في بيت مريم(ام حمد)جدة سلطان\\بعد ماسلموا عليها وجلسوا...
ابوسلطان-باركي لسلطان يمه بيصير عريس وجاي يعزمك على ملكته بكره
ام حمد-ول عليكم يوم صارت الملكه بكره جيتم تقولون لي حشى غريبه انا مو جدته!
ابوسلطان-والله يمه كل شي صار بسرعه ماخطبناها الا من اسبوع واليوم بلغونا موافقتهم وبنخلي الزواج بعد ثلاث اسابيع
ام حمد-وليه العجله؟ بعدين مو ام سلطان متصله علي قبل اسبوع تقول انك اختلفت مع ابو لميس خلاف كبير على الشغل امداكم تتصالحون وتناسبه بعد
عصب ابوسلطان-ليه وهو خلاص مافيه بهالديره الا بنت ابولميس لاهذي وحده غيرها ونسب ابرك من نسبهم,,انا باروح الشركه وانت ياسلطان خذ جدتك معك للبيت
ام حمد من سنين من توفى زوجها رفضت تترك بيتها رغم اصرار ابوسلطان المتواصل انها تعيش معهم لكن هي مارضت تترك البيت وجيرانها او تغير فيه شي مع انه قديم وجلست فيه هي وشغالتها وسواقها وكل مابغت راحت لهم بس مستحيل تنام الا في بيتها...
يوم طلع من عندهم ابوسلطان التفتت على سلطان اللي من جاء وهو مانطق ولا كلمه...
ام حمد-وش فيك ياسلطان كن هالزواج مو بخاطرك؟
سلطان-تدرين يمه اني من زمان ابي لميس لكن شوفي اللي صار
ام حمد-الله يعوضك ياولدي انت عارف ابوك مريض ومانبي نعارضه بشي
سلطان-وهذا اللي خلاني اوافق على هالازواج
ام حمد-الله يكتبلك اللي فيه الخير
بعد ثلاث اسابيع في صباح يوم الزواج\\مرت هالاسابيع بسرعه دلال ماكانت تشوف فيهن سلطان كثير واذا شافته ماتتجرأ تسأله اي شي عن هالزواج وهو كان دايما ياساكت او سرحان,,واليوم راحت له غرفته عشان تسلم عليه لانها بكره بتسافر مع خالتها وبناتها يتمشون وهذي اول مره تسافر بدون سلطان, في بيتهم ماكان فيه اجواء تدل على انه عندهم اليوم زواج وملامح سلطان ابدا ماكانت ملامح عريس,,يوم طلعت منه فكرت انها على قد ماهي راحمه سلطان وحالته راحمه اكثر هالبنت اللي بتجي لعائله الكل مو مرحب في وجودها واولهم زوجها.. ياترى وش شخصيتها؟ وش بيكون ردة فعلها على اللي بتشوفه؟ والى متى بتتحمل؟ ليتها راحت معهم للملكه هي حتى مافكرت تسأل امها وشلون شكل البنت صدق انها جايه للعائله غلط...
وفي الليل سلطان حس انه من الصبح يتحرك بشكل آلي بدون احساس او تفكير مو من الصبح بس كل هالاسابيع كان يحاول مايفكر بهالزواج لكن الليله كل شي بيصير واقع مايقدر مهما حاول انه يتجاهله من الليله فيه انسانه بتشاركه في حياته..في بيته..انسانه ماهتم يعرف عنها اي شي غير اسمها اللي عرفه بالملكه (أمنيه) اللي اكيد بتتمنى انها ماعرفته ولا شافته زين ان امه وافقت على طلبه والغت الزفه مو ناقص يعرض هالحزن اللي بوجهه على هالحريم اللي بيجلسون يحللون نفسيته ...
في بيت ابو لميس\\كانت لميس وسحر جالسين في الغرفه,,طول هالاسابيع وهم يحاولون ان لميس ماتعرف خبر هالزواج سحر دايما معها ولاخلتها تكلم او تقابل اي احد ممكن يقولها على هالخبر حتى لميس نفسها بعد اللي صار ماكانت تبي تكلم اي احد يسألها عن هالخلاف وسحر طول الوقت تقنعها انها تنتظر السالفه تهدأ شوي بعدين تسأل دلال وش ناوي سلطان يسوي...
سحر-لموسه وش رايك نطلع نتمشى مامليتي من حبسة البيت؟
سحر-عشانك من زمان ماطلعتي تعودتي على الكسل يله عشان خاطري
لميس-اوكي عشان خاطرك باروح اقول لامي واشوف السواق اذا كان فيه وانت فكري وين نطلع
نزلت لميس تدور امها وقبل تدخل الصاله سمعت صوت ابوها العالي...
ابولميس-وش قصده مرسل لي بطاقة دعوه في ليلة الزواج هو مايبيني احضر بس يبي يأكدلي انه زوج ولده والله من زين النسب اللي فرحان فيه! المشكله ان مااحد صدق ان سلطان جاء وخطب بنتي كان المفروض اخليه يجي هو وابوه وارفضهم قدام العالم عشان الكل يعرف من ابولميس بس هذا ابو سلطان دائما واعي شوفي وشلون زوج ولده بشهر عشان يطلعني كذاب!
لميس ماصدقت اللي تسمعه(سلطان..سلطان زواجه اليوم)راحت بسرعه لغرفتها وبدت تصارخ في وجه سحر والدموع تنزل من عيونها..
لميس-كنت تعرفين انت وامي ونجلاء كلكم عرفتم وخبيتم علي!!
لميس-زواجه اليوم اليوم وانا ماعرف! وهو مايقول لي!!
عرفت سحر ان الخبر اللي يحاولون يخبونه عنها انكشف لكن وشلون درت...
سحر-لاتظلمينه هو انجبر على هالزواج عشان خايف على صحة ابوه
لكن لميس ماكانت تسمع سحر لانها بدت تصيح..راحت سحر وضمتها..
في القاعه//مشى سلطان للغرفه اللي فيها العروس..زوجته! وقف متردد عند الباب ثم دخل..جلس عندها وهو صاد عنها مايدري وش يقول.. مايعرف يتصنع مشاعر مو موجوده في داخله..كان المفروض تكون هالعروس هي لميس ياالله كان كل شي في هالليله غير..لمح فستانها الأبيض البسيط لو كانت لميس كان بيلمح فستان مايشبه هالفستان إلا بلونه لميس طول عمرها بنظره كامله في كل شي أنوثتها أناقتها جمالها..لو بس كانت لميس هي اللي بجنبه اللحين كان انحلت كل مشاكله..قام بدون لايلتفت عليها وقال...
سلطان_ألبسي عباتك بنروح الفندق
وطلع عنها بدون لايلتفت عليها،،وفي السياره كانت عيونه على الطريق لكن باله في مكان ثاني..كان يحاول يستوعب الوضع اللي هو فيه بس مو قادر (اللحين البنات ماصاروا ينغصبون وأنا الرجل أنغصب على الزواج بس وش أقول أنا اللي جبته لنفسي الله يسامحك ياعمر على فكرتك هي سبب كل اللي أنا فيه)
وصلوا الفندق وقبل يدخلون الغرفه دق جواله ماصدق عيونه يوم شاف الرقم(لميس!!أول مره تدق علي أكيد صار شي ليه بهاليوم يالميس؟ ليه بهاللحظه؟) سلطان فتح الباب...
وبعد مادخلت رد على جواله.. ماكان يعرف وش تبي..وش بيقولها..بس مستحيل يتركها تدق ولايرد...
لميس بصوت مبحوح_ليه سويت كذا ياسلطان؟ أنت بتذبحني!
وبدت تصيح..سلطان تقطع قلبه عليها..لميس اللي يخاف عليها من الهوا تصيح بهالشكل..وبسببه..
لكن لميس سكرت..اتصل عليها سلطان تأخرت ماردت لكن هو كان مصر انه يكلمها ويطمنها..ردت سحر على جوالها بعد مايأست ان لميس ترد...
سحر_أنا مو لميس أنا بنت خالتها
كان يسمع صوت صياح لميس...
سلطان_قولي لها سلطان يحبك ومستحيل ينساك هالزواج أضطريت أوافق عليه من خوفي على صحة الوالد لكن أوعدها إني مجرد ما أنهي هالخلاف بين أبوي وابوها بأطلق وهي تعرف أنا من مين أخذت لأني مو مهتم بهالزواج اللي كله مسألة وقت وينتهي