جاءت نسمات الصيف وبدأت اشعر بقليل من الحر وقمت بأستبدال كوب الكوفي بكوب من المثلجات البارده..
نظرت الى صفحتي البيضاء والتي بحاجه الى ان املئها وشعرت بالحزن على شخصيات روايتي نعم هم مجرد شخصياتي من مخيلتي لكن يحزنني ماوصل له حالهم
بهذا الفصل من روايتي سأكشف القليل من الحقائق وستتضح الصوره بعين الكثيرين منكم
الفصل الخامس عشر
يوم الاثنين سنة 1424 للهجره,,
الساعه 5 المغرب..
عنود تنزل معاها الدرج وهي مقهوره: والله نوف بدري ماجلسنا شي
نوف وهي ماخذه دور المسكينه: شسوي اخواني مو راضين اتأخر قالو تغدي معاها ونبي نجي ناخذك
العنود بقهر: اف هذول اخوانك ماعندهم سالفه
وصلت معاها لباب الصاله..وقفت نوف وناظرت العنود:خلاص لاتطلعي الجو حار اشوفك بكره بالمدرسه
العنود: ان شاء الله
طلعت من بيت العنود ناظرت بالشارع الفاضي وراحت بسرعه لبيت ياسر اللي تارك الباب مفتوح لها ..اول مادخلت جاها صوته من ورها بحماس وهو يضحك: هلا نوفتي الحلوه
نوف وهي تشيل غطاها: هلا بك ياحبي
ياسر وهو يمسكها من خصرها ويدخل معاها داخل البيت: شفيك تأخرتي
نوف بقرف: هذي العنود انشبتلي
ياسر بعد ماجلس على الكنبه: وهذي كل مره بتجيني لازم تمرين عندها
نوف :شسوي تعرف اخواني والا انا مابي اروح بيتهم الخايس
ياسر: اما بيتهم الخايس
نوف بعد ماسكتت: لاوالله بيتهم مو خايس الا فخم خدم وحشم وسواق مالت علي بس
ياسر : ادري اشوف ولدهم يسلم علي من فوق خشمه هالورع المتخلف
نوف تشيل عبايتها وتقرب منه تحظنه: ماعلينا منها هي واخوها ..يسور حبيبي ماتبي ترجع تسكن عند خالك اقرب لي هناك اروح لبنت خالك واشوفك
ياسر يبوس خدها: لاياعمري هنا ببيت ابوي الله يرحمه احسن مافيه احد وناخذ راحتنا ونسوي اللي نبيه
نوف تتبسم : اللي تبيه ياعمري
ياسر وهو يناظرها: والله ياانتي حلوه تدري بهالشي والا لا
نوف بدلع: الا ادري
:
:
:
الرياض الزمن الحالي ..حيث توقفنا..والساعه تشير للـ 1:30 ظهراً
حس بشلل برجلينه وشذا تصارخ وتتلفت وتركض للحمام وتطلع برا وترجع له تمسكه من ملابسه وهي تبكي بحرقه : فهد ابي بنتي تكفى
فهد يمسك يدها وهو متألم: لاتسوين بنفسك كذا شذا لاتنسين انتي حامل
شذا وهي تبكي وتسحب يدها: أي حمل فهد انت ماحلفت لي تخلي بنتي عندي
فهد راح للطاوله اخذ محفظته ومفتاحه وجا عندها حط يده عند كتوفها ودفها بشويش: ياللا تعالي ببلغ الشرطه هذا اكيد عمها ماغيره وماله حق ياخذها وحتى لو كان له حق انتي اشهدي ضده وتقارير المستشفى والبنت
شذا تبكي: ياويلي ضاعت البنت انت ماتدري هذا وش ممكن يسوي
فهد يمسكها : انتي امشي ماعليك ان شاء الله بنلاقيه
شذا تبعد يده : وخر عني انت السبب انا قلت لك ماراح يتركنا بحالنا
مرر اصابع يده بقوه بشعره الكثيف تنهد وقالها بهدوء: طيب تعالي
مشت معه بهدوء وبعد ماركبو السياره شغل الراديو على الـ mbc fm
كانت أغنية حاتم العراقي ..ياطير..
-( العشره ماتهون الا على ابن الحرام ..ياطير يامسافر له وصل له هذا الكلام ميت حبيبك قول له والليل أبد ماينام,,
كان كل شوي يمرر يده بشعره وكأنه يتألم او يبعد نظارته ويمسح عيونه بعنف..
شذا واللي خافت عليه: فهد شفيك
فهد بهدوء: سلامتك حبيبتي ..بس علميني وين يصير البيت..
شذا واللي مو مرتاحه لحاله بدت توصف له البيت ..
اول ماوصل عند بيت ام ماجد وقف السياره واول مافتح الباب مسكته بسرعه: وين رايح لاتروح اخاف
فهد يبعد يدها بهدوء ويتبسم ابتسامه تخفي حزن : لاتخافين
نزل من السياره حط يده على الجرس وماشالها ..وكلها دقايقه وفتح الباب واحد واضح عليه انه مو في وعيه تمام ويترنح شوي وتفوح من فمه ريحه مره بشعه ..
فهد يبعد عنه شوي : اعوذ بالله ..انت ماجد
ماجد بدون نفس وهو مازال يترنح ويغمض عيونه بطريقه غريبه: ايه انا ماجد وش تبي
فهد: ابي اقول لك جيب البنت احسن لك
ماجد يضحك مستخف بفهد: ومين حظرتك
فهد يناظره: معاك الدكتور فهد زوج شذا
ماجد يتحلطم : مبسوط بنفسك دكتور يعني اتحزملك وارقص مثلاً
فهد بهدوء: لا بس ابيك ترجع البنت امها اولى بتربيتها والا انت مو كفو تربيها
ماجد بعصبيه: مالك دخل انا كفو والا مو كفو وياللا انقلع
فهد بهدوء وبثبات: انا بنقلع بس ابي اعلمك انه خلال 24 ساعه ان مارجعت البنت ببلغ السلطات وبعطيهم المستندات حق الجرعه اللي اعطيتها للبنت مسبقاً
ماجد بأرتباك: انا ماعطيتها شي
فهد يتبسم: والله الشرطه تقدر تحلل دمك وتعرف انت تتعاطى شي او لا وبعدها تحكم فكر بكلامي زين ..طلع كرته من مخباته ورماه داخل البيت : هذا كرتي بعد ماتفكر دق علي وانا بجي اخذ البنت ماله داعي تتعب نفسك
..ومشى بهدوء بدون لايسمع رد من ماجد اللي كان يناديه
اول ماركب السياره التفتت له بسرعه: هاه وش صار
فهد ببرود: ولاشي
شذا التزمت الصمت لأنها تشوف حالت فهد كيف صايره..
اول ماوصلو البيت دخل بسرعه للحمام وانتم بكرامه وماقفل الباب راح للمغسله حط راسه فيها وغسل شعره ..شذا واللي ركضت وراه صارت تناظره بذهول واول مارفع راسه ونزلت المويه على وجهه شهقت بقوه: انت مجنون تبي تنجلط
فهد صار يحرك راسه يمين ويسار وبدت قطرات المويه تطير من شعره اللي مليان مويه
شذا التفتت بسرعه تناظر : ياربي ..وراحت بسرعه جابت له منشفه صغيره ورجعت مدتها له بسرعه : خذ نشف شعرك
فهد: مابي انشفه مرتاح كذا وانا مو بزر انا دكتور وعارف شسوي
شذا تحط المنشفه على راسه : لاماتدري وش تسوي ونشف شعرك
فهد يمسك يدها وواضح من قوة مسكته انه معصب ويتكلم بهدوء قد مايقدر: قلت لك اعرف شسوي ..بعدين ليه خايفه علي مو انا السبب بكل شي خلاص بحريقه انتي ماخفتي على هالجنين اللي ببطنك واللي انا روحي فيه وانتظره من سنين جايه الحين مسويه خايفه علي ..ومشى عنها بعد ماترك يدها
شذا مشت وراه بسرعه ووقفت قباله: فهد حبيبي انا اسفه والله ماكان قصدي بس من حرقت قلبي على بنتي
فهد يهز راسه بالايجاب: حصل خير انا بس عصبت شوي
شذا تتبسم: بروح اسويلك عصير ليمون من يدي عشان تروق
فهد يتبسم: اوكي
:
:
:
الساعه 6 المغرب ,,
جالسه على الأرض تبكي وهي تسمع صوت المسجات واحد ورى الثاني وحاطه يدينها على اذنها وتبكي بحرقه :مابي اقرا مابي ..
سمعت صوت طق على الباب وقفت بسرعه وراحت الحمام وانتم بكرامه تغسل وجهها
ام مشعل فتحت الباب ودخلت وهي تتلفت : عنوده وينك
العنود طلعت من الحمام وانتم بكرامه وهي تتبسم غصب:هلا بالغاليه
ام مشعل تناظها مستغربه: شفيه وجهك
العنود تناظر وجهها بالمرايا :شفيه احمر؟
ام مشعل: ايه
العنود تتبسم: ايه حاطه كريم تقشير وحرق وجهي
ام مشعل بعدم تصديق : اها ..وصارت تناظر العنود بصمت
العنود تقطع السكوت وهي تتبسم بأرتباك : شفيك ماما
ام مشعل تجلس على السرير وتضرب بيدها على السرير: تعالي اجلسي هنا
العنود بعد ماجلست : خير ماما
ام مشعل تتنهد : موعاجبني وضعك يابنتي حابسه نفسك بالغرفه كل الوقت وماتاكلين زين وش صار بك وين ضحكتك زمان
العنود بعد ماتنهدت: ابد حاسه بالوحده فاقده مشعل كان يعطيني من وقته
ام مشعل : انا وين رحت اجلسي معي
العنود بحزن : انا اجلس معاك بس بابا مااشوفه غير وقت الغدا وكم دقيقه بالليل وماتجي الساعه 9 الا انتي وبابا نايمين
ام مشعل تمسح على شعرها: حبيبتي نظمي نومك معنا بعدين اهتمي بطيورك شوي من زمان ماشفتك بالحديقه معهم
العنود بعد ماتذكرت طير ياسر: مابيهم خلاص
ام مشعل تتنهد: علميني وش خاطرك فيه ودك نسافر او ننتظر الأجازه الكبيره ونروح لمشعل
العنود تبوس راس امها: صدقيني ماما مافيني شي بس تعرفين الدراسه ونظام نومي غير نظام نومك بس مافيه شي ثاني
ام مشعل توقف: اتمنى هالشي ياللا تعالي حظري العشا معاي
العنود تتبسم: خلاص شوي والحقك
بعد ماطلعت امها ناظرت بالجوال اللي على الطاوله نزلت دمعتها وهي تاخذه وتفتح الرسايل ..رساله من نوف ورسالتين من ياسر,,
فتحت اول شي رسالة نوف
:
عنوده حبيبتي شفتي جوالي؟
:
ضحكت بسخريه بعد ماقرت الرساله وبصوت واطي: طبعاً خايفه اشوفه وبعد تفكير : انا كيف ماخطر لي افتش الجوال اكيد فيه مسجات ثانيه لا اكيد تمسحهم نوف تخاف من اخوانها او يمكن ماتخاف بعد اللي شفته ماعاد اصدق شي ولاابي اشوف شي مابي انقهر فوق قهري
بعد تردد كبير فتحت اول رساله من ياسر,,
:
ياحلوه شكلك ماتفهمين وماتجين الا بالعين الحمرا انا كلامي واضح بتفهمين بالطيب والا بسود عيشتك
:
بكت بصوت خايف مسحت دموعها بسرعه وفتحت الرساله الثانيه
:
معك 48ساعه او بيصير شي مايعجبك
:
استجمعت كل قوتها ودقت عليه ..
ياسر وهو مبسوط وبكل ثقه: كنت عارف انك راح تدقين
العنود بصوت عالي مليان خوف: انت وش تبي مني اتركني بحالي ماكفاك اللي اخذته
ياسر يضحك بهستيريا: لاصراحه مااكتفيت
العنود بقرف: حقيييييييييييييير لكن ماراح اجيك ولاابي اكلمك وسوي اللي تبيه بابا ماراح يصدقك
ياسر بغرور وبنبرة تحدي: بس راح يصدق المقاطع اللي برسلها لجسم بنته الحلو ياحبيبة بابا
صارت تبكي بحرقه وحست بكل جسمها يرجف: لالا انت كذاب
ياسر بعد ماضحك: انتي اول ماصحيتي كنت اضبط الكاميرا وانتي شفتيني بس الظاهر ماتوقعتي بصورك...وكمل بقرف: شوفي انا مو فاضيلك اخر فرصه لك بعد بكره ..بوقف الظهر رجعت ابوك للبيت وان مادقيتي وقلتيلي انك موافقه برسل المقاطع لبابا ياروح بابا بس ان شاء الله تعجبه
قفلت بوجهه وصارت تبكي اكثر واكثر ابوها لو وصلته هالمقاطع يروح فيها ..قطعها صوت المسج فتحته وهي ترجف
:
نسيت اقول لك حطيت على المقطع ميوزك ورتبته خليته مقطع اغراء جنان راح يحس بابا وش كثر بنته مبسوطه باللحظه
:
رمت الجوال بقوه على الجدار وصارت تصارخ بقوه :حقير غبي حيوان تافه وبدون شعور بدت ترمي كل شي على الأرض وتحذف عطوراتها على الجدار وهي تصارخ وتبكي ..
ام مشعل فتحت الباب بسرعه وانصدمت بالمشهد راحت عند بنتها تحاول تمسكها : بسم الله عليك يابنتي
العنود ناظرت امها وهي ترجف وتنافخ وتبكي :تعبانه ..ماكملت كلمتها الا وهي طايحه مغمى عليها على الأرض
ام مشعل جلست على الأرض وهي مذعوره تهز ببنتها ودمعتها على خدها: عنوده شفيك بسم الله عليك ...باست خدها وهي تحس انها شوي وتنهار معها ماعندها قدره تحملها وابو مشعل مو بالبيت..طلعت بسرعه من الغرفه نزلت الدرج بسرعه اكبر مسكت الجوال ودقت على ابو مشعل مره ومرتين مارد قفلت وهي تبكي خايفه على بنتها وبعد تفكير دقت على اخوها فهد ونفس الشي مارد قفلت بسرعه وقررت تدق على اخوها ابو سلمان خصوصاً ان بيته قريب دقت على ابو سلمان ..
:
:
ابو سلمان اللي كان تو واصل البيت بعد ماقفل باب الصاله رد عليها: هلا والله بأم مشعل ..وبسرعه: شفيك علميني ..وبصوت مرعوب: شفيها العنود
سلمان اول ماسمع اسم العنود فز من مكانه وراح عند ابوه ونوره قربت من ابوها ..وام سلمان طلعت من المطبخ على صرخته..
ابو سلمان بعجله : خلاص انا جايكم جايكم
سلمان يمسك ابوه : شفيهم بيت عمتي
ابو سلمان يفتح الباب :ماادري عمتك تقول بنتها طاحت عليها وماتتحرك
سلمان بسرعه: بجي معاك
ابو سلمان واللي كان متوتر : ياللا عشان تسوق انت اللهم اجعله خير
راح سلمان بسرعه اخذ مفتاحه من الطاوله وطلع مع ابوه ..تحرك بسيارته بسرعه ووصل بيت عمته بزمن قياسي وماحس بنفسه الا وهو يلحق ابوه لداخل البيت ..
ابو سلمان بعد مافتح باب الصاله: وينك ياام مشعل
ام مشعل بصوت عالي : تعال انا هنا
رقى الدرج وسلمان وراه ..
استقبلتهم ام مشعل وهي تبكي ولابسه عبايتها: انا حطيت عبايتها عليها البنت ماتتحرك
ابو سلمان دخل وصار يناظرها وهو مرتبك مو عارف وشلون يحملها
سلمان قرب منها وهويشيلها بسرعه: بابا الله يهديك البنت بتروح مننا وانت تناظر فيها ..حملها بسرعه وبخفه وهو يركض فيها حس انه مشهد وينعاد عليه مو قادر يتمالك اعصابه ولا يوقف نبضات قلبه ..ام مشعل وابو سلمان كانو يلحقونه بسرعه ..
وصل سيارته فتحت ام مشعل الباب اللي ورى حط العنود وركبت ام مشعل عند راسها ركب ابو سلمان وركب سلمان وتحرك بالسياره بسرعه
اول ماوصل المستشفى فتح الباب بسرعه مو مهتم لوجود ابوه او عمته شالها ودخل فيها وناظر بالممرضه : وين غرفة الطوارىء..
الممرضه مشت قدامه وهو يلحقها بسرعه الى ان حط العنود على السرير وطلع بهدوء بعد مادخل الدكتور..
ام مشعل وابو سلمان اول ماشافوه راحو لعنده بسرعه :هاه وش صار
سلمان : ولاشي الدكتور عندها
بعدها بدقايق طلع الدكتور وناظرهم: انتم اهل المريضه
ام مشعل بخوف: ايه شفيها
الدكتور : انهيار عصبي
ام مشعل تشهق وهي تحط يدها على فمها: انهيار عصبي
سلمان: وش السبب دكتور
الدكتور: اكيد تعرضت لصدمه قويه
ام مشعل مستغربه: وش صدمته البنت مدللينها اخر دلال
الدكتور : ايه واضح عشان كذا البنت عندها جفاف من سوء التغذيه
ام مشعل بحزن : والله تعبت معها يادكتور ماترضى تاكل
الدكتور: عموماً انا عطيتها ابرى تهديها وراح تنام عندنا الليله
ام مشعل: اقدر اشوفها
الدكتور: هي نايمه الحين خلوها ترتاح
سلمان اللي راح بعالم ثاني وهو يفكر: انهيار عصبي وصدمه وامها تقول ماترضى تاكل معقوله هالغبي اللي تحبه ماعاد يبي يتزوجها
قطع افكاره صوت جواله ..اول ماشاف نوره المتصله رد عليها بسرعه: هلا
نوره: هلا بك شفيها العنود
سلمان :انهيار عصبي
نوره مستغربه: انهيار عصبي من وشو
سلمان: ماادري حتى عمتي مستغربه
نوره بحزن : تصدق انا اليوم لما جتني البيت كانت تكلم اخوها وهي تبكي والله حزنت على حالها
سلمان بهدوء: الله يعينها
ودع اخته ببرود وهو يتذكر النظره الغريبه اللي شافها اليوم بعيون العنود
:
:
:
الساعه 9 مساءً بتوقيت السعوديه ..12 الظهربتوقيت امريكا
فتح باب الشقه بهدوء التفت يمين ويسارمالقى احد بالصاله راح للحمام والمطبخ واخيراً غرفة نومها برضو مالقاها انبسط انه مالقاها وبدا يدور بكل مكان بالتسريحه ودولاب الملابس مالقى شي حس بتوتر وبدت اعصابه تفلت يبي يلقى جواز سفره ويطلع قبل ترجع نجلاء بدت انفاسه تتسارع وراح للطاوله اللي بجنب سريرها وكانت امله الأخير جلس على الأرض يفتح الأدراج بسرعه ويدعي ربه انه يلقاه ..
جاه صوتها اللي خلاه يلتفت بقهر كانت مستنده ع الباب ومكتفه يدينها وتتبسم: مشعل حبيبي وش تدور علمني بعطيك اللي تدور عليه بدون لاتتعب نفسك وتضيع وقتك
مشعل يوقف : ابي جوازي
نجلاء تضحك بهستيريا: وانت متوقع اني بهالغباء عشان اتركه لك بالغرفه للمعلوميه انت لو تدور بالشقه كلها وتقلبها فوق تحت ماراح تلقاه
مشعل بعد ماتنهد: يابنت الناس وش تبين مني وش ضريتك انا فيه عشان تسوين كل هذا فيني
نجلاء بطفش: اف لاتسوي لي دور المسكين ترى مالي مزاجك .. ومشت عنه..
مشعل لحقها بسرعه ووقف بوجهها وبنبره جديده من نوعها تحمل حده غريبه عن مشعل :اسمعي انتي انا ماعاد اتحمل وابي اتخلص منك ومن هالسم اللي بجسمي ولو على موتي يعني لاتفكرين تطلعين لي مسدسك الغبي موخايف منك والجواز سوي فيه اللي تبينه ماعاد تفرق معي ..ومشى للباب بسرعه واول ماحط يده على المقبض..
صرخت نجلاء بصوت عالي: اوقف انت تحسب بيعالجونك وبيرجعونك بلدك لاياحبيبي بيلعنون خامسك
مشعل التفت ببرود: خلاص مايهمني اكثر من المخدرات ..ورفع كم التي شرت :واثر الأبر انا صرت مثل أي حقير مدمن ماله قيمه
نجلاء ترفع حاجب: طيب انا مستعده اعطيك جوازك دامها ماعاد تفرق معك
مشعل التفت لها وهو متبسم ويشد شعره وهو يحاول يقاوم الصداع: جد والله
نجلاء بخبث: محتاج للأبره
مشعل يمسح وجهه وبصوت عالي: مالك دخل هاتي الجواز
نجلاء تأشر على الكنبه قبال التلفيون: طيب اجلس
مشعل بعصبيه: مابي اجلس خلصيني بروح قبل يزيد الألم
نجلاء : خايف ماتتحمل الألم وتطلب الأبره
مشعل يصارخ: خلصيني بس
نجلاء ببرود : اجلس بوريك شي ضروري وبعدها .. حطت اصبعها عند عيونها : بسلمك الجواز من عيوني
مشعل يجلس وهو يهز رجله بتوتر : طيب خلصيني
راحت نجلاء غرفتها ورجعت بعدها بثواني معدوده شغلت الدي في دي حطت سي دي وناظرت مشعل والابتسامه الخبيثه شاقه وجهها شق قالتها بكل مكر: ركز بالسي دي اللي برسل منه نسخه لماما ونسخه لبابا ونسخه لتوأمتك الحلوه
مشعل ناظرها بأستغراب وناظر بالشاشه الزرقا اللي مكتوب عليها LODING,,
انتظر العرض يبدا وهزت رجله كل مالها وتزيد من الألم والتوتر اول مابدا العرض انفتحت عيونه على اخرها وهو يناظر بصورته الصافيه اللي بدون ملابس تماماً ومع بنت اول مره يشوفها ناظر بنجلاء اللي كانت تتبسم: مين هذي ومتى صار
نجلاء تكتف يدينها: ياحبيبي المدمن والفاقد مرات يسوي اشياء ومايحس لنفسه
مشعل يهز راسه : لامستحيل جبتي لي بنت وصورتيني بعد تبين تجيبين لي المرض
نجلاء تضحك: لاتخاف البنت سليمه
مشعل يتف بالأرض: انتي احقر شخص انا عرفته
نجلاء تناظره بقرف: اقول كل تبن وشوف المقطع الثاني مسكت الريموت وتقدمت للمقطع الثاني
ناظر بشكله وهو مهزوم وهو ضعيف وهو منتهي كانت مجموعة لقطات له وحده يشم البورده ووحده ياخذ الأبره وحالته بعد ماياخذ المخدر حس ان وده يبكي العبره خانقته والانفاس تحتبس بداخله وتحرقه ناظرها بهدوء: وش تبين مني كل هذا عشان الفلوس قلت لك بعطيك
نجلاء تتبسم: وانا قلت لك الف مره مابي فلوس بحساب
مشعل يناظرها: وانتي تحسبين بابا كل ماقلت له بيعطيني بالهبل فلوس
نجلاء : هذا شي انا احدده المهم الحين تبي جوازك وارسل هالهديه لأبوك والا بتصير سنع معاي ازين لك
مشعل وهو يحك بيدينه : ليه انا ليه مالقيتي غيري وليه تسوين كذا اصلاً
نجلاء تناظره بقرف: اول شي اخوي هو اللي اعطاني اسمك وقال هذا ابيه لأنه غني وانا ماسألته من وين عرفته بس بعدين عرفت ان بابا الله يرحمه كان يشتغل عند ابوك
مشعل: وكذا تجازون بابا
نجلاء بقرف: والله بابا ياحبيب بابا ماسوالنا شي بالعكس اعطانا تعويض زباله بعد موت بابا وماما ومارضى يعطي اخوي فلوس عشان ينزل للسعوديه وكان يبي يوديني لبنان مع انه مالي احد هناك او يخليني مع عمي بالسعوديه وتبي الصراحه انا اكره الشعب السعودي لأنه شعب مغرور وشايف نفسه
مشعل بعد ماوقف: انتي مو سعوديه؟
نجلاء وهي تضحك : لا انا لبنانيه بس عايشه من ولادتي بديرتكم الخايسه وجايه امريكا عشان اخوي مو عشان ادرس عشان لاتسأل سؤال ثاني مالي خلقك
مشعل مستغرب: لهالدرجه انا كنت لعبه بيدك لهالدرجه كنت غبي ماشفت جواز سفرك ولاشي عنك جيت معاك هنا مثل المهبول
نجلاء وهي تضحك: ايه انت اغبى من عرفته
مشعل يصارخ : انطمي ياحقيره يالملعونه انتي اللي مثلك ماتستاهل الا التراب ياتراب
نجلاء تقرب منه وتدفه بسرعه على الكنبه وتثبته بيدها اليسار وتحط المسدس على راسه بيدها اليمين : مابدي اسمعك تحكي ولاكلمه بدك تسكت او بخليك تندم فهمت والا لا
مشعل يحاول يبعدها عنه :اشوف طلعتي على حقيقتك
نجلاء: مو شغلك
مشعل :وخري هالمسدس عني ادري ماراح تموتيني لأنك لو اموت انا ماراح تستفيدين شي
نجلاء تضحك بسخريه: ياحبيبي فيه الف واحد مثلك واغبى منك يعني لو تموت انا ماراح اخسر شي
مشعل وهو متألم وحاس بوجع بكل جسمه خصوصاً وانه بدا يحس بحاجته اكثر للجرعه: طيب وخري بسوي كل اللي تبونه بس بقول شي
نجلاء تبعد عنه وتحط المسدس ببنطلونها الجنز من ورى : وش تبي تقول اخلص
مشعل: التسجيل بالجامعه مابقى عليه شي ابي اختبرالتوفل وابي اسجل عشان ادخل الجامعه واكمل دراستي غير كذا وان كنت بصير فاشل بالدراسه ماتفرق معي تموتوني ترسلون المقاطع لبابا تزيدوني ادمان مايهمني ..مشعل كان خايف من قصة السي دي واكيد عندها منه اكثر من نسخه بس كان لازم يخاطر ويقول هالكلام وبعدها ياتصيب او تخيب ماوده يصير مدمن وحاله وغير ذا مادرس يضيع عمره بالأدمان
نجلاء بعد تفكير : بالطقاق تبي تدرس ادرس بس ابي اقول لك من اليوم ماراح تخطي خطوه برا البيت لحالك فيه بودي قارد يبي يلحقك وجوالك باخذه
مشعل بعد تفكير : واهلي لازم اكلمهم
نجلاء تضحك :لازم ياحبيبي والا كيف بتجي الفلوس بس تكلمهم قدامي
مشعل وهو يضغط على يده: موافق اهم شي اكمل دراسه
نجلاء وهي تتبسم بخبث: اللي يسمعك يقول تبي تركز وتنجح وانت مدمن
مشعل: مالك دخل انا بتصرف ..غمض عيونه من الألم وبدا يحك بصدره
نجلاء تقرب منه: تبي أبره
مشعل بعصبيه وبصوت عالي: لا لالالالالالاوخري عن وجهي
نجلاء بلا مبالاة: كيفك بعد شوي يزيد الألم وتجي تترجاني تبيها ..ضحكت ومشت لغرفتها وهو يناظرها بأحتقار ويحاول قد مايقدر يتمالك الألم ..اول ماوصلت عند غرفتها وقبل تدخل وقفت وناظرته وبصوت عالي: صح نسيت اقول لك السي دي ان كنت تبيه خذه عندي نسخه منه
:
:
:
الرياض 12:جمادى الثاني: 1426للهجره الساعه 7صباحاً
وفي وقت سابق..
بطريقهم للجامعه عشان التقديم ,,
نوف تناظرها بمكر: انتي شفيك علميني من متى نخبي على بعض
العنود بعد تفكير: اسمعي بعلمك
نوف بحماس: ايوه
العنود بأرتباك: يابنت عاجبني ولد جيرانا ماادري من اشوفه وش يصير فيني انهبل والمصيبه بيتهم اشوفه من دريشة غرفتي وماغير اراقبه حلو يانوف عاجبني
نوف تفكر: معقوله تقصد ياسر اكيد هو لأنها تقول تشوف بيتهم من دريشتها ..نوف تضحك وبصوت مسموع : بالله عليك هذي السالفه
العنود منحرجه: أي والله
نوف: لاوتراقبه بعد والله انك فاضيه
العنود: اقول لك عاجبني وعلى شوي بحس اني احبه
نوف بينها وبين نفسها : بحاول احمسها تكلمه دامه ياسر ..نوف تسوي فيها تفكر وبصوت مسموع: طيب دامه عاجبك حاولي تلفتين انتباهه
العنود: اسكتي احسه لاحظ اني مشفوحه عليه
نوف بسرعه: لا لا يلاحظ بس خليه يلاحظ وجودك
العنود: كيف طيب رمضان باقي عليه كثير كنت بقول لك اخذ صحن أي شي لهم
نوف بينها وبين نفسها: هالخبله ماتدري ان ياسر ساكن لحاله ..ضحكت وبصوت عالي : هذا طموحك يالخبله
العنود: طيب شسوي
نوف: اسمعي ان صار وقبلونا بالجامعه جربي مره افقعي كفرات سيارة السواق وصارخي على السواق الين يجيك هو يشوف وش السالفه
العنود بعد تفكير: وش دراني بتجي الصدفه وهو واقف برا بيتهم بعدين سواقنا يوقف السياره داخل الكراج
نوف: انتي دبري عمرك وغير هذا راقبيه من هنا الى بداية الدراسه يمكن يشتغل او شي ويصحى الصبح
العنود بعد تفكير: ايه اليوم يوم اطلع كان صاحي ويشرب شسمى شاهي واخذت نفس عميق بعد كلمتها
نوف فاطسه: لاانتي منتهي لهالدرجه عاجبك
العنود شارده: ياشيخه احلى من القمر مرررررره حلو اول مره اشوف واحد شكله كذا
نوف : شوقتيني اشوفه
العنود: انقلعي مافيه
نوف بينها وبين نفسها: حلوه انقلعي ماتدري انه خويي فوق فلوسها وكل شي عندها حتى الولد اللي عاجبني هفت نفسها عليه
:
:
الرياض ,,الزمن الحالي..
الساعه 10 مساءً..
بعد ماخلصو عشى جلسو عند التلفزيون ..
لجين وهي تناظر احمد بحب: احمد تبي عصير
احمد وهو يناظر التلفزيون بأهتمام: ايه هاتي لي تفاح
لجين بحزن وهي تناظره ومقهوره انه مافكر حتى يناظرها: طيب
راحت المطبخ حطت عصير التفاح بصينيه حديد ومعه كاسين واخذتها للصاله حطتها على الطاول وبعد ماملت الكاسات ..اعطت احمد كاسه وهي اخذت كاستها وجلست بجنبه
احمد بعد ماشرب ومازال يناظر التلفزيون بذات الاهتمام: مشكوره نونه
لجين حطت الكاسه على الطاوله وهي مقهوره: العفو بس احمد مااحب القنوات الأخباريه بدل القناة
احمد مركز: اصبري اصبري
لجين اخذت الريموت وبدلت القناه
احمد التفت لها واخذ الريموت بسرعه: نونه مو وقتك
لجين قامت للرسيفر وغيرت القناة
احمد مقهور: ياربي لجين ابي اشوف البرنامج
لجين توقف بوجهه وبكل دلع: لا مافي ماحبيته انت مو جالس لحالك
احمد يتبسم وبنبرة تهديد: ترى اقوم اعضك
لجين تهز كتوفها: مابي واتحداك تسويها
احمد يحط عصيره ويوقف بسرعه :طيب اوريك
ركض وراها وهي تركض وتصارخ
احمد وهو يركض وراها : صايدك صايدك
طلعت برا للحديقه طلع وراها وشاف الحديقه هدوء تلفت يمين ويسار وهو مستغرب: لجين اطلعي بس مهوب وقت مزوحك ..ماجاه رد منها
ناظر بالمكان اللي يملاه الظلام عدا انارات صفراء خفيفه وبصوت عالي: لجين اطلعي بس ماالعب معك ..ونفس الشي ماجاه رد منها..تبسم ودخل الصاله: هالخبله اكيد دخلت من باب المجلس ..راح للمجلس فتح الباب وشاف المكان يعمه الظلام فتح النور وراح عند الباب الخارجي لقاه مقفول بالمفتاح من الداخل ..طلع يركض وهو متخرع وراح للحديقه يتلفت بسرعه ويمشي بالحديقه وبصوت عالي: لجين وينك يرحم امك ردي علي مو مزح هذا قلبي بيوقف..زاد خوفه لأنه مالقى منها رد ..
مشى يسار وهو يتلفت مثل المجنون فجأه ضرب بشي ناظر تحته ورفع رجله الثانيه بسرعه عشان لايدوس على لجين اللي كانت ممدده بالأرض وكان راح يطيح من الحركه الجمبازيه اللي سواها..
نزل بسرعه لمستواها حط يده تحت جسمها وهزها بقوه :لجين لجين نونه شفيك
فتحت عينها وتكلمت بهدوء وبتعب: احمد بموت
احمد بسرعه: بسم الله عليك..تلفت وهو متوهق فسخ تي شرته بسرعه وحطه تحت راسها : دقيقه وبرجع لك لاتتحركين ..
راح غرفته بسرعه اخذ مفتاح سيارته وقبل يطلع تذكر ان ماهو لابس تي شرت لبس اول تي شرت شافه بوجهه وراح غرفتها اخذ عبايتها ..
نزل بسرعه اول ماوصل عندها نزل لمستواها لبسها عبايتها وحط الغطا بشكل عشوائي مسك يدها اليمين ولفها على رقبته وحط يده اليسار تحت ظهرها ويده اليمين تحت افخاذها
لجين وهي تمسكه بتعب: احمد لاتحملني
احمد وهو يشيلها ويوقف عدل وضعيتها بحركه سريعه ناظرها وهو يمشي : لابحملك من ثقلك هالحين وبعدين خلاص صرت متمرس بالسالفه حطت راسها بهدوء على صدره حس بأنفاسها السريعه الساخنه وزاد توتره..فتح السياره بالريموت اللي ماسكه راح عند باب الراكب سند جسمها برجله وفتح الباب بيده اليمين سحبه برجله وحطها بالكرسي وعدل وضعيته عشان تنسدح قفل بابها وركب مكانه بسرعه فتح الكراج وبعد ماطلع قفله وتحرك بسرعه للمستشفى ...
بعد ماوصلو المستشفى ودخلها للطوارىء وقف برا وبعد دقايق طلعت الدكتوره..
احمد راح عندها بسرعه : هاه دكتوره طمنيني
الدكتوره: كول الألم دا والتعب اللي بجسمها من الحراره دي حرارتها مرتفعه اوي حديها ابره تخفف دا كولو بس حعمل لها تحليل حمل بالأول
احمد بسرعه: من ..وسكت ,,كان يبي يقول من وين بتكون حامل من الهوا
الدكتوره تناظره: من ايه؟
احمد بأرتباك: من قال انها حامل
الدكتوره: فيه احتمال تكون حامل والأبره حتكون خطر ع الجنين
احمد مبتسم على الاخر ويقلد اللهجه المصريه: اعملو لها تحليل ياليت تكون حامل دنا نفسي اكون ام قصدي أب وضحك
الدكتوره تضحك: ان شاء الله
بعد مااخذت الأبره صارت احسن مسكها من يدها ومشى معاها بشويش اخذ الدوا من الصيديله وبعد ماركب معاها السياره ناظرها : خوفتيني عليك
لجين تتبسم: جد خفت علي
احمد: أيه والله اللي مو مستوعبه معقوله تعبانه وتدارين وساكته
لجين بهدوء: عادي بعدين متعوده اسكت طول عمري اتعب ومرات اطيح بالفراش ومحد يدري عني
احمد يناظرها وهو يتبسم: لابس هالحين تغير الوضع فيه من يداريك ويخاف عليك
لجين: الله يخليك لي
اول ماوقف سيارته بالكراج نزل بسرعه فتح لها الباب ومسكها مشى معاها بهدوء .. لما وصلو للغرفه فسخها عبايتها علقها وفتح لحافها :تعالي نامي انا اليوم بصير الممرض
لجين بعد ماانسدحت :احمد
احمد : عيونه
لجين بخجل وهي مرتبكه :انـ ـ ا
احمد يناظرها: قولي لجين انتي وشو
لجين : تعبانه ومحتاجتلك
احمد قرب منها جلس على السرير بجنبها ..
لجين بعد ماحطت راسها على صدره: جسمك دافي الظاهر انت بعد فيك حراره
احمد واللي توتر بعد ماشم ريحة عطرها الناااعمه: هاه لا مافيني شي..جاه صوت من داخله : شفيك متوتر هذي زوجتك انت مو جالس تسوي شي غلط ..رد بسرعه على هالصوت: لاوش اللي زوجتي انا لازم اعرف حدودي
لجين تحط يدها عند خده: احمد احمد
احمد اللي كان شارد: هاه
لجين : اقول لك ملابسي مضايقتني ابي ابدل جيب أي بيجامه..لجين كان قصدها انه يجيب البيجامه عندها ويطلع وهي تبي تلبس
احمد واللي فهم غلط: هاه ايه طيب
راح جاب البيجامه حطها على جنب ركب على السرير وقرب من لجين فتح اول زرار بالبيجامه وهي ترجف وموعارفه وش تسوي مصدومه بالموقف ..فتح الزرار الثاني وهو يحس بأنفاسها سريعه ..لأنها كانت متوتره ..رفع عينه ناظرها قرب منها بدون لايحس وباسها بحب
:
:
:
الرياض 12:جمادى الثاني: 1426للهجره الساعه 12:30 ظهراً
يوم التسجيل للجامعه..
وبعد ماوصلتها العنود للبيت..
دخلت غرفتها قفلت الباب وجلست على السرير طلعت الجوال من شنطتها ودقت على ياسر..
ياسر وهو مبسوط: هلا والله بالزين كله
نوف: هلا بالنصب كله ههههههههههه
ياسر : افا بس
نوف :يسور عندي لك اخبار
ياسر بأنصات: وش اخباره قولي
نوف: العنود خويتي معجبه فيك وتراقبك من دريشة غرفتها
ياسر وهو يضحك: قديمه لمحتها كم مره واخذت بالي انها تراقب
نوف بقهر: وليه ماقلت لي؟
ياسر: ماادري ماكنت متأكد
نوف : طيب هذا انت تأكدت وش ناوي تسوي
ياسر بعد تفكير: والله ماادري
نوف: اسمع انا قلت لها تراقبك الى ان تبدا الدراسه عشان تقدر تخترع صدفه هي شافتك اليوم طالع الصبح انا قلت لها يمكن يشتغل انت اطلع كل يوم الصبح نفس موعد اليوم عشان تحسبك تداوم
ياسر بطفش: اف لامابي مو فاضي لها اليوم كان عندي شغله كل يوم اطلع من صباح الله وين اروح
نوف: روح بيت خالك نام هناك قول لهم مااقدر انام بالبيت او أي شي عشان أي فرصه تصير لي بشوفك وبكذا راح تزيد لقائاتنا
ياسر بحماس: بذمتك
نوف: ايه والله ..لكن ابيك تضبطها هي غرقانه مايبي لها شي الصدفه اللي انا بدبرها بتحسم الموضوع
ياسر يسوي رومنسي: لا لا انا مااقدر اغيرك ياجميل
نوف تضحك: اقول وخر من بنت للثانيه قال مااقدر اغيرك
ياسر يضحك: وش عندها اللي ماتعرف غيري
نوف بسرعه: ايه صح اشرب شاهي كل يوم وانت طالع العنود عجبتها قصة الشاهي خلها تحسبها عاده فيك
ياسر: هوانا صح احب الشاهي بس وشو كل يوم قالو لك مصري
نوف: اسمع الكلام وانت ساكت عشان العنود تحس بجو الدوام اللي انت داخل فيه
ياسر: اهم شي ماتطول هالسالفه
نوف: وانت وش خسران
ياسر: مالي مزاج شكلها بنت على النيه ومو فاضي اضبطها وسالفه
نوف تضحك: ياشينك ماعندك صبر بالعكس هذي راح تكون احلى تجاربك بتجرب معها اللي ماعمرك جربته
ياسر يتبسم بخبث: دام كذا خلاص تم
:
:
:
الرياض الزمن الحالي ..
يوم الأثنين ..الساعه 7:20 صباحاً
بعد ماسمعت البوري ..طلعت اول ماركبت السياره وماشافت العنود ناظرت بالسواق : وين العنود
السواق: انا مافي معلوم ..ورفع الجوال :هذا حق انتي والا لا
نوف تاخذه بسرعه: ايه جوالي وين لقيته
السواق: انا في شوف ورى يوم امس ..فيه مسج انا مايدري وفيه يفتح
نوف فتحت المسج بسرعه قرته وناظرت بالسواق وهي متخرعه: قريت المسج ؟
السواق : لا انا مافي معلوم عربي
نوف بخوف: فيه احد شافه
السواق : لا بس انا
نوف بعد ماارتاحت: اشوى
السواق واللي راح لطريق الجامعه على طول ..
نوف وهي تناظر بالطريق:حتى نوره ماراح تجي
السواق: مافي يجي
نوف مستغربه : شفيهم هذول
:
:
الرياض ..بالمستشفى ..
الساعه 8 صباحاً,,
فتحت عيونها بتعب ناظرت بنوره اللي جالسه بجنبها تقرا بالمصحف
ابتسمت بتعب وبصوت خافت: مارحتي الجامعه
نوره تحط المصحف على الطاوله وتوقف: الحمد لله على سلامتك وين اروح وعنودتي تعبانه
العنود وهي تبكي: اصيله نوره
نوره تقرب منها: شفيك عنودي
العنود تضم نوره وتبكي: تعبانه يانوره
نوره بحزن : وش متعبك
العنود: محتاجه لمشعل احس اني وحيده
نوره تمسح على شعرها: لاتحسين هالاحساس انا اختك أي وقت تبيني اجيك او تعالي عندي
فهد يطق الباب: ممكن ادخل
نوره بحماس: ايه عمي
العنود مسحت دموعها بسرعه
فهد بعد مادخل : هاه اخبار مريضتنا اليوم
العنود وهي تتبسم: الحمد لله
فهد يناظر نوره: الحين بيجيبون لها تاكل انتي اهتمي بهالمهمه لازم تاكل زين والعصير خليها تشربه كله
نوره : من عيوني
اول ماطلع من الغرفه حس بالهزه بمخباته طلع جواله بهدوء وشاف الرقم الغريب: الو
ماجد: الو دكتور فهد
فهد: معك مين يتكلم
ماجد: انا عم شهد
فهد بثبات: فكرت بكلامي
ماجد: ايه وين اجيب البنت لك انا مابي مشاكل
فهد: انا ادل البيت بخلص مناوبتي وبجي اخذها
ماجد: طيب بس بشرط
فهد بقهر: ولك وجه تتشرط
ماجد: ايه هذي بنت اخوي الله يرحمه الوحيده ومابي احد يحرمني منها
فهد: محد بيحرمك منها كل مابغيت تشوفها كلمني وابشر
ماجد بكل نفاق: تبشر بالجنه وانا بأنتظارك فمان الله
فهد: فمان الكريم
:
:
الرياض يوم السبت 6/ شعبان /1426للهجره
اول يوم بالدراسه..
الساعه 7:20صباحاً
اول ماوصلو لنوف طلعت بسرعه ومن اول بوري..
نوف: شفيك تأخرتي
العنود تضحك: كل يوم بجيك هالوقت
نوف بأستغراب: ليه
العنود وهي منحرجه: اشوف ولد جيرانا الى ان يروح شغله
نوف فاطسه: ياليل ولد الجيران..وبينها وبين نفسها :والله منت بهين يايسور
العنود منقهره :انطمي بس ياويلي عليه ماشفت بحياتي مثله
نوف :والله بجد شوقتيني اشوفه
العنود : قلت لك قبل انقلعي مافيه
نوف تضحك وبينها وبين نفسها: والله لو تدرين كيف علاقتي مع ياسرولد الجيران ضربتي على الراس
:
:
:
الرياض الزمن الحالي ,,
الساعه 10 صباحاً
نوره تناظر العنود وتتبسم :بروح تحت بشتري شغله وبجي
العنود :طيب
طلعت برى وضغطت الزر الاخضر بسرعه: الو
بندر: هلا بهالصوت
نوره:ياربي بندر هذي ثاني مره اطلع ماابي بنت عمتي تحس
بندر يسوي مسكين : شسوي مشتاق لك
نوره: طيب ماراح اطول انا قلت لها بنزل اشتري شي
بندر: كويس يمدينا نسولف
نوره: لامايميد المصعد بجنبي والكفتيريا مهي بعيده
بندر: اها..الا تعالي بسألك
نوره: اسأل
بندر: بنت عمتك نوموها بقسم الجراحه
نوره وهي تناظر اللافتات والله ماادري هي بالدور الأول بس وشو هالدور ماادري
بندر وهو يتبسم: اها
بندر: نوره تدرين بشي
نوره : وشو
بندر: تدرين انك دنيتي وروحي وحياتي
نوره بغرور: ايه ادري
بندر يضحك : ياغرورك
نوره بعد ماحست الصوت يقطع: الو الو بندر
بندر: هلا
نوره: وين رحت
بندر:..................
نوره: شفيك ساكت ..خرعها الصوت اللي جا من وراها : ابد
التفتت بسرعه وشهقت: بندر مجنون انت
بندر وهو يتبسم ويمد لها ورده حمرا: قسم بالله مجنون فيك
نوره: روح بس لايجي اخوي وانا اقول اول مكالمه يسألني انتي بأي مستشفى والحين يسأل اسأله بايخه اثرك تبي تجي تكفى روح
بندر يهز راسه لا: خذي الورده واروح
نوره اخذت الورده وهي تتلفت خايفه: خلاص اخذتها روح
بندر بعناد: مو رايح انتي بنفسك قلتي اخوك يداوم الصبح
نوره بخوف: بندر واللي يرحم والديك روح عمي دكتور بهالمستشفى
بندر يضحك: ياللا بدينا بلكاعة البنات عمي دكتور وخالي ضابط وبابا وزير
نوره بقهر: مالت عليك قسم بالله عمي دكتور هنا وروح لأن وقفتنا غلط حتى لوبمكان عام
بندر وهو يناظرها بحب: طيب بروح بس بقلك شي
نوره:قول
بندر يتبسم وبكل هدوء : أحبـــك
نوره استحت وراحت تركض للغرفه
بندر يناظر الباب اللي يتقفل ويتنهد :ياويلي اموت انا باللي تستحي
:
:
الساعه 11 الظهر ..
بعد مااخذ شهد من عمها وبطريقه للبيت: هاه شهوده اشتقتي لي
شهد تهز راسها ايه
فهد يناظرها وهو عاقد حواجبه : شفيك شهد عمك سوالك شي
شهد تهز راسها لا
فهد :اجل شفيك تكلمي
شهد :جلست طول الوقت محبوسه ولحالي خفت مانمت مااكلت
فهد يتبسم: يابعد عمري الحين نروح البيت نفاجأ الماما برجعتك تاكلين وتبدلين ملابسك وتنامين
شهد : طيب
وصل البيت فتح الباب بهدوء وشهد واقفه وراه وهو يصارخ: شذا ..ياام شهد وينك
شذا تجي من المطبخ : هلا فهد جوعان حبيبي
فهد مبتسم على الأخر: لاعندي لك مفاجأه ..دخل وهو ممسك بالباب عشان تشوف شذا بنتها..شذا اول ماشافت بنتها راحت لها بسرعه وهي تحظنها وتبوسها رفعتها شوي وجا فهد بسرعه مسكها : شوي شوي على ولدي وحط يده على بطنها لاتعورينه
شذا وهي مستحيه: ان شاء الله
فهد يناظر شهد: ياللا بابا روحي تروشي والبسي عشان تنزلين تاكلين وتنامين
شهد بهدوء: ان شاء الله بابا
:
:
الساعه 1 الظهر ..
دخلت البيت وهي متخصره: الحين الحين بقول لماما ..وطلعت لسانها بدلع
فارس: اقول والله تقولين ماعاد اخذك معي
حور بدلع: عادي لاتاخذني
فارس يقرب منها: بشتري لك حلاوه
حور : مابي ..وبصوت عالي :ماما ماما
ام فارس تجي عندهم وتناظرهم: كل يوم ترجعون بهوشه
حور: ماما فروس يلحق بنات
ام فارس تناظر فيه: وش تقول اختك
فارس:ماعليك منها ماما رحت بيت تركي خويي قالت يلحق بنات
حور تفكر: ماما انا شفته راح مدرسة البنات ولحقهم
فارس يحاول يبين عدم اكتراثه: ماما خذيها روحي معها بيت تركي ان ماطلع نفس البيت لك اللي تبينه بس بنتك خبله
ام فارس: ليه كنت رايح
فارس: تركي ناسي اغراضه عندي بس يوم وصلت تذكرت انه اليوم بيتغدا ببيت خويه ورجعت ولاتصدقين هالبزر
ام فارس :حور حبيبتي روح بدلي ملابسك ولاتدخلين بأمور الكبار
حور تتحلطم : طيب ماما
:
:
:
الرياض يوم الأثنين 8\8\1426للهجره
الساعه 12 ظهراً
جامعة الملك سعود بالتحديد..
واقفين قبل البوابه يلبسون عباياتهم
نوف :وينها بنت خالك
العنود ببرود: الحين تجي
نوف: وش سويتي على ولد الجيران
العنود بيأس :ولاشي ماغير اراقبه
نوف تضحك:ياشيخه ماعندك سالفه تصرفي
العنود تفكر:اتصرف شسوي
نوف وهي تاخذ نفس :أي ولد الجيران انا عجبني ولد خالك صراحه عليه رزه والا ريحة العطر حقه ياويلي بس انا لو عندي ولد خال نفسه مااشوف احد غيره..وبينها وبين نفسها: انا لازم اشوف لي صرفه مع ولد خالها صراحه خقق مره دخل مزاجي
العنود: انتي شفتي ياسر عشان تحكين كذا
نوف تحاول قد ماتقدر تكون طبيعيه وتخفي ارتباكها: ياشيخه مااعتقد انه ازين من ولد خالك ولد خالك حكااااااااااايه..وبينها وبين نفسها : ياسر صح حلو بس لا ولد خالها ازين منه الف مره عليه رزه عجيبه
العنود تصفقها: هي بنت ماتستحين تغازلين ولد خالي قدامي
نوف وهي تتخصر: اعتبري ولد الجيرن ولد خالي هذا انتي تغازلينه قدامي..وبينها وبين نفسها: لاوخويي من زمان وماقلت لاتغازلينه
العنود تضحك: ياربي هالبنت غبيه شوفي لي حل بس مع ولد جيرانا تعبت بس اراقب
نوف بينها وبين نفسها: لازم اشوف لك حل حتى يسوري طفش
:
:
:
الرياض الزمن الحالي..
الساعه 2:30 الظهر,,
صار له ساعتين صاحي ..سحب على الدوام ..للحين كل ماغمض تذكر منظره هو ولجين اول ماصحى وحس بقهر ولام نفس ..
فتح باب غرفته بالوقت اللي فتحت فيه لجين باب غرفتها..اول ماشافته نزلت راسها..
احمد بقهر:لجين
لجين بهدوء: نعم
احمد واللي وضح عليه معصب: انا اللي صار البارح ابد ماعجبني
لجين واللي حست بجد بالأنكسار: وانا وش ذنبي تبي تلومني على شي انت سويته
احمد تلعثم بالكلام وناظرها وموقادر يخفي قهره: خلاص عشان لاتتكر هالحركات وعشان لااحس اني اقدر المسك بطلقك بدون لاأحد يدري عشان لاترجعين لحياتك الأوليه
لجين حست انها خلاص راح تبكي ومو قادره تتمالك نفسها دخلت غرفتها وقفلت الباب
احمد يطق الباب: لجين افتحي انا اكلمك
:
:
:
الرياض 8\8\1426 للهجره ,,
يوم الأثنين..
الساعه 2 الظهر بعد ماتغدت راحت الصاله عند التلفزيون ودقت رقم نوف..
نوف بحماس: هلا والله
العنود: هلا بك ..بنت مو قادره اصبر لبكره علميني وش خطتك
نوف تضحك وبداخلها مبسوطه ان ياسر ماخذ عقل العنود لذي الدرجه: ذابحك ولد الجيران هذا مدري وش مسويلك
العنود : اقول اخلصي علميني
نوف بكل دهائها: اسمعي
العنود بكل تركيز: معك
نوف: بكره خلي السواق يجيني قبلك وانا بخليه يروح لنوره على اساس انك باقي ماخلصتي
العنود تفكر: طيب وبعدين
نوف: بهالوقت انتي اطلعي مثل كل يوم وسوي مصدومه انك ماشفتيه وسوي فيها محتاسه والباب مقفول عليك ومفتاح ماعندك المهم انك تشدين انتباهه
العنود بسرعه: لا لا نوف اخاف
نوف تحاول تقنعها بأي طريقه: اقول اسمعي الكلام ياكذا ياتجلسين بس تراقبين
العنود بتردد : لانوف وش يبي يقول عني
نوف وهي مقهوره: يابنت لاترفعين ضغطي هو وش دراه على اساس ان السالفه جد..وبينها وبين نفسها: اف دايم تسوي فيها مثاليه
العنود بعد تفكير وتردد كبير: لا لا نوف اخاف اسوي هالحركات
نوف مقهوره : الولد عاجبك؟
العنود: ايه
نوف بأصرار: خلاص سويها لاتصيرين جبانه او انسي سالفة ولد الجيران للأبد
العنود بعد تفكير: لا وش انسى خلاص بسويها يعني اللي يحبون وش عندهم زود عني
نوف بحماس: ايوه تعجبيني ..ابتسمت بخبث وبداخلها تقول:اشوى اقتنعت
العنود: طيب ياللا باي بكلم خالي
نوف : باي..
قفلت منها ودقت بسرعه على ياسر..
ياسر: هلا بالحلو
نوف تضحك: هلا بالحب ..اسمع حبي
ياسر: هلا قلبي
نوف: بكره العنود الخبله بتسوي فيها السواق مشى عنها عشان تلفت انتباهك انت عاد شف شغلك
ياسر يضحك: بسوي انها ماطافت علي خصوصاً اني شفتها كم مره من الدريشه ومنك تأكدت من السالفه
نوف: سوي اللي يريحك المهم تجيبها
ياسر بأبتسامه خبيثه: ماعليك اجيب 10 من زيها
:
:
:
الرياض الزمن الحالي ..
الساعه 2:45 الظهر..
نوره وهي تناظر بالعنود: اقول كلي سلطه مااكلتي شي
العنود: اسكتي يانوره ماعاد لي مزاج شي احس الدنيا ضايقه فيني
نوره بأسف:ليه عاد كذا هونيها وحاولي تشوفين الجانب الحلو
العنود بحزن: أي جانب حلو تدرين حتى الطيور اللي كانت روحي فيهم قلت لماما تبيعهم
نوره بسرعه: نعم ؟ ياويلك تبيعين طير اخوي تراه موصي عليه من برا
العنود مستغربه: طير اخوك؟
نوره تناظرها مستغربه: ايه شفيك اللي جابه لك وحطه بالدريشه تدرين عاد انها فكرتي..قالتها وضحكت
العنود مفهيه: فكرتك؟
نوره :لاتقولين ماتدرين انه من اخوي كتب لك بالكرت انه منه
العنود مذهوله : أي كرت ؟
نهاية الفصل