البارت السادس عشر
ترى ضميري يأنبني !!
.
.
على كثر ما هو متحمس للسفر كان خايف و متوتر من ردة فعل وعد
يتمنى يكون قريب يمها في السفر بس خايف أنها تعرفه و تصير النتيجه عكسيه
توكل على الله و جهز شناطه لأن السفر بيكون بعد يومين
ابتسم بينه و بين نفسه على جاسم بعد ما كلمه شكله متحمس لشهر العسل الله يوفقك يا جاسم و الله عانيت كثير في حياتك
جلس على الكنبه في الصاله نزل شماغه و فتح أزرار ثوبه يحس بكتمه في صدره كان قلبه يدق بقوه خاف بينه و بين نفسه
هالحاله ما تجيه إلا إذا كانت بتصير مصيبه لشخص عزيز عليه قال بخوف و هو يشد على صدره الله يستر
%%%
عند مطار كولالمبور
الساعه 3 العصر
وصلوا المعارييس للمطار كانت رند منبهره بشكل المطار كبير و فخم
ابتسم جاسم على ردة فعلها لأنه يعرف أنها و لا عمرها سافرت مكان برا السعوديه
جاسم لابس برمودا بيج و بلوزه عشبيه و كاب بيج
جاسم : رنود قلبي
رند : هلا
جاسم : خلينا نروح الفندق عشان نرتاح
رند : أوكي
ركبوا سيارة تاكسي و خذوا معهم شناطهم جاسم جلس قدام مع السايق و رند ورا
كانت رند تطل من النافذه على المناظر الطبيعيه من بساط أخضر و أشجار و مرتفعات
رند : واااو شكلها جناان
جاسم : هههه أكيد بتكون جناان معك
رند ماردت عليه لأنها مستحيه
جاسم : اللحين وصلنا لكوالالمبور
رند طلت من النافذه و تأشر لجاسم : جاسم وش يسمون هالبنايتين دايم أشوفهم في المجلات
Petronas جاسم : برج التوأم
رند : شكلها حلوه
جاسم : بكره نروح لها
وصلوا لفندق ويستن
The Westin Hotel
طلعوا من السياره و أشر جاسم للحمال يشيل معه الشناط
جاسم : شفتي الشارع هذا
رند : ايه
جاسم : هذا شارع العرب كثير من العرب يكونون موجوديين فيه
رند : زين حلو
جاسم ابتسم لها : أكيد كل شي معك حلو
مسك يدها و دخل معها الفندق
.
.
.
%%%
في الرياض
بيت أبو مشاري
الساعه 4 العصر
شوق : رغد لازم تروحين معنا يمكن ما يعجبك ذوقنا
رغد جالسه على السرير بملل : مو مشتهيه أجهز شي
أفنان : شوق ما عليك منها خلينا نروح نجهز لها و هي بكيفها
شوق : أوكي
.
.
.
راحوا مع طلال المجمع
طلال : أنتوا جهزوا لها و أنا بنتظركم في ستاربكس
أفنان و شوق : أوكي
كانت شوق تدور أفنان شافت أفنان واقفه عند محل نعومي
قربت منها شوق : وش تسوين؟
التفتت عليها أفنان : هههههههه خلينا نسوي فيها مقلب
شوق بابتسامة خبث : خلاص تم خلينا ندخل
و دخلوا المحل
.
.
%%%
في الجبيل
عند شركة سابك
كان جالس على الكرسي الدوار و ساند راسه على الكرسي
اللحين سويت اللي مخطط عليه من فتره بس أحس أن هالبنت بتجنني ما أدري ليه
أحس إنها تجذب الناس غصب عنهم بأسلوبها و طريقة كلامها و شكلها الله يعيني عليك يا رغد شكلك بتقلبين كياني فوق تحت
سمع صوت الباب ينفتح انصدم بالشخص اللي جاي
فيصل بعصبيه : نعم وش تبي اطلع برا
يوسف : أوووه وش فيك علي
فيصل : يوسف اطلع برا لا توريني خشتك مره ثانيه
يوسف : أفااا وش فيك لا يكون عشان ذيك البنت لا تخاف سحبت علي مع وجهها
فيصل : طيب انقلع
يوسف : سمعت أنها انخطبت
فيصل بعصبيه : مين قال لك ؟
يوسف : ما أحد قال لي بس عندي إحساس
فيصل : أهااا طيب و انخطبت وش بتسوي ؟
يوسف بابتسامة خبث : بنتقم منها
فيصل ببرود : وش بتسوي ؟
يوسف : بشكك خطيبها فيها
فيصل : هههههههههه أتحداك
يوسف : أوكي نشوف و بخليها ترجع لي غصب عليها و هي تترجاني بعد
فيصل : أقول لا يكثر هرجك و انقلع برا
يوسف باستهزاء : لا يكون أنت خطيبها
فيصل بابتسامة برود : كل شي جايز
يوسف : أهاا أوكي أنا بطلع أشوفك بعدين
فيصل : يوسف ما أبي أشوفك فكني من وجهك
يوسف : طيب يلا سلام
فيصل بعصبيه في نفسه : الله لا يسلمك
%%%
مرتاح ولا يتصنع قلبك الراحــه
شايل في خاطرك ولا البال متهنــي
مجروح ولا شفى قلبك من جراحــه
زعلان للحين ولا راضي عنــي
شخبار قلبك عسى ما فارق أفراحــه
أدري جرحتك وشلت بخاطرك منــي
خسران بعدك وقلبي ضاعت أرباحــه
غلطان أدري وأبي منك تسامحنــي
تدري عيوني بغيابك ماهي مرتاحــه
تبكي على فراق طيفك وانت ذابحنــي
ياللي ذبحني غلا شكرا على رماحــه
اللي طعني بها وما يوم ريحنــي
جيتك من الشوق والأشواق ذباحــه
أسأل عيونك عسى للحين تذكرنــي
راضي بجرحك وأنا ما أتصنع الراحــه
تكفى عشاني أبي ترجع وتسمعنــي
.
.
من حبها أنا بكيت رغم المرجله دمعي سال !!
كان جالس في غرفته خذ إجازه من المطار يحس نفسيته متحطمه حب بعد أكثر من خمس سنوات يضيع كذا
جاه هالمسج من الجوال عرف إنه من عبير هالبنت تجرح و تداوي جروحها تعبت من هالحاله بس أحبها و هذا اللي مصبرني
رفع الجوال و قرى المسج ابتسم رغم دموعه اللي نزلت تعب من هالحاله كل سنه تسوي له كذا بس هالسنه غير
كرامتي ما تسمح لي أرجع لها مليت من هالعيشه
مسك جواله و دق عليها
رفعت السماعه ودها تتكلم بس قاطعها صوت نواف : عبير خلاص اللي بينا إنتهى أنا في طريق و أنتي في طريق
و سكر الجوال
ضم الوساده و قعد يبكي و هو اللي ما نزلت دموعه إلا في وفاة جده
%%%
في الخبر
عند قصر فواز ( أبو رائد )
في غرفة وعد
الساعة 4 العصر
كانت ترتب أغراضها في الشنطه متحمسه لهالسفره كثير تبي تعرف مساعد أكثر و أكثر تحس أنها مالت له
من كلام رائد عنه دايم يمدح فيه و في مرجلته رجال سنافي ما يعيبه شي كبر في عيونها لما خطبها و هو يعرف أنها ما تتكلم
سكرت شنطتها و جلست على السرير تفكر أحس هالأسم مو غريب علي كأني سامعته من قبل بس وين ما أذكر
أمممممم يمكن رائد تكلم عنه قبل ما تصير لي هالحادثه كل شي جايز
مسكت الجوال بحماس و رسلت لرائد مسج كان ودها تكلمه بس صار كلامها بالمسجات و بالرسايل
رد عليها رائد بمسج
وعد نزلي لي في المجلس عندي لك مفاجأه
تحمست وعد وش هالمفاجأه اللي مسويها لي
على طول نزلت تحت للمجلس
.
.
في المجلس
رائد يضحك : هههههههههههههههه
مساعد باستغراب : رائد وش وراك من هالضحك و الله خفت على نفسي منك
رائد : ههههه لا ما في شي
لفت نظر مساعد وحده دخلت طالعها بانبهار لا مو معقول هاذي وعد
وعد كانت منحرجه و هي تتوعد رائد في نفسها و على طول طلعت من المجلس
مساعد لازال يطالع المكان اللي كانت واقفه فيه
رائد : مساااعد
مساعد : هاااا
رائد : ههههههههه وش فيك ؟
مساعد : ما فيني شي
رائد : وش رايك بخطيبتك ؟
ابتسم مساعد بينه و بين نفسه
مساعد : ما شاء الله هاذي وعد !!
رائد : هههههههه مبين أنك خاق عليها أقول بروح أشوفها شكلها عصبت مني
مساعد : أوكي
(مساعد)
أأخ يا وعد عليك جمال رباني ما شفته في بنت الله يصبرك علي يا قلبي
%%%
في الرياض
بيت أبو فيصل
الساعه 5 المغرب
كانت طالعه من غرفتها مسويه خيالين صايره مثل ميكي ماوس
نزلت تحت للصاله و هي تتكلم بحماس : وش رايكم فيني ؟
الكل ناظرها و هو مستغرب مسكت فمها من الفشله و على طول ركضت للمطبخ
كل واحد يطالع الثاني و في وجهه علامة استفهام كبيره
بعدها انفجر سلطان من الضحك : ههههههههههههههههههههههههه هههه
عساف كان فاهي ما علق على شي
خالد : هههههههههههههههههههه و الله هنادي نكته
التفت خالد على عساف : عساف وش فيك ؟
عساف بفرح : هي نفسها اللي أبيها
خالد : ههههههههه قدامك سلطان قول له
سلطان باستغراب : وش السالفه ؟
عساف : بقول لك بعدين
سلطان : أوكي
خالد وقف : بروح لهنادي
عساف : طيب
دخل خالد على هنادي في المطبخ كانت جالسه على الكرسي و هي منحرجه
خالد : وش فيك ؟
هنادي باحراج : مين ذا اللي معكم ؟
خالد : هذا عساف ولد عمي
هنادي بعصبيه : كان دخلتوه الديوانيه أو المجلس
خالد : سلطان قال لنا أنكم كلكم طالعين
هنادي : أهاا
خالد : لا تخافين ما راح نطول دقيقه و حنا طالعيين
هنادي : أوكي
%%%
في ماليزيا
فندق وستن كوالالمبور
الساعه 6 المغرب
قامت من النوم التفتت عليه و هو لازال نايم ابتسمت بينها و بين نفسها شكله ما نام في الطياره
قربت لجهته و هي تتأمل ملامح وجهه ابتسمت تحس في وجهه برائه و هو نايم مسحت على شعره
حست انه عقد حواجبه شالت يدها من شعره شكله من جد تعبان راحت تاخذ شاور في الحمام
.
.
طلعت من الحمام و هي لابسه فوطه راحت لجهة المرايا تسرح شعرها كان عينها على جاسم خايفه أنه قعد من النوم
التفت عليه بس لازل على وضعيته شكله غرقان في النوم فتحت الشنط و طلعت لها بنطلون جينز و تي شيرت
فجأه حست بأنفاس شخص وراها التفت باستغراب طلع جاسم مميل راسه لها و هو يحرك عيونه
جاسم بابتسامه مايله : متى صحيتي يا حلوه ؟
رند بخجل : أمممم تقريباً من ساعه
جاسم : ليه ما قعدتيني من النوم ؟
رند باحراج : شكلك تعبان ما نمت في الطياره
جاسم : بروح آخذ لي شاور تجهزي عشان نطلع
رند : أوكي
و راح جاسم الحمام
لبست رند ملابسها و جلست تنتظر جاسم في الصاله
.
.
.
%%%
أحبكـ حب ما له حدود و أحب كل شي أنت تحبه
.
.
في بيت أبو مشاري
في غرفة رغد
الساعه 7 الليل
رغد : زين حلو هالفستان
أفنان تغمز لشوق : ايه حلو و شرينا لك عطورات و ميك أب
رغد : زين
شوق : أمممم رغد أنا وأفنان بنجهز شنطتك
رغد بابتسامه : تسلمون لي يا أحلى خوات
قربت منها أفنان و ضمتها بعدها بكت رغد على حضن أختها
أفنان بخوف : رغد وش فيك ؟
رغد كانت تمسح دموعها بحزن : ما أبي أفارقكم و أروح هناك
شوق بضيق : لا تخافين يا رغد أكيد بتكون في إجازات و بتجينا و يمكن حنا بعد نجيك
رغد بحزن : بشتاق لكم
شوق : و حنا أكيد أكثر
أفنان : رغد صدقيني بتنبسطين هناك أمريكا حلوه و أكيد بيتمشى معك هناك
رغد : طيب
وقفت شوق بارتباك مسكت جوالها و طلعت من غرفة رغد
أفنان : هههههههه أكيد هذا تركي
رغد بابتسامه : الله يوفقهم يا رب
%%%
دخلت غرفتها و سكرت الباب
شوق : هلا قلبي
تركي : هلا و غلا بالزين كله
شوق بخجل : هلا فيك
تركي : أخبارك يا الغاليه
شوق : تمام
تركي : دوم يا شوق
شوق : يدوم نبضك
تركي : حبيبتي اليوم برجع من الظهران
شوق : زين ترجع لنا بالسلامه و لا تسرع
تركي : هههههه الله يسلمك طيب و لا يهمك
شوق : زين كذا تعجبني
تركي : المهم الليله بتطلعين ؟
شوق : لا ما أتوقع بنجهز شنط رغد سفرها بعد أسبوع
تركي : أهاا زين
شوق : ليه ؟
تركي : أمممم بس كذا حبيت أسأل .. المهم أنا عندي شغله و راجع الرياض
شوق : أوكي
تركي : يلا يا قلبي انتبهي لنفسك
شوق : طيب
و سكرت منه الجوال
مسكت الجوال و ضمته لصدرها : الله يحفظك و يرجعك بالسلامه
%%%
ترى ابتسامه و هي ابتسامه منك تسوى كل ضحكاتي ..
في غرفة طلال
كان جالس على اللاب توب يتصفح المنتدى اللي هو نائب مدير فيه
مسك الجوال و دق على تركي
تركي : هلا
طلال : هلا بالنسيب
تركي : هلا فيك
طلال : وصلت من الظهران
تركي : ايه توني واصل تعال لي البيت
طلال : أوكي يلا أنا جايك
و سكر منه الجوال
شاف اللاب توب و استغرب من الرساله اللي جايته من وحده أسمها بنت أبوها
طلال في نفسه : غريبه هاذي ثقيله مو من النوع ترسل رسايل
فتح رسالتها
السلام عليكم أخوي صاحب السمو
بصراحه أبي تتفاهم مع الأخ عماد الحب أزعجني بالرسايل الغراميه
أتمنى أنك توقفه لأنه يأثر على سمعة المنتدى
دمت بود أخوي
بنت أبوها
طلال في نفسه : وش فيه ناصر غريبه
مسك الجوال و دق على ناصر
طلال : ألوو هلا
ناصر : هلا و غلا شخبارك من زمان ما شفناك
طلال : تمام الحمد لله
ناصر : دوم إن شاء الله
طلال : تسلم ... ناصر وش فيك مع بنت أبوها
ناصر باستغراب : مافيني شي
طلال : توها رساله لي تقول أنك ترسل رسايل غراميه
ناصر : غريبه لا و الله ما رسلت شي أصلاً من زمان ما دخلت المنتدى
طلال : لا يكون أحد ماخذ الباسورد حقك
ناصر : والله كل شي جايز أجل احذفه و بسجل من جديد باسم ثاني
طلال : أوكي يلا أجل أشوفك على خير
ناصر : يلا سلام
و سكر الجوال
%%%
في كوالالمبور
كانوا يتمشون في مجمع KLCC في بتروناس ( البرج التوأم )
جاسم : قلبي أشتري اللي تبين وسعي صدرك
رند : تسلم جاسم بس أخاف أكلف عليك
جاسم : لا كلافه و لا شي خذي كل شي يطري على بالك
رند دخلت محل كان محل رجالي فيه بدل و بناطلين جينز ابتسمت و هي تختار خذت برمودا جينز كحلي و تي شيرت أحمر و كاب جينز
جاسم باستغراب : لمين هالبدله ؟
رند بخجل : أمممم بصراحه أحس هالبدله بتكون حلوه عليك
جاسم ابتسم لها : أوكي بشتريها
راح لعند المحاسبه و شرا البدله
طلعوا من المحل لفت نظر جاسم محل لفساتين قصيره ابتسم : رند
رند : نعم
جاسم : تعالي ندخل هالمحل
رند : أوكي
جاسم أشر على فستان قصير لونه أسود ابتسم بخبث : هاا رنود وش رايك فيه ؟
رند بخجل : لا ما أدري أحس ..
قطع كلامها جاسم بخبث : أحس أنه بيطلع حلو عليك
رند انقلب وجهها أحمر من الاحراج
راح و شراه عند المحاسب
طلعوا من المحل و راحوا عند جهة المطاعم جلسوا في مطعم ايطالي
جاسم كان يطالع المينو : قلبي وش تبين نشتري لنا ؟
رند : أمممم أبي فوتوشيني
جاسم : أوكي فوتوشيني و دجاج ايطالي
رند : زين
نادى على الجارسون و طلب
جاسم : رند تصدقين أني لين اللحين مو مصدق أنك معي أحس أني في الحلم و بقوم منه
رند مسكت يده : لا صدق أني معك هذا مو حلم
جاسم بابتسامه : أحبك يا رند أنتي دنيتي كلها
رند بخجل : و أنا بعد أحبك
جاسم : تصدقين ودي أغني
رند مسكت فمها بيدها : ههههه خله في الفندق مو هنا
جاسم : و أنا وش علي من الناس أنتي اللي تهميني بس
رند نزلت عيونها بخجل
رفع راسها جاسم : رنوود ما خلصنا من هالحيا
رند بخجل : أمممم لا ما بعد
جاسم بخبث : خلينا نوصل الفندق و أنا أشيل هالحيا اليوم
رند انقلب وجهها أحمر : لا خلاص إن شاء الله يروح
جاسم : زين
رند : هههههههه يا حبك للتهديد
جاسم : أفااا لا عادي بس أبي أجننك أشوي
رند : كل شي منك حلو
جاسم بابتسامه : و أنتي أحلى و أحلى
جا لهم طلبهم
مسك جاسم الملعقه : يلا بأكلك بيدي
رند : فشله قدام الناس
جاسم : لا عادي تونا بشهر العسل خلينا نوسع صدرنا
رند فتحت فمها الصغير و كلت بس حبة دجاج و الباقي طاح على الطاوله
جاسم : يا ربي مع فمك هالنتفه ما يكفي يدخل فيه شي
رند مسكت المنديل و مسحت فمها بخجل
جاسم تأملها و قام يتغزل فيها : فديت هالفم و الله
رند بحرج : جسووم جنبنا عرب لا تفشلنا
الكل يناظرهم و هم مبتسمين مبين أنهم توهم معارييس في بداية حياتهم ..
%%%
في بيت أبو نواف
الساعه 9 الليل
كان جالس في غرفته من بعد ما تكلم مع عبير و هو مو مشتهي يطلع
يحس أنه في دوامه من التفكير و الحزن معقوله أنا أقدم على هالخطوه و أنا أعرف أني ما أقدر أستغني عنها
ليه سويت كذا مسك راسه إن شاء الله يكون كل شي كابوس و يروح أنا أحب عبير ما أطيق البعاد عنها
دق باب غرفته كان متوتر ليكون أمي درت بالسالفه اللي حصلت بيني و بين عبير الله يستر
فتح الباب و كانت قدامه مها انصدمت من شكل أخوها لبسه كان مبهدل و شعره معفوس و واضح أنه كان يبكي من شوي
مها : نواف ممكن أدخل أبيك في موضوع
نواف : تفضلي
دخلت و جلست على الكرسي اللي مقابل السرير و نواف جلس على السرير قبالها
مها : ليه سويت كذا ؟
نواف بضيق : كلمتك عبير
مها : ايه كلمتني حرام عليك تسوي كذا مهما صار ترى عبير تحبك و ما تقدر تستغني عنك
نواف نزل عيونه بحزن : بس هي ما تبيني
مها باستغراب : من جدك تقول كذا يا نواف
نواف بعصبيه : كنت مكلمها أقول لها متى نخلي العرس دايم تأجل فيني مليت من هالحاله ترى اللي قدي عندهم عيال
مها تهدي فيه : طيب تفاهم معها مو تسوي كذا
نواف بعصبيه : مها قولي لها يقول نواف آسف على الكلام اللي قاله و يقول لك أن كنتي تبينه العرس يكون في العطله
و أن كانت تبي تأجل قولي لها يقول لك نواف الله يوفقك بواحد غيره و هو بيروح يخـ ( حس أن الكلام ضاع منه )
مها قربت من أخوها : نواف أنا بقول لها بس لا تضغط على البنت كثير
نواف نزل عيونه و هو يشبك أصابيعه بتوتر : طيب بس
مها : بس شو ؟
نواف بضيق : قولي لها ترى كان نواف معصب يوم كلمك
مها ابتسمت له : طيب بقول لها
نواف بخجل : مشكوره مها لو الله ثم أنتي كان اللحين صارت حالتي حاله
مها : هههههههههه أفا أنت أخوي و عبير بنت خالتي و لا أنت ناسي
نواف شال مها بفرح : تسلمين يا أحلى أخت بالدنيا
مها : هههههههههههه الله يسلمك بس اتركني لا أطيح
نواف : هههههههه أوكي
( نزّل مها )
بس لا تنسين تقولين لعبير هالكلام و قولي لها ترى نواف يحبك و حياته بدونك ما تسوى شي
مها : طيب و لا يهمك يلا بروح أقول لها
نواف : أوكي و أنا بطلع مليت من جو الغرفه
مها : طيب
%%%
يوم الثلاثاء
الساعه 8 الصباح
في الخبر
مساعد كان راكب سيارته وقف عند قصر أبو رائد ( فواز ) و هو مبتسم
في نفسه : الحمد لله هالضيقه راحت إن شاء الله ما بيصير إلا كل خير
طلع رائد من القصر و راح لجهة مساعد : هلا مساعد
مساعد فتح النافذه : هلا فيك
رائد : بركب معك و أهلي بيلحقونا مع السايق
مساعد : أوكي حياك الله
ركب رائد جنب مساعد
رائد : جهزت أغراضك ناقصك شي يا مساعد ؟
مساعد : لا الحمد لله تسلم مو ناقصني شي
رائد : أن احتجت شي لا يردك إلا لسانك
مساعد ابتسم لرائد : تسلم يا رائد ما تقصر
رائد : الله يسلمك
مساعد بتوتر : أممم رائد شخبار وعد ؟
رائد : وعد شكلها متحمسه لهالسفره
مساعد بتوتر : أهاا زين عشان تغير جو
رائد : أي و الله بعد ذاك الحادث اللي حصل لها و هي ما تطلع من القصر كله جالسه في غرفتها و تنزل لنا نادر
مساعد بضيق في نفسه : يا ليت ما سويت اللي سويته يا رب يا كريم اشفها و رد لها نطقها آمين
رائد : مساعد وش فيك سرحان
مساعد : لا سلامتك ما فيني شي
دق جوال رائد و رد عليه
هلا يبا أنتوا ورانا .. أوكي زين بنروح اللحين البحرين .. الحجز من هناك .. أوكي يلا سلام
مساعد مشى بسيارته و سيارة عمه وراه
%%%
في الأكاديميه العلوم الطبيه ( جامعه الملك سعود )
الساعه 9 الصباح
كان جالس يسولف مع خوييه بندر عن البعثه
نايف : أنا قلت لأهلي و شكلهم وافقوا
بندر : زين حتى أنا وافقوا على فرنسا
نايف كان ماسك معه أوراق : شوف هاذي الأوراق عن الجامعه اللي بندرس فيها
بندر مسك الأوراق و قعد يقرى : أهااا اسمها جامعة ليون شكلها حلوه
نايف : الله يوفقنا بس
بندر : آمين على فكره لازم نجهز فيز شنقن لأن الأكاديميه تفاهموا مع الجامعه نفسها بس بقى بعض الأوراق و الإستمارات لازم نعبيها
نايف : أوكي مو مشكله .. طيب متى تقريباً بيكون سفرنا ؟
بندر و هو يفكر : أممم أتوقع بعد شهرين
نايف : أهاا أوكي لازم نستعد من اللحين
بندر يغمز لنايف : عاد فله هناك أكيد بندرس مع بنات
نايف : هههه جد أنك واحد فاضي حنا بنروح عشان ندرس مو ندجها هناك
بندر : هههههه طيب خلاص
نايف وقف : أنا بروح للدكتور جودت بتفاهم معه في شغله
بندر : و أنا بشوف الربع في مبنى الهندسه
نايف : أوكي
%%%
وش بيصير في البارت الجاي ؟
توقعاتكم تهمني ^_^
دمتم بســ ع ــــاده
متلثمه بشماغه
# نهاية عاشق #