الفرحه احساس جميل غمرني اليوم واحسسته واضحاً بعيني وابتسامتي وكل حركاتي..
شيئاً جميل أفتقدته لأيام وجدته من جديد وأعاد لي الفرحه وزين وجهي بأبتسامه ساحره..
كوب من الموكا البارد شربت منه القليل وبدأت أسرد المزيد من الأحداث بحماس ..
الفصل الواحد والعشرين
نفس الزمن الماضي 12 من شهر ذو الحجه ..
الساعه 3 الفجر ..
فتحت عيونها بصعوبه سحبة الشرشف الأبيض عشان تستر جسمها العاري ناظرت بالغرفه الخاليه تماماً من الأثاث عدا السرير الخشبي النفرين اللي نايمه عليه ..ناظرت ياسر كان جالس بمقدمة السرير ممسك بالريموت ولابس شورت والجزء العلوي من جسمه عاري يشوف مسلسل بالتلفزيون اللي معلق ع الحيط..
مسكت راسها بتعب: وش صار؟
ياسر ببرود: نفس كل مره
نوف مستغربه: وشلون يعني نفس كل مره كيف نمت بهالطريقه وماحسيت لنفسي
ياسر وهو يقلب بالقنوات وبدون لايلتفت لها: لأنك شربتي كثيييييير
نوف بقهر : ياربي يسور الف مره اقول لك مابي اشرب هالشغلات
ياسر: انا ماقلت لك أشربي انتي شربتي لحالك..وقف وأخذ التيشرت يلبسه: ياللا قومي بوديك الكبير
نوف تناظر الساعه وتصرخ بخوف : ياربي الوقت تأخر كيف بدخل البيت
ياسر: انتي ماقلتي قفلتي باب غرفتك
نوف: ايه قفلته
ياسر: خلاص انا برقى الطوفه بفتح لك الباب الخارجي وانتي ادخلي بشويش لغرفتك اقفليها ونامي وان سألتك امك بعدين وينك قولي كنت نايمه وقافله الباب
نوف بخوف:اخاف واحد من اخواني صاحي
ياسر: امشي بس اخوانك مع اخوياهم مابيرجعون غير الظهر اعرف اللي رايحيين معهم انا
نوف بهدوء: طيب
:
:
:
الرياض الزمن الحالي ..حيث توقفنا
كتب رساله بسرعه ويده ترجف
:
ياغبيه كل شي اهديته لك هو ملكك خلاص مالي حق اخذه بس علميني من رفض الزواج وليه
:
انتظر ردها وهو متوتر حاس انه شوي وبتفلت اعصابه وبيبكي احساسه مايختلف كثير عن الطفل اللي مضيع امه بسوق عامه ورغم محاولاته عشان يلقاها الا انه يفشل ..ضغط الزر الأحمر بقوه عشان تنور شاشة الجوال ويتأكد جاه رد او لا ..صدره صار يعوره ونبضاته تزيد قوه وسرعه ..سمع صوت رنة الرسايل فتح الرساله بسرعه
:
بندر انت كانت لك مكانه خاصه عندي وكنت ارتاح معاك اللي بيننا يمكن تسليه اوتضيع وقت ويمكن حب طايش بس مو زواج انا ماتوقعتها توصل بجد للزواج بندر انا اسفه انت الف بنت تتمناك بس انا مابيك زوج لي
:
كان يقرا كلامها وتزيد الرجفه بجسمه ويضيق نفسه اكثر واكثر اول ماخلص جملتها الأخيره واللي كانت اقوى شي بالرساله حس بدوار فضيع طاح بقوه على الأرض وضرب راسه الأرضيه
:
:
:
الساعه 1:30 الظهر بتوقيت السعوديه 4:30 الفجر بتوقيت امريكا..
دخل الجرسون وبيده دفعه جديده من الصحون حطهم على المغسله ومشى
مشعل جلس على لوح الخشب اللي واقف فوقه بحزن وبصوت واطي: ياربي على هالحاله ماراح اوصل البيت الا بعد الساعه 5 شسوي
قربت منه انجولينا النادله الصغيره اللي تشتغل معاه وقالتها بأبتسامه بريئه: Do not Grieve (لاتحزن)
مشعل فتح فمه يبي يرد عليها ولاحظ نظرة البودي قارد القاتله تبسم لها ووقف يكمل شغله ..
رجع الجرسون وحط مجموعه من الصحون والكأوس..
مشعل واللي خلاص انقهر ناظر بالجرسون : All of these dishes (كل هذه الصحون)
رئيس العمال وهو يناظر مشعل بقهر : I work in silence Woe to you (اعمل في صمت تباً لك)
مشعل سكت وش يقول وهو ياخذ فلوس من هالحقير غطس الأسفنجه بالصابون بسرعه وبدا يغسل الصحون بسرعه اكبر ..اول ماخلص ناظر بالجرسون
الجرسون وهو ياكل: Can you go (يمكنك الذهاب)
غسل يده وتحرك بسرعه كان يمشي بالشارع وهو حاس بصداع فضيع مدمن ويساهر ماتجي حس انه وده يبكي حاله .. لو استمر على هالحاله مستحيل ينجح بالجامعه قبوله وكان توفيق من رب العالمين بس النجاح صعب ينجح وهو على هالوضع حتى تركيز مايقدر يركز ووصل لمرحله مايقدر يستغني عن المخدرات..اول ماوصل البيت وهو داخل للعماره شاف دلو تنظيف لونه ابيض له حمال حديد ناظر فيه وبعد تفكير اخذه والبودي قارد يناظره بأستغراب..
اول مادخل غرفته راح للحمام وانتم بكرامه توضى وصلى الصبح وبعد ماانهى صلاته اخذ الدلو حط فيه مويه للثلث نزل الحماله وربطها بسلك تلفزيون هذا اللي كان متوفر عنده علق الدلو على مسند السرير اللي يصير وراه على طول ومد السلك بشويش وربطه برجل الساعه الحديديه وحط الساعه على طرف الطاوله جلس على السرير بشويش وانسدح ناظر بالدلو تبسم غمض عينه واستسلم للنوم
:
:
:
الساعه 2:30 الظهر ..
جنا جالسه بالصاله تهز رجلها بقوه : بندر صار له ساعه من لما راح غرفته
جود ببرود: عادي طول عمرنا كل واحد بغرفته وش الجديد
جنا: لاهو كان معصب وانا انتظره يرد لي خبر
جود تقلب بالسي ديات : عادي يابنت لاتعطين الموضوع اهميه تلقينه نام
جنا بعد تفكير: لامااتوقع نام تعالي معي نروح نشوفه
جود تمشي بملل: اف منك والله ماعندك سالفه
كانت تمشي بسرعه بداخلها حاسه بخوف ماتدري ليه ..طقت باب الجناح حقه ماجاها رد منه طقته مره ثانيه ونفس الشي
جود تفتح الباب: خلصينا بس
تلفتو يمين ويسار ماشافو احد
جنا وهي تتلفت : بنـــدر
جود تصارخ وهي تركض عليه : جنا هنا ..نزلت على الارض ورفعته بصعوبه وهي تهزه بخوف ري ري شفيك رد علي
جنا تناظره وهي خايفه : ياربي شصار عليه ..نزلت لمستواه وهي تحس بقلبها ينبض بقوه تحسست نبضه السريع وحست بحرارة جسمه انفاسه السريعه والرجفه بيدينه صرخت بصوت عالي: جود كلمي بابا والا تركي بسرررررررررررعه
:
:
:
الساعه 3:30 الظهر
ممسكه بجوالها وتدق عليه لها ربع ساعه هذا الأتصال العاشر وماجاها رد منه ..تحدد زواجها 15\7 وتبي تبلغه لازم اخوها يكون حاظر عرسها ..
ام مشعل وهي تناظر فيها رايحه جايه بهالصاله وهي تدق : يمكن ماصحى باقي
العنود ومازالت تحاول : لا هو صار يداوم بالجامعه وطبيعي يصحى بدري
ام مشعل بعد تفكير: هالحين الساعه عندهم حول 6:30 يمكن يصحى الساعه 7
العنود تفكر : يمكن ياربي ..ماما تخيلي مايقدر نزل بهالتاريخ
ام مشعل بحزن: امر الله وش نسوي
العنود بسرعه: لا بأجل العرس مشعل لازم يحظر عرسي..شردت شوي :لازم تكلم سلمان وتقول له هالكلام بس هو مايرضى يكلمها ..ناظرت بأمها: ماما وين جوالك
ام مشعل تتلفت يمين ويسار وتاخذ الجوال : خذي
اخذت العنود الجوال وراحت للمجلس دقت رقم سلمان وكلها دقايق وجاها صوته الهادي: الوو
العنود بعد تردد: الو
سلمان بقهر: ياليل التبن وش تبين داقه علي من جوال عمتي
العنود بهدوء يملاه الخوف: ابي اكلمك بموضوع
سلمان بقهر: ياربي هذي اللي تبي تخرب جوي وش تبين اخلصي
العنود بهدوء: انا ادق على اخوي من زمان ببلغه بموعد العرس مايرد اللي بقوله لو كان بيوم العرس ماعنده اجازه ابي نغير الموعد
سلمان بعصبيه: نعم وش قلتي ؟ يكون بعلمك انا عرس وخرابيط مابي ولولا ابوي كنت اخذتك بالملابس اللي عليك قالت نأجل قالت
العنود بحزن: بس انا قي مثل أي بنت البس فستان ابيض واسوي عرس
سلمان يضحك بسخريه: لاتضحكين انتي مو مثل أي بنت اللي تلبس الفستان الأبيض وتستاهل زفه سنعه هذي الشريفه العفيفه مهوب انتي
العنود حست بوجع بقلبها بعد كلمته قفلت الجوال بوجهه وجلست على الأرض وصارت تبكي بحرقه وتضرب نفسها وتصارخ : انا صح غلطت بس مالي ذنب ان الحقير سلبني شرفي ..لمت رجلينها وحطت راسها بوسطهم وصارت تبكي مثل الأطفال
:
:
:
الساعه 4 العصر بتوقيت السعوديه 7 الصبح بتوقيت أمريكا ..
ررررررررن المنبه وصارت الساعه تهز من الصوت ..طاحت من الطاوله لأنها كانت على الطرف انسحب الدلو مع الساعه وانكبت المويه على مشعل وطاح الدلو عليه ..مشعل فز متخرعه وهو ينافخ : اعوذ بالله وش هالصحوه الخايسه ..شال الساعه من الأرض وناظر فيها : ياسلام تمام صحيت على الوقت ..قام بسرعه غسل وجهه ولبس ملابسه تعطر وطلع من غرفته وراح على غرفة نجلاء وصار يطق الباب بقوه: نجول نجلوه اصحي
نجلاء فتحت الباب بكل عصبيه وهي تصارخ: وش تبي ياتبن
مشعل يرفع كمه : عطيني الأبره هالحين
نجلاء : اقول انقلع بس للظهر
مشعل واعصابه محترقه بس يحاول يمسك نفسه: لاتكفين هالحين اليوم بتأخر بالجامعه اخاف تجيني الحاله وانفضح
نجلاء بعد تفكير: بعطيك وتكلم اهلك اليوم دقو كثير يمكن بيجيبون فلوس
مشعل بسرعه: موافق مواف قبس خلصيني ابي اروح
دخل معاها غرفتها طلعت الأبره ضربتها ضربتين وغرستها بيده بمهاره ..غمض عينه للحظات وفتحها هز راس بسرعه وبصوت وضح عليه انه دايخ: ياللا بروح
نجلاء تتخصر وتمد الجوال: كلم اهلك بالأول
مشعل :ياربي كذا بتأخر بكلمهم لارجعت والله
نجلاء: قلت لك الحين والا قسم بالله اخلي البودي قارديه يقفلون الباب ومافيه جامعه
مشعل اخذ الجوال بأستسلام ودق على اخته وبعد ماجاه صوتها قالها وهو مفهي شوي: الو هلا حبيبتي شخبارك
العنود بحزن : هلا حبيبي.. مشعل مره اشتقت لك
مشعل بهدوء : وانا اكثر دقيتي علي وكنت نايم
العنود بسرعه وهي تحاول تخفي حزنها: ايه كنت بقول لك زواجي 15 شهر 7 ولازم تنزل تحظره
مشعل بعد تفكير: اعتقد عندي اجازه وقتها
العنود بحماس: احلف
مشعل: أي والله خلاص بتأكد وبرد لك خبر
العنود وهي مبسوطه: خلاص اوكي
مشعل : ياللا بقفل لأني تأخرت على الجامعه
بعد ماقفل سحبت نجلاء الجوال بسرعه: وش تبي اختك
مشعل : تبيني احظر عرسها
نجلاء ببرود: عشم ابليس بالجنه
مشعل بقهر وهو يحاول يركز: ليه يعني ودي اشوف اختي الوحيده عروس
نجلاء تجلس على السرير: لاتحلم وش استفيد انا لو سلمتك لأهلك
مشعل بسرعه : تستفيدين المبالغ اللي اخذتيها وجيتك لأخوك هنا
نجلاء وهي ترفع حاجب: ومين قالك اني راضيه بالفتافيت اللي اخذها من ابوك انا ناويه على اكثر
مشعل: بعطيك اللي تبينه بس خلينا اروح احظر العرس واذا تبين برجع امريكا
نجلاء تضحك بهستيريا: اقول مالك امل ومااضمنك ومستحيل اخليك تروح لاتحلم وروح جامعتك
مشعل بعد مافقد الامل صفق الباب بقوه ومشى وهو يحس بنار تغلي بداخله..غير الدوخه وعدم التركيز اللي سببتهم له الأبره
:
:
:
الساعه 5المغرب ..
وقف سيارته بالحديقه ونزل بسرعه لف لباب الراكب يساعد اخوه ينزل ..
بندر واللي صحصح بعد المغدي والابر: مافيني شي تركي وخر عني
تركي: مافيه شي يسوى تسوي بنفسك كذا بنت راحت تجي غيرها الف
بندر بحزن: لاتركي هذي غير نوره كانت حياتي انا كنت مثل المجنون ماتمر علي لحظه بدون طاريها ..وكمل بحزن اكبر : انت تعرفني كنت اقدر اتعرف على الف بنت بس مو راعي بنات انا بس هذي غير عفستني وخلتني كذا وراحت ..كمل بصوت عالي وعصبيه واضحه: تقول لي تسليه والله لأعلمها بخليها تندم حطمت قلبي انا اوريها ان مافضحتها
تركي بسرعه: اذكر الله بس اهلها ناس يعزون علينا
بندر بأستغراب: اهلها؟
تركي : ايه نوره تصير اخت سلمان انا ماعرفت الا لما قلت انت لبابا يتقدم لهم وقلت قبيلتهم واسم ابوها
بندر مستغرب: طيب ويعني؟
تركي: سلمان يصير ولد خال مشعل خويك يعني نوره بنت خاله وغير هذا سلمان ولد عم فارس خويي واعتقد هالأثنين اقرب ناس لي ولك
بندر واللي دارت الأحداث براسه ورجع بتركيزه لورا تذكر اول ماكلمها كان يبي مشعل وطلعت له نوره مع انه كان متأكد ان هالرقم مشعل داق منه الحين بس فهم ماكان تشابك خطوط ولاشي ..مسك السياره بسرعه بعد ماحس بدوخه
تركي يمسكه: وتقول مافيك شي الله يلعنها بنت تسوي فيك كذا
بندر بتعب: لاتلعن حبيبتي ماارضى عليها
تركي يناظره: وتقول بعلمها وبفضحها وانت ميت فيها امش بس الله لايوفقها ع اللي سوته فيك
بندر بقهر: تركي وش جالس اقول لاتدعي عليها والله يعورني قلبي
تركي بقهر: كنت راح تجيب لنفسك ذبحه والسبب هي وتقول لي لاتدعي عليها والله لو مااهلها كنت انا اللي ربيتها لك هالخايسه
بندر واللي صار ينافخ: تركي وبعدين معك تبي تجلطني يعني؟ كفايه اللي فيني
تركي بسرعه: خلاص خلاص وش رايك تروح معي ديوانية ابو الحميد الشباب كلهم جالسين هناك عشان تنسى شوي
بندر بهدوء: لامالي خلق
تركي يسحبه: امش بس غير جو بدال الحزن اللي انت فيه
:
:
:
الساعه 5:30 المغرب..
واقف كالعاده عند البيت ينتظر شي وشو مايدري..اخذ جواله ودق على فهد ..
فهد رد عليه ببرود: هلا احمد
احمد بيأس: فهد واللي يرحم والديك خلني اكلمها تعبت والله
فهد :وانت ليه تسوي فيها كذا؟
احمد بسرعه: انت وش دراك يافهد انا ماسويت لها شي بالعكس والله انا ضحيت عشانها انا مابي افضح امورنا العائليه بس والله اني تحملت عشانها الكثير ..واللي يسلمك يافهد ماعاد اتحمل البيت بدونها ابي اكلمها او برجع الشرقيه ماعاد اتحمل والله
فهد بحزن واللي بجد مو عاجبه حالهم لالجين مرتاحه ولا احمد قالها بعد تفكير: خلاص اليوم باخذ مرت خالك وبطلع وبترك لك الباب مفتوح انت ادخل وتفاهم معها
احمد مبسوط: الله يسعدك فهد ماتقصر
:
:
:
الساعه 8 مساءً ..ديوانية أبو الحميد ..
كان جالس بين الناس ومهو معهم كل شوي يفتح جواله ويناظر فيه بأي لحظه متوقع اتصالها للحين حاس بكتمه معقوله كل هالحب واخرها طيش وتسليه ..وبعد تفكير وبينه وبين نفسه :عشان كذا كانت تقول لي بابا ماراح يوافق اثرها هي اللي رافضه ..ليه عشمتني بحبها اجل..رفع راسه يناظر بفارس اللي ممسك بالعود: هاه والحين وش اغني
بندر طلع من صمته وبكل هدوء: غني حسب علمي
فارس بأبتسامه عريضه: ابشر ماطلبت شي
بندر: تبشر بالجنه
فارس بدا يعزف على العود بمهاره ..دخل بندر معه جو واول مابدا الأغنيه حس بندر بالحزن يتملكه ..
((حسب علمي تحبيني وبين قلوبنا ميثاق..واذا قصدك تثيريني ليالي البعد ماتنطاق..وينك يادفى سنيني تعب قلبي ألم وفراق..خريف البعد يطويني وتبكي حولي الاوراق..تعالي حيل ضميني بعد عمري انا مشتاق..تقر بشوفتك عيني وتهدى بروحي الاشواق..بشــار
بندر واللي ماقدر يتمالك حزنه وهو يسمع صوت فارس الساحر والاغنيه الحزينه وقف بهدوء: انا ماشي ..اول مامشى حس بدوخه وكان راح يطيح بس مسك بالباب بسرعه
فارس بسرعه ومعه مجموعه من الشباب : سلامات سلامات
تركي يمسكه بسرعه: الله يسلمكم عادي مافيه شي بس هو اليوم تعبان شوي ..وناظر بأخوه: مشينا البيت
بندر هز راسه بالأيجاب بدون لاينطق بكلمه
:
:
:
الرياض الساعه 9:30 يوم الخميس ..قبل ان نتوقف بيوم..
نوره بأصرار: لا بابا انا مابي اتزوج ابي اكمل دراستي
ابو سلمان بهدوء: بس يابنتي الناس ماينعابون وانتي بسن مناسب للزواج
نوره: تبي تغصبني هذا شي ثاني بس اذا بتاخذ شوري انا مابي اتزوج ومو مستعده للزواج حالياً بلغ الجماعه انه مافيه نصيب
ريم بكل عصبيه: غبيه انتي يقول لك مليونير خلاص ماتبينه اتزوجه انا
نوره تناظرها بقهر: تبين تتزوجيه حلال عليك
ابو سلمان: اول شي الولد اصغر من ريم ثاني شي الناس محددين يبون نوره ..وكمل بحزن: الا الزواج يابنيتي ماينغصب عليه ماتبين براحتك بكره ابلغهم مافيه لهم نصيب عندنا
:
:
:
الزمن الحالي ..
الساعه 8:30 مساءً بتوقيت السعوديه 11:30 الظهر بتوقيت أمريكا..
كان طالع للحديقه بعد ماخلص محاظرته وهو طالع شافها قباله جايه من بعيد لنفس الباب اللي هو طالع منه راقبها بذهول صار يناظر بنفسه ويناظر فيها وهو مستغرب ..هو كان لابس بنطلون ابيض وتي شرت أحمر جزمه حمرا سبورت وانتم بكرامه وساعه بيضا ..هي كانت لابسه نفس الشي حتى ساعتها نفس اللون كانت مسويه شعرها ظفيرتين رابطتهم من تحت وكانت في منتهى النعومه ..حس بتوتر لما شافها ترقى الثلاث درجات اللي قدامه وبسرعه راح يسار بنفس الوقت اللي هي راحت فيه لنفس الجهه هو كان هدفه يفسح الطريق لها وهي كان لها نفس الهدف ..صدمو الأثنين ببعض وطاحت الأغراض اللي بيدينهم ..نزل على الأرض بسرعه وهي سوت نفس الحركه ..جمع اغراضها بسرعه ورفع راسه بيعطيها الأغراض وصارت عينه بعينها حس برعشه غريبه اول مره يحسها بحياته ..
مد لها الأغراض وقالها بتوتر: انا اسف
البنت وهي منحرجه: والله ماكان قصدي اصدم فيك ولااستقصد كل مره اصدم فيك
مشعل واللي حس بالبودي قارد يشده من يده شال أغراضه وقالها بسرعه: لاعادي
:
:
:
الرياض الساعه 9 مساءً..
جالسه قبال التلفزيون تقلب بالقنوات بملل مافيه شي سنع بالتلفزيون..
ريم وهي جايه من المطبخ وبنظرات مستفزه: غريبه نوره جالسه تشوف تلفزيون
نوره ببرود: وليه غريبه التلفزيون لناس معينه؟
ريم بخبث: لا بس العاده بهالوقت جالسه بغرفتك تسوين فيها نايمه
نوره بقهر:اسوي فيها نايمه؟ ليه يعني بسوي نايمه
ريم : مدري عنك اسألي نفسك
نوره بهدوء: لاحبيبتي مااسوي فيها نايمه اكون نايمه فعلاً
ريم بخبث: ايه صح والدليل يوضح عليك النوم لما نجي الغرفه ونشغل النور
نوره بكل عصبيه: يعني مايصير اجلس افكر قبل لاانام
ريم تضحك: تجلسين تفكرين لاتضحكين على نفسك انتي تدرين وش تسوين
نوره تحط الريموت وتوقف: بروح انام اصرف لي مو فاضيتلك انتي ونفسيتك الخايسه
ريم تسوي لها مالت: مافيه نفسيه اخيس من نفسيتك خل عنك بس
نوره رقت الدرج بدون لاترد عليها
:
:
:
الساعه 9:30 ..
وصل البيت ودق على شذا: ياللا اطلعي انتي وشهد ولاتنسين تتركين الباب مفتوح..
قفل منها ونزل من سيارته راح عند سيارة احمد ووقف عند دريشته..
احمد يفتح الدريشه :ادخل الحين؟
فهد: لااصبر تطلع حرمتي وبنتي وبعدها ادخل غرفتها ثاني غرفه بعد ماترقى الدرج يسار
احمد : طيب
فهد التفت: هذي حرمتي طلعت تقدر تدخل
رفع الدريشه وطفى سيارته ..نزل وهو متوتر كل الكلام اللي كان محظره بدا يضيع دخل البيت ورقى الدرج اول ماوصل عند غرفتها طق الباب
لجين من ورى الباب: ادخل خالي..كانت معتقده انه خالها لأنه هذا وقت رجعته من المستشفى وهو متعود يجيها اول مايوصل
دخل احمد الغرفه بهدوء وناظر فيها كانت ماسكه كتاب تقرا فيه ..رجلينها ممدده ومغطيه زين ..شكلها مع انه كان عادي الا انها كسرت خاطره ..قرب منها وبصوت ملاه الحنان: كيفك لجين؟
لجين رفعت راسها تناظره مستغربه : انت وشلون دخلت ؟
احمد : دخلت وخلاص ابي اكلمك
لجين تبعد نظرها عنه : مابيننا كلام اللي بيني وبينك انتهى
احمد يجلس على ركبتينه ويناظر فيها بحزن : لجين وش اللي انتهى اللي بيننا انا احبك وابيك حياتي من غيرك ماتسوى شي موقادر اتحمل دقيقه زياده من غيرك لجين تكفين لاتعذبيني اكثر
لجين بحزن : انا كنت معك وانت ماقدرتني
احمد بقهر: لجين حرام عليك انا مااغليت احد كثرك ..يعني تتوقعين وش السبب اللي خلاني اتزوجك غير حبي لك ..لجين انا مابي اجرحك بس مين يرضى يتزوج وحده كانت تعرف كم واحد قبله ووش عشانه بس عشاني احبك قلت عادي وهي راح تخلص لي بس ماقدرت افكاري كانت تاخذني وتجيبني .. النار كانت تاكلني كل ماضحكتي او تكلمتي بنعومه وانا اتخيلك تكلمتي وضحكتي بنفس هالطريقه مع غيري حسي فيني انا كنت اطبخ بعد كل كلمه احسها انقالت لغيري ..انا وربي ضحيت عشانك تقبلت كل هذا ودست على كرامتي كرجال وقلت خلاص هي تغيرت افهميني تكفين
لجن بهدوء: ماعاد ينفع الكلام
احمد بحزن: لجين لاتصيرين قاسيه انا مالي غيرك
لجين:.............
احمد بأصرار: لجين خلاص؟ مافيه فايده ؟ ان كان هذا قرارك الأخير انا برجع الشرقيه
لجين ببرود : ارجع
احمد وقف وهو يحس انه انكسر ..وقالها بحزن: اللي تبينه مع السلامه
:
:
:
الرياض نفس الزمان الماضي ..
12 ذو الحجه ..الساعه 5 الفجر..
وصل عند بيتهم ناظر فيها وهو مبتسم : خلك بالسياره برقى الطوفه بفتح لك الباب
نوف وهي تتلفت بخوف: مبسوط هاه
ياسر يضحك: ياشيخه خلك قويه
نوف مرتبكه: ياللا بس بسرعه لايجي احد
رقى الطوفه وهي كانت تراقبه الى ان اختفى كانت خايفه ونبضات قلبها كل شوي تزيد لو شافها احد من اخوانها ذبحها بدون تفكير ..كلها دقيقه وطلع ياسر من الباب الخارجي وهو يأشر لها مبسوط..
ركب السياره وناظرها:ياللا يالحب روحي بيتكم عشان تعرفين قيمتي
نوف تضحك: مالت عليك ياللا بايو
ياسر: بايو بيننا الو طيب
نوف وهي تنزل:طيب
دخلت من الباب الخارجي بشويش وقفلته بهدوء فسخت عبايتها بسرعه ومسكتها بيدها ومشت بهدوء الى ان دخلت البيت والخوف اللي بداخلها يزيد كل مامشت خطوه ..اخيراً وصلت غرفتها فتحتها بشويش وحاولت قد ماتقدر ماتصدر صوت بعد مادخلت الغرفه قفلتها بسرعه ونطت على السرير وهي تضحك بهستيريا: منت بهين يايسور..
شوي وسمعت صوت جوالها طلعته بسرعه من الشنطه وردت عليه: هلاعمري
ياسر: قلبي دخلتي غرفتك
نوف بدلع: ايه بس خفت شوي
ياسر يسوي رومنسي: بسم الله عليك يابعد روحي اهم شي انك وصلتي سالمه
نوف : كله بفضلك ياروحي
ياسر بحب: تصدقين عاد بديت اشتاق لك
نوف :يانصاب كم وحده غيري تقول لها هالكلام يعني مااعرفك
ياسر: لابس انتي غيرهم كلهم
نوف تضحك : ايه طيب المشكله انك خبز يدي
:
:
:
الزمن الحالي الساعه 10 مساءً..
فتح باب غرفة اخوه بعد ماطقه ..شافه جالس على السرير ومسند جسمه بالحاجز الخلفي وماسك مسباح يلعب فيه والحزن واضح على وجهه
تركي بهدوء: بندر ماتبي تقوم تاكل شي؟
بندر بعد ماتنهد : لامالي نفس
تركي يجلس بجنبه: مايصير كذا الدكتور قال لازم تاكل زين
بندر بحزن: والله مالي نفس
تركي: حاول طيب
بندر يتبسم بستخفاف: تصدق تركي هي لما كانت معي ماكنت اشتهي اكل لأنها بعيده عني ابي قربها هالحين لما بعدت عني نهائي وش تتوقع يكون حالي
تركي يحط يده على كتف بندر: انسى ياخوي ترى النسيان نعمه
بندر بقهر: مااقدر انسى عمري وحياتي انت ماتدري وشو نوره بالنسبه لي والله كرهت نفسي ياليت هاليوم ماجا انا كنت اتمناه بس هي حطمتني
تركي: طيب قوم اكل عشاني
بندر بحزن وهو يمسح جبينه: مابي ياخوي قلت لك مابي
طلع من غرفة اخوه وهو مقهور ومر بجنب الجناح المخصص لجود واللي كانت تتكلم بأنفعال : انتي ماتدرين صوته يجنن يسحر احلى شي فيه صوته
فتح الباب بسرعه : مين اللي صوته يجنن
جود بسرعه: هاه هذا عبد الهادي حسين
تركي يفكر: مين عبد الهادي حسين؟
جود: مغني لاتسوي فيها ماتعرفه
تركي يهز راسه: امممممممم ايوه صح مغني ..ناظر بجنا بحزم : انتي انقلعي غرفتك ..وناظر بجود : وانتي نامي لاادوس ببطنك
جنا تدفه: انا اكبر منك على فكره ..احترم نفسك
تركي بحزم: وانا الرجال وان مارحتي والله لعلمك
جنا ببرود : بروح عشاني ابي اروح مو عشانك قلت
تركي يدفها: طيب انقلعي ..وناظر بجود : وانتي
جود تضحك بنام بنام
بعد ماطلع تركي مشت لسريرها انسدحت ودقت على فارس ..
فارس بحماس: هلا والله
جود: هلا بك اخبارك
فارس : بخير انتي اخبارك
جود: انا بخير
فارس: تدرين انك وحشتيني
جود: وانت اكثر ..تدري قبل شوي انا واختي نتكلم عن صوتك اقول لها صوته حلو ويدخل علينا تركي يقول مين اللي صوته حلو مع انه هو اللي معطيني السي دي خفت اقول اسمك قلت له عبد الهادي حسين
فارس يضحك: ياويلي لو يدري اخوك والله ليسويني شاورما
جود تضحك: لاتبالغ اخوي ديمقراطي
فارس: ايه هين على اساس مااعرف اخوك ياشيخه هذا خويي وحافظه
جود تفكر :والله انك صادق مافيه على بابا ديمقراطي بقوه
فارس: اليوم شفت اخوك بالديوانيه وشكله ماعجبني
جود بهدوء: شكلك تقصد بندر لانه اليوم كان تعبان
فارس: مايشوف شر ماتبين تنامين
جود: الا بنام بس غنيلي
فارس يضحك: اشوف اعجبتك السالفه كل يوم تقولين غني
جود بدلع: صوتك عاجبني وابي اسمعه دايم عندك مانع؟
فارس مبسوط: لاحبيبتي وش تبيني اغني؟
جود تفكر : غني أي شي
فارس : طيب وسكت شوي وبعدها تكلم: اصبري دقيقه
جود :طيب
حط الجوال على جنب وفتح باب الغرفه بسرعه ..شاف حور اللي رفعت راسها وصارت تتبسم: انتي وش مصحيك للحين
حور ببراءه: اجازه مافيه مدرسه ليه انام بدري
فارس: ومالقيتي تسهرين الا عند باب غرفتي
حور تضحك: عجبني الحوار حقك
فارس مستغرب: أي حوار؟
حور: هذا اللي حبيبتي وكل يوم تبيني اغني
فارس يصفقها: مين قال حبيبتي
حور بسرعه :انت والله انت انا سمعتك تكلم بنت هاه تقول شسمه ..وكملت وهي مستحيه : حبيبتي
فارس واللي ارتبك: انا كنت اكلم ماما ابي منها شغله وعجزان اروح لغرفتها
حور بدهاء الاطفال: الحين اروح اسألها
فارس يحاول يقنعها: حور عيب مايتدخلون بسوالف الكبار
حور تناظره بحده: تحلف بذمتك كنت تكلم ماما
فارس يتبسم: ايه
حور تهز راسها: اها طيب بروح انام نعسانه
فارس: ايه روحي تصبحين على خير ..قرب منها وباسها: وهذي بوسه لأختي الحلوه
حور: بكره تاخذني للبقاله ومااسأل ماما ..موافق؟
فارس يتنهد: مـــــــــوافق غصب عن خشمي
حور راحت تركض: واو وناسه
دخل غرفته وقفل الباب ..اخذ الجوال حطه بأ ذنه: تأخرت عليك؟
جود: شوي وين رحت
فارس: هذي اختي سمعتني اقول حبيبتي وصارت تهددني
جود تضحك: والله حركات
فارس: والله بتحشرني كل يوم والثاني بتقول ودني البقاله
جود فاطسه: زين تسوي فيك
فارس يتمسكن: حرام عليك مااستاهل
:
:
:
الساعه 10:30 مساء بتوقيت السعوديه 1:30 الظهر بتوقيت أمريكا..
كان جالس بمحاظرته الثانيه فتح الملزمه الكحليه حقته يبي يكتب شاف اسم مكتوب بالخط العريض بالصفحه الأولى بعد الجلده (عبيــــــــــــر) قلب الصفحه وشاف الخط مهوب خطه التفت للبنت الي دايم يصدم فيها واللي كانت مركزه بالمحاظره وجالسه وراه بكثير رفع راسه يناظر بالبودي قارد اللي كان مكتف يدينه ويناظر قدامه ..وبعد تفكير وبينه وبين نفسه: هذي فرصتي انا لازم استغل الموقف الله جايبها لعندي هالفرصه ..بس لا يمكن احد مرسلها لي والا معقوله كل مره اصدم فيها بالصدفه والا لبسها اللي صادف مرتين نفس لبسي ..لا..محد يشوف لبسي غير البودي قارد اللي مايرفع جوال من اول مايشوفني الى ان يتركني ..وش اسوي ..بسرعه لازم اتصرف قبل لاتفتح الملزمه وتاخذ بالها انها مو لها ..وبسرعه: ياربي حتى لون ملزمتها نفس لون ملزمتي وش السالفه ..وبعد تفكير: ياللا بسويها واللي فيها فيها ..هذي يابتنقذني او بتغرقني زياده ومااعتقد ان الغرقان لاغرقوه زياده بيتغير عليه شي ..اخذ قلمه وقلب الملزمه فتحها من ورى وكتب فيها بسرعه وقفلها وقلبها مره ثانيه ..رفع راسه يناظر بالبودي قارد وشافه على نفس الوضعيه ..تنفس بعمق وركز بالمحاظره ..
اول ماانتهت المحاظره وهو طالع سمع صوتها تناديه: لوسمحت لوسمحت
قرر يتجاهلها ..الى ان وصلت ووقفت قباله وهي تنافخ : انا انادي عليك مدت الملزمه له انت بدلتني بالملزمه حقتي
البودي قارد اخذ الملزمه من يد مشعل واعطاها لها واخذ اللي بيدها وسحب مشعل
عبير تناظر مستغربه: شفيه هذا البلى منه والا من البودي قارد حقه
:
:
:
الرياض الساعه 11 بتوقيت السعوديه..
شذا التفتت للكرسي اللي ورى تناظر شهد النايمه: فهد لازم نرجع البنت نامت
فهد يوقف عند مطعم: ياللا بشتري عشا بس ونرجع البيت ..تبين شي؟.
شذا تفكر:والله ودي ببيتزا
فهد يتبسم :ماطلبتي شي
نزل من السياره ودخل المطعم طلب 2 بيتزا و2 عصير برتقال كبير طلع جواله من مخباته ودق على احمد ..
احمد بهدوء: هلا فهد
فهد: هلا احمد بشر وش صار
احمد بحزن: مارضت ترجع لي خلاص براحتها انا بكره راجع الشرقيه
فهد بحزن : انا لارجعت بكلمها
احمد بسرعه: لاخلاص مافيه كلام بعد اللي صار بيننا
فهد :الله يصلح بينكم
احمد بهدوء: ان شاء الله مع اني مااتوقع
فهد واللي جهز طلبه: خلها على ربك ياللا مع السلامه
احمد : الله معك
اخذ فهد طلبه وحاسب عليه وطلع من المطعم وانفجع بالمنظر رمى الأغراض من يده وفتح عينه على اخرهم وهو يدور سيارته بالشارع الفاضي ..مسح شعره بقوه وصار يتنفس بسرعه :انا متأكد وقفتها هنا وين راحت السياره؟
نهاية الجزء