[morano]

الحلقــــــــــــــــة الســــــــادسـة ..



(( 6))

صرخت عليها و نقزت تحت اشيل الخاتم ...طلعتها بعصبية : ما اتجوفين انتي...؟؟

شيخاني مستغربه مني و من عصبيتي: زين ما جفته "و اطالع الخاتم" و من وين لج هالخاتم اول مره اجوفه .!!
حضنته بكف ايدي و جني خايفه عليه: ما يخصج ..زين انج ما كسرتيه جان ذبحتج و الله..

طالعتني شيخاني بنظرات ما حبيتها .. قطع علينا هرن سيارة سعيد ...ربعنا صوب السياره ...
حمودي قاعد يحكي لابوه عن كل شي صار في الحفلة ...و سعيد يضحك مع انه مب فاهم شيء من الي قاعد يقوله حمودي..


حصه: سعيد باجر عليك دوام ..

سعيد: هي حبيبي ليش تبين تظهرين مكان اثرج اليوم ما قعدتي فـ البيت ..
حصه: هههههههههه حرام عليك سعيد ..مستكثر علي هاالطلعات ..

سعيد يرد عليها ابسرعه : فديتج و الله كنت اسولف ..امري جان تبين باجر بظهرين مكان خبريني و انا بظهر من الدوام و اخذج حتى لو كانت رومااا ..

شيخاني + شوق: هههههههههههههههههههههه

حصه تضربه بذراعه: سعيييييييييييييييييييييدا اااااااااااااااان

سعيد يرد راسه لورا و يضحك ابصوت عالي: ههههههههههههه شسوي فيج عيل ..

حصه اونها زعلانه: زين خلاص انسى السالفه " و اطالع برع "

حطيت ايدي ع خدي اطالع الدنيا برع و انا مستانسه من سوالف سعيد و حصه خذت نفس طويل ..باجر انا و وراشد جي بنكون نتضارب و نتراضي ...اتنهدت يا حلوه الحب ...

ضربت شيخاني طالعتها بسرعه:شووووووووووو

شيخاني: بلاج تتنهدين ..شو بتموتين..

رديت عليها ابسرعه: ما يخصج..
سعيد : بديناااااااااااااا

شيخاني: عفانا الله طالعه ع سيفاني..

رديت بعصبيه: محد غيرج يشبه سيفاني ... مالت عليه وع ..
شيخاني و كانها تتعمد تستفزني: أحســــــــــــن منـج و الله ملـيون مره..

بلعت ريجي بعصبيه و عقدت حياتي: سعيد جوفها قلها اتصخ عني ...كافي انها من شويه داست ..........."سكت ما بغيت اطري سالفه الخاتم .."

شيخاني: كملي ليش سكتي دست شو و انتي شو سويتي فيني زين ما ذبحتيني ..اقول حصه جان منسرق من بيت امج خاتم ترى شوق سارقتنه ..

حرجت عليها لانها بالغت: احترمي نفسج ... شو تتحريني شرااتج معروف منوه الحرامي الي ما يخلي شي في البيت الا سرقه ...نسينا ما كلينا..

سعيد + حصه: ههههههههههههههههههههههههه

شيخاني: مب جنج انتي كنتي اطرشيني ..

شهقت و حطيت ايد ع صدري: يا الجذااااااااااااااااااااا ااابه ..
سعيد: بس صخووو وصلنا ..

حصه: شيخاني: باجر بقومج من الصبح بوديج معاي العياده بتروحين..؟؟

شيخاني: طبعا دام السالفه فيها طلعه اكيييييييييييييد بروح معاج ..

سعيد يطالع حصه: ليش ..؟؟ شو بلاج..؟؟

حصه اتفج الباب و هي نازله : شاكه في شي.و أبااااااااا اتاكد ...." و نزلت ابسرعه من السياره"

نزلت وراها رغم اني كنت محرجه من سخافة شيخاني الا اني ابتسمت اتمنى صج حصه تطلع حامل ها الي فهمته من كلامهااا ...

دشيت داخل ابسرعه ... كالعاده ادور ع باباتيه ...دشيت حجرته جفته راقد ..رحت صوبه لويت عليه و بسته ..يلست اتامله و اطالعه قلته : انا وايد احبك باباتيه ...

دشت عليه امايه الحجره و الظاهر انها كانت يايه من برع سالتني: شو اتسوين ..

رفعت راسي اطالعه: ييت اجوف بااباتيه ولهت عليه ..

يلست ع الكنبه: خليه زين لا تزعجيه ..و حليللي جان زين طلعت مريضه شرات ابوكم جان بجوف الحب شرات ما يجوفه ابوج ..

عفدت صوبه ابسرعه و لويت عليها و كنت شويه و بصيح: ماماتيه حرام عليج لا اتقولين جذا انتي تدرين اشكثر انحبج ..

ضحكت امايه: هههههههههههه اسولف فديتج ..."يرتني و يلستني حذالها " شو سويتي بيت خالتج ..
سالتها ابسرعه : القعده كانت وايد حلوه بس ناقصتنج ..

ابتسمت امايه: كان ودي ايي بس تدرين بابوج و حالته ..
هزيت راسي متفهمه موقفها ...حسيت للحظه اني ابا احط راسي ع حجر امايه .. و ارتاح من الدنيا و همومهاا و لو للحظه ... مدري ليش خطرت ع بالي صورة ذياب خال ندى يوم فكرت بالهموم ...

حطت امايه يدها ع ظهري: بلاج يمه ..

تنهدت : ماشي بس ابا ارتااااااااااااااااااااح .. و بنتج شيخة منكده علي حياتي..

امايه : ههههههههههههه انا و خالتج حليمة كنا جذاا دوم نتجاتل ..
ابتسمت : يا سلام و بدور و موزي بعد جذا ...بس محد شرات شيخاني ..لغايه عنبوه مدري من وين لها ها اللسان ..

ضحكت امايه مره ثانية: ههههههههههههههه فديتج باجر بتعرسين و بتتفارقون عقب بتحسين بشوق لها اللحظات...

قلتها ابسرعه: وي وي الله لا قال ...

امايه: ههههههههههههههههه سعيد اخوج وينه ابا ارمسه..
رفعت راسي اطالعها : ليش ..؟؟

يلست امايه تلعب بشعري و قالت : اليوم كلمت قوم عمج عاادل بييون بيتنا بتمون اسبوع و برجعون الكويت .

تنهدت: تعودنا ع زيارتهم ...

امايه: هي بس لازم اخبر اخوج سعيد علشان يشتري اغراض و نتزهب لييتهم ..

مدري اي احساس كنت احس به و انا راقده بحجر امايه و هي قاعده تلعب بشعري يمكن الحنان ...غمضت اعيوني و قلتها : ماماتيه خبري الي اسمه سيف ما منه فايده بس امسوي له راس ع الفاضي ...سعيد باجر عليه زاام ...

اامايه ردت علي: ابرايه ورا باجر ..هم بيون الاسبوع الياي ...و بعدين لا اتقولين سيفاني ما منه فايده منوه قاعد يراكض بابوج من مستشفى لـ مستشفى مب اخوج سيف ..نشي نشي خليني ارووح اجوف اخوج ..

زخيت ايدها و كأني ما ابا انحرم من الاحساس الي قاعده احس به: لا دخيلج ..تمي جذا لـين ما ارقد ...سولفي باي شيء لي ما ارقد..

ضربتني امايه ع ظهري ع الخفيف: شوقاني رديتي للصغر شو تبين اشتري لج شاطوحه بعد..

ضحكت من خاطري : ههههههههههههه فديتج مااماتيه خليني شويه بس سولفي اي شي ..رفعت راسي ..عن باباتيه ..عن عمي و ليش راح كويت عن اي شي بليز ...بس لا تحرمني من هالاحاسيس الي قاعده اعيشها ..

امايه: احاسيس شو قاعده تخرطين انتي ...

ضحكني ردها : هههههههههههههههههههههه

سكتت امايه شويه تمت تلعب بخصلات شعري و انا غمضت عيني ..طرت بعالمي الخاص عالمي مع راشد ..ولد خالوه حليمه و المستقبل الي يتريااانا انا هوه ...بس فجيت عيني متفاجاه يوم سمعت ماماتيه اتقولي

ماماتيه: تدرين ييمه المفترض اني اتزووووج عمج عاادل

كلامها كانت شرات الصدمه لي ..طالعتها ابسرعه كانت بعيوني الاف من الاسئله بس كلها ضاعت و انا اترياا امايه اتكمل كلامها ...

طالعتني: صج و الله كان المفترض يكون عمج عاادل هو ريلي ...

رجعت ع نفس وضيعتي .. و انا اتمنى اني الكلام الي قاعده اتقوله امايه و الي بتقوله بيكون حلم ..ما حبيت اقاطعها ابا اعرف كيف ..جذا ..

كملت و هي تلعب بشعري : عمج عادل خطبني ... و اهلي وافقوا ...مع اني اعرف لو ابوج الي كان خاطبني اهلي ما بيرضون ..

كلامها قطع قلبي ...بس امايه كملت كلامها : عمج عادل متعود يسافر من مكان لـ مكان ... كان تاجر عود ...مع انه لا ابوه ولا حد من اهله كان جذا ... مدري هوه طلع ع منوه ..جذا ... المهم ..

كل البنات كانن يتمونن ان يتزوجون عمج .. بس علشان السفر .. و الممال و يعني ريال ما ينعاب .. و كل وحده تتمنى ..تكون زوجها شرات عمج عاادل ..

مدري ليش قلت بقلبي الحمدلله ما طلع ابوي عمي عادل ...غمضت اعيوني اسمع كلام ماماتيه ..و أبوج كان كل ما يخطب وحده يردونه لانه من انولد ما يرمس ....

.المهم ..عمج عادل ما قصر .كان كل ما يرجع الدار يكون عنده بيزات اشكثر ياخذ اخوه كذا بلاد برع يعالجه بس ..كل الاطباء قالوا ماشي فايده منه ...

و اما بالنسبة لي ..كانوا رباعتي و اهلي حتى اختي حليمه ..يحسدون ع اني خطيبة عمج عااادل ..فاجأتني ضحكتها : ههههههههه اذكر اني كرهت هاليوم انخطبت فيه ابسبب تعليقات بنات الفريج ... و غير الهدايااا الي كان اييبها لي من برع ..


ع كثر سفره ..ما كان شي وقت انا نتزوج كنت مخطوبه له كم سنه ..حتى حليمة الي اصغر عني تزوجت .. و يابت راشد ..

حطيت ايدي ع قلبي و قلت فديت رشودي..بس ها مب وقت احلامي بغيت اندمج بسالفه امايه الي اول مره اسمعهاا ...
قالت لي : ابوي و امي حرجوا من عمج لانه وايد اخر سالفه الزواج و الملجة ..فتريووه لي ما يرجع البلاد ..علشان يخبرونه يا انه يتزوجني يا انه يبطلون الخطبه ...

طالعت امايه: علشان جذا ما تزوجيته ..

هزت امايه بمعنى لا و قالت : عمج عادل اعتذر من ابوي وقاله انه لازم يسافر الكويت و حدد اليوم الي بيرجع فيه .. بيكون يوم عرسنا انا و عمج ..

كنت مشتاقه اني اعرف شو السبب الي ما خلا امايه تزوج عمي عاادل ..

كملت كلامها : ..باليوم الي مفرووض ايي فيج عمج ..انذبحت الذبايح و انطبخت العيوش بالجدور ... و طبعا ها مب حيا الله عرس ها عرس عاادل اغنى رياييل الفريج .. و كل بنت كانت تتمنى تزوجه ...فكان عرس ما صار ولا استوى ...

انا لبست و سويت ... و كشخوني الحريم و يلست في عريشنا اترياا المعرس ... غابت الشمس و الناس تعشوا و دقوا و الملاج و المعازيم كلهم كانوا يتريون المعرس ...

.بس عمج ما يااه ..و لين ما غابت الشمس وصلنا خبر انه انحجز منطقة كانت جريبه من منطقتنا ..معروف ان سلطان هالمنطقة جاير و محد يطلع من ايده حي جان انحبس ...


من وصلنا الخبر انجلب العرس لـ حزن .. عرفنا ان خلاص عمج دام انحجز عند هالسلطان يعني موته اكيد اكيد ..ع الرغم من الحزن الي صابنا كلنا ..

و خاصه انا في ثياب عرسي اتريا عمج ..اقترح ابوي يزوجني ابوج الا هو اخو خطيبي لان كل ماله بيكون لاخوه ...دام انه موت عمج صار اكيد خلاص ...

عاد كل البنات الي رفضوا ابوج ..تمنوا انهن وافقوا عليه لانهن بيعشون بعز ...لانه بيوورث اخوه ...بنفس اليوم و الوقت المحدد ..ملجت ع ابوج بدال عمج ..

يلست مصدومه: بس عمي حي ما مات ...؟؟؟؟كيف جذا !!!

ضحكت امايه: ههههههههههه عقب شهر انصدمنا يوم جفنا عمج ياه .. و انصدم يوم جافني صرت حرمة اخوه ...

طالعت امايه و انا بعدني مستغربه من السالفه: شسوي عمي..؟؟

هزت جتفها: تضارب مع ابوي و اخوه ... بس بالاخير اقتنع ...و رضى بالقسمه و لنصيب و رجع الكويت و تزوج من هناك .. و ليومج تم بالكويت ...

ابتسمت : زين عيل يدي طلع طماااااااااع عباله ابوي بيستوي تاير ..

ضحكت امايه: ههههههههههه هي و الله بعد ما الكل يحسدني ع خطبة عمج ..كلهن حمدواا ربهم انهم ما صار لهم الي صار لي ..

حرجت: ليش شو بلاه ابوي ...الف من تتمناه ..

ابتسمت امايه: فديتج شوقاني و الله ثم و الله لو خذت عمج ما بكون مستانسه ..قد ما انا مستانسه مع ابوج ..

لوت ع امايه: سالفه عجيبه ..بس حلوه ...الحمدلله انج انتي ماماتيه و باباتيه هو بااباتيه..

امايه: شوق تخبلتي شو هاي الرمسه بعد..
ضحكت و انا مرتاحه : هههههههههههههههههه

خطر عبالي سؤال : ماماتيه ...عيل شو الي رجع عمي الامااراات ..؟؟

ردت علي: يرجع بس يسلم ع ابوج ...تدرين ان عمج ما يعرف عنا شي ولا عرفنا عنه شي الين جم سنه بس ..
حاولت اتذكر : صح صح ما اذكره ابد بطفولتي ..هااااااااا سيفاني طالع ع عمي نحيس ..

قبل ما اترد علي اامايه انفج باب لحجره ..طالعنا شيخاني الي كانت محطيه ايدها ع خصرها : شو اتسون ... انا قاعده ادوركم و انتن هني ..؟؟

قلتها : شو تبين ..؟؟

شيخاني : ما اباج ابا ماماتيه ...

دشت الحجره و راحت صوب باباتيه و باسته فوق راسه بدفاشه لدرجه انه تجلب بفراشه ..

قلتها: يا الدفشه ..
طالعتني: كيفي احبه .."طالعتنا بنظرات" شو كنتوا اتقولون
قلتها و انا واقفه: ما يخصج ..ماماتيه لا اتخبرينها زين انا بروح انخمد ..

شيخاني : انجلعي من زينج الحينه..

ما حبيت ارد ع شيخاني لاني مب متفيجه لها بس كان بخاطري انخمد ع الشبريه ...و ارتب افكاري و بالسالفه الي قالتها لي امايه ...قببل ما اصكر الباب سمعت ضحكت امايه ع كلامي و كلام شيخاني .

رحت حجرتي ..دشيت الحمام تغسلت ..و عقب ما بدلت و لبست بيجامتي .. انخمدت بفراشي ...تذكرت راشد و كيف هداني الخاتم ...عفدت صوب ما حطيت خاتمي كسر خاطري يوم جفت هالدبه مفعصتنه ...حضنته بكف ايدي .. و حطيته تحت المخده ...طرشت مسج لـ راشد" تصبح ع خير حبيبي"

...و حطيت الموبايل ع الكمدينو ... حاولت ارقد بس قعدت اتجلب بفراشي ..اتذكر سالفة امايه .. لو كان عمي هو ابوي كيف بتكون حياتي ..؟؟ بنعيش فـ كويت ...اساله وايد دارت في بالي بس ..النوم كان الحاجز الوحيد ع ها الاسئله الي كانت تجول في خاطري ..و ما لقيت لها اي رد ...


فجيت عيني بالغصب ابسبب نور الشمس الي كان متسلل حجرتي..حطيتي ايدي ع عيني متضايجة ..هذي اكيد اماية فجت ستارة الحجرة ...نشيت بكسل اصكر الستاره ...ور جعت شبريتي احاول ارقد ...ما عرفت جم الساعه الا عقب ما رن موبايلي ...جفت المتصل "ندوي" ...حسيت بخيبة يوم ما جفت مسج من راشد او اتصال منه ...مرات احس ع قد ما يحبني هالادمي ع قد ما يطنشني...

رديت بكسل:الوو

سمعت صوت ندى الحيوي: صباح الخير ..

ابتسمت : صباح النور ...جي جم الساعه ..
ندى:بعدج راقده ...شوه ...؟؟

قلتها بكسل: هييييييييييييييييييييي

ندى: قومي الساعه 11 الضحى ...اكيد سهرانه ع الحفله ..
يلست ابمكاني: عيبتج الحفله ندوي...؟؟

ردت ابسرعه: هي مشكورات و الله ..ما توقعت ..خبرت خالي ذياب استانس من السالفه .. و راويه الهدية ..
مدري ليش ياني فضول اعرف شو قال عن هدتي فسالتها: وشو قال ..؟؟

ردت ندى و هي تضحك: عيبته هديتج ما قلتج احس حاط عينه عليج ..

عاتبتها لاني ابد ما افكر ب،ـ ذياب : نــــــــــــــــــــدى عن الرمسه الفاضية ..
ندى: هههههههههههه اوكى سوري سوري ..اممممممممممم تدرين ..
قلتها ابسرعه :شووه ..؟؟


قالت : اممممممم راويته هديت قوم عمي... و قلته شرات ما قالوا لي ..هاي من راشد مدري ليش حرج علي..؟؟ مع انهم كانوا ربع بديت اشك انهم ع خلاف..؟؟

كلام ندى حسسني بالغيره لانها ترمس عن راشد و هالشيء مب من حقها ...بس لفتني وايد يوم قالت انهم ع خلاف علشان جذا راشد حرج علي البارحه في الستي ...يوم سمع طاري ذياب ...

اتنهدت : مدري و الله ...

ندى: المهم انا بغيت اسلم عليج ..تراني بروح العمره .

شهقت متفاجاه : متىىىىىىىىىىىىىى

ندى: ههههههههههه هونج بلاج ..
قلتها: فاجأتيني ..
ردت علي: بروح مع قوم خالوه العوده ...

قلتها : يعني بتكونين مع فتون .. و الله اغار
ندى: ههههههههههههه افا عليج ما بخونج صدقيني ..

سالتها: زين متى بترجعين ..
ندى : اسبوع بس ...

قلتها من كل خاطري : ربي يحفظج ندوي......عاد دعواتج الطيبه لنا ..
ندى : اكييييييييييييد سلمي ع اهلج كلهن ..

شوقاني: ربي يسلمج متى بتروحين ..؟؟
ندى : ع العصر ...جان شي وقت بمر عليج .. زين ..
قلتها : مب مشكلهه بس ابتعدي عن فتون ..

ضحكت: هههههههههههههه من عيوني ...

صكرت عنها خذت نفس طويل ندوي بتروح العمره بفتقدهاا ..امممممممم لفيت ويهي بذراعي اتذكر ..فتون بنت خالة ندى.. وحده من عمرنا بس انسانه غيوره ... دايما كانت اتغار مني و من ندى و من صداقتنا ..

اذكر اشكثر كانت اتسوي مشاكل من بينا ..لدرجة ان خالة ندى تدخل بالسالفه ...بس حركتها و مشاكلها ابد ما فرقتني عن ندى لان الي بيني و بين ندى اكبر المشا كل و الغيره الي في قلبها ...

فكرت اتصل بارشد ..رن موبايله ما رد علي ..يمكن يكون مشغول بدوامه ...رحت الحمام اتغسل ... و ابدل ملابسي ...و انا طالعه شهقت يوم جفت شيخاني منسدحه ع شبريتي.. و ملتويه باللحاف...ييرت عنها اللحااف بغيض و قلتها : شو اتسوين ...؟؟؟؟

تمت شيخاني ابمكانها امغطيه ع ويها حاولت اقومها: نشي شيخاني تدرين ما احب حد يرقد ع فراشي ..قومي..

بس هدوء شيخاني و عدم ردها لي خوفني و خلني اتجرب منها ..حاولت ارفع ايدها عن ويها .بس ما قدرت..
سالتها بخوف : شو بلاج ..؟؟؟

شيخاني بنفس وضعيتها ما اترد ..

هزيتها : شو فيج ...باباتيه فيه شي

هزت راسها بمعنى لا ...
يلست ع الشبريه ..ما جفت دموعها بس جفت عيونها محمره ..وقفت و قالت : مافي شي ...
تميت واقفه ابمكاني اطالعها الين ما ظهرت من حجرتي.استغربت ..من موقفها شو بلاها ..؟؟؟ يمكن ها الوحش قالها شي اكيد سيفاني قالها شي... يوم سعيد يداوم هو يلعب بذيله ..

طلعت ابسرعه من حجرتي رحت صوب حجرة شيخاني دقيت الباب جفته مقفول ..دقيت كذا مره ابد ما طاعت تفتح ...

نزلت تحت بالصاله ..جفت ماماتيه قاعده ادخن باباتيه ..علشان صلاة اليمعه ....فتح لي ذراعه من جافني ..رحت صوبه و لويت به ..ابتسمت له و قلته: شخبارك باباتيه زين ..

ادري ما كان يسمعني بس هز راسه ...
امايه: صح النوم ...

شوقاني: شو بلاها شيخاني...

طالعتني ماماتيه : شو بلاها توها يايه من برع مع حرمة اخوج .. شحلاتها ..شو بلاها "طالعتني بنظرات" قلتيها شي انتي..؟؟

رديت ابسرعه : و الله لا ...بس اجوفها متغيره و صاخه حتى الحينه قافله عليها باب حجرتها .

امايه: عن ترقد بس عقب بتفوتها صلاة الظهر ...تعالي خذي ها المدخن ..روحي حجرة اخوج سيف و دخنيها .. و دخني ثيابه .

عضيت ع شفايفي الي تحت : ما ابا اجابله من ضربني ما جفت شيفته ..

ماماتيه: يلا روحي لا تستوين عدوه .. و ها اخوج اكبر عنج روحي..

حط ابوي ذراعه ع جتفي و جنه عرف من ملامح ويهي ان مضايجه رفعت راسي ارد له ابتسامته العذبه ..خذت عن امايه المدخن و قلتها : انتي اصلا دوم تدافعين عنه من زينه ..

امايه: روحي روحي...باجر بيعرس و بخف عليكن ..

قلتها و انا اصعد الدري: احسن علشان افتك منه ..

ما سمعتني امايه جان بتسوين لنا حفله ...رحت حجره دشيتها بتردد بس الظاهر ما كان موجود ...يلست ادخن الحجرة عقب فجيت الكبت ادخن ثيابه ...

نقزت ابمكاني يوم سمعت صوته : شتسوين ..

طالعتها جفتها ظاهر من الحمام شكله كان يسبح لانه وقف عدال التسريحه ينشف شعره ...خذت نفس طويل و ابوي ما فيني ع لسانه و ايده ..صكرت باب الكبت و كنت بربع برع حجرته و قبل ما افج الباب
زقرني: شـوق ...

وقفت ابمكاني بلعت ريجي بخوف سعيد محد منوه بيداري عني ...و ابوي..تميت واقف ما بغيت التفت صوبه علشان ما اموت من الخوف ...

فكرت اذا سوا فيني شيء بحرقه بالنار الي بالمدخن التفت له بروود و رفعت راسي اطالعه ..
فاجاني: مبروك ع التخرج..

بلعت ريجي مب رايممه ارد عليه مصدومه
عقد حياته : شو بلاج ...؟؟؟

لا و الله مب جنه امكفخني من جم يوم اونه شو بلاج ...هزيت راسي بمعنى ما فيني شيء ...
ابتسم و تجرب مني لصقت باالباب و انا متردده احرقه بالنار ولا لاء.يوم ابتسامته لي خللتني اتراجع باخر لحظه ...

سيف: انتي بعدج متضايجه من سالفه أول امس ...اوكى انا اسف ..

و باسني فوق راسي ...مب غريبه ع سيف دوم يكفخنا عقب يبوسنا فوق الراس..بس دام نفسيته اوكى يعني مب هو الي مزعل شيخاني...

قالي: انا و سعيد بحياتتنا ما تضاربنا ..غير اول امس..فضلج علي ..
قلتها : سعيد يحبنا و ما يرضى علينا ..

رد ابيسرعه : حتى انا احبكم ..ادري انج ما تحبيني ولا شيخاني تحبني...بس انا وايد اعزكم ..

مدري ليش كسر خاطري يوم سمعت منه هالرمسه ..

فقلته بسرعه : نحبك بس نخاف منك ..
راح صوب كبته يظهر له كندوره: ما عليه ...المهم الحينه انتي مب متضايجه مني صح ..

قلته : هي مب متضايجه منك ..

طالعني: زين ..مشكوره ...مرات اغار يوم اجوف علاقتكم بسعيد ..غير عن علاقتكم بي شي حاجز كبير بيني و بينكم و انا بحاول اكسر ها الحاجز ..

ابتسمت له : حتى انا و شيخاني بنحاول ما انضايج في شي ..تبا شيء ..؟؟

هز راسه بمعنى لا
طلعت من الحجره و انا مستانسه اول مره اكتشف ان سيفاني غيور ... زين و الله علاقتنا بـ سعيد غيرته ..شي طيب ..

رحت صوب حجرة حصه دقيت الباب بس ماشي رد ...خمنت اكيد حصه راحت بيت امها اتبات هناك ...دوم يوم سعيد يكون في الدوام هي اتروح بيت امها ..بس شو سالفتها شخاني...شي محيرني..

رحت اتصل بحصه ردت علي عقب ما سلمت عليها سالتها : اقولج بلاها شيخاني..

حصه: شو بلاها ..؟؟

قلتها: يت من برع متضايجه و حالتها حاله شو مستوي يوم رحتوا العيادة ..؟؟
حصه : ليش هي قلت لج شي ..؟؟

قلتها : لا ما طاعت ترمس علشان جذا اتصلت بج ..شو مستوي حصة ..
حصه سكتت شويه: ماشي شوقني كانت معاي اوكى ..

سالتها : عيل من شوه متضايجة ..
حصه: مدري و الله .. حتى كانت تضحك و اتسولف مع راشد ..

انصدمت : راشد اخوج ..

حصه: ههههههههههههه هي بلاج هو ماخذني العياده ..
رصيتت ع سماعة التلفون جي ما خبروني كنت بروح معاهم ..
حصه: طمنيني ع شيخاني ولا تبيني ارمسها اجوف شو بلاها .

قلتها : لا خلاص بجوفها بروحي يمكن تدلع ..

قالت لي: انا اشك في جذا بعد ...يلا عاد بخليج حمودي مدري شو قاعد يسوي بامايه ..

ضحكت و انا اتذكر شيطانة حمودي: هههههه بوسيه لي ...

حصه:: ان شاء الله مع السلامه ..

رحت حجرتي متضاايجة من راشد مرات يرفع الضغط بس بتحمله لاني احبه ...عقب ما خلصت صلاة الظهر .. وصلني مسج رحت اجوف منو الي ذكرني بها الحزة ..فجيت المسج ..طرت من الوناسه و انا اقرا مسج من "روحي تحبك" ( انزلي تحت انا في صالة بيتكم ابا اجوفج )

ما صدقت ربعت البس شيلتي و طلعت من حجرتي طايره ...راشد هني حبيبي موجود فـ بيتنا هالانسان ابد ما ينشبع منه ..

نزلت الدري من سمعت صوته وقفت ابمكاني و يلست ع الدري اطالعه من بعيد ...فديته كم احبه و احبه ...
سمعته يسولف و يضحك مع امايه ...زين سيفاني مش موجود ..نزلت الدري اوني ما اعرف انه موجود ..

رديت لورا يوم طاحت عيني بعيونه ..

سمعت امايه: تعالي شوق ها راشد ولد خالتج ياي يسلم فيني تعالي ..

تجدمت و انا اعيوني بعيونه سالني: شحالج شوق ..

قلتها و انا ميته من المستتحى : بخير ..

امايه: ههههههههههههههه بلاج مستحية ..راشد ولد خالتج وشرات اخوج ...

طالعت اجوف نظراته يوم امايه قالت شرات اخوج ...ابتسم لي و كأنه يقلي ما عليج منهم كلهم ..انتي لي و انا لج ...قطع علينا اخوي سيف يوم دش الصاله مع ابوي رادين من المسيد ...


طالعني سيف بنظرات عتاب و غيض يوم جافني واقفه بالصاله جريبه من راشد...علشان جذا طلعت برع الصاله ابسرعه ...علشان ما احصل كف منه ...

يلست احاوط في المطبخ اتريا راشد يظهر ..شكله بتغدا هني ..!! ليش ما قالي من قبل كنت طبخت له من ايدي الحلوه ...سمعت صوت باب الصاله يفتح و يتصكر ...وقفت برع عند باب المطبخ ...لمحني واقفته فياه صوبي ..

تعلقت عيوني بعيونه قال لي : وحشتيني..

قلته ابسرعه: جذاب ..

راشد جنه حرج مني: تأدبي يوم ترمسين معاي ..
قلته ابسرعه : ليش ليش ما قلتي انك بتاخذ حصه العياده كنت بروح معاها علشان اجوفك..

راشد: مدري فجأه اتصلت بي ...

ابتسمت: حتى ما سالتها شو اخبارها و شوو قالوها طار عقلي و قلبي يوم قالت انك انت ماخذنها ...
راشد يطالعني بنظرات : شوقاني انا بخطبج خلاص..

لصقت فيه من غير قصد بس من الوناسه : متى متى ...

طالعني: صبري شويه بس عاد انا ما اصبر عنج ...

ما قدرت ارد ع كلامه ولا ع نظراته فنزلت راسي بالارض

سمعت ضحكته: ههههههههههه تستحين شوق...

انفج باب الحوي و كانت الشغاله فافترقنا بسرعه ..

قلته بصوت واطي/: اتصل بي ..
طالعني بنظراته الحلوه ... و ظهر من البيت ..يلست ع عتبة باب المطبخ مب رايمه اشل ريولي ..

قال بخطبني... راشد يحبني... يحبني ...كل ما يسوي تصرف يقهرني او يستفزني ..يرجع يفاجأني انه يحبني و يموت علي...

رحت الصاله و تغدينا ..طبعا الا شيخاني كانت قافله ع روحها الباب محد يعرف شو بلاها ...و عقب الغدا قعدنا انسولف ... مواضيع كثيره منها ..عن قوم عمي وييتهم من الكويت ... و غير ان عرفنا ان حصه حامل ... و فاجأنا سيفاني يوم قال انه نوى يخطب خلاص ...

رحت حجرتي ...تضايجت يوم جفت ان راشد ما اتصل بي ...حطيت راسي ع المخده و رجعت رقدت ...شهقت يوم حسيت باللحاف اتيير من فوقي بعصبيه ...يلست ابسرعه مكاني ...

وقلت : بسم الله الرحمن الرحيم ...شو بلاكم اليوم ..

يلست بدور ع طرف شبريتي منهاره اتصيح ..و كانها ضايعه و مب عارفه وين اتودي ابعمرها ..

حبك كمنجه ف الحشا ايرن. . وايحرك اوتاري لشجان يا اوليفي يا اصغير السن .. لا تستوي لي دوم منان ان ييت صوبك ريتك اتون.. .وان سرت ترقص جنك احصان