[لامارا]

الجزء الخامس عشر
انتهى العام الدراسي وجت العطلة الصيفية فرصة الناس للمتعة والتمشي والعروس اللحين عرس خالد وحنان اللي حبو بعض من سنين وكبر حبهم معهم بس تو الناس على قصتنا هي في نصها أو أقل من النص
لطيفة ترسل لسالم مسج:سالم ما أقدر أكلمك بس حبيت أقولك لا تدق علي لأني وايد مشغولة اليوم عرس اخوي خالد
سالم بالمسج:مبروك
لطيفة:الله يبارك فيك
سالم يرسل:عقبالنا
لطيفة:أنشالله الله يسمع منك ويجمعنا مع بعض طووووول العمر
سالم:وشصار عن طلعتي معاج؟
لطيفة:والله انك فاضي خلاص لاترسل أنا وايد مشغولة وأجل الموضوع لوقت ثاني
سالم يرسل:
في خاطري لك شي ودي أقوله
مدري تصدقني أوتقول كذاب
قلبي يحسك دايم الدوم حوله
مع كل دقة يذكرك يا أغلى الأحباب
تدري عليك الروح بالحيل توله
وتدري بعد طيفك عن العين ماغاب
لطيفة تضحك وترسل:مينووووووووون(مجنون)
سالم يضحك ويرسل:مجنونج
لطيفة استحت من هالكلمة
سارة تدخل الغرفة:يلا لطيفة تأخرنا عن الصالون
لطيفة:أوكي جاية يلا نمشي
ام ناصر:يلا وينكم ننطركم وانتو قاعدين
سارة:أنا كنت اناديها
ام ناصر:يلا يلا امشو عشان الوقت
لطيفة:وصلو آلاء والعروس الصالون؟
ام ناصر:أي وصلو من زمان
لطيفة:عيل خنمشي لا نتأخر
.............................................
في القاعة عند الرجال
يوسف يسلم على خالد:مبروك يالمعرس
خالد:الله يبارك فيك عقبالك
يوسف:مشكور.....اللحين الصغير تزوج ومابقى الا عزيز
عبد العزيز:تو الناس
يوسف:أي تو الناس أخوك الصغير اللحين تزوج وانت بتطق الــ27 وماتزوجت
عبد العزيز:نلحق خير
ناصر:هاذا هو عنيد حتى امي تقوله بدور له على بنت الحلال بس هو دايماً يصك الموضوع
خالد:اللحين بتقعدون تسالفون عن الزواج تزيدوني نار جيبو سالفة ثانية
يوسف:الله شدعوة يوم زواجك وتقول تزيدوني نار!
خالد:نار الشوق يابعدي...أبي أدخل على العروس
يوسف:العروس للحين ماخلصت أصبر شوي
خالد:أف ماني قادر اصبر
عند الحريم>>>
كانو البنات جالسات مع بعض لطيفة وفاطمة وآلاء وسارة وأماني وكانو يسالفون بطاولة بروحهم
لطيفة:والله راحة لنا طاولة بروحنا وبس
آلاء:أحسن من الخلطة اللي مامنها فايدة
فاطمة:شعليكم اخوانكم بيتزوجون محظوظين
أماني:ويعة وانا وين رحت مو أنا متزوجة من زمان!
سارة:وجبتي ذا الخبل البطة
أماني: الله يسامحج ياسارة
لطيفة:قولي برميل
أماني:ويعة أنتي وياها قولوووو ماشا الله على ولدي
آلاء:ما شالله على ولدج يا أماني عليه صحة مادري شتأكلينه
أماني:أحسن عيل تبين ولدي ميت ماياكل شي
آلاء:هههههههههه......خلونا من هالهذرة وقولولي مين تتمنى تكون العروس الجاية بعد حنان؟
تمو الأربعة يطالعون ببعض
فاطمة:اممممممممم...لطيفة
لطيفة:يمى بسم الله مالقيتي الا أنا تحطينها فيني ليش ماتكونين انتي؟!!!
فاطمة:أنشا الله تكونين العروس بعد حنان؟
لطيفة:وليش ماتكونين انتي؟
فاطمة:مو اللحين
لطيفة:انزين معليه يارب أكون العروس بعد حنان الله يسمع منج
الكل:ههههههههه
آلاء:يمى منج تبي تتزوج بسرعة
لطيفة:الزواج ستر..وبعدين لاتخافين أتغشمر
آلاء:ليه؟
لطيفة:لأنج أنتي بعد حنان
آلاء:هاهاهاي
أماني:عن اذنكم بروح شوي وبرجع
ويكملون سوالفهم
لطيفة:أيه انزين شيضحك؟
آلاء:أنا ماعندي حبيب بس انتي عندج
فاطمة:أي صح لطوف عندها حبيب
لطيفة:مو شرط
آلاء وهي تبتسم:لا شرط حبيبتي
لطيفة:وبعدين يا آنسة ألاء يوسف وين راح؟
فاطمة:ووووووع شتبي في وويسف؟!
لطيفة:لحظة شوي نبي نسمع
آلاء:هههههههه يوسف مجرد صديق
لطيفة:بعد في أصدقاء وأحباب والله حالة
فاطمة:أصلاً الصداقة بين جنسين مختلفين ماتصلح ولا تناسب مع مجتمعاتنا ونهايتها حب بس على إطار الصداقة أو يكون الضياع
لطيفة:كلامج مضبوط100%
آلاء:حتى فطيم صارت فيلسوفة
سارة:أفففف شالسوالف السخيفة صداقة وحب مدري شنو
آلاء:أنتي شتبين يا ام لسانين!
لطيفة:هالبنت ملقوفة لأبعد الحدود
فاطمة:يمى شلون تتحملين هالبنت يا لطيفة؟!
لطيفة:والله شسوي القدر خلاها أختي
سارة:حمدي ربج ان عندج أخت مثلي
لطيفة:مشا الله لييييييييه؟
سارة:لأني بنت مرحة وحبوبة وحلوة
لطيفة:ومزعجة وملقوفة
سارة:لا تكفين انتي تراج ألقف مني
آلاء:وانتو كله تتناجرون جذي!
لطيفة:يعني شدعوة أنتي اللي ما تتهاوشين مع حنان
آلاء وهي زعلانة:ألا الصراحة أتهاوش بس من اليوم ورايح مافي هوشات
لطيفة:يعني بتشتاقين لحنان؟
آلاء:أكيد وايد
سارة:بس إذا تزوجت لطيف ما أعتقد اني راح أشتاق لها
لطيفة:ماااااااالت عليج هذا ويهي أن مابجيتي بعد
سارة:ويييييييييييييييي ليش ابجي بالعكس أسوي حفلة أنج بتفارقينا ونفتك منج
لطيفة بسخرية:عاد نشوف إذا جا هذا اليوم
فاطمة:أي والله خلي أختج تنخطب ويصير خير
لطيفة:ويعة يعني بعنس
فاطمة:من كبرج عشان تعنسين مو قصدي جذي قصدي نشوف أختج شبتسوي إذا تزوجتي
لطيفة:ولا تنسين سالفة الخطبة
فاطمة:أتذكرها
لطيفة:آلاء متى تجي أختج العروس؟
آلاء:لحظة الحين بشوف وانتو ماراح تييون؟
فاطمة:لا نبي نشوفها وهي على الكوشة أحسن عشان تكون الفرحة من قلب
راحت آلاء لحنان كانت حنان تجنن روعة طبعاً وهي العروس فستانها منفووووش حيل وعاري من عند الصدر
آلاء:ياحلاااااتج يا حنان بس يلا عجلي الحين وقت خروجج للكوشة
حنان:خايفة
آلاء:خايفة من شنو؟
حنان:خالد متى راح يدخل؟
آلاء:مادري بس يلا عجلي بلا هذرة زايدة
حنان:أي والله صج
قبل ما أكتب دخول حنان أبي أوصف لكم البنات وحدة وحدة
آلاء بما أنها أخت العروس فكشختها زايدة فستانها كان ذهبي قصير بس مقصقص من تحت يعني إذا مشت قطع الفستان تروح وتجي على رجولها وتسريحتها شعرها مرفوع مرة حلوة والفستان حلو عليها ومناسب على جسمها لأنها شوية متينة ومكياجها ذهبي.لطيفة كانت حلوة وتهبل فستانها بنفسجي طويل لكن عاري من فوق ومافي من فوق ألا عند صدرها ألا خيطين يتلاقون بنص الصدر ومنطقة البطن فيه خرز وتصميمه فرنسي مرة حلو وتسريحتها يابانية وخصل من شعرها طايح على وجهها مع الخصل الحمرة.فاطمة فستانها فوشي يهبل علاقاته تلتلقي في الرقبة وتسريحتها حلوة وخصل ناعمة نازلة من شعرها المرفوع يعني كانت روعة.سارة بما أنها صغيرة فلبست فستان عنابي يهبل طويل ومن ورا أطول وعاري من فوق والفستان مرة ناعم وحلو وتسريحتها ناعمة وكان شكلها ناعم .أماني بما أنها متزوجة وبنت كبيرة ففستانها بيج مرة حلو وصاخب فيه قصات حلوة من تحت وفوق وتصميمه فرنسي وعاري شوي وتسريحتها كبيرة ورفيعة يابانية مرة حلوة.
بكذا خلصنا وصف البنات واللحين خلونا عند العروس حنان.كان فستانها حلو مرة منفوش ومزخرف وقصات من كل الجهات وتسريحتها شي رهيب شعرها مرفوع وخصل طايحة لوجهها ومكياجها ذهبي.
دخلت حنان على الناس وبدا الطق والتلولش من كل ناحية في الصالة دخلت بكل بطء والبنات ساعدوها... وجلست عند الكوشة وقام الطق وقامو البنات يرقصون.... بعدها جا خالد والبنات قامو يطالعون فيه كان ذاك اليوم حلو وكشخة ورزة
آلاء:وجع أخوج صاير يهبل شمسوية فيه؟
لطيفة:ههههههههه مسنعته ياعمري
فاطمة:لا والله صج خلود اليوم صاير حلو
لطيفة:أكيد شفيكم هو المعرس
آلاء:أحس انه مو خالد يمكن غيروه هو عادي وايد بس اليوم صاير شي غير
لطيفة:عيييييييب ترى الريال متزوج
آلاء:لا تخافين ماراح نحسده
لطيفة:أقول قومو نشوف العروسين شيسوون شكلهم قاعدين يمرون بأجواء رومانسية
خالد وحنان كانو جالسين على الكوشة
خالد:فرحانة ياعمري؟
حنان:أكيد فرحانة أحس ان الدنيا ماتوسعني
خالد:وأخيراً
ابتسمت له حنان أحلى ابتسامة
وقام الغنا على غنية صاخبة وقامو البنات يرقصون ومنهم فاطمة ولطيفة وآلاء وسارة وأماني وصديقات حنان بعد كذا وبعد ماقرب يفضي المكان
راحو البنات يباركون للمعرس والعروس
لطيفة:مبروك ياخوي
خالد:الله يبارك فيج
لطيفة تسلم على حنان:مبروك حنان
حنان:الله يبارك فيج عقبالج
لطيفة بابتسامة:مشكورة حبيبتي
فاطمة:مبروك حنون والله ماتخيلت شكلج وانتي عروس
حنان بدلع: ههههه شدعوة
فاطمة:والله مو مصدقة بتاخذين فارس الأحلام
حنان:فطووووم
فاطمة:ههههههه مبروك خالد
خالد:الله يبارك فيج
فاطمة:دير بالك زين على حنان تراها غالية علينا
خالد:حنان أحطها بعيوني هي غالية على الكل
حنان استحت
لطيفة:يلا فاطمة نمشي تأخرنا حيل
فاطمة:أي والله نخلي العروسين مع بعضهم
وسلمو عليهم وتركوهم
.................................................. ...
رهف كانت داخلة لبيت بو راشد
رهف:يبى...حمد...نور... وين راحو؟
نور نزلت وشافت أختها وهي على الدرج واندهشت
نور بفرح:رهف!(وراحت ولمتها)متى جيتي يالخايسة وليش ماقلتيلنا انك جاية؟
رهف:كنت بسويها لكم مفاجئة...وين أبوي وحمد؟
نور:أبوي كالعادة في الشركة وحمد مثل ما تعرفينه طالع
رهف:اشتقت لكم
نور:واحنا بعد...قوليلي شسويتي هناك وناسة؟
رهف:أكيد استانسنا شرايك أنتي
نور:طيب قوليلي كل شي سويتوه أنتي وحسن هناك من وصلتو باريس إلين اللحين...تعالي وين رجلك؟
رهف:خلاني عندكم بعد ماسلمت على امه وابوه ورجع للبيت
نور:المهم قولي وشصار هناك بباريس؟
.................................................. ...
ريم كانت جالسة مع ابوها صالح(تذكرونها)
ريم:يبى خالتي حصة وين راحت؟
صالح:راحت تشوف عيالها وتقول توها طالعة منهم مسكينة مشاكل عيالها ما تخلص
ريم:ليش شالجديد؟
صالح:ولدها يتعاطى مخدرات
ريم:سالم؟
صالح:لا سلمان شفتي البلوة!
ريم:يا الله والله مسكينة خالتي ام سالم ماتستاهل هالمشاكل اللي تجيها... انزين شبتسوي؟
صالح:مادري أكيد بيعالجونه من الادمان
ريم:بس ترى صعب خاصة إذا كان النوع اللي يتعاطاه قوي أو هو مدمن من زمان
صالح:عارف بس شنسوي
وبعد ماخلص كلمته جت حصة
حصة وهي ضايق خلقها:السلام عليكم
صالح وريم:وعليكم السلام
صالح:هاشخبار عيالج؟
حصة:لا أنا لازم أودي ولدي المستشفى مايصير جذي ولدي بيموت من السم اللي ياخذه
ريم:لازم تودونه بأسرع وقت
صالح:صح كلام ريم بأسرع وقت ترى أن ما وديتوه اللحين حالته بتزيد سوء
ريم:طيب شلون سالم؟
حصة:سالم مثل ماهو دوم يطلع لا وماله خلق يحاجيني
صالح:عيالج يا حصة يحتاجون لرعاية واحد طايش وممكن يضيع بالطريج الخطأ وواحد مراهق وطاح بمشكلة ماندري متى بنخلص منها وهو في هالسن بيكون في أقصى حاجة لج ولأبوه لازم تهتمين بعيالج
حصة:شلون تبيني أهتم بعيالي أجابلك ولا أجابلهم ولاتبيني كل يوم اروح لهم وتقول هذي كله مع عيالها؟!!!
صالح:لا مو قصدي جذي أنا قصدي تراعينهم تسألينهم شنو يبون وشنو مايبون تتكلمين معاهم...وهذا مو بس انتي تسوينه حتى يعقوب لازم يهتم بعياله مو دايماً هاملهم
حصة:تعبت منهم هم وابوهم بعد...سالم ما يسمع الكلام وعنيد...وسلمان فلت من أيدي وراح لأصدقاء السوء اللي ودوه للطريج الخطأ...وبوسالم ماحد يقدر يتكلم معاه شتبيني أسوي؟
ريم:معليه ياخالتي أبوي ينصحج بس
حصة:كلام أبوج صحيح أنا صج غلطانة بحق عيالي وايد....وايد....
...............................................
سالم كان منسدح على الكنب ومسند أيده ورا راسه ماسك الجوال كالعادة يتصل بلطيفة وهي كانت ترتب سريرها وشافت انه هو وقفلت جوالها
سالم:هذي شفيها بعد؟!أقول أكلم أبرار
ويتصل فيها وترد
أبرار:ألو هلا والله
سالم:هلا بالقمر ياهلا والله شلونج
أبرار:عايشين الحمد لله
سالم:أنا بصراحة زعلان منج
أبرار:ليه حبيبي شفيك؟!
سالم:يعني بس أنا اللي أتصل وانتي أبد ولا تسألين عن حبيبج
أبرار:سوري حبيبي والله آسفة بس ماعندي وقت
سالم:أفااااا يعني في أشياء شغلتج عني؟
أبرار:ولاشي يقدر يشغلني عنك بس تدري الدراسة حنا مو في أي كلية حنا في كلية الطب بس اشوى خلصنا بعد تعب الاختبارات
سالم:وياحلاتها من كلية
أبرار:هههههه مع انها أصعب كلية وتقول ياحلاتها من كلية؟!
سالم:خلي صعوبتها على جنب أنا أقول ياحلاتها من كلية لأني فيها التقيت فيج وتعرفت عليج
أبرار:وأنا بعد مثلك تذكر يوم نلتقي أول مرة كنت بالأول معجبة فيك تذكر؟!
سالم:ههههههههه أي نعم أذكر كنتي كلما تشوفيني تصدين نظرج عني وانتي تبتسمين ورفيجاتج يجننونج
أبرار:ههههههه وكنت دايماً تحرقني بنظراتك
سالم:ولا يوم كنتي تركضين وصدمتي فيني وأنا مسكتج من خصرج وانا أدري انج كنتي متعمدة
أبرار:أوه شلون عرفت؟
سالم:بذكائي هههههههه
أبرار:كانت أيام ولا أحلى كنت استحي منك وايد ورفيجاتي يزودوني حيا واذا جينا نمشي مع بعض ولا نتكلم ربعنا يصفقون لنا ويصرخون إحراج
سالم:أي والله حتى أنا أنحرج
أبرار:....سالم...بقولها على طول ومن دون مقدمات..أبيك تخطبني
سالم:تو الناس لازم نعيش حبنا شوي
أبرار:أي تو الناس ترى الدنيا مالها أمان
سالم:لاحبيبتي شدعوة لاتخافين هذا اليوم راح يجي....بس أبي أطلب منج طلب
أبرار:آمر
سالم:أبي أطلع معاج
أبرار:متى؟
سالم:اليوم يلا علشان خاطري
أبرار:أي يا سالم بس...مادري
سالم:شنو اللي ماتدرين يلا ترى أزعل عليج
أبرار:أوكي حدد المكان ونتقابل
سالم:أي هذي عيوني
.................................................. ..
نجي لسلمان كانت حالته تزيد سوء من سيء لأسوأ يشم ولا همه ولا حاس بالدنيا ولا مهتم بدراسته أو أي شي ثاني همه هو السم اللي ياخذه المخدرات وبس بيضيع حياته ومستقبله وشبابه اللي توه في بداية العمر في سن يحتاج فيه لامه وابوه بس ياترى سلمان بيتعالج من المخدرات ولا لا؟
.................................................. ......
سارة:ليه؟
لطيفة:شنو اللي ليه؟
سارة:ليه مارديتي عليه؟
لطيفة:الله يعني أنتي تبيني أكلمه...هذا بدل ماتقولين زين
سارة:لااااااااا أحسن أنج حقرتيه بس غريبة مو من عوايدج!
لطيفة:والله أنا أشوفه شي عادي
سارة:ماتخافين انه يزعل؟
لطيفة:ليه يزعل أنا ماسويت شي غلط بس صكيت الجوال
سارة:بيقول انج ماتبين تحاجينه
لطيفة:خليه يقول والله إذا فكر هالتفكير بيكون أنسان سخيف وحساس
سارة:ماقالج انه بيي يتقدم لج مرة ثانية؟
لطيفة بارتباك:لا....لا ما قال بس أكد لي ان احنا لازم نتزوج
سارة:أنا أقول شكله ندم انه تقدم لج لا يلعب عليج ترى أكثر الشباب جذي
لطيفة:لا تظلمينه حرام هو يحبني ويبي يتزوجني مثله
سارة:نشوف بس لوتزوجتيه بتتعذبين معاه
لطيفة:ياسارة ترى مليت فكيني من هالسالفة واللي يرحم والديج أنا زهقت
.................................................. ...
سالم وهو جالس مع أبرار في المقهى
أبرار:شكنت تبي مني؟
سالم:ماشي بس اشتقتتلج وابي اشوفج واسالف معاج
أبرار:أنا اللي أبي منك شي
سالم:قولي
أبرار:سالم أبيك معاي أنا وبس
سالم:وأنا معاج
أبرار:دوووووم معاي طول العمر
سالم انربط لسانه مايدري شيقول:قصدج نتزوج؟
أبرار:أي...أنا عارفة انك ذكي
سالم:أي بس....
أبرار:بس شنو شنو عذرك؟
سالم:أي بس يا أبرار....أنا للحين ما كونت نفسي وما اشتغلت وتعرفين أنا يمكن أدرس برة
أبرار:مصمم على دراستك برة؟
سالم:مادري يمكن
أبرار:أوكي خل كل هالأشياء على جنب إذا كنت تحبني صج وانا مو شاكة في هالشي تعال وتزوجني
سالم:...........أنا صج أحبج بس مثل ماقلتلج أبرار في أشياء كثير مانعتني
أبرار:ممكن اعرفها؟
سالم:اللي قلتها لج قبل شوي
أبرار:هذي أسباب أسمحلي سخيفة ياما ناس في مثل حالتك وتزوجو
سالم:كيفج إذا ماتبين تصدقيني
أبرار:أدري ليش مانعتك.....سالم أنا أعرف ان ثلاثة أرباع البنات بالجامعة معجبات فيك وأنت تكلمهم والمشكلة انك ما تقدر تمنعهم منك لأنك تحبني ...أنا أعرف كل هذا ...بس أسكت وما أقول شي
سالم:شلون تعرفين؟!
أبرار:مو مهم الله يسلم البنات
سالم:أبرار هاذولا مجرد بنات...وبعدين حتى أنتي ماتقصرين
أبرار:مافهمتك ما أقصر في شنو؟!
سالم:مو عندج ربع شباب؟!
أبرار: مو ربعي...صحيح اني عادي أتحجى معاهم وامزح معاهم بس مو ربعي أنا ماعندي Boy friend غيرك
سالم:ولو أنا ما أرضى جذي
أبرار:هههههههه من متى صرت متحفظ؟
سالم:أنا أغار عليج وانتي تتمصخرين علي مايصير تحاجين شباب غيري سواءً بالجامعة أوغيرها
أبرار:ليه؟
سالم هذي مايبيلها كلام لأني أحبج وأغار عليج
أبرار:والله احنا ماعندنا هالحركات يا سالم حتى لو تحبني وتغار علي حنا ناس متطورين مو عايشين في التسعينات عشان تمنعني من اني أتحجى مع زملائي الشباب وامزح معاهم
سالم:إذا تركتي هذا الشي أنا أوعدج اني أترك البنات
أبرار:آسفة يا سالم ما أقدر لأنه شي سخيف أنا ما توقعتك جذي توقعت تفكيرك أرقى وأحدث
سالم:هذا من خوفي عليج وحبي لج
أبرار:بس هذا مايسمونه حب هذا غيرة أو شك أنا ما أحب جذي أنا بنت عادية صحيح اني غنية بس تصرفاتي عادية
سالم:يعني أنتي مصممة على انج اتمين على حالج؟
أبرار:أي نعم حالي مافيه شي وانا ماسويت شي غلط شمعنى اللحين تحكم علي؟
سالم:لأن حبي لج يزيد
أبرار:بس اللي تقوله يقول شي ثاني أترك الأشياء المتخلفة عادات وتقاليد مدري شنو حنا متطورين وفي سن الشباب
سالم:أنا ما تكلمت عن العادات والتقاليد ولا جبت طاريها بس كل حبيب فيهالدنيا يغار على حبيبه
أبرار:كلامك صح بس هذولا مجرد زملاء معاي بالجامعة واللحين تخرجنا
سالم:يعني شنو وبعدين؟
أبرار:ولاقبلين أنت اللي بديت بالموضوع
سالم:وأنا اللي راح انهيه
أبرار:شفيك زعلت؟
سالم:أنا مازعلت..أنا اللي المفروض أسكت وانطم وأنجب شرايج؟!!
أبرار:لا حبيبي مو قصدي جذي لا تنكتم ولا تنجب لاتعصب بس أنا أبرر لك اللي يصير
سالم:خلاص أبرار أنا مو زعلان
أبرار:أثبتلي
سالم:شأثبتلج؟
أبرار:أنك مو زعلان
سالم بملل:شلون؟
أبرار:بطريقتنا المعروفة
سالم:أحبج
أبرار: أي جذي أعرف انك رضيت علي
.................................................. ......................
أم حسن تنادي رهف
رهف وهي فاتحة باب غرفتها بملل:نعم خالتي
أم حسن:رهف يمى قومي ساعديني على الغدا
رهف:والخدامة
أم حسن:الخدامة غير وبنت البلد غير الخدامة ماتعرف تطبخ
رهف:أنا توني راجعة من السفر
أم حسن:مافهمتك!
رهف:يعني صار لي أسبوع وأنا راجعة يعني توني عروس بتشغلوني من أولها ماصدقتو أرجع من السفر وتشغلوني؟!!
أم حسن:لا يا بنيتي مو قصدي كذا أنا تعبانة والخدامة تاخذ راحة أبي زوجك يذوق طبخك
رهف:ما أعتقد أن زوجي يرضى لزوجته المذلة تطبخ
أم حسن:والرجال ما ياكل من أيد مرته؟!
رهف:لا ياكل بس مو من أمر أي أحد من أمره هو وأنا بكيفي إذا اشتهيت مع اني مااعرف أطبخ
أم حسن:يعني ماتبين تساعديني؟
رهف بجرأة:لا مابي أساعدك رجاءً خالتي مرة ثانية لاتطلبين مني أني أجي وأساعدك على الطبخ إذا كان على مزاجي جيتلك مع ان هذا يكون في الأحلام
أم حسن بزعل:خلاص يا بنتي أنا ماقلتلك شي تصرخين علي
رهف:أنا ما صرخت أقولك أني مابي أجي معك مافيها شي
أم حسن:الله يسامحك
رهف:يا رب
وراحت أم حسن وهي زعلانة
رهف:بالطقاق
.....................................
خالد وهو ينادي حنان:حنان...يلا حبيبتي تأخرنا
حنان:OK جاهزة..جاهزة
خالد:يلا تأخرنا الطيارة راح تقلع
حنان بعدما خلصت اللي بأيدها:خلاص خلصت...شرايك فيني؟
خالد:قمر تهبلين...راح تصكين على كل اللي بالمطار
حنان:مشكور
خالد:يلا نودع أهلنا ونروح المطار
حنان:يلا
..................................................
سالم وهو يكلم لطيفة
سالم:تكفين الله يخليج
لطيفة:ما أقدر يا سالم ما أقدر
سالم:ليش ما تقدرين؟
لطيفة:ليش أولاً؟
سالم:للمرة المليون أقولج علشان أهلنا يوافقون على انهم يزوجونا
لطيفة:بس؟!
سالم:وعشاني وعشانج نكون مع بعض وأهلنا ماراح يحصلونا ومثل ماقتلج نشرط لهم إذا بنرد لهم يوافقون يزوجونا
لطيفة:قصدك نشرط لهم انهم لازم يوافقون على ان احنا نتزوج؟
سالم:أي صح..يلا عاد
لطيفة:والله مادري شقولك يا سالم
سالم:لا تقولين ولاماتقولين انتي أن وافقتي ما ارح تخسرين شي وصدقيني هذا الشي اللي بنسويه علشان مصلحتنا
لطيفة:أن احنا نهرب؟!
سالم:لا مو نهرب نثبت للكل شكثر حنا نحب بعض
لطيفة:بس بهالطريقة؟!
سالم:عيل شنو!
لطيفة:يعني مافي طريقة غيرها؟
سالم:للأسف مافي طريقة غيرها
لطيفة:OK أفكر
سالم:شنو تفكرين ترى مافي وقت الوقت والعمر يمشي
لطيفة:اللي يسمعك اللحين يقول ان طاف علينا سنين واحنا جمن(كمن)شهر ماطاف علينا
سالم:بس هذا يا لطيفة أحسن حل لنا احنا الاثنين
لطيفة:انزين بس شلون؟
سالم:ماهي صعبة أنا بقولج اللي بتسوينه
.................................................. .........
في بيت عبد الله عند البنات
فاطمة:يا حظهم
آلاء:أكيد يا حظهم ...يا حظهم في كل شي تزوجو عن حب مو حنا مالت علينا (وهي تكش على وجهها)
فاطمة:ههههه يليتني مثلهم
آلاء:أي والله ياليتني أحب واحد كل الصفات اللي أبيها فيه
فاطمة:ليش شلون صفات فارس الأحلام؟
آلاء:انه يكون شاب خلوق وطيب ووسيم طبعاً ويكبرني ب4 أو5سنين تقريباً مو مثل هذا اللي تحبه لطيفة ومزعجتنا فيه مايكبرها ألا بسنة مادري سنتين
فاطمة:أحس الشباب الصغار جذي أغبياء...بس نفس صفات الزوج اللي أبيها قلتيها
آلاء:الله يا ليت كل الحياة جذي حب وأمان ووفاء ومافي خيانة
فاطمة:الله يكفينا شر الخيانة
آلاء:وما يكون فارس أحلامي عنيد أو عصبي أو يضرب بالعكس أبيه هادي ومتفاهم
فاطمة:يوووووه بعد الله يكفينا شر العصبية والضرب..فيه حريم مساكين ينضربون من أزواجهم ضرب مبرح
آلاء:الله يصبرهم على أزواجهم
فاطمة:بس أنا اللي يمس شعره مني ما أرحمه
آلاء:لاتكفين أن ماياج ريل(رجل)يعلمج بدروبج
فاطمة:أنتي اللي يبيلج زوج كل الصفات الشينة فيه يضرب وبخيل وألفاظه شينة
آلاء:الله الله ليش عاد يا بنت عمي جذي تتمنين لي؟
فاطمة:هذا اللي تبين لي
وبهذرتهم هذي يرن الجرس
فاطمة:مين اللي ياي؟
آلاء:مادري يمكن حنان
بعد دقايق
جت حنان ودخلت الغرفة:هاااااااااااااي
آلاء:هلا والله بالأخت العروس
فاطمة:هلااااااااااا حنوووون العروس
وسلمو على بعض وجلسو
آلاء:ها شخبار أو ليلة (وهي تغمز)
حنان:تهبل
فاطمة:شلونج يالعروس
حنان:بألف خير
آلاء:عيل متى بتروحين؟
حنان:اللحين بس أنا ياية أسلم عليكم وأمشي
فاطمة:بتروحين اللحين؟
حنان:أي
فاطمة:وكم يتكمين هناك؟
حنان:يمكن اسبوعين ثلاث شهر
آلاء:ويعة بتمين هناك شهر؟!
حنان:عيل ليه سموه شهر العسل؟!
آلاء:وين ريلج؟
حنان:هني مع ابوي
آلاء:يعني راح يسلم على أهله ويا؟
حنان:أي وبيودينا ناصر
فاطمة:وينه خالد أبي أشوفه واسلم عليه
حنان:وجع وتقولينا جدامي؟!!!!!
فاطمة:ههههههههه من اللحين اشتغلت الغيرة؟!
حنان:والله مافيها شي إذا غرت على زوجي
فاطمة:انزين خلصنا
آلاء:الحمد لله والشكر
..............................................
لطيفة كانت خايفة حيل من هذي المغامرة الكبيرة بس في نفس الوقت تبي تشوف يمكن يصير خير
كانت مرة خايفة نزلت من باب بيتها وعلى طول ركبت سيارة سالم بس تتوقعون في أحد شافهم؟؟؟مشت السيارة بسرعة عشان ماحد من أهلها يشوفها..........بعد مرور الوقت وصلو للشقة المكان اللي اتفقو انهم يكونون فيه
سالم:تعالي دخلي
فتح باب الشقة
سالم:تفضلي شفيج خايفة
لطيفة:خايفة يا سالم
سالم:لاتخافين مافي شي
وهي تناظر شقته اللي يجلس فيها عادة هو وربعه والبنات ويفرفشون فيها ويشربون بس ماكان فيها أحد
لطيفة:سالم أنا خايفة مو مأمنة اللي راح يصير لي
سالم:أفا تخافين مني؟!
لطيفة:أنا اللي في حالتي بتخاف من كل شي
سالم:حتى أنا؟
لطيفة:سالم أحس اني نادمة من خطتك هذي...أنت تقدر اللحين تكلم هلك وتقول انك ماراح ترجع لهم ألا لما تزوجوني فلانة وهي أنا..بس أنا مادري شسوي
سالم:لاتظنين مجرد ان نخلي أهلنا يزوجونا لا...نقعد مع بعض ونسالف وتقولين مشاعرج اتجاهي واقولج مشاعري اتجاهج وشكثر انتي تحبيني..صح؟(وهم كانو جالسين وبدا يتلامس جسمها)
لطيفة بخوف:س...سالم..وخر عني(وهي تحاول تزحف من مكانها وتبعتد عنه)
سالم:لا تخافين أنا ماراح اسويلج شي (وهو يقرب منها)أنا معاج..أنا أحبج قوليلي اللي بقبلج تكلمي معاي
لطيفة وهي تقوم:سالم واللي يسلم عمرك وخر عني تكفى
سالم:شفيج ماراح اسويلج شي أنتي هدي ولاتخافين (مسك خصرها)
لطيفة وهي تبي توخر أيده من خصرها:انزين وخر عني وكلمني أنا ما أرتاح جذي
وخر أيدك عني
سالم:ليش ماترتاحين وانا يمج...حرام عليج أنا أحبج
لطيفة:تكفى سالم لاتيي يمي..لاتقرب مني
سالم:أنتي تزعليني منج...أنتي بنت حلوة ونعومة ومافيها شي إذا انجذبت لج(وهو يحاول يبوسها)
هي كانت لاصقة بالجدار:وخر عني....وخــــــــر
ودفته دفة قوية خلته يتراجع لورا وهربت منه برة الشقة وهو كان مستاء من تصرفها هذا
لطيفة طلعت وتمشي بالشارع وماتدري شتسوي ولاوين تروح وشلون ترجع لبيتها:...ياربي شهالورطة اللي حطيت نفسي فيها...ياربي ساعدني..ساعدني ...مادري شسوي.. مادري...أنا الغبية..أنا اللي ورطت نفسي هالورطة
سالم ماوقف ولحق لطيفة لتحت
وهي كانت خايفة من انه يجيها وصار اللي ببالها
راح لها وشافها واقفة في الشارع وماتدري شتسوي
سالم:لطيفة..لطيفة تعالي شتسوين هني
لطيفة:وخر عني مابيك...وخر
سالم:تعالي وين رايحة تعالي أدخلج داخل!!
لطيفة والدموع تنزل من عيونها بغزارة:مابي..أنت مجرم مااحبك..ماتوقعتك جذي...وخر عني أكرهك..مابيك
سالم:لطيفة بلا عناد مايصير تمشين في الشارع جذي أنا أخاف عليج
لطيفة:وانت من متى تخاف علي..أنت أصلاً بس تبي تلعب علي وتسوي اللي ببالك...ماأنلام إذا خفت منك...أكرهك سالم أكرهك
سالم:وأنا أبيج أنا أحبج سامحيني
لطيفة:أسامحك على شنو أنك بتهتك عرضي...أنك بتبيع شرفي ...وخر عني مابيك ..مابيك..أبي أروح البيت (وهي تبكي زيادة)أبي أرووووح البيت
سالم:خلاص أهدي أنا بوصلج البيت
لطيفة:مابيك توصلني مكان ...اللحين أهلي بيشكون فيني..أنا الغلطانة اني وافقت أطلع معاك
سالم:انزين شلون بتروحين؟!
لطيفة:مادري مالك شغل...تاكسي...مشي..مالك شغل(وتمشي وتتركه)
وهو يلحقها ويمسك إيدها بقوة:تعالي يا مجنونة وين رايحة؟!!!
لطيفة:هد إيدي مالك شغل فيني
سالم:تعالي مافي لاتروحين ولا مكان لا يصير فيج شي
لطيفة:أنت مو مسؤول عني أتركني مابيك
وترك إيدها وراحت وقعد يلوم نفسه بقلبه:ليش سويت جذي في البنت مو أنا أحبها..أنا غبي...غبي
..............................................
ياترى شبيصير بعد ماراحت لطيفة عن سالم؟
هل بتتركه أو بالعكس؟
وحنان وخالد شبيصير بعد زواجهم؟
وأم سالم وعيالها شبتسوي معاهم؟