يوم السبت الصبح في بيت سلطان\\سلطان كان جالس في غرفة الطعام جت الخدامه وحطت الفطور وهو يفطر سمعها تنزل مع الدرج استغرب وش مصحيها دخلت عليه وتفاجأ يوم شافها لابسه تنوره جنز وبلوزه وردي كانت فاكه شعرها ومجعدته ومكياجها الوردي مخليها روعه كان شكلها غير كل يوم كان يشوفها بجلابيه خفيفه ورافعه شعرها حتى يوم كان يوديها لأهله كان يجي وهي لابسه عباياتها هذا إذا ماكان السواق هو اللي موديها كان قرب ينسى هالاحساس اللي تثيره فيه أو اللي كان يغيب عن البيت عشان يتجنبه...
أمنيه تفاجأت انه للحين فيه
سلطان_صباح النور، وش عندك لابسه على هالصبح
سلطان_الكليه! أنت للحين تدرسين!!
أمنيه_مادريت إن شكلي عجوز!
سلطان ابتسم_لا مو قصدي بس توقعتك تخرجتي
سلطان_وش معنى أخترتي هالقسم؟
أمنيه طالعته بنظره غريبه مافهمها_كذا
سلطان_يعني مو حب واهتمام بالأطفال
أمنيه من غير نفس_مافيه أحد يكره الأطفال
سلطان استغرب من لهجتها اللي تغيرت فجأه
دق جوالها وردت بإبتسامه أول مره يشوفها على وجهها طبعا وليه بتبسم له
أمنيه_أهلين صباح النور.......
إذا وصلتي عطيني دقه وأطلع
سلطان عصب مين هذي اللي بتمرها وليه ماتروح مع السواق والخدامه مثل ماتروح معهم لأهلها ومن اللي بيوديهم وبدون لاتقوله
سلطان_مافيه روحه اليوم للكليه
أمنيه ببرود عصب سلطان زياده_وليه؟
سلطان_عشان قبل ماتتفقين مع صديقتك تمرك تعرفين إن عندك زوج تسألينه قبل
أمنيه_ زوجي! اللي توه يعرف إني للحين أدرس! زوجي اللي أنتظرته أمس للساعه ثلاث عشان أقوله إن أخته زارتني ولكنه ماجاء!زوجي اللي لو كان انتظر شوي كان قلتله إن دلال هي اللي بتمرني وتروح معي للكليه!بس ماكنت أظن هالشيء يهمه أو يفرق معه
أمنيه_اللحين تسمح لي أروح؟
طالعها سلطان ويوم ما رد عليها تركته وطلعت
سلطان غمض عيونه(يالله لو هي كلمتين معها أحس اني متضايق وتعبان كأن لي ساعات وأنا أكلمها) تذكر شكلها تغير لهجتها معه فجأه تكرهه؟أو مو هامها؟أو وش شعورها اتجاهه؟واللي محيره ليه رضت بهالوضع؟
(دلال أمس كانت هنا! جتها بعد ماطلعت منها كان الوقت متأخر! وليه تروح معها الجامعه وهي توها عارفتها!)
في السياره أمنيه كانت تفكر باللي قال لها سلطان(والله مغرور اللحين بعد الكلام اللي قاله لي ليلة زواجي بدون لايهتم بمشاعري وله شهر مايكلمني يجي اليوم ويسولف عادي بأي قسم؟ليه أخترتيه؟وأنا كلي مو هامته وليت لو جاوبت يعجبه مثل يوم كنا في الفندق يوم عطاني الجوال ماحبيت أقوم عنه بسرعه عشان ماأجرحه آخرتها يعصب علي كأني أنا اللي راميه نفسي عليه! لا الأريح لي وله إننا مانتكلم مع بعض أبدا كذا،أحسن)قالت آخر كلمه بصوت عالي وبعصبيه من غير ماتحس
دلال_ياساتر ليه معصبه على هالصبح؟
أمنيه_على ناس عجزت أفهم وش يبون
أمنيه_وليه توقعتيه سلطان؟
دلال_يعني من بتشوفين بهالصبح غير سلطان لمحت سيارته
أمنيه_عصب على باله بروح مع وحده من صديقاتي
أمنيه ماردت عليها وتسآلت معقوله دلال ماتعرف عن سالفة اللي يحبها!
وصلوا الكليه وراحوا للشله اللي كانت عشر بنات أول ماشافوا أمنيه بدوا يزغرطون
أمنيه_بس فضحتوني بتخلوني أحس إني تزوجت صدق
فرح_أجل أنت متزوجه تمثيل ماعرفتينا
أمنيه_دلال حماتي أخت سلطان
بعد ماسلموا عليها البنات جلسوا يسولفون ويضحكون
عبير_اللحين أمنيه اتزوجت وخلود ورنا تملكوا ومها انخطبت وأنا للحين ماشفت ظل رجل عند الباب والله شكلي بأعنس
رنا_لاتزعلين دلال أكبر منك ومو مخطوبه
دلال_لا حبيبتي أنا عريسي موجود متى ما نويت أتزوجه قلت لأمه تعالي اخطبيني
عبير_ياسلام أنت اللي بتقولين لها تجي تخطبك
دلال_واحد فيه كل المواصفات رجل أعمال وقلبه طيب ووسيم وشخصيه كل شي تتمنونه فيه بس له عيب وحيد
عبير_بعد كل هالمواصفات مابقاله عيوب
عبير_ولا يهمك أنا أتزوج أخوه وأريحك منه
دلال_لا الله لايبليك ذاك البلا
أمنيه_أنت صادقه أو تمزحين عن مين تتكلمين؟
دلال_عن بطلي اللي كان يدافع عني أيام الطفوله عن خلوووودي
أمنيه_بس هو ماعنده أخو غير الدكتور أظن اسمه نواف
عبير_ياسلام دكتور تكفين دلال أبيه
دلال_أقولك هذا آفه تقولين أبيه
أمنيه_لكن خالتي وعمي يمدحون فيه
دلال_أوووف اتركونا منه هذا اللي ناقص أسولف عنه سكروا الموضوع ترى من جد أكرهه
البنات يوم شافوا دلال عصبت ماحبوا يضايقونها وغيروا السالفه...
رجعوا من الكليه وهم في الطريق
امنيه-دلال انت صدق تحبين خالد؟؟
دلال- لا امزح انا من كنت صغيره وانا اقوله ترى اذا كبرت باتزوجك وهو يقول الله يعينني بس انا وحتى سلطان نعتبره اخونا الكبير انا للحين ماستحي اكلمه واسلم عليه
امنيه-شكل علاقتكم بام خالد وعيالها قويه
امنيه-ونواف صدق تكرهينه ولا مزح بعد
دلال-لاهذا عاد صدق حرام عليك مايكفي هالشمس والحر بعد تبينا نتكلم عنه
امنيه حست ان دلال ماتبي تعلمها ليش تكرهه اكيد لسى ماوثقت فيها عشان تقولها اسرارها,,وصلت امنيه للبيت والخدامه قالت إن سلطان اتصل وقال ماراح يجي على الغداء،تغدت أمنيه ونامت ويوم قامت العصر راحت لأختها ولا رجعت للبيت إلا بعد المغرب راحت لغرفتها وبدلت ملابسها ولبست برمودا ورديه وبلوزه بيضاء وفيهارسمات بالوردي وبعد العشاء وكالعاده طلعت في الحديقه كانت الساعه 11وهي ماتنام إلا 12 ولاتدري سلطان متى يرجع؟
لكن سلطان اليوم رجع بدري كان يبي يكلمها دخل البيت ولقاه فاضي توقع إنها نامت راح للمطبخ وشاف الخدامه...
أمنيه كانت جالسه على العشب وتاركه الكراسي وتكلم دلال جاء سلطان وهي كانت معطيته ظهرها ولاشافته
أمنيه_هههههه تسوينها ماأستغرب
سلطان سرح في شعرها الأسود اللي أنتثر على ظهرها وغطى أكتافها في حياته ماشاف مثل سواد شعرها وكثافته ونعومته
شهقت أمنيه وطاح الجوال من يدها وفزت بسرعه ماكانت مستوعبه مين صاحب الصوت ولا توقعت إنه يجي بدري ألتفتت عليه وطاح شعرها غطى نص ملامحها وقفت تطالعه وعيونها مفتوحه على آخرها كان قلبها بيوقف
أما سلطان يوم شافها قلبه بدأ يدق بقوه كانت عيونه ثابته على ملامحها شعرها انتبه للبسها وعرف انها ماتلبس ذيك الجلابيات إلا عشانه موجود انحرجت أمنيه من نظراته
أمنيه_مما..ما.توقعتك تجي-شهقت-دلال
أمنيه أخذت جوالها من على الأرض وكلمت دلال اللي انهبلت ماعرفت وش صارلها
دلال_زين تذكرتيني!خوفتيني وش صار فيك؟
أمنيه_ماصار شي بس.. سلطان.. لقيته فجأه وراي..و
دلال_ههههه وكل هذا تستوعبين الموقف! زين مع السلامه
سلطان كان للحين واقف بمكانه ويطالعها...
سلطان_ مافيني شي بس جيت بدري أبي أتكلم معك
أمنيه فكرت(معقوله بيطلقني!يمكن رجعت علاقة أبوها وعمي)
أمنيه_خلاص روح بدل ملابسك وأنا انتظرك هنا، تعشيت؟
راح سلطان وأمنيه تذكرت لبسها انحرجت إنه شافها كذا فكرت تروح تغير ملابسها بس حست إنها مالها داعي هو شافها وخلاص، رجع سلطان وجلس على الكرسي وأمنيه جالسه على الأرض
سلطان_ياتجين تجلسين على الكرسي يا أنا أجلس على الأرض
الكرسي الثاني كان قريب منه تخيلته يكلمها وهو بهالقرب منها!!
أمنيه_أنا أحب أجلس على الأرض
سلطان عرف إنها ماتبي تقرب منه لأنه انتبه عليها يوم تطالع الكرسي القريب منه وتكشر
حب يقهرها على الأقل يرد على الطريقه اللي كلمته فيها الصبح فقام وجلس قريب منها نزلت عيونها وبدت تلعب بشعرها...
أمنيه_وش الكلام اللي تبي تقوله؟
سلطان_فيه سؤال محيرني لكن أتمنى إنك تجاوبيني بصراحه
سلطان_أنت مغصوبه على الزواج؟
أمنيه رفعت راسها وطالعته بحقد لكن فجأه راحت هالنظره ورجع البرود وابتسمت
أمنيه_وإذا كنت أحب واحد ناوي تخطبه لي بعد ماتطلقني
سلطان عصب عليها ومسكها مع يدها بقوه وقف ووقفها معه كان قريب منها بالحيل وحست من صوت أنفاسه إنه قهرته لكن يستاهل مثل ماجرحها لازم تجرحه
أمنيه رفعت عيونها له بتحد مع إنها كانت ميته خوف
سلطان_مسكها بقوه مع كل يدينها لين حس ان عظامه بتتكسر
تركها وطاحت على الأرض توقعها تصيح لكنها رفعت عيونها له بذيك النظره البارده اللي يكرهها
سلطان_ليش وافقت على الزواج؟؟
أمنيه_وليه أرفض مو أنت لقطه لوحده مثلي
نزل سلطان ومسكها مع يدها وقومها سحبها وجلسها على الكرسي وجلس قبالها
سلطان_أمنيه جاوبيني بصراحه أنا جيت اليوم بدري عشان أعرف وأرتاح من الحيره أنت ليش مو هامك اللي قلته والوضع اللي حطيتك فيه ياإما انك تحبين أحد وارتحتي اني بأطلقك أو إن كل اللي همك الفلوس
أمنيه_بس هذي اقتراحاتك ولافيه شي ثاني وأنت ترشح أي سبب؟
سلطان_أنا أبي أعرف السبب اللي عندك وماراح أتركك الليله لين ما أعرفه