[جرح الذات]

البارت الثلاثون (الأخير)
الفصل الرابع

لكل عاشق نهايه ..!

سلطان

كنت أحبها من زمااااااان بس كان أسلوبي جاف معها اللي يشوفني يقول هذا يكرهها بجنون وهو ما يدري أني أموت بالتراب اللي تمشي عليه
تصرفاتها .. تمردها .. ردودها علي تعجبني أحب أتنابش معها مع أني عارف إن هالشي يزعلها و يمكن يبكيها بس غصب عني هذا أسلوبي معها مستحيل أغيره
يوم كنا في المزرعه سويت مقلب أنا و تركي على البنات بس ما دريت إن هالمقلب ينقلب علي .. ناصر الله يهديه ما قصر فضحني النذل بس بعد ما قال إني أحبها
و صعدت أفنان لفوق حسيت بخيبة أمل أكيد البنت تكرهني مع أسلوبي السخيف و الهمجي معها فكرت أني أخطبها عشان أعرف رايها فيني
كنت محطم نفسي من البدايه بس ما توقعت توافق علي طلعت تحبني مثل ما كنت أحبها فديتك يا أفنان يا أغلى زوجه بهالدنيا

فيصل

معرفتي برغد و موقفي معها لها قصه غريبه عجيبه يمكن ما أحد في هالأيام يصدقها بس هذا الواقع اللي عشته
كنت مغروم بهنادي بنت عمي و الكل يعرف وش كثر أحبها و أغليها بس في حفلة سعود ولد عمي بمناسبة رجوعه من لندن
انصدمت كثير بالكلام اللي قاله أبوي معقوله حبيبتي تكون أختي من أبوي تضايقت كثير و كرهت نفسي لفتره شهرين على ما أتذكر
بس الموقف اللي ما أنساه و لا زال في ذاكرتي يوم شفت بنت عمي .. شرفي .. عرضي تواعد شاب خسيس في المجمع
الكل يقول تفكيري تفكير بدوي أو معقد أو سطحي بس مهما يصير تظل بنت عمي و ما أرضى عليها لأنها من لحمي و دمي غيرتي عليها خلتني أسوي شي
ما فكرت في حياتي أسويه .. هددتها بالصور اللي كنت مصورها لها ترجتني كثير بعد ما شفت وجهها أكذب عليكم
أن قلت لكم ما حبيتها من أول نظره .. عليها جمال رباني يأسر الأنظار كانت أصغر بنات عمي و هذا اللي علقني فيها أكثر وافقت إن ما أخلي عمي يشوف صورها إذا تزوجتني
و قلت لها إني بذلها و بهينها و بعيشها بعذاب و بحرمها من الاتصال بأهلها و يا ويلها إن قالت طلقني كل هذا انتقام منها .. وافقت على كلامي و هي تبكي من القهر
تم زواجنا بسرعه و رحت معها أمريكا عشان شغلي كنت ما أعطيها وجه و أطنشها
في يوم من الأيام قامت تصرخ علي و تبكي بسبب معاملتي القاسيه معها حسيت أني ظلمتها كثير توها صغيره علي بيني و بينها 10 سنوات
انهارت قدامي مثل الورده الذابله في هذا اليوم اكتشفت إني أحبها و أموت فيها صدق من قال }من بعد الكره محبه{

نايف

الحب شي ما كنت أؤمن فيه أبداً كنت أضحك على أخواني فيصل و سلطان أحس إن الحب كان على أيام روميو و جولييت
و اللحين في هالعصر انتهى كان قلبي خالي من مشاعر الحب لأي بنت .. طموحي الوحيد أني أكون من أشهر الأطباء على مستوى الرياض
رحت أكمل دراستي الطب في فرنسا في جامعة من جامعاتها طبعاً مثل ما تعرفون الجامعات في الغرب مختلطه
بدينا أول أسبوع بجد و اجتهاد بس بعد ما شفنا البنات السعوديات المتغربات اللي معنا تغير كل شي فيني
هم خمس بنات بس كل وحده لها جمال يلفت الأنظار و خصوصاً غدير
اللي من جلست جنبي و قلبي يدق بقوه و حرارة جسمي ترتفع مع أني كنت انتقد ملابسها قدام ربعي
سألت ربعي اللي معي ليه يصير لي كذا من تجلس جنبي هالبنت ضحكوا علي و قالوا لي هذا الحب
آآه من الحب و أيامه تعلق قلبي بهالبنت تقدرون تقولون حب من طرف واحد لأن أسلوبها معي عادي كأي شخص موجود معها بالكلاس
استمر هالحب في قلبي مدة خمس شهور تقريباً بعدها انصدمت إن غدير تصير أخت السفير متعب تحطمت لأن مستحيل تتزوج شخص مو من طبقتهم المخمليه
عرفت بعد أيام إن غدير تحب واحد اسمه ناصر.. الفضول ذبحني و سألتها مين ناصر هذا اللي تحبه و عرفت في الأخير أنه ناصر ولد عمي محمد
شلت البنت من بالي ما أبي أطعن ولد عمي في الظهر و أغدر فيه مع حبيبته
بعد ما خلصت الدراسه رجعت من فرنسا و بديت مشواري كإستشاري في أمراض القلب و صرت مشهور على مستوى المملكة
في يوم من الأيام رجعت من شغلي و جات لي أمي يا نايف أبي أفرح فيك و أخطب لك
وافقت بس قلت لها إني أبيها تكون قريبه من سن أختي منى لأني مو مستعد أتزوج مبكر
خطبت ساره بنت عمي اللي من شفتها في يوم الشوفه نسيت غدير و طوايف غدير حسيت إن أيام حبي لغدير أيام طيش و تسرع

عساف

من بدايه حياتي كنت إنسان مدلل كل شي أبيه أو يخطر في بالي ألقاه تقدرون تقولون إني أنولدت و في فمي ملعقه من ذهب !!
طول هالوقت كنت أحس بالوحده و الغربه أسمع عن عمامي من أبوي كثير ودي أشوفهم اشتقت لهم كثير
أتذكر مره شفتهم في يوم العيد كنت ألعب في المراجيح و جالس لوحدي بعيد عنهم
قربت مني شوق كانت في الإبتدائي : عساف ليه ما تلعب مع الأولاد؟
ناظرتها بعدم اهتمام : مو مشتهي ألعب معهم
شوق : أهاا
حبيت هالبنت من أول ما شفتها و هي مو رايحه عن بالي رجعنا الإمارات
لأن جدي قال لأبوي اطلع من البيت و ارجع للمكان اللي جيت منه
ذكريات كثيره حصلت لي في الإمارات عشت عيشة ملوك و تعلمت من أبوي أشغال كثيره
بعدها توفت أمي و تأثر أبوي بوفاتها كثير بس حمد الله إنها توفت و هي على دين الإسلام
قمر بكت كثير بعد وفاة أمي لأنها كانت قريبه منها حيل عكسي أنا .. اللي صرت دايم مع أبوي في الوزاره و نادر نشوفهم
مرض أبوي بنفس المرض اللي مرضت فيه أمي ضاق صدري كثير و كنت أتعب كثير من المقابلات الصحفيه اللي تصير لي
كان متعب خويي واقف جنبي في هالأمور ما قصر معي توفى أبوي و بعدها حسيت إني قدام مسؤوليه كبيره
قمر أختي من جهه و الوزاره من جهه ثانيه و الشركات اللي أبوي مسؤول عليها قررت أتنازل عن منصب الوزير لواحد غيري
و فكرت إني أنزل للرياض أشوف عمامي و أخطب البنت اللي كانت محتله تفكيري طول هالسنين
وصلت الرياض و بعد فتره خطب تركي شوق و عصبت من هالشي كثير
دخلت بيت عمي و صار لي موقف مع هنادي من بعدها حسيت إن هالبنت هي اللي ملكت قلبي
تذكرت شوق بعدها حسيت إن شوق حب طفولي ما له أي معنى
خطبتها من عمي عبدالله و وافق علي تزوجتها اااه عليها جمال و دلال كلمة قمر قليل بحقها
بعد شهر العسل رحت معها الإمارات و عرفتها على قمر اللي فرحت كثير بزواجي من هنادي بنت عمي
قررت أني أخلي قمر تنقل الرياض لأن ما لها أحد في الإمارات بعد ما خلصت دراستها
عيشتي في الرياض كانت أحلى لها طعم ثاني بوجود عمامي و أهلي و ناسي
و غير كذا وجودي مع أغلى زوجه في هالدنيا أم راشد الله يحفظها و يخليها لي ..


نواف

نهاية عشقي نهاية مأساويه من أيام حبي لعبير بنت خالتي اللي كانت خطيبتي إلى أيام عشقي لأماني الله يرحمها
خطبتي لعبير بنت خالتي كانت من أحلى الأيام اللي مرت علي في حياتي ما كنا نحب بعض بس كنا نعشق بعض و نرتب لحياتنا المستقبليه مع بعض
مضت على خطبتنا 4 سنوات و جات العاصفه اللي بعدتنا عن بعض إلى الأبد تزوجت عبير ولد عمها اللي كانت مغصوبه عليه
و تحطمت أنا بعد ما تزوجت كرهت شغلي في المطار و خذت إجازه لمدة شهر عشان تستعدل نفسيتي التعبانه
توفى ولد عمتي الشخص اللي علاقتي قويه معه فهد اللي كنت أشكي له همومي تأثرت كثير و خصوصاً إن عنده بنت صارت يتيمه بعد وفاته
مضى شهرين على وفاة فهد كنت جالس في الصاله و جلس خالد أخوي معي و قال لي عن تركي اللي عمامه يبونه يتزوج أماني على شوق
انصدمت من هالشي بعدها قال لي خالد ليه ما تتزوج أماني عصبت منه بس جلست أفكر و حسيت إن كلام أخوي صحيح أقلها عشان الريم
و عشان أشيل تركي من هالمشكله اللي هو فيها
تزوجت أماني و سكنت معها في الخبر حياتي معها كانت سعيده أحلى سنتين في عمري مضت معها و أكثر شي فرحت فيه إنها حامل
حسيت إن الدنيا ضحكت في وجهي من جديد كنت أداريها و أخاف عليها من نسمة الهوا جات وقت ولادتها و قلبي كان يدق من الخوف و التوتر
طلع لي الدكتور اللي مو عارف وش يقول لي ابتسم بتوتر : مبروك زوجتك جابت لك ولد
رديت عليه بخوف : طيب و هي شخبارها اللحين ؟
نزل عيونه بحزن : زوجتك عطتك عمرها
انهرت عليهم في المستشفى من صدمتي بهالخبر راحت أماني و تركتني مع فهد و الريم آآخ يا أماني يا صاحبة القلب الدافي
بعد وفاة الغاليه تذكرت الحلم اللي حلمته عن فهد ولد عمتي يوم قال لي باخذ وحده عزيزه على قلبك
كرهت الزواج بعد أماني و أنا حالياً فرغت حياتي لتربية أحلى درتين تركتهم لي أماني في هالدنيا .... << أغلى اثنين بقوا في حياتي بعد وفاتها

سعود

أيامي مع حنان كانت مره حلوه قبل ما أخطبها و حتى بعد ما تزوجتها كانت نفس طبعي تقريباً
حبيتها بسبب أسلوبها و تصرفاتها المرجوجه هههههه جد بتقولون واحد فاضي بس هذا الشي اللي لفت نظري في حنان
إنسانه ماخذه الدنيا وناسه و فرح ما تفكر في الأيام الجايه أهم شي تعيش كل يوم بيومه قلبها طيب و خفيفه ظل و تحب تسوي لي مقالب و بالنسبه للجمال ما أبي أقول لأني أغار عليها ^_*
يوم درست في لندن كانت في بالي على طول اشتقت لها كثير و كنت معزم أني إذا خلصت من دراسي أخطبها بس قبل ما يخطبون الشباب الكبار اللي في العايله
شفتها في بيتهم بعد ما رتبت الوضع مع أختي ساره حسيت إني نذل ههههههه بس الشوق و ما يسوي شفتها و بعدها بيوم خطبتها
على قولة الشاعر : رأيـت بهـا بدراً على الأرض ماشياً ولم أرى بدراً قـط يـمشي على الأرض
حنان يا أجمل امرأة رأيتها في حياتي أتمنى أن لا تفرقنا الحياه و أن نبقى معاً مدى الدهر

ناصر

قصة حبي غير و كل العايله يقولون ناصر غير تفكيري .. أسلوبي .. تعاملي مع الناس في كل شي غير
حتى حبي له قصه غير مختلفه كثير عن البقيه يمكن تقولون شايف نفسي حيل بس هذا الواقع
كنت في مدرسة أهليه راقيه من مدارس الرياض المعروفه تعرفت في نفس المدرسه على سامي اللي مع الأيام صار بيننا ميانه لدرجه مو طبيعه
كنت في ثالث ثانوي و الزيارات بيننا كثيره بعد ما درست معه بالجامعه عرفت أنه من الطبقات المخمليه اللي تفكيرهم فوق
بس كنت ما أختلف عنهم لأني في نفس مستوى تفكيرهم إنسان فري أحب الحريه .. متفتح نوعاً ما
أناظر الحياه من زاويه أنا مقتنع فيها عكس أهلي اللي ما كان يعجبهم تصرفاتي و طريقة تفكيري الغربي و كلهم ضدي
أعترف أن عندي بنات عم يصلحون لي بس ما يناسبوني لأن تفكيري مختلف عن تفكيرهم
جات لي بعثه لفرنسا أنا و سامي فرحت كثير بهالبعثه اللي غيرت في حياتي كثير
درست أنا وسامي إدارة أعمال في آخر سنه من دراستي عرفني سامي على أخته اللي بتدرس بعد سنه الطب في فرنسا
غدير اللي ملكت قلبي بعد ما شفتها .. حسيت إنها الوحيده اللي تصلح لي و تصلح لتفكيري الصعب اللي الأغلبيه ما يتقبلونه
حبيت غدير و هي بادلتني هالمحبه كنت أشوفها كثير في قصرهم بالرياض تجلس معنا و نسولف مع بعض كانت تتمنى تصير في المستقبل إنسانه لها مكانه كبيره في المجتمع
خطبتها من أخوها متعب السفير في فرنسا و كان سامي معارض لهالخطبه بس بعد ما حاولت فيه وافق بشرط إني أدور له بنت من أهل الرياض يتزوجها
لأنه ما يعرف أهل الرياض كثير بحكم شغله في ايطاليا وافقت على شرطه و خطبت له وحده من البنات اللي من مستواهم الراقي و أنا تزوجت غدير اللي أعشقها و أهواها
كما قال الشاعر : نـسيـت الـهوى إلا هـواك فـإنه تغلغل في الأعماق و إنساب في دمـي

خالد

أصعب شي في هالحياه أنك تحب وحده و أنت تعرف إنها تكرهك من كل قلبها
منى البنت اللي تؤامين حبوها في نفس الوقت أنا و أخوي سطام الله يرحمه بس اللي انصدمت منه أنها تحب أخوي سطام و هو يبادلها نفس الشعور
بعد ما عرفت هالخبر رحت لسطام و أنا معصب و قلت له ابتعد عن منى أنا أحبها ابتسم لي و قال : خلها تختار أنا و لا أنت
كانت منى وراي و أنا أرد على سطام بعصبيه : الله ياخذك و يريحني منك
قربت منى من سطام بخوف : فال الله و لا فالك ، ناظرتها بعصبيه : تحبينه ؟
ردت علي : ايه أحبه ، رديت عليها بحقد : الله يبعدكم عن بعض ، ابتسم سطام : كل هذا غيره مني ؟
مشيت و طنشت كلامه اللي قاله لي .. أنا أحب سطام أخوي بجنون بس الغيره و الحقد عماني
بعد ما دريت إن استجابت دعوتي بمرض سطام كرهت نفسي و أنا أشوف تؤامي يذبل قدامي
آخر كلام سطام لي و هو على فراش الموت : منى ما أوصيك عليها يا خالد دامك تحبها أنتبه عليها لا تنسى
كنت أبكي على كلامه : حرام عليك لا تقول كذا منى لك أنت إذا قمت لنا بالسلامه ما بوقف في طريقك تزوجها إنت أولى مني
ابتسم لي بتعب : مرضي ما منه شفى أنت تؤامي و فاهمني بس إذا تزوجتها سموا على أسمي لا تنسوني
مسكت يده و أنا أبكي : اللي تبيه بيصير لا تزيد علي الله يخليك
بعدها بكم يوم توفى تؤام روحي اللي حياتي بدونه ما تسوى شي عرفت قيمته بعد ما فقدته يا ليت هالدعوه ما طلعت مني ليتني أنا و لا هو
بعدها عرفت إن منى كرهتني لهالسبب ما درت إني أموت ألف مره من الندم و الحسره
مضت سنين على هالسالفه لين شفتها في المستشفى يوم سوى أخوها نايف حادث سياره
لقيتها عند الأنتظار طلبت منها تجي بس ما عطتني وجه قلت لها الموضوع عن نايف
جات لي : وش فيه نايف ؟ ، قلت لها : في موضوع أهم من نايف منى أنا ما أقدر أعيش من دونك أنا مو بس أحبك أنا أعشقك
ناظرتني بعصبيه : أنت إنسان ما تحب إلا نفسك بس ، دمعت عيني من كلامها : حرام عليك ترى من مات أخوي و أن أموت ألف مره من الندم لا تزيدين علي بكلامك اللي يجرح
سكتت بعد ما شافتني أبكي من القهر ، حطيت يدي على الطاوله بضيق : أنا أبي أنفذ وصية سطام إن كنتي تحبينه ساعديني في تنفيذها
نزلت عيونها بضيق : أنا أكرهك ، مسكت يدها بدون شعور و شديت عليها بحزن : بس أنا أحبك
تركت يدها و راحت لجهة الحريم قررت أتقدم لها بس رفضتني في البدايه بحجة إن ما تفكر في الزواج حالياً
انتظرتها لما دخلت ثاني جامعه و أنا صرت مهندس في أحد الشركات
و تقدمت لها مره ثانيه و وافقت علي و كنت عارف إنها مغصوبه تزوجتها بداية حياتنا كانت صعبه كل واحد في غرفه
بس بعد ما انتقلنا للعيش مع أهلي أضطرينا نتم في نفس الغرفه عشان ما أحد يشك بالموضوع
مضى 8 شهور على زواجنا و الكل قعد يسأل ليه ما حملت لين اللحين رديت باحراج ما نبي نجيب عيال تونا في بداية حياتنا
حسيت إن منى انحرجت من هالموضوع خذت هالسالفه فرصه عشان أقترب منها أكثر و أخليها تنسى سطام
بعد ثلاث أسابيع تعبت و أغمى عليها يوم كانت في الصاله مع أمي و أختي ساره .. دقوا علي و جيت بسرعه عشان أوديها المستشفى
طلع لي الدكتور بعد فتره : زوجتك حامل و فيها فقر دم حاد لها فتره ما تاكل
رديت على الدكتور بخوف : و هي شخبارها اللحين ؟ ، الدكتور : بتجلس في المستشفى مده معينه لما تتحسن صحتها
قمت أروح عليها وأجي و هي صاده وجهها عني كل ما يقول لها الدكتور زوجك جا تقول له خله يطلع ما أبي أشوفه .. جرحني كلامها و كرهت نفسي زياده
خذتها للبيت و مضت الشهور و جا وقت ولادتها و قرروا يسوون لها قيصريه كنت خايف عليها لأنها كانت في الشهر السابع
جابت ولد زي القمر دخلت عليها و أنا جايب معي باقه ورد : منى جانا ولد و سميته سطام
ناظرتني باستغراب بعدها ابتسمت بتعب : أبي أشوف سطام الصغير
طلبت من الممرضه تجيبه جابته الممرضه و مسكت سطام بين يديني و قربته منها حبت راسه و نزلت دموعها : و أخيراً حققنا وصيته
ابتسمت لها : ايه حققت وصيته هذا سطام ولد خالد جا
بعد ما جانا هالولد تغيرت حياتنا معه من الضيق و الشقى إلى السعاده و الراحه
أم سطام أحبكـ و أعشقكـ من كل قلبي ..

مشاري

أنا الوحيد من أفراد هالعايله اللي ما أفكر في الزواج أبداً مع أني كنت أكبر واحد فيهم و كل واحد من عيال عمي يبي يفتك مني << ههههههه صاير لهم نشبه
فكرت أخطب مها بنت عمي اللي يوم شفتها في مطبخ بيتنا و علومي ضايعه خقيت عليها خقه خصوصاً مع فستانها الأحمر اللي ما خلاني أنام
جلست أهوجس فيها و أنا نايم .. يوم قررت أخطبها حطمتني أفنان و قالت لي إنها مخطوبه تحطمت في ذاك الوقت بعدها اكتشفت إن كلامها صاروخ
خطبتها و الكل فرح بخبر خطبتي لها لأني كنت الكبير في هالعايله وافقوا علي و شفتها في يوم الشوفه .. فهيت عليها أول مره أشوف بنت في حياتي غير اخواتي
جمالها يعجبني مثل ما يقولون الناس كلها على بعضها حلوه ..

جاسم

أكثر شي غلطت فيه رند إنها قللت من رجولتي الشي اللي كل الشباب يكرهونه كنت أحبها و هالشي كان واضح قدام خالتي أم رند و عمي و أهلي الله يرحمهم
أسلوبها معي في الفتره الأخيره كان جاف و ردودها علي فيها تمرد مع أني ولي أمرها الوحيد اللي بقى لها و أنا اللي متحمل مسؤوليتها بعد وفاة أهلنا الله يرحمهم
تأثرت رند بوفاة عمي كثير و وقفت معها مع إن حزني كان أكبر لأني فقدت أعز شخصين عندي في نفس اللحظه
كان عمري في ذاك الوقت 20 سنه و هي عمرها 17 سنه مضت الأيام و انشغلت في دراستي و هي في دراستها بالأكاديميه
خالتي أم رند كانت جالسه بكرسي متحرك و هالشي أثر فيني كثير لأني أعتبرها كأم لي مو مرت عم
سكنت بيت عمي بعد فتره مع أني كنت رافض هالشي بس عشان رند وافقت و سكنت في الدور العلوي
كانت رند تقارن بيني و بين تركي ولد خالتها .. تركي أحلى .. تركي شخصيته تجنن .. تركي و تركي
كنت أطنش كلامها مع أني مو عارف ليه تقول هالكلام لي ؟
بس جا يوم من الأيام اليوم اللي عمري ما أنساه يوم قالت لي تركي رجال و ولي أمري مو رجال وصل حدي و قلت لها أنا أعلمك مين الرجال اللحين
و صار اللي صار قمت مصدوم من الشي اللي سويته هاذي بنت عمي اللي أنا مسؤول عنها أسوي فيها كذا ... جلست تبكي قدامي بحسره : ضيعتني يا جاسم
كان كلامها لي مثل السهم اللي يجرح قلبي طلعت من البيت و صار لي حادث و نقلوني للمستشفى
بعد كل هالأشياء اللي صارت تقدمت لرند من خالتي و بعدها خوالها اللي بالقصيم وافقوا علي بفرح لأني أولى الناس فيها
تزوجت رند و أخيراً البنت الوحيده اللي عشقتها في حياتي
الله لا يبعدني عنك يا بعد أهلي كلهم
ما في غيره سكن روحي حبيبي و أنا أحبه لو قال تمنى أتمنى عمري قربه

رائد

الغدر في هالدنيا مثل شربة الماي .. انتظرتنا بكل شوق و وله .. سنتين من عمري ضيعتها و أنا بانتظار رجوعها من أمريكا
سمعت أنها وصلت من مساعد اللي شافها في المطار مع صديقاتها قلبي كان يدق بقوه و المشاعر مضطربه داخلي.. شوق .. فرح .. توتر .. خوف .. ارتباك
رحت المطار و التقيت بها و هي تاخذ أغراضها ناظرتها في البدايه حسيت إنها تغيرت علي كثير أسلوبها .. طريقة لبسها
قلت لها : وش لابسه أنتي ؟ ، قالت : عادي عبايه و حجاب فيها شي !!
رائد بعصبيه : ذي عبايه و لا جلابيه وش هالألوان اللي على عبايتك ، شجون ناظرته بعدم اهتمام : أنت ليه جاي هنا ؟
رائد باستغراب : ذا سؤال تسألينه ؟ ، شجون بلا مبالاه : ايه عشان تودع وعد المهم رائد أنت ما لك دخل باللي ألبسه لو تلاقيني ببنطلون و تي شيرت ترى ما لك علاقه
رائد مسك يدها بعصبيه : أنا ولد عمك ما تفهمين أنتي ، شجون بألم : ابعد يدك عني تراني متزوجه استح على وجهك
كل ما رجعت كلامها في عقلي حسيت إني على كثر ما حبيتها كرهتها لأنها خاينه و غداره
خذت استراحه من شغلي و مريت الرياض على ربعي عشان أغير جو و أنسى شجون و أهلها
رجعت لشغلي في الشركه دخلت مكتبي و انصدمت بوجود بنت جالسه فيه ... عصبت من هالموضوع
بعد فتره عرفت إنها قمر أخت عساف بس جد اسم على مسمى كان بيننا في البدايه رسميات بس بعد ما أخذنا على بعض صار بيننا ميانه
حبيت فيها طبيتها و أخلاقها العاليه و ذكائها مع إن اللي يشوفها في البدايه يقول هاذي مغروره و متكبره و شايفه نفسها
عرفت كثير عنها و عن حياتها القديمه ابتسمت لها و أنا أشوف وجهها سألتها أكيد أمك أجنبيه ابتسمت لي بخجل : أيه
آآه يا عالم جمال .. رقه .. حلاوه .. ذكاء .. أخلاق كل شي حلو اجتمع فيها
قررت أروح لعساف وأقول له الكلام اللي في قلبي ، قابلته في مجمع الفيصليه بالرياض عند جهة المطاعم عشان نكون بعيدين عن الشباب
رائد : عساف أبيك في موضوع و لا ليت ما تردني ، ابتسم لي عساف : تفضل ؟
كنت متوتر من ابتسامته أحس وراها شي تأملت وجهه يشبه قمر كثير كأنهم تؤام بس هو فيه من ملامح البدو أما أخته شكلها أمريكيه أصل :
أمممم أبي أتقدم لأختك قمر ، عساف ابتسم لي بفرح : هاذي الساعه المباركه و ما يحتاج أسأل عنك بس باخذ راي البنت بالموضوع
من كثر ما فرحت برده ضميته و هو قام يضحك علي : الله لهالدرجه قمر ماكله قلبك
جلست أتحلطم قدامه : أختك حتى النوم ما خلتني أنام ، ابتسم لي : الله يكتب اللي فيه الخير
تقدمت لها رسمي و وافقت علي و كل العايله فرحوا بهالخبر سكنت بالخبر معها و طلبت منها تطلع من وظيفتها لأني كنت أغار عليها بجنون
أغار عليك من قلبي وعيني ومنك ومن زمانك والمكان
ولو أني جعلتك في عيوني الى اليوم القيامة ما كفاني

طلال

وجدان الدانه اللي حصلت عليها بعد معاناه و شقى أعشقها و أغليها و أحب دلعها و دلالها (فديت جودي و الله)
من أول ما شفتها في ملكة أفنان و أنا أحس إنها خذت عقلي معها . جمالها طفولي .. برائه .. انوثه .. رقه .. نعومه
كنت ناوي أخطبها بس كانت أمورنا متعسره أنا و أخوها تركي اللي يبي أختي شوق و مصيري كان مرتبط بمصيره
في نفس اليوم عزمت أنا و تركي أننا نحط أهلنا أمام الأمر الواقع قدام الرجال في الملكه و صارت الأمور لصالحنا و لله الحمد
بعد الملكه بفتره خطبت وجدان رسمي و كنت طاير من الفرح بعد ما عرفت بموافقتها تعلقت فيها و صارت بيننا مواقف مره حلوه لا زالت في الذاكره .. ^_^
غلاها ياكبر عندي غلاها .. عشقها القلب ولخاطر هواها
تولعت بهواها دون مدري .. وباع الناس قلبي واشتراها

مساعد

شخصيتي و تعاملي تغير كثير بعد ما لقيتها في حياتي علمتني إن الحياه دروس لا يمكن أن تنسى
كنت رئيس عصابه و العقل المدبر فيها بالخبر و كانوا الأعضاء فيها جاسم و صقر الله يرحمه اللي كانوا ينفذون أوامري بانصياع
الشي اللي حدني أسوي كذا أبوي اللي كان بالسجن بسبب الديون المتراكمه عليه لقيت خطه أطلع أبوي فيها من السجن
كنت مو مهتم بالطريقه اللي باخذ فيها الفلوس أهم شي تكون عندي الفلوس في أسرع وقت
رتبت الخطط و المؤامرات مع أعضاء عصابتي في خطف البنات البطرانات عشان أهلهم يدفعون لنا فديه مقابل إطلاق سراح بناتهم
و بديت أول عملية خطف في حياتي و هي آخر عمليه يوم الخميس الساعه 11 الليل .. كنت أترقب سيارة لكزس طالع منها صاحبها لجيان و كانت في السياره بنت
أشرت لربعي أنهم يجيبونها بسرعه قبل ما يطلع أخوها مسكوها و جابوها للسياره و هي كانت تقاوم وتصرخ مسكت المنديل وخدرتها
و هي معنا في السياره أكذب عليكم إن قلت ما كنت خايف و متوتر بس كل ما يوسوس لي الشيطان زال مني الخوف و التوتر
وصلنا للشاليه تبعنا و نزلت البنت في الخيمه و ربطتها و هي فاقده الوعي
أغراني وجهها الحلو الملائكي و هي متحجبه لمست وجهها البريئ بس سحبت يدي بعد ما حسيت أنها بتقوم بأي لحظه
طلعت من الخيمه و ضميري بدا يأنبني وش ذنب البنت أسوي فيها كذا قررت أرجعها اليوم الثاني بس قالوا لي ربعي فرصتك دق على أهلها و اطلب منهم الفديه بكره
كنت أمنع الكل يدخل للخيمه اللي هي فيه بدون استأذان مني و أحاتي أهلها اللي ما أدري وش بيسوون إذا عرفوا إن بنتهم مخطوفه
مضى يوم كامل بعدها رحت لها و هي مربطه و قمت أتغزل فيها طلعت من الخيمه و رجعت للشقه
بعد فتره دقوا على ربعي و قالوا دم !! ما فهمت وش يقصدون رحت لهم و لقيتها مغمى عليها و راسها ينزف دم
شلتها و ركبت السياره و أنا متوتر حدي ما أبي البنت تموت رحت للطوارئ و اكتشفت إنها ضربت راسها بعامود الخيمه رحت للدكتور عشان اعرف حالتها قال لي أنها بتصير خرساء
أغمى علي من الصدمه و جاني رائد صديقي أيام الثانوي يشكرني لأني انقذت أخته يعني طلعت وعد اللي خطفتها أخت رائد صديقي حسيت أني حقير و نذل
قررت أخطب وعد عشان أصحح غلطتي و وافقوا علي بس وعد ما كانت تدري مين أنا
مضت الأيام و رحت معهم مصر و قررت أتزوجها هناك و نكمل شهر العسل مع بعض عرفت بعد ما تزوجتها أني أنا رئيس العصابه نطقت من الصدمه
فرحت إنها نطقت و ضاق صدري لأنها تركت لي رساله اليوم اللي بعده و طلبت مني الطلاق بعد ما عرفت حقيقتي
ما كانت تدري إني من وديتها المستشفى و أنا أحس أن بيجيني شي إذا سمعت عنها خبر مو زين .. عشقتها لأنها أول بنت تدخل في حياتي بهالطريقه الغريبه
توفى زوج أختها و تركتها فتره عشان تفكر قررت آخذها من بيت أهلها و كنت خايف إنها علمتهم عني بس الحمد لله ما قالت لهم شي
رجعتها للشقه و مضت أسابيع و حنا منفصلين عن بعض و هالشي كان مضيق صدري كثير لأني أحبها و هي تصدني
بعد كم يوم صار موقف رجعنا لبعض و كنا أحلى ثنائي جمتعهم قصه غريبه و نهاية سعيده ..

تركي

نهاية عاشق في حياة كل واحد من أبطال رواية متلثمه و منهم أنا له قصه و حكايه مختلفه على الثاني
تجمع ما بين الحب .. الوفاء .. الغدر .. الخيانه .. الإنتقام .. الصبر .. الفراق .. الشوق
ملكة تركي & شوق
كانوا الأسمين مكتوبين على الكيكه ناظرت الكيكه و سرحت لأيام قديمه لها بصمه في حياتي
تقدمت لشوق عدة مرات و ردني خالي سلمان لأني مو ولد أخته نوره و بسبب مشاكله مع أبوي حول الشركات و المساهمات
كنت مقهور من اللي يحصل معي و زاد قهري يوم انخطبت شوق و تزوجت لواحد ثاني غيري
قلبي يغلي من جوا مو قادر أستوعب إنها تركتني و أنا اللي كنت أسهر الليالي أفكر فيها و أكتب الخواطر و الأشعار عليها
حبيتها .. مو بس حبيتها إلا عشقتها و عشقي لها خلاني أصبر على فراقها طول هالوقت
يوم السبت أو يوم البؤساء
مقطع خاطرتي اللي كتبتها لما تزوجت ماجد الإنسان التافه .. مضت الأشهر و قلبي المجروح صابر على فراقها لما جا اليوم اللي تطلقت فيه من ماجد
تقولون فرحت !! .. لا و الله ما فرحت لأني عارف إن قلبي متضايق على اللي صار له
مضى حوالي خمس شهور على طلاقها و كان في هاليوم ملكة أفنان أختها على سلطان ولد عمي
عزمت على الشي اللي أنا متفق عليه أنا و طلال لأننا نفس الحاله محرومين من اللي نحبهم بسبب مشاكل قديمه حنا ما لنا دخل فيها
جلست جنب خالي سلمان و جلس طلال جنب أبوي
الكل يناظرنا مستغرب ما عدا عيال خالي اللي ابتسموا من هالحركه عرفوا أننا ناويين على شي خطير
تكلم واحد من الرجال في المجلس و كان موجه كلامه لخالي سلمان : أنا أبي بنتك المطلقه لولدي
رديت عليه و أنا ماسك أعصابي بكل ثقه : أنا عازمك على ملكتي أسبوع الجاي من بنت خالي سلمان
ناظرني خالي و هو معصب بس الكل وقف معي من عيال خالي و انحرج خالي إنه يردني لأنها تعتبر المره الرابعه اللي أتقدم فيها لشوق
بعدها رجعوا خالي و أبوي مع بعض و صاروا شركاء و إنتهت المشاكل ..
ناظرتني شوق و هي مبتسمه : تركي وش فيك لازم نقص الكيك
ناظرت الكيك باحراج نسيت نفسي و أنا أفكر في أيام قبل
قصينا الكيك و الكل كان يصفق لنا بحراره
طلع صوتي اللي كنت مخليه مفاجأه ... الكل ما يدري عنها مع الموسيقى ناظرت شوق و مسكت يدها و أنا مبتسم
كل شي في دنيتي له طعم ثاني .. الليالي طولها طول الثواني
والعمر مره وانا عمري معاك .. يا عساني ما انحرم شوفك عساني
ابتدى عامي و شمسك ماتغيب .. لو يغيب الكون كله ماتغيب
من خريف القلب لك ببني قصور .. تآمر وكل الأماني لك تجيب
في شتاء عمري ألاقي بك دفا .. ياللي نظراتك تعلمني الوفا
وآخر فصولك ربيع مزدهر .. مايل بغصنه لوردك تقطفه
يدري إن أسباب ضعفي نظرته .. يدري إني ما أقاوم ضحكته
يدري إن الروح ماتغلى عليه .. لو دعاها جت تلبي دعوته

نزلت دمعة من عينها و على طول مسحتها بايدي : شوق لا تخربين فرحتنا بدموعكـ
ابتسمت لي : تصدق صوتك أحلى من عبد المجيد
تركي باحراج : ههههههه كلك ذوق
ناظرتني بخجل : مشكور على الأغنيه
تركي رفع راسها و هو مبتسم و حب جبينها : العفو تستاهلين أكثر يا قلب تركي

The End..


{{..خلف الكواليس

لا أستطيع التعبير عن شعوري و أنا أنهي أول روايه لي

أعترف بأني شعرت بالحزن لأنني أنهيتها بس أتمنى إنها نالت على إعجابكم و ذوقكم الرفيع

أغلب سلسلة أحداث الروايه كانت حقيقه نعيشها في هذا الزمن و القليل منها من وحي خيالي

و لكنني حاولت بأقصى حد أنها ما تكون خياليه لدرجة أنها لا تصدق و هذا كان بطلب كثير من قريباتي أنها تكون أكثر واقعيه

أشكر في الحقيقه منتديات غرام و ألم الإمارات و تعب قلبي اللي أتاحتوا لنا الفرصه أنا و الكثير من كاتبات الروايات في كتابة رواياتنا بكل حريه

و أصحاب الأيادي الخفيه اللي ساعدوني في كاتبة هذه الروايه و شجعوني على تكملتها بكل حماس

و منهم بنت خالتي الغالية pink cat فلهن جزيل الشكر على ما قدموه لي

بالنسبه للروايه كنت مخليه نواف هو البطل الأساس في الروايه بس في آخر لحظه غيرت الفكره و خليت بطل الروايه تركي

هدفي من هذه الروايه إن ما في شي مستحيل في هذه الحياه
و من يمتلك الشجاعه يستطيع الحصول على الفتاه التي يريد منها أن تكون شريكه له في المستقبل << تشجع الشباب اللي يحبون ^_*

تركي و صبره على المصاعب التي واجهته في الحياه في سبيل حبه لشوق أستطاع الحصول عليها بعد مشقة 4 سنوات من حياته
و رفضهم الزواج منها لعدة مرات و لكن حبه له كان أقوى من أي عائق يواجهه في هذه الحياه
في الحقيقه حبيت شخصية تركي كثير إنسان صبور و أكثر شي عجبني فيه إنه يعشق شوق بجنون

أيضاً ما أنسى العشاق الباقيين في الروايه جاسم و حبه لبنت عمه رند الوحيده اللي تبقت له من أهله
جاسم إنسان رائع بمعنى الكلمه بس العيب الوحيد اللي فيه إنه عصبي إذا عصب من شي ينسى اللي قدامه << عاد عندنا من أمثاله كثير ^_*

مساعد اللي يسمونه أقاربي رئيس عصابة مافيا الخبر شخصيته قبل و بعد
شخصيته من قبل كانت تقهر بجد إنسان ما عنده ذرة احساس و لا مشاعر هدفه في الحياه الفلوس و بس
بعد ما عرف وعد و تزوجها تغير 180 درجه مثل ما يقولون صار إنسان ثاني مرهف احساس له قلب طيب و حنون << حبيته من جد

رائد الإنسان اللي أحس أنه أتكيت و رزه شاف قمر و هي الوحيده اللي دخلت مزاجه بسبب جمالها و أخلاقها الشي المميز فيه إنه غيور على قمر لدرجة الجنون

فيصل و رغد اللي ما أحد من أقاربي توقعوا أنهم بيتزوجون في النهايه فيصل شخصيه غريبه يحمل الكثير من الألغاز في قلبه
تزوج رغد بنت عمه لهدف الإنتقام بس ضعف قدامها لأنه حبها و عشقها من النظره الأولى << بصراحه أؤمن بالحب من أول نظره

المهندس خالد صاحب الشخصيه القويه من بداية القصه بس من داخل إنسان مهزوز و بالأصح مجروح و يعاني من جروحه
منى كانت حلم حياته .. جاه وقت حس باليأس بس بعدها واجه حبه بكل شجاعه لما ملك قلبها << و أخيراً

ناصر و حلمه بالزواج من أخت السفير السعودي في فرنسا اللي كثير من عيال عمه
حسوا إن حلمه مستحيل يتحقق بس في النهايه تزوج فتاة أحلامه غدير و عاش معها أحلى حياه في باريس
<<شخصيته إنسان فري يحب الحريه جذاب و أكثر ما يميزه أنه على كثر الدول الأجنبيه اللي يروحها و على كثر البنات اللي يشوفهم ما تملي عينه في هالدنيا إلا غدير

نايف و تفكيره بالمستقبل أكثر من الزواج << كثير شباب كذا
حقق طموحه في الطب و صار دكتور مشهور على مستوى المملكه بعدها خطب بنت عمه ساره
<< شخصيته مختلفه كثير عن ناصر إنسان جدي و محافظ نوعاً ما و غيور بس قلبه طيب

سعود بداية حياته في الغربه و كل تفكيره في الرياض بعد ما نزل من لندن خطب صديقته من الطفوله حنان و رجع يكمل الدكتوراه في لندن و هي معه
<< بصراحه كنت في البدايه بشيلهم من الروايه بس شخصية سعود الهبال و الثقه و الزقرت عجبتني أعترف كان من بداية الروايه عاجبني

طلال اللي حاله ما تقل عن حالة تركي فراق الحبايب صعب إذا كان من الأهل بس بالصبر و العزيمه على الوصول للمراد تكون أقوى من رأي الأهل و عنادهم
وجدان كانت روحه و قلبه و عقله البنت الوحيده ما بين العايله اللي من أحد يقول اسمها يسرح و يفكر فيها .. حبها من قلب و دخلت عقله و قلبه بدون تفكير

مشاري و رفضه التام للزواج << عاد هاذي تمر في حياتنا كثير ..
بعد ما شاف مها صدفه حس أن هالبنت هي اللي بتسعده في هالحياه خطبها بعدها تزوجها حس إن الحياه الزوجيه لها طعم غير عن حياة العزوبيه

نواف هو الوحيد اللي كنت بخليه بطل روايتي بس قلبت حياته حزينه في النهايه << المشكله لازم يكون في نهاية حزينه لواحد من أبطال الروايه
كثير زعلوا على نهاية نواف بس معليش سامحوني أبي تصير الروايه أكثر دراما و واقعيه في قلوبكم
للأمانه قصة نواف مع عبير في البداية كانت واقعيه نوعاً ما

و في الأخير وداعاً لقرائي الأعزاء و للمنتديات الغاليه على قلبي
و لروايتي نهاية عاشق التي بدأت في كتابتها منذ ثلاث سنوات << طوال المرحله الثانويه
فراق الروايه صعب على قلبي بس لكل روايه نهاية .. ^_^

دمتم بسـ ع ـاده جميعاً و عذراً على القصور اللي بدرت مني

أختكم / متلثمه بشماغ عاشقها

تمت بحمد الله في تاريخ
11/10/1430هـ
30/9/2009م
يوم الأربعاء
الساعه 6:15 الصباح