في نفس اليوم والوقت كانوا اهل زوجها مسوين عزيمة كبيرة بمناسبة رجعت ولدهم من السفر ،،، كان في رحلة علاج بسبب حادث سيارة ...كل اهلهم وقرايبهم حاضرين هالعزيمة .. والمجالس مليانة حريم كبار وبنات ومن كل نوع ...!!
لمياء بحكم انها مرت ولدهم الكبير وبما أن خالتها ام زوجها ماعندها بنات ؟؟ ولاعندها حريم عيال الا لمياء وسمية اللي جاية من السفر مع زوجها .. اضطرت لمياء انها تقوم تقريبا بكل العزيمة .. جهزت لها كل شي .. واستعدت لها من فترة أسبوع ...
واليوم كانت مشمرة عن ساعديها في البيت وتسوي كل المهام المتطلبة في عزيمة مثل كذا ... كانوا بنات خالة فهد وبنات عمومته يساعدونها وماتركوها .. لكن القسط الأكبر من الشغل والترتيب كان على عاتقها هي ...!!
في نفس الوقت كانت تحس بالفرحة والإنشراح لسبب بسيط وهو رجعة سلفتها بالسلامة .. واللي بتسكن مع ام فهد بنفس البيت يعني اذا جت تزورهم بتلقى أحد على الأقل يرادها الصوت غير خالتها ....!!
دخلت عليها سمية المطبخ شايلة ولدها الصغير بيدها ::/ يا حياتي يا لمياء تعبناك اليوم ؟؟؟
التفتت عليها لمياء وبيدها الفناجيل ::/ وش دعوى سمية .. اهم شي انكم رجعتوا بالسلامة والباقي يهون ...!!
قربت سمية لها تساعدها ::/ إلا وين مهند ما أشوفه ؟؟
لمياء ::/ تلاقينه يلعب برا و الا عند ابوه ؟؟؟
مسكت سمية يد لمياء ::/ طيب خلي من يدك وقولي للخدامة تسوي عنك .. وتعالي نتقهوى معهم شاهي ونسولف ... اشتقت لجلساتك بصراحة ...!!
ابتسمت لها لمياء ::/ يالله مشينا ..!
طلعوا الثنتين من المطبخ الخارجي ومشوا للبيت .. كانت سمية تلعب مع ولدها اللي كان بين يديها . وهو ميت من الضحك على حركات امه ..
ابتسمت لهم لمياء وسألتها ::/ كم عمره الحين ؟؟
سمية ::/ سنة ونص ..!!
سادت لحظة صمت شوي قبل لاتسأل سمية بخجل ::/ وانتي ما كتب لك الله شي ؟؟
التفتت لها لمياء بحزن ::/ لا والله الى الآن وانا أعالج ...!!
سمية ::/ إن شاء الله ربي بيكرمك ..!!
لمياء ::/ الله كريم ...!!
دخلوا للمجلس وشافوا مهند قاعد جنب جدته ويشرب معها شاهي ويآكل من المكسرات .. نادتها خالتها ::/ لمياء ...!! تعالي خذي عنه الصحن لا يغص ؟؟؟
قربت لمياء لولدها ::/ إن شاء الله ..
مسكت مهند مع يده لكن ما رضى يتحرك وبدء يصيح ويبي يقعد يآكل ... رحمته لمياء وماهان عليها تكسر خاطره .. جلست عنده ومسكت الصحن وبدت تكسر له الفستق والفصفص ... وسمية تناظرها مبتسمة وكأنها راحمتها دعت لها من قلبها ان الله ييسر امرها ويرزقها الذرية الصالحة لأنها تستاهل كل خير ...
صحت من تفكيرها لما شافت لمياء تضرب في ظهر مهند .. والولد وجهه ازرق ومو قادر يآخذ نفس ... نقزت من مكانها وحاولت تطلع القشرة اللي نشبت بحلقه .. والحمدلله جت سليمة وطلعت قشرة الفستق اللي كلها مهند على باله انها حبة فستق مقشرة ..
تنهدت لمياء وهي تحضن ولدها بخوف .. اول مرة حست أنها ممكن تفقده ويضيع من يدها ...!
تنهدت ام فهد وانفعلت على لمياء قدام المجلس كله ::/ قايلت لك انا من البداية ابعدي عنه الصحن لكن انتي سفهتيني وكأني ما احكي ...؟ الحين هذا حيلة ولدي بعد تبينه يروح ؟؟؟ ويقعد ولدي بلا ضنى ؟؟؟
ارتخت قبضة لمياء على ولدها من الصدمة .. ومن كلام خالتها الجارح واللي جرحها قدام الحضور كلهم ... وكأنها تقول ما منك فايدة ؟؟؟ وماراح تقدرين في يوم تحققين حلم فهد ؟؟؟
قامت ام فهد من مكانها وراحت لمهند تحضنه ... لكن سمية ماسكتت لما شافت وجه لمياء المنصدم ::/ وش دعوى يا خالة ولدها وولده .. يخافون عليه أكثر من أرواحهم ؟؟
ام فهد باعتراض ودمعتها متجمدة على طرف عينها ::/ بس فهد غير لو يروح مهند يمكن هو يلحقه ...؟؟
بلعت لمياء تجريح خالتها وانربط لسانها عن الرد والكلام .. تفاجأت وماتوقعت ان خالتها ممكن تقول لها هالكلام بوجهها ؟؟ يعني وشلون هي ماعندها إحساس الأمومة اللي يسمح لها تخاف على ولدها ؟؟؟
طلعت وما خذت مهند معها لأنها مو حاسة أصلا بنفسها .. كل اللي نفسها فيه الحين انها ترمي روحها على السرير وتصيح وتطلع كل اللي بقلبها ؟؟ ليه العالم ماتحس بشعوري ؟؟ ليه كلهم يرمون علي كلام قبل لايحسبون حسابه ؟؟ يعني أنا مو بنت وأم تتمنى يكون عندها عيال ؟؟ يعني معقولة ما احب فهد ولا أحب يكون بيننا عيال وبنات يحملون اسمنا ؟؟؟ والا هالناس كل همهم الكلام وبس وما يهتمون اذا كان يجرحني في الصميم والا لا ؟؟؟
راحت للصالة وطلعت جوالها من الشنطة وهي خلاص وصلت لمرحلة ما عاد تقدر تمسك دموعها وتمنعها تنزل؟؟؟
-
مشت هي وسارة بروحهم في الممر اللي يودي للساحة الخارجية مقر العشاء ...!!
كانت سرحانة وبالها مو معها ؟؟؟ صدمتها الحركة اللي سواها ؟؟؟((( معقولة يهدي سحر وأنا لا ؟؟؟ ليش ؟؟يعني هي علشانها احسن مني وعندها مال وحلال أهدى لها طقم ألماس واحنا جابوا لنا معهم كيك وخرابيط وقالوا هذا احتفال بنجاحكم ؟؟؟ هه والا احنا مو قدالمقام وخسارة علينا مثل هالهدايا...؟)) قفلت معها خلاص ودها تصيح وودها تكلم احد بهالموضوع .. بس اكيد بيقولون لها لا تصيرين بيبي وغيارة ؟؟؟ بس بالله عليكم مو من حقي أغار ؟؟ أشوفه مهديها مثل هالشي وانا لا ؟؟؟؟
خذت نفس عميق وتنهدت من بعده بألم .. وكانت تحاول بجهد كبير انها ماتصيح او تحسس الي حولها انها متضايقة ؟؟؟
لكن وين تخبي على سارة اختها اللي خابزتها وعاجنتها ؟؟؟ التفتت عليها سارة وهي حاسة بشعور اختها والسبب انها هي أصلا حست بالقهر لما شافت هديته لسحر؟؟؟ يعني لهالدرجة تعني له الكثير يوم يسوي معها كذا ؟؟؟
سارة وهي منزلة راسها ::/ مقهورة ..!!
انتبهت عذا من سرحانها ولفت لها ::/ وش اللي قاهرك ؟؟؟
سارة وهي تناظرها بعصبية ::/ شوفي وش جايب لها ؟؟؟ وانتي ... أووو قصدي احنا انا وانتي ماجابوا لنا نصف اللي جابه هو لها ؟؟؟على الأقل كان اشترى واحد مثله أو عطاني انا خاتم وانتي عقد مادام مستخسر علينا طقم كامل ؟؟
بلعت عذا غصتها وحز بخاطرها ان اختها ملاحظة نفس الشي يعني مو هي الغيارة ::/ مادري وش قصده من ورا هالحركة ؟؟؟
انقلبت سارة ووقفت قدام عذا وصارت تمشي على ورى ::/ اااخخ لا ومهديها بوسط الحفلة وقدام الكل...!! يعني على الأقل مادمت مقصر في حقنا اهدي لها بعد الحفلة ...!! مو قدامك وعيني عينك ... كانه يقول شفتي يا عذا انقهري ؟؟؟
عذا خلاص الكلام يجرحها اكثر ويصعّب عليها مسكها للدموع ::/ خلاص سارة اسكتي ..!! هو حر ..!! يهدي اللي يحب الشي اللي يعجبه ؟؟؟
شهقت سارة بخوف::/ يعني تقولين ان هديته لسحر دليل انه يحبها أكثر منك ؟؟؟؟؟
حطت عذا يدها على فم اختها تسكتها وهي خلاص دموعها تلمع بعيونها :/ اسكتي ..!! لاتفسرين كلامي ؟؟؟ ولا تؤولينه خليه على ماهو عليه ؟؟
اقبلت عليهم ندى راجعة من الباب وكأنها تستعجل الباقين اللي ما طلعوا .. تقابلت معهم في نهاية الممر .. قربت لهم وهي تبتسم ::/ يالله وينكم العشاء................
سكتت لما لاحظت التجهم بوجه عذا والنظرات المخيفة بعيون سارة .. وحست ان اللي خايفة منه صار وغبائها هالمرة بيضيعها ...
ندى ::/ وش فيكم ؟؟؟ وراكم صايرين كذا ؟؟
سارة باندفاع ::/ اسألـــي نفسـ ـ ـ ـ ـ
قاطعتها عذا ::/ خلاص سارة .. (( والتفتت على ندى)) مافينا شي ندوش بنطلع الحين ...
مسكت يد اختها علشان يطلعون مع بعض وحاولت قد ماتقدر ترسم إبتسامة على وجهها على الأقل علشان ما تخاف ندى عليهم ؟؟ توهمت انها تبتسم وطلعت تاركة وراها ندى اللي تحس بتأنيب الضمير ؟؟ ماتدري ليه انكتب انه ماتصير هوشة بين زياد وعذا الا هي لها يد فيها ؟؟؟؟؟
طلعوا عذا وسارة للساحة الخضراء المزينة بالأنوار ورشاشات الماء اللي تخفف حرارة الجو ...
وقفت سارة عن المشي وسحبت يدها بقوة ::/ ليه ماخليتيني اتكلم ؟؟؟ خليني اوضح لها حقارة تفكيرهم ؟؟؟
عذا وهي تتوسل ::/ الله يخليك سارة ... لاتقولين شي ؟؟ خلاص اصلا ماصار شي ؟؟ وانا ماعندي مشكلة هو حر يهدي اللي يبي ؟؟ مالنا حق نتدخل بخصوصياته ؟؟؟
سارة بانفعال ::/ لا والله ؟؟؟ وتلميحاته انه يبغاك ؟؟؟ وابوي اللي مقتنع واحنا كلنا اللي مجزمين بأنه يبغاك ؟؟؟ كل هذا ما يسمح لك تتدخلين بخصوصياته ؟؟
عذا وهي تمسك يدين سارة وتحس نفسها خلاص ماتقدر ::/ سارة بليز قفلي عالموضوع علشاني ؟؟ وبعدين هو ماعمره تكلم بشي رسمي ؟؟ ولا حتى أثبت هالشي ؟؟؟ يعني يمكن كانت أفكار مراهقين وصغار ؟؟؟ خلاص الله يخليك اسكتي وخلينا نروح نتعشى ...!!
طالعتها بنظرة توسل .. استسلمت لها سارة وخذت نفس عميق وابتسمت لأختها تهون عليها .. لكن قلبها من داخل مابردت حرته ؟؟ ودها تطلع الحكي اللي بقلبها بس مو لندى لا؟؟ لزياد نفسه ..!
مسكتها عذا قبل لايتحركون ::/ لا تقولين لأحد ؟؟
سارة بضحكة استهزاء ::/ تخافين يتشمتون ؟؟؟
عذا ::/ لا مو القصد ؟؟ لاتقولين وبس ؟؟
سارة وهي تمشي وتتركها ::/ مالي مصلحة اقول لهم .....!!
ابتسمت عذا من ورى قلبها ومشت مع اختها يجلسون على وحدة من الطاولات علشان يتعشون ويطلعون وترتاح من هالتوتر ........!!
-
بعد منتصف الليل بنص ساعة البيت كان تقريبا خالي من المعازيم اللي ماقصروا بحضورهم للحفل .. ماكان موجود إلا الأقارب جدا ... انضموا البنات لمجلس الحريم وجلسوا مع بعض يسولفون ويعلقون ويتناقشون في الأحداث اللي صارت ...!!
ام عبدالله كانت من ضمن اللي بقوا ماراحوا .. كانت تنتظر تسلم على زياد اللي اتصل عليها ينبهها ماتروح لأنه بالطريق راجع للبيت ويبي يسلم عليها ...!! وأكيد عشان على الأقل يلمح عذا ولو من تحت الغطاة ...!!
طول الجلسة وام راشد مانزلت عينها عن عذا .. لدرجة حست فيها عذا واستحت واحمر وجهها من تركيز ام راشد ؟؟؟
لاحظت سحر الشي اللي يصير .. وكانت من قلبها فرحانة وودها فعلا لو عذا تصير من أقاربهم المقربين .. ابتسمت لما جت عينها بعيون عذا ...
وانتبهت لريم اللي تحاكيها ::/ أقول شوفي أمي وشلون تطالع عذا ؟؟؟ أحرجت البنت ؟؟
سحر ::/ خليها تملى عينها من مرت ولدها ...!! الله يوفقهم يارب
التفتت سحر لريم وهي تتكلم .. ولمحة في عيونها كلام وده يطلع لكن ريم حابسته وما تبيه يشوف النور ... حاولت سحر تفهم وش تبي ريم لكن للأسف ماقدرت ...
ابتسمت لبنت خالتها ووقفوا الثنتين يودعون ام عبدالله وبناتها لأنهم بيطلعون ولبسوا عباياتهم ؟؟
ام راشد وهي تسلم على ام عبدالله ::/ فرصة سعيدة اللي اجتمعنا مع بعض عقب كل هالمدة ...
ام عبدالله مبتسمة ::/ علينا أسعد يالغالية ...
ام راشد بمغزى ::/ والجايات أكثر إن شاء الله ...
سلمت ندى اللي كانت واقفة جنب ام راشد على عمتها وحبتها على راسها .. وقلبها قابضها من تعامل ام راشد مع عمتها ..؟ حست ان الأمر مريب و مشكوك فيه ..!!
ودعوا بعض جميعاً .. ومشت ندى مع عمتها توصلها للباب .. لكن حلفت عليها ام عبدالله انها ماتتعب عمرها وتطلع ترتاح لأنها من اليوم وهي ماارتاحت ولا جلست ..
انصاعت ندى لأمر عمتها واكتفت بتودعيهم وخلتهم يسلكون طريقهم بروحهم ...
سارة بعد ماابتعدوا شوي ::/ أقول عذا ..؟
عذا وهي بالها مو معها والغم ساكن قلبها ::/ نعم ... وش عندك ؟
سارة بلهفة ::/ شفتي خالتهم وشلون تطالعك ؟؟ كلتك بعيونها ...؟
عذا ::/ ايه والله احرجتني .. كان ودي اغوص في هدومي ؟؟
ضحكت سارة بقهقة عالية .. والتفتت عليها امها بنظرة تحذير ..::/ سارة ترى ما بعد طلعنا للشارع ....!!
سارة وهي تمسك عمرها ::/ آسفة يمه والله ما اعيدها ؟؟
سمعوا صوت ندى وهي تركض وتنادي عليهم .. وقفوا كلهم والتفتوا لها وهي تلهث ..
ام عبدالله بخوف ::/ وش فيك حبيبتي ؟؟ وراك لحقتينا ؟؟
ندى وهي تجاذب نفسها ::/ سلامتك عمة .. بس اطلعوا مع الباب الخلفي حق زياد .. هو وعبدالله ينتظرونكم هناك ؟...
سارة من دون نفس لأن زياد انطرى ::/ ووينه فيه هالباب المقرود ؟؟
ضحكت ندى ::/ هههههههههه دقايق اجيب جلالي واطلع معكم ...
لفت عنهم ندى وراحت تركض تجيب جلال .. اما عذا فالتفتت على سارة بنظرة حيرة ودها تنقذها ...؟؟
عذا بهمس ::/ بنشوفه ؟؟
سارة بخبث ::/ يعني انتي ما ودك ؟؟
عذا نزلت راسها ::/ اول كان ودي لكن االحين لو شفته ممكن انهار واصيح ؟؟
سارة بصدمة ::/ لا الله يخليك انتبهي ..؟؟ لا تسوين لنا حركة المزرعة ..؟
ضربتها عذا على كتفها وهي تبتسم .. وسكتوا علشان ماتحس امهم وعلشان ندى وصلت بعد ..!!
مشوا مع بعض وهم ساكتين الا من بعض التعليقات لحد ماوصلوا ملحق زياد اللي ساكن فيه وكان بابه مفتوح شوي وطالع منه نور خفيف ...!!
وقفت ندى وهي تأشر ::/ عمة هنا ينام زياد اخوي (( واشرت على الدرج الجانبي )) وهذا الدرج يطلع لغرفتي يعني لما يحتاجني او احتاج اروح له مو لازم انزل مع الدرج الرئيسي اطلع من هنا ...!!
ابتسمت ام عبدالله لندى ::/ الله يعطيه العافية عمكم ماقصر عنكم بشي ..!! الله يخليه لكم ؟؟
ابتسمت ندى لها ::/ ويخليك لنا انتي بعد ... الا ماودك تشوفين غرفة زياد ؟؟
ام عبدالله وهي تمشي ::/ لا حبيبتي مافيه وقت خليها مرة ثانية ..؟
سارة بحماس ::/ أي مرة ثانية يمه الله يهديك ؟؟؟ خلينا الحين ندخل ونشوف تكفين ؟؟
ندى تضحك ::/ عاد هالحماس اللي يسمعك يقول بتدخل غرفة الملكة مارغريت ؟؟ عساها تصير نظيفة بعد ولا يفشلنا ؟؟
ام عبدالله بجزم ::/ لا مو لازم ندخلها المهم انه هو مرتاح فيها وبس هذا اللي نبيه ؟؟
سارة بعناد ::/ إلا انا بدخل وانتي كيفك روحي اركبي واذا خلصت بجي للسيارة ؟؟
حاولت ندى تهدي الوضع ::/ خلاص خلونا نسوي تصويت اللي يحب يدخل يرفع يده واللي مايحب لا يرفع ...
رفعت سارة يدها على طول .. اما عذا فـ بدون شعور رفعت يدها وكأن قلبها هو اللي يسيرها هذيك الساعة .. ماتدري بس تعلقها بهالشاب خلاها تتحمس اكثر أنها تتعرف عليه لو على الأقل من خلال غرفته وأغراضه الشخصية ..
التفتت ندى على عمتها المبتسمة ::/ سوري عمة بس غلبوك .. وبتضطرين تجين معنا ..
مشوا كلهم متخذين اليسار متوجهين لغرفته .. تقدمتهم ندى بزعمها علشان ترتب الغرفة لو طلعت فوضى .. طلعوا الدرجتين ودخلوا مع الباب اللي كان شبه مفتوح ..
كانت إنارة الصالة الخفيفة مفتوحة .. فتحت ندى الأنوار كلها و تفاجأت لما شافت قدامها صينية فيها بواقي اكل ..
ندى بتذمر لعمتها ::/ شفتي ولد اخوك المهمل .؟؟ حتى ماكلف نفسه انه يشيل هالصينية .. يا إما أنا أسوي كل شي والا كل شي بيكون بهالفوضى ..
ابتسمت لها ام عبدالله ::/ يالله لازم تتحملينه لين تجي اللي تحل محلك ...
وردت خدود عذا لما اقلت امها هالكلام .. وتقدمتهم كلهم لوسط الصالة وعيونها مركزة على كل زاويا البيت .. تنهدت من خاطرها وهي تتخيل زياد وهو جالس على هالكنبات .؟؟ والا وهو منسدح على الأريكة ببدلته الرياضية السوداء اللي تعشقه لما يلبسها وبيده الريموت و يلعب بشعره ....!!
شافتهم ماشين لغرفة ثانية بابها على الصالة .. لحقتهم ووقفت معهم عند الباب .. ابتسمت بحب وهي تشوف غرفة نومه .. كانت ملابسه مرمية على السرير وبعضها على الكرسي ..
ندى وهي تحوس ::/ شوفة عينك يا عمة لأني انشغلت عنه هاليومين انقلبت غرفته لمزبلة .. (( وهمست بأذن عذا اللي تقدمت لها تساعدها )) الله يعينك على دلعه ؟؟
ابتسمت لها عذا بحياء وكان بيدها ثوب لزياد .. وريحة العطر تفوح منه ؟؟ اول ماشمتها حست بشي حلو ينتشر بصدرها ويخليها مبسوطة ...لما تلفتت على أغراضه الشخصية اللي كان باين عليها الفخامة والذوق من آلة الحلاقة لفرشاة الشعر للعطور وشافت سريره .. جاها الحماس انها ترتب له المكان وتبخره له .. وتمنت لو هو مسموح لها انا تنتظره بهالمكان لحد مايجي وتملى عينها من شوفته ..
صحت من حلمها الجميل ورجعت لها الغصة مرة ثانية لما سمعت صوت سحر وهي تدخل الغرفة ...
سحر ::/ يالخونة اجل جالسين هنا وعلى بالي انكم رحتوا ..
ندى مبتسمة ::/ وقفنا امشيهم بغرفة زياد ؟؟ انتي اللي وش دراك اننا هنا ؟؟
سحر ::/ شفتكم من دريشة المطبخ الخارجي ولحقتكم ؟؟؟
ندى وهي تتوسط بالغرفة ::/وش تسوين هناك ؟؟
تقدمت سحر وكأنها تساعد ندى ::/ كنت بعطي خالتي من الكيك والحلويات لعيالها علشان يذوقون فرحتنا ...
ام عبدالله وهي تعدل طرحتها ::/ طيب يابنات انتم رتبوا المكان واحنا بنروح ؟؟ بس عاد وين الباب معه ؟
التفتت عليها ندى ::/ خلاص انا بروح معك ياعمة ؟؟
مسكتها ام عبدالله::/ لالا حبيبتي انتي رتبي اغراض اخوك وعلمينا وين الباب معه واحنا بنروح ..؟
ابتسمت لهم ندى بشكر ودلتهم للباب وخلتهم يروحون بروحهم ....!!
مشوا البنات ورى امهم لحد ماوصلوا لباب حديدي كبير باللون الزيتي وعلى حوافه لون نحاسي وبوسطه رسومات ذهبية ... ومقابضه باللون الذهبي ....!!
تقدموا له كلهم بيطلعون معه .. لكن قبل ما تمسك ام عبدالله مقبض الباب جاهم صوته يجلجل ::/ هلا والله بزينة الحريم كلهم ؟؟؟ تو مانور المكان بجيتكم .؟؟
التفتت ام عبدالله على يمينها وشافت ولد اخوها وولدها جالسين على كراسي الحديقة وقدامهم المسبح الخرافي ... ابتسمت لهم و لفت رايحة لهم ...
اما عذا فجمدت بمكانها من سمعت صوته ...... غمضت عيونها علشان تقدر تتخيل صورته بهالصوت الرجولي اللي يحسسها بالأمان ويشعل بقلبها أشياء حلوة كل مرة تسمعه ...
نبهتها سارة لما مسكتها ومشت هي واياها مع امها رايحين لهم ...؟
كل ماقربت خطواتها حست بدقات قلبها تتسارع اكثر وأكثر ... لدرجة انها حست بنبضاتها وكأنها في أذنها ...
واول ماقربوا لهم وبانت لهم ملامح الأثنين .. بلعت عذا ريقها وغصتها لما شافته واقف بكتوفه العريضة وطوله الفارع ...كان بثوب بس من دون شماغ ولا طاقية .
تقدمت ووقفت جنب اخوها بينما امها تسلم عليه .. ركزت في ملامحه وكأنها تشوفه لأول مرة .,,, فكه القائم الحاد وسماره البرونزي .. وعيونه الكبيرة و الدعجاء خلتها تنتقل لعالم ثاني غير عالمها الواقعي ... ملامحه الحلوة وترحيبه الحار لأمها خلاها تنسى شعور الكره والغيرة الي حست به من دقائق ... سرحت في وجهه لحظات تتأمل تقاسيمه الجذابة .. لاحظت خطوط التعب والإرهاق اللي انرسمت بوجهه وتحت عينه وشافت حاجبه الأيسر منسدل على عينه اللي كان يغمضها ويفتحها ببطأ شديد من التعب اللي اعتمر جفونه لكن هو يحاول يغطيه بابتسامة رجولية قوية .!! وما حست بعمرها الا لما انتبهت لنظرته الحلوة لها وابتسامته العذبة اللي حلت وجهه فوق ماهو حلو ..
سألها بنبرة دافية وحنونة ::/ وانتي عذا وش اخبارك ؟؟ وكيفها العطلة معك ؟؟
ارتبكت من سؤاله على بالها انه خصها هي بالسؤال ومادرت انه كان يسولف من شوي مع سارة ،،، تلعثمت وهي تقول ::/ بخير كل شي تمام الحمدلله ..
ونزلت راسها بخجل عميق لأنه انتبه لها وهي تناظره ؟؟؟ لكن هو ركز عيونه فيها للحظات .. حس بشي غريب في عيونها ماتعوده ؟؟؟ زعلانة والا متضايقة هذا اللي شافه ؟؟؟
عبدالله بعصبية ::/ وينكم ؟؟ لي ساعة وانا انتظركم هنا ؟؟
ام عبدالله ::/ والله طالعين من زمان يمه بس عاد ندى جعل ربي يسلمها لزمت علينا ندخل نشوف غرفة الحبيب (( وناظرت زياد بنص عين ))
غطى زياد وجهه بيديه وهو يقول ::/ لا يا عمة ...!!لا تقولين كنتوا في زريبة البهايم ؟؟؟
ام عبدالله تضحك::/ خليتها هناك المسكينة ماتدري وش تحوس ووش وتسوي ؟؟
زياد بنبرة استفهام ::/ ترتب الغرفة ندى ؟؟؟
ام عبدالله ::/ ايه هي وسحر بنت عمك ...!! على تعبهم الا انهم مدهرين لك ...!!
التفتت عذا من سمعت كلمة امها علشان تشوف وش بتكون ردة فعله من انطرى اسمها ؟؟؟ كان ودها لو انها سدت اذنه يوم نطقت امها بالإسم علشان مايسمع انها مهتمة فيه ؟؟؟؟؟
زياد بحنان رد لعمته وهو يرجع شعره لورى ::/ مادري وش بسوي من دونها والله .؟؟ انشغلت عني هاليومين وانقلبت موازيني ..؟
سارة بتنغيز ::/ ايه ترى معها سحر بعد ..
التفت عليها زياد مبتسم ::/ حتى سحر والله ما عمرها قصرت معي بشي و لو الله ثم هالثنتين كان فيني الحين جرب من الوساخة ...!! وهزال من قلة الأكل ؟؟!! الله يخليهم لي جميع لاخلا ولا عدم...!!
لمعت عيونها بالغيرة والتعاسة من رده اللامتوقع؟؟ التفتت لسارة تبي تشوف وش نظرتها لها .. كانت تحتاج نظرات تشجعها وتواسيها لكنها لاقت في عيونها الإصرار والكبر ... بلعت ريقها بحزن ورفعت عينها لزياد وشافته يطالعها باستغراب وعيونه مليانة استفهامات عن سبب نظرتها الكسيرة ..!
ضحك عبدالله وقطع عليهم وهو يقول ::/ بلاها مدلعتك والله ؟؟
ام عبدالله بحنان ::/ الله يخليهم لبعض ياربي ويرزقهم الصالح من عباده ؟؟
التفت زياد لعذا اللي كانت واقفة قريب من كتف عبدالله::/ آآآآآآآآآآآآآآآمين ان شاء الله والسامعين ..
ابتسم عبدالله ::/ انت خلنا نتخرج بالأول ؟؟
قربت ام عبدالله لزياد ::/ وش فيه وجهك ياقلب عمتك مصفر وعيونك مرهقة وكأنك لك شهر مو نايم ..؟
حك زياد راسه وهو يبتسم ::/ فاهمتني والله يالغلا ..!! اليوم كله وانا مداوم بالشركة واول مارجعت تكرمت علي ندى بشوي سندويتشات .. وعقبها قالت لي أطلع من البيت لأنهم بيجهزون هالمنطقة للعشاء ... عاد طلعت من البيت ولا نمت من الساعة 8 الصبح ...
ام عبدالله بحنان مسحت على وجهه ::/ ريح عمرك يمه ترى الشغل ماراح يطير لكن صحتك ان خسرتها ما قدرت تسترجعها ...
مسك زياد يد عمته وحبها ::/ ابشري يالغالية .. كلها دقيقتين اغير ملابسي واحط راسي وانام ...
ام عبدالله مبتسمة ::/ بالعافية ان شاء الله ..
قاطعهم عبدالله ::/ فرش اسنانك يالمقرف ..!! ولاتقول بعد ان ندى معودتك تفرشها لك ؟؟
ضحكوا كلهم على زياد لكن هو وضح الحرج في عيونه من تعليق عبدالله ومن كذا ماطاوعها قلبها عذا تضحك عليه اكثر ...
يعني على كثر ماتحس بقلبها يعورها ومطعون ومحتاجة تتشفى منه على كثر ماتمنت انها ملكت الجرأة هذيك اللحظة علشان تسكتهم والا تدافع عنه بعكس سارة اللي تشجعت تضحك أكثر علشان تقهره أكثر وتبرد قلبها ....!!
سلمت عليه عمته وودعته ... وتوادع مع عبدالله ومشوا كلهم وهو معهم بيطلعون مع الباب ...
ركبوا سيارتهم وهو لازال واقف عند الباب ومانزل عينه عنها ..أرهقته نظرتها الغريبة له اليوم واللي مايدري وش سببها ؟؟؟ و ماشبع منها ولا من حكيها والجلسة معها ؟؟؟ مع انها ماتتكلم بحضوره من الحياء لكن يكفيه انها تتنفس معه نفس الهواء من نفس المكان ... وده يرتاح من هالشقاء ...!! ليت اللي يتمناه يقدر يوصل له بيده كان ماتركها اليوم تتحرك من مكانها قبل لا يخليها تفضفض له باللي بخاطرها واللي مكدرها بهالصورة البشعة... امنيته يجي اليوم اللي يضمها فيه تحت جناحه ولا تودعه أبد ... لأنهم ساعتها بيكونون مع بعض ولا راح يسمح لأي من كان أنه يآخذها منه او يزعلها ..
انتبه لعمته وهي ترسل له قبلة طايرة وعبدالله يضحك عليهم .. ابتسم ابتسامة صفراء باهتة لعمته وهو يسوي نفسه يمسك البوسة ويحطها على قلبه ............................. ودخل وسكر الباب وراه ..!
ياقرة عيوني جفت عيني النوم ..... من شفت نظرات الحزن في عيونك ....ياليت ربي زالني قبل هاليوم ..... وماعاشت عيوني لوقت يخونك .... أدري واحس بما تحمل من هموم ..... ياليتي احمل ماتعانين دونك ...... سريت منك وقامت افكاري تحوم .... وشلون أعين وكل ما أقواه عونك ....... !!!
|