انها الحياه مجرد ايام تمر بنا واحداث نقلبها وتقلبنا ومشاهد دائماً تمر بنا سماء زرقاء وشمساً ساطعه ..
اصوات السيارات وضجيج الشوارع نورالنهار يعلن بداية رحله جديده ..
كلاً منا له طريقته بصنع رحلته الجديده منا من يعيشها بأمل جديد ومنا من يبقى حزين ليندب الماضي
الفصل الثامن عشر
الرياض .. قبل ان نتوقف بـ ربع ساعه ..والساعه تشير للـ7:45 مساءً
واقف على باب غرفتها يطق الباب ..
لجين وواضح ان صوتها متغير : نعم وش تبي
احمد من ورى الباب وهو يحاول يفتحه بس الباب مقفول : افتحي الباب شوي بكلمك
لجين بأصرار : ماابي روح
احمد بحزن : طيب قومي نتعشا برا
لجين بصوت عالي : ماابي احمد خلاص روح اتركني بحالي
احمد متوهق : ياربي مايصير كذا جالسه تبكين وماتبين تاكلين وقافله على نفسك انا ودي اسعدك مو ازعلك لجين افهميني
لجين بعد ماانسدحت وبصوت عالي عشان يسمعها : ماعليك فاهمتك وفاهمتك صح بعد ..انا بنام لاتقول سفهتك
احمد بسرعه : اصبري بقول لك شي ..سكت شوي يبي يسمع جواب ولما ماجاه رد ..تكلم بسرعه : لجين لجين بلا عناد ردي علي ..نفس الشي مالقى غير السكوت .. ضرب الباب بقوه برجله ومشى معصب ..
التفتت للباب تناظره بحزن وتفكر : انا الظاهر مكتوب علي اشقى وماافرح بحياتي ابد
:
:
:
الرياض حيث توقفنا والساعه تشير للـ 8:5 مساءً
ابو مشعل يتبسم مبسوط: اقول لك فيه واحد جاني يخطبك
العنود بخوف وارتباك : بس بابا انا ماافكر بالزواج ابي اكمل دراستي
ابومشعل واللي بدت تختفي ابتسامته : والله يابابا انا ماتعودت اجبركم على شي وسعادتكم عندي بالدنيا انتي فكري وادرسي الموضوع وبعدها قرري
العنود تبتسم غصب عنها : ان شاء الله بابا بس ماراح تزعل لو رفضت صح
ابو مشعل يتبسم : لا حبيبتي الزم ماعلي رضاك وراحتك
العنود مبسوطه : اهم شي
خلصت عشاها وراحت على غرفتها انسدحت على فراشها وهي ماسكه الجوال بيدها وبعد تفكير ارسلت لسلمان مسج
:
سلمان بابا جايب لي عريس ويقول ولد عالم وناس
:
كلها دقايق وسمعت صوت الجوال يرن وكان سلمان المتصل .. حست بتوتر وخوف ردت عليه والأرتباك واضح بنبرةصوتها المتغيره : الو
سلمان بهدوء : تتكلمين جد والا تهايطين فوق راسي
العنود بخوف : لا اتكلم جد
سلمان بدون نفس : طيب والمطلوب مني يعني
العنود : ولاشي بس انا ماعندي احد غيرك اشكي له
سلمان معصب : وانا ماقلت لك انسيني ولاتجين تكلميني انتي من وين تفهمين ؟
العنود بحزن : انت ليه تعاملني كذا
سلمان معصب : انتي تستاهلين اردى من كذا معامله تستاهلين اوكلك تبن وماارد عليك ولااعطيك وجه انا مدري ليه دقيت عليك
العنود تبكي : حرام عليك
سلمان بطفش : اف بلا دموع تماسيح يعني ينقالك خايفه الحين ابوك يزوجك ويكتشف عريس الغفله انك مو بنت شريفه
العنود واللي زاد بكاها : سلمان حرام عليك
سلمان بهدوء : طيب طيب انا بلقالك حل عشان لاتتزوجين نهائي وتعنسين ببيت اهلك بس على فكره هذي اخر خدمه بقدمها لك
العنود واللي ماتقدر ترد عليه لأنها مو بوضع يسمح : طيب
سلمان : عن اذنك مشغول
العنود: الله معاك
قفلت من سلمان وصارت تبكي وترمي المخدات ع الارض بقهر وتصارخ : تستاهلين يالعنود تستاهلين انتي اللي ارخصتي نفسك وهذي جزاتك
:
:
الساعه 10 .. بيت ابو فارس بالتحديد ..
ماسك جواله ويناظر بالشاشه .. عند اسمها كل شوي يضغط اتصال .. اول مايطلع له جاري الأتصال بـ غرور ..يقفل الجوال بسرعه متوتر وخايف من ردة فعلها ..وغير هذا فيه شي بداخله يقول له اللي تسويه عيب هذي اخت خويك بدل ماتصون عرضه كذا تسويله ..اخيراً وبعد مشاورات بينه وبين حاله وبعد ماجاه اصرار غريب من داخله ضغط الزر الأخضر وهو يقول ياللا اللي فيها فيها ..
اول ماجاه صوتها الناعم الهادي : الــو
ابتسم غصب عنه وحس ان الدنيا نورت بعينه دخل جو مع صوتها وكأنه يسمع معزوفه موسيقيه مو كلمه عاديه مثل كلمة الو
جود بصوت اعلى وهي مقهوره : الو
فارس بسرعه واللي حس انه بأرض الواقع ولازم يتكلم : الو ..قالها بنبره مهزوزه
جود بأستغراب : نعم مين يتكلم
فارس بتردد: انا فارس
جود بعصبيه : وش اللي انا فارس فارس مين وتبي مين
فارس بخوف : انا شسمه اللي هذاك
جود متنرفزه : اقول انقلع بس انقلع ..قفلت بوجهه
فارس ناظر بالشاشه : بال ماعندها وقت ابد .. دق عليها مره مرتين وثلاث كانت تعطيه كل مره بزي المره الرابعه ردت عليه بصوت عالي وواضح انها معصبه مره : نعم خير وش تبي
فارس بهدوء : شفيك علي شوي شوي عشان اتكلم
جود واللي مازالت منقهره : طيب اخلص علي قول
فارس بعد تردد: انا الولد اللي يلحقكم كل يوم
جود مستغربه : اللي يغني ؟
فارس : ايه انا
جود مقهوره: من وين جبت رقمي
فارس بغرور: مصادري
جود بكل عصبيه : مالت عليك وعلى مصادرك فوقك صح انك ماتستحي على وجهك ياللا انقلع بحريقه الله لايردك وياويلك اشوف رقمك بجوالي والله لو شفته لأعلم اخوي ياغبي ..قفلت بوجهه بدون لاتنتظر رده
فارس يبلع ريقه وهو يناظر الشاشه وفاتح عينه على الاخر : بال بال اكلتني بقشري وراها ذي متوحشه ..حط الجوال بقهر : انا اعلمك جود يالمغروره
:
:
بزاويا اخرى وبنفس الوقت تقريباً .. بقصر ابو بندر تحديداً
طلعت بسرعه من غرفتها وراحت غرفة جنا تطق الباب بأنفعال ..
جنا بصوت عالي : تعال ري ري
جود تفتح الباب بسرعه : انا جود مو ريري
جنا تضحك : مدري العاده هو يطق الباب كذا لأنه مايجيني الا مستعجل ويبي شي ضروري
جود تقرب من اختها وتجلس على السرير وبسرعه : جنا تخيلي
جنا تعدل جلستها وبكل فضول : وشو
جود : هذا الولد اللي كل يوم يطرد ورانا
جنا : ايوه
جود : هذا اللي صوته حلو
جنا مستعجله : ايوه ايوه عرفته شفيه
جود : دق على جوالي
جنا مستغربه : بذمتك
جود : أيه والله
جنا تعقد حواجبها : من وين جاب رقمك
جود : ماادري عنه يقول مصادر
جنا تفكر : اممممممم لاتردين عليه خليه يولي هذا وش يبي اول شي يلاحقنا والحين يدق على رقمك
جود : ماادري عنه
قطع حوارهم صوت بندر : الحلوات وش يسولفون فيه وليه الباب مفتوح
جود تتبسم : ابد سوالف بنات ..تعال ري ري اجلس معنا
بندر يناظر بنفسه ويأشر بيده من راسه لرجوله : مشكله كل هالطول والعرض وري ري بس مقبوله
جود وجنا حطو يدينهم على فمهم عشان يكتمون ضحكتهم
بندر مقهور : وراك يابنت انتي وياها
جود وهي تضحك: أي عرض انت وخشمك عصقول وتتكلم
بندر : وخري زين يقول لك احسن شي بالحياه الرشاقه
جنا تضحك: صح يالرشيق
بندر قرب من جود مسكها وقومها من السرير وجلس مكانها : روحي عندي موضوع مع اختك
جود تسويله مالت : مالت عليك صح ماتستحي بعدين ماادري ليه تتعب نفسك وتنفرد فيها وهي بكره بتقولي السالفه كامله وبالتفاصيل ليه بكره مااعتقد تصبر لبكره انت تطلع من هنا وهي تجيني من هنا
بندر يناظر بجنا : جد كلام هالمهبوله ماتعرفين تكتمين سر
جنا تضحك : ماعليك منها
جود تتخصر : المهبول انت بعدين صدقني تبي تقول لي عشان كذا وفر على اختي مجهود
بندر وقف ومسك جود من اذنها : اول شي مو شغلك ثاني شي لااسمعك مره ثانيه تقولين لي مهبول فاهمه
جود وهي تمسك يده : أي أي وجعتني بعدين انت قلت لي مهبوله
بندر يترك اذنها ويجلس وبكل غرور : ايه عادي انا اخوك الكبير وياللا انقلعي
جود تتحلطم بصوت واطي ومو مفهوم وش تقول
بندر يناظرها : لاسمعيني وش تقولين
جود تمد لسانها : مابي بروح غرفتي
بندر : احسن
بعد ماطلعت جود من الغرفه التفت لأخته : ابي منك خدمه
جنا تتبسم : امر
بندر : مايامر عليك عدو بس ابيك تسويلي شغله بدون لاتعلمين اختك الخبله وبدون لاتسأليني ولا سؤال انا بعد ماتشوفينها بفهمك كل شي
جنا مستغربه : اشوف وشو
بندر : اول شي تحلفين ماتعلمين اختك
جنا تفكر : والله مااعلمها بس هالحين بتسألني شقول لها
بندر : شغلي موهبتك بتأليف السوالف
جنا مسويه بريئه : انا ؟
بندر : لاانا اجل انتي واختك شاطرات بالتأليف تنافسون سكوب سنتر
جنا : مالت عليك
بندر : الحين شلون بتعلمينها والا بتألفين لها سالفه
جنا : بألف ياللا قول
بندر منحرج : ابيك شسمه .اول ماتبدا الدراسه تشوفين لي بنت اسمها نوره
جنا : اشوفها كيف يعني
بندر : يعني تعرفي عليها احتكي فيها بأي طريقه انتي وشطارتك وانا بعدين بعلمك كل السالفه
جنا تفكر : اسوي اللي تبيه بس احلف تعلمني
بندر يضحك: مالت عليك يالفضوليه والله لعلمك اهم شي تحتكين فيها
جنا تتبسم : طيب عطني اسمها الكامل
بندر : نوره سلطان الـ........
جنا : خلاص تم ولايهمك
بندر مبسوط : الله لايحرمني منك يااحلى اخت بالدنيا
جنا تضحك: ايه احلى اخت عشان مصلحتك
بندر يضحك : لا افا عليك تشكين انك احسن من اختك الخبله
جنا تضحك : لا مااشك ولا شوي
:
:
الخميس الساعه 12 الظهر ..
طلع من غرفته ونزل الدرج شاف ام سالم جالسه قبال التلفزيون ..
وقف بنص الدرج وسألها: لجين للحين حابسه نفسها
ام سالم بحزن: أي ياوليدي
رقى الدرج بسرعه راح عند غرفتها يطق الباب بقوه وهو محكم قبضته ويصارخ : لجين بلاجنون وافتحي الباب بلا جنون
لجين من الغرفه وبصوت عالي: ماابي ولاتحاول كيفي روح اتركني بحالي
احمد معصب: انتي من امس الغدا مااكلتي شي قومي بلاغباء
لجين تصارخ : انا غبيه احمد روح والا والله العظيم لأسوي بنفسي شي خلاص مالي نفس لااشوف احد ولااكل
احمد بعد تفكير: طيب بجيب اكل وبحطه على الباب
لجين تصارخ: لاتجنني قلت لك مابي ان حسيت بالجوع بنزل اكل
احمد واللي حس انها مصره: طيب بس تاكلين بعدين
لجين: طيب طيب
:
:
:
الساعه 1 الظهر..
ماسكه الجوال ومنسدحه على بطنها وتضحك: مجنون انت
بندر يضحك: مجنون فيك يابعد روحي
نوره تتبسم: دوم الجنون يارب فيني وبس
بندر مبسوط: وغلاتك مستحيل اجن بغيرك
نوره : تصدق بندر
بندر بحب: ان ماصدقتك اصدق مين
نوره: انت غيرت لي حياتي احس انها كانت شي غير الحياه وجيت انت حسستني بمعنى الحياه
بندر حط الجوال صفق صفقتين واخذ الجوال بسرعه وبكل حماس: لا لا انا مقدر على هالكلام القوي
نوره فاطسه: يامجنون وانا اقول وش صاير
بندر وهو مبسوط: نوره تدرين انك روحي وعمري وحياتي
نوره بدلع: ووش بعد
بندر : وانا واقف تحت عند بيتكم ومن الحماس شوي وارقى الطوفه
نوره وقفت بخوف: احلف
بندر ببرود: والله
نوره بقهر: يابرودك روح بس روح
بندر: والله مارحت انا جايب لك شغله بمناسبة النجاح
نوره : باقي ماشفت النتيجه
بندر مبسوط: ادري ناجحه يابعد روحي ياللا تعالي خذيها
نوره بخوف : لا لا مااقدر وبابا بعد هنا اخاف مستحيل
بندر يسوي معصب: حنا وش اتفقنا ماتقولين لي لا
نوره: اقول لك بابا هنا واخوي برضو هنا مابي اخاف
بندر: طيب خلاص روحي لأخوك وقولي له يطلع ياخذها
نوره مستغربه: نــــــــــــــعم
بندر بهدوء: الله ينعم عليك قولي له صديقتي جايبتلي شغله مع اخوها وانتهينا اللي بالعلبه شي عادي لو شافه
نوره مرتبكه: لاانا اخاف انت ماتخاف؟
بندر بكل برود: نــو.. صديقتك هي اختي وانا ماكذبت والله اختي معك بالجامعه وماعندي مشكله لو شافني اخوك وحفظ شكلي لأني بعد فتره لما اتقدم لك رسمي بقول اختي اللي هي صديقتك رشحتك لي
نوره: ماشاء الله حاسبها صح
بندر:اووووووه تعبت وانا احسبها متى بس اجيكم رسمي وياللا اخلصي خلي اخوك يطلع لي او تدرين بطق الجرس ياللا مع السلامه
نوره بسرعه: لحظه انا بقول له بالأول انت اصبر كم دقيقه وطق الجرس
حطت الجوال على جنب ونزلت الدرج وهي متوتره كان ابوها جالس بالصاله مع سلمان..
ابو سلمان يناديها بحماس : نوره تعالي باركي لأخوك
نوره تقرب منهم وهي تتبسم: مبروك بس على وشو
ابو سلمان : اخوك يبيني اكلم زوج عمتك وده يرتبط بالعنود
نوره بفرحه كبيره: جد والله الف مبروك ياخوي
ابو سلمان مبسوط: انا متأكد ان زوج عمتك ماراح يمانع بس اخوك يبي الملكه هالحين والزواج بعد زواج اختك
نوره تناظر فيه : وليه بعد زواج اختي شروق راح تتزوج بالاجازه الكبيره باقي كثير
سلمان ببرود: لاكثير ولاشي كلها كم شهر
نوره فتحت فمها تبي تتكلم وقطعها صوت الجرس ..تكلمت بسرعه وهي تأشر على الباب: سلوم روح انت للباب صديقتي جايبتلي شغله مع اخوها
سلمان يناظر فيها: وش شغلته
نوره : شغلة بنات رح بس جيبها
ابو سلمان: رح لاتقوف ولد الناس وخليه يقلط يتقهوه
نوره كان ودها تقول لابس ماتقدر
طلع سلمان اول مافتح الباب شاف بندر اللي كان يناظر سلمان وهو متبسم على الاخر مد يده يسلم على سلمان وبينه وبين نفسه: ياويلي حركات واقف مع اخوها ..مد الكيس وقالها وهو لازال يتبسم: هذا اختي قالت لي اجيبه
سلمان يبتسم وهو مستغرب ابتسامة بندر الي ماغابت عن وجهه: ادري عطتني خبر اختي اقلط تقهوه
بندر كان وده يدخل بدون نقاش بس استحى: لا بروح الناس ظهر وقت ثاني ان شاء الله
سلمان يمسكه: حلفت عليك يارجال الوالد قالي اقولك تقلط وان مادخلت معاي تتقهوه تصير علوم عشان كذا تفضل تقهوه وبعدها الله ييسر لك
بندر اول ماسمع ان ابوها اللي يبيه يتقهوه كان وده يطير للمجلس ..تبسم وقالها بهدوء: دامها كذا نتقهوه بس دقيقه بطفي السياره
سلمان: خذ راحتك
راح طفى سيارته وهو فرحان وده يغني طاير من الفرحه طاير .. دخل ورى سلمان وهو يناظر بالبيت بفرح رقى ثلاث درجات بزاوية البيت من اليمين.. قباله كان باب الحمام وانتم بكرامه ويمينه باب المجلس دخل المجلس اللي كان كبير مره برسلان بيج 3 طاولات زجاج بالوسط وحده كبيره وطاولتين صغار كنب سعودي داير مدار الجدار باللون الأبيض تزينه خطوط زرقا سماويه ستاره عريضه مزيج من اللونين ثلاث صور ببراويز خشب وحده تحوي صورة الجد ابو سلطان الله يحرمه ووحده تحوي صورة ابو سلمان وصوره لسلمان..
بعد مافتح الأنوار سلمان اشر له على الكنبه اللي بالوسط اللي مقابلها الطاوله الكبيره :تفضل
بندر وهو يجلس : يزيد فضلك
طلع من المجلس من الباب الثاني اللي يوصل المجلس بالبيت قفل الباب وناظر بنوره: نبي شاهي وقهوه
نوره بخوف: ان شاء الله
سلمان يمسكها ويهمس لها: اخو صديقتك فيه شي
نوره : لا ليه
سلمان مستغرب: مدري عنه طول الوقت متبسم
نوره شردت : الله يستر منك يابندر لايحسون بشي بس
سلمان يدفها : هي بنت روحي بس نبي قهوه وشاهي
نوره : ان شاء الله
ابو سلمان يوقف: بجي اجلس معك
فتح الباب ودخل المجلس بكل هيبته ابو سلمان انسان متزن وله هيبه عجيبه
اول ماشاف ابوها غصب عنه وقف وارتبك مد يده:السلام عليكم
ابو سلمان وهو يصافحه: وعليكم السلام استريح ياوليدي
بندر مرتبك: العفو استريح انت
ابو سلمان يجلس:حياك ياوليدي
بندر :الله يحييك..بندر كان يناظر بأبو نوره مو مصدق انه جالس قباله كان وده يقول له ياعمي لو سمحت انا خاطري اتزوج بنتك بس سمعت انك ماراح تزوجها لي بدون لااشتغل
ابو سلمان يقطع صمت بندر: تدرس ياوليدي
بندر مرتبك: أي والله ياعمي سنه ثالثه هندسه معماريه
ابو سلمان يهز راسه بالأيجاب: ماشاء الله الله يوفقك
بندر: جميع ياعمي
ابو سلمان : الاهل عندكم يعرفون الاهل عندنا
بندر: أي والله ياعمي اختي مع بنتك بالجامعه
ابو سلمان يهز راسه
دخل سلمان وهو شايل الصينيه الكبيره اللي فيها دلتين القهوه والشاهي حطها على الطاوله الكبيره وناظر ببندر: قهوه والا شاهي يا..وسكت
بندر يتبسم: شاهي ..واشر على نفسه محسوبك بندر
سلمان يضحك: وانا محسوبك سلمان
بندر وهو ياخذ الشاهي : تشرفنا يااخ سلمان ..شرب الشاهي ووقف: ياللا انا استأذن
ابو سلمان يناظر بالساعه :تجينا وقت غدا وتمشي بدون لاتتغدا والله مااقبلها
بندر بأرتباك: والله خيرك سابق ياعمي بس بروح البيت ينتظروني على الغدا
ابو سلمان : تكلمهم وتعطيهم خبر مااقدر اخليك تمشي وهو وقت الغدا
سلمان يتبسم: بابا قال تجلس يعني تجلس لاتحاول
بندر بتوتر: خلاص دام محاولاتي ماراح تنجح امري لله اتغدا وامشي
طلع سلمان من المجلس نوره كانت واقفه عند الدرج تراقبه بأنفعال
سلمان وهو ينادي امه: ياام سلمان ياست الحبايب
ام سلمان تطلع من المطبخ وهي تضحك: امر ياوليدي
سلمان: جهزو لنا الغدا الرجال بيتغدا معنا
نوره حست بقلبها ينبض بقوه وبينها وبين حالها : ياويلي الله يستر ..
رقت الدرج عشان تاخذ الكيس لغرفتها ..اول مادخلت غرفتها حطت الكيس وكانت راح تطلع بس فضولها ماتحمل رجعت وفتحت الكيس كان فيه علبه كبيره مره دائريه بنفسجيه مزينه بشريط اخضر شالت غطى العلبه لقتها مليانه شوكلاتات من كل الأنواع (بونتي..مارس..كت كات..جالكسي..سنكرس ..كندر..) حفلة شوكلاته وفوقهم علبه سودا مربعه اخذت العلبه فتحتها لقت فيها ساعه فخمه مرررررررررررررررره سوارها احمر جلد والساعه دائريه فضيه محوطه بالكرستال ناظرت فيها بتمعن وهي مبتسمه واخذت بالها من عقرب الثواني اللي كان صغير وبأسم بندر ..ضحكت وبصوت مسموع: يامجنون سلامات البس ساعه فيها اسمك ..بعلبة الساعه كان فيه كرت صغير فتحته وقرت فيه
:
من نجاح لنجاح لاتعطين احد هالشوكلاته لك انتي بس والساعه عشان تتذكريني كل ثانيه احبك
:
ضمت الكرت لصدرها وهي مبسوطه: انت بندر هديه من السما مافيه انسان مثلك مستحيل
:
:
:
الساعه 2:30 الظهر..
كتب 3 صفحات مسج كلها
:
أحبك..أحبك..أحبك..أحبك..أحبك
:
وجالس يناظر بالرساله له ساعه ويفكر ارسل والا ماارسل ..ارسل والا ماارسل ..وبعد تفكير: خلاص برسل يعني وش تبي تسوي ان دقت علي ماراح ارد ضغط ارسال وجلس على اعصابه ..
اول ماسمع صوت نغمة الرسايل الكلاسيكيه فز قلبه فتح الرساله بتوتر
:
وش اللي احبك روح نام بس
:
فارس واللي انقهر: اف هذي ليه اسلوبها كذا..ارسل لها
:
ليه اروح انام حرام احبك يعني
:
جود لما شافت رده صارت تضحك طيب انا اعلمك ارسلت له
:
ايه حرام لأن ماما قالت لي لاتلعبين مع مبزره
:
كان ماسك الجوال ومتحمس فتح الرساله بسرعه ولما قراها انقهر صح انها ماتستحي وارسل لها
:
مين البزر يالبزره
:
شوي وجاه ردها..
:
انت البزر لأنك جاي تحب وانت للحين ترضع
:
فارس لما قرا المسج مااستوعب:ياويلي كلامها مثل الأولاد ..تذكرها كيف كانت تهاوشه ولسانها الطويل ..هذي على بالها انا كبر اخوها ..ارسل لها
:
على فكره انا اكبر من تركي
:
جاه ردها..
:
وانا بعد اكبر من تركي يعني موشطاره يابزر
:
فارس حس ان ريحته طلعت من القهر كل شوي تقله بزر ارسل لها
:
طيب انتي مواليد كم
:
ردت عليه
:
بتفتح معي سيره؟
:
ارسل لها
:
لابس ابي اعرف مين البزر فينا
:
جود قرت المسج وبعد تفكير :اكيد هو اصغر ..فكرت شوي وبعدها ارسلت له
:
انا مواليد 10\10\1409هـ
:
فارس قرا المسج وصار يضحك وارسل لها
:
وانا مواليد 5\8\1409 هـ يالبزره
:
شافت المسج وضحكت غبي مالت عليه وارسلت له
:
مبسوط بهالشهرين طس بس عطيتك وجه
:
فارس ضحك بهستيريا لما شاف المسج حقها :ياويلي انقهرت احسن ..ترك جواله وطلع من غرفته نزل بسرعه الدرج وهو يصارخ: حور حور
حور تجي عنده وهي متخصر: نعم وش بغيت
فارس ضام يدينه: سامحيني عمتي عطلت اشغالك المهمه
حور تهز راسها : خلاث سامحتك
فارس يدفها مع راسها: اولاً اسمها خلاص ثانياً تسنعي لااسنعك
حور معصبه : وش تبي او بعلم بابا
فارس يهز كتوفه: لاتصدقين خفت..عموماً كنت باخذك مشوار بس عشان طولت لسانك بطلت
حور مبسوطه: احلف
فارس: اقول لك بطلت وش اللي احلف
حور: خلاث مااطول لساني وعد
فارس يسوي يفكر: طيب خلاص روحي بدلي ملابسك
:
:
:
الساعه 3 الظهر ..طلع من بيت ابو سلمان وهو مبسوط مره ..
دق على نوره اول ماركب سيارته..
نوره بحماس: هلا والله اخيراً طلعت من بيتنا اشوفك ماصدقت
بندر يضحك: شسوي ابوك نشب لي الا تتغدى
نوره: وعسى اعجبك غدانا
بندر: ماعليه كلام
نوره بسرعه: بندوري بندوري
بندر بحب: ياعيونه
نوره: شربت شاهي والا قهوه
بندر: لاشاهي ليه؟
نوره بدلع: انا اللي سويت الشاهي
بندر بسرعه: اويلي بس وانا اقول وراه سكر زياده
نوره مستحيه: بندر بلا هالحركات استحي
بندر بحب: لبى اللي تستحي ..فاتك عمري
نوره: وشو
بندر يضحك: مسكت خط مع ابوك عمي وياعمي والله باقي شوي واقول له ياعمي انا جاي اطلب يد بنتك
نوره ميته ضحك:اما لو قلتله تصير حكايه
بندر مبسوط: ايه والله بس الشهاده لله انبسطت مره اني وسط اهل حبيبتي عقبال مااجيكم اطلب يدك رسمي
نوره : ان شاء الله ..بندوري
بندر يتنهد بحب: ياعيونه ياروحه امري تدللي
نوره: مشكور على الهديه الحلوه
بندر: مو احلى منك وماجبت شي كان ودي احط الدنيا كلها بيدك واقول لك اختاري
نوره مستحيه: الله لايحرمني منك بس الساعه حكايه
بندر :اعجبتك؟
نوره: ايه بس ماراح البسها
بندر بسرعه : وليه مالي دخل تلبسينها
نوره: بندر اخاف احد يلاحظ
بندر بحزن: لاتورينها لأحد بعدين هو عقرب الثواني ترى لفيت كثير على ماضبطتها امانه البسيها نوره طلبتك
نوره تتبسم: خلاص بلبسها
بندر مبسوط: يابعد عمري
:
:
:
الساعه 4 العصر ..
وقف سيارته عند قصر ابو بندر ..
ناظر بأخته : وش فهمتك انا طول الطريق
حور طفشانه لأنه طول الطريق كان يحفظها الكلام: اعطي هذا ..ورفعت السي دي بملل: للي اسمها جود ..واجلس اقول اخوي حلو وصوته حلو
فارس يصفقها: ياغبيه مو كذا قوليها بسالفه يعني مو فجأه
حور : ادري ..انزل؟
فارس يفتح بابه : انزلي
بعد مانزل من سيارته مسك يدها ودخل من باب القصر الكبير كان تركي جالس برا وينتظره صارخ من كراسي الحديقه: تعال تعال
فارس يقرب منه ويجلس : هلا والله
تركي وهو يناظر بحور : هلا بك هذي اختك ؟
فارس يتبسم : ايه
تركي : ياحليلها
حور بدلع : ماعندك خوات بنات ماحب اجلس مع اولاد
تركي يضحك : الا عندي تعالي باخذك لهم ..مسك يدها ..
حور تسحب يدها بسرعه : لا مااحب امسك يدين اولاد
تركي يتبسم : عادي انا مثل اخوك
حور بدلع : لا انت مو اخوي والكذب حرام
تركي يضحك : طيب امشي معي
دخل الصاله الكبيره اللي يتوسطها درج لولبي جميل ودق على جنامن جواله : الو ..انزلي تحت بالصاله انتي واختك ..اخت خويي هنا ..طيب ..
انتظر شوي ونزلت جنا ومعها جود اول ماشافو حور صارو يضحكون
تركي مستغرب : وش عليه تضحكون
جود : ماادري تك تك بس لما قلت لي اخت خويتك حسبتها كبيره
حور بهدوء : وشو تك تك
جود : تبي تتكلم ..بس تركي كان يسوي لها حركات يعني اسكتي
جنا بسرعه : هذا دلع اخوي تركي
حور فطست ضحك : تك تك انا حسبته عصفور والا شي ههههههه
تركي مقهور : زين كذا حتى هالفصعونه تضحك علي
حور تتخصر وهي عاقده حواجبها : مين الفعثونه
تركي فطس ضحك : وش قلتي
حور معصبه : اقول لك مين فعثونه
جود تمسكها وهي تضحك : ياحليها تعالي معنا
تركي وهو يضحك : خلاص سلمتها لكم
جلسو معاها بالصاله الراقيه اللي تتوسطها شاشة بلازما كبيره نقوش رائعه على الجدران ثريا كبيره ارضيه من البرسلان الراقي كنب فخم خليط من اللونين البني والذهبي ..
حور بعد ماجلست : صالتكم تشبه قاعة الاستقبال اللي تطلع بالاخبار ابوكم وزير ؟؟
جود تضحك : لا وانتي تتابعين اخبار
حور بدلع : لا بس بابا ..انتي وش اسمك
جود تتبسم : اسمي جود
حور مبسوطه : خذي هذا لك
جود تاخذ السي دي : من مين
حور : اخوي قالي اعطيه اللي اسمها جود وقولي لها اخوي حلو وصوته حلو بمناسبه
جود فاطسه ضحك : وشلون يعني بمناسبه
حور : ماادري هو قال قولي حلو وصوته حلو بمناسبه انا مافهمت بس ماقلت له مافهمت تدرين ليه
جود مستمتعه بالحوار : ليه
حور : عشانه عور راسي طول الطريق يفهمني هالكلمتين
جود وجنا يضحكون بصوت عالي ..
جنا تناظر جود : تجنن صح
جود تهز راسها : مره
:
:
:
الساعه 9مساءً بتوقيت السعوديه 12 الظهر بتوقيت امريكا..
اليوم بالكلاس طول ماهو جالس يفكر بخطط وافكار مو مضمونه بس اخيراً قرر يجرب شغله يمكن تكون ضرب من الجنون بس هي تجربه يدري انها ماراح تصيب بس يبي يشوف لو تمرد وش تصير عاقبته..
قبل لايطلع من باب المعهد اشر للبودي قارد ع الحمام وطبعاً البودي قارد لحقه دخل من الباب وراح لأخر باب عند الجدار دخل وقفل الباب اما البودي قارد وقف قبل الباب مكتف يدينه ووجهه للجدار ..
مشعل رقى الحاجز اللي يفصل الحمامين عن بعض وناظر بالبودي قارد اللي وجهه للجدار وبينه وبين نفسه :غبي ماتطفش من هالوقفه ..نزل بهدوء بالحمام الاوسط ورجع رقى الحاجز بهدوء عشان ينزل بالحمام الاول اول ماصار بأرض الحمام فتح الباب بهدوء ناظر بالباب الرئيسي اخذ نفس وطلع متجه للباب بس اعترض طريقه واحد ..مشعل متنرفز keem back (ارجع للخلف)
البودي قارد لماسمع صوته التفت بسرعه وشافه يركض لبرا ..ركض وراه بسرعه ومشعل كان يركض بكل قوته طلع برا المعهد نزل الدرج بسرعه وصا يركض بالشارع وهو يحس بركض البودي قارد وراه تجاهل الدوخه اللي براسه وعدم تركيزه وصار يركض بدون ادراك للشوارع اللي يمر فيها ولا الناس اللي يصدم فيها كل همه كان انه يضيع هالبودي قارد اللي يمشي وراه ..انعطف لمنفذ يمين اول مادخل فيه جاته ضربه قويه على راسه طاح منها على الارض وفقد وعيه ..
صحى بعدها بكوب مويه بــــــــــــــارد ..تخرع فتح عيونه وهو مفزوع يناظر بنفسه وهو بكنبة الشقه ونجلاء قباله موجهه سلاح عليه واثنين من البودي قارديه واقفين يمينها ويسارها
ناظرت فيه بقرف: امزح معاك انا ؟
مشعل وهو يحس بدوخه فضيعه : انا بس كنت ابي اجلس شوي لحالي
نجلاء وهي تحط السلاح بوضيعة الأطلاق : وانا سبق وحذرتك عموماً انت ماتهمني انا ببدا الخطوه الثانيه مع ابوك عشان احصل فلوس اكثر
مشعل بسرعه : لا لا الا بابا تكفين انا بسويلك اللي تبينه بس بابا لا
نجلاء بخبث : بعد حركتك هذي انا ماعندي غير هالطريقه اتصرف فيها
مشعل : سوي اللي تبينه والله لو تبتزين بابا او تكلمينه لذبح نفسي ووقتها ماراح تستفيدين شي وبابا ماراح يصدقك بتخسرين من الجهتين
نجلاء بعصبيه : ياحيوان انت تهدد
مشعل : لا مااهدد بس جاك العلم
نجلاء وجهة المسدس لرجله واطلقة بدون مايهزها شي
مشعل يصارخ من الم الرصاصه : يــــــــــــــــــــــاح قيره رجلي ناظر بالدم اللي يطلع من رجله وحس بدوخه اول مره يشوف دم كذا
ضحكت بقوه : هذا عشان تعرف انك بالنسبه لي مجرد حشره
مشعل يصارخ : ليه تسوين كذا..تكفين الله يخليك الا بابا انا مستعد اسوي أي شي بزيد لك الفلوس بقوله بسافر بفتح مشروع اللي تبين اوعدك ايه حتى لو تبين فلوس الحين بعطيك عندي ساعتين مره اسعارهم فوق بابا جابهم لي وصدقيني مستحيل يشتري ساعه سعرها تحت الساعات اهتمامه
نجلاء تجلس على الكنبه اللي بجنبه: طيب نشوف
الألم اللي برجله بدا يزيد غير الوجع اللي براسه وبدا يحس انه محتاج لجرعة المخدر كل جسمه يوجعه ويرجف ..ناظر فيها : شوفي لي حل لرجلي
نجلاء : خلك كذا ماعندي حلول
مشعل وهو يفرك بيدينه : طيب هاتي ابره مو قادر جسمي كله يعورني احس بموت
نجلاء ببرود : تستاهل اكثر من كذا
مشعل وهو يصارخ من الألم ويفرك بيدينه ورجله : تكفين ماعاد اتحمل الألم الله يخليك ابوس رجلك شوفي لي حل
نجلاء تضحك وتمد له رجلها : تعا بوسها
مشعل نزل على الأرض وصاريزحف لها الى ان قرب منها : ابوس رجلك تكفين الألم ذبحني ..باس رجلها وانسدح على ظهره يصرخ من الألم
نجلاء وقفت : تصرفو معاه
:
:
:
الساعه 10 مساءً ..
ناظرت بالسي دي اللي كانت ناسيته ..
جنا بحماس : شغليه خلنا نسمع
جود بهدوء : طيب
راحت للستيريو حطت السيدي وانتظرت ..
ومثل ماتوقعت نغمات العود المتقنه كانت جميله جداً جلست على الكنبه بجنب جنا وهي تنتظر صوت فارس ..
بدا يغني بهدوء وبصوته الساحر..
قالو ترى مالك امل في قربها لو يوم أبعد وجنب دربها هذا هو المقسوم ..(قالو ترى ..عبادي الجوهر)
جود تناظر جنا : صوته حلو
جنا : شوفي كيف ضابط الأغنيه تتوقعين ليه يسوي معاك كذا
جود تاخذ السي دي : مدري عنه
جنا : يمكن يحبك
جود : خليه يولي مابي حبه قال يحبني قال
جنا : والله انك صادقه خليه يولي بس مااعتقد انه يضحك عليك لأنه صديق تركي مره
جود تناظرها : بهالزمان كل شي متوقع قومي بس
جنا بهدوء : صادقه
:
:
الرياض الساعه 11 مساءً ..
طق الباب بشويش ماسمع منها جواب ..طق الباب بقوه : نـــونه ردي علي
لجين بصوت عالي : احمد بنام بلا ازعاج
احمد معصب : وش تنامين مااكلتي شي من امس الظهر مجنونه انتي
لجين بصوت عالي : مالك دخل فيني كيفي نفسي وحره فيها
احمد مقهور وبصوت عالي : انتي زوجتي وش اللي حره بنفسك
لجين تضحك بصوت عالي عشان يسمعها : لا زوجتك ؟ احلف عاد تو ادري تصدق زين اللي قلت لي
احمد يرفس الباب بقهر : مهوب وقت تريقتك افتحي الباب
لجين بأصرار : قلت لك بنام نعسانه لاعاد تطق علي الباب
احمد : طيب لجين يصير خير
:
:
الساعه 11:30 مساءً
على فراشها مغمضه عيونها والنعاس ماخذها ..كان باقي شوي وتروح بأحلى نومه بس صوت المسج خلاها تفتح عينها بقوه ..
فتحت المسج وتبسمت لما شافت المسج من بندر
:
احبك ياروحي يادنيتي ياكلي ..وحشتيني ورب البيت مو قادر انام اذا تقدرين دقي علي
:
غطت وجهها باللحاف وتأكدت ان اللحاف مغطي كل جسمها ناظرت بالشاشه من تحت اللحاف وسوت اتصال
بندر بسرعه : هلا عمري
نوره بصوت اقرب للهمس : يامجنون
بندر : يالبيه بس.. نوره
نوره : هلا
بندر : خايف افقدك والله لموت لو افقدك
نوره بنفس الصوت : ماتفقد غالي لاتخاف ماراح اتركك
قطع تركيزها صوت عهود : اف خليني انام
نوره : شكلي بقفل اختي سمعتني
بندر : اصبري نعسانه مره
نوره : موت
بندر : خلاص حياتي خذي وضعيتك وانا بقول لك قصه
نوره مبسوطه : طيب
نامت على جنب غمضت عينها وتركت الجوال بأهمال على اذنها ..
بندر : اوكي يقولك ياطويلة العمر فيه واحد اسمه بندر بيوم من الأيام دق رقم بالغلط وطلعت له بنت مثل الملاك مافيه بالبشر مثلها سبحانه خلقها مالها شبيه ولابديل وتعلق هالبندر بهالبنت حبها موت وصار يحس انها روحه وقلبه وكل عمره وان حياته بدونها ماتسوى شي ..احبك نوره ..
نوره:...............
بندر يضحك: نوره ..نورتي..حبيبتي ..عمري ..نمتي؟ ياجعله نوم العوافي
قفل جواله حطه على جنب غمض عيونه يبي ينام واخذته الافكار الى عالم من الخيال عالم كله حب كله امل ببكره يجمعه بهالبنت اللي بجد صار يحس انها اغلى من روحه
:
:
:
الساعه 12:30 بعد منتصف الليل بتوقيت السعوديه 3:30 الظهر بتوقيت امريكا ..
صحى وهو يحس بوجع براسه ورجله ..لقى نفسه بفراشه والبودي قارد واقف عند الباب شال اللحاف بسرعه وناظر برجله الملفوفه بشاش ابيض بعنايه ..حس انه منكسر محتاج لأهله ..يناظر برجله بحزن معقوله تصوب برصاص معقوله بنت تلعب فيه كذا ..تعوذ من ابليس وهو يقول لا هذا اكيد كابوس مستحيل انا بعلم هذا حلم اكيد ..فيه دمعه حارقه صدره وده يطلعها بس احترم الرجوله الباقيه فيه وماطلع هالدمعه وفضل انها تحرق داخله ..مابقى شي من رجولته ماانهز حرام يكمل بنفسه انهزامه .. تذكر العنود ضحكتها وكيف كانت تفهمه حن لها وده يكلمها يضمها ويقول لها وش كثر حاس انه مهان ومظلوم .. تذكر حب امه وخوفها وحرصها عليه ..ابوه اللي ماهمه بالدنيا غير راحته .. تذكر دموعهم لما سافر ضرب بقوه على السرير : ياليتني ماسويتها ياليتني مافقدت عقلي بلحظة جهل دمرتني
:
:
:
يوم الجمعه الساعه 1 الظهر ..
رجع لغرفتها يرفس بالباب بقوه ويصارخ : ياغبيه تبين تموتين افتحي الباب والحين
لجين بصوت منهك : مابي
احمد بخوف : اسمعي صوتك كيف صاير واللي يرحم امك افتحيه كلي أي شي مو عشاني عشان جدتك هالمسكينه جالسه تبكي من خوفها عليك
لجين بتعب : احمد قلت لك مابي
احمد بعصبيه : لجين والله ماتفتحينه لأكسر الباب
لجين ببرود : سوي اللي تبيه
احمد : والله بسويلك اللي تبينه ..بترك البيت لو تبين أي شي بس تعالي افتحي الباب ياغبيه لاتموتين لجين عشان خاطري انسي انا وش سويت وتذكري نفسك امانه افتحي الباب حبيبتي الله يخليك
لجين مشت للباب بتعب وهي حاسه بدوخه ورجلينها ماتحملها فتحت الباب وناظرت فيه بوجهها التعبان وشفاتها الذابله : انا حبيبتك تضحك علي او على نفسك ..حست بدوخه وانها راح تطيح حاولت تمسك الباب ..بس احمد مسكها بسرعه وشالها : يالمجنونه جد موب صاحيه يومين بدون اكل ليه هذا كله باخذك للمستشفى
لجين : لاوالله مابي اروح
احمد حملها للسرير وسدحها : اجل انا الحين بجيب لك اكل وعصير وتاكلين غصب عنك
راح عند الباب اخذ المفتاح اللي فيه عشان لاتقفل الباب مره ثانيه ونزل بسرعه راح المطبخ ناظر شوي بالمكان ماعرف وش يسوي طلع للصاله اخذ مفاتيحه ..طلع من البيت بسرعه حرك سيارته لأقرب مطعم اخذ رز ولحم سلطه خضرا و2 عصير برتقال طبيعي رجع البيت بسرعه دخل المطبخ بالأكياس حط لها الرز بصحن دائري والسلطه بصحن بيضاوي صغير وحط الـ 2 البرتقال حمل الصينيه وراح على الغرفه حط الصينيه وتربع على السرير ساعدها تجلس بعد ماضبط المخدات وراها ..اخذ الشوكه وحط فيها من السلطه وناظر بلجين : ياللا افتحي فمك
لجين تبعد الشوكه : ماابي
احمد : والله تاكلين والا قسم بالله العظيم لأسوي شي مايعجبك ابد
لجين واللي خافت : طيب باكل
احمد : غصباً عليك والعصير تشربينهم اثنينهم ومابي نقاش
:
:
:
الساعه 7 المغرب ..
دخل البيت ينادي : ياام مشعل
ام مشعل طلعت من المطبخ : امر
ابو مشعل بعد ماجلس بالصاله : مايامر عليك ظالم ..اجلسي ابيك بسالفه
ام مشعل تجلس : وش سالفته
ابو مشعل يتبسم : اليوم ابو سلمان كلمني يطلب يد العنود لسلمان
ام مشعل مبسوطه : والله جد
ابو مشعل: أي والله
ام مشعل بفرحه : ماراح نلاقي احسن من سلمان لبنتنا
ابو مشعل : ايه عشان كذا انا ابيك تكلمين البنت لأني قلت لأبو سلمان على الدراسه قال ان سلمان بيتملك هالحين والزواج بعد زواج شروق واذا على الدراسه سلمان بيخليها تكمل دراستها
ام مشعل توقف بحماس : الحين اقول لها
ابو مشعل بهدوء : ايه
رقت ام مشعل الدرج ..راحت لغرفة العنود ..بعد ماطقت الباب جاها صوت العنود : ادخلي ماما
ام مشعل بعد مافتحت الباب : كيف عرفتي انه انا
العنود وهي على فراشها تقرا كتاب : يعني مين غيرك
ام مشعل تجلس على السرير : بابا قالي اكلمك بموضوع
العنود تحط الكتاب : وش موضوعه ؟
ام مشعل : سلمان ولد خالك متقدم لك يبيك عروسه له
العنود بعد ماارتبكت : هاه سلمان
ام مشعل تتبسم : ايه سلمان وبابا قالي انه كلم ابوه بقصة الدراسه وقال ماعنده مانع تكملين دراستك والزواج مو قريب الحين بس الملكه وش قلتي
العنود وهي مو قادره تخفي توترها وارتباكها : ماادري
ام مشعل : وافقي خلينا نفرح فيك والزواج ماراح يوقف بطريق دراستك
العنود بهدوء : اللي تشوفونه
ام مشعل باستها على خدها : الله يرضى عليك يابنيتي ..
طلعت من الغرفه ونزلت الدرج وهي مبسوطه,,
ابو مشعل وهو يناظرها تنزل : هاه نقول مبروك
ام مشعل : ايه نقول مبروك
ابو مشعل برضا : على بركة الله
:
:
:
يوم الأثنين 15 محرم ..استئناف الدراسه ..
الرياض ..الساعه 9 صباحاً ..
راحت لوحده من صديقاتها : تعالي بسألك
ليلى : اسألي
جنا : ماتعرفين بنت اسمها نوره سلطان الـ.....
ليلى تفكر : ماادري وش تدرس
جنا : ادب انقليزي
ليلى : ماادري تعالي معي عندي وحده من خوياتي تدرس ادب انقليزي
مشت جنا مع ليلى اول ماوصلو للبنت نادتها ليلى بسرعه ..
ليلى : شوق ماتعرفين بنت بسنه اولى اسمها نوره سلطان الـ......
شوق بسرعه : الا اعرفها ليه تسألين
ليلى : علميني مالك دخل
شوق تأشر على الكفتيريا : شفتي البنت اللي على باب الكفتيريا
ليلى تناظر : أي وحده فيهم
شوق : اللي لابسه الشريطه الورديه
ليلى : اللي شعرها طويل
شوق بسرعه : ايه هذي هي
ليلى : طيب مشكوره
رجعت لعند جنا وقالت لها مين فيهم نوره ..جنا تفكر الحين عرفتها وشلون اشوفها من قريب وأحتك فيها على قول بندر.. اخيراً جات براسها فكره غبيه بس يمكن تنفع ..
مسكت ليلى وراحت لعند نوره ناظرت فيهم : بنات لو سمحتو ممكن سؤال
نوره والعنود بصوت واحد : اسألي
جنا مرتبكه : فيكم وحده تدرس ادب انقليزي
نوره بسرعه وهي تتبسم : ايه انا
جنا وهي تناظر فيها وتحاول تحفظ ملامحها : لأنو انا ادرس حاسب آلي سنه اولى وودي احول ادب انقليزي وماعندي وحده من خوياتي ادب انقليزي عشان تنصحني
ليلى فتحت فمها تبي تتكلم بس جنا دفتها بسرعه عشان تسكت
نوره تضحك : واللهي انا عن نفسي اشوف الأدب الانقليزي مافيه احلى منه بس الحاسب برضو له مجالاته
جنا : يعني احول والا لا
نوره : انا رايي اذا كنتي مرتاحه لاتحولين ويروح تعبك على الفاضي
جنا تهز راسها بالأيجاب : طيب مشكوره
نوره تتبسم : العفو
اول مامشت جنا التفتت لها ليلى : ليه ماقلتي تبين تسألين هالسؤال كنت سألت خويتي
جنا : لا ..فيه بنات قالو لي انها من المتفوقات بالدفعه فحبيت اخذ رايها
ليلى تهز راسها بـأقتناع : اها
:
:
الساعه 11 الظهر ..
صحت على صوت الجوال ..كان احمد المتصل ..ردت عليه ببرود : الو
احمد : هلا
لجين : هلا بك
احمد : فطرتي والا باقي
لجين بدون نفس : لا باقي
احمد : وليه
لجين : تو صاحيه
احمد بهدوء : اها .. لجين
لجين : نعم
احمد: مطوله وانتي تكلميني بذي الطريقه
لجين : والله انا اكلمك عادي وانت من زمان تبي العادي بس انا ماكنت افهم
احمد : لا انا ماكنت ابي كذا
لجين بهدوء : احمد خلك بدوامك احسن
احمد : الحين ماعندي شي فاضي
لجين :طيب انا عندي
احمد : وش عندك
لجين : فيني نوم ابي انام
احمد بهدوء : طيب لجين اللي يريحك
:
:
:
الساعه 1 الظهر ..
كان جالس بالصاله ينتظرها متى تدخل بحماس ..اول ماشافها داخله فز من مكانه وراح لها : هلا والله ..هلا بالطش والرش
جنا تضحك : مالت عليك ماشفتها ماقدرت
بندر واللي تحطم : ليه عاد
جنا تضحك :امزح والله شفتها
بندر يسحبها يجلسها ويجلس جنبها : كيف شفتيها
جنا : اول شي علمني وش سالفتك مع هالبنت
بندر بقهر : قولي بالأول والله لأعلمك
جنا بعد تفكير : طيب ..اممممممممم وشلون اوصفها لك
بندر : قولي أي شي
جنا : نحيفه وطويله يعني اذا تحبها تناسبك
بندر متحمس : ادري انها نحيفه وطويله شفتها بالعبايه قولي شي ماشفته
جنا تضحك وتهز يدها : باين عليها مدوختك هالبنت
بندر ينتهد : قولي بس
جنا تفكر :شعرها ناعم مره مثل الفلبين اسود وطويل
بندر مستغرب : بذمتك شعرها ناعم بلا نصب
جنا : أي والله انه ناعم الا حرير اقول لك مثل الفلبين
بندر يضحك : دايم اقول لها يالشوشه ماتقول شي
جنا تضحك : ماادري عاد
بندر بحماس اكبر : طيب كملي
جنا : خشمها مسنون وطويل نوعاً ما عيونها عسليه وواسعه شفايفها مرسومين وحلوين ..وبسرعه : ايه صح وخدودها مليانه
بندر فاتح عيونه على الأخر : لاتنصبين ترى حتى لو انها شبه السرلانكيه بحبها ومابغير رايي
جنا تهز راسها بخبث : تحبها هاه
بندربأرتباك : ايه احبها هذي كل السالفه عادي انا قصدي شريف
جنا : طيب يابو قصد
بندر يعدل جلسته : ماعلينا الحين اوصفيها جد
جنا تتبسم : ورب البيت ماكذبت بحرف
بندر بعد ماتلعثم : شسمه عيونها واسعه وخدودها وهالحركات اللي قلتيها كلها
جنا تهز راسها بالأيجاب : ايوه البنت حلوه صراحه ذكرتني بميساء مغربي بس هالنوره احلى
بندر وقف متحمس: بذمتك بلا نصب لاتلعبين بأعصابي
جنا تضحك وتسحبه : اجلس بس قسم بالله انها مره حلوه لا وبيضه بعد
بندر وهو يحس انه متكهرب : حلوه حلوه يعني
جنا :اقول لك مره حلووووووه
بندر يضحك وهو مفهي : على طول اقول لها عبده وكويحه وتسكت يعني حسب وصفك المفروض تسكتني على طول
جنا تتبسم : يمكن ماتحب هالحركات بعدين البنت شكلها حبوبه وطيوبه انا كلمتها
بندر يهز راسه بالأيجاب وهو مبسوط : أي والله وانا اشهد تدخل القلب على طول
جنا : اذا بجد انت تحبها وتبيها .. غمزت له : ياحظك.. بس وشلون عرفتها
بندر متلعثم : كنت غلطان برقم وطلعت هي بوجهي وماادري كيف جذبني صوتها ويوم بعد يوم الى ان حبيتها وتعلقت فيها والله ياجنا اني احبها مره وقصدي زواج ولاابي العب فيها
جنا تتبسم : ان شاء الله تكون تستاهلك
بندر : والله انها تستاهل انا نوره اعشقها بنت هاديه وطبيعيه واكثر شي معجبني فيها انها ماترضى تسويلي أي شي كل شي عندها لا وغير ذا نادر ماتطلع من البيت مشوارها الوحيد للجامعه واذا نوت تطلع راحت بيت عمتها وصريحه معاي مره وشفافه
جنا مبسوطه : الله يسعدك ياخوي وتتزوجها
بندر بحماس : والله بعد هالمواصفات شكلي بخطبها بكره
جنا تدفه : وش اللي تخطب توك ببداية العشرين كمل دراستك
بندر مقهور : حتى انتي
جنا : ليه مين قالك بعد
بندر بحزن : نوره
جنا : والله انها بنت سنعه هذا لأنها خايفه على مستقبلك
بندر شرد وهو مبسوط ويفكر : والله انه مافيه مثلها بنت اصول
:
:
:
الساعه 4 العصر ..
مابطل هالعاده مع ان جود قالت له لاعاد توقف عند البيت لايشوفك تركي وتصير مشاكل ..
كان واقف يراقب وفجأه طلعت سيارة السواق ..لحقها وكتب مسج وهو يسوق
:
هذا انتي اللي مع السواق
:
جاه ردها
:ايه
:
فارس انقهر
:
وين رايحه ان شاء الله
:
بعد حول دقيقه جاه ردها
:
بروح بيت خالتي بعدين ماقلت لك لاتلحقني
:
فارس واللي بجد عصب
:
وش عندك ببيت خالتك كل يوم ناطه عندهم
:
جود قرت المسج وردت عليه بهدوء
:
بنت خالتي بنفس مرحلتي ونذاكر سوى
:
فارس روق بعد ماقرا ردها وارسل لها
:
طيب بس لاتتأخرين
:
جود تبسمت بعد ماقرت المسج وارسلت له
:
ان شاء الله
:
جود ماكانت ترد عليه ابد له حول 4 ايام وهو يدق عليها مستحيل ترد عليه لو يدق بالساعه 60 مره حافظه اسمه بجوالها العندليب.. بس صارت ترد على مسجاته ومرات تتأخر بالنوم وهي تسولف معاه بالمسجات ولما كان يقول لها خل بدق عليك احسن ماكانت ترضى تقول له السوالف بالمسجات عاديه يعني مثلها مثل صداقات النت
:
:
:
الساعه 4:30 العصر بتوقيت السعوديه ..7:30 الصبح بتوقيت امريكا..
طلع من غرفته وهو لابس ومتعطر و العكازه بيده يمشي بصعوبه
نجلاء واللي كانت بالصاله تشرب قهوه : وين على الله
مشعل : بروح اسجل للتوفل والا ممنوع
نجلاء ببرود : لا روح ماعلي منك
مشعل رمقها بنظره ماتخفي الحقد اللي بقلبه ابد ..
اول مانزل على الشارع مشى شوي وهو يراقب البودي قارد اللي رغم انتفاخ عضلاته مافكر للحظه يساعده ركب التاكسي اللي وصلهم على المكتب
اول مانزل مشى شوي وهو داخل للمكتب صدمت فيه بنت بقوه
مشعل رجع لورى وكان راح يطيح ..
البنت مسكته من يدينه بسرعه عشان لايطيح : souri
مشعل : no .. سكت وهو يناظر فيها مستغرب وبصوت مسموع : وجهها مو غريب
البنت تتبسم : عربي ؟
مشعل : ايه
البودي قارد يدفه عشان يدخل المكتب وواضح عليه معصب
البنت : انا بعد عربيه وسامحني ماكان قصدي
مشعل : لاعادي ماصار شي
مشت البنت من جنبه وهو دخل المكتب بعد مادفه البودي قارد ..قدم على موعد عشان الأختبار وطلع ..ركب بنفس التاكسي اللي كان ينتظرهم ورجع للشقه كان يرقى الدرج بصعوبه والبودي قارد وراه ينتظره بدون لايساعده
اول مادخل الشقه وبطريقه لغرفته دخل البودي قارد بسرعه وهمس لنجلاء بأذنها ..نجلاء معصبه وبصوت عالي : مشعل
مشعل بقرف : نعم؟
نجلاء : مره ثانيه لاتحتك بأي احد غير سواق التاكسي لو ركبت بتاكسي او البقال
مشعل مستغرب : وش يعني ممنوع اتكلم مع الناس
نجلاء توقف : اذا مو عاجبك ياحلو خلاص لاتروح تدرس وخلك جالس هنا
مشعل بسرعه : لا لا خلاص اروح ساكت وارجع ساكت
نجلاء تحط يدها تحت ذقنه وتلف وجهه يمين ويسار وهي تتبسم : شطور
:
:
:
الساعه 5:30 المغرب ..
دخل البيت بعد مافتح الباب بعنف وهو يصارخ :لجين وينك
لجين تنزل الدرج بهدوء : نعم
احمد قرب منها وهو معصب ومسكها من شعرها وهو يصارخ : تبين الثقه هاه تبيني اوثق فيك :: فتح يده وناظرها بحده : لا وتلوميني عشاني ماعندي ثقه فيك
لجين تمسك يده : أي احمد انت توجعني
ام سالم طلعت من غرفتها مفزوعه : وش فيه ياوليدي ليه ماسكها كذا
احمد وهو يهز راسها من شعرها بعنف ويصارخ : اسألي بنتك هي تعرف
لجين تتبسم وبكل هدوء وفيه دمعه على خدها : اذا قصك على المتصل تراه خالي فهد
احمد ترك شعرها وهو مصدوم: وش يعني خالك فهد
لجين وهي تبكي : انا متفقه معاه بس كنت بعلمك انك ماعندك ثقه فيني
احمد واللي الصدمه شلت حركته كان يناظر بلجين اللي تلبس عبايتها وهو مفهي : خالك فهد ماغيره ..ماسمع غير صوت باب الصاله ينفتح ناظر فيها وهي تطلع من الباب لحقها بسرعه : وين بتروحي
لجين تركض للباب الخارجي : مالي قعده بهالبيت
احمد لحقها بسرعه وطلع من الباب وهو يلحقها كانت تمشي بخطوات سريعه وتبكي
احمد يسرع مثلها بخطواته وهو يتكلم بصوت عالي يحاول قد مايقدر يخفظه : لجين بلا جنون اوقفي العالم تناظر فينا
لجين ومازالت تمشي بسرعه : انقلع عن وجهي بروح بيت جدتي ام سلطان
احمد يمشي وراها : طيب اوقفي بلا جنون انا بوصلك المكان اللي تبينه بعدين جدتك بالبيت
لجين بعد ماوصلت للشارع العام وقفت تنتظر الأشاره تصير حمرا عشان توقف السيارات
احمد قرب منها ووقف بجنبها : انتي تدلين مكان بالرياض يالمهبوله
لجين وهي تناشق : مابي اجلس مع واحد ماخذني شفقه والا هو مو معتبرني شي ولاعنده ثقه فيني مو قادر يعتبرني لازوجه ولاشي مايأمن فيني لاعلى بيت ولا على عيال انت حتى ماتتحمل اكون ام لعيالك
احمد بهدوء: مين حط هالأفكار براسك
لجين تبكي: افعالك يااحمد لو جماد حس انا انسانه احس مو حجر
احمد مسكها من زندها : اذكري الله وخل نرجع البيت نتفاهم لاتفرجين العالم علينا
سحبت يدها بقوه وهي تصارخ : وخــر عنــ.. بس ماكملت جملتها الا ويدها انفلتت من احمد وغصب عنها ومن قوة حركتها رجعت بخطواتها الى ورى وكانت الأشاره خضرا والسيارات مسرعه ..صوت الفرامل القويه وصوت احمد وهو يصرخ : انتبـــــــــــــــــهي السياره
مامنعو السياره الحديده من انها تصدمها بقوه لدرجه طلعت على الكبوت وتدحلبت منه على الشارع ..
احمد ركض لعندها نزل لمستواها جلس على الأرض ووهو مرعوب حطها بحظنه يهزها وبصوت كله خوف قالها وهو يحبس دمعاته : لجين لجين ردي علي
بزمن قياسي تجمهرت الناس : اللي يقول لاحول ولاقوة الا بالله واللي يقول كيف ماانتبهت واللي يصور واللي يتفرج على احمد كيف يضمها لصدره ويصرخ ..غير راعي السياره اللي كان يناظر مرعوب
احمد فتح وجهها وناظر فيه كان مليان دم صار يمسح الدم بسرعه وهو يبكي غصب عنه نزلت دمعاته وتحول من رجال لطفل ماسك بيدينه اثمن شي عنده وحاس انه بيفقده صرخ بصوت عــــــــــــــــالي : ابي سيارة اسعاف زوجتي تمووووووووووووت
نهاية الفصل