[جرح الذات]

× دانة في شقتها .. ليش ما جاء أكيد قرا الخاطرة ياربي معقولة عرف ومايبيني !! × دق جوال دانة .. يؤ ياربي ..مين !!
دانة " تبتسم " : هلا وغلا ..
مشاعل : يوووه وينك بعد ذيك المحادثة ولا اشوفك ولا شي ..
دانة : يوووه ياربي لاااا تتكلمين أستحي والله تبينني أصير جرئية على الماسنجر أحسن ,,
مشاعل " تضحك " : لالالا ما كلمتك على الموضوع ذا أكيد ما فيه جديد دامك ما رحتي لسدني ..
× دانة سكتت ..
مشاعل : وينك ؟
دانة : إيه معك .. كملي ..
مشاعل " تضحك " : تعالي تعالي عندك شي !!
دانة " بخوف " : مشمش أخاف تزعلين ..
مشاعل " تتنهد " : لا إله إلا الله مسوية شي أكييييد الله يآخذك حرام عليييييييييييييييك يامجنونة !!
دانة " دمعت عينها " : مشاعل الله يخليك لا تزعلين .. بقول لك ..
مشاعل : يالله قولي ترفعين الضغط مع اني داقه أبي رآيك بشي بس بتعكرين مزاجي ..
دانة " بهدوء وبخوف " : رحت لسدني وقربت من فيصل أكثر ..
مشاعل " عصبت " : ما تستحين ولاتعرفين الحلال من الحرام أنت .. اللي تسوينه حراام شيطان أنت بينهم والله العظيم حرام..
دانة "خافت " : أدري إنه حرام بس حبيته ولا أقدر أصبر عنه ..
مشاعل "بتتطنز": حبيته ولا أقدر أصبر عنه ..أقول أصلاً مكالمتي لك غلط بس أرفع ضغطي على وحدة ما تسمع الكلام أبد وأصلاً مجرد أنت بالغربة لحالك ولا معك محرم خطأ في خطأ ..وخاصة لك وأشكالك ..
×دانة ساكتة ولا تقدر ترد لأن كلام صديقتها صح .. !!
مشاعل "بهدوء ": على كل أنا داقة بآخذ رآيك بواحد متقدم لي بس دام تفكيرك كذا ومو عارفة مصلحة نفسك أكيد ماراح تعرفين مصلحتي أنا .. ويالله مع السلامة وانسيني ياقلبي لما تتعدلين لأن أهلي ما يبونني أصادق وحدة عقليتها كذا ..
دانة " بسرعة " : لحظة لحظة مشمش ..
مشاعل : نعم ..
دانة "ودمعتها فعينها ": وإذا أبعدت عنه ؟
مشاعل : تذكري إن عندك صديقة أو بالأصح أخت اسمها مشاعل ..
دانة "بكت " : مشاعل حسي فيني .. حرام عليك أنا مالي أحد أشكي له ..
مشاعل " بهدوء " : قولي لأمك ياقلبي والأم أصدق شخص معك ..؟؟ ليش ماتقولين لها .. أكييييد لأنك عارفة ايش راح تكون ردت فعلها ..
دانة "تتنهد" : صح ..
مشاعل : أما أنا صديقتك تبينني ألين معك وأصفق لك باللي قاعدة تسوينه ..
دانة : يااالله يا مشاعل .. أحبه طيب ,,
مشاعل "قاطعتها وبعصبية" : أقوووول يالله مع السلامة .. وانسيني لما تعقلين .. ×قفلت الخط
دانة " رمت الجوال على السرير .. ورمت بنفسها على السرير وتبكي .. ياااالله حتى مشاعل صديقتي ضدي !! أجل مين راح يآقف معي..

×في شقة خالد ..
خالد : روحي شوفيها ووانتبهي لها أبوها مأمني عليها .. الحين يصير لها شي وحنا ما ندري عنها ..
ليلى "تبتسم" : أنا مكلمتها ومافيها إلا العافية تبيني على طول عندها أنت ..؟
خالد : لا بس من يوم ما جينا من سدني وأنت ما شفتيها إلا مرة .. حرام ..والله
ليلى "تطالعه " : هي تدرس ومو فاضية لي .. وأنا مشغولة اكثر الوقت تنظيف وغسيل وطبخ وما معي وقت أبد ..
خالد "يتنهد": المهم لا تفشلينني انتبهي لها ..وبس ودقي عليها ..
ليلى "تقاطعه ": طيب طيب .. خلاص حفظت هالموال من يوم جينا وأنت انتبهي لها انتبهي لها !! أنا ما اهتميت فيني كذا ؟
خالد : هههههههههههه تغارين يعني ؟ لا لاتخافين علي، وحدة ويالله متحملها ..

×فيصل يدرس قبل يطلع للجامعة .. وهو يشرب الكافي × دق جواله ..
.. أهلين أهلين
أبو فيصل : هلا أبوي وشلونك ؟
فيصل "يبتسم " : تمام الله يطول بعمرك ..
أبو فيصل "يضحك ": مبروووك ماشاء الله .. الله يتمم لكم بخير يارب ..
فيصل "يضحك " : الله يبارك فيك والله ما توقعت ..
أبو فيصل : هههههههههه الله يوفقكم وهذي أمك تبيك ي أبوي والله يوفقك
فيصل : الله يسلمك عطني إياها ..
أم فيصل : هلا فيصل × بكت ..
فيصل "يضحك " :وش فيك يمه ؟
أم فيصل : والله إني فرحانة لك .. وتمنيتك عندي ..
فيصل "يضحك" : إن شاء الله قريب وأجي انبسطي وأشوى إن نورة جت بعد عشان ما نشيل هم هنا ..
أم فيصل : إي والله الحمد لله ولا تعب الطيران عليها .. وهي بأول الحمل ..
فيصل : الحمد لله والله يتمم ..
أم فيصل : زين يبه قلنا بنبارك لك .. تبي شي؟
فيصل : سلامتكم سلمي على أخواني كلهم ..
أم فيصل : إن شاء الله مع السلامة ..
فيصل : مع السلامة ..
× سكر فيصل الجوال ..يكلم نفسه .. كم يوم اجازاتي بين الترمين ؟.. إيه 15 يوم .. يعني باقي عليها شهر وشوي لا والله حوالي شهرين باقي بس حلو .. أروح أشوف نورة وأخليها تنبسط .. يالله مع إني بضغط على نفسي لكن ما عليه أتحمل.. أهم شي أشوفها وهي حامل "يتنهد " .. ووه بس بصير أبو ..

× دانة في شقتها طفاشة ومخلصة دارسة وما عندها جامعة اليوم .. وقاعدة تتصفح النت وما لها خلق .. × أخذت جوالها .. ودقت ..
ألو .. أهلين بابا ..
أبو دانة " وصوته متغير " : هلا يبه وشلونك ؟
دانة "مستغربة " : تمام بس وش فيه صوتك ؟
أبو دانة " يتنهد " : توني صاحي من النوم ..
دانة : بس اليوم عندك دوام ..؟
أبو دانة : إيه مارحت اليوم .. مالي خلق ..
دانة "مستغربة مرة": والله غريبة !! أنت تقول ما لي خلق لالالالا أكيد فيه شي طيب كم الساعة عندكم ؟
أبو دانة : وش فيك أنت !! قلت نايم .. الساااعة الحين 10 الصباح ..
دانة : طيب حتى لو ما عندك دوام تقوم بدري .. لا يصير فيكم شي ؟؟
أبو دانة : لا يايبه مافينا شي وش فيك أنت ؟؟ ماتبين أبوك يرتاح أبد ، تبينني على أشتغل ..
دانة "تضحك " : لالالا بالعكس بس استغربت وسوووري بابي ع الإزعاج .. والله ماأستحي صحيتك من النوم ..
أبو دانة : لا يايبه أنا ما أرتاح إلا إذا سمعت صوتك ..
دانة "والدمعة فعينها " : بابا اشتقت لك والله ..
أبو دانة " يتنهد " : وأنا يايبه بس لا تشيلين هم أهم شي تجين رافعة روسنا بشهادتك حبيبتي ..وأفتخر فيك بكل مكان ..
دانة : يارب الله يسمع منك أبي دعواتك يالغالي ..
أبو دانة : الله يوفقك ويسعدك يارب ..
دانة : يالله بابا سلم ع ماما وبوسي لي إياها ..
أبو دانة "يضحك " :إن شاء الله ..
دانة : مع السلامة ..
أبو دانة : مع السلامة ..
× سكرت دانة وسرحت .. ياااربي والله صوتي بابا مو طبيعي أكيد فيه شي !! وإلا على قولته ما داوم !! بس غريبة وشلون ما له خلق والله مو طبيعي !! ويعني أمي نايمة للحين معه ماني فاهمة شي ..

مرت الساعات خالية من كل شي يوم ممل على الجميع .. وخاصة فيصل واصل من الجامعة ماله خلق شي .. ولا له خلق حتى يآكل .. جلس بالصالة عند التلفزيون .. ويفكر . .أدق عليها وإلا لا ..بس أنا غبي قايل مكالمات دولية ..إيه صح .. × دق فيصل على نورة ..
فيصل : أهلين نورة ..
نورة : هلا وغلا ..
فيصل : كيفك إن شاء الله تمام ..
نورة : الحمد لله بخير ..
فيصل :وش فيك ؟
نورة "بهدوء" : مافيني شي بس مالي خلق ..
فيصل "يتنهد" : يووه كنت بقولك افتحي السكايب نسولف .. والله مشتااااق لك ..
نورة : لاااااا خلها بعدين مالي خلق ..
فيصل "استغرب من ردها " : تعالي وينك أنت ؟
نورة : بالبيت ويني يعني ؟
فيصل : طيب وش فيك ؟
نورة : طفشانة .. أمي رايحة لجيرننا وعبد الله نايم .. وضايق صدري..
فيصل : طيب افتحي السكايب نسولف وتنبسطين ..
نورة : فييييييصل اللاب توب بعيد وأنا جالسة عند التلفزيون أشوف سنوات الضياع ومالي خلق أسولف أبد صراحة ..
فيصل "عصب" : معقولة مو مشتاااقة ؟؟ يالله علييييييك ..؟؟
نورة " تتنهد " : لا إله إلا الله محمد رسول الله .. أقول شكلك تبي أحد تتهاوش معه .. أنا مالي خلقك ..
×فيصل عصب وسكر الجوال وهي تتكلم .. غبية ولا تعرف تتكلم بعد .. هذا وأنا داق بدلعها .. بس أنا أوريك .. طلع الدخان .. !!!!

× دانة مسترخية على السرير ومعها اللاب توب .. وتشوف مشاعل فيه بالماسنجر .. ومترددة تكلمها ..
مشاعل : أهلين دانة ..
دانة : أهلين ..
مشاعل : آسفة إني سكرت الجوال اليوم .. بس ما كان قصدي..
دانة : لالالا خلاص ..
مشاعل : دانة ابعدي عنه
دانة "تتنهد ": خلاص لاتكلميني عن الموضوع هذا مليت منه.. ودامك مو حاسة فيني مايهمك ..
مشاعل : السالفة مو كذا ياقلبي ..بس مجرد إنك آخذه راحتك مع الرجل هذا بحد ذاته شي يقهر لأنه حرام ..
دانة : يعني لو أتزوجه ماتقولين شي
مشاعل : ههههههههه وأنت على بالك بيتزوجك ؟ هو إذا فباله شي فهو راح يسوي اللي يبي ويرميك ..
دانة "عصبت" : خيييييييييييييييييييير أنت أكيد مو صاحية ما وصلت وأنا أبد مو قصدي كذا .. أنا حبيته والحب شي مو باليد
مشاعل : طيب هو قليل أدب إذا عطاك وجه وخان زوجته ..
دانة : أنا أفكر فيه هو ماعلي من زوجته ولا هامتني ..
مشاعل : ياااااحراااام عليك .. تخيلي وحدة تسوي معك نفس اللي تسوينه ..
دانة "معصبة" : وش سويت أنا ؟؟؟ بيدي أحب وبيدي أكره؟؟؟ .. هذا شي مو بيدي ,, وأنا بسوي المستحيل عشان أكسبه
مشاعل : الله يوفقك إذا عطاك وجه أصلاً ..
دانة : طيب تراني ما زعلت والله ولا راح أزعل عليك أبد ..
مشاعل: أنا آسفة .. وحقك علي بس شسوي شايلة همك أكثر مني ..!!
دانة : تعالي من اللي متقدم لك ..
مشاعل : واحد يقرب لنا بس من بعيد شوي ووافقت مبدئياً وإن شاء الله بوافق.. لأن وظيفته حلوة .. وسمعته بعد حلوة ..وأبوي عاجبه الولد مرة
دانة : يعني بتتزوجين ؟
مشاعل : إن شاء الله ادعي لي..
دانة : الله يوفقك يارب بس لا تسوين الزواج إلا إذا جيت ..
مشاعل: أكيييييييد إن شاء الله ..يالله بطلع أنا ..
دانة : أوكي مع السلامة
مشاعل: مع السلامة

× في بيت فيصل .. الوقت بدري على النوم .. دق فيصل على خالد .. لأنه يبي يسولف مع أحد
خالد : هلا فيصل ..
فيصل : فاضي ..؟
خالد : إيه مره فاضي .. تبي شي ..
فيصل : تعال عندي نسولف والله فاضي مرة وضايق صدري ..
خالد : خلاص مسافة الطريق ..

× نورة وعبد الله بغرفة نورة ..
عبد الله : حلوووو طيب سألوا عنهم ..
نورة : تقول خالتي ناس يجننون وبناتهم يجننون بعد ..
عبد الله : يالله الله يوفق قولي لأمي خليها تدق عليهم وأروح أشوفها ..
نورة "تضحك " : مستعجل ؟
عبد الله : إي والله ودي أعرس ..
نورة : ههههههه الله يوفقك خلاص أقول لأمي تدق عليهم بكرا ..والله يوفقك يارب تعجبك ..
عبد الله : أكيد إن شاء الله بتعجبني .. طيب أبي الصغيرة ..
نورة : لااااااااا أبي وحدة قريبة من عمري لأن بصير مرة معها وخر بس وبعدين الكبيرة أحلى ..
عبد الله : هههههه حلللللوة هذي .. أنا اللي بتزوج وإلا أنت ؟
نورة : لا يعني لا .. بتتزوج الكبيرة وغير الكلام هذا ما عندي ..
عبد الله : يالله الله يوفق ولعيونك كل شي يهون ..
نورة "تبتسم " : ياحبي لك الله يخليك لي..

× فيصل وخالد في الصالة ..
فيصل : اعذرني على القهوة عاد عارفني بس زين طلع معي شي ..
خالد : لا بالعكس والله شي قهوتك الله يعافيك يارب ..
فيصل : قسم بالله مليييت ودي أرجع للسعودية .. ودي أستقر خلاص ..
خالد : الله يعين والله الغربة تبي ..
فيصل "يتنهد" : يمكن أنت مبسوط مع زوجتك ؟ أنا اللي حتى لو رحت السعودية قدامي قلق وتعب وقرف ونكد ..
خالد " يطالعه " : أوف أوف كل هذا بالسعودية لالالا وسع صدرك وادع ربك يوفقك ويسخرلك زوجتك ..
فيصل " يتنهد" : إيه .. وقبل قلت لك عنها وقلت لي اصبر .. ياخي صبرت وحملت والله يعين ..
خالد "مستغرب " : حامل ؟
فيصل : والله إني فرحت وانبسطت بس إذا فكرت ما راح أستمر معها وحرام أجيب منها ولد ..
خالد : طيب سويت اللي قلت لك معها ؟
فيصل "بسرعة" : سويت كل شي قلت دلعها دلعتها ماباقي إلا أجيب نجوم السماء لها .. قلت سفرها غير جو اطلع فيها سويت كل شي .. أبعدنا عن بعض نبي نشتاق أكلمها تقول مالي خلق ودي أفهم من ايش مخلوقة هالبنت ..!!
خالد : قل لا إله إلا الله .. ودامها حامل عذرها معها أذكر قبل أتزوج أمي تقول إذا حملت زوجتك تحملها لأنها تتعب مرة ..
فيصل : يااااااااليتها حامل من أول ما تزوجتها عشان أحطه عذر !! ياخي مليت حتى وهي بعيدة ماني مرتاح .. ×طلع الدخان
خالد "يطالعه " : أنت ماتبي تصبر .. اصبر وبعدين حرام عليك تحكم من مكالمة ..
فيصل "يقاطعه " : شف خالد أنا بروح للسعودية أسبوعين إن شاء الله عشانها .. لأني أكذب إن قلت ما لها مكانة فقلبي .. بس والله والله إن شفت شي ما عجبني بأدبها ..
خالد "عصب" : ليش تحلف طيب .. ياخي حرام عليك ..
فيصل "بعصبية " : زهقتني ..
×سكت خالد .. وسكتوا شوي كلهم ,,
فيصل : والله العظيم ما كان المفروض أقول لك وأدري إنه خطأ .. بس إذا قلت لأمي بتزعل وتشيل بخاطرها لأنها هي اختارتها ..ولمين أقول ,, أنت عارفني وعادك مثل أخوي ..
خالد "يبتسم " : وش دعوى أخوك أنا .. وقبل استراليا وأنا وياك مثل الأخوان .. بس ماكتب ربي يتعرفون ليلى ونورة إلا هنا ..
فيصل "بهدوء" : مادري يمكن تسرعت وعصبت على نورة .. لكن فيني قهر منها لي سنة وشوي يمر علينا أسبوع حلوين وشهر متزاعلين وهذي حالتنا .. دلعتها بالغربة دلع ما تحلم فيه ولا بنت والله ولا كأني أسوي لها شي ,, ولااااا حملت وبيجي ولد يااااسلام والله ماراح تهتم فيني أبد و والله ما تحملتها إلا عشان أمي وإلا كان مطلقها من أول شهر تزوجنا فيه لأنه ا نكدية ودايم مالها خلق شي..
خالد :تعوذ من ابليس .. وشف دق عليها بعد شوي إذا جيت تنام وخلك عادي ..
فيصل "يضحك باستهزاء " : ههههههه والله العظيم أتخيلها قدامي الحين وصاك الجوال بوجهها وجايه ولا على بالها ولا كأنها مسوية شي .. أدري فيها إنسانة غبية ..تلقاها الحين مبسوطة وتضحك ولا أحد صاك الجوال بوجهها ,,
خالد "يبتسم ": يالله .. الله يعينك ..

× نورة وعبد الله يسولفون ,,
نورة : ههههههههههههههه الله يآخذ ابليسك .. احلف إنك سويت كذا ..
عبد الله : والله ما همني أحد .. مع إن المدير بالبنك ما يطيقني بس أسوي حركات وأسوي نفسي غبي ..
نورة "تطالعه " : أريح لك .. طنش ولا عليك من أحد وتعيش حياتك .. هههههههه
عبد الله : لا وأعطيه من الكلمات الطيبة اللي تحرجه والله اخليه ينحرج ..
نورة : هههههههههههههه ياربي منك ما عقلت .. أنت ..
× دخلت أم عبد الله عليهم ..
عبد الله "وقف " : هاه بشري ..
أم عبد الله : تقول نسأل عن الولد ونرد لكم ..
نورة "تبتسم ": خليهم يسألون مافيه مثله ..
عبد الله : طيب متى أشوفها ؟
أم عبد الله "عصبت " : الحين خلصنا من متى أتزوج بدينا متى أشوفها .. اصبر خلهم يردون ..
عبد الله : طيب وش اسم زوجتي ؟
نورة : هههههههههههههههههههههه على طول زوجته ..
أم عبد الله "تطالعه " : ياربي لك الحمد والشكر ..
عبد الله : وش فيكم واثق إنها بتوافق طيب ..؟ وش اسمها تكفين يمه ..
أم عبد الله : اسمها يا طويل العمر سارة ..
عبد الله "مستغرب " : والله ؟
أم عبد الله : وش دعوى أكذب عليك ..
عبد الله : والله ما توقعت اسم مرتي كذا ..
نورة : هههههههه صاحي أنت ؟
أم عبد الله :ههههههه خليه على راحته ..

×فيصل مسترخي على السرير معاه الرواية اللي كانت جنبه .. وفتح الرواية وطلع الخاطرة يقراها .. ×تنهد فيصل .. والله شي غريب طيب لو صرت أنا وشلون حبتني بسرعة !! معقولة !!×دق جوال فيصل ..
فيصل : نعم ..
نورة "بهدوء" : أهلين فيصل ..
فيصل "بنفس شينه " : نعم وش تبين بسرعة ..
نورة "مستغربة " : المشكلة أنت الغلطان !! وأنت اللي سكرت بوجهي ومع ذلك أرجع وأدق عليك يعني في النهاية أنا اللي لازم أعتذر ..
فيصل "بهدوء ومن جواه معصب " : طيب وش تبين دامي أنا الغلطان أحد قال لك دقي اعتذري ..
نورة : ما دقيت أعتذر أصلاً داقه بس أحسسك بخطأك ..
فيصل"يقاطعها": يعني تبينني أعتذر ..عجيب والله تدقين تبينني أعتذر ..!! ههههههه
نورة "عصبت": من الأساس أنت غلطان مهما كان ما تسكر الجوال بوجهي ..
فيصل "بعصبية": استرجعي المكالمة برآسك وتعرفين من الغلطان ,,
نورة "مستغربة ومعصبه " : يعني أنا الغلطانة !! قلت لك بصراحة مالي خلق .. يعني تبيني أسولف معك وأنا مالي خلق ..
فيصل : مهما كان أنا زوجك .. ولا أسمح لك تتعاملين معاي كذا .. وإذا داقه براسك مشكلة أنا والله تعبان ومالي خلق ناس متخلفين..
نورة "بعصبية" : طيب طيب .. شوف لا تدق علي إلا إذا بتعتذر......
× قطع كلامها وسكر الجوال بوجهها ورماه عا لأرض ومعصب مرررة منها .. ياااالله على هالمريضة هذي ..!!
×فيصل تأخر ما نام مايدري وش يسوي مع نورة ..!! حيرته ويفكر فيها لأنها عكرت مزاجه .. وقرر يرسل لها مسج قام وجاب الجوال وكتب لها الكلمات ..
اسقني حب ..
أو اسقني فرقى ..
إن صبرت أشقى .. أو هجرت أشقى !!
اختر الحل الصعب ..
ياتفارق يا تحب !!

× نورة كانت جالسة بالصالة مع أمها .. وانصدمت من المسج !!
أم عبد الله : وش فيه المسج اللي قريتيه ؟
نورة "تبتسم " : مافيه شي بس كلمات حلوة ..
أم عبد الله : الشعر الحين مو مثل شعر من أول ..
نورة "تطالعها وبالها مع فيصل ": إيه شعر من أول ألغاز ..وشعرنا الحين يخوف .. !!
× قامت نورة ..
أم عبد الله : وين قمتي ..؟
نورة " وهي تمشي " : شوي يمه بروح لغرفتي بجيب شي ..

× دخلت نورة غرفتها .. وقفلت الباب .. ودقت على فيصل .. عادت الإتصال أكثر من مرة بس مايرد لأنه حطه صامت ونام .. ولا يبي نورة ترد ولا يبيها تدق !!!! يااااربي وش فيه والله إني خبلة نورة خافت .. وصارت مو على بعضها أبد .. بالها مشغول مرة مع فيصل .. ليه أرسل المسج وش يبي مني هو الغلطان .. ×طاحت دموعها .. ياااربي وش يبي هذا مريض والله مريض .. ماني قادرة أفهمه أبد .. ماني قادرة أغير شخصيتي على حسب مزاجه .. والله صعب ذا الإنسان ..

× أم عبد الله تطق باب الغرفة ..
× فتحت نورة الباب وهي تمسح دموعها ..
أم عبد الله " استغربت " : وش فيك يمه ؟
نورة "جلست على طرف السرير " : يمه ياليتني ما خليت فيصل ..
أم عبد الله "تتنهد": ليش وش طرا عليك ؟
نورة "طاحت دموعها": حنا أبعدنا عشان نتفاهم أكثر .. بس شكلنا ماراح نتفاهم ..
أم عبد الله "استغربت" : بس أنتم قلتوا غير الكلام هذا .. يمه فيكم شي؟
نورة "بكت " : يمه فيصل صعب .. فيصل مزاجي ماني قادرة أفهمه ..
أم عبد الله "تتنهد " : والله من يوم جيتي وأنا حاطه يدي على قلبي عارفة إن بينكم شي .. يايمه المفروض تفاهمتوا هناك دام بينكم مشكلة ما يصلح تفترقون ..
نورة " تبكي " : يمه أنا حبيته بس ماقدرت أسعده ماقدرت ,, وهو صعب والله العظيم صعب .. له ألف مزاج ..
أم عبد الله "تتنهد": والله يايمه الرجال كلهم صعبين وماتحملتي ماراح تعيشين و الله يعين على الأيام الجاية ..

×صحى فيصل وصلى الفجر ورجع ينام ع الساعة 6 وركب المنبه ع الساعة 9 عشان بيطلع يمشي .. أما دانة صحت صلت الفجر ولا رجعت تنام لأنها نايمة بدري .. وحبت تطلع تدور وتغير جوها الممل ومتردده تروح الشاطئ وإلا ..!!

×نورة تحس بضيقة الصدر ولا قادرة ترتاح ندمت لأنها دقت على فيصل .. وراحت لغرفة عبد الله وحبت تقول لأخوها السالفة ..
عبد الله : والله يا نورة دق عليك فيصل ويبي يسولف معك مهما كان ما تقولين له كذا أبد .. أنا لو تقول لي سارة كذا والله والله لا أخليها متساوية مع الأرض ,,
نورة " تبتسم ومالها خلق " : طيب وش أسوي الحين ؟ هو زعلان.. وما رد علي ..
عبد الله : فيصل طيب يرجع يدق عليك وقولي ما قال عبود ..
نورة : أحس إني كثييير ما أعرف أتصرف
عبد الله "يقاطعها": بإختصار قليلة دبرة على قولتهم ..
نورة "تبتسم " : تقريباً وخاصة مع فيصل ..
عبد الله "مستغرب من نورة " : بعد أنت فكري قبل تسوين شي أنت مو وحدة صغيرة ما تعرف تصرف نفسها ..
نورة "تتنهد": ما أعرف !!
عبد الله : هههههههههههه حلوة ما أعرف ..
نورة "تطالعه " : ياربي ليش تضحك ..
عبد الله "يبتسم " : شوفي وأنا أخوك تبينني أدق على فيصل؟ وأساعدك لكن إذا ما تدخلت أنا وحليتيها بطريقتك أفضل ..
نورة "تتنهد " : لالا أنا أحلها إن شاء الله .. يالله بروح أنام الساعة 1 والله سهرت ..
عبد الله : ياعيني سهرانة 1 أنا اللي أعوذ بالله حوست نوم مو طبيعية ..
× نورة وهي تمشي طالعة .. الله يعينك .. يالله تصبح على خير ..
عبد الله : تلقين خير .. نامي زين وارتاحي ولا تشيلين هم ..
نورة : الله يسهل .. × طلعت ..

× نورة راحت و ساعة وهي مو قادرة تنام .. والله أخاف بعد ما تعلقت فيك تطير مني .. بنجن والله .. أنا غبية ما عرفت أتصرف .. × جت فبالها فكرة .. أرسل مسج .. أكييد راح يقراه بس المكالمة مو على كل حال يرد ..
أشكي عليك الحال ياعارف الحال ..
ولو مابيدك شي يكفي لك أشكي ,,
يكفي تروح بكلمتك ضيقت البال ..
ويكفي تحس بضيقتي دون ما أحكي ..
لو شفت في عمري همومٍ وغربال ..
فيك الحنان بصادق الحب يحكي ..
دنيا مشاكلها .. على كل موال ..
وكلٍ على همه من الوقت يشكي ,,

× نورة انتظرت رد فيصل ولكن ما رد .. للأسف ..

× فيصل توه صاحي .. من النوم دخل الحمام وطلع .. أخذ جواله .. وفتح المسج .. قراه .. " تنهد .. يااالله يا نورة .. والله كسرتي خاطري .. جلس على طرف السرير يقراه ألف مرة .. !! سرح فيصل مع نورة اللي راحمها .. يارب تساعدني .. يارب تصلح بيننا .. فيصل مو قادر يدق عليها .. لأنها كاسرة خاطرة .. حب يرسل لها مسج ..

تزعل وأنا لك موووت ولهان ..
ماكني محبوبك أو أعنيك ..
ترضى أعيش العمر حيران ؟
وأنا اللي راحة قلبي بيديك ..
لك في الغلا شيدت بنيان ..
لك صاحبٍ دايم يداريك ..
ياسلوتي عن كل من كان ..
لا تفتكر في يوم ناسيك ..
خذ صادق الإحساس برهان ..
ما يقبل مساوم وتشكيك ..
لأنك على الفؤاد سلطان ..

× صحت نورة على صوت المسج .. وعرفت إنه من فيصل افتحت المسج .. وهي فيها نوم مرره .. قرت المسج .. وصحت .. ياااالله تجنن فديتت قلبك أنا .. نورة دقت على فيصل ..
نورة "بهدوء" : ألو ..
فيصل "صوته توه صاحي من النوم "" : أهلين..
نورة : رضيت ؟
فيصل "يتنهد " : أكيد راح أرضى ..
نورة " وصوتها مبحوح من النوم " : فيصل آسفة ..
فيصل : خلاص رضيت ..
نورة "طاحت دمعتها " : والله أحبك .. ومشتاقة لك ..
فيصل : مشكورة .. باين شوقي أصلاً ..
نورة " تتنهد": ما رضيت ؟
فيصل : لا رضيت ..يالله بطلع بسرعة اخلصي ..
نورة "تمسح دمعتها " : طيب مع السلامة ما أعطلك عن طلعتك ..
فيصل : صحيتك من النوم سو سوري .. بس تصبحين على خير ..
نورة : تلقى خير مع السلامة ..

× قفلت نورة وبالها مع فيصل .. وباين المسج ما طلع من قلب .. لأنه شايل بخاطره عليها .. نورة مسحت دموعها ورجعت نامت ..

× فيصل طلع يمشي على الشاطئ .. رجع للشاطئ لأنه ما ارتاح بالمكان اللي راح له قبل ..

× دانة تشرب كافي على الشاطئ .. طالعت فيصل وهو يمشي .. وحاولت تصد عنه ماتبي تشوفه .. لأنها عرفت إن كلام مشاعل صديقتها صح .. بس شسوي وين أروح .. هذا مكان عام .. إيه إذا جاء فيصل قلت له ما أبيك تجلس معي !!!!

مرت ساعة وفيصل يمشي .. جت في باله خاطرة دانة أكثر من مرة .. بس ما حب يروح لمكانها خايف يحرجها ..

× دانة "وقفت " بتمشي .. طالعها فيصل من بعيد وابتسم .. ابتسمت له دانة ومشت وهي معطيته وجهها يعني (مقبله على فيصل) .. فيصل شاف إنها ما اهتمت ولا تطالعه .. شك إنه فيه شي .. إيه أكيد عشان الرواية .. لحقها فيصل . دانة دانة ..
دانة "رفعت رآسها وابتسمت " : أهلين فيصل ..
فيصل "يبتسم " : صباح الخير ..
دانة : صباح النور ..
فيصل : روايتك ؟
دانة "ارتبكت ": وش فيها ؟
فيصل "يبتسم " : صراحة مافتحتها ولا قريتها شكلي أخذتها كذا بس ..لذلك بجيبها لك بكرا ..
دانة "حست بالتحطيم جواها لأنها حاطة امل إنه قاري الخاطرة " : اوكي ..
فيصل "يطالعها " : فيه شي ؟
دانة "مستغربة " : لا مافيه شي .. بس خلاص إذا تبي تجيب الرواية جبها ..مافيه مشكلة ..
فيصل "يطالعها " : لالالا أضحك عليك قريت شوي منها وبكملها ..وقريت الخاطرة صراحة رووووعة ..
دانة "ارتبكت وحست إنها خلاص بتموت من الحياء ووجهها صار أحمر " : طيب بروح أنا مستعجلة أشوفك × مشت دانة وهي مو على بعضها ..
فيصل " يضحك " : لااااااااا والله البنت مو طبيعية !! هههههههههه

× دانة تكلم نفسها .. يااااااااااربي ياليتني ما عطيته الرواية .. وياليتني ما شفته وش سويت أنا !!

×دانة تمنت إن الأرض تنشق وتبلعها ولا صار لها الموقف هذا .. ولا توقعت تكون ردت فعلها كذا ..بينت كل مشاعرها .. وفيصل فهمها ..!!!
فيصل "واقف مكانه ولاصدق باللي صار.. يتنهد " : والله هذا الوجه اللي يفتح النفس على هالصبح .. أنا مادري وشوله أدخل البيت .. وأنكد على نفسي ..× فيصل يفكر باللي صار له مع دانة ؟؟؟؟

× دخلت دانة شقتها .. وهي ترتجف .. رمت أغراضها على السرير .. ورمت بنفسها ومبسوطة .. أخيييييييييييييييييييراً .. الحين ارتحت.. × دق جوالها .. تسمعه .. ماااااراح أرد ما أبي أحد .. خلوني بفيصل وبس .. لكن انتبهي يا دندونة امسكي نفسك .. وشي اسمه شاطئ انسيه ..