[morano]

×× أهلــــي هم نقطة ضعفــــي ..

أمــي .. أبــوي .. أخوانــي .. مغرقيني حنان وعطف ودلال .. ولو قسوا علي بلحظـــه ،، حنوا علي بباقي اللحظات؟؟؟

وكيف مايعطوني كل هالأهتمام وأنا بنتهم الوحيده من بعد وفاة (وجــــدان)؟؟
وجدان هي أول شمعه نورت هالبيت وأول شمعه أنطفت من ثمــــان سنين..
وأنشاءالله كل شموع البيت تظل منوره العمر كله لأني أحبهــــم وماأتصور هالبيت يخلى منهم ..<سطــام / صالــح / سعد / فــارس > هم شموع البيت ××..




################



دخلت وتيــن للكليه وهي تمشي بأتجاه القاعه وشايله بيدها الجوال تبي تتصل على صديقاتها تشوف وينهم وبيدها الثانيه شايله كتاب صغير.. ألتفتت على صوت عآلــــــي يناديها من بعيد..

"ألتفتت وتين": أهلين صفاء توني بأتصل عليك إنتي والبنات..

"صفــاء وهي تلتقط أنفاسها": تعالي معنا بسررررعه اللفـــت اللي بجنب الكافتيريا قفل على بنت وكل الطالبات والموظفات والمشرفات واقفين عند اللفت..

"وتين وهي حاطه إيدها على فمها ومتفاجأه": يالطيف لايكون قفل على وحده من بنات شلتنا..؟؟

صفاء: لأ الشله كلها واقفه عند اللفت ينتظرونا.. يالله تعالي معي بسرعه نشوف وش صار عالبنت..

"حطوا رجولهم وتين وصفاء وهم يركضون للفت ولما وصلوا تفاجأوا بأشكال الموظفات والمشرفات وهم لابسات عباياتهم ومغطيات وجوههم ويبعدون الطالبات من اللفت"..

"وتين وهي حاضنــه شنطتها وتقرب لصفاء من زحمة الطالبات": وش صاير ليش الموظفات لبسوا عبايات؟؟

"صفاء وهي ترفع جسمها وتحاول تشوف": ماأدري بس الظاهر إن.......

"سكتت وهي تسمع الموظفه تصرخ بصوت عالي": ياطالباااااااااااات أدخلوا للقاعات بسرعه.. بيدخلون رجال الأمــن ورجال الأسعـــاف يفتحون اللفت ..

"هديل وهي تصفق بحمـــاس وتجي بجنب وتين": ونااااااسه بيدخلون كليتنا رجال امـــن هههههههههههههههههههههههه..

"وتين وهي تضرب هديل على رأسها": يادبه إنتي وينــك جالسه أدورك من بين البنات.. خفت يكون اللفت قفل عليك!!

"صاحت هديل": لييييييته قفل علي عشان يصير شوية أكشن بس قهر قاعتنا تحت مو فوق آآآآآآه..

"وتين وهي تحط جوالها بالشنطه وتحضن الكتاب الصغير": الحمدلله والشكر مجنونــه.. هذا بدل ماتقولين الله يساعد البنت اللي بداخله وتكون بخير..

"هديل بلا مبالاه": مو أول مره يقفل اللفت دايم يقفل ويفتحونه الموظفات وتطلع البنت منه بخير بس أنا مستغربه ليش مافتح معهم هالمره...
"سكتت ثواني وناظرت بيد وتين وهي تسألها" وش هذا الكتاب اللي بيدك؟

"أبتسمت وتين": هذا كتاب يفسر الشخصيات صارلي يومين أقرأ فيه ومابعد أنتهيت منه مره مره حلو ..

"هديل وهي تضربها من كتفها بحماس": حركاااااات صايره مثقفه من متى؟

"وتين وهي تعلي صوتها عشان تسمع هديل بوسط أزعاج الطالبات": أي ثقافه أنتي تدرين إني ما أحب أقرأ كتب بس الفضول ذبحنــي..

هديل: لقيتي شخصيتــي؟

وتين: لأ مالقيت ألا شخصيات أخوانــي..

هديل: طاح حظك أنتي وأخوانك من حلاتهم عاد..


"صفاء وهي تلتفت عليهم": بس أنتي وياها هذا وقته خلونا نشوف وش آخرة الفوضــى اللي صايره بالكليه اليوم..


"دخل مدير حركة الباصــــات وهو لابس بشت ويمشي وراه أثنين من رجال الأمـــــن بلبسهم الأخضر وهم ماسكين آلالات بإيدينهم ووراهم يمشي موظف بالكليه وماسك بيده جهاز أسود يكلم فيه وكلهم رايحيين لجهة اللفت..

صرخوا الطالبات صرخه وحده والبعض يصفق والبعض يصفر بصوت عآلــــي والبعض يضرب الزجاج بقوه وكأنهم جماهير..
وأشكالهم فعلآ كأنهم جماهير لأنهم بالمربعات اللي داخل المباني ويفصلهم عن الرجال حاجز زجاجـــي.. وبعض الطالبات أنحبسوا داخل دورة المياه اللي قبال اللفت وعجزوا يطلعون من دخلوا الرجال "..


"صفاء بخوف": يمااااااه مومعقول اللي قاعد يصير أحس إني بحلم..

"هديل وهي مسنده جسمها عالزجاج": حسااااافه ولا واحد شكله حلو!!

"وتين وهي تضحك": هذي حركه مقصوده ههههههههههههههههههههههههه هههههههه..

"هديل وهي تضرب يدها بيد وتين وتضحك": الظاهر كذا وإلا خلصوا رجال الأمن المزين نبي نكحل عيونا على هالصبح ههههههههههههههههههههههههه هههههههه..

صفاء: سمعت بنات يقولون إن اللفت قفل عليها من الساعه 7الصبح وإلحين الساعه 8 يعني صارلها ساعه كامله بداخله..


"دخلوا رجال أمن أثنين_واحد فيهم حاطه إيدينه بأذانـــه من أصوات التصفير والصراخ والتصفيق.. والثاني منزل رأسه بالأرض ويناظر بجواله يتحاشى نظرات البنات"..

هديل: ياحليلهم مؤدبـييييييـن ما يناظرون بالبنات..

وتين: وإنتي الصادقه طالبات الكليه ضيعوا الحيا وصاروا الرجال يستحون أكثر منهم..

هديل: غصب عنهم يستحون وبعدين الطالبات يتصرفون كذا لأن المكان ضيق وزحمه.. والله لو توقف الطالبه قدام رجال الأمن بلحالها تنخرس ويطيح عليها الحيــــا..


"توزعوا المشرفات داخل المباني وهي يصرخون عالطالبات ويحاولون يفرقونهم ويبعدونهم عن اللفت"..

"وتين وهي تناظر الساعه": يالله بنات باقي عشر دقايق وتبدأ المحاضره خلونا نروح للقاعه..

صفاء: أنتظري شوي مافيها شي لو تأخرنا خمس دقايق..

هديل: مابي أدخل المحاضره أبشوف وش يصير مع البنت..


"صرخت الموظفه بوجه وتين وهديل وصفاء وهي تأشر": تحركي عالقااااااااااااااااااااا عــه يـــاطااااااااااااااااااا البــــــه!!!!!


"مشوا بالممر وعيونهم معلقه بالزجاج ودهم يعرفون وش صار.. ألتفتت هديـل على وتين وهي تأخذ الكتاب وتقول": دام هذولا رجال الأمن الشيف اجل هونت ماأتمنى نفسي مكان البنت..

صفاء: ياقو قلبك ياهديل حتى بوقت المشاكل مايفوتك شي تركزين على كل صغيره وكبيره..

"هديل وهي تلتفت على وتين": فسري شخصيتي من هذا الكتاب ..

وتين: قلت لك مالقيت إلا أخواني..

"هديل وهي توقف وتحط أيدها على خصرها": ترا ذبحتينا بأخوانك ماصارت عاد.. يله أشوف قولي لنا وش قرأتي عنهم؟؟

"وقفت وتين وهي تسند جسمها عالجدار": امممممم سطــام [شخصيته شرقيــــه] والطبيعة الشرقيه فيها جديـــه ومسؤوليــه .. ودقيق مره يهتم بالتفاصيل ..
روتينــي ومايحب التغيير.. ويحب المساواه بعلاقاته مع الناس وما يفضل شخص على الثاني ويـ......

"قاطعتها هديل": لحظه لحظه وش فيك أنطلقتي بالحكي** طيب فهمينا وش هذا شرقي؟؟ أنت من أهل الرياض وسط المملكه وش جابكم للشرقيه؟؟

"أنفجرت وتين بالضحك وهي تجلس عالأرض وتحط شنطتها بحضنها": ههههههههههههههههههههه لأ لأ لأ لأ انتي فاهمه غلــط!!!

"هديل وهي تجلس": فهميني ..

وتين: فكرة الكتاب مقسمه لأربع أتجاهات (شمال/شرق/جنوب/غرب) مــو على خريطة المملكه ولا على خريطة العالم.. هي على أفتراض وجود أربع تجمعات من الصفات الأنسانيه للبشر ومختلفه وراثيآ..

"هديل بإستهزاء": يعني بكذا فهمتيني صرتي تحوسين بزيــاده..

"صفاء جلست وهي منجذبه لحكي وتين": توته كملي تحمست أعرف أكثر..

وتين: المقصود أن فيه صفات معينه صارت مقبوله ومعروفه على أنها من ناس بمنطقه او حضاره معينه وهذا ماله علاقه بالمكـــان ابدآ..

هديل: ألحين بتقنعيني أن ملاييييييين الناس بأربع شخصيات أو أتجاهات مثل ما تقولين؟؟

وتين: مثل مافيه ألوان وصبغات محدده للشعر(أصفر وأحمر وأبيض وأسود)وألوان العيون (أسود وأخضر وبني وأزرق) ولون بشره ثآآآآبت مستحيل يتغير ..
كذا الشخصيات تقسمت لأربع أنماط فيها صفات محدده إذا لقيتي كل هذي الصفات بشخص أو بعضها تقولين عنه ان شخصيته[شماليه] أو [جنوبيه] أو [غربيه].....

هديل: أبسوي نفسي فهمت عشان ماتتعبين وأنتي تشرحين لي..

"وتين وهي تفهمها":هدوله ترا سهله وما يبي لها فهم.. كل شخصيه لها وظيفــه تعبر عنها وأقصدالرجل اللي أشتغل بمجال عن قناعه وحب أو أن الظروف سيرته بس بالنهايه لقى نفسه راضي ومرتااااااااح..

"صفاء وهي مبسوطه": واااااااو وناسه يعني نقدر نفهم اللي حولنا بسرعه..

"هديل وهي تغمز لوتين بعينها": أكيد تبي تعرف شخصية اللي بالي بالك..

صفاء: ههههههههههههههههههه كاشفتي على طول..

هديل: طيب كملي ياوتين وش عرفتي عن أخوانك بعد؟؟

وتين: سطام شخصيته الشرقيه حيل تشبهه وخصوصآ أن عمره 31سنه ويشتغل مهندس معماري بشركة انشاءات معماريه ..
أما صالح شخصيته غربيــــه بحته أجتماعـي بالدرجه الأولى وعفــوي وحيــوي ودمه خفيف يحب التغيير والتجديد ويكره القيود بس مشكلته انه مايعطي أهميه لمظهره وهندامه
يعني الثوب والشماغ يلبسهم بالمناسبات بس وغيره مستحيل..

هديل: سبحان الله قمة التناقض بينهم .. طيب صالح وش يشتغل وكم عمره؟

وتين: عمره 24 سنه موظف بشركه بالمطار المدني وطبعآ وظيفته عاديه لأن ما عنده إلا شهادة الثانوي .. صالح فيه لقافه عجيبه غريبه يمووووت بالمشاكل وحقه وحق غيره مايضيع أندفاعـــي حيل ويحب المغامرات..

"هديل وهي تناظر الساعه": يعني مثل مغامرتنا ألحين طنشنا المحاضره وجلسنا نسولف والساعه صارت 8ونص!!!

"شهقوا صفاء ووتين وهم يناظرون ببعض فجأه ويوقفون"..

هديل: وين رايحين خلااااااص المحاضره وفاتتنا بسبة وتين واخوانها.. خلونا نروح للكافاتيريا نفطر أزين...

#############




كان جالس فـــارس مع جده فهد بإستراحة الرجال بمستشفى الــ##### الحكومي بالملــز قسم (الأنــــف والإذن والحنجـــره) ينتظر دوره عشان يدخل عند الأستشاري ..
فارس يشتكي من ضعف شديد بالسمـــع من فتره طويله ويستخدم سماعات طبيه للسمع..

أبو سطام: صارلنا ساعه كامله وإحنا ننتظر ..

فارس: عادي جدي إحنا بكل موعد ننتظر ساعه وأكثر بعد..

أبو سطام: ياولدي أخاف إنك جيعان وإلا عطشان قم إنزل للبقاله تحت أشترلك فطور سنع يشبع بطنك..

"فارس ويحاول يبتسم": أنا شربت حليب قبل أجي للمستشفى..

أبوسطام: حليب مايسد الجوع.. طلعنا من البيت الساعه ثمان وماوصلنا المستشفى إلا تسع من زحمة السير وألحين الساعه عشر.. قم ياولدي ترا مو زين لصحتك..

فارس: أبشر ياجدي بس نطلع من عند الأستشاري أشتري فطور وأعتقد ماراح نطول عنده..


"نادت النيرس بإسم فارس ومشى مع جده وراها لعند الممر الخاص بقسم تخطيــــط السمـــع"..

"فارس بملل": وين ماخذيني مابغى أسوي تخطيط للسمــــع..!!

"صــد وهو يتأفف وألتفت عليه جده ويحاول يقنعه": ماعليه هالتخطيط بينفعك بكره يتحسن سمعك وتصير تسمع عدل مثل أول وأحسن..

"تضايق فارس من تفكير جده المحدود": التخطيط يقيس درجة السمع مايحسنه..!!!

أبو سطام: مايخالف ياولدي هذا بيفيدك..

فارس: ماصارت بكل موعد تخطيط والله ملييييييييييييت..

"أقبل عليهم أخصائي السمع Audiologist وهو ماسك أوراق بيده ويأشر لفارس يدخل غرفة التخطيط..

دخل فارس وجلس عالكرسي ورمى السماعات اللي بأذانه وحطها بيده..
وقف الأخصائي وهي تثبت السماعات الكبيره على راسه ويعطيه الجهاز بإيده..
تكلم بصوت عالــــي مره عشان يسمع فارس": تسوي زي كل مره يافارس أول ماتسمع الصوووووت تضغط عالجهاز اللي بيدك على طول تمــــــــاااااااااااام إنت ساااااامعنــــيييييييي..؟؟

"هــز فارس رأسه و بخاطـــره": حفظت هالحركه ثلاث سنوات وأنا أضغط بالجهاز ولا طلعت بنتيجه..


( فارس كان يعاني من ضعـــف بسيط بإذنه اليســرى فقط من وهو صغير بسبب أصابته بحمى "الحصبه".. لكن أهله ماتداركوا المشكله إلا من ثلاث سنوات وبدأ علاج ..
ومع الأيام تدهورت حالته وصار الضعف بأذانه كلها سواء..

وأول مابدأ علاج أعطوه المستشفى سماعات طبيه وكان مبسوط فيها وقتها بس مع الأيام صارت تزعجـــه كثير وتسبب له أحراجــــات مع الناس )..

"الأخصائـــي وهو يأشر لفارس بيده من ورا الزجاج بحركه يعني": أضغط عالجهاز..

"فارس كان مرتخي بجلسته وسرحــــان يناظر تحت ويضغط بأصبعه عالجهاز بعشوائيه حتى بدون مايسمع الصوت.. عدل جلسته وهو يتنهد ويتمتم":
والله أذني أنفجرت من الأصوات اللي اسمعها ماعاد أقدر أركز صار يتخيلي صدى الصوت** وأنا أضغط عالجهاز ومو متأكد إذا فيه صوت وإلا لأ....
ألحين من أطلع من الغرفه توديني عند الأستشاري الغثيث اللي حافظ كلامه أكثر من دروسي ولاجديــــد كالعاده..


"أشر الأخصائي لفارس ينزل الجهاز من رأسه ويطلع من الغرفه.. حط سماعاتــه بأذانه وطلع يمشي ورا جده والأخصائي لغرفة الأستشاري"..


"الأستشاري أسماعيـــل وبعد ماأخذ الأوراق من الدكتوره وجلس بمكتبه": كيف حالك يافارس إنشاءالله تمام..

"مـــا رد عليه فارس وحط إيــده على خده يناظر الأرض.. يمكن ماينـــلام على تصرفاته لأنه وصل لدرجة المــلل واليأس ،، وأي شاب بعمره ماعنده (صـبـــر وطولة بــال)
شي طبيعي يتصرف كذا مع اللي متأمل يساعدونه وينهون مشكلته بعد رب العالميــــن"..

"أبو سطام وهو مبتسم ويحاول يرقع لفارس": والله يادكتور الولد جاي مواصل من أمس مانــام وإنت تعرف هالطلاب من تجي الإجازه يتخربط وقت نومهم ولا جت المدارس عقب تعدل ورجع زي أول..

"ماأهتم الدكتور لكلام أبو سطام وقال وهو مندمج يناظر الأوراق": يافارس .. أنت تحس بدوخه أو تسمع طنين..؟

فارس: لأ..

د/أسماعيل: يطلع من أذانك إفرازات؟

فارس: لأ..

د/أسماعيل: تعطس دايم وتحك أنفك؟

فارس: أحيانآ..

"سكت ثواني د/أسماعيل ورفع راسه موجه كلامه لفارس": زي ماأنت عارف إن ضعف التوصيــل في السمع في أذانك هي المشكله اللي إنت تعاني منها ومن التخطيط اللي قدامي بين إن نسبة الضعف زادت شوي و مـا........

"قاطعه فارس بإنفعال": كل مره يضعف أكثر من المره اللي قبلها وش الحل..؟؟؟

"ماجاوبه الدكتور ولا أهتــم لإنفعالــه وكمل وهو يعدل نظارته": إحنا ناقشناك من قبل بخصوص إجراء عملية (قطع العظم الركابي) بس للأســـف،، حالتك كرمالها وتسوء والعمليه ماراح تنفع للي بعمرك..
أستمر على أستخدام السماعات حاليآ وأعتقد إنها حل مؤقت لك وووو... وإنشاءالله خير...

"صــد عنه فارس وأخذ نفس عميــــق وهو يضرب بيده على رجلــه بقوه..
ألتفت عليه جده وطبطب على كتفه ويحاول يهدي منه": ماعليه ياولدي أصبر لما يفرجها ربك قل الحمدلله على النعمه اللي إنت فيها ترا غيرك يتمنى ربع اللي إنت فيه..

د/أسماعيل: راح أعطيك موعد بعد شهرين وإنشاءالله تتحسن حالتك للأفضل..

"قام فارس وطلع من الغرفه حتى بدون مايستفسر عن الموعد أبدآ وبخاطــــره": ماتتحسن طول ماأنتم بالبرود واللامبالاه 3سنين وحالتي من سئ لأسوء ولانفعتوا بشي؟
والله لو إني واحد من قرايبكم كان حطيتوني فوق روسكم وحطيتوا أحتمالات كثيره لتحسن سمعي........

"ألتفت فارس على جده اللي مسك إيــده وتعابير وجهه تدل على الحزن والضيقه لحالة حفيـــده": تعالي ياولدي خلنا نآخذ ورقة الموعد الجاي..
"أخذ فارس نفس عميق وهو يناظر فوق": يــــارب ترحمنــــــــي ..


..× فــارس 17 سنه .. يدرس ثاني ثانوي "أدبي"..
توفوا أمــه وأبــوه بحادث من كان عمره تسع سنوات وتكفل جده بتربيته وعاش في بيت جده اللي هو أبو سطام..

فراق وجــدان صدمهم وحطمهم ولما تجاوزوا الصدمه كان فارس كل همهم بالبيت لأن عمامه خارج الرياض وجده وجدته لأبوه متوفين..
و برغبه من أبو سطام وأختيار من فارس أنه يعيش عندهم صاروا يعاملونه كــ أخ مو ولد أخت ويلاقي نفس الحب والأهتمام والدعم وحتى القسوه والشده عشان ما يصير فيه غيره بينه وبين سعد وفارس متفهم لهالشــي ..

فارس ذكــي ولمــاح وقلبه طيب وحنوووون.. قلبه وعقله أكبر من عمره يمكن لأنه أكتسب صفات كثيره من سطام وصالح وتأثر فيهم لدرجه لاتوصـف وصارت شخصيته مزيج من الهدوء والعفويه والإندفاع ×..