الجزء الثالث
الجازي : دقيقه ريناد اسكت طروق المزعج
طارق حبيبي ؟ اسكت عشان اعطيك حلاوه
طارق : ابي هواوه ؟
الجازي : ان شاء الله بس روح جب الشنطه ذيك وتأشر عليها لانها كانت على سريرها وعطته حلاوه وسكت
ريناد : والله ولا الحضانه
الجازي : عاد هذا طارق مو أي واحد
ريناد: ياحبك للبزارين ياختي
الجازي : بنشوف وش بتسوين لتزوجتي وصرتي ام
ريناد : لايكثر بس وش ناويه عليه تجيني ولاجيك ؟
الجازي : العنود عندنا الحين خليها وقت ثاني
ريناد : طيب ياقلبوو يالله اجل اخليك ولي مكالمه ثانيه معك
الجازي : سي يو
ريناد افضل صديقه للجازي تحبها حيل وهي انسانه محترمه ، تتعامل مع الناس بكل ادب وتواضع عكس اختها المغروره
راح نعرف من هي اختها المغروره بعدين
/
/
/
دخل ابو لافي المجلس وتفاجأ بولد اخوه كأنه يشوف اخوه سالم ايام شبابه نفس طوله وعرض اكتافه ، ذقنه المتقدم شوي واللي يزيد من وسامته ، ملامحه الحاده ، والغموض اللي يكسي وجهه ، سمار بشرته ، ونظراته القاتله اللي تحوي الى عمق التفكير
( صقر )
دخل علي عمي وكانت الفرح تغطي ملامحه ، يالله تغير حيل وكبر
صارت لحيته كلها بيضا ، والوقار والزهد يبين من شكله
ابو لافي : حيا الله صقر يامرحبا مليون
صقر : الله يحيك ويخليك ياعمي
ابد ماتوقع عمه يضمه اهتز من داخله بقوه ، خلته يحس انه ولد صغير محتاج لحنان ابوه
ابو لافي : القهوه وينها ؟
ناظر فهد اللي كان مبتسم : عمي الحين بتجهز
ابو لافي : فهد ياولدي روح للريم ابي قهوتها اللي تبيض الوجه
فهد : ان شاء الله
صقر داخله : اللي مثلها ونعومتها يشك انها تعرف تسوي شي !!
ابو لافي وعيونه تلمع : كيفك ياولدي وكيف الدنيا معك ؟
صقر : بخير ياعمي ماينقصني غير مسامحتك وراضاك عني
ابو لافي : ياولدي انسى اللي فات ، احنا عيال اليوم وانت كنت مراهق وماتعرف مصلحتك
صقر بداخله : أي هين انسى ياعمي
كمل ابو لافي : مانبي القطاعه ياولدي وهلك كانوا فوق راسي وماقصرت معهم بس ماندري هم ليه مايزرون ولايسألون ؟
صقر : مافيه قطاعه بعد اليوم طالما انا موجود
ابو لافي : مبروك للشركه الجديده وجعلها مفتاح فرج لك ماشاء الله عليك رفعت اسمنا فوق وخليتني افتخر فيك بشهادتك وشركتك
صقر بغرور :تسلم هذي تربيتكم ياعمي
/
/
/
شوق : لاحول وانتي من يوم جيتي وانتي تبكين ؟
الريم : لاتلوميني فشله وش بيقولون علي كل شوي طالعه عند رجال
شوق : طيب ماكنتي تدرين يعني تقصدين ؟ ولا علينا ذي الحركات عشان مانتقم منك ؟هههه
الريم بضحكه : لا والله ماشفتيه انتي شلون كان يطالع فيني
شوق وهي تتربع : اكيد اخذتي عقله ؟ الا حلو ؟ يعني كذا جنتل مان
الريم : بايخه وانا فاضيه اتمقل فيه
شوق : تتوقعين من هو؟
الريم وهي تمسح بقايا دموع على خذها : مادري بس اظن انه شخص مو عادي لان شكله يوحي بمكانته الراقيه واحس فيه ملامح من جراح بس يمكن يتهيأ لي مادري؟
شوق وهي تغمز : ياعيني وقالت ماتمقلت فيه
الريم وهي تلف بجهه باب غرفتها لانه انطق : نعم
فهد : عمتي يقول جدي سوي القهوه اللي تبيض الوجهه
شوق وهي تمسح شعرها بعد مابدلت ملابسه : الا فهد حبيبي من ذا اللي عندنا ؟
فهد ويبي ينرفزها : وانت ليه تسألين عن اللقافه بس
راح وخلها ضحكت عليها الريم مع دخلت غلا اللي سمعتهم
غلا بحيره : يقول ان اسمه صقر سالم ماصدق انه يقرب لنا مابعد شفته في حياتي كلها
شوق والريم ناظروا بعض باندهاش
الريم وهي تضرب وجهه: يافشلتي هذا صقر ولد عمي
شوق : وش عنده جاي من زمان عنه واصلا اخبره برا
الريم بتوتر وقلبها يدق : مادري ؟؟؟امشي تحت معي عشان اسوي القهوه لايفضحنا
غلا : بروح لفيصل اعلمه يمكن يقولي شي وطلعني من حيرتي
شوق : ههه الحمدلله البنت انهبلت عليه
الريم وهي ترجع : غلا حبيبتي انتي بنوته شاطره صح؟
غلا : اكيد
الريم : طيب لاتقولين انه شافني وتصرين نمامه
غلا : لا لا ماعلم احد بس علمي شوق بعد مو بس انا ؟
شوق : ههههه هذي ملسونه لو اجلس اردادها ماخلصت ياللا قبل يعطينا جدي كلمتين
الريم : يالله
/
/
/
رهف : وااااي يمه شكلك مره حلو بلوك الجديد شفايفك طالعه تجنن كأنك نانسي عجرم
ام ماجد بغرور : فديت بنتي الذوق
رهف : مامي ابي اطلع زهقانه
ام ماجد : اطلعي احد ماسكك
رهف : خالد وماجد مايخلوني براحتي كله يدققون على ملابسي وعبايتي
ام ماجد : ماعليك منهم خذي السواق واطلعي مع وحده من صديقاتك
رهف وقفت وهي تبوس امها : مشكوره مامي ودقت على وحده من صديقاتها الفري وراحوا المجمع
/
/
/
راكان بفرحه : هلا بولد عمي هلا ماني مصدق
يوم قالي فهد كذبته ارحب يالله ان تحيه
صقر ماتوقع كل ذا الحب يلقاه في بيت عمه : الله يحيك هلا بك
سلم عليه وعلى فيصل اللي كان معه
واندق الباب وراح راكان يشوف من هو
راكان: توكم تجيبون القهوه والرجال صارله ثلث ساعه
الريم : امسك اصلا تفاجأنا مادرينا انه جاي
راكان : عن الهذره بس روحي جيبي القدوع ترى هذا صقر يعني نفرش له الارض ورد لو يبي
الريم : اعصابك هذي شوق جايه وراي وجايبتلك الورد اقصد القدوع
راكان : ماتوبين عن التعاليق اوريك
وقدم لهم القهوه وظلو سوالف لين جا جراح اللي اخر ماتوقع انه يشوف تؤمه
(جراح صقر ماجد) كانوا متعلقين ببعض لدرجه كبيره لكان الشيطان اللي انزرع في صقر فرقهم وراحت اخوته مع جراح وبقت مع ماجد وكان ماجد يحاول يرضي الاثنين بس مافيه فايده وظل متمسك بهم كلهم ، كان ماجد يجيب اخبار صقر ويوصلها لجراح والعكس يعني المحبه باقيه لولا سموم شياطين الانس واللي يزعل لما يكون الشيطان قريبك ومنك وفيك
/
/
/
في المجمع
مشاعل : شوفي هذا خقاق وربي
رهف : من تقصدين ؟
مشاعل : هذاك اللي يناظرك ماشال عيونه عنك
رهف : ماعليك منه ؟ شكله حافي منتف
مشاعل : هههههه لا اجل طالعي اللي جنبه يجنن شوفيه وشكله يلعب رياضه ناظري عضلاته شلون
رهف وهي متملله وتعدل لثمتها : وينه هذا ؟
مشاعل : على يمين المنتف على قولتك هههه
رهف : وااااااو بصراحه خقاق ؟
مشاعل وهي تغمز : واحلى من صقر ؟
رهف : بصراحه صقر ماعليه كلام بس نظراته حاده يامامي تخوف بس هذا شكله حبوب وينقص عليه بكلمتين حلوين
مشاعل : وش دراك؟
رهف : ناظري عيونه واحكمي ياميشوو
مشاعل : امشي نرز واجيهنا عندهم يمكن يرقمونا
رهف : لا ياقلبي مو انا اللي اسوي كذا وارخص نفسي هم اللي يجون لي وافكر اذا اعطيهم وجهه ولا لا
واستمر الحديث والنظرات الشيطانيه ......
/
/
/
(جراح)
دخلت المجلس بس كأن كل شي وقف يوم شفته اخيرا بعد دهور مرت وعلاقتي معه مقطوعه ، اشوفه بعد الود اللي تحول ونقلب كرهه بينا
ابو لافي : جراح علامك واقف هذا صقر ولد عمك رجع لنا تعال سلم
(صقر)
حسيت ان حيلي مهدود اول مادخل خالطتني مشاعر من زمان ماعشتها ، قمت وعرفت ان جراح يفكر نفس تفكيري وماهي غريبه علينا مو كنا بيوم اصدقاء ههه اصدقاء يازينها هذي الكلمه في هذا الوقت
ابو لافي : بتظلون واقفين انت وياه
جراح انتبه لابوه وتقدم ومد يده لصقر صقر سلم عليه وتعانقت اليدين وكل واحد يشد الثاني وكأنهم يعاتبون بعض بنظراتهم وبيديهم
ولحظه .. ضموا بعض
ابو لافي فرح حيل لانه يدري ان جراح تعذب بعد فراق صديقه وكان بدوامه بين ابوه وولد عمه وصديق طفولته
جراح : هلا بك ياولد عمي
صقر / هلا بك زود
وراح الوقت سوالف ووضحك وجا لافي وكتملت العقده
صقر ماهو قادر يحدد مشاعره من زمان ماحس بلمة الاهل والترابط وجلس في صراع حاد بين الحب اللي مازال ينبض فيه وبين حقده وانتقامه للماضي
/
/
/
ام عبدالله : وانتي لو فيك خير ماحرمتيه من العيال كان لفيتي قشك ورحتي بيت هلك مامنك الا الخساير
وضحى بألم : يايمه هذا حكم ربي مالي ذنب انت شفتي تقاريري وكل شي سليم
ام عبدالله : قصي علينا بهذي الارواق بس
ام عبدالله مره عقله قديم مره وهي عليها مزاج غريب مره تكون طيبه ومره تقلب نكديه
وضحى : الله يعين يايمه ادعي لنا بدل هالكلام
ام عبدالله : وين ولدي اتفاهم معه ؟
وضحى : الحين بينزل راح يبدل
وكملت بخاطرها ( ياربي ارحمني من هالعذاب والكلام اللي اسمعه ، ياربي عطني الذريه الصالحه من عبدالله وريح قلبي )
/
/
/
استأذن صقر بعد ماوعد عمه بكره يجي مع هله كلهم
مر على الشركه واخذ اوراق عشان يراجعهم وراح البيت
ماجد : لا كان جلست مو توعدني وتروح
صقر : هههه وانت للحين جالس هنا
ماجد : صارلي ساعتين احتريك لولا ان العنود تهديني ولا كان جيتك بالعقال امحطك
صقر وابتسامته الساخره : لا .. قد هذا الكلام
ماجد ويسوي نفسه خايف : لالا اسفين طال عمرك
صقر : ههههه
ماجد : بشر وش سويت في بيت عمك ؟
صقر : كل شي ماشي مثل مابي لكن وتذكر موقف الريم وحاول يشيلها من باله ماهو ناقص يخرب خطته عشانها
ماجد : لكن ايش ؟؟؟؟؟؟؟
صقر : حسيت بلمتهم وتمنيت لو ماصار اللي صار
ماجد : اهم شي ترجع القلوب مثل اول
صقر : مادري بس للحين احس بالحقد اذا تذكرت اللي صار ماهو بكيفي ياماجد
ماجد : الله يهديك بس
دخلت العنود ومعها طارق : اخوي هوني
ماجد : ايه جا اللحين ماتعرفيني
العنود : مااااااجد
ماجد ويسوي نفسه هيمان : عيونه
صقر طقه في راسه : استح على وجهك وهذا وانا قدامك تسوي هذي الحركات
اخذ طارق وجلس يلاعبه
دخلت ام صقر وشافته
ياحليله ولدي مثل الطفل وبراه في وجهه اذا هو مرتاح ومايفكر
يالله انك تهديه وتطهر قلبه من كل حقد
انتبه لامه اللي واقفه وابتسم لها بعد ماقبل جبينها
ام صقر : بشر ياولدي
صقر وحب يطمن امه : كل شي تمام واستقبلوني احسن استقبال
ام صقر : الحمدلله
صقر : بكره عزمنا على العشا ياليت تخبرين الجازي وانت يالعنود لازم بكره تكونين موجوده
ماجد : احم احم ترى فيه زوج هنا ماتعصيه وتحت شوره
ام صقر بحنيتها : بعد أذنك ياوليدي طبعا
صقر : ماعليك منه ؟ يستهبل عليك يمه
العنود : الله لايحرمنا من استهباله ادري فيه مايقول لا في الواجب
ماجد : لا كذا ماقدر كبرتوا راسي
صقر :هههه والله انك مخفه كلمتين تجيب راسك ، اصلا جراح بيكلمك وبيعزمك لانه قالي تحضر
ماجد بضحكه استهبال : هع هع ترى هو صديقي مثل ماهو قريبك وصديقك لاتنسى كلنا واحد وتوه مسكر مني قبل لاتجي
ام صقر : الله يديم محبتكم يارب
العنود : يارب
صقر : يمه وين الجازي ماشفتها؟
ام صقر : في الغرفه توها يو م رقت
ماجد : اجل يالله يالعنود اللبسي ورانا مشوار
صقر : وين بدري تعشوا ؟
ام صقر : ياولدي وش عجلك اجلسوا تعشوا
ماجدوهو يوقف : نتعشى عندكم العافيه والله مكلم هلي بنتعشى عندهم وامي زعلانه قالت ليه قاطعها
ام صقر : اذا كذا الله معكم الله الله في امك
ماجد : ابشري يااحلى خاله بالدنيا وباس جبينها
العنود وهي تلبس : يالله سلمي عالجازي ماني بقادره ارقى فوق
صقر وهو يشيل طارق اللي كان مدوخ يبي ينام: لاتاكل امي لو سمحت بسك بوس
ماجد : هههه فديتها والله شرايك تسلفني امك ؟
صقر بعصبيه مصطنعه : اقول امش لارويك شغلك
ضحكت ام صقر والعنود وبداخلهم مبسوطين مهما كبروا الا ان حبهم لبعض واضح كانت ام صقر تحب ماجد حيل لانه مربيته وماجد نفس الشي امه ماهي فاضيه لهم ولاعطتهم الحنان لانها مشغوله بجمالها المزيف ومكانتها بالمجمتع وهذا الشي اثر عليهم كثير خصوصا خالدورهف لان ماجد كانت ام صقر معطيته الحنان وغير كذا العنود اللي كانت له الاخت والام والزوجه الصالحه وللمعلوميه كان حبه للعنود جنون من يومها صغيره وهو يحبها ويتمناها وماتوقف هذا الحب بل زاد اكثر يوم كبرت تزوجت العنود وهي باخر جامعه وقف معاها وساندها تخرجت وتوظفت ومازال واقف معها كانوا مضرب مثال زوجين متفاهمين في كل شي
بالنسبه لخالد ورهف كلا يشبع فراغ عاطفته بطريقته رهف في السوق ونظرات الاعجاب من الشباب اللي تشبع غرورها وعاطفتها وخالد بالنت ومكالمات البنات وكأنهم نسوا القيود اللي تمنعنا من هذي الافعال وان فيه نهايه لكل فعل مشين وخارج عن حدود الشرع
/
/
/
الريم وهي تتقلب على سريرها : اف خلاص اعوذ بالله ابي رتاح روح من بالي
كان الموقف تارك اثر في نفسها ماتدري ليه ؟ اذا سلطان صارلها نفس الموقف واقوى لانها اصدمت فيه نست بعد ساعات وش معنى صقر اللي صورته المشوشه ماراحت من بالها ، ماتذكر ملامحه لانه كان جالس باول المجلس وغير كذا دموعها شكلت غشاء والتوتر اثناء الموقف كل هذا منعها من شوفته
/
/
/
بجهه ثانيه منسدح على سريره بعد ماحاول يقرا الاوراق لكن فشل ماهو قادر يركز صورتها في باله مامتحت حط يده على راسه وجلس يفكر : الريم من وين طلعتي لي انتي ؟
سكت شوي ليه ماتكون من ضمن خطتي اصلا أي شاب يشوف هذا الجمال اكيد بيتأثر يعني طبيعي اني افكر فيها
ليه ياصقر ماتقدر تقول انه بدايه حب ليه انت سلبي ؟؟
بعدين قرر يمر على الجازي ويسولف معها شوي
/
/
/
جراح : ياخي ازعجتني كأنك اول واحد معه زوجه ولد
ماجد وهو يحط يده على كتف جراح: اجل شد حيلك انت وتزوج وبتشوف اذا ماصرت مثلي واخس
جراح : فال الله وفالك اصير بيتوتي مثلك لا ياشيخ
اصلا مقررين انا وصقر مانتزوج نبقى عزاب يازين الحريه
ماجد : انتوا الخسرانين يالله القا بكره زوجتي بالسياره تحتريني اكيد بخاطرها تقول علامه تأخر هو راح يجيب كيك ولا يغازل هع هع
جراح : الحمدلله اني ماني متزوج ناقص هم انا كفايه المعجبين اللي مأذيني
ماجد : مافيه فايده منك بروح احسن
جراح : الله معك
تلاقوا بالصدفه عند محل وهم راجعين من بيت ابو ماجد وكانت صدفه حلوه اجمعت روحهم الاحلى
علاقة ام ماجد بالعنود عاديه يعني مجامله فقط والحين في بالها خطه لازم تتقرب منها شوي
سألت عن رهف اللي كانت هايته للحين وقالت لها انها نايمه عشان تتجنب المشاكل مع ماجد العنود طبعا استغربت بس سكتت
/
/
/
فتح باب جناحه كان جالس مع امه وحبتهم ياخذون راحتهم بس تفاجأ بانوار الجناح كلها مسكره ونور خفي يخرج من غرفته ، خاف لايكون وضحى تعبانه , مشى خطوات سريعه وهي ينادي بأسمها
عبدالله : وضحى وضحى
راح لغرفه النوم وشاف الظلام مغطيها بس الشموع مشتعله في كل ارجا الغرفه بشكل رايق ويبهر حط يده على قلبه وابتسم : ماتجوزين عن حركاتك ورمنسيتك اللي تسحرني اكثر واكثر
وضحى وينك ياقلبي ترى بطريقتك هذي توحشيني حيل لاتجنيني وينك؟؟؟
للاسف مافيه جواب
اتجه للتسريحه لقا كرت احمر مغلف بطريقه فنانه
مكتوب عليه
احبك .. احبك
التفت لي تلقاني ظلك لو بغيت
تلقاني حزنك لو بكيت
تلقاني فرحك لو ضحكت
احبك زوجتك ومحبتك / وضحى
ابتسم والتفت وراه لقى الانسانه اللي اسرته بحنانها بعفويتها وطيبتها بصبرها لقاها وهي مسنتده على الباب يدها على خصرها وميله راسها وكل شعرها مال معها شعرها اللي يسحره بلونه الكستائي وراسمه ابتسامه ذوبته كانت لابسه فستان قصير ولونه اسود وحيل ناعم وماسك على جسمها الرشيق
عبدالله قرب منها وهو يهمس : حبيبتي فاجأتيني ربي لايحرمني منك
وضحى : تستاهل يانظر عيني
عبدالله : احبك ربي يسعدك مثل ماتسعديني
وضحى : وانا اكثر تعال تعشى لاني شفتك ماتعشيت
وهو فعلا من كثر ماتكلمت امه انسدت نفسه ولاتعشى زين
مسكت يده اليمين واخذ يده اليسار وحطها على كتفها
عبدالله : وين رايحه ؟
وضحى : تعال مسويه لك اكل خفيف
افتحت غرفه الطعام وكانت الطاوله فيها شموع مصففه بطريقه روعه على شكل قلب ومن داخلها الاكل اللي مسويته اصناف كثيره وكلها يحبها تعرف من عشرتها معه شنو يحب وشنو يكرهه وشغلت موسيقى كلاسيكيه
ضمها لصدره وهو يحمد ربه ان الله رزقه بوحده مثلها
/
/
/
الجازي :تفضل
صقر دخل غرفه الجازي اللي كانت عالنت تكلم صديقتها والتفت شافت صقر واستغربت من شكله كذا مهبذل وحالته توحي انه يفكر في شي
صقر : وش تسوين ؟
الجازي : اكلم ريناد صديقتي عالماسنجر لحظه استأذن منها الله يرجها مع سوالفها اللي ماتنتهي
صقر ابتسم وبادلته الابتسامه
الجازي سكرت الاب توب وجلست جنبه وفي راسها علامه استفهام
: خير صقر تعبان ؟
صقر : لا بس بغيت اقولك بكره فيه عشا عند عمي
الجازي : ايه قالت لي امي قبل لاتنام
صقر : بغيت اسألك ؟
الجازي : اسأل وانا اختك ؟
صقر :كيف علاقتكم مع عمي ؟
الجازي سكتت بعدين قالت ماعلي منه بخورها دامه سأل : بصراحه طيبه وعمي كان يزور ومايقصر بس احنا اللي قطعنا
صقر وهو رافع حواجبه مستغرب : ليش؟
الجازي : لان خالي ابو ماجد كان يهاوش امي ويقول كلام مادري شلون
فهم صقر وحب يغير الموضوع : طيب بكره ابيكم تحاولون تتقربون منهم وان شاء الله ترجع الامور مثل اول واحسن
الجازي بفرحه : ان شاء الله عاد تصدق انا متلهفه على الريم حيل طيوبه والعنود اختي كله تمدحها ومفتخره فيها في المدرسه لانها من الاوائل
صقر وهو يجاريها : بالله ؟؟
الجازي بعفويه : والله واللي مونسني انها هذي السنه اخر سنه وبتجي معي في الجامعه يعني بتكون علاقتي معها قويه باذن الله
صقر : ماشاء الله حسبتها يوم شفتها انها توها باول ثانوي
الجازي وفتحت عيونها : شفتها؟
صقر ارتبك : لا ههه شكلي اخرف وش شفتها ؟ لالا عن اذنك يالله بروح انام وراي دوام
الجازي باستغراب : نوم العوافي
يوم طلع ضرب راسه : وش بلاني خربتها ؟
الجازي : اقص يدي اذا ماشافها وخبلته اكيد انها حلوت اكثر بعد ذي الغيبه .....
/
/
/
شوق وهي عالنت وتقدم مشاركات في المنتدى وكانت فاتحه الماسنجر و مافيه احد متصل بعد دقايق تم تسجيل الدخول من دنيتي على كيفي امشيها :
فرحت حيل لانها متعرفه عليها قبل شهر من الامتحانات عن طريق المنتدى
علمتني كيف احب علمني كيف انسى:
هلا بك وش اخبارك ؟ بشري وش سويتي بالامتحانات ؟
دنيتي على كيفي امشيها :
اهلين شوق انا تمام دامني خلصت الثانويه الا انتي وش مسويه؟
علمتني كيف احب علمني كيف انسى :
تمام الحمدلله والله احاتي النتيجه مدري كيف النسبه !!
دنيتي على كيفي امشيها :
ههههههههه >> اخر همها
علمتني كيف احب علمني كيف انسى :
ليش ؟ ماتبين تخشين جامعه ؟
دنيتي على كيفي امشيها :
عادي والله.. الا انتي وين مختفيه ماتشبكين ولاتعطينا وجهه ومقاطعه المنتدى والماسنجر حشى كل هذا عشان الثانويه العامه
علمتني كيف احب علمني كيف انسى :
كانت مستغربه من اسيل هذا اسمها طبعا
ايه وامي خذته عشان انتبه لدروسي
دنيتي على كيفي امشيها :
الله يعينك ، بزر انتي تعاملك كذا
علمتني كيف احب علمني كيف انسى :
لا عادي بس حريصه علي
واستمرت المحادثه لين اذن الفجر وراحت تصلي وتنام وهكذا حياتها ايام العطله
/
/
/
ليان :لايكون زعلانه للحين ؟
الريم : لا الله يهداك بس عمي وهله بيجون الحين ومختبصه شوي
ليان وهي بخاطره تعرف وش ردها : طيب اخليك وان شاء الله اكلمك وقت ثاني
طبعا كان الكل معزوم وضحى وزوجها ولافي وهله باستثاء ابو ماجد اللي كان متضايق بس فهمه صقر ان كل شي بيعجبه بس يصبر شوي وصقر شاف انه ماله داعي يجي اصلا وهو مانعزم
يعني بتكون العزيمه عائليه
/
/
الجازي : خلاص يمه هذاني خلصت
ام صقر : الله يهداك تأخرنا صقر معصب
الجازي : الله يستر بس خلني اضبط الاخلاق عنده شوي
نزلوا تحت وكان صقر معصب فعلا ومحتاس مايدري ليه : بدري حضرتك كان جلستي اكثر؟
الجازي وهي تبلع ريقها : الله وش ذي الكشخه ياصقر ناظرت امها
ماصدق معرس
ام صقر : اذكري الله لايجي اخوك شي من عيونك؟
الجازي : لا اله الا الله
وقف صقر وهو مبتسم ابتسامته المعهوده لانه عرف انها تبي تروقه شوي : يالله مشينا
الجازي في نفسها : اشوى هتلر ماعطاني كلمتين تخرب مزاجي