بارت اليوم هوالبارت الي بتكتشفون مع عوق حقيقتها
كيف ..وليش ..ومن هي عوق.. ان شاء الله با البارتات القريبه القادمه
.
.
.
البارت الثاني
.
.
.
نوح الحمآم...
.
.
.
طلعت لأمي وهي منسدحه با الصاله وتسمع الرادو امي..
ما تحب التلفزيون ومتعلقه في الرادو وهي من كثر ماتكره التلفزيون حتى انا صرت ما احبه... ولا اهتم فيه...
على ان عندنا في البيت اكثر من تلفزيون
صرت احب الرادو وحافظه برامجه علشان امي..
واستمتع وانا اسمع معها لبرنامج نورعلى الدرب...
واضحك على امي اذا جا سؤال لشيوخ عن امور تخص المرأه..
والا علاقة الزوج بزوجته..
امي تقول قومي والا سدي اذانتس لين يخلص السؤال والجواب
نسمع انا وامي برنامج صور مسموعه وكل حلقه تجي امي تناقشها معاي مثل الي يشرح درس وتحاول توصلي الصح من الغلط من خلال موضوع البرنامج حتى احيانآ
تقول كلام ما افهمه ولا سمعته با البرنامج دروس من امي لي استوعبتها بعد ما عرفت حقيقتي
نتابع المسلسل الساخرام حديجان..
واذا قلت يمه ترى الي يسولفون كلهم رجال واحد يقلد مرات رجال ومرات حرمه..
تقول لاعاد اسمعتس تقولين ها الكلام عند احد ثم يقولون عوق التسذوب..
ولا صدقتني الا مره جا لقاء بتلفزيون لشخصية ام حديجان الحقيقيه وناديتها تشوفه علشان امي صدقتني وهي مستغربه كيف شخص واحد يقوم بكل الادوار
كان عند امي متعه انها اتابع المسلسلات البدويه با الرادو احسن من التلفزيون
وحتى مرات تهاوش تقول ليه يغيرون القصه ولا يجيبون منها الا اساميهم والباقي يلعبون علينا فيه
وتسرد لي امي القصه الحقيقيه للي سمعته
برنامج الباديه حافظه وقته على كل محطات الرادو وحتى من اي دوله يبث البرنامج
.
.
.
امي كانت شخصيه قويه ويمكن لو ماكانت شدتها كان جمالي قلب علي نقمه الكل يمجد جمالي وينبهر اذا شافني دائمآ الفت الانظار في كل مكان اروح فيه مع امي.. الا امي..,
دايم تقول لاتغترين واجد بالمدح من زين خشمتس والا من زين عيونتس لكن الناس ماتشوفتس الا متكحله ومتحومره>>يعني حاطه روج
ترى لو يشوفون وجهتس كذا بيهجون العرب والا بياضتس دافع البلا سامجه مافيتس ملح ابد.. ابد.. ترى زين البنت بحياهاودينها
مرات تخليني ارجع من حفله والا مناسبه ادخل غرفتي واوقف قدام المرايه ..
ماغير اتلمس وجهي و ايديني واناظر فيهم يمكن امي صادقه
والا العرب مالهم الا الظاهر اكيد ان امي هي الي صح..
ها الشي وغيره اشياء بعد حفظ الله سبحانه وتعالى..
كانت رادع لي ما احاول اظهر وجهي والا بياضي قدام احد..
دايم حجابي كامل من طلعت للمتوسط..
الشراب والقفاز البسهم مثل لبسي لعباتي..
حتى لبسي امي ما يعجبها الا اللبس الساتر سواءفي بيتنا والا اذا طلعنا
تقول وش الزود الي بيجيتس اذا طلعتي شي من لحم جسمتس غير عيون خلق الله
امي كانت حريصه على صلاتي ..
وحتى النوافل فرض علي عند امي اصليهم ودايم تقول يا زين بنتي لو تصوم معي وتزين شهرها بصيام البيض..
واصوم معهاالايام البيض لكن امي بعد ما كبرت ما تستحمل الصوم السكر كثير يرتفع عندها وانا اصوم
علشان ازين الشهر بصومي ..
تقول عوق وانا امتس ترى الشهر الي ما تصومين فيه لو اثنين والا خميس يفقدتس
لاتخلينه يفقدتس اشياء تنغرس فينا..
واحنا اطفال تظل قواعد ثابته ماتتغير طول حياتنا
امي بدويه على الفطره حتى لماكنت اسمع لها الي نحفظه من القرآن انا وهي بدار التحفيظ لسانها ثقيل بقراءة القران ..
لكن زرعت فيني اشياء من يوم انا طفله..
وكبرت وصارت اساس بحياتي من ضمنها صيامي الي لازم كل شهر اواذا ضقت والا تعسر علي امتحان قالت عوق بنتي افزعي للي ماتنام عينه
يفزعلتس صلي بنتي وهي تنفرج ..
من يوم انا صغيره عمري ما مديت يدي على شي ماهو لي..
امي تقول الشي الي تاخذينه وانتي مالتس حق فيه ينزع الله منه البركه ويروح منتس اضعافه عاجل والا اجل ...
ورزقتس بيوصلتس مهما تأخر
.
.
.
من يوم كنت صغيره وهي كل جمعه بعد صلاة الظهر توقف عند الباب...
وتقول لسواق ينادي عيال جيرانا الصغار..
توزع عليهم ريالات كل واحد ريال لكن سبحان الله فرحتهم بريال امي ماتنوصف عيال جيراناكل جمعه يمرون من عند باب بيتنا ينتظرونها تطلع عليهم وتعطيهم الريال
امي متعوده بعد العصر اذا ماطلعنا لدار التحفيظ تجلس في سور بيتنا السور كبير وفيه مجلس خارجي او ما يسمى مشب ومقابل المشب مزينه لها مظله با السورتجلس فيهابا الصيف وتتقهوى فيها ..
مرات يمرونا حريم الجيران يحبون يجلسون عند امي ويسمعون لها على ان امي ماتعطي احد وجه وصريحه مره ما تعرف تجامل
استغرب على كثر صراحة امي على كثر ما يحبونها حريم جيرانا
وكثير من جاراتنا يستشيرونها وياخذون شورها
مره وحده من الجيران جات تشتكي من زوجة ولدهاكانت معاهم بنفس البيت قالت لها يا ام نايف لاتاخذين زمنتس وزمن غيرتس خلي وليدتس يرتاح وخليه يطلع بزوجته ولا تغثينه وريحي وارتاحي
خليتس من مراقب ولدتس ترى ينفر منتس ترى بعد البيوت مرات يقرب القلوب وقربها يقسيها
كلام امي صحيح البيوت ما تبعد القلوب المشاكل هي الي تنفر الناس من بعضها
.
.
.
صرت اترقب متى بس امي تطلع لمظلتهاوابي الشنطه الي صارت شغلي الشاغل
الشنطه يبي لها وقت علشان اقدر افتحها واشوف الاوراق الي فيها
وامي ما تطول عني لازم كل شوي تناديني تشوف وين انا والا تسألني وش كنت اسوي
اروح وارجع من المدرسه وانا كل ما شفت عهود زاد اصراري على فتح شنطة الاوراق
نسيت اخبركم امي بعد ما وصلت لثالث ثانوي صارت تسمح لي اروح مع الشغاله والسواق بدون ما تطلع معاي فقط للمدرسه وتحسب با الدقيقه متى اطلع للمدرسه ومتى ارجع وطلعت لي حفيظة نفوس
واخيرآجات الفرصه عيال خالي زارو امي وهذي فرصتي الي ما راح تتكرردخلت غرفة امي وافتح درج عند امي والقى شنطة الاوراق
وهذي اول مره في حياتي امد يدي على شي وانا خايفه احس اني قاعده اسرق الشنطه من زمان عند امي وموجوده قدام عيوني ولا عمري فكرت حتى المسها ولا اقربها الا اذا امي طلبت مني افتحها
سمعت صوت الشغاله تنادي
تقول عوق ماما كبير يبغاك با المجلس قلت خلاص جايه
وبسرعه رحت با الشنطه لغرفتي
وطلعت لأامي وانا الهث من الركض...
والخوف ولو سألت امي وش تسوين ..!!
اكيد بفل السبحه من الخوف
لكن امي بعد ما طلعو ا عيال خالي كانت تعبانه ونادتني تبي علاجها
عطيتها العلاج لكن ما نفعها زاد تعبها
على طول اخذت امي للمستشفى ونفس الكلام امي مرتفع ضغطها نتيجة انفعال والحمدلله مرت على خير
ورجعنا للبيت ونسيت الشنطه مع خوفي على امي
دخلت غرفتي ابي انام منهده من التعب فتحت دولابي ببدل ملابسي والقى الشنطه
طار النوم من عيوني...!
قفلت غرفتي..
خفت امي تدخل وتشوف الشنطه معاي ..
على طول دخلت الحمام وفتحت صنبور المويه..
لأن غرفتي نظام جناح علشان لو مرت امي والا ارسلت الشغاله تسمع صوت المويه وتحسبني با الحمام..!
فتحت الشنطه وادور في الاوراق كان فيهاصكك بيتنا وصكوك بيوت لأمي
امي بعد ما طلعت لي حفيظة نفوس اخذتني للمحكمه وسجلت بيتنا با اسمي واراضي عندهاوبيوت مأجرتهم
وفتحت حساب با اسمها خاص لي لأن عمري 18سنه ورفضوا ذيك الفتره انهم يفتحون لي حساب امي كانت توقع بختم والختم كان عندها يعتبر شي ثمين ومحتفظه فيه مع الاشياء الثمينه عندها
اوراق قديمه تملى الشنطه ما ادري ليش محتفظه فيها...!
اول شي فتحت حفيظة النفوس حقت امي قلت بحسب عمر امي طلع عمر امي 84سنه ماهو 80يعني معقوله ولدتني وهي 66سنه
هذا اول سهم ضربني بقلبي وهد حيلي
.
.
.
حسيت بدوخه واني بس ابي استفرغ ..
لكن
تماسكت هذي فرصتي الوحيده الي اقدر اعرف وش داخل الشنطه الي من انولدت وهي موجوده ولا عمرها الفتت انتباهي ...
بحثت با الاوراق
لقيت ورقه صك وفاه لكن با اسم شخص غريب..
اسم رجل لكن ماهو اسم ابوي...؟
من يترى الي امي محتفظه بصك وفاته...؟
في ورقه ان امي ارملة ها الشخص لكن امي سمعتها تقول انها تزوجت اكثر من مره ولا حاولت اسألها عن اي شي يخص زواجها
استحي منها ودايم تقول عيب البنت بس تنشد عن السوالف الي ماتخصها
دورت على صك وفاة ابوي...!
ما لقيت الاورقة تفويض لواحد اسمه مثل اسم واحد من عيال خالي...!
لكن اسم ابوه نفس اسم الشخص الي مكتوب ان امي ارملته ...
و انه يكون وكيل امي يعني وكيل امي ولد زوجها المتوفي
خالي ما شفته بس عياله اثنين كبار واختهم وحده يجون امي على فترات متباعده عندنا واحنا نحضر منا سبتهم وبسرعه نرجع امي ما تحب تطول عند اي احد تقول انا وبنتي مانرتاح الا في بيتنا على ان بيت امي وبيوت عيال خالي بنفس المنطقه يبعدون عن بيتنا اقل من ساعه
رجعت بسرعه لصك الوفاه لقيت انه فعلن متوفي من 24سنه يعني قبل انولدب6سنوات
.
.
.
طيب انا وين اسمي وين الي يخصني
و
لا في أي ورقه تخص ابوي قعدت ادور مثل المجنونه لقيت شهادة ميلاد قريت الي فيهاوياليتني ماقريتها
.
.
.
انهرت بعد مالقيت شهادة ميلادي الي موجوده معي من الولاده لكن عمري ما فتحتها مافيها اسم امي
ورقه من الاماره ومحضر من الشرطه عمرها 18سنه بعمري تعهد من امي وضحى انها تراعي الطفله مجهولة النسب عوق بنت عبدالله عبد الملك احمد
وتربيها تربيه اسلاميه وتراعي الله فيها
.
.
.
دارت الدنيا فيني وقفت بفتح الباب فتحت المفتاح وطحت ما صحيت الا على صوت امي والخدامه ومغرقه ملابسي مويه
وامي تبكي \ وش الي جاتس بسم الله عليتس من روعتس
ورى شنطتي بغرفتس
آرتبكت عوق بـ ألم..وفضلت الصمت وهي تجمع آشتاتها...
وتدخل الحمام...!
.
.
.
ي غصن بلا ورق
من اليباس انت والا بعدك خضر
مدري ي غصن
بس اه ي غصن من نوح الحمامه هذيك على طرفك
وش هو نوح الحمام
الا من انين جوفه
وعبره انحبست
ماعرفت لها طريق
.
.
.
غيرت ملابسي ودخلت سريري بدون ولا كلمه وامي تناظرني وهي منصدمه
ماتدري وش جاني
نمت نوم متقطع وكوابيس و احس احد كابس على نفسي وصحيت نص الليل كل جسمي عرقان على ان الجو كان ربيعي
شغلت نور الغرفه الا امي نايمه عندي با الغرفه على الارض من يوم حست با النور صحت
وتناظرني..!
ام عوق\ وش فيتس يا بنتي روعتيني ماعادت رجولي تشليني من خوفي عليتس تحسين بشي يوجعتس شي تبين المستشفى
رحمت حالها ..!
عوق\ مافيني شي يمكن الي فيني كان من ضغط الدروس
ام عوق\ عوق ورى شنطتي بغرفتس
.
.
.
انلجم فمي ما ادري وش اقول...؟
امي معاها الضغط..!
ولا تستحمل احد يعاتبها..!
.
.
.
عوق ب ارتباك\ يمه الشنطه احتجت حفيظة النفوس حقتي المدرسه يبونها علشان البيانات الشخصيه
بلعت ريقها ب الم\يمه كل البنات الي في ثالث ثانوي يطلبون منهم اثبات واوراق علشان شهادة الثانويه العامه
والعصر عيال خالي عندتس ولا بغيت ازعجتس اخذت الشنطه لغرفتي
ام عوق\ الحمدلله ولا عاد تعودينها اذا بغيتي شي اطلبيه
وانا اطلعه لتس والا نسيتي اني اعرف اقرا ودارسه نحو الاميه..؟
عوق ب احمرار\ ابشري ما اعيدها
ام عوق\ اجل قومي صلي الي فاتس يا امتس واشحذي ربتس من فضله
قامت امي من عندي وانا مستغربه ان امي كيف ما شكت اني عرفت الحقيقه المره اني لقيطه مجهولة النسب
وكلام عهود صحيح
وانا نفسي كيف ماعرفت ان في شي بحياتي غلط..؟
اشياء كثيره تدل ان فيه شي مو طبيعي...؟
انا وحيدة امي....
وامي كبيره بالعمر...
ماعندي اقارب من جهة ابوي اقارب امي وبس
آآآآآآآه يا راسي بينفجر...,
من التفكير...
طيب انا وش اسوي الحين اخبر امي اني عرفت الحقيقه..؟
اخاف اقولها تتعب والا يجيها شي..!
وانا وين اروح مالي الا ربي وثم امي...!
يارب افرجها علي...
واجعل لي من امري هذا فرجا ومخرجا
بصلي وانام العبد با التفكير والرب في التدبير...,
صليت الي فاتني ورحت لغرفة امي واحضنها وانام مثل يوم كنت صغيره اشم ريحتها ريحت الحنان حسيت با الامان بحضنها
.
.
.
صحيت الفجر وامي كانت تصلي يوم خلصت صلاه حسيت وجه امي متغير...
عوق ب استغراب\يمه فيتس شي..؟
ام عوق\لا بس ماتعودت اسهر والبارح بعد ما لقيناتس طايحه
مانمت زين من خوفي عليتس وحتى انتي يوم جيتي تنامين عندي بعد ما ارتحتي بنومتس
عوق\كيف فتحتي الغرفه علي..؟
ام عوق\ فقدتس وارسل عليتس الشغاله قالت عوق با الحمام اسمع صوت مويه وطولتي ومن عقبهاخفنا..
نطق الباب مارديتي حركة يدة الباب ..!
ولقيناه مفتوح وانتي طايحه عنده والحمام مفتوح والمويه تصب الحمدلله انتس ما قفلتي على روحتس
.
.
.
طلعت للمدرسه واليوم حالي غيرامس كل شي تغير بعيوني داخلي ماهو مكسور وبس الا محطم تحطيم الزجاج
تحطيم مامن وراه صلاح وحتى الي بيصلحه بتشوه ايدنه من التصليح
كان حلمي ان عندي عايله يجمعنا بيت واحد صار حلمي بس اب اشيل اسمه
غريبه بين الناس مهما كثروا معارفي
انا لقيطه يعني بنت حرام ياترى كنت بيوم امشي بشارع وابوي معي بنفس الشارع ولا عرفني ولا عرفته
والا يمكن درست مع خواتي وامي تحضر مجلس الامهات ولا درت اني موجوده بين البنات
وحتى لو عرفتني اكيد ماتبي تشوفني اذكرهابا العار..؟
الي بسبته اكيد حذفتني عندباب مسجد..او.. عند حاوية قمامه
.
.
.
عار
هو انا عار
ذنب كبير يغضب الرب
و
يسود وجيه الرجال
عار
تندس فيه الارواح ب القبور و تطير فيه عقول ارجح
الرجال
.
.
.
او
يمكن امي مالها ذنب انخطفت او احد ضحك عليها وغرربها
اويمكن كل افكاري غلط يمكن ضعت من اهلي ولا عرفوا مكاني
ودورو وتعبوا ماحصلوني
يمكن اصلن انا اهلي مو سعوديين ضيعوني هنا وفقدو الامل يلقوني ورجعو لبلدهم
.
.
.
تهت عنك يمه
ايه تهت
ضيعتيني يمه
دورتي عني كثير انبح صوتك ي ينادي
يبه ضيعتني يبه
وين الطريق الي تهت عنك فيه يبه
وش كان
وش صار
دورتني يبه بس ماحصلت الا بقايا عبرتي
او بقايا صوره مشوهه
.
.
.
(كلمه اخيره)
يوم عاشوراء هو أفضل يوم في شهر المحرم، فيقع صيام يوم عاشوراء في منزلةٍ تلي منزلة صوم عرفة، ذلك أنَّ صيام يوم عرفة يكفِّر سنتين، أما صيام عاشوراء فيكفِّر سنة واحدة، وإن تكفير سنةٍ كاملةٍ لا شك في أنه خير كبير وفضل عظيم أيضًا، فَعَنْ أَبِي قَتَادَةَ رضى الله عنه قال: قال رسول الله صلى الله عليه وسلم: «...صِيَامُ يَوْمِ عَرَفَةَ أَحْتَسِبُ عَلَى اللَّهِ أَنْ يُكَفِّرَ السَّنَةَ الَّتِي قَبْلَهُ وَالسَّنَةَ الَّتِي بَعْدَهُ وَصِيَامُ يَوْمِ عَاشُورَاءَ أَحْتَسِبُ عَلَى اللَّهِ أَنْ يُكَفِّرَ السَّنَةَ الَّتِي قَبْلَهُ
الي الملتقى قريبآبأذن الله
طيف الأحباب
ام الوليد