ماخلاني آخذ راحتي....أيوه...طيب باي...

فيصل:شفيك

ريم فتحت شنطتها وطلعت كريم:عندهم ناس وأنا ماتزينت

فيصل ناظر شنطتها:لا ماشاءالله عليك جايبه العده كلها

ريم:فيصل لاتسرع علشان ماالخبط

خفف السرعه وريم رسمت كحلها ..

لفت لفيصل لماخلصت وقالت:ها فيصل حلو إلاشوي

فيصل وعينه ع الطريق:وأنا شدارني ماأعرف لكم

ريم:طيب شوف

التفت لها وناظره ورجع يناظرالطريق:زين

ريم:قول الصدق ولاتفشلني

فيصل:والله حلو وكثيربعد

طلعت البلاشر وحطت منه.وهي رافعه نقابها ومدخله يدها من تحته وفيصل يضحك عليها..

فيصل:إذا وصلتي كملي

ريم:أخاف أقابل أحد إذا دخلت

نزلت ريم لماوصلو:باي

ودخلت قابلتها أمل:هلا والله

فتحت نقابها بسرعه ولفت للمرايه تشوف شكلها وشهقت

أمل:شفيك

ريم طلعت الكحل من شنطتها تزيد كحلها:الدب فيصل يقول الكحل كثير

أمل ناظرتها باستغراب:إنتي متزينه بالسياره

ريم:أيوه

فسخت عباتها وعدلت شعرها ولبسها وتعطرت ودخلت مع أمل...

*******

دخلت للبيت وفسخت عباتها وعطتها الخدامه..مشت بتدخل شافت زياد قدامها..

إبتسمت وقربت منه:هلا زياد

عقد حواجبه بضيق وأبعد عنها:هلا

مسكت يده وسحبته:تعال أبغاك في موضوع

سحب إيده من إيدها بقل صبر:آسف مشغول لازم أرجع للمستشفى اللحين

ناظرته بدلع وقربت منه وعيونها مركزتهابعيونه:علشان خاطري بس دقيقه..وإلا أنا مالي خاطرعندك

دفهابعيد عنه وناظرها بغضب:إبعدي عني أحسن لك..موسكت عنك المره اللي فاتت يعني عاجبني الوضع..لا فإحترمي نفسك ..

مسكت ذراعه وقربت منه :أجل ليه جاي هنا...وإلا جاي علشانها ولاعطتك وجه..

فاردمه من وقاحتها ودفها عنه بقوه:قلتلك أبعــــدي و
إحترمــــي نفسك ..ولاتجيبي سيرتها ..هذي أنظف منك..مو كل الناس من طينه وحده...خلي عندك كرامه وإستحي ع وجهك...

مشى وهو يتأفف وطلع..

إنقهرت مرره وضربت أخماس بأسداس وهي تسب وتتوعد داخلها..ماكانت متوقعه إنه يرفضها بهالشكل متوقعه إنه يستسلم لهابسهوله مثل أخوه بس هذا قهرها وصممت أكثر تجيب راسه ومو اهو اللي يكلمها بهالطريقه ويقول عنها هالكلام وقارنها بوحده مثل تولين....

وماانتبهت للعيون اللي تراقبها من دخلت...

***************

في فرنســــا وبالتحديد باريــــس....

أول ماوصلوا كانت السياره تنتظرهم ركبوا واتجهوا لبيتهم اللي في باريس ..

فتح رعد الباب ودخلوا ..عجبها شكله مره ونظراتها تدور حولها..

طلعت من المطبخ المفتوح ع الصاله خدامه وشكلها فرنسيه وهي تبتسم..

بعد الترجمــــه

ماريا:مرحبا مسيو رعد

رعد:مرحبا ماريا كيف حالك..

ماريا:بخير تهانيا الحاره مسيو

رعد:شكرا لك

ماريا ناظرت لميس:يالهي زوجتك جميله جدا مسيو

رعد التفت للميس:هذه لميس

لميس مو فاهمه شئ ماتعرف تحكي فرنسي إلا بعض الكلمات فإكتفت بابتسامه..

ماريا:أهلا بك في باريس عزيزتي

لميس:شكرا

ماريا أخذت الشنط:تبدوان متعبين ..لمالا تأخذون قسطا من الراحه حتى أعد طعام العشاء..

شكرها رعد وصعد فوق ولحقته لميس..

وقفت بحيره لماشافت غرف كثيره ..

افتحت أقرب باب لها بتردد ودخلت ..حمدت ربها إن رعد موموجود فيها سكرت الباب وأخذ شاور سريع ولبست بيجامه ونامت كانت تعبانه مره وفيها النوم ومانتظرت لين تتعشى

رعد أخذ شاور ولبس بنطلون أسود وتي شيرت أبيض ونزل يتعشى وطلب من ماريا تاخذ إجازه ..هي استغربت وماقدرت تقول شئ..

**********

صحت من النوم وشافت الساعه تسعه صباحا..

قامت وصلت الفجر ولبست جلابيه ناعمه ولمت شعرها ذيل حصان..

نزلت تحت وهي تنادي ماريا دخلت للمطبخ مالقت أحد..

سمعت صوت رعد خلفها :أنا عطيت ماريا إجازه ..

فتحت عيونها شلون يعطيها إجازه لايكون يظن إني بطبخ له..

ناظرها رعد بسخريه:ماعتقد بنحتاجها وإنتي موجوده وإلا ماتعرفي تطبخي...أووه نسيت إنك كنتي خدامه قبل..

إنصدمت من حكيه ناظرته بصدمه واختفى من قدامها..

جلست ع كرسي المطبخ ودموعها تنزل..ليه .ليه يسوي فيها كذا ليه يجرحها إيش سوت له علشان يكرهها بهالشكل..

سمعت صوته برى في الصاله:هلا ريومه

مسحت دموعها وقربت من الباب وشافته جالس ومعطيها ظهره:تمام إنتوا كيفكم.....هههههه أوك أسفين آنسه ريم....أيوه.....لا لميس نايمه اللحين...عطيني أمي

حاكى أمه وسكرالجوال قام وشاف لميس واقفه وتطالعه بصدمه:ليه ماخليتني أحاكيها

رعد:كذا....وين الفطور

لميس انقهرت ومشت تصعد فوق:سوي فطورك بنفسك

كان بيلحقها بس جواله وقفه بصوته ..

لميس ماقدرت تكمل الدرج وجلست وضمت نفسها تبكي حرام مشتاقه لريم وتبغى تحاكيها وهذا يمنعها طيب ليه..

رعد:هلا سعود

سعود:هلا بالعريس

رعدجلس:هلا

سعود:شفيك

رعد بدون نفس:مافيني شئ

سعود:آفا هذا وإنت عريس

رعد:أي عريس إلا تعيس

سعود:ليه لايكون بعد بتعقدني من الزواج

رعد تنهد:يعني ماتدري

سعود بطولة بال:ياخي إنت شفيك ماتفهم معطيك محاضره كامله قبل تتزوج ومانفع فيك أوسمعت شئ حلو

رعد:أي حلو هذي يجي منهاشئ حلو

سعود:آفا بس هذي بنت عمك وإلانسيت

رعد:لا مانسيت

سعود:لايكون بعد السالفه هذيك ومادري إيش..تراك عارف نفسك

رعد تنهد:أيوه عارف

سعود:حاول يارعد تقرب منها أنا ماأقول تحبها ..

قاطعه رعد بانفعال:تبيني أحب وحده مثل هذي تخسي والله مابقى إلا هي

سعود عصب:لاأنت منهبل اليوم أقول مع السلامه ولاترفع ضغطي..

سكر الجوال بضيق وسند راسه ع ورى وغمض عيونه وأفكاره مختلطه وموقادريثبت ع شئ..

لميس سمعت اللي قاله وماصدقت إن رعدممكن يقول لواحد من أصحابه بشكوكه فيها ومعاملته السودا لها كيف وهي بنت عمه...

قامت ودخلت غرفتها ورمت نفسها ع السرير....

***********

دخلت للصاله وشافت أمها وأخوها جالسين

عبدالله:ها يمه شقلتي

دلال:بإيش

أم عبدالله:تعالي يادلال شوفي أخوك إيش يبغى

دلال:إيش

أم عبدالله:يبغاني أخطب له ريم بنت أختي

دلال:نعــــــــم
تبغى ريموه ماغيرها

عبدالله:أيوه أبيها عندك مانع

دلال:طبعا مالقيت غيرهالكريهه ووووع ع الأقل خذ رنا أحسن منها

عبدالله:لأنها صاحبتك تبغيني آخذها وبعدين أنا أحب ريم وأبيها...ها يمه

أم عبدالله:لا..

عبدالله:ليه يمه أنا أبيها

أم عبدالله:تبغاني أخذها وأخوها رافض أختك وتاركها

عبدالله:طيب وإذا..ماصارنصيب بينهم..تقطعين نصيبي علشانها

دلال:أيوه وريم بالذات مانبغاها

عبدالله بعصبيه:جــــب إنتي ماحد أخذ رايك إبلعي لسانك ولاتتدخلي....يمه بليز أنا أحبها وأبيها تكفين يمه كلمي خالتي علشان خاطري..

أم عبدالله:أنا شايله بخاطري عليها وماراح أحاكيها اللحين..

تأفف وطلع معصب...

دلال:من صدقك يمه بتخطبيها له

أم عبدالله:أخوك يبيها ومابي أكسر بخاطره..

دلال عصبت:هذا إذا اقبلوا فيه

************

نزلت تحت في الصاله ومالقت رعد فيها أكيد طالع كالعاده..

جلست عندالتلفزيون تتفرج وتقلب في القنوات..

سمعت الباب ينفتح وعرفت إن رعد وصل ماتحركت من مكانها وركزت نظراتها ع التلفزيون..

دخل رعد وشافها في الصاله..

فسخ جاكيته وحطه ع الكنب وجلس بعيد عنها وقال وهو يفتح أزارير قميصه:سوي العشا

لميس ونظراتها ع التلفزيون:أناموخدامه عندك

رعد :لاوالله..إيش حاجتك إنتي هنا قومي سوي العشا ولا يكثر

لميس بعناد:مارح أسوي

رعدصاك ع أسنانه:لاتخليني أعصب أكثرمن كذا وتندمي ع الساعه اللي عاندتي فيها..

خافت منه وقامت بعصبيه ودخلت للمطبخ سوت له معكرونه وحطتها في صحن وحطت عليها صلصه وحطتها عنده وراحت فوق..

لماسمعت صوت غرفته يتسكر نزلت تحت وتفاجأت إنه مالمس الأكل..انقهرت مخليهاتطبخ كذا
شالتها وحطتها في المطبخ ونظفته وطلعت للبلكونه اللي تطل ع ساحة الكونكورد وجلست تتفرج ع الناس..

تفكيرها راح لريم مشتاقه لها تبغى تحاكيها وحاسه إنهامخنوقه ووحيده تنهدت بضيق ....

**

كانت عايشه بسجن وحاسه بالوحده تعودت ع وجود ريم والبنات في حياتها..إشتاقت لهم..

كانت جالسه في البلكونه كعادتها..رعد يطلع من الصبح ويرجع الظهر ينام ويرجع يطلع لين الليل ومومعطيها وجه وإذا عطاها وجه صاريجرحها بالحكي..حتى الأكل ماتاكل نفسها منسده عن كل شئ..طول يومها عندالتلفزيون أوفي البلكونه تتفرج ع الناس..

لابسه بنطلون أسود وبلوزه هاي نك بيج وبالطو اسود مسكرته لأن الجو بارد ورافعه شعرها شنيون..جالسه ع الكرسي وتطالع الأرض سرحانه ..ضامه رجولها فوق الكرسي وتفكر بينفجر راسها من التفكير وحاسه بوحده فظيعه..تحس إنها مخنوقه من جلوسها لوحدها..موقادره تتحمل شعور الغربه والوحده اللي عايشتها..

نزلت دموعها ومسحتهم..شالت شباصتها من شعرها ونزل مثل الشلال بانسياب ع ظهرها..شعرها طال لنص ظهرها..

رمت الشباصه ع الأرض وصمت نفسها وشعرها غطى وجهها...

سمعت تنهيده ورفعت راسها وهي تبعد خصلات شعرها عن وجهها وتفاجأت برعد واقف ع باب البلكونه ويناظرها ....

*************

ريم بتروح عندالبندري ومبسوطه مره...لبست تنور بنيه مكسره بنفخه بسيطه وقصيره وعليها حزام ع الخصرأحمربعسلي خفيف وبدي ناعم أحمر فيه نقوش عسليه وجاكيت بني...مسويه شعرها كيرلي وحاطه فيه مشبك كريستال أحمرناعم..حطت ميك أب ناعم وأخذت شنطتها ونزلت تحت....

أخذها معه فيصل ولماوصلوا للبيت نزلت ريم...

وانفتح باب البيت وطلع منه بسام...ماعرفها لماشافها

ريم تنحت قدامه ..كان لابس بنطلون جينز أزرق وبلوزه سودا عليها جاكيت خفيف أسود مسكربسحاب لنص صدره وفيه من عند الكتفين طبعه زرقا ..

لمح سيارة فيصل وعرف إنها ريم ..رفع نظارته ع شعره وابتسم وابعد عن الباب

دخلت ريم بسرعه وبسام طلع لفيصل...

البندري رحبت فيها ودخلتها للمجلس:أخيرا شرفتي وزرتينا يادبه مشتاقه لك

ريم:ههههه عارفه إنك تحبيني

البندري بخبث:موبس أنا اللي أحبك فيه غيري

حمر وجهها وانحرجت وقالت بتصرف:وين خالتي

رفعت حواجبها:حلوه التصريفه...أمي اللحين جايه

دخلت أم بسام وسلمت ع ريم ..جلست معاهم شوي وراحت...

بعد السوالف أخذتها البندري معاها لغرفتها..

ريم:حلوه غرفتك مرره بنوتيه

البندري:كنت أبغى لونها أحمر بس بسام حطها بينك

ريم:حلو البينك مرره رايق

البندري بنص عين:أكيد حلو مو بسام اللي اختاره

ريم طنشتها ماتدري شفيها عليها اليوم:بشرى مو معاك بالغرفه

البندري:كانت معاي بس أخذت غرفة أختي لماتزوجت

قربت ريم من مكتب البندري وشافت كتب كثيره:تحبين تقرين

البندري:أيوه

أخذت ريم كتاب شعر وفتحته:تقرين أشعار

جلست البندري ع طرف السرير:لا هذا لبسام ناسيه عندي

ريم تبغى تسمع أكثرعنه:يقرا شعر

البندري:يمووت في الشعر
..تدرين أخوي رومنسي ياحظ زوجته فيه

عطتها ريم ظهرها وهي ترجع الكتاب وابتسمت

البندري:تقرين الشعر

ريم:مو كثير أنا أحب الرسم

البندري:واو يعني رسامه

ريم:ههههه يعني أحاول...مع إن فيصل محطمني

البندري:ماعليك منه..إنتي وريني رسوماتك

ريم:أخاف تتطنزين وأنا خلقه متحطمه

البندري:ههههه لاخلي عندك ثقه

ريم:أوك بتفنن لك هالأيام وعطيني رايك

البندري:أوك

ريم تناظرالكتب:إممم إنتي تحبي تقري أي كتاب

البندري:أحب القصص والروايات وخصوصا روايات شكسبير روعه

ريم:أيوه أخوي فيصل يحبها

البندري:عندي كثير وماأبغاها قريتها أكثرمن مره خذيها له
...بس بغرفة بسام

ريم:ليه

البندري:متهاوشه معاه واخذها...تعالي معاي

سحبتها معاها لغرفته ووقفت ريم:لا بندري تكفين فشله أدخل غرفته

البندري سحبتها:عادي إمشي بس

دخلت وهي متفشله ماتبي تدخل غرفته كذا...

كانت مرره ذوق لونها عسلي بأزرق بلمسه بنيه

ريحتها ريحة عطره القويه...ريم تجمدت مكانها وماتحركت

دورت البندري عن الكتب في مكتبه:وينها..أيوه لقيتها

ريم خايفه ومومرتاحه بوجودها بغرفة شاب:أنا بطلع

لفت بتطلع ع دخلت بسام لغرفته .....

**************