أنها الدمعه مجرد قطرة ماء شفافه مالحة المذاق هل لأنها عصاره من أحزاننا وألامنا أم لأنها عصارة أفراحنا وأتراحنا..
بالأمس كانت لي فرحه خاصه أبكت أختي لساعه كانت دموع ملئتها السعاده ..فهي ليست الا أشهر معدوده وتحتظن شقيقتي مولودها الأول بأبتسامه كبيره وسعاده تثلج صدرها..
الأن وأنا اضع اصابعي على كيبوردي أفكر هل تصل هذه السعاده الى ابطال روايتي أم تستمر سلسلة الأحزان والمواجع..
موسيقى كلاسيكيه قديمه تذكرني بشخص عزيز تملىء مسامعي وأبدأ معكم حروف جديده من حروفي..
الفصل العشرين
في الزمن الماضي ..يوم الحادي عشرمن شهر ذو الحجه ..سنة 1426للهجره..
الساعه 7:30 المغرب,,
جالسه على الكنبه وميته ضحك : والله كان ودي اشوف شكلها
ياسر وهو ياخذ أنفاسه بعد ماضحك ويدفها مع ركبتها : لاماشفتيها وهي تقول ..وقلدها وهو يسوي دور المسكين : أنا كنت احبك ليه تسوي معي كذا
نوف تتبسم وهي تفكر وبصوت مسموع: تستاهل طول عمرها تفاخر باللي عندها ودايم تقول لي ماعندك أنا أعطيك أنا اسوي لك على بالها محتاجه منيتها علي
ياسر وهو يشرب من الكاس اللي بيده وبلا مبالاة :ماعليك منها ياروحي أنتي تسوينها وتسوين طوايفها
نوف تبتسم بخبث : الحين أنا وهي متساويين مالت عليها ومسويه فيها تحبني وتخاف علي
ياسر يوقف ويمسك يد نوف يقومها: قومي بوديك مكان حلو
نوف بأستغراب: وين؟
ياسر: الشباب مسويين حفله حلوه حق العيد بمزرعه ..غمز لها بدهاء: تعجبك
نوف تفكر: مابي اخاف اشوف احد اعرفه ماحب سمعتي تخرب
ياسر يضحك: لاماعليك البنات اللي هناك مايعرفونك اضمن لك
نوف توقف وتلف حول نفسها تعرض فستانها الأسود القصير اللي يتوسطه حزام ذهبي : تحس لبسي يناسب حفله
ياسر يناظرها بأعجاب :يناسب وبس الا بتصيرين ملكة الحفله ..خلص جملته الاخيره وهو يناظر بجسمها وقوامها اللي يسحر عيونها المخضره بياضها الجميل تبسم لها : هاه مشينا
نوف بغرور وهي تشوف الأعجاب بعيونه: ثواني البس عبايتي بس
:
:
:
الزمن الحالي..حيث توقفنا ..و****ب الساعه تتحرك ببطء شديد..
حط جواله بمخباته ووقف ببرود وبدون لايناظرها : أنا بمشي
العنود بحزن: انتظر شوي وش يقول بابا ان طلعت بهالسرعه
سلمان بنبره تظهر حقد كبير: يقول اللي يقوله محد يهمني
مشى بخطوات سريعه فتح باب المجلس الخارجي وطلع بسرعه قفل الباب بقوه لدرجه طلع صوت غمضت العنود عيونها بقوه بعد ماسمعت الصوت القوي ..مسحت الدمعه اللي تسللت بلحظة غفله لخدها وحاولت تبتسم وطلعت الصاله لأمها
:
:
:
بعد مرور 3 اسابيع..يوم السبت ..الساعه 4 العصر ..بيت الجده ام سلطان بالتحديد..
جالسه قبال التلفزيون على الكنبه الكبيره ورجلينها ممدوده بأهمال ..صوت التلفزيون اللي عالي نوعاً ما يملى المكان ..تبكي بصمت وتحاول قد ماتقدر صوت بكاها يكون مكتوم كل شوي تمسح دمعتها اللي تنزل بسرعه ..حاسه بنار بصدرها تخنقها ..تمسح بيدها على فخذها بقهر وبصوت مسموع : ياربي ليه ماتتحركون معقوله الله يعاقبني ..حاولت تبذل مجهود وتحركهم بس كانو جامدين ضربت بيدها بقوه على رجلها وهي تصارخ :لاتتحركين مهوب لازم خليك جامده كذا وجاحدتني مثل كل شي بحياتي
جات شذا عندها بسرعه :شفيك لجين بسم الله عليك
لجين وهي تبكي بصوت عالي: مافيني شي مبسوطه ومرتاحه
شذا تضمها بهدوء: اذكري الله ولاتخافين ماراح ينساك
لجين وباقي تبكي : ان شاء الله
صوت الجرس قطع حوارهم وقفت شذا وراحت للأنتر : ايوه مين
احمد بعد تردد: أنا احمد اقدر اشوف لجين
شذا بتوتر : والله ماادري لحظه بسألها
قفلت الأنتر وناظرت بلجين وبعد تردد كبير: لـجين هذا احمد يبي يشوف
لجين بصوت عالي وبكل قهر: قولي له ينقلع مابي اشوف وجهه ..وبكت بحرقه: هو جزء من اللي انا فيه وهو سبب بزيادة حزني وقهري مابي اشوفه ابد
شذا ضغطت الزر وهي مرتبكه مو عارفه وش تقول وبصوت هادي: احمد
احمد بسرعه: ايوه
شذا : معليه لجين للحين نفسيتها تعبانه خليها مره ثانيه
احمد هز راسه بحزن وقالها بنبره وضح اليأس عليها: خلاص ان شاء الله خير
:
:
:
نفس الزمان حيث عدنا ..يوم الحادي عشرمن شهر ذو الحجه ..سنة 1426للهجره..
الساعه 11 مساءً..
صوت الأغاني العالي يملى المكان ..
مجموعه من الرجال يراقبون بحماس نظرات تملئها الشهوه وابتسامه خبثه تعلو وجوههم ..
في الوسط يرقصون ويتمايلون بدلع نوف ومعها بنتين وحده مصريه والثانيه من نفس جنسيتها بس ماتعرفها ولاحبت تعرف بنفسها..
قرب ياسر للأستيريو رفع صوت الأغاني وصفق بحماس وهو يغني مع هادي حسين : سوي كنك مادريت وبوسني سوها ثاني على انك تعتذر قول اسف مانتبهت وضمني والعذر مقبول ولك مني عذر..صفق صفقتين بقوه وقالها بصوت عالي وهو يقترب منها: امووووووووت بالخصرالنحيف انا ..باسها بخدها وجلس وهو يضحك مع خويه ضحكه شيطانيه
:
:
:
الزمن الحالي ..الرياض ..الساعه 7 المغرب..
كتب الرساله وهو معصب
:
والله ماتروحين قلت لك
:
هز رجله بقوه وهو ينتظر ردها ..وبعد دقايق جاه الرد
:
فارس بروح مااقدر بصراحه وبعدين ماراح اتأخر
:
انقهر مره من عرف بولد خالتها اللي معجب فيها وهو مايبيها تروح هناك ابد ..كتب الرساله بسرعه وهو معصب
:
بدق عليك وردي علي والا وقسم بالله ياجود مايحصل طيب
:
دق عليها وكان ينتظر ردها وهو يحاول يمسك اعصابه
جود بهدوء: الو
فارس بكل عصبيه: جود انا حمار عندك؟
جود: لاحاشاك
فارس: ماعندك الا كلامك تعودتي على الدلع الزايد
جود بهدوء: أي دلع فارس انا بروح لبنت خالتي وماعلي من ولد خالتي وماراح اتأخر
فارس بقهر وبصوت عالي: على تبن ولد خالتك الغبي ..قلت ماتروحين يعني ماتروحين واسمعي الكلام احسن
جود بقهر: انت ليه تصارخ هالحين ياللا انقلع ..قفلت بوجهه بدون لاتنتظر منه رد
ناظر بالشاشه بقهر اخذ مفتاح سيارته نزل الدرج بسرعه ركب سيارته وهو معصب تحرك بسرعه لدرجه طلع صوت احتكاك قوي للكفرات بالأرض وصل عند القصر بزمن قياسي وقف ينتظر طلعتها كان معصب لدرجه موقادر يفكر ولاقادر يسيطر على نفسه ..
اخيراً طلعت سيارة السواق مشى وراها شوي وبعدها تقدم بسرعه واعترض طريقها ..
شافته وهو ينزل متوجه للسياره بسرعه وحست بالخوف فتح الباب بقوه وناظر فيها بعصبيه : انا مو لعبه بيدك حبك اللي كلام بس انا مابيه قلت ماتروحين يعني ماتروحين لاترفعين ضغطي
جود بخوف: طيب لاتعصب شفيك
فارس يتنهد: مالك دخل ووجهك غطيه مبسوطه بحالك
جود بهدوء: بس
فارس يقاطعها بسرعه: لاتبسبسين لي غطي وجهك بدون كلام اغار تفهمين وش يعني اغار طلعاتك كثيره وماتسمعين كلامي رفعتي ضغطي
جود بحب: طيب خلاص روق ماراح اروح حتى لو تبي تزعل بنت خالتي ..تبسمت له وفكت طرف الغطا وغطت وجهها : عسى راضي
فارس يتبسم بحب: ليه تبين تروحين
جود: بنت خالتي مسويه حفله لعيد ميلادها
فارس بعد تفكير: طيب روحي بمشي وراك وبنتظرك تطلعين نص ساعه وانتي طالعه
جود مبسوطه: والله مااطول قبل النص ساعه انا ماشيه
فارس يتلفت ويناظرها: تدرين اني احبك
جود مستحيه: فارس اسكت سواقنا يفهم عربي
فارس يضحك: طيب ياللا عشان لاتتأخرين
:
:
:
الساعه 7:30 ..
ماسكه الجوال ومسنده جسمها على التسريحه: وبعدين بندر؟
بندر: احبك..احبك ..احبك
نوره تتبسم : بندر شفيك اليوم
بندر بسرعه: مو صاحي مجنون مختل عقلياً بس احبك اموت فيك اعشقك
نوره بحزم: بندر
بندر: ايه احبك احبك احبك مالك شغل
نوره تضحك: حلوه مالك شغل
بندر بحزن: نوره ترى تعبت وش رايك نتملك هالحين ونتزوج بعدين عادي
نوره: عادي عندك لكن بابا مااعتقدر انه عادي عنده
بندر بقهر: اف اف اف اف اف اف اف اف اف اف اف
نوره تضحك: خلاص بندر
بندر يكمل: اف اف اف كيفي مالك دخل
نوره : لا انت بجد فيك شي اليوم
بندر: ايه فيني اشياء مو شي واحد
نوره بدلع: ايوه وش هالأشياء اللي فيك
بندر: اللي فيني ياطويلة العمر اني احبك واعشقك وبصراحه ماعاد اتحمل بعدك
نوره: معليه تصبر
بندر بسرعه:حبيبتي عمري حياتي
نوره: امر
بندر بحماس: مايامر عليك ظالم جوعانه؟
نوره بسرعه وبحزم: لا
بندر: طيب عطشانه
نوره بنفس الحزم: لا
بندر: تبين أي شي
نوره بأصرار: برضو لا
بندر: ترى انا برسم الخدمه انتي اشري بس
نوره تضحك: ادري انك برسم الخدمه بس مو محتاجه شي
بندر بنبره حزينه: الله يصبرني بس
نوره تضحك: يصبر الجميع
:
:
:
الساعه 9 مساءً بتوقيت السعوديه 12 الظهر بتوقيت أمريكا..
رجع من المعهد اول ماوصل عند البيت فتح صندوق البريد كالعاده صار له اسبوع وهو على هالحاله وده يشوف بشرى ساره..ماصدق عيونه لما شاف الظرف بالصندوق فتح عيونه على اخرها وبفمه ابتسامه صغيره يحاول يخفيها يمكن اللي بالظرف شي مايفرح ..فتح الظرف بتوتر وبدا يقرا الورقه اللي من جامعة دنفر زاد توتره وهو يقرا اسمه بالورقه حس انه بدا يقرا ببطىء لما وصل للجزء المهم ..اخيراً قرا قرار الموافقه صرخ بقوه وصار يناقز نسى تعبه البارح بغسيل الصحون ونسى سهره نسى هالايام القاسيه كيف تمر عليه وفرح بهاللحظه
:
:
:
الرياض الساعه 10 مساءً..
جالسه على السرير وممسكه بالجوال وتفكر ترسل والا لا هذي المره الثالثه اللي تدق عليه ويعطيها بزي ..
اخيراً كتبت رساله وارسلتها له
:
مو ناوي ترد علي؟
:
كانت تناظر بالجوال وهي متوتره اول ماسمعت صوت الرساله فتحتها بسرعه وهي تحس بنبضات قلبها تتسارع
:
لا مابي ارد ولاعاد تدقين مالي مزاجك
:
حست بغصه بعد ماقرت كلامه وسألت نفسها ليه سلمان يعاملها كذا على شي هي مالها ذنب فيه ..وبعد تفكير قالتها بصوت واطي: لا انا غلطانه ..انسدحت على فراشها وتلحفت زين ودارت بنفس الدائره اللي تدور افكارها كل يوم حولها ..ماتدري غلطتها كانت حب ياسر الطايش والا حبها اللي جا متأخر لسلمان واللي بجد يعذبها
:
:
:
الساعه 11 مساءً..
جالسه على الأرض وتحسب فلوسها ..وبعد ماخلصت حساباتها قالتها بصوت مسموع: اف بس 600 ريال وش اجيب له بهالمبلغ هو دايم مدلعني بالهدايا الفخمه .فكرت شوي ووقفت بسرعه طلعت من غرفتها وراحت عند غرفة شروق طقت الباب بشويش وفتحت الباب كانت شروق جالسه على السرير وتكتب بدفتر كحلي صغير..
نوره بحماس: صاحيه؟
شروق تضحك: وش رايك يعني
نوره تقفل الباب وتقرب بسرعه وتجلس بجنب اختها : هلا والله بأختي حبيبتي عروستنا وحبيبتنا وحشتيني
شروق تناظرها بأستغراب: وحشتك وحبيبتك؟
نوره وهي تتبسم وتهز راسها: ايه
شروق تضحك : اقول خلي عنك اللكاعه قبل نص ساعه وجهي بوجهك وش تبين اخلصي
نوره تضحك: يعني مكشوفه؟
شروق تكمل كتابه: بقووووووه
نوره تبوسها على خدها: اختي حبيبتي سلفيني مبلغ تافه
شروق تضحك: قولي كذا من الأول
نوره: طيب وش قلتي
شروق: كم تبين
نوره تتبسم بعنف: 400 ريال فقط لاغير
شروق فاتحه عيونها على اقصاها : فقط لاغير هاه
نوره تهز راسها بالأيجاب
شروق تسوي معصبه: اقول تقلعي مافيه
نوره تسوي فيها تترجاها : تكفين والله عيد ميلاد انسان ولازم اشتري هديه فخمه
شروق تصفقها: ماتستحين على وجهك وشو عيد ميلاد انسان
نوره بثقه: لامافهمتي علي انا اقصد بنت بس يقول لك كلمة انسان مايصير تسوينها مؤنث
شروق تضحك: أحلى يالفاهمه عموماً طسي مافيه فلوس
نوره تبوسها على خدها بعنف: طلبتك صدقيني ارجعهم لك قبل نهاية الشهر
شروق تفكر : وان مارجعتيهم
نوره بعد تفكير:احرميني من حظور عرسك
شروق تضحك وهي تفتح الدرج وتطلع الفلوس: طيب خلاص بحرمك
نوره تاخذ الفلوس بسرعه: مشكوره يااحلى اخت بالعالم
راحت لغرفتها وهي تفكر ومو لاقيه هديه تساوي قيمته عندها خصوصاً ان المبلغ ماهو كثير مره اخيراً فكرت تدق على العنود ..يمكن تفيدها بهالسالفه.
العنود بهدوء: الو
نوره بحماس: هلا والله بأحلى عنوده بالعالم
العنود تضحك: اكيد تبين شي لاتتمصلحين
نوره: طيب بسألك سؤال
العنود بهدوء: اسألي
نوره : وحده من صديقاتي عيد ميلاد خطيبها يوم الربوع ومتوهقه وش تهديه او وش تسويله وسألتني قلت مالي الا أسأل خطيبة اخوي حبيبتي
العنود تضحك رغم حزنها: انا كنت متأكده وراك مصلحه
نوره بسرعه: طيب ياللا تخيلي انه عيد ميلاد سلمان كيف تفاجأينه خصوصاً انك تستحين منه ومو أي شي تقدرين تسوينه
العنود وهي تفكر وخيالها راح لبعيد: انا اعلمك وش اسوي له
:
:
:
الساعه 12 مساءً..
رقى الدرجه بتعب اليوم كان دوامه مزحوم حاس بأرهاق وده يوصل لفراشه بأسرع وقت ويرتاح..
وهو بطريقه لغرفته سمع صوت مناشق لجين بغرفتها تنهد بحزن وطق الباب وفتحه وهو يتبسم مخفي حزنه على حالها ..لاحظ حركتها السريعه عشان تمسح دموعها ..
تبسمت وهي تناظره بحنان وطيبه باينه بعيونها: تأخرت اليوم برجعتك
فهد قرب منها باس جبينها وجلس بجنبها : ايه كانت عندنا حالات طارئه وانتي ليه مانمتي
لجين بهدوء: ماجاني نوم
فهد يمسح على شعرها بحنان: احمد اليوم كلمني
لجين بعصبيه : لاتجيب لي سيرته مابي اسمع طاريه طاريه يجيب لي المرض
فهد بسرعه: طيب طيب خلاص ..تنهد وقالها بهدوء: الله يهديك ويصلح بينكم
لجين سكتت والحزن واضح عليها
فهد بعد ماوقف: ابيك تنامين
لجين بهدوء: طيب
طلع من غرفتها ودخل غرفته شافها بكامل زينتها وجمالها جالسه على السرير مغطيه رجلينها وتقرا كتاب عن الأطفال ..
ناظرت فيه بحب وهي تتبسم: هلا حبيبي الله يعطيك العافيه
فهد بكل حب: الله يعافيك حبيبتي
شذا تبعد اللحاف وتنزل رجلها: بقوم اجهز لك ملابس
فهد قرب منها بسرعه رفع رجلها ورجعها مكانها ولحفها : مابيك تجهزين شي نسيتي كلام الدكتور؟
شذا بهدوء: لامانسيت بس كله شوية نزيف الدكاتره يبالغون
فهد وهو يطلع ملابسه من الدولاب: لامايبالغون انا دكتور وفاهم وخلك مرتاحه احسن لايصير بولدي شي
شذا تتبسم : ان شاء الله
:
:
:
يوم الأربعا من نفس الأسبوع..
أقنعت امها بصعوبه انها تروح عند صديقتها تتغدا معها وبعد محاولات وواسطات من شروق اختها اقتنعت امها وسمحت لها بشرط انها تكون بالبيت قبل صلاة المغرب اتفقت مع امها انها بتروح مع صديقاتها كلهم وهم طالعين من الجامعه ..
الساعه كانت تشير للـ 12:30 الظهر ..ارسلت له مسج
:
بندوري ممكن تجي عند الجامعه بس وقف بعيد بعطيك شغله
:
جاها الرد بسرعه
:
ماطلبتي شي جايك دقايق وانا عندك
:
تبسمت بعد ماقرت الرساله تحس بندر انسان مختلف شخص من زمن ثاني طيبة قلبه وحبه شي خيال ..راحت عند بوابة الجامعه لبست عبايتها بسرعه قبل لاتطلع العنود من محاظراتها وتجي تشوفها طلعت غرشة العطر وعاندت الصوت اللي جا من داخلها ..عيب عليك لاتحطين عطر ..رشة بالعبايه كم رشه وحملت شنطتها وطلعت بسرعه وهي تراقب السيارات عارفه وين راح يوقف بندر ..شافت سيارته وهي توقف نزل من السياره وقف وراها سند يده اليسار ع الشنطه وطلع الجوال من مخباته بيده اليمين كان لابس كاب ابيض وازرق ..قميص ابيض باين الكلر حقه واطرافه من تحت التي شرت الأزرق بنطلون ابيض بجيوب مخططه ازرق وحزام ابيض بحلقه زرقا باينه من فوق القميص اللي مدخله بس عند حلقة الحزام جزمه سبورت وانتم بكرامه مقدمتها زرقا وباقي الجزمه بيضا نظاره شمسيه ماركة Gucci..
ناظرت فيه وهي تتقدم له بخطوات خايفه مرتجفه كان شكله خرافي اناقته تسحر ناظرت بنظارته اللي باين عليها فخمه وحست بتفاهة هديتها اللي ماتسوى شي ..
بعد مادق رقمها سمع صوت جوال قريب منه رفع عينه وشافها تمشي متجهه له عدل وقفته وحط الجوال بجيبه وصار يناظرها وهو مبتسم فرحان يعرفها لو تكون بين مليون مشيتها بنيتها عيونها كل شي فيها غير تقلب كيانه هالبنت وتحرك اشياء فيه محد غيرها يحركها ..
وصلت عنده بعد ماصارت قباله ناظرت فيه بسرعه ونزلت عينها مستحيه..
بندر مبسوط: اموت باللي تستحي وش تبين تعطيني ياروحي
نوره بعد مابلعت ريقها بخوف تقدمت لباب الراكب بسيارته فتحت الباب ركبت بسرعه وقفلت الباب
بندر يناظر مو مصدق وبصوت مسموع:ركبت سيارتي
راح بسرعه ركب بجنبها وبعد ماقفل الباب وواضح عليه علامات الدهشه: أحرك السياره؟
نوره بصوت وضح الخوف عليه : ايه
بندر صفق صفقتين من الوناسه وتحرك بسرعه مو طبيعيه خايف لاتغير رايها :وين تبين نروح يابعد روحي
نوره ترجف وخايفه مو عارفه تتكلم حاسه بشي غلط بالموضوع تنفست بعمق وقالتها بصعوبه وبصوت واطي : مــ طــ عــ م كا..
بندر يحاول يركز: مطعم وشو مافهمت ارفعي صوتك
نوره وهي ترجف: افوكادو
بندر يهز راسه: اها افوكادو والله انا خايف يغمى عليك وشلون بتاكلين معاي وانتي مو قادره حتى تتنفسين
نوره تكلم نفسها وهي تفرك بيدينها : ياربي بندر لاتصعبها علي انا بدون شي خايفه
بندر واللي حاس بخوفها : خلاص لو صار واغمى عليك بشيلك وبقول حرمتي وحامل وبوديك بيتنا بحطك بالجناح حقي وبقفل علينا الباب عاد هناك ببيتنا محد لك لو اخليك اسبوع ..سمع صوت انفاسها اللي صارت اقوى وضحك بقوه : وانتي صدقتي ياجعل يديني البتر ورجليني الشلل لو افكر المسك او اسوي فيك شي مايصلح
نوره بهدوء: بسم الله عليك
بندر يستلكع: هاه وش قلتي
نوره نزلت راسها وسكتت
بندر يضحك: لا السالفه واضحه مغمى عليك يعني مغمى عليك
اول ماوقفت السياره عند المطعم ناظرت بالمدخل كان عباره عن درجتين من الرخام الرمادي بعده قوس محدد بخط رمادي بداخله بابين حديد تزينهم نقوش ناعمه يتوسط البابين فانوس يتدلى وسط القوس..
فتحت الباب وحست بشلل برجلينها موقادره تنزل اول مره تجي مطعم لاومع بندر وش هالفشله بدت تلوم العنود بداخلها على افكارها الغبيه
جا بندر عندها وهو مبتسم :معليه انزلي ماراح اكلك
نزلت معاه وكل خطوه تجر الثانيه وهي تمشي قالتها بتردد وبصوت واطي: الطاوله محجوزه بأسمك
بندر مبسوط : ياعيني ع الحركات بس
دخلو المطعم اللي كانت صبغته صفرا وانارته خافته استقبلهم الجرسون :اهلاً وسهلاً
بندر: حاجزين طاوله بأسم بندر متعب
الجرسون يمشي قدامهم عبر الممر ويوصلهم لطاوله بجنب نافوره صغيره..جلسو على الطاوله الدائريه المغطيه بمفرش اخضر عليه نقوش بيضا وكراسي مزين بنفس الطريقه قرب القرسون الحاجز الخشبي اللي يحوي مربعات زجاجيه غير شفافه ..
ناظر فيهم بأبتسامه : شوي ويكون الطلب جاهز
بعد ماقفل الحاجز وراح ..ناظر بندر فيها: مجهزه الطلب بعد ؟ وش الطاري من زمان اشحذك اشوفك من بعيد ماترضين
نوره:...................
بندريسمع صوت زقزقة العصافير ويناظر بالمكان اللي كان راقي الطاوله كانت مرتبه بطريقه حلوه الصحون والملاعق والشوك والمنديل ..غير الأضواء الخافته اللي توحي بالرومنسيه ناظر فيها وبصوت ملاه الحب: احبك
نوره استحت وحست قلبها ينبض بقوه
بندر يضحك: مشكله انتي انطقي بكلمه ماراح اكلك
نوره بهدوء:طيب
صوت طق الجرسون..بندر : ايوه
فتح الجرسون جانب من الحاجز حط صحن المقبلات الفرنسيه وحط بجانب كل واحد شوربة الأستكوزاكانت مقدمه بكوب صغير ناصع البياض ومزينه بشريحة ليمون على جانب الكوب..
بعد ماراح الجرسون ناظر بالشوربه وناظر فيها : تعرفين وش احب؟
نوره بهدوء : اكيد
بندر: ياويلي بس ياللا شيلي الغطا عشان تاكلين
نوره :باكل بدون لااشيله
بندر يحط الملعقه : موقبول صراحه ابي اشوفك
نوره مرتبكه: وقت ثاني
بندر معصب: متى؟ خطبه مااقدر اخطبك لأن ابوك معقد السالفه وهذي المره الأولى اجلس معك كذا رغم ان علاقتنا من زمان
نوره غصب عنها بدت تبكي كانت تبيها لحظه حلوه ماينساها بندر وخربت كل مخططاتها
بندر بسرعه وبخوف: تبكين لالا كله ولا تبكين مهوب لازم عمري لاشفت وجهك ليه تبكين
نوره وهي تبكي : كنت ابيها تكون لحظه حلوه بس استحي منك مااقدر اشيل الغطا عن وجهي
بندر اخذ الملعقه وبدا يشرب:انا حمار غبي ماافهم خلاص والله لأكل وانتي براحتك اهم شي راحتك
نوره تمسح دموعها : حاشاك
كلها دقايق ودخل الجرسون مره ثانيه شال الشوربه وحط 2 كوكتيل طبقات ومعاهم الطبق الرئيسي ..كان عباره عن مأكولات بحريه منوعه وبنفس الصحن كان فيه شموع وحركات وكان مقدم بطريقه روعه..
بندر يناظر بالشموع مذهول :والله حركات لاواكل بحري والله جبتيها جــ.. سكت وماقدر يكمل كلامه بعد مارفع عينه وشافها شالت الغطا عن وجهها حس بنبضات قلبه تتسارع وانفاسه تصير بطيئه مره ..ناظرببياض بشرتها وصفائها رموشها الطويله وعيونها الواسعه خدودها الممتلئه وشفتها المرسومه حس بشلل بكل جسمه ماكن متوقعها بهالجمال ..بداخله كان فيه صوت يقول أي ميساء مغربي نوره احلى بكثير هذا وهي محجبه..ماقدر يشيل عينه او يبعد تركيزه
نوره بهدوءبعد مانزلت راسها : ماحبيت اكسر خاطرك وياللا اكل
بندر بفهاوه: هاه لا انا شبعت
نوره بدلع:خلاص بغطي وجهي ونمشي
بندر بسرعه : لا لا والله لأكل
كان ياكل وهو مبسوط كل مارفع عينه وشاف وجهها الحلو انفتحت شهيته اكثر كان يراقبها تاكل بهدوءوبنعومه..كان يحس قلبه يسوي ايقاعات صوت رقيع بداخل جسمه وحس انه يحبها اكثر
صوت طق ع الحاجز قطع اندماجه وبسرعه وانفعال: غطي وجهك بسرعه
نوره بنبرة تحدي: خواتك مايغطون وجيههم
بندر بسرعه : وش جاب لجاب بعدين خواتي بابا مدلعهم وغطي وجهك لاافقعه
بعد ماغطت وجهها فتح الجرسون جزء من الحاجز : اقدم الحلى؟
بندر يناظرفيها: حلى بعد
نوره بهدوء : قول له ايه
بندر : ايه
شال الجرسون اللي على الطاوله وجاب الكيكه الدائريه اللي داير مدارها شموع وبوسطها شمعه كبيره وحطها بوسط الطاوله
بندر ناظر بالكيكه وناظر بنوره مستغرب
نوره بهدوء: كل عام وانت بخير
الجرسون يتبسم: هبي بيرت دي
قفل الحاجز وراح ..بندر ناظرها مستغرب يعني كل هذا عشان عيد ميلادي؟ والله انا ناسي طلع جواله يناظر بالشاشه : غريبه ماجاتني رسايل ولاهدايا يمكن عشانك محتفله فيه بدري
نوره بهدوء : احسن وياللاطفي الشمع
طفى الشمعات وهو مبسوط وبعد ماجلس ناظر فيها: نوره احبك والله هذا احلى عيد ميلاد يمر علي
فتحت شنطتها وطلعت علبه مستطيله مغلفه ومربوطه بشريطه حمرا مدتها له وبكل حب : ادري قدرك اعلى من كذا بس هذا اللي قدرت عليه
بندراخذها وصار يفتحها وهو مبتسم: نوره اهم شي انتي معي كل عام وانت بخير من فمك تسوى الدنيا ومافيها ..فتح العلبه وشاف القلم الفضي اللي مكتوب عليه نوره بخط جميل على جنبه تبسم بعنف: والله حركات وشلون قدرتي تطلعين من البيت
نوره تضحك: رحت مع شروق اختي قلت لك انها تجهز لزواجها وقلت لها الهديه لصديقتي
بندر وهو يتبسم:الله لايحرمني منك
نوره: ولايحرمني منك
بعد مااكلو من الكيكه وقفت بهدوء: بروح الحمام وانتم بكرامه
بندريتبسم : اوكي انتظرك
راحت وبعد دقيقتين رجعت وبدون لاتجلس: هاه مشينا؟
بندر بحزن: تو الناس
نوره : لامابي اتأخر ماما مهددتني
بندر: طيب بدفع الحساب
نوره بهدوء: خلاص دفعته هالعزيمه هديه مني
بندر: لازم بردها لك وقريب
نوره وهي مبسوطه: عمرك ماقصرت معي بشي
بندر بحب: الله يقدرني يانوره واسعدك طول العمر..اخذ مفتاحه وجواله ومشى معاها للسياره وهو مو مصدق حاس كل اللي صار حلم شي من الخيال
نفس العام ..سنة 1427 للهجره ..ولكن الأيام قد مضت بنا..
يوم الخميس 25 جمادى الأول ..
الساعه 12 الظهر..
فتحت باب غرفة شروق .لقتها محتاسه تجهز اغراضها ..باقي على زواجها اسبوع ..
نوره بحماس: العروسه مو محتاجه مساعده
شروق: اليوم بروح اجيب فستاني تجين معاي
نوره مبتسمه: ايه وليه لا
شروق: انا قلت لريمو الغبيه قالت مالها مزاج
نوره تضحك: ماقلتي شي جديد ريم دايم مالها مزاج بس أنا زعلانه منك
شروق مستغربه : ليه؟
نوره: ماقلتي لي كل عام وانتي بخير اليوم عيد ميلادي
شروق تضحك : شسوي تدرين فيني مزحومه بزواجي
نوره : ايه صح وبعد ماقطع كلامها صوت المسج فتحته وكان من بندر
:
حبيبتي انزلي تحت فيه شي لك
:
كتبت رساله بسرعه وارسلتها له
:
بهالظهر مااقدر
:
جاها الرد بسرعه
:
اختي اللي جايبته وانا خليتها تطق الجرس خلاص
:
نوره قفلت المسج وناظرت بشروق: هذي خويتي تقولي انها تحت جايبتلي شغله يمكن عشان عيد ميلادي
شروق تتبسم: ابسطي يابنت بدت المعايدات
فتحت عهود الباب بسرعه: تعالي انزلي بسرعه فيه بنت تنتظرك على الباب وعندها علبه كبيره ومارضت تدخل
نوره راحت غرفتها بسرعه لبسة بنطلون جينز وتي شرت ابيض ونزلت بسرعه كانت تمشي للباب الخارجي وهي مستحيه من اخته اول مافتحت الباب ناظرتها جنا وهي تتبسم: كل عام وانتي بخير
نوره: وانتي بخير
جنا: اخوي بيدخل العلبه انا مااقدر اشيلها
نوره مستحيه: طيب بفتح الباب كله وهو يحطها على جنب ويطلع لاني بتخبا ورى الباب
جنا : طيب ..ونادت بصوت عالي : تعال بندر
علا على صوت المسجله بالسياره قبل لاينزل وترك بابه مفتوح اول ماسمعت نوره صوت الأغنيه العالي
غنو لحبيبي وقدمو له التهاني في عيد ميلاده عساها ميت عام
افرح حبيبي واطلب اغلى الاماني الليله ياعمري تناديك الاحلام
ودعت عام وقابلك عام ثاني تعال نقضي العمر في حب وهيام..عبد المجيد عبد الله ..
حست برجفه وهي واقفه ورى الباب رومنسية بندر مستحيله مالها حد..سمعت صوته وهو يحط العلبه يسار الباب ..ماكانت تقدر تشوفه بس سمعت صوته: نورتي كل عام وانتي بخير ياقلبي
نوره مستحيه وبصوت واطي:ياربي بندر مايستحي وبصوت عالي : وانت بخير
بندر: نورتي عشان هالمناسبه لك هديتين الثانيه بجيبها بالليل
نوره انحرجت منه وماعرفت وش ترد عليه بعد مامشى سحبت جنا الباب وهي تتبسم: خلاص راح تدرين اخوي يحبك مره عمري ماشفته مبسوط مثل اليوم
نوره استحت وماقدرت تعلق على كلامها
جنا: ياللا انا بروح خلي أي احد يساعدك تدخلون العلبه
نوره: ان شاء الله
بعد ماطلعت جنا ناظرت نوره بالعلبه اللي واضح عليها انها علبة كيك كانت عموديه وطويله ..دخلت البيت بسرعه: عهود تعالي ساعديني ..جات عهود بسرعه وهي تطلع معها : ابي قطعه كبيره
نوره تمسك العلبه من الطرف اليمين:قطعه من وشو
عهود وهي تمسك الطرف اليسار: من هالكيكه الكبيره
وهي تمشي بالكيكه سمعت صوت المسج بمخباتها كملت طريقها الى ان حطت الكيكه على طاولة الطعام ..طلعت جوالها وقرت المسج اللي من بندر
:
لاتنسين تطفين الشمع قبل لاتفتحين الهدايا
:
نوره مستغربه : هدايا؟
فتحت العلبه وانبهرت هي واختها بالكيكه اللي تسحر مكونه من اربع طوابق كانت الطوابق دائريه خليط من اللونين الأحمر والوردي رفعت راسها تناظر بالطابق العلوي ..ناظرت بعهود : تعالي نحطها على الكرسي نزلوها بشويش على الكرسي ناظرت بالطابق العلوي كان مكتوب عليه عيد سعيد نورتي انبسطت وهي تقرا الكلام وتناظر بالشمعتين اللي ملصقين بالكيكه رقم اثنين ويمينه صفر ناظرت بالعبله المربعه الموجوده بطرف كل طابق ..
راحت بسرعه للمطبخ وبصوت عالي : نادي خواتك بجيب ولاعه وصحون وسكينه
عهود تصارخ: طيب ولاتنسين الشوك
اخذت الولاعه بسرعه وحطت 5 صحون فوق بعض وفوقهم 5 شوك وسكين رجعت تمشي بخطوات سريعه وهي تنادي امها: ياللا ماما تعالي
اول ماوصلت كانو خواتها واقفات..
شروق تناظروهي مبتسمه وبعينها علامات الأنبهار: ياعيني وش هالحركات
ريم تتحلطم : كيكه وش كبرها وش هالصديقه الحركات
ام سلمان تتقدم لهم وهي تناظر بنوره تشغل الشمع: وش هالحركات يابنيتي عيد ميلاد وخرابيط مااخبر هالحركات من السنع
نوره بعد ماشغلت الشمع: عادي ماما حنا ماقصدنا نحتفل عادي يعني
عهود بحماس: ياللا طفيهم
نوره: ياللا كلكم معي: 123 ..
عهود ونوره وشروق ينفخون بحماس وهم يضحكون ..
ريم بكل برود: وش هالغباء
عهود: ياللاافتحي العلب
نوره اخذت اول علبه وفتحتها كان بداخلها خاتم وبالجهه المقابله للخاتم مكتوب((كل)) بطريقه حلوه ..اخذت العلبه الثانيه كان بداخلها حلق وبالجهه المقابله مكتوب ((عام))..اخذت العلبه الثالثه كان بداخلها أسواره ناعمه وبالجهه المقابله مكتوب ((وأنتي)).. اخذت العلبه الرابعه كان بداخلها قلاده ومكتوب بالجهه المقابله((نورتي))..
عهود تصارخ: وش هالحركات
نوره بصوت واطي وهي مستغربه: لاكذا زياده
ريم تناظر بالهدايا: هذول كأنهم الماس وش هالصديقه الغنيه
نوره تناظرها: الماس؟ تمزحين
ريم بقهر: لاوالله ماامزح لمعتهم الماس اما اذا كان تقليد متقن ماادري
شروق تتبسم: بعد هالهدايا لاتطلبين شي
ريم تلوي فمها: وش هالصديقه اللي تجيب الماس
عهود بسرعه : وش قصدك والله بنت انا شفتها
نوره بسرعه: اهم اغنيا مرررررررررره هالكم ألف بالنسبه لها ولاشي
ريم بكل قهر: اها
:
:
الساعه 1 الظهر بتوقيت السعوديه 4 الفجر بتوقيت أمريكا..
يمشي والتعب واضح على مشيته من الساعه 8 وهو واقف على رجلينه مسح خشمه بطريقه وضح عليها انه مدمن مافيه شك بكذا وجهه اللي كأنه واحد نعسان او مضيع والهالات اللي واضحه تحت عيونه تقول أنا مدمن ..ناظر بالبودي قارد اللي واضح التذمر على ملامحه وبصوت واطي:والله محد جبرك تمشي وراي ..
اول ماوصل الشقه رقى الدرج بتعب فتح باب الشقه ودخل غرفته رمى نفسه على السرير بتعب..
مايدري وشلون بيصحى الصبح لازم يصحى بدري لأنه اول يوم له بالجامعه متحمس حيل وعنده مبلغ لابأس فيه جمعه من غسيل الصحون يقدر يوفي فيه مصاريف بسيطه للجامعه الأكل والشرب بيدبر نفسه بأي شي تجيبه الخايسه نجلاء ..حمد ربه انه جهز ملابس وعطور وغيره من السعوديه وماقصر على نفسه بالشنط ..حط يده تحت راسه وبدا يغمض عينه بتعب وبينه وبين نفسه: بحمل معاي فلوس وانا طالع من الجامعه بشتري منبه..فتح عينه على اقصاها :مابي انام اخاف مااصحى ..حك راسه بتعب : ياربي مااقدر اواصل والحل هالحقيره مستحيل تصحيني ..بعد تفكير اخذ لحافه وطلع نام بالصاله على أمل انه يصحى..
:
:
:
الساعه 1:30 الظهر ..
منسدحه على بطنها وتكلمه بكل حب : بندر ليه مكلف على نفسك كل ذي هدايا
بندر بحب وبكل رومنسيه: انتي تستاهلين عيوني
نوره بخجل: لابس والله كذا كثير هذا الماس شف كم كلفتك هالكم قطعه
بندر بهدوء: والله مافيه شي يسوى قيمتك عندي نوره انتي عطيتيني اللي مايقدر لابمال ولاذهب ولا الماس ولاغيره والله حبيبتي واناافكر وش اهديك احترت لأن العمر كله وهالدنيا كلها ماتسواك ولاتساوي غلاك عندي
نوره بهدوء وهي مستحيه: ياربي بندر كبير علي هالكلام
بندر بحب: والله مو كبير يكفي الحب اللي مالقيته بدنيتي كلها مالقيته الا عندك مهتمه فيني وتسألين عني دايم وتخافين علي وربي انتي بحياتي عوضتيني كل شي لاتضنين السعاده بالمال والله انا اهلي اللي هم اهلي مايسألون عني ولايكلموني كثرك بابا وماما على طول مشغولين وكل واحد بالبيت له جناح خاص ومانلتقي الا بالصدفه او بمواعيد بابا اذا ابي منه شغله لازم ابلغه قبل اسبوع او اكثر عشان يفضى لي
نوره بحب: بندر
بندر: ياعيونه
نوره : انت حياتي والله انا احبك
بندر مبسوط: يالبيه بس وانا اموت فيك
:
:
:
الساعه 4 العصرمنسدحه على الكنبه وتبكي امها مشغوله وابوها مو بالبيت حاسه هالجدران تخنقها كل ماتذكرت ان الأجازه بدت تحس بنار بصدرها راح تكون بسجن قاتل يذبحها.. سلمان كان ياخذها للجامعه ويرجعها للبيت مايوجه لها أي كلمه ومايرضى تطلع من البيت ابد ..كتبت له مسج
:
سلمان ممكن اروح اشتري هديه لأختك اليوم عيد ميلادها
:
انتظرت 5 دقايق وهي تمسح دموعها اللي تزيد سرعة نزولها كل ماتأخر عليها بالرد لماسمعت صوت المسج فتحت الرساله بخوف
:
انثبري مكانك طلعه من البيت مافيه ارسلي لها مسج وقولي لها هديتها عندي بشتريلها ساعه
:
تنهدت بحسره بعد ماقرت المسج وارسلت لنوره رساله
:
نورتي كل عام وانتي بخير ياقلبي هديتي بتوصلك مع سلمان
:
كلها ثواني وجاها رد من نوره
:
وانتي بخير ياقلبي ..ياعيني على الحركات اشوف صرت شماعه للعشاق
:
العنود ابتسمت بسخريه بعد ماقرت المسج
:
:
:
الساعه 5 المغرب ..
فتحت الستاره اللي بغرفة لجين وهي تراقب سيارة احمد من يوم صارت لجين ببييتهم وهو كل يوم يجي يوقف عند البيت للساعه 9 بعدين يروح على امل ان لجين يحن قلبها وتكلمه ..
شذا وهي تناظره : حرام عليك لجين والله يكسر الخاطر
لجين بحزن: وانا مااكسر الخاطر خسرت ولدي ومااقدر امشي زادني خساره والحين جاي يبي يكلمني ماابيه
شذا تتنهد : ان شاء الله تتصالحون قريب
لجين بعصبيه: زهقتي مني يعني عادي ارجع الشرقيه
شذا تترك الستاره وتقرب منها:لا ياقلبي بالعكس والله مونستني بس ابيلك الخير
لجين وهي تبكي:اذا بجد تبيلي الخير قولي لخالي يخليه يطلقني مابيه خلاص عفته وربي مااحب اسمع اسمه ولاطاريه
شذا بهدوء: يعني هذا اللي يريحك
لجين بسرعه: ايه والله ريحوني انا تعبت كل يوم والثاني تكلموني عنه وتبوني اصالحه قلت لكم خلاص ماعد ابيه
شذا بهدوء: خلاص اليوم اكلم خالك يخلص لك هالموضوع
:
:
:
الساعه 5:30 المغرب بتوقيت السعوديه 8:30 الصبح بتوقيت أمريكا..
وصل الجامعه متأخر طول الطريق يركض والبودي قارد يركض وراه وصل عند جامعة دنفر وقف وهو يناظرها بذهول الجامعه كانت عباره عن ثلاث مباني كبيره مره اكبر شي المبنى الأوسط كان عريض وممتد سقفه مثلث الشكل وامامه عمود عالي تتوسطه ساعه كبيره دائريه ويمينه ويساره مباني اصغركانت ملتصقه بالمبنى الرئيسي اقصى اليسار يوجد مبنى عالي مستطيل الشكل تعلوه قبه دائريه باللون النحاسي الغامق اما بالنسبه لباقي المبنى مطلي باللون الرمادي الفاتح جداً القريب للأبيض ..اسقف المباني المثلثيه كانت باللون الرمادي الغامق اما باقي المبنى فكان مطلي باللون البني الغامق اقواس الأبواب والنوافذ كانت مطليه باللون الرمادي الفاتح جداً..حديقه كبيره امام المبنى تحوي طرق ضيقه تتخلل الحديقه بعنايه ..اشجار كبيره وطويله كانت تزيد من جمال ممرات الحديقه التي كانت اشبه بشوارع ضيقه ..
راقب الطلاب الكثر يتجه كل واحداً منهم للمبنى اللذي يحوي كليته او تخصصه..
بينه وبين نفسه: الحين انا وين اروح ..تخصص مشعل كان ادراة اعمال ..
البودي قارد يأشر له: الحقني ..
مشى ورى البودي قارد الى ان دخل للمبنى كان مزدحم بالطلاب اشكال والوان منهم اشكالهم عربيه نوعاً ما ومنهم اشكالهم اوربيه وبقوه ..اناقة الطلاب كانت مره ملفته اللي لابس لبس كاجول واللي لابس لبس رسمي واللي لابس لبس مريح جداً ..مشعل كان لابس قميص ابيض مقاسه بالضبط.. نص كم مطوي نهاية الكم بحركه انيقه بنطلون اسود وكرافا (ربطة عنق) سودا مخططه برمادي ..وجزمه رسميه بيضا بقاعده سودا وانتم بكرامه ..
مرت بجنبه بنت اجنبيه ناظرت فيه : wooooooooow
مشعل انحرج وكمل طريقه للقاعه اول مادخل القاعه كانت زحمه وواسعه جلس على اول كرسي لقاه فاضي وكان على الطرف والبودي قارد وقف جنبه كان حاس بتوتر يحس كل النظرات عليه تقول وش هالمدمن..سمع حوار اثنين جنبه شوية همهمات يقولون هذا اكيد ولد سفير او شي كبير ماتشوف الحراسه اللي معاه..
ابتسم بسخريه للي سمعه وبداخله: ناس فاضي ماتدري باللي فيني ولاوش ذا اللي معي
بهالوقت دخل الدكتور وبدا يعرف بنفسه ويرحب بالطلاب الجدد
:
:
:
الرياض الساعه 8 ..
جالسه هي وخواتها بالصاله يسولفون ويضحكون ..
طلع سلمان من المجلس وناظر فيهم: وحده تروح تساعد ماما
نوره مستغربه: ليه وش صاير
سلمان واللي له فتره اخلاقه دايم زفته: قومي وبلا كثر كلام ابوك معه رياجيل
نوره تناظره: طيب وانت على طول معصب
سلمان بدون نفس: انا كذا ياللا قومي اخلصي
راحت هي وشروق يسوون الشاهي والقهوه مع امهم وبعد مااخذها سلمان رجعو يتناقشون ويسولفون عن زواج شروق وتجهيزاتهم له
:
:
:
الساعه 8:30 مساءً بتوقيت السعوديه 11:30 الظهر ..
راح الكفتيريا اللي كانت مليانه طلبه اصواتهم واهم يسولفون وياكلون كانت تملى المكان كان ميت جوع بس مايقدر يشتري شي المبلغ اللي عنده للمنبه .. جلس على احد الطاولات وهو حاس بتعب وصداع رفع راسه وكانت رافعه راسها بنفس اللحظه كانت تكتب بدفتر ورفعت راسها تشرب من كاسة العصير بعدت شعرها الغجري الكثيف البني عن عينها ..ملامحها كانت طفوليه مره بشرتها بيضا مره خدودها ورديه وشفتها مرسومه كانت معنى حقيقي للنعومه ..ناظرت فيه وهو يراقبها تبسمت له بهدوء بادلها الأبتسامه وهو يفكر هالوجه انا وين شايفه وبعد عمق تفكير :ايوه صح هذي البنت العربيه اللي صدمت فيها كم مره ..
وقفت بهدوء رفع عينه وهو يناظر فيها تقترب منه كان مستغرب مررره وهو يناظر فيها كانت لابسه نفس لبسه تمام بس بدال البنطلون تنوره للركبه وبدال الجزمه الرسميه بوت جلد ابيض..
وقفت قباله وبإبتسامه عريض: تذكرتني؟
مشعل يناظر بالبودي قارد ويناظر فيها: ايه
البودي قارد بدا يشده من يده ...
مشعل بهدوء: اسف مو مسموح لي اكلم احد ..
ومشى بسرعه والبودي قارد يسحبه وهي تناظره بأستغراب
مشعل بينه وبين نفسه : الله يستر هالحين ان قال لنجول الخايسه
:
:
:
الرياض الساعه 9:30 مساءً ..
طلع مع ابوه من المجلس ..قرب ابو سلمان من البنات وهو مبتسم على الأخر جلس على الكنبه وبصوت ملاه الفرح: تدرون مين كان بالمجلس
شروق مبتسمه: مين ومخليك مبتسم كذا
ابو سلمان : هذا متعب الـ........... ومعاه ولده الكبير بندر اخو صديقتك اللي جات اليوم يانوره وجابت الهديه
ريم بتذمر : وانا اقول وراها جايبتلك الماس اثاريها بنت متعب الـ.........
نوره واللي جاتها ام الركب لما سمعت اسم بندر وابوه : وش يبون
ابوسلمان مبسوط : جايين يطلبون يدك يابنيتي
نوره توترة وارتبكت لما سمعت اللي قاله ابوها: يطلبون يدي انا ؟ وبينها وبين نفسها : عشان كذا يقول لي هديه ثانيه بالليل
ريم بقهر: اهم حددو وقالو نوره
ابو سلمان: الابو يقول نوره صديقة بنته وحكت لأخوها عنها وقال يبيها وماتناسبه ببناتي الا نوره لأنه اكبر منها واصغر عنك
ريم بقهر: وانت بتزوج نوره قبلي؟
ابو سلمان وهو مبسوط: الناس مافيهم شي ينعاب والولد بيمسك منصب عند ابوه ودراسته حلوه اذا اختك موافقه انا ماعندي أي مانع
:
:
:
يوم الجمعه الساعه 1 الظهر ..
فارس بهدوء: يعني ماتغديتي
جود بدلع : مالي نفس بعدين عادي اقدر اتغدا بعدين
فارس بحزم: قومي تغدي وبلا دلع
جود: مابي
فارس بعصبيه: جــــــــود
جود بدلع اكبر : غنيلي واقوم
فارس بهدوء: وش تبيني اغنيلك
جود تفكر: أي شي لراشد
فارس : طيب ..احم احم.. علمني وشلون انساك وانام وانا اللي لك صاحي ايام وايام..شاغلني في بالي شوقك ولا يروح صاحي انا ونايم مايروح مايروح..دنياك دنياي هو حد يسواك في القلب وياي وفي البال وياك..خلاص ياللا قومي
جود وهي مبسوطه: طيب بقوم
قفلت الجوال وطلعت من غرفتها تنزل الدرج بسرعه شافت جنا تكلم بتلفون البيت و بندر واقف يراقبها بحماس
جود مستغربه : وش صاير؟
بندر يـأشر لها اسكتي ..بعد ماقفلت جنا تكلم بسرعه: هاه وشو وش يقول بابا
جنا بحزن: يقول ابو البنت كلمه وقاله مافيه نصيب
بندر بعصبيه: وشلون مافيه نصيب اكيد هو رفض من راسه نوره قالت لي قبل
مشى بسرعه وهو يدق على نوره كان يرقى الدرج وهو يدق عليها الى ان وصل غرفته دق حول 4 مرات وماجاه رد ارسل لها رساله
:
نوره قالك ابوك بموضوع البارح
:
وماكانت الا دقايق وجاه الرد مثل الصاعقه
:
ايه قالي الله يسعدك مع غيري انا وانت ماننفع لبعض وكل شي جبته لي برجعه لك مع اختك
:
حس بألم حــــــــــــــــــاد بقلبه وكتمه مو قادر يتنفس ..العرق كان يتصبب من جسمه رغم برودة التكييف
نهاية الفصل