عندما تقلبنا الأيام ونكتشف غدرها عندها فقط ندرك انه هنالك قلوب سوداء بداخل اجساد بريئه لاتعكس الا بالبراءه فتصدمنا
قلبتني هذه الحياه كثيراً وعلمتني الكثير وادركت بوقت متأخر ان الناس وكما يقولون اجناس
انت يامن اضحكتني وابكيتني لك تقديري وانت يامن تعلمت مني وعلمتني لك احترامي وانت يامن تقرأ سطوري لك شكري
فكرت كثيراً كيف ابدأ هذا الفصل من روايتي واحتارت الأحرف في مخيلتي وها أنا ذا أبدأ لأبحر بسطوري وأخذكم معي
الفصل الثاني عشر
الرياض سنة 1425 للهجره 1| شوال يوم الثلاثاء
قبل اللقاء,,
بغرفتها ماسكه الجوال وبكل عصبيه : مامعي ولااقدر اجي على امريكا
جاد: ما ألت لك تتصرفي
نجلاء : طيب كيف
جاد: انا سألت ناس بعرفهم هونيك كل يلي عليك تستدرجيه لألك
نجلاء وهي مبتسمه بخبث: بس ..هذي سهله
جاد: انتي استدرجيه وبعدها بعطيك الخبر الاكيد
نجلاء: وش اسمه
جاد: مشعل خالد الـ........ ابوه رجل اعمال غني كتيــــــــــــــــــــر
نجلاء تتبسم: عز الطلب
:
:
:
الرياض الساعه 12 بعد منتصف الليل
الزمن الحالي..
طلع من غرفة الطوارىء ولقاها تنتظره والخوف واضح من عيونها اللي باينه جاته تركض وبخوف: بشر فهد تكفى
فهد بحزن : الحمد لله بس حالتها صعبه شوي
شذا بسرعه : وش بيصير ببنتي لاتكذب علي
فهد واللي يحاول قد مايقدر يكون في ثبات : لاتخافين بتقوم بالسلامه ..بــس سكت شوي
شذا تقطع سكوته بسرعه: بس وشو لاتخوفني
فهد بهدوء: انا مضطر ابلغ السلطات
شذا بخوف: تبلغ ليه ؟
فهد يناظر فيها مقهور: بنتك ياهانم كانت ماخذه جرعه زياده من ماده مخدره تدرين وش معنى هالكلام
شذا منزله راسها وبهدوء: فهد لاتبلغ
فهد بأصرار : أنا اسف واجبي كطبيب يلزمني ابلغ عن اللي صار البنت كانت راح تموت انا ابي افهم بنت بعمر الزهور كيف تسوين فيها كذا
شذا بسرعه وبنبره حزينه: لا لا فهد انت تتوقع اسوي في بنتي كذا فهد عشان خاطري لاتبلغ اخاف ياخذون بنتي مني
فهد يناظرها بأستغراب : مين مسوي بالبنت كذا ومين اللي راح ياخذ بنتك منك
شذا وهي تبكي: اهل زوجي الله يرحمه ..وناظرت بالساعه ومشت بسرعه:انا لازم اروح لو صحو ومالقوني تصير علوم غبره
فهد يمشي بخطوات سريعه ويوقف بوجهها: اصبري
شذا: نعم
فهد: انتي تدرين من متى انا ادور عليك
شذا : وش يفيد فيه
فهد بتوتر: شوفي يابنت الناس انا لاراعي حركات ولاشي وسوالف المراهقين زمان نسيتها بس اللي اعرفه اني للحين شاريك وابيك زوجه على سنة الله ورسوله
شذا بهدوء: فهد انت ماتدري
فهد يقاطعها بسرعه: قبل لاادري عن أي شي شذا انا طول هالسنين مانسيتك ولاتزوجت انا اوعدك اكون زوج حنون واب مثالي لبنتك
شذا بعد مادخلت بنوبة بكاء: فهد مااقدر اخاف انت على بالك ماابي انت ماتدري وش حالي جيت بالبنت اقرب مستشفى مشي وماعندي ولاريال عمها مو مقصر لافيني ولافيها بس مابي اتزوج وياخذون بنتي مني
فهد وهو مقهور :مين ياخذها منك مالهم حق وعمها انا اقدر البسه قضيه على اللي سواه بالبنت
شذا بعد تفكير: لا لا اخاف مااتخيل حياتي بدون البنت
فهد وهو يضغط على اصابعه من التوتر: شذا وش يرضيك علميني وبسويه يابنت الناس انا تعبت والله العظيم ..انتي ماتقولين انك طالعه بدون لااحد يدري خلاص البنت على الصبح بتكون احسن وانا معاك ناخذها ونروح نتزوج ونروح يومين نسوي عمره ونرجع وانتي ارمله مو لازم عرس وانا متنازل لاابي لاعرس ولاشي
شذا ساكته ومنزله راسها
فهد يكمل بسرعه: شوفي وان ظهر عم البنت او عرف طريق لنا بقوله بيننا المحاكم وبهدده بسالفة البنت وجرعةالمخدر الزياده شذا تكفين
شذا سكتت وهي تفكر معقوله بعد هالسنين فهد يكون ملاذها معقوله يخلصها من هذا كله بس لا مومعقوله تغيب كل هالسنين واخرها تجي تدمر حياته ..التفتت لحياتها الماضيه خسارتها لأهلها وزوجها قسوة اخو زوجها وامه وحياتها اللي انقلبت حياة يتم وهم وألم هذا ان ماكان طريق السعاده فهو حبل النجاة الوحيد ,,
فهد وهو يناظرها بتوتر: انتي ماقلتي تعانين منهم انا من زمان اتمناك ماطلبت الا الحلال وافقي طلبتك والله العظيم تعبت وانا اكمل حياتي بدونك..وبصوت عالي وبكل انفعال : انا صاير غبي مثل المراهقين ابكي على الاطلال اتذكرك اتذكر كل شي فيك صوتك ضحكتك ماقدرت انساك ادق على بيتكم واروح عنده ابي بس اعرف انك بخير ويوم اللي عرفت عن موت اهلك حاولت القاك مالقيت لك طريق والحين جايه تقولين لي انك مو بخير وتتوقعين ارجع اعيش حياتي بدونك مـــــــــــــــــــــااق در..فسخ نظارته ومسح عيونه بحركه سريعه لف راسه للجهه الثانيه وبهدوء: انا اسف
شذا بهدوء اكبر: وانا موافقه
فهد التفت لها بسرعه وبحماس: وش قلتي
شذا وهي منحرجه منه: قلت موافقه
فهد يفسخ البالطو حقه وبسرعه: الحين بروح ..وفجأه وقف وناظر بالساعه بالجدار: لابس باقي ماخلص شفتي ..مشى بعدها بسرعه وبصوت عالي: عادي عادي باقي 10 دقايق بطلع بدري لاتروحين برجع
ابتسمت بهدوء وهي تناظر توتره واستبشرت خير لأنها شافت فهد الانسان اللي حبته زمان طيب وهادي وناجح ماغيرته الايام بالعكس زادته ذوق وحلا
:
:
:
سنة 1420 للهجره يوم الأحد الساعه 3 الظهر ,,
بعد حادث السياره بحوالي الشهر ..
نزلت السلالم بهدوء وهي تناظر بهالبيت اللي صار خالي عليها اللي كان مالي هالبيت عليها راح وتركها لحالها ..
ام ماجد تناظر شذا بعصبيه ونفسها الخايسه باينه بكل ملامح وجهها: انتي لايكون فاكره نفسك صاحبة بيت للحين اصحي لنفسك انا لولا بنت ولدي ماكنت تحملتك انتي واهلك السبب بموت ولدي
شذا بعيون غرقانه دمع: الموت حق انا بعد فقدت اهلي وزوجي
ام ماجد بعصبيه وبصوت عالي: اسكتي بس من يوم اخذناك وانتي قدم سوء علينا الله يقطعها ساعه اللي اخذناك فيها اسمعي من اليوم تنامين بالغرفه الصغيره اللي بجنب المطبخ فاهمه
شذا بحزن : فاهمه
مشت ام ماجد بكل جبروتها وقوتها وهي تسوي حركات اشمئزاز بوجهها مبتعده عن الدرج
شذا جلست على الدرج وهي تبكي بحرقه وكل شي بداخلها يصرخ ياربي ليش انا بالذات يروحون اهلي ابوي اخواني وعزوتي واجلس كذا لااهل ولامال ولابيت ليـــــــــــش ..بكت بحرقه سندت راسها على سور الدرج وبدت تستغفر ربها وهي تحمده على بنتها اللي طلعت فيها من الدنيا
:
:
:
الرياض الساعه 1:15الفجر
الزمن الحالي,,
دخل البيت قفل باب الصاله وسند جسمه عليه مو مستوعب اللي صار معقوله شافها وعرض الزواج عليها معقوله وافقت ..هز راسه بقوه :اكيد انا احلم
ام سلطان تقطع حيرته: بسم الله عليك ياوليدي
فهد مستغرب وبينه وبين نفسه: وش مصحيها هالوقت الحين اقول لها او مااقول
ام سلطان تقطع اندماجه: وش سالفتك اليوم
فهد بسرعه: انتي وش سالفتك ليش صاحيه
ام سلطان تناظره بعدم استيعاب: صحيت اشرب مويه
فهد بسرعه وباين عليه الاستعجال: اها طيب ..راح بسرعه ووقف عند الدرج : انا وين رايح اجيب ملابس ..وبعد تفكير وبصوت واطي: لا لا وش ملابسه بجيبها هنا بعد الزواج لان ماعندي اجازه ..لا لا صح بروح معها مكه خلاص باخذ اطراري وبسرعه كبيره وبصوت عالي شهق: امــــــــــــــي
ام سلطان قربت منه وضربته بالعصايه: وش امي جالسين بفلم كرتون انت مو صاحي ياولد
فهد مرتبك: بصراحه يعني انا قررت اتزوج
ام سلطان والابتسامه بانت على وجهها: هذي الساعه المباركه من بكره اقول لأختك تشوف عروس
فهد بسرعه: لا لا لا انا لقيت العروسه اخت واحد دكتور زميلي ويتيمه وانا احب الولد وناوي اناسبه
ام سلطان: خلاص شوف لنا يوم نزورهم
فهد يحك رقبته: لا مايحتاج البنت عايشه مع اخوها وانا طلبت يدها منه وهو وافق واتفقت معاه على كل شي باقي نحدد يوم الملكه ببلغ اخواني وزي كذا
ام سلطان مبسوطه: اخيراً ياوليدي قررت تشوف حياتك ومستقبلك
فهد يضحك بأستخفاف: ايه بس فيه مشكله
ام سلطان تناظره: وشهي
فهد بخوف: البنت اهلها ماتو قريب ومايبون لاعرس ولاشي يعني يوم ملكه عائلي وخلاص
ام سلطان بعدم اقتناع: سنين وانا انتظرك تتزوج واخرها تتزوج بحفله عائليه
فهد يبوس راسها: قلت لك البنت يتيمه واهلها متوفيين مالهم فتره مايصير بعدين وين احسن اتزوج بحفله عائليه او مااتزوج ابد
ام سلطان تلوي فمها: وش هالحاله معاك
فهد يضحك: المهم اني اخيراً بتزوج
رقى الدرج وراح غرفته بسرعه جلس على السرير وهو متوتر وبعد تفكير دق على اخوه ابو فارس ..وبعد مرتين اتصال رد عليه ابو فارس بكسل وبصوت ملاه النوم: الو
فهد بسرعه: محمد اصحى معي انا بتزوج
ابو فارس بكسل: فهد روح نام ..تحلم بالزواج تجي تدق علي الظاهر اثرت فيك العزوبيه
فهد بسرعه: لا والله بتزوج وبكره
ابو فارس يجلس على السرير: وش هالتخريف
فهد ياخذ نفس: ماهو تخريف البنت بتزوجها وبكره لأنها يتيمه وفيه ظروف كثيره تمنعني اتزوجها بحفله وزحمه وغير هذا البنت ارمله
ابو فارس بسرعه: فيه واحد عاقل يتزوج بين يوم وليله وبعد هالعمر كله تتزوج ارمله
فهد: انا ابيها وبتزوجها وماطلبتك الا عشان توصل الفكره لأخواني وأمي ماادري كيف بجي لأمي مع حرمتي وهي عندها بنت
ابو فارس مصدوم: لاوبعد عندها بنت
فهد بهدوء: تكفى ياخوي تصرف معهم انا باخذ اجازه اطراريه وبملك بكره وبروح مكه 3 ايام وانت شوف لي حل عادي نسوي حفله صغيره ان رجعت ..سكن شوي وبعدها كمل: انا دقيت عليك لان ادري بردت فعل سلطان ماراح تكون حلوه
ابو فارس يتنهد: وش هالموقف اللي حطيتني فيه
فهد بسرعه: طلبتك ياخوي
ابو فارس: خلاص انا بتصرف معهم مبروك ياخوي
فهد بفرح: الله يبارك فيك
:
:
:
السبت الساعه 1:30 الظهر ..
صار له ساعه ونص واقف هالوقفه ليه مايدري ..قبل القصر بمسافه بالجهه المقابله..
فارس وهو يراقب بوابة القصر الفخمه:ياربي لو يطلع تركي ويشوفني ..وبعد تفكير : بقوله جاي اشوفك بقول له أي شي
اخيراً انفتحت بوابة القصر وطلعت سيارة السواق منها لحق السياره بسرعه وهو مايدري مين فيها بس كل همه كان انه يلحقها مشى وراها بحماس الى ان وصلو الى احد الصالونات الفخمه نزلت بنتين من السياره حاول ياخذ باله من اشكالهم ماقدر بس لاحظ الوجوه المكشوفه والنظارات الشمسيه اللي ماقدر يميز ماركتها..
مد يده وشغل الأف ام يسمع اغاني وهو يفكر: تركي قال انه ماعنده غير اختين يعني اكيد هي وحده من هذول بس ماقال ان خواته يكشفون المهم ماعلي انا لازم اشوفها
:
:
:
الساعه 2 الظهر ,,
نازل الدرج وملامح وجهه تترجم معاني كثير الملل الحزن القهر ,,
راقبته وهو ينزل الدرج الى ان وصل عندها بالصاله وجلس بجنبها..
نوره تناظره وتتبسم: ادري ماشفت منها أي بادره
سلمان ياخذ نفس :نوره ماادري المشكله ببنت عمتك او فيني
نوره تتبسم على الاخر : لا ببنت عمتي انا لو منها ادق عليك واقول لك احبك
سلمان بسرعه: بنت استحي على وجهك
نوره: شفت يعني لو سوت كذا يكون وضعها غلط يمكن حست فيك وفهمت بس مو قادره تعبر او بالاصح تستحي تقول لك
سلمان يعدل جلسته: يعني وش اسوي بالضبط
نوره حاطه يدها تحت ذقنها وتفكر
سلمان يدفها: اخلصي
نوره: روح لها وقول لها بالعربي الصريح انا يابنت عمتي احبك وابي اتزوجك
سلمان مستغرب: كذا بدون مقدمات
نوره تناظره بقهر: كل هالمقدمات وتقول لي كذا بدون مقدمات لاتقهرني روح صارحها
سلمان: وشلون اروح بيتهم اقول لها احبك
نوره بعد تفكير: اسمع روح عند بيتهم وارسل مسج وقول لها بالمسج انك عند البيت وانت وشطارتك ورومنسيتك بالمسج
سلمان: رايك كذا
نوره بأصرار: ايه رايي كذا ودامك تبي الزواج وماتبي لف ولادوران شوف رايها وفرحنا
سلمان يوقف بحماس: بروح والحين
نوره تضحك وتناظره وهو يمشي بسرعه وبصوت عالي: بشرني لا اوصيك
سلمان بعد مافتح الباب: ان شاء الله
بعد مامشى اخوها دق جوالها اخذته وكان بندر المتصل ردت وبكل هدوء: هلا
بندر بحب: هلا بحياتي
نوره: وش تبين الحين
بندر: ياويلي اموت فيك وحشتيني
نوره بسرعه: طيب اكلمك بعدين
بندر بسرعه اكبر:لا اصبري انا عند بيتكم
نوره بخوف وارتباك: وش اللي برا وش تبي
بندر : ابي اعطيك شغله
نوره وهي تحس بالخوف صار بكل جزء بجسمها: اخوي برا ياويلي
بندر بكل برود : لاشفته مشى لاتخافين
نوره وهي توقف وتراقب الصاله وتتلفت بسرعه:طيب خلاص روح
بندر بثقه: لامو رايح
نوره بقهر: كيفك بقفل بوجهك واوقف برا للصبح
بندر ببرود: وليه اوقف الجرس موجود بقول ابي نوره وخلاص
نوره بسرعه: ياربي بندر وش تبي
بندر: ابي اعطيك شغله
نوره: لو تموت ماطلعت لك صاحي انت
بندر : مابيك تطلعين لي ابيك تطلعين وتوقفين ورى الطوفه يسارالباب
نوره بيأس: طيب امري لله
مشت بهدوء فتحت باب الصاله وراحت وقفت ورى الطوفه وقالتها بهدوء: وقفت
بندر بحماس :طيب راقبي الحين وش بيجيك
نوره بخوف: طيب
بندر مسك باقة ورد بيده وحذفها بقوه ..نوره سمعت صوت وراها والتفتت شافت الباقه بعيده شوي عنها قربت منها وبندر يسمع صوت انفاسها بالجوال اول ماوصلت للباقه الحمرا الكبيره اخذتها وابتسمت وبصوت ملاه الحب:بندر مجنون
بندر بكل رومانسيه : مجنون فيك
نوره بهدوء: طيب ياللا قفل بروح اخبي الباقه
بندر بصوت ملاه الفرح: طيب حبيبتي
:
:
:
الساعه 3:00 الظهر ..
اول ماأخذ يسار للشارع اللي فيه بيت عمته شاف مشهد سبق وشافه قبل العنود واقفه نفس الوقفه اللي شافها قبل جن جنونه وهو يحرك السياره ببطىء وشافها تاخذ كيس صغير حس بثوران بداخله حرك السياره بسرعه ووقف ورى العنود نزل وقفل الباب بسرعه لف من ورى السياره متجه لها وهو يناظر فيهم بكل عصبيه هالمره بعد الاستاذ غلطان ..وقرب من ياسر ومسكه من قميصه بعنف وهزه: انت ماتستحي واقف مع بنات الناس
ياسر يحاول يفك يد سلمان : وخر يدك عني
سلمان بعصبيه: مابي اوخرها وش بتسوي يعني
العنود بخوف وهي تبكي : سلمان خله يروح
سلمان بصوت عالي : انتي انطمي ..مسك ياسر بيد واليد الثانيه سحب فيها الكيس من يد العنود بعنف وناظر بداخل الكيس وراماه على الارض بقهر وبصوت عالي وهو يناظر ياسر: ماشاء الله كروت وحركات
ياسر بعد ماأبعد سلمان بعنف: مالك شغل
سلمان واللي سيطرة عليه العصبيه : هذي بنت عمتي ياثور وقرب منه ووجه له ضربتين بقوه على وجهه وضربه بيدينه الثنتين على كتوفه طاح منها ياسر على الارض سلمان جلس فوقه وصار يضربه وياسر يحاول يدافع عن نفسه ويضرب سلمان بس ماكان بنفس قوته
العنود كانت خايفه مره وحاطه يدها على فمها وتبكي
ياسر بصوت عالي وهو ممسك بيدين سلمان عشان لايضربه وبنافخ: انا قصدي شريف احب بنت عمتك وبتزوجها وهي موافقه وهذا الكيس فيه علبة بخور من امي وكرت لعرس بنت خالي
سلمان حس بتنمل برجلينه وخمول بيدينه فك ياسر بلا وعي ووقف ناظر العنود وناظر ياسر وراح سيارته بدون لايبدي أي تعليق وتحرك بسرعه
العنود ابتسمت بعد كلام ياسر ونست خوفها من سلمان وراحت ركض بيتهم ,,
:
ضرب راسه بدريشة السياره بقوه وبصوت عالي : غبي ياسلمان غبي عشان كذا ماعبرتني شايفه غيري وانا مثل الحمار اطرد وراها فتح جواله يقرا الرساله اللي له ساعه يكتب فيها
:
حبيبتي أنا احبك من زمان وابيك زوجه لي حاولت اكتبها بأسلوب رومنسي بس مالي بهالحركات انا عند بيتكم اذا موافقه قولي موافقه وادخل الحين اطلبك من اهلك
:
رمى الجوال بقوه على قزاز السياره وزادها سرعه وصرخ: غـــــــــــــــــــبي بنت تهزك
:
:
:
الساعه 7 المغرب ,,
طفش وهو واقف عند المشغل النسائي راح صلى واكل شي خفيف ورجع وكلم جوال وسمع اغاني وغنى مابقى شي ماسواه وكل مارفع راسه شاف السواق الهندي مسند جسمه على السياره ومكتف يدينه ويناظر بالمشغل ينتظرهم
فارس ماسك الدركسون بطفش: هذا ماطفش الحمد لله اني مو سواق ,,وفجأه سنع جلسته وتحمس وهو يشوفهم طالعات من المشغل ومستغرب انهم مغطيات وجيههم وقبل كانو كاشفات بس ماهمه المهم انهم طلعو راقبهم والسواق يفتح لهم الباب وهم يركبون شغل سيارته ولحقهم وهو مو مصدق حتى رجلينه نملت من الجلسه ,,
مشى وراهم مسافة حول نص ساعه شرق الرياض وصلو لطريق ظلام وكان خالي من السيارات وهو مستغرب وش جايبهم هذول هنا,,
وهم ماشيين جات سياره جمس اسود وقفت بمحادات سيارة السواق فيها شباب اثنين كاشخين اخر كشخه الشماغات مكويه بعنايه قلم فخم يسار الجيب العلوي للثوب الناصع البياض ريحة العطر اللي تفوح بمجرد فتح الشباك ,,
فتح اللي بجهة الراكب دريشته وصار يصارخ: على وين ياحلوات عطونا وجه عاد نبي نخاويكم
حاول السواق يبعد عنهم بس كانو يقربون منه بطريقه مخيفه ويحاولون يعطلون سيره الى ان راحت السياره بالرمل على محاذات الشارع ووقفت ووقف الجمس الاسود قدامها
فارس وهو يقرب منهم بسيارته ببطىء وخوف: ياربي انا وش جايبني هنا هذول اكيد متفقين معاهم ,,وبسرعه: لا لا مااتوقع خوات خويي يسوون كذا ياربي وشلون اتصرف انا واحد واهم اثنين لازم اتشجع
وقف سيارته ونزل بسرعه بالوقت اللي نزلو الشباب من سياراتهم يتحرشون بجود وجنا ويحاولون يفتحون الباب وسط صراخ البنتين وخوف السواق الهندي
فارس بصوت حاسم يحاول يخفي الخوف اللي بداخله :وش تبون من البنات
واحد منهم التفت ببرود : وش دخلك
فارس بعصبيه وبصوت عالي: وخر عنهم او احسب ان امك ماجابتك
اللي ماسك باب السياره يناظر فارس من فوق لتحت ويلتفت لخويه وهو ميت ضحك : الاخ ينكت
فارس حاول يتجاهل خوفه خصوصاً انه اول مره يدخل بجدال حتى بالمدرسه كان ومازال الحيط للحيط.. جمع كل شجاعته وقرب من الولد اللي ضحك ومسكه بيدينه من ثوبه وسحبه لدرجه طاح شماغ الأول وبصوت عالي: تعال اعلمك مين اللي ينكت ,,
دخل معاه بتشابك الى ان طاحو على الارض وكل شوي يتقلبون وواضح ان الولد اقوى من فارس اول ماصار فارس تحت والولد فوقه السواق صار يدور بالارض الى ان شاف لوح خشب ضرب فيه الولد على راسه وفارس رفسه ببطنه بقوه بعده عنه ووقف بسرعه يناظر بالولد الثاني وينادي الهندي بحماس: تعال جاكو
الهندي واللي ابد ماكان اسمه جاكو بس يبي يخلص من هالسالفه مشى ورى فارس ..الولد لما شافهم جايين صار يرجع على ورى
فارس بصوت عالي وهو حاس نفسه بطل : خذ خويك وانقلع والا نكمل عليك
الولد سحب خويه بصعوبه حطه بالسياره وانحاش بسرعه ..
جود وجنا نزلو من السياره وقفو عند فارس وبصوت واحد:مشكور ماقصرت
فارس وهو مستحي :ماسويت شي
جود تناظر فيه: انا وين شفتك قبل
السواق بكل لقافه : هذا صديق سير تركي
جود بسرعه: انت اللي هذاك اليوم بالحديقه ماتستحي على وجهك
فارس بأرتباك: وش سويت
جود بقهر: متفق مع شوية حوش عشان تسوي فيها بطل فوق روسنا والله لأقول لأخوي مشينا جنا
اول مامشوى لحقهم فارس بسرعه وقف مقابلهم وبسرعه : دقيقه دقيقه والله العظيم مااعرفهم ولاعمري شفتهم
جود تناظر جنا: تصدقين انها صدفه
جنا بعد تفكير: مستحيل
فارس بأرتباك وهو يحاول يوقفهم: لحظه لحظه بقول الصدق والله وبدون كذب
جود توقف وتكتف يدينها: اخلص
فارس متوتر ومرتبك: انا بصراحه بس ماتضحكون علي ولاتعلمون تركي والله ماقصدت شي
جود بعد تفكير: قول ماراح نضحك
فارس منزل راسه وخايف: انا لحقتكم من البيت الى المشغل ومن المشغل الى هنا وتفاجأت مثلكم بالموقف اللي صار
جنا بسرعه: ليه لاحقنا
فارس بتوتر وهو يرجع خطوتين لورى: ابي اشوف اللي ضربتني الكف هذاك اليوم ماادري وش حدني والله اسف
جود: اقول انقلع نصاب
فارس بسرعه: قسم بالله هذا الصدق الله يحرمني امي وابوي لو كذبت عليك
جنا تناظرها وبصوت واطي: شكله صادق
جود بدون نفس وبصوت مسموع: طيب طيب ماقصرت لحقتك لنا طلعنا منها بفايده مع السلامه ومسكت يد جنا وراحت معها للسياره
الهندي يقرب من فارس: انا بعد مافي قول لسير تركي انك يلحق انا
فارس بقهر: بالله انقلع لوتعلمه قلبت السالفه عليك
الهندي: لا لا يعجبك انا مافي يقول
راح الهندي وركب سيارته ..التفت فارس يبي يروح سيارته وفجأه سمع صوت البوري راح عند دريشة السواق : نعم
جنا بصوت واطي: لوسمحت امشي ورانا نبي نروح مزرعه قريبه هنا عندنا حفله مع صديقاتنا وصراحه نخاف
فارس بفرحه: افا عليك اوصلكم وانتظركم الى ان تطلعون بعد
جنا: لابس الحقنا لاهنت
فارس: ابشري
:
:
:
الرياض الساعه 8 مساءً
مابقى شارع ماراح له ولاحي الا ولفه حاس بكتمه بداخله وحزن يملاه حاس انه انكسر انه انهزم حاس بوحده وضعف احاسيس كثيره انخلطت بداخله احاسيس اول مره يحسها ويشعر فيها ,,
حس انه مثل طفل انكسرت افضل العابه
او انه بالغ ضاعت كل احلامه
بلحظه فكر ياليته يرجع طفل ويبكي يبكي فراقها يبكي غبائه يبكي طيشه يبكي شبابه اللي مااحترمه ورجع مراهق يحب ويفكر بالغرام ومافكر ان هالبنت مو شايفته ولاحاسه فيه
اول مره يحس انه مو قادر ياخذ انفاسه وان الانفاس تحتبس بقسوه بصدره وقف على جنب سند راسه على الدركسون وصار يتنفس بصعوبه حلم كثير متى يمتلكها متى تصير زوجته حبيبته وام عياله بس للأسف احلامها ماكانت مثل احلامه
:
:
:
الساعه 9 مساءً بتوقيت السعوديه 10 صباحاً بتوقيت أسبانيا
ماسك ريشه بيده يلعب بأذنها وهي تتقلب بكسل :احمد روح بنام
احمد ومازال يعاندها :قومي طافنا الفطور نبي نطلع قبل وقت الغدى
لجين تقوم بكسل : طيب
راحت بسرعه غسلت وجهها توضت وصلت اخذت تنوره جينز سوداوتيشرت ابيض راحت الحمام وانتم بكرامه لبست اول ماطلعت لبست الجاكيت الاسود الطويل قفلت كل زرايره واخذت الشال الاسود تحجبت بعنايه مسكت العطر بس احمد مسك يدها اللي فيها العطر بسرعه حست بقلبها ينبض اول مالمست يدينه يدينها رفعت عينها بهدوء تناظره حست انفاسها ماتطلع من صدرها ودها تقول له احبك بس فيه شي يمنعها
احمد بهدوء: لاتحطين عطر
لجين : طيب
نزل معاها صعدو السياره اللي تنتظرهم وكانو متجهين لـ Puerta del Sol (بوابة الشمس)
اول مانزلت من السياره وناظرت المشهد تمثال كبير غريب مثل اللي تشوفهم بالتلفزيون مبنى كبير عمود عالي على اليمين يعلوه مثلث صغير وباقي المبنى عباره عن مربعات متلاصقه تعلوها نوافذ صغيره جداً وتتوسطه نوافذ كبيره مستطيله يعلو كل نافذه مثلث دخلت الساحه اللي كانت عباره عن ساحة تسوق ضخمه تحوي عدت مطاعم ,,
احمد يناظرها بحب:اعجبك المكان
لجين:مرررررررره حلو اول مره اشوف شغلات مثل كذا
احمد يمسك يدها: ياللا نتسوق شوي بعدها نتغدى
لجين واللي حاسه بالامان لوجوده معاها: كل يوم نتسوق ؟
احمد يتبسم: التسوق بمكان مثل هذا متعه حقيقيه
لجين بحماس: طيب
بعد ماتسوقو جلس معاها بأحد المطاعم اللي كان شكله اوروبي قديم الكراسي والطاولات وحتى الكونتر كله مصنوع من الخشب على الطراز التقليدي القديم ..
طلب لهم سمك على الطريقه الأسبانيه وعصير توت ..
لما جا الاكل كان ياكل متحمس وهي تاكل ببرود ناظر فيها: نونه ماتحبين السمك؟
لجين بهدوء : احبه بــس
احمد يتبسم: بس وشو
لجين تحرك كتوفها : مدري
احمد يحط سمك بالشوكه ويقربها من فمها : كلي بلا دلع
لجين تاكل من يده وبداخلها تدعي الله لايحرمها منه
:
:
:
الساعه 10:30مساءً بتوقيت السعوديه 1:30 ظهراً بتوقيت أمريكا
جالسين يتفرجون على الشقه الفخمه المفروشه ..اثاث امريكي فاخر صالون ابيض جلد بمفارش سوداء شاشة بلازمه كبيره جداً طاوله زجاجيه تتوسط المكان غرفة نوم امريكيه مزدوجه مع حمام وانتم بكرامه غرفة ضيوف تحوي غرفة نوم فرديه راقيه ..المطبخ مفتوح على الصاله بشكل جميل الوانه الساحره تضيف جمال على الصالون فهو خليط من اللون الرمادي والأحمر الدموي ..كونتر حديد بلون الرصاص مرتفع وكراسي عاليه طاولة طعام صغيره خشب باللون العسلي يمين الصالون
نجلاء تلف يدينها بيدين مشعل: ها حبيبي وش رايك
مشعل يتبسم: والله رهيب المكان بس انا ابي الغرفه المزدوجه عشان الحمام (وانتم بكرامه) مو عشان شي
نجلاء تناظره بقهر: طيب براحتك
مشعل يناظرها بطرف عين وهو حاس بحماسها: ماتبين عادي ندور مكان ثاني
نجلاء بسرعه : لا لا خلاص الحين ندفع ونوقع العقد والمكان جاهز للسكن من بكره نسكن..وبسرعه: ليه من بكره من اليوووووووووم
مشعل يضحك: اللي تبينه
:
:
:
مكه المكرمه فجر الأحد الساعه 3 تماماً
دخل الفندق الراقي القريب من الحرم وهو حامل البنت بيده حطها على السرير وشذا راحت بسرعه للحمام وانتم بكرامه ناظرت بشكلها بالمرايا بعد مارمت غطاها على كتوفها عيونها الذبلانه الهالات السودا تحت عيونها شعرها المهمل وجهها كله شاحب استحت تطلع لفهد وهي بهالمنظر وهي عروسته حالياً ..
جا عند باب الحمام وانتم بكرامه طق الباب وهو متحمس يذكر شكلها الحلو وجهها الناعم اللي شافه زمان بالصدفه كم مره لكن نسى تفاصيله ويمكن من سرعة اللحظه مادقق بتفاصيله طول الطريق وبالمحكمه ماجات صدفه يشوف وجهها .
قالها بحب وحماس وبمشاعر غريبه هو نفسه عجز يوصفها: افتحي الباب ببارك لك انا محترم تعب بنتك بس مشتاق لك
شذا بحزن وبدون لاتفتح الباب: مااقدر فهد
فهد بحزن : ليــــــــــــــــــــه
شذا واللي بدت تبكي: استحي فهد تشوفني بهالمنظر انت ماتدري هالايام القاسيه كيف انعكست على شكلي مااقدر تشوفني كذا استحي
فهد بسرعه وهو لاصق جسمه بالباب : شذا لاتبكين ولاتتضايقين اهم شي راحتك انا ماصدقت لقيتك ياشيخه عمري لاشفتك خلاص ولاتزعلين انا بشوف حل للمشكله وطول هاليومين اللي بنقضيهم هنا مابي اشوفك ماراح اشوفك الا وانتي مرتاحه طيب
شذا بهدوء: طيب
راح لغرفته بالفندق ودق على العنود مره مرتين وجاه ردها اللي مليان نووووووووم: الو
فهد : هلا بعنوده
العنود بملل: هلا خالي
فهد : قالو لك اني بتزوج
العنود وهي تجلس: ايه وصلني الخبر
فهد بسرعه: وش رد الجماعه
العنود: ماما تقول اهم شي انه يعرس وخالي ابو فارس مو مهتم تعرفه كل شي عنده حريه شخصيه بس خالي ابو سلمان مووووووووووووولع
فهد مرتبك: وش يعني مولع يابنت
العنود تضحك: يعني ياسواد ليلك منه لما ترجع
فهد يضحك: الله يعين
العنود بسرعه: ايه متوهقين كيف يبلغون جدتي انها ارمله وعندها بنت
فهد ببرود: مالي دخل تصرفو انا تزوجت وانتهى الموضوع المهم عنوده ابي منك طلب
العنود :امر
فهد بعد تفكير: بعد يومين برجع بعطيك مبلغ ابيك تجهزين عروستي وتزينينها وكل شي هي فقيره ويتيمه وزمان عن المشاغل وماخلتني اشوفها مستحيه من نفسها
العنود بحماس : افا عليك سلمني عروستك انت بس وبخليك تنهبل وانا ادري انها حلوه والا ماكنت بعت الكل عشانها
فهد بسرعه: بنت بلا هالكلام الكبير انا مابعت احد بس البنت يتيمه قلت اخذ ثوابها
العنود بعدم تصديق : اها ثوابها
فهد يضحك: اقول كملي نومك الملتقى بعد بكره
العنود تضحك: على خير ان شاء الله
قفلت من خالها تلحفت وكانت تبي تنام بس سمعت صوت اغنيه قوووي مره شالت لحافها وطلعت من غرفتها تتبع الصوت وشافتها جاي من غرفة مشعل تخرعت وبدت تفكر معقوله شعلولي رجع ويبي يسويها مفاجأه حاولت تفتح الباب لقته مقفول نزلت بسرعه للمطبخ وجابت مفاتيح البيت السبير ورجعت لغرفة مشعل تحاول تفتحها اخيراً فتحتها ولقتها ظلام شعلت النور وصارت تتبع الصوت اخيراً وصلت له وتأكدت انه من الدريشه فتحتها وشافت الجوال اخذته وهي مستغربه طفت النور قفلت الغرفه رجعت المفاتيح بسرعه ورجعت غرفتها جلست على التسريحه تناظر بالجوال المقفول فكت الجوال حطت شريحتها وشغلته ..
اول مااشتغل كانت الخلفيه صورة حور بنت عمها والوضع اسمه سلمان سلطان استغربت اكثر قلبت بالارقام المحفوظه كلها ارقام شباب وفيه بالاستديو صور لحور ولسلمان ومشعل وفارس وصور لهم بالمزرعه راحت للرسايل كانت رسايل لسلمان طفت الجهاز وحطته بالدرج بلا مبالاة وبكل برود : بعدين بسأل مشعل وسرحت بفكرها بياسر وابتسمت : واااااااااااو لو يطيح بيدي جوال ياسر وفيه صوره ياحبي له بس
:
:
:
الساعه 4 الفجر بتوقيت السعوديه 7 المغرب بتوقيت امريكا
جالس بالصاله الجديده وكل جسمه يوجعه الالام فضيعه بدت براسه وتسللت الى مفاصله ورجلينه ويدينه وكل جسمه حس انه ينهار مثل اللي بحالة غرق او مصاب بنزيف حاد جسمه كله كأنه مصاب بجرب صار يضغط على راسه بقووووووووووووووه ويفرك يدينه بتعب ويتنفس بصعوبه ناظر فيها وبصوت ملته الانفاس التعبانه: نجول ماادري وش فيني
نجلاء وهي رافعه حاجب: انا ادري وش فيك
مشعل ومازال يفرك بجسمه: وش فيني
نجلاء رافعه حاجب: تبي شي يريحك
مشعل بصوت عالي وهو متقطع من الالم : ايه عطيني اسبرين او أي شي
نجلاء حطت كيس بلاستك فيه بودره على الطاوله الزجاجيه: هذا افضل من الاسبرين
مشعل وهو يصارخ ويفرك بنفسه: بودره وش هذا مخدرات لا لا ماابي
نجلاء توقف: والله كيفك تبي ترتاح مالك الا هو ..ومشت عنه بغرور
مشعل يصارخ: نجلاء تعالي لحظه ..ماردت عليه وصار يناظر بالكيس وهو تعبان وكل جسمه يتقطع من الالم قرب من الكيس فتحه شم البودره بعنف الى ان طاح على الارض مثل المغمى عليه
نجلاء من بعيد تناظره وتبتسم بخبث اقوى وادهى من خبث الشيطان لأنها شيطان من الانس بصورة امرأه
:
:
:
الساعه 4:30 الفجر بتوقيت السعوديه 5:30 المغرب بتوقيت أسبانيا
بوسط حلبة مصارعة الثيران ووسط هتافات الناس كانت مرتميه بحظن احمد وحاسه بخوف كبير ..
احمد يناظرها :شفيك خايفه ناظري فيهم والله ممتع
لجين بخوف: لا لا يخوف
احمد : عشان خاطري ناظري
رفعت عينها تناظر وجلست طبيعيه اول ماجا الثور الهايج قريب منهم صرخت بقوه وحظنت احمد بخوف احمد لف يدينه عليها بحب وقربها لصدره زياده: ياجبانه لاتخافين صح انك بنوته جبانه
لجين كانت مبسوطه باللحظه ودها يطولون بحلبة مصارعة الثيران طول الشهر وتجلس كذا بحظن احمد ..حاسه بحبه ودفاه متأكده انه يحبها مستحيل كل هالدفى اللي بصدره ويكون مايحبها
احمد يبعد لجين عنه ويناظرها: خلاص ياجبانه
لجين وهي مفهيه : هاه
احمد يضحك: اقول بلا دلع وشوفي
لجين استحت وعدلت جلستها : طيب
اول ماصارت تناظر ضرب الثور الرجال بعنف صارخت مره ثانيه وضمت احمد وبصوت عالي: خلاص ماعاد ابي ارفع راسي ابد
احمد وهو فاطس: طيب كيفك
:
:
:
الرياض الساعه 7:30صباحاً
سمعت صوت البوري وطلعت وقبل لاتركب للسياره شافت سيارة سلمان واقفه فتحت الباب بسرعه وبصوت عالي: دقيقه وراجعه
دخلت البيت وهي تركض وصلت عند غرفته بسرعه كبيره طقت الباب محد رد عليها فتحت الباب وشافته منسدح على بطنه بدون لحاف راحت له هزته : سلوم سلوم
سلمان بدون لا يلف لجهتها: وش تبين
نوره بخوف : شفيك
سلمان بصوت مبحوح : مافيني شي
نوره: الا فيك شف صوتك
سلمان بقهر : قلت لك مافيني شي
نوره تمسكه من كتوفه وتلفه لها وتتأمل وجهه الحزين وبكل اسف: سلوم وش فيك
سلمان بحزن: مافيني شي الحين مالي مزاج اتكلم خليها بعدين
نوره تبوس راسه: لاتزعل ياخوي تكفى
سلمان يبتسم بحزن: ماعليك اخوك قوي
نوره : مابتروح الدوام
سلمان : لا روحي انتي الله يحفظك
طلعت من الغرفه ونزلت الدرج بحزن وهي مشغول بالها بأخوها واللي حاله مو عاجبها
:
:
:
الساعه 9 الصباح بتوقيت السعوديه 10 مساءً بتوقيت اسبانيا
ماسكه بيجامتها الشورت القصيره بالحمام وانتم بكرامه وبكل تردد : البسها او ماالبسها وبعد تفكير :لا لازم البسها هو يحبني ولازم الفته لي كزوجه لبست البيجامه الشورت القصيره مره ملت جسمها وبيجامتها عطر وطلعت من الغرفه شافته جالس على السرير يناظر تلفزيون راحت وهي مستحيه جلست بجنبه: وش تسوي
احمد وهو يبعد عينه عنها: مااسوي شي اشوف تلفزيون بعدي دقيقه ..وفطس ضحك : بالله لجين شوفي شكله
لجين تناظر التلفزيون بأستخفاف وترجع تناظره : احمد
احمد بلا مبالاة: نعم
لجين: خل نسولف شوي
احمد يقفل التلفزيون وبكل برود: سولفي
لجين بعد ماتوهقت : وش اقول؟
احمد : ماادري انتي تقولين بسولف
لجين وهي تتبسم: ماعندي شي اقوله بس قلت بدال التلفزيون نسولف احسن
احمد بعد مااخذ نفس : لجين ممكن اسألك سؤال
لجين وهي مبتسمه : اسأل
احمد: ليه لابسه قصير وحاطه نص غرشة العطر
لجين ارتبكت وتوترت وماعرفت ترد عليه
احمد يوقف وبكل برود: لجين انا متفق معاك على الزواج الصوري ولاتتوقعين بيجي يوم والمسك انا ماالمس وحده كلمت واحد قبلي حتى لو مالمسها للأسف مااقدر اعتبرك زوجه وهاليوم ماراح يجي عشان كذا لاتفكرين بهالسالفه وانسيها
حست بعد كلامه ان الدنيا تدور فيها وان ودها الارض تنشق وتبلعها وقفت بسرعه وحاولت تدارك نفسها: لا العطر فيني عاده وانا لبست قصير عشاني قلت انت زوجي اقدر اخذ راحتي باللبس
احمد وهو يشغل التلفزيون: اها
لجين تفتح الدولاب تطلع لها ملابس: الحين اغير ملابسي
احمد بعدم اكتراث: والله براحتك
اخذت بيجامه ساتره ودموعها تنزل على خدها بصمت راحت الحمام وانتم بكرامه قفلته وجلست على الأرض بحزن وهي تبكي بصمت وتحاول تكون قويه قد ماتقدر حطمها احمد دمر اشياء كثيره جميله بداخلها بدون لايدري
كان يقلب القنوات بتوتر وبعد مامرت حول الربع ساعه راح عند باب الحمام وانتم بكرامه وطق الباب: نــونه كل هذا تبدلين ملابسك
لجين وهي تحاول ان صوتها يكون عادي: خلاص خلصت الحين بطلع
احمد بهدوء: لايكون زعلتي
لجين: لا لا مازعلت مافيه شي يزعل
احمد بعد مااخذ نفس: لجين افهميني امانه انا حنيت عليك وحسيتك بنت طيبه وبريئه ومحتاجه من يساندك وبجد ومن قلبي ودي اسعدك بس مااقدر اعتبرك زوجه تكفين افهميني
لجين فتحت الباب وهي تبتسم وتخفي بداخلها الم ونار تحرق صدرها: احمد انا ماازعل منك بالعكس انت عيشتني ايام حلوه وانا يكفيني وجودك معي حسستني ان معاي احد واني مو لحالي بهالدنيا
احمد يتبسم: الحمد لله انا كل اللي ابيه انك تكونين مرتاحه ومبسوطه
رجع للتلفزيون يفرفر بالقنوات وهي تراقبه بحزن ومستغربه وضعها رغم انها حاسه بالأمان بس انها من دوامه لدوامه وماتدري متى بترسي بها الايام وتعيش حياه عاديه طبيعيه مثل أي انسان
:
:
:
الرياض..سنة 1425 للهجره يوم الأحد الساعه 1 الظهر
قبل اللقاء بحوالي الساعه,,
راكبه مع خويتها بسيارة الليموزين اللي واقفه بعيد عن بيت ابو مشعل بمسافه بسيطه..
رهف وهي تناظر البيت: انتي متأكده هذا بيتهم
نجلاء وهي تراقب: ايه متأكده ومتأكد بيطلع
رهف بملل: صار لنا ساعه ونص واقفين هالوقفه طفشت خل نروح نتمشى احسن
نجلاء تأشر لها روحي: لازم اشوفه الى متى بنتظر ..ووسط كلامهم انفتح الكراج وطلعت منه سياره سبور انفنتي لونها اسود
نجلاء بسرعه وبحماس: الحق هذي السياره بسرعه
رهف: وش دراك انه هو
نجلاء: اكيد هو معلوماتي تقول انهم ماعندهم غيره ولد ومو معقوله الاب بيطلع بسياره سبورت ياغبيه
رهف بطفش: اف طيب نشوف اخرتها
صار السواق يمشي وراه ومع الزحمه صار مشعل سابقهم بمسافه ركزت على رقم لوحة السياره عشان لاتضيعها وبصوت عالي وهي مقهوره: انت ماتعرف تسوق
الهندي: مدام زحمه الشارع
شافته من بعيد ياخذ يسار ويدخل مواقف الفيصليه التفتت بسرعه لـ رهف :بيتغدى بالفيصليه ..وصارخت على السواق بسرعه: بسرعه الحقه ..وصل السواق للمواقف ودخل وهو يدور موقف شافو مشعل تو لاقي موقف ويطفي سيارته ..
نجلاء بسرعه : اوقف قبل سيارته بشوفه وهو نازل
وقفو قبله ..نزل مشعل من سيارته طفاها بالريموت وكان لابس نظاره شمسيه ماركة بيناين مر قدامهم كان بقمة اناقته بنطلون جينز بحزام اسود فيه خطوط زرقا وقميص سبورت ازرق وجزمه سبورت ازرق واسود مرر يده بشعره الكثيف وهو يمشي بطلاقه
رهف بحماس: واااااااااااااااااااااااا او يجنن
نجلاء تصفقها: وقتك انتي بعد ياللا ننزل
رهف: احلفي انه مو حلو
نجلاء تناظرها بخبث: حلو بس جيبه احلى خل ننزل
رهف بتذمر: ياللا
:
:
:
الرياض الزمن الحالي..يوم الأربعاء الساعه 1 الظهر
فتح باب الصاله ودخل بتكاسل وواضح الحزن على وجهه
ام سلمان وهي تحط الأكل على الطاوله : ياللا بدل ملابسك وتعال تغدى
سلمان وهو يمشي للدرج: مابي غدا
ام سلمان يحزن: مايصير ياوليدي لك كم يوم ماتتغدى
سلمان يناظرها: لو ابي جيت اكلت انا مو صغير
ام سلمان: تغدا معنا اليوم ابوك بيتغدا هنا
سلمان وهو ماسك سور الدرج ويناظرها بأستغراب: وش الطاري
ام سلمان تتبسم: عنده موضوع بيناقشه مع خواتك
سلمان بعدم اكتراث: اها طيب انا بنام مناقشه سعيده
ام سلمان تهز راسها وهي تراقبه يصعد الدرج
بعد حول 10 دقايق خلصت تجهيز السفره ودخل ابو سلمان متحمس قرب من السفره وبنبره ملاها الفرح: وين البنات
ام سلمان تناظره : الحين اناديهم
راحت الصاله وشافت عهود اللي كانت تشوف تلفزيون: عهود روحي نادي اخواتك
عهود بكسل: طيب
ام سلمان بسرعه: اسرعي ابوك يبيهم على الغدا
عهود بسرعه : ان شاء الله
ام سلمان راحت للطاوله وجلست ابو سلمان غسل يده وجلس على كرسيه ينتظر البنات ..
جات عهود بسرعه وجلست : الحين جايين وراي
نوره جات وهي تتبسم تسحب الكرسي بحماس: ياسلام ياحظنا بابا بيتغدا معنا
ابو سلمان: اجلسي بس شاطره بالكلام وين خواتك
نوره تتحلطم:جايين وراي الواحد مايقول كلمتين حلوين بهالبيت
ابو سلمان يضحك: لاقولي
جات ريم وجلست بدون نفس وبدون أي تعليق كالعاده نفسها بخشمها
ابو سلمان يناظرها: انتي ماتغيرين عوايدك دايم نفسك شاينه
ريم بقهر: لو نوير اللي جلست كذا كنت سألتها شفيك بس انا تحطون علي
ابو سلمان يهز راسه: لاحول ولاقوة الا بالله مابي فرحتي تخرب
نوره بحماس: وش عندك فرحان بابا
ابو سلمان: اصبري تجي اختك
جات شروق وبكل ادب جلست: قوه بابا
ابو سلمان يتبسم: الله يقويك يابنيتي..ناظر ببناته الاربعه بحب والابتسامه تزين ملامح وجهه: وين اخوكم
ام سلمان: سلمان اليوم رجع تعبان سبقكم بالغدا ونام
ابو سلمان: الله يعينه المهم يابنات انا جمعتكم اليوم عشان اقول لكم انه فيه رجال ولد ناس وبنعمه انا اعرف ابوه عز المعرفه عمره 30 سنه متقدم لأختكم شروق وانا وافقت بس قلت له الراي الاول والاخير للبنت وش رايك يابنيتي
شروق واللي قلب وجهها احمر نزلت راسها وهي مستحيه : مالي راي بعد رايك بابا
ابو سلمان: على بركة الله اليوم اتفق مع الناس
عهود ونوره وقفو من الفرحه : ياسلام اختنا بتصير عروس وكل وحده راحت تبارك لها من جهه
ريم بكل برود وبدون لاتتحرك: مبروك شروق
ابو سلمان يناظرهم وهو مبسوط قرب من ام سلمان اللي جالسه على يمينه قربها منه وكلمها بشويش: شوفي ريم وش فيها على طول نفسيتها شينه كذا
ام سلمان بهدوء: ان شاء الله
ام سلمان ام حنونه وطيبه وامرأه هادئه جداً وصبوووووووووووره علمت عيالها على الحب والتفاهم ودايم تحاول تكبر بداخلهم روح الترابط
:
:
:
الساعه 3:30 الظهر
منسدحه على فراشها تلعب بشعرها بفرح: ياسر تصدق
ياسر بهدوء: وش
العنود: احس اني تعلقت فيك بسرعه
ياسر يتبسم: انا بعد تعلقت فيك وحبيتك بسرعه كبيره
العنود بهدوء: ماتوقعت بعد اعجابي فيك احبك واتعلق فيك
ياسر : تدرين عنود
العنود: وشو
ياسر بفرح: كلمت امي عنك قلت لها وانا رايح الدوام اشوف بنت جيراننا ماادري هي رايحه تدرس او تشتغل بس عاجبتني حشمتها وأدبها وخاطري اتزوجها
العنود : مسوي فيها ماتدري اني ادرس
ياسر بهدوء: ماله داعي امي تعرف اني اكلمك شي بيننا
العنود: ايه صح,,ووش قالت
ياسر بحماس: قالت بيت ابو مشعل ونعم الناس بس يرجع ابوك اكلمه يكلم ابو مشعل
العنود استحت وسكتت ماعلقت على كلامه
ياسر يضحك: عنود شفيك سكتي يعني استحيتي
العنود بدلع: ياسر وخر
ياسر :اوخر وين اروح اجي عندك
العنود تضحك: صح انك ماعندك سالفه
ياسر بسرعه: ايه صح قلت لأمي ابي اشوف العروسه يمكن ماتعجبني
العنود: باللهي
ياسر بثقه: أي والله وش دراني عنك يمكن شينه عبده كويحه
العنود بسرعه: اتحداااااااااااااااااك
ياسر: خلاص لاشفتك احكم ..وبكل هدوء: عنود
العنود: امر
ياسر: مايامر عليك ظالم ..تحبيني
العنود: أي
ياسر بحنان: أي وشو
العنود: احبك
ياسر بحب: انا بعد احبك ويشهد الله ان مالي غناة عنك
:
:
:
الساعه 10 مساءً بتوقيت السعوديه 1 الظهر بتوقيت امريكا
مثل المجنون يصارخ ويرمي الاغراض كأنه يدور شي راح كل مكان الصاله والمطبخ وعند التلفزيون يدور وهو متألم راح الصاله وجلس على الارض يمسك شعره بقوه ويشده ويفرك بجسمه يضغط على يدينه بعنف عند مفاصله وبصوت عالي ملاه الالم : ياربي موقادر اتحمل اكثر
طلعت نجلاء من غرفتها بسرعه وبكل خبث: حبيبي مشعل شفيك
مشعل وهو يتفس بسرعه ومتألم: الالم يانجلاء موقادر اتحمله
وصار يحك عند رقبته ويفرك بيدينه ويصارخ: تكفين شوفيلي حل
نجلاء بدهاء: تبي بودره ؟
مشعل بسرعه: ايه ايه جيبي أي شي يخفف الالم مااقدر اتحمل اكثر
راحت غرفتها جابتها له وبدا يشمها مثل أي مدمن ماهر ومتمرس على الشم ارتاح وانسدح على الكنبه وهي يتبسم ومضيع عقله
ونجلاء تناظره وتتبسم وبصوت واطي: باقي الطريق لسه بأوله يامشعل
:
:
:
الرياض الساعه 10:30 مساءً
بالسياره ماسك الجوال ويكلم اخوه: هاه بشر يابو فارس
ابو فارس بتردد: والله ياخوي ماعندي بشاير حلوه اخوك ابو سلمان معصب بس ملتهي بسالفة بنته
فهد مستغرب: أي سالفه
ابو فارس مبسوط: شروق ملكتها الخميس الجاي
فهد فرحان: والله الف الف مبروك
ابو فارس : الله يبارك فيك
فهد بهدوء: وامي
ابو فارس بتوتر : والله ياخوي امك زعلانه وتقول ماتبي تكلمك هذا وهي مادرت ان عروستك عنها بنت قلنا لها بس انها ارمله وزعلت
فهد بحزن: خير ان شاء الله انا اتصرف
قفل من اخوه ودق على العنود اللي ردت عليه بسرعه وبحماس: هلا بالعريس
فهد يضحك: هلا بك زود هاه اجيب عروستي
العنود تتبسم وبحماس: ايه جيبها الحين
فهد : خلاص مشوار الطريق
وصل بيت اخته ونزل مع شذا وشهد اول مادخل بيت اخته جات العنود وام مشعل يرحبون ويهلون بـ شذا وبنتها
فهد وهو يناظرهم: ياللا انا استأذن عشان شذا تاخذ راحتها
العنود وهي تغمز له: الله معاك
مسك يد شهد وناظر شهد اللي مغطيه وجهها: شذا باخذ شهد معي بعرفها على امي وبخليها الليله معي وبكره بجيبها
شذا بهدوء:ان شاء الله
مسك يد شهد وابتسم: تنامين معاي
شهد بحماس: ايه انام معاك
ركب سيارته وطول الطريق وهو متوتر دخل البيت وهو ماسك البنت بيده راح لأمه غرفتها وشافها جالسه ترتب اغراض بدرج الطاوله اللي جنب السرير..
ناظرها وبهدوء: مساء الخير يالغاليه
ام سلطان ماردت عليه ولاناظرت فيه
فهد بحزن: شدعوه انا ولدك فهد الغالي اهون عليك
ام سلطان : لاماتهون ..رفعت راسها بهدوء وناظرت بالبنت :مين هذي؟
فهد بعد تردد: هذي بنت زوجتي
نهاية الفصل