دخلت الغرفة وانا هلكان الدوام يأخذ كل وقتي ومن قضيه لقضية ... دخلت أخذ شاور و انا أفكر بالبيت حاله مو عاجبني الكل مشغوول بنفسه ولاحد يعرف عن الثاني شيء الا ماندر .. يعني فرقد لها عالمها الخاص وعليها اسلوب لك عليه واللي مساعدها إنه ابوي يوقف بصفها حتى لو كانت غلطانه إما فداء كائن مسالم بها البيت مالها بالمشاكل وكثير ارتاح ليما اسولف معها وحمد مشغوول بالدوام بالشركه مع الوالد وبيته وزوجته امافيصل اغلب اوقاته سهر وطلعات وعنده الجامعه تشغله أما أثير وعبدالله بعدهم صغاار وهم اهتمام امي أكثر شيء ومشغوولين بالدراسه او الطلعات مع أصحابهم
اما عمتي الشوق عنصر غامض بالبيت مع اني كثير اسوولف معها بس مع ذلك عندها سر تخفيه عناا والسر يتعلق بعلاقتها مع ابوي وانقطاع الحوار بينهم الا ماندر و جلوسها عندنا وماتروح بيت عمي عبدالعزيز الا بعض الاوقات وقليل
طلعت من الحمام وقفلت باب الغرفة ما ابغا ازعاج اعرف الوالده الحين بتجي قوم تعشى مايصير ومن ها الكلام انسدحت على السرير ورحت بنومه ما حسيت بشيء من التعب
رجعت الشوق وفداء من ملكة سارة على الساعه 10:30 بعد مادخلوا الصاله شافوا أثير قاعده قبال التلفاز
أثير التفت لهم : هاا وصلتوا من وين جااين
جلست الشوق على الكنبه بينما فداء صعدت غرفتها .. ناظرتها أثير وهي تصعد درجات السلم وكلمت عمتها : شفيها
الشوق وهي تفك طرحتها : ابد مصدعه اشويه .. ويش قاعده تشاهدي
أثير رجعت نظرها للتلفاز : فلم
الشوق : اهااا ... طيب ويش صار على الجمعه استانستوا او لا
أثير : لافليناها على الأخر
الشوق ابتسمت : تمام ... بس لا تتأخري وراك مدرسه
أثير : اشوي وبقوووم
قامت : اخليك بروح اريح تصبحي على خير
أثير : تلاقي الخير عمه
صعدت غرفتي غيرت ملابسي ومسحت المكياج عن وجهي لبست بيجاما و انسدحت على السرير خذني التفكير لملكة سارة وكيف كانت مستحية ومبسوطة بنفس الوقت الله يوفقها .. تذكرت كلام الحريم يوم شافوني انا وفداء كل وحده تقول خوات ومن أي عايله انتوا وناظرتهم بعد مانقول اسم العايله صحيح اسم يهز له قلوبهم بس ويش فادني فيه ولاشيء .. حتى استغربوا يوم قلت اني صاحبة سارة ... ظليت بأفكاري ليما رحت بالنوم
كانت فرقد جالسه بغرفتها بعد مارحت صاحبتها غرام جالسه على صفحة الدردشة بإسم (حنين )
حنين : طيب اصحابك شنهو سوا إلك بعد المقلب
فتى الجنوب : ههههه ... الله لايوريك كفخوني ليما قالوا بس وبعدها حاربوني يومين
حنين : تستاهل اجل هذا مقلب تسويه فيهم
فتى الجنوب : شسوي احب المقالب ومن الطفش اسويها فيهم... بعد فتره
فتى الجنوب : الحين بسألك من متى وانا اسولف معك ولاقلتي شنهو اسمك
فرقد بدا با اللإسئله رديت عليه : اسمي ريم
فتى الجنوب : عاشت الأسامي ياريم .. وانا علاء
فرقد بقرف : ياشين الأسم وييع يجيب اللوعه
حنين : يجنن أسمك
فتى الجنوب : انتي الي تجنني فديت روحك
حنين : تسلم
فتى الجنوب : الإ بسألك انتي ماوراك دوام بكره
حنين : الا ... بس ماعندي الإ الساعه 10
فتى الجنوب : اهاااا
صباح يوم السبت
جلست الساعه 5 الفجر دخلت الحمام اخذ شاور وبعدها فرشت السجاده وصليت الفجر ولبست ملابس الجامعه من قميص سماوي وتنورة سوده لبس الجامعه وكل ذا أخذ من وقتي ساعه الا ربع ناظرت الساعه 5:45 باقي ساعه على الدوام محاضراتي ماتبدا الا 8:30 وقفت جنب المرايه ومشطت شعري ورفعته ذيل حصان وبعدها حطيت البودره والكحل وغيره مع اني ما حب أحط مكياج كثير بس بعض الأحيان للتغير ويخفي أثار التعب من مذاكره وغيره .. جهزت أغراضي ونزلت تحت شفت الكل مجتمع على الطاوله عدا فرقد وجهاد ونجود زوجة حمد
جلست بعد ماسلمت وبست راس ابوي وأمي .. بديت أكل بهدوء وانتبهت للوالد ينادي عمتي الشوق
بوحمد : الشوق
رفعت راسي بعد ماسمعت أسمي من بوحمد يناديني وذا من النادر طبعاً : سم
بوحمد بعد ماقام من على طاولة الطعام : اذا خلصتي تعالي المكتب
ناظرته متجه صوب غرفة المكتب وقلت ببالي الله يستر ناظرت الي جالسين شفتهم يناظروني ابتسمت وقمت بعد ما حطيت التوست الي ماكملت نصها واتجهت وراه
ناظرت عمتي الشوق الي ماكملت فطورها واتجهت للوالد المكتب وانا مستغربه شنهو الموضوع الي عند الوالد من الصباح ويبغا يكلم فيه عمتي
انتبهت لاأثير الي وقفت وقلت لها : بتمشي
ردت عليه : أي .. قمت معها لاان السواق الي بيأخذها المدرسه نفسه بيوصلني الجامعه سمعت الوالده تقول
ام حمد : شفيك يمه كملي فطورك
ابتسمت لها : الحمدالله .. التفت لاأثير : لحظه بس أنزل عباتي سمعتها تقول وانا أصعد الدرج : استناك بالسيارة
صعدت الدرج دخلت الغرفة اخذت عباتي لبستها ولفيت الطرحه واخذت كتبي وشنطتي ونزلت وماحصلت حد على الطاوله الا الوالده وحمد يسالفون اتجهت للبوابه وعدلت النقاب عند مرايه جنب الباب وبعدها طلعت وركبت السيارة
فداء : ها تأخرت
أثير: لاعادي
التزمنا الصمت فترة بعدها قالت أثير : تتوقعي شنهو الموضوع الي يبغا الوالد فيه عمتي
رديت عليها : مادري بس أتوقع عريس جديد ولاشنهو الموضوع الي بيخلي الوالد يكلم عمتي من الصباح وهو مايتكلم معها الا نادر غير سالفه عريس
ردت أثير : حتى انا اتوقع كذا سكتت طلعت كتابي أذاكر كم كلمه بمسافة الطريق بعد فتره قالت أثير : تصدقي شنهو شفت بيت صاحبتي
التفت لها بعد ماكنت اناظر بالكتاب .. كملت كلامها وبحماس وتعجب بنفس الوقت : شفت وحده مره تشبهك صحيح تشبهني بس الشبه بينها وبينك كبير يعني الي يشوفها يقول اختك
استغربت منها وناظرتها بإستفهام وكملت .. تصدقي حتى بعد ماطلعنا قلت لخوله شفتيها كيف تشبهني قالت لا اشوفها تشبه فداء مره
قلت لها بعد مارجعت نظري للكتاب : يخلق من الشبه أربعين
ردت عليه : صحيح بس سبحان الله با البداية ما هتميت بس يوم تكلمت حيست بشعور ماقدر اوصفه .. ناظرتها وقلت : مثل ايش
ردت أثير : مادري بس حسيت اني ارتحت لها وبنفس الوقت في شيء مخوفني منها كأنه حد يقولي أحذري تكلميها وتعطيها أي اهتمام
استغربت من شعورها المتناقض وقلت لها : طيب هي صاحبتك لو كيف
ردت عليه : لالا .. هي صاحبة وحدهمعنا وهي مو من هنا من جده على مااتوقع بس نزلوا الشرقية فتره وبعدها بيرجعوا واتوقع الحين رجعت بما انه دوام
قلت لها :طيب كيف شفتيها مع السوالف
ردت عليه : ماكانت كثير تسولف لانها خجولهبس اذا تكلمت تحسي كلامها منطقي وتعرف شنهو تقول .. يعني الكلمة الي تقولها تعبر لك عن كل كلامها
ضحكت عليها : أثير شفيك لايكون معجب فيها
ضحكت أثير : لاشدعوه ما احب هالسوالف بس بجد حبوبه وهاديه ... انتبهنا إن السواق وقف عند مدرسة أثير نزلت بعد ماسلمت عليه واتجه السواق لجامعة الملك فيصل ... وبعد ربع ساعه وقف عند البوابه ونزلت وبعد الأجرات اليوميه من قبل الأمن داخل الجامعه من التفتيش على الجوال والبطاقه واتجهت لصندوق عباتي دقيت على صاحبتي ياسمين اشوف إذا وصلت او لا ردت عليه بعد كم رنه .. هلا فداء
رديت عليها : هلابيك .. ها وصلتي
ياسمين : لسه دقايق واصله
رديت عليها : اوك اذا وصلتي عطيني خبر
ياسمين : اوكيه
في غرفة نايف
جلست من النوم بعد ما حسيت بالآلام تكسر ظهري ما قدرت ارفع نفسي على السرير التفت عن يميني حصلت نايف نايم قمت أناديه : نايف نايف آآآآه ناااااايف ... بس لاحياه لمن تنادي تقربت منه و حطيت أيدي على كتفه وقعدت أهز فيه : ناااااايف آآآآآآآآآه ناااااااايف تكفى قوووووووووووووم
جلس نايف مخترع وقرب مني ومسكني : أريج حبيبتي شفييييك شنهووو يألمك
رديت عليه واحس صوتي ماينسمع بس مادري كيف سمعني : آآآآآآآه شكلي بووولد
رد عليه : شنهو تولدي توك بالثااامن
سكت ومارديت عليه من الآلآلآم الي فيني حسيت خلاص مابقدر اوصل للمستشفى .... نايف مو عارف ويش يسوي قام من على السرير وبدل بيجامته على السريع ولبس الثوب ورمى الشماااغ على كتفه اخذ عباتي وقومني وانا اصرخ بداخلي من الألم ولبسني اياها ورمى الطرحه على وجهي مسكني ومشى بي برا الغرفه ويوم وصلنا عند الدرج حصل امه طالعه من غرفتها وجات لعندنا
ام نايف : يمه شفيها أريج
نايف ومو عارف ويش يسوي : شكلها بتولد
ردت عليه : شنهو تولد توها داخله شهرها الثامن
نايف : يمه مادري .. مسكيها على ماجهز السياره ... مسكتني خالتي ام نايف وهو نزل الدرج مسرع واختفى من عيني بعدها .. انتبهت لخالتي ام نايف تنزلني الدرج ومع نزلت الدرج حسيت اني بديت انزف بس تحملت النزيف والآلآلآم الي كلما لها وتزيد على آخر الدرج نادت خالتي على الخدامه وأمرتها تجيب الها العبايه ... انتبهت لزياد طالع من المطبخ وجا وجه بان عليه القلق وقال : يمه وشفيكم وشصاير
امسكتني خالتي واتجهت معي للبااب : افتح الباب يمه مرة أخوك جاها الطلق
اتجه زياد مسرع يفتح الباب وحصل بوجه نايف الي جا عندي مسرع ومسكني وأخذني اتجاه السيارة وتبعتنا خالتي ركبني بالخلف وقعدت جنبي خالتي اسمعها تسمي علي وتهدي فيني وانتبهت انه نايف مسرع بالسيارة بسرعه جنونيه حسيت ان النزيف بدا يزداد عندي وبعدها بديت افقد الوعي بس اسمع صوت خالتي من بعيد تقول : يمه لاتنامي اصحي ماصير يمه... فتحت عيني لاكن مسرع وغمضتها وجاني صوتها مره ثانيه من بعيييد وحسيته انه بعالم ثاني: يمه لاتنااامي فتحي وسمعتها تقووول يمه نااايف اسرع مايصير تفقد وعيها ماسمعت رد من نايف ولاخالتي بعدها ماعدت اسمع صوتها
دخل زياد الفله يبتسم ويقول بخاطره الله يسهل عليها أريج تستاهل كل خير أخذ له كوب كافي وبدأ يشرب فيه اشويه الاجواله يرن طالع المتصل و رد : أخيرا صحيت كل ذا نوم
ضحك الطرف الثاني ورد : شسوي من سهر البارح
زياد : عاد انت بدعت كل ذا سهر وسوالف كل ماقلت لك قووم الوقت تأخر قلت خلنا اشوي
..... :بعد شسوي سوالفك حلو
زياد : أي كذب علي المهم فطرت او لا
.... : لسه صاحي قلت اشوفك صحيت او لا
زياد : انا من زمان صاحي ... يلا افطر وشرف عندي خلنا نروح يادووب نوصل الجامعه
.... : اوكيه عطني 10 دقايق واكون عندك ... سلام
زياد : اوكيه .. سلام
كان جالس بالكرسي الي خلف المكتب أمرني أجلس قباله بعد ماجلست
بوحمد :كلمتك ام حمد بخصوص مشاري
حسيت ريجي ناشف و ما عرفت شنهو اقوول بس رديت : أيوه
بوحمد : انا كلمت عبد العزيز وهو قال شوف رأيها ... سكت اشوي وقال : شرايك انتي
سكت اشويه ورديت : الراي رأيك
بوحمد : اذا على رايي ابغا أزوجك اليوم قبل بكره وافتك من همك تدري بعد كم صار عمرك الحين وما أعتقد بيجيك خطاب بعد ها العمر
حسيت بخناجر تطعن بقلبي من الآهانه والتجريح الي حصلتها بكلامه بس سكت
كمل كلامه : بس مع ذاك مو أي حد يجي ندزك عليه وخصوصاً ذا لاانه مو من مؤاخيذنا وانا بقول لا ام حمد تقول لهم مالهم نصيب عندنا
سكت وانا احس براحه بداخلي رغم نزف جروحي بعد اهانته الي حصلتها بكلامه وسمعت يأمرني : خلاص قومي عن وجهي
أتجهت لغرفتي وانسدحت وانا مالي خلق دوام خصوصاً بعد التأخير فأفكرت اني ماداوم بالمره واستسلمت لدموعي تأخذ مجراها على خدي
لاتسأليني عن سبب كتم الآحزان .... بس اسأليني عن غيابي وحضوري
لاتسأليني عن سبب دمع الآعيان .... بس أسأليني عن دواعي سروري
لاتسأليني عن تصاريف الأزمــان ... أجامل أحبابي وربعي والأخـــوان
جبر الخواطر صار معنى حضوري ... أعطيهم الفرحه وأنا وسط الآحزان .... وأجبر كسور الغير وأهمل كسوري
كنت جالسه على الكراسي أنتظر ياسمين بعد مادقت وقالت انها وصلت عند البوابه ماحسيت الا بالي غطى اعيوني بديت اتحسس ايده بإيدي وسألت : مين .. بس ماحصلت رد خمنت في بالي تكون ياسمين وقلت : ياسمين عن السخافه .. ماحصلت رد كمان انتبهت لا أيد تمسك ايدي وتقومني قمت ومشيت فيني اشويه وقلت : يلامييين إذا ياسمين ترا راح أذبحك ... ماحصلت رد بعد ها المره وهي لسه تمشي فيني وحسيت انها تصعدني الدرج خفت وقلت : مين أنتي ترا إذا طحت يا ويلك مني .. بس ماسمعت إجابه وتوقفت عند الدرج وقلت : ما راح أصعد وريني ويش بتسوين
حسيت بوسه على خدي حاولت أفك ايدها وبعد جهد فكيتها والتفت خلفي وحصلتها تضحك
فداء : سخيفه
ياسمين تضحك : ياحلوك وأنتي خايفه
صعدت عنها الدرج وقلت : حركاتك سخيفه مثلك
لحقتني و زالت تضحك : شسوي أغير جو على الصباح
رديت عليها : تغيري جو على حسابي
ردت عليه : شسوي أحبك
ألتفت لها وقلت : لا تتكلمي معي
ردت عليه : اوكيه مو مشكله بشووف منهو الي بعد 5 دقايق بالكثير بتجي تكلمني
ألتفت لها و أبتسمت : وأنا أقدر
ياسمين : فديتك وفديت غمازاتك
ضحكت على خبالها : شو تتفدي فيني حتى لو أنك زوجي
ياسمين تضحك : هو يحصل مثل ها الحلى و مايتفداه أكيد غبي وعمي بعد وهذا إذا ما كان مجنون
ضحكت عليها : أقول تعالي لانتأخر على المحاضرة وننطرد بسببك
ياسمين : يلا
بإنتظار توقعاتكم ويش ممكن راح يصير من أحداث
تحيتي