بعيني كنت اراقب حياتي كيف كانت وكيف اصبحت فأنا كأي أنسان على هذه الدنيا تقلبه الأيام دون رحمه
لم ازل صغيره فأنا بالعقد الثاني من عمري ولكني اعتقد بأني عشت مالم يعشه غيري
نظرت الى الصحن المليء بالتوت امامي وشكرت الباري عز وجل فكل ماحولي رزقاً من الله فشكراً لله اللذي انعم علي ولم يحرم غيري من ما انعمه علي
الفصل الثالث عشر
الرياض سنة 1425 للهجره
الساعه 1 الفجر
منسدحه على فراشها وهي مقهوره وبصوت مسموع : لادق ولاشي وش السالفه ..
راحت عند المرايا وناظرت بنفسها بغرور :مستحيل كل هالجمال ومايشوفني لازم يدق رجعت فراشها مسكت الجوال وصارت تقلب فيه وتتمنى اتصاله بأي لحظه..سمعت نغمة الرنين انبسطت وابتسمت بخبث وهي تناظر بالرقم الغريب يتصل ..
ردت بكل دلع : الو
مشعل بتوتر : الو
ابتسمت اكثر لما سمعت الصوت الرجالي وقررت تدعي العصبيه
نجلاء بصوت وضحت العصبيه عليه: نعم وش تبي
مشعل : انا اسف
انبسطت على السذاجه الواضحه بنبرة صوته وكملت بنفس العصبيه والتمثيل المتقن: شكلك فاضي ..قفلت الخط بوجهه وهي تضحك متوقعه يرجع يدق عليها وهي تتمنى انه يكون مشعل لانه مره يناسبها وواضح انه ماله خبره مع البنات ..
بعد دقايق سمعت صوت المسج فتحته وقرت..
( انا الولد اللي بالفيصليه اليوم الظهر ..
ضحكت بهستيريه وهي مبسوطه ان الصيده وصلت لعندها وقررت تدق عليه وتبدا معاه اللعبه لما دقت عليه عطاها بزي ورجع دق عليها
نجلاء تناظر الشاشه وهي تبتسم بأستخفاف: حركات عيال العز
:
:
:
الزمن الحالي حيث توقفنا و****ب الساعه تتحرك ببطئ فالساعه تشير للـ 10:31 مساءً
فهد كان ينتظرها تنطق صمتها ونظراتها كانت تقطعه يبيها تقول شي تصارخ عليه تضربه أي شي المهم ماتسكت حس انه يموت بالثانيه الف مره صح شذا حبيبته اللي ينتظرها له سنين بس هذي الغاليه اللي مابعدها ولاقبلها غالي,,
ام سلطان بهدوء يذبح: الله يبارك لك
فهد التفت لشهد : شهد روحي الصاله شغلي التلفزيون شوي وبجيك
شهد: ان شاء الله
قرب من امه باس جبينها وجلس بجنبها: يمه انا ابي رضاك وماعندي اغلى منك بس ماعرفت وشلون اواجهك ..يمه انتي ماتهمك راحتي انا كذا مرتاح حيل ..يمه شذا بنت فقيره يتيمه وماهي كبيره على فكره ابوها الله يرحمه حرمها من كل شي وزوجها صغيره وكل اهلها ماتو بحادث ومابقالها احد وحتى هالبنت اليتيمه مات ابوها ..يعني لما انسعد واسعد اثنين معي فيها شي؟ يمه اللي اعرفه قلبك كبير تكفين الله يخليك لي ابي رضاك بدونه والله اموت
ام سلطان والدمعه بخدها: بسم الله عليك
فهد يضمها ويبوس راسها بحزن: لاتبكين يالغاليه تراك اغلى ماعندي
ام سلطان: الله يسعدك بس انا كان نفسي افرح فيك
فهد يتبسم: مو اهم شي سعادتي انا مرررررررره فرحان ومرتاح ماتتصورين فرحتي وبعدين انا ماشفت عروستي ولاشي بعد بكره بسوي حفله بسيطه بلبسها شبكتها وابيك تفرحين لي تكفين بتشوفين عيالي ان شاء الله فيه احلى من كذا
ام سلطان تتبسم : ان شاء الله
فهد : فرحانه لي وراضيه عني؟
ام سلطانه: ايه راضيه
فهد يناظرها من تحت النظاره: من قلبك؟
ام سلطان تهز راسها: من قلبي الله يسعدك
طلع من الغرفه ونادا شهد :شهوده تعالي بوريك وين تنامين عشان بكره بروح معاك السوق بشتريلك شوية شغلات وبوديك للماما
شهد تجي عنده بحب: ان شاء الله
راح معها للغرفه لحفها وباس جبينها وناظرها بحب: انا مين
شهد: عم فهد
فهد بهدوء: لامن اليوم قولي لي بابا
شهد تناظره: لا بس ماما تقول بابا راح للي ارحم من كل هالناس
فهد مبسوط: ايه صح كلام ماما ..والله سبحانه وتعالى عشانه رحيم يعوض الناس الزينه ..وعشانك بنوته شاطره الله عوضك وجابني لك اصير لك بابا ثاني
شهد مبسوطه: يعني انت الحين بابا الثاني؟
فهد: أيـــوه شاطره
شهد: طيب بابا يصير انام
فهد يضحك: ايه يصير تصبحين على خير
:
:
:
الساعه 11:30مساءً بتوقيت السعوديه 2:30 الظهر بتوقيت أمريكا..
وقف وهو يحس بصداع خفيف براسه ..راح للحمام اللي بغرفته وانتم بكرامه غسل وجهه بالمويه البارده وناظر نفسه بالمرايا ..((وش جاك يامشعل انا لازم اتخلص من هالمصيبه اللي انا فيها بس كيف وبعد تفكير نجول هي اللي تجيب هالشغلات الخايسه انا لازم اتفاهم معاها بس اخاف ماعاد تعطيني بودره وانا مااقدر اتحمل الالم اللي يقتلني سكت شوي وفكر بعدها..هذا ادمان يامشعل انت دارس وفاهم ياربي شسوي ..راح عند سريره جلس على السرير بيأس اخذ جواله ودق على توأمته..
العنود ترد عليه بحماس: شعلولي هلا والله بالغالي
مشعل يضحك: هلا بحبية اخوها تدرين اشتقت لك
العنود بدلع: ايه صح واضح والدليل تدق كل يوم انت ماتذكرنا الا كل اسبوع مره
مشعل بحزن: تدرين المكالمات غاليه ومو بس كذا بابا مايقصر بس تعرفين مشاغل
العنود بعد مااختفت الفرحه اللي بصوتها وتبدلت لنبرة حزن: مشعل وش فيك
مشعل يتصنع الفرحه: وش فيني مافيني شي
العنود مستغربه: لاتسويهم علي انا توأمتك يعني حافظتك
مشعل بعد ماتنهد: تعرفين الغربه صعبه ومو متعود عليها ..وبكل حماس: بس ماعليك تعلمت انقلش بسرعه وقريب بقدم على التوفل وبدخل الجامعه مره متحمس
العنود مبسوطه: الله يوفقك وترجع لنا سالم ..الا تعال بسألك
مشعل: اسألي
العنود: مافيه احد نسى شغله بغرفتك
مشعل مستغرب: شغله مثل وشو
العنود بعد تفكير: ماادري يعني ساعه جوال أي شي
مشعل: لا لا اساساً محد دخل غرفتي
العنود وهي تفكر بجوال سلمان: اهــــــــــــا
مشعل يفكر: وانتي ليه تسألين
العنود تضحك: بس جا على بالي لان غيبتك شكلها طويله تخيل عاد لو فيه من ناسي شغله عندك مطوله عشان ترجع له
مشعل فطس ضحك: وانا احسب عندك سالفه طسي بس
العنود بسرعه: تعال ماعرفت اخر الاخبار
مشعل: لاماعرفتها علميني انتي
العنود : شروق بنت خالي ملكتها الخميس الجاي
مشعل: بكره؟
العنود بسرعه: لا لا الاسبوع الجاي
مشعل: الله يبارك لها
العنود بحماس: وخالي فهد تزوج
مشعل مستغرب: لاتمزحين
العنود بسرعه: والله العظيم تزوج
مشعل: والله تطورات ليه ماقلتو لي يمكن كنت جيتكم وحظرت العرس بس تعالي انا مكلمكم الاسبوع اللي راح ماقلتولي غريبه
العنود وهي تتلفت : لأنه ماسوى عرس ملك عليها وبس وبعد بكره يبي يسوي حفله صغيره
مشعل: وليه عاد
العنود: لانها ارمله وعندها بنت
مشعل بسرعه: بذمتك عاد
العنود: أي والله
مشعل يهز راسه بالايجاب: المهم انه تزوج وبعدين تراك حشرتيني بزاويا بقفل ياللا سلمي على ماما وبابا
العنود: ربي يسلمك وخذ بالك من نفسك
مشعل: ان شاء الله مع السلامه
العنود: الله معاك
:
:
:
الساعه 1 الفجربتوقيت السعوديه 2 الظهر بتوقيت اسبانيا
بالسياره تناظره بفرح : وين بتوديني اليوم
احمد يتبسم لها بحنان : على الملاهي
لجين مستغربه: ملاهي مره وحده
احمد يمسح بأصبعه عند خدها الناعم: والله لأخليك تعرفين معنى الطفوله بجد اليوم وبكره بوديك ملاهي
لجين تناظره بحب: نشوف
ناظر احمدبالسواق: وقفنا عند شارع (The Painter Rosales)
السواق يتبسم: بدك تـ
احمد يقاطعها بسرعه: نبي ناكل سندوتشات من هناك ماتغدينا
السواق :اوكي
اول ماوقفت السياره ونزلت على الرصيف اللي يطل على نهر منازنارس ناظرت المنظر بذهول النهر كان عريض ممتد لبعيد وازرق صاااااااااااااااافي مره مفهومها عن الانهار كان مختلف كانت تعتقد انها مستطيله صغيره ناظرت بالاشجار الكثيره العاليه المحيطه بالنهر والجو الصافي مجموعه من الطيور تحلق حول النهر كان مشهد مذهل
احمد يلف يده حول كتوفها: عجبك النهر
لجين تتبسم بفرح: مـــره حلو
احمد يلتفت يمينه: انا ميت جوع تعالي ناكل
لجين تناظر فيه: وش نبي ناكل
احمد يأشر يمين: نبي نمشي هنا مسافه فيه واحد عنده كشك يبيع سندوتشات رهيبه لا ولحومه حلال اكلي وادعي لي
لجين بحماس : مشينا حتى انا جوعانه
مسك يدها بهدوء ..يمشي معاها مثل أي اثنين عشاق يأشر لها على النهر والاشجار ويسولف لها عن جمال مدريد وانه شهر مايكفي بهالطبيعه الجميله والمعالم الحلوه كانت تناظر حولها وتحس ان المكان منور مره وصافي والهوا نظيف مره ..
وصل الكشك سلم على العجوز المبتسم اللي يبيع وناظر لجين: نونه وش تبين تاكلين
لجين تناظره: مدري انت ادرى اطلب أي شي
طلب لهم ساندوتش لحم بالصوص والخضار وعصير ..
اول ماخلص طلبهم جا العجوز حطه لهم على الطاوله البيضا الدائريه العاديه ..جلست لجين على الكرسي الابيض وهي تناظر الصحن اللي فيه بطاطا وساندوتش فرنسي نصفين ..
ناظرها احمد وهو ياخذ نصف الساندوتش بحماس: مااعجبك؟
لجين تاخذ نصف الساندوتش: بالعكس باين عليه رهيب
احمد وهو ياكل: بالله عليك فيه احلى من انك تاكلين بجو مثل كذا
لجين بعد مابلعت اللي بفمها : لا والله مافيه ..واكلت قضمه ثانيه: احمد الساندوتش رهيب
احمد وهو ياكل: ماقلت لك
بعد ماخلص اكل شرب عصيره بسرعه: ياللا خلصي نبي نروح بسرعه
لجين تاكل بطاطا وتشرب عصيرها: وين بنروح
احمد يناظرها: خلصتي
لجين : ايه
احمد يمسك يدها ويركض : ياللا بس
لجين تضحك: طيب شوي شوي
وصل معاها لشرق النهر ووقف عند الضفه يناظرها :مستعده
لجين وهي تناظر البرندا الصغيره اللي ينلطق منها التلفريك: بتركبني هنا
احمد بهدوء: يس
لجين ترفع راسها تناظر بتلفريك وصل بعيد: لا والله مستحيل
احمد يسحبها : اقول تعالي بلا دلع
ركبت التلفريك وهي تقرا المعوذات ماسكه الحديده ومغمضه عينها
احمد فاطس ضحك: وانتي كل مكان اخذك تخافين
لجين تو تبي تتكلم بس التلفريك تحرك وصارت تصارخ: اخاف اخاف والله احمد اخاف
احمد قرب منها حطها بحظنه ولف يدينه حولها : حتى وانتي بحظني
لجين ساكته وماتبي تعلق ولاهي عارفه تتنفس وحاسه انه يسمع نبض قلبها اللي صار سريع وقوي مره
احمد يمسح بأصبعته عند جبينها : ياللا افتحي عينك انا معاك لاتخافين ترى المنظر مايتفوت
فتحت عينها وناظرت النهر من فوق شكله كان رهيب مره المشاهد كانت من فوق مو طبيعيه كان يأشر لها على الحدائق والكنيسه ويشرح لها كل شي يمرون فيه حست انها بحظنه وانفاسها مع انفاسه مالكه العالم كله تمنت لو انه يعطيها حبه فوق حنانه عشان تصير اسعد بنت بالعالم
وقف فيهم التلفريك بمدينة الالعاب ...
ناظرت فيه :مدينة العاب
احمد يتبسم: ايه ماقلت لك بخليك تلعبين والا تخافين
لجين تفكر: ماادري ماعمري جربت الهبي لاند اللي بالشرقيه عمري ماطبيتها
احمد يمسكها وهو مبسوط: الحين اخليك تجربين كل الالعاب
لجين تضحك : ياربي منك مجنون
صار يركب معها لعبه ورى الثانيه كانت تلعب مثل الاطفال شوي تضحك وشوي تخاف شوي تمسكه وشوي تضمه عمرها ماحست بسعاده مثل هالسعاده حست انها اول مره تشوف دنيا
احمد وهو ماسك الحديده اللي باللعبه: هاه مبسوطه
لجين فرحانه: مرررررررررررررررره
:
:
:
الرياض الخميس الساعه 3 الظهر..
دخلت معاها احد المشاغل الفاخره بالرياض ..
وقفت عند الريسبشن مسكت شذا من كتوفها:بسلمكم اختي بكره ملكتها ابيكم تسوون لها بدكير ومنكير و تنظيف بشره وتصبغون شعرها شوكلت و ..ناظرت بشذا وبعد تفكير: سوو لها كل شي حتى قص لشعرها ابيها تصير غير مهما كانت التكلفه ماعندي مانع
شذا بهدوء: مابي اقص شعري
العنود تتبسم: عادي براحتك يقصون لك اطراف الشعر الميته بس
شذا : طيب
العنود: ياللا انا بروح متى ارجع اخذها
الموظفه تناظرها: مو اقل من 4 ساعات
العنود : اوكي
شذا تمسك العنود: وين بتروحين عني
العنود: بروح اشتري لك ملابس لازمك جهاز ماعندك شي ينفع وان انتظرتك تخلصين ماشرينا شي
شذا : طيب بس استحي
العنود: ماعليك هنا يعرفوني زبونتهم وبيتوصون فيك
طلعت العنود وجات اللبنانيه تتبسم لشذا: تعاالي معي
شذا راحت معاها جلسوها على الكرسي لفو شعرها بفوطه مستطيله تغطي منطقة فوق الجبهه بس سدحت اللبنانيه الكرسي واستلموها وحده تصنفر رجلينها ووحده باليدين ووحده بوجهها
اما العنود اللي وصلت السوق صارت تشتري كل شي وبدون حساب اخذت تيشرتات وجينزات وتنانيير وبيجامات وحتى قمصان نوم وكملت على محالات الجزم وانتم بكرامه والاكسسوارات والمكياج وختمتها بالعطور وادوات الاستحمام
:
:
:
الساعه 6 المغرب,,
بنبره كلها يأس : ياربي بندر قلت لك لا يعني لا
بندر بترجي: مره وحده والله مره وحده
نوره بأصرار: مستحيل لاتحاول
بندر: شوفي اطلبي عشى وانا بوصله واطلعي خذيه وبس
نوره: بندر تفهم وش تعني كلمة مستحيل
بندر بقهر: ياربي نوره والله تعبت ابي اتقدم لك بجرب يمكن يوافق ابوك
نوره: لا بابا ماراح يوافق لاتظنه نفس ابوك ..بابا له افكاره الخاصه وطول ماانت بدون وظيفه حتى لومعك ملايين ماراح يوافق
بندر يتنهد : بس يانوره باقي سنه ونص واتخرج مااقدر اصبر بقول لـ بابا يشغلني بالشركه او بأي مكان وبتقدم لك
نوره : وتضيع بين دراستك والوظيفه
بندر بتردد: لابصراحه ماراح اشتغل بس بنقول كذا لـ أبوك عشان يوافق
نوره بسرعه: تبديها معاي بكذبه ..ياللا مع السلامه
بندر بسرعه: لحظه نوره اصبري انتي ماكذبت عليك بس ..
نوره تكمل: بتكذب على بابا بندر قفل احسن مابي اتهاوش معاك
بندر: ليه تزعلين انا ابي اللي بيننا يصير رسمي بأي طريقه
نوره بعصبيه: بتقفل والا اقفل انا
بندر بهدوء: خلاص نوارتي حقك علي بصبر سنه ونص
نوره تضحك: ايه الصبر حلو يمدحونه
:
:
:
الرياض سنة 1412 للهجره ,,
راجعه من المدرسه تمشي بهدوء اول ماشافته واقف قبل البيت بمسافه تسارعت خطوتها وبنبره سريعه ملاها الخوف: فهد ليه واقف هنا
فهد : انتظرك
شذا بخوف: تكفى روح اخوي او ابوي لو يشوفونك هنا يذبحوني روح بسرعه
فهد وهو يناظرها بحزن: شذا ليه تكذبين علي قولي ماحبك قولي مابيك بس لاتكذبين
شذا بحب: فهد وغلاتك عندي ماكذبت عليك بحرف
فهد: قلتي بتزوج وللحين ماتزوجتي ليه تبين تبعديني عنك
شذا بحزن: والله يافهد مابي ابعدك ابوي اتفق مع الرجال على كل شي بس ننتظره يرجع من السفر وبنتملك كلها شغلة ايام لاتعلق نفسك فيني
فهد بقهر: اتعلق انا خلاص تعلقت من زمان
شذا : لا حنا للحين صغار وهذا حب مراهقين بكره تتزوج وتنسى
فهد يضحك بأستخفاف: انا لو خسرتك بلتهي بدراستي ولاراح اتزوج اوعدك
شذا بسرعه: لاتقول هالكلام اكيد راح اسمع عن زواجك وعيالك وياللا الحين بروح لايشوفني احد
كان يراقبها وهي تمشي وقلبه ينبض مع كل خطوه من خطواتها هالطفله اللي لعب كثير معاها الى ان كبرت وصارت احلى بنوته وغصب عنه قلبه حبها
:
:
:
الرياض الزمن الحالي ..الساعه 9 مساءً
دخلت المشغل مبسوطه ناظرت بموظفة الرسبشن: هاه خلصت عروستنا
الموظفه وهي تتبسم وتأشر على كنبه مقابل الاستقبال: ايوه وجالسه تنتظرك
التفتت العنود تناظر شذا كأنها تشوفها لأول مره شعرها الشوكلت المقصوص بعنايه طبقات متناسقه واصل لأخر ظهرها ومنساب بنعومه عيونها الواسعه اللي صارت احلى مع رسمة الكحله والميك اب الناعم شفتها البارزه واللي صارت احلى مع اللون الوردي الفاتح بشرتها اللي صارت افتح وانظر وبان بياضها اكثر كان ناقصها بس لبس انيق وشوية اكسسوارات
شذا توقف: تغيرت؟
العنود تتبسم: بصراحه وماتزعلين
شذا تضحك:ماازعل قولي
العنود: صرتي انثى قبل كنتي شي ثاني
شذا تدفها: بنت تراي زوجة خالك
العنود: ايوه بدينا بحركات نص كم
شذا : لابدينا ولاشي
راحت العنود الرسبشن : ابي اجي بكره معاها الساعه 3 ونبي نخلص بدري
الموظفه: ان شاء الله تعالي بدري تخلصي بدري
:
:
:
الساعه 10 مساءً بتوقيت السعوديه 1الظهر بتوقيت امريكا
نفس الحاله ترجع له وتتكرر مثل كل يوم صرخ بقوه :آآآآآآآآآآآآآآآآآآآآآآآآ� �آآه وحس روحه تطلع مع هالصرخه ..ضغط بقوه على راسه مو قادر يحمل الألم اللي يفتت خلايا مخه ..
مثل المجنون يتكلم بصوت عالي : هذي اخرتي مدمن مخدرات ..راح ورى الكنبه وصار يضرب راسه بالجدار بلا وعي ..
نجلاء تقرب منه وتمسكه: مشعل اهدى شوي
مشعل يلتفت لها وهو قريب يتشنج من الالم: انتي ليه تسوين فيني كذا
نجلاء تمسح على شعره: ابيلك الراحه
مشعل يدفها ويصارخ : مابي الراحه اللي كذا
جلس على الارض يأن من الالم ماعاد قادر يتحمل جسمه كله شاب نار من الالم يدينه ترجف وتتحرك بسرعه وتضغط على اجزاء مختلفه من جسمه بلا وعي
نجلاء تقرب منه : اليوم بريحك على الاخر
مشعل بأستسلام وهو يفرك بجسمه ويتألم وبصوت مرتجف: سوي أي شي المهم يروح هالالم مو قادر اتحمل
قربت منه رفعت كم التيشرت ربطته بخيط مطاط ضربت ضربتين عند المفصل الى ان بان عرقه قربت الابره ضغطتها شوي وبعد ماطلع منها شويه من السائل الشفاف قربتها من يده وغرست الابره بعرقه ضغطت الى ان تسلل السائل الى جسمه تخدر كل جسمه وغمضت عيونه غصب عنه وبدا الالم يروح منه حس بتنمل بكل اطرافه رخى جسمه وانسدح وراح بعالم بدايته هدوء واسترخاء ونهايته دمار وعذاب
:
:
:
الرياض الساعه 10:30 مساءً
جالسات بغرفة العنود يرتبون الاغراض الجديده بشنطة سفر كبيره
شذا وهي تحط الجينزات وتناظر الاكياس الباقيه: كل هذي اغراض وش تركتي بالسوق
العنود بغرور: تركت لهم الشين واخذت لك الزين
شذا تضحك وبكل هدوء : ياعيني على الكلام الزين
العنود تناظرها: اقول شذا
شذا :قولي
العنود :ماتعرفين ترفعين صوتك اكثر
شذا بهدوء:لا صوتي كذا
العنود ترفع راسها: الله يساعدك ياخالي
ناظرت شذا بشهد اللي ماخذه شنطه صغيره وترتب فيها اغراضها: ماما روحي نامي
شهد ببراءة الاطفال: مو رايحه انا بعد عندي اغراض وفساتين كثيره شاريهم لي بابا فهد
شذا مستغربه: مين؟
شهد بدلع: بابا فهد
شذا تتبسم وبينها وبين نفسها : الله يعوضني فيك خير يافهد
:
:
:
الساعه 3:30 الفجر بتوقيت السعوديه 4:30 العصر بتوقيت اسبانيا
وصلو لمدينة العاب الاخوان ورنر العالميه,,
اول مادخلت ناظرت بالناس البالونات والالعاب اللي بالالوان الزاهيه مجسمات الارنب ورنر ونقار الخشب حست انها بأحد العاب البلاي ستيشن الالعاب الوانها حلوه وجودتها عاليه ..
احمد يناظرها : مدينة الملاهي هذي 5مناطق كل منطقه فيها شي وحنا الحين بمنطقة الالعاب الخطيره..وابتسم لها بعنف
لجين بدلع: حرام عليك انا خوافه
احمد مبسوط: اقول تعالي وخلي عنك الدلع
ركب معاها الافعوانيه وبلغتنا العاميه تعني قطار الموت عندنا بس طبعاً مايشبه له وماله أي صله فيه الافعوانيه في مدينة الاخوان ونر امتداداتها كبير مكونه من سكتين دائريتين كبار متصلتين بسكه ارتفاعها حوالي 12 قدم يعني رعب بمعنى الكلمه ..
لجين وهي تجلس :احمد تكفى خل نبدا بشي ثاني
احمد : لاهذي يعني هذي
لجين وهي خايفه: الله يستر
احمد : اهم شي امسكي بالحديد زين
لجين :ماسكته بس احس المجال كبير شوي
احمد يتحرك: لا انتي تتوهمين من الخوف
تحركت اللعبه اول شي ببطىء وقبل السكه الدائريه الكبيره بدت تسرع ولجين تصرخ من الخوف واحمد فاطس ضحك اول ماانقلبت فيهم اللعبه تحركت لجين بشكل غريب برا اللعبه ..وصرخت بكل قوتها :احــــــــــــمـــــــــ� �ــــــــد
احمد مسكها من وسطها :لاتخافين ماتطيحين ..وهو يسحبها خلصت الدوره بالسكه ونزل جسمها على المقعد مره وحده وبقوه حست بأنعواج قوي برجلها ..وصارت تبكي وتنافخ من الخوف والالم
احمد يناظرها وهو ممسك بالسكه بقوه: شفيك نونه
لجين وباين الالم على وجهها : رجـــلي
احمد بخوف : شفيها
بهالوقت دارت اللعبه بالسكه الدائريه الصغيره ولجين تصرخ: احمد مااقدر اتحمل خل يوقفون اللعبه
احمد صار يصارخ : stob >>stob بس مع ارتفاع اللعبه بالسكه المرتفعه وصوت الناس العالي ماسمعه المشرف على اللعبه
احمد ترك الحديده وحوط لجين بيدينه : لاتخافين انا معاك ..اول ماوقفت اللعبه وقبل لاتوصل لمكان النزول وقف قد مايقدر لان الحديده ماسكته وصار يصارخ :wit pliz I need heelb heer(لحظه لو سمحتو انا بحاجه للمساعده هنا)
المشرف على اللعبه لما شاف لجين المتألمه اللي تصرخ من الالم طلب من الناس اللي باللعبه يجلسون بأماكنهم وماحد ينزل
اول ماوقفت اللعبه بعد الحديده بسرعه وحمل لجين بدون لايحس بثقها نزل الدرج بصعوبه وصار يمشي بخطوات سريعه ومعاه واحد من الامن
احمد يكلم لجين اللي دافنه راسها بصدره وتبكي: انا اسف نونه والله اسف
وصل لغرفة الطوارىء حطها على السرير جا المسعف .. اول ماشافه احمد صاح فيه بصوت عالي: I need wmen (احتاج لأمرأه)
جات المسعفه حركت رجل لجين بخفه دهنتها بدهان شفاف ولفتها بضماد بني وقالت لهم انه مجرد رض بسيط
احمد مسكها بحب ونزلها من السرير لف يده ورى ظهرها عشان يسندها
ناظرها وهي تعرج وصار يتبسم: يادلوعه
لجين بدلع وهي مبرطمه: رجلي عورتني
احمد يضحك: خوفتيني انا ماادري وشلون شلتك من هناك لهنا يالدوبه
لجين بغرور: اتحداك مثل الريشه
احمد يناظرها: ايه صح
لجين بدلع: احلف اني دوبه
احمد يستلكع: هو صراحه صراحه مو دبه بس مو لدرجة ريشه عاد
لجين تتبسم : المهم اني مو دبه
احمد يستهبل: هاه نكمل لعب
لجين بسرعه: نــــــــــعم
احمد يضحك: امزح شفيك فتحتي عينك على الاخر توبه العب معاك يالجبانه
لجين تتحلطم: ايه صح جبانه بدال ماتقول سلامتك
احمد يهز راسه ويقلد المصاريه: سلامتك ياألبي
لجين تقلده: ربنا يسلمك
مشت معاه للبوابه وكل ماحست بأصابعه الطويله عند خصرها حست بالخجل حرارة يده اللي ورى ظهرها حسستها بالأمان والحنان كل يوم تحب احمد اكثر وتتعلق فيه اكثر..
ناظرت بوجهه وملامحه الحلوه وهو يكلم السواق بالجوال فارس احلامها وجابه الله لعندها ولاهي قادره تكسب قلبه
:
:
:
الرياض يوم الجمعه الساعه 8 مساءً
صالة بيت ام سلطان كانت مزينه كلها بالورد وكانت فيه بنهاية الصاله كوشه بسيطه كنبه لشخصين خلفيه هادئه ورود وانوار جميله عمود على اليمين مليء بالورد وعمود على اليسار مليء بالورد ..
فتحت العنود باب الصاله والكل كان متحمس يشوف زوجة فهد دخلت وفسخت عبايتها عند الباب واعطتها للعنود اللي حطتها بدورها على الطاوله لفت بهدوء والخجل مالي وجهها ماتعرف من الموجودين غير العنود وام مشعل ..الكل كان يناظرها بأنبهار مافيهم من توقع هالارمله بهالجمال ..
ام مشعل لاحظة توترشذا قربت منها ومسكتها وهي تبارك وتهلي والعنود تشاركها نوره انظمت لهم بعد ماسلمت على شذا
شذا تكلم ام مشعل بصوت واطي: وين ام فهد
ام مشعل: هذي اللي جالسه يمين الكوشه
شذا تناظر يمين الكوشه وتلاحظ وجود عجيزتين يتناقشون مع بعض بأهتمام
شذا بسرعه: أي وحده فيهم
ام مشعل: اللي تتبسم لنا حالياً
شذا قربت من ام سلطان باست جبينها بحب
ام سلطان تضم شذا: الله يحفظك يابنيتي ويقدرك تسعدين وليدي
شذا تتبسم: ان شاء الله
جلست على الكنبه وهي تراقب الموجودين وشلون يتأملونها وفيه كم عين تتفحصها..
:
:
بالمجلس ..كان الكل يضحك ويناقشون فهد على العزوبيه اللي تركها ووشلون تخلى عنها..
راح عند اخوه اللي كان واضح القهر بوجهه باس جبينه وجلس..
فهد بحب: انت سندي بهالدنيا
ابو سلمان متلحطم: عشان كذا اخذت رايي
فهد وهو يتبسم: صدقني كل شي صار بسرعه
ابو سلمان: ومالقيت الا ارمله لاوعندها بنت بعد
فهد: هالارمله يتيمه ومحتاجه من يسعدها
ابو سلمان: ومافيه غيرك يسعدها
فهد وهو يتبسم: وين الاحسن اقعد عزوبي والا اتزوج ارمله
ابو سلمان:يعني تبي تسكتني
فهد: لا ابيك تفرح لفرحتي وتزيدها ياخوي انا من زمان مافرحت طلبتك
ابو سلمان يتبسم: الله يبارك لك ياخوي
فهد مبسوط:ايوه كذا فرحني
التفت يناظر الموجودين اللي يسولفون ويضحكون الا سلمان كان الصمت جليسه وعلى غير عادته
فهد يناظر سلمان: شفيك تعبان من شي
سلمان يبتسم: ايه راسي مره مصدع مدري شفيني
فهد : اشوفك على غير عادتك
سلمان يضحك بصعوبه: اقول التهي بعروستك بس
فهد يوقف : بقول لهم ابي اشوفها خلاص مااقدر اصبر اكثر
سلمان يتبسم: ايه روح روح لاتفوتك
فهد يضحك: صح ماعندك سالفه
راح عند الباب طقه وهو يدق على العنود جوال ..
العنود جات بسرعه عند الباب: ايوه
فهد بصوت عالي من ورى الباب : ابي اشوف عروستي
العنود تناظر بالموجودات وتضحك: العريس مستعجل خلاص يبي يشوف عروسته
ام مشعل وام فارس ومعاهم ام سلمان راحو للمطبخ وهم يسولفون عن شذا اللي صارت حديث الكل حالياً
العنود بسرعه : ادخل خالي
دخل وهو كاشخ على الاخر ذقنه مضبط على الاخر ريحة عطره ملت المكان وابتسامته كانت شاقه وجهه شق
العنود تناقزه: هذا اللي مايبي العرس
فهد يناظرها بطرف عين: انتي انطمي
العنود تضحك: طيب بنطم
قرب من عروسته واول ماشافها وركز بوجهها الخجول انذهل شكلها تغير او هو نسى انها جميله لهالدرجه ملامحها الطفوليه صارت اكثر انوثه فستانها الستان الذهبي الطويل بارز جسمها بجمال شعرها الكثيف اللي مسحوب على جنب ومموج بطريقه غجريه رهيبه الكرستاله الذهبيه اللي مثبته بالجهه المعاكسه من شعرها ومكياجها الذهبي المتقن كل هذا خلاه يفقد السيطره مو مصدق نفسه بحلم او علم معقوله شذا قدامه ومتزينه له وعروسته لااكيد هو يحلم مد باقة الورد وهو مفهي ..اخذتها منه بخجل وهي ودها تضحك على شكله
العنود تضحك: خالي اجلس اجلس شكلك انهبلت ايه هذي مشكلت اللي يتأخر بالعرس
نوره تشاركها الكلام: ايه شوفي الوان وجهه وشلون تغيرت
فهد يسوي معصب: بنات استحو
نوره والعنود بنفس الوقت: لاتكفى
عهود بسرعه : ياللا لبسها الذهب
قربو منه البنات كل وحده تفتح علبه ..
لبسها الدبله ولبسته الدبله لبسها العقد الذهب وهو يرجف وساعدته العنود لبسها الاسواره ولما جا يلبسها الحلق همس بأذنها : مبروك علي انتي يااحلى من شافت عيني
:
:
:
الساعه 9 مساءً بتوقيت السعوديه .. 10 صباحاً بتوقيت اسبانيا..
استلم الصينيه الفاخره من النادل ودخل الغرفه وقف عند راسها وبصوت حنون: نونه نونه قومي افطري
لجين تفتح عينها بكسل: رجلي توجعني
احمد يتبسم: ايه انا جايب لك الاكل لعندك وبوكلك بيدي
لجين تجلس: حركات
احمد حط الصينيه ذات القواعد على رجلينها وجلس جنبها حط قطعه من الفرواله المقطعه بالشوكه وقربها من فمها: ياللا بسم الله
لجين بعد مااكلتها:لا انا مو متعوده على هالدلع
احمد يناظرها بحنان: كم نونه عندي انا من اليوم تعودي على هالدلع
:
:
الرياض الساعه 11 مساءً
قفل باب الغرفه والتفت لها وهي جالسه على السرير بخجل ..قرب منها وهو مو مصدق عينه..
فهد بعد ماباس جبينها: مو مصدق انك صرتي لي
شذا سكاته
فهد :تكلمي قولي شي وحشني صوتك
شذا بخجل: اتكلم وش اقول
فهد يوقف بحماس: ياويلي صووووووووووتك حلو
شذا وهي تتبسم: فهد لاتبالغ
جلس على الارض سند يده على رجلينها: شذا تدرين اني احبك
شذا استحت وسكتت
فهد يكمل: وتدرين انك مره حلوه
شذا تناظره مو مصدقه اللحظه: وش بعد
فهد وهو يضحك: وطماعه مره
شذا تضحك: انا طماعه
فهد يناظرها والحب واضح بعينه: ياليت كل من يطمع يكون مثلك كان الدنيا بخير..
قرب منها ضمها بحنان اخذ نفس عميق وهو مو مصدق انها بحظنه
:
:
:
الرياض يوم الخميس الساعه 8:30 مساءً
اجواء الفرحه تملأ المكان شروق بنعومتها جالسه على الكرسي المزين بنعومه وهي مستحيه ومنزله راسها طول الوقت ..
العنود ونوره يتهامسون بفرح ويناظرون شروق المستحيه
العنود مبسوطه :شوفي البنت بتموت من الحيى
نوره وهي تناظرها: شروق من يومها هاديه ومالها حس
شذا ناظرتها بفرح وراحت لها جلست بجنبها:شفيك ياعروسه
شروق بهدوء:ولاشي
شذا تتبسم: ذكرتيني بنفسي يوم عرسي وحتى يوم حفلتي مع خالك انا مثلك احس بخجل مو بس من عريسي لاالزحمه والعيون الكثيره اللي تتأملني تربكني
شروق تناظرها مبسوطه: ايه احس عيونهم مابعدت عني
شذا تتبسم لها: ماعليك منهم خليك طبيعيه وابتسمي
شروق: ان شاء الله
دق جوالها طلعته من الشنطه وردت:الو
فهد بحماس:هلا قلبي
شذا :روح قابل الرجال
فهد بسرعه: لا لا قلبي تعالي عند الباب بقول لك شغله
شذا بأصرار:مافيه اجلها للبيت
فهد:بعطيك رايي بمكياجك
شذا :بالبيت خذ راحتك وان تعطي رايك
فهد برومنسيه: وحشتيني من الصبح وانا بالدوام ماشفتك تعالي
شذا بدلع:قلت لك لا
فهد:طيب خلاص زعلت
شذا تضحك:اراضيك بالبيت
قفل الجوال وتنهد وهو مومصدق نفسه وبصوت مسموع: الحمد لله
فارس يناقزه: وش عليك ياعم مبسوط مره
فهد فاتح يده بوجه فارس: بسم الله خمسه وخميسه لاتحسدني ماصدقت اتزوج
:
:
الرياض ..الزمن الحالي يوم السبت 9 ذو القعده ,,
اول ماطلعو من صالة المغادرين بالمطارسمعت صوتها وهي مبسوطه وتنادي: لجين لونه الحمد لله على السلامه
لجين تقرب من العنود مبسوطه: الله يسلمك حبيبتي
العنود تحظنها بحنان: وحشتيني
لجين: انتي بعد وحشتيني موت بس وشلون جيتي
العنود بحماس: اول ماقالت لي ماما انكم راجعين اليوم قلت لها بجي لكم وماما رحبت بالفكره وهي تنتظرنا بالسياره ياللا
لجين مبسوطه: ياللا
مشت لجين مع العنود واحمد وراهم وقبل لايوصلون للباب الخارجي للمطار دخل سلمان وهو رافع يده ويبتسم: الحمد لله على السلامه يابو الشباب
احمد يضحك: الله يسلمك..والله حنا مهمين ماتوقعت هالاستقبال
سلمان يضحك: بلا غرور بس بابا قال مافيه من يستقبلكم وقالي اجي اخذكم
احمد يناظر العنود بطرف عين: فيه من سبقك
سلمان ناظرها وعرفها وحس بقلبه يعوره حاول يتبسم: يعني اطس..؟
احمد يلف يده حول كتفه: لايارجال بخلي حرمتي تروح معاهم وانا بجي معك
سلمان: وش هالسالفه لابروح اقول لعمتي تجي وبنتها بسيارتي وتخلي السواق يروح سيارتي الـ جاكوار على اليمين بفتحها لك عشان تحط اغراضك وبروح اقول لعمتي
احمد بخبث : وش دراك انها بنت عمتك
سلمان يتخصر:لاذكي تصدق.. مافيه غير بنت عمتي وخواتي يمكن يجون لحرمتك وخواتي بالبيت
احمد يضحك:اها احسب المهم روح لعمتك
بعد مانادى عمته وركب السياره ينتظرها تجي..سمع صوت جوال غصب عنه التفت وشاف العنود اللي جالسه ورى الراكب تطلع جوالها من شنطتها تضغط بزي وترجعه..سلمان يفكر: معقوله تكلمه جوال لا لا مو معقول ..ليه مو معقول وهي تكلمه بالشارع ..اكيد هو ناداها بنت عمتي ماتسوي حركات مو حلوه انا متأكد
احمد يسترسل بكلام يقوله من دقيقه : وبس هذا اللي صار
سلمان يلتفت له بذهول: هاه
احمد يأشر على الطريق : اقول حرك وانا لي ساعه تاعب نفسي اسولف معك وانت مو معي
سلمان منحرج: اسف شردت شوي
بعد ماتحرك سلمان التفتت العنود للجين بحماس:ماقلت لك خالي فهد تزوج
لجين مستغربه: بذمتك
العنود: أي والله
لجين: وليه ماعزمتوني على العرس ولاقلتو لي ارجع
العنود : ماسوى عرس حفله عائليه بسيطه
لجين : اها وبحماس: وكيف عروسته
العنود: بتشوفينها لما تروحين تاخذين جدتك ..حلوه نعومه هاديه ومافيه اطيب منها
لجين : اشوفك حبيتيها
العنود وهي تتبسم: شذا مين مايحبها
ام مشعل وهي تناي لجين بهدوء: لجين
لجين: امري خالتي
ام مشعل: مايامر عليك ظالم بس جدتك انا بعدين بجيبها
لجين بسرعه: بـــس
ام مشعل تقاطعها بأصرار : خلاص قلت لك بكره انتي وزوجك واصلين من سفر وتعبانين وهي ماجهزت اغراضها
لجين بأسف: ان شاء الله
غصب عنه كان مركز بعينها اللي يشوف جمالها بالمرايا ..اذنه ماكانت مركزه بشي غير صوتها اللي بسببه تسارعت نبضات قلبه ..صعبت عليه نفسه بس تأكد ان اللي هو فيه شي خارج عن ارادته,,..
بعد ماوصلو البيت دخلت معاه من الباب الرئيسي بحماس وانذهلت من الحديقه الحلوه ممر جميل للباب الرئيسي للبيت جلسه جميله على يدها اليمين مع مجموعه من اشجار الزينه تمت تغطيتها بطريقه حلوه وعلى يدها اليسار ارجوحتين كبار مره حلوين على شكل ورقه ..
سبقها لباب الصاله وفتحه وبحماس: برجلك اليمين نونه
دخلت البيت وهي مبسوطه تفاجأت بروعت الصاله المزين سقفها كله بأنوار فضيه ساحره كانت الصاله مزينه بأبجورتين كبار بمصباحين اناره واحد صغير والثاني كبير ..كنب امريكي ابيض كلاسيكي طاوله زجاجيه بلازما كبيره رف زجاجي صغير اسفل البلازما ..المطبخ كان على يدها اليسار مبني من الطوب وملبس برسلان على الطريقه الاوروبيه كان مزيج روعه من اللون البيض والبيج وكامل المستلزمات ومفتوح على غرفة الطعام ببوفيه بسيط ..غرفة الطعام كلاسيكيه ترتفع عن الصاله شوي ..
اما المجلس كان هادي ..كنب سعودي فاخرخليط من اللونين التركواز والبني طاوله بنيه خشب ثقيله تتوسط المكان بلازما كبيره رفين خشب بني اسفل البلازما ..بأخر الدور الارضي غرفة النوم المخصصه للجده وهي عباره عن غرفة نوم فرديه كلاسيكيه باللون العسلي..
بالطابق الثاني غرفة النوم الاساسيه ..كانت عباره عن غرفة نوم امريكيه باللون البيج الفاتح جداً صوفه جميله طاوله دائريه بكرسيين وشاشة بلازما صغيره واللحاف خليط من اللونين الاحمر والبيج الفاتح..
لجين وهي مبحلقه بالغرفه: احمد من جدك هذا بيتي
احمد يتبسم: ايه
لجين والفرحه شلت حركتها: لاانا مااقدر على كذا
مسكت بالجدار بقوه بيد واليد الثانيه حطتها على راسها وهي مغمضه عيونها,,
احمد بسرعه: لجين شفيك
لجين وهي تضحك: لايعني مثل المسلسلات المصري بيغمى علي من الفرحه
احمد يدفها وهو يضحك: مالت عليك خرعتيني ..ياللا نرتب اغراضنا وننام طبعاً انتي بتنامين هنا اما انا بنام بالغرفه اللي قبالك واي شي تحتاجينه ناديني
لجين تحاول تكون طبيعيه: يعني ماوريتني غرفتك
احمد يبتسم بعنف: نفس غرفتي بالشرقيه حملتها على هنا تراها عزيزه علي
لجين: اها
احمد ياخذ شنطته: ياللا تمسين على خير مرررررررره تعبان
لجين: نوم العوافي
دخلت الغرفه قفلت الباب وهي تناظر بجمال الغرفه وبينها وبين نفسها هالفرحه اللي بقلبي ناقصه..
:
:
:
الساعه 3:30 الظهر..
اول ماتحركت سيارة السواق خارج القصر الفخم تحرك فارس وراهم بسيارته ..
جنا تناظر جود وتلتفت ورى تشوف فارس اللي ماشي وراهم: هذا له فتره على هالحاله ماغير يلاحقنا من مكان للثاني ماعنده شغله غيرنا
جود تناظره ببرود: خليه يذلف بكره يتعب
جنا تناظره: والله ماشكله
جود تناظرها بقهر: وش دخلنا فيه تعب او لا خلاص اعتبريه بودي قارد مع انه ماينفع حتى بودي قارد
جنا فطست : مسكين هالرجال متأمل فيك خير
جود تأشر لها روحي: أي رجال هذا بزر اصغر مني كبر تركي اخوك
:
:
الساعه 4 العصر,,
جالسه على السرير وتهزه : فهد قوم بلا كسل عشان تروح المستشفى
فهد يفتح عينه بكسل: ياربي مالي مزاج اروح
شذا بسرعه: لاوش اللي مالي مزاج قوم انت دكتور
فهد يجلس ويمسح على شعرها: ياربي ياشذا خايف اني بحلم حلو وبصحى منه
شذا:لا الله لايقولها وارجع للكابوس اللي كنت فيه
فهد يلبس نظارته ويناظرها بقهر: اها يعني بس هذا اللي يخليك ماتبينه يكون حلم
شذا بسرعه: لا لا مو بس كذا
فهد يكتف يدينه: لاخلاص انا زعلت
شذا تدفه: ياللا عاد فهد بلا دلع تزعل من شذا حبيبتك
فهد يتنهد: المصيبه مااقدر
صوت طق على الباب وبعده صوت عالي: اقدر ادخل
فهد يضحك: ادخلي
شهد ببراءه: بابا ليه تصحى متأخر بعدين تروح دوامك وترجع الصبح تعبان وتنام وبعدين مااشوفك
فهد يضحك: تعالي حبيبة بابا
شهد تجي لحظنه بسرعه: ماتتعودها
فهد فاطس: شوف البنت وشلون تتكلم
شذا تتخصر: ياقوي جاك اللي اقوى
فهد يتحلطم: انا قوي حرام عليك والله اني مسكين
شذا: قوم تغدى بس
شهد: ايه صح بابا قوم
:
:
:
الساعه 10 مساءً,,
ياسر بحب: وحشتيني
العنود: انت اكثر
ياسر: عنود ابي رقم ابوك
العنود مستغربه: ليه
ياسر : بابا يبي يكلمه
العنود: ليه؟
ياسر مبسوط: يعني مسويه ماتدرين
العنود بخجل: الا ادري
ياسر : خلاص هاتي الرقم ابيهم بسرعه يتفقون عشان اشوفك
العنود: بس عشان تشوفني
ياسر: الشوفه هي البدايه بعدها الملكه والزواج ووقتها تصيرين لي
العنود: واثق اني موافقه
ياسر بسرعه: حلوه ماتوافقين تعلقيني وبعدها ماتوافقين
العنود تضحك: لاماعليك بوافق
:
:
:
الساعه 10:30مساءً بتوقيت السعوديه ..1:30 الظهربتوقيت امريكا
جالس عند رجلها على الارض يسحب فيها وبنبرة ترجي: تكفين نجلاء شوفي لي حلا ذبحني الالم
نجلاء ببرود: وش اسوي قلت لك مافيه
مشعل يحك صدره بعنف ويناظرها ويسحب بشعره وبصوت عالي: تصرفي الله يخليك
نجلاء وهي توقف وبنبره مليانه كذب:ياحبيبي ياحياتي هذا بفلوس مو بلاش وانا ماعاد عندي
مشعل يحط يده المرتجفه بمخباته يطلع محفظته ويفتحها بسرعه لدرجه طاح كل شي فيها ..طلع بطاقة الصراف مدها لها:خذيها بسرعه جيبي أي شي يهديني يخفف الالم
نجلاء:مااعرف الباس
مشعل يصرخ: سنة ميلادي رووووووووووحي تكفين
طلعت من الشقه وهي تضحك مبسوطه ناظرت بالساعه وبعد خمس دقايق دخلت راحت غرفتها جات عنده اعطته الابره وبعد مااستسلم للنوم طلعت من الشقه عشان تروح اقرب صرافه تسحب اللي تقدر عليه..
:
:
:
يوم الخميس 13 ذو القعد ..
الساعه 9 مساءً .. جالسين عند التلفزيون يشوفون فيلم
وقف بكل برود: انا بروح انام توصون شي
لجين تناظره: بدري تو الناس
احمد: حاس بصداع وفيني النوم
لجين بأسف: اها طيب تصبح على خير
احمد: وانتي من اهل الخير
طلع الدرج بسرعه وهي تراقبه وتفكر الى متى هالبرود اللي انت فيه يااحمد وش اسوي معاك ماعاد اقدر اخبي حبي لك اموت بالدقيقه الف مره وانت قريب مني وبعيد عني بنفس الوقت ..احمد زاد بعده عنها من يوم رجعو من السفر ورجع دوامه ..
:
:
الساعه 10 مساءً
العنود بسرعه : لاياسر مستحيل
ياسر بهدوء: شفيك انتي اقول لك بعلق الكيس على الباب وانتي خذيه بس اخاف انتظر و اعطيك الكيس وانتي راجعه ويجي احد نفس هذاك اليوم
العنود بعد تفكير:طيب متى انزل اخذه
ياسر: 10 دقايق بس ببدل وبروح احطه
العنود:طيب
جلست تراقب ساعتها وبعد 10 دقايق نزلت طلعت بهدوء للحديقه وفتحت الباب الرئيسي الخارجي وشافت الكيس معلق سحبته بسرعه وقفلت الباب فتحت الكيس وهي مبسوطه ..بس بسرعه تغيرت هالفرحه وهي تحس بجسم قوي يرتطم فيها يكفت يدينها ويكمم فمها بعنف حاولت تصرخ بس ماقدرت صارت ترافس بقوه بس هالجسم كان اقوى منها
نهاية الفصل