[لامارا]

لندن ..
كانت حاطه كفها تحت ذقنها وتناظر ولاذاقت العشا ..
سلطانه: شفيك ؟ متضايقه ؟
رتيل:سوس أبي طارق ..
شهقت وهلت دموعها المتحجره بعيونها : أبيييه ..
سلطانه مسحت دموعها : اللقا بالجنه إن شاء الله ..
رتيل بهمس : ماقدر آصبر عن بعده ..تعبانه ودي به وبسوالفه وضحكاته وحنانه ..
شدت على كفها : رتيل أنتي أقوى من هزه مشاعر..!
رتيل :احتياج هاللحظات محتاجته ..
سلطانه قومتها معاها ونزلت الحساب وطلعوا ..
رتيل : خلينا نروح لنهر التايمز ..
سلطانة : آوككي بس ماعرف الطريق..
رتيل مخنوقة : أنا أعرفه وعادي تعالي نركب سيارة أجره لاجل نوصل بدري له ..
ركبوا التاكسي والجو يسوده الصمت كلن منهم شايله همها ..
دق جوال رتيل ..رفعته وشافت رقم غريب رفعته بضيق: نعم
عساف كان بالسيارة وراها ولاحست بالسيارة المتحركة وراها من طلعوا من المطعم : وينك ؟
: طالعه مع سوس
: آييه عارف بس وينك الحين بالضبط ؟
:بتاكسي رايحة لنهر التايمز ..
: بالله .. شاطره طالعه للنهر الحين ..!
بضيق ماله مثيل : موب شغلك .. ولاتفكر عساف تجي أبي انتفس هوى بمكان أنت مو فيه ..
سكت للحظات : خلاص ..
سكر وهو ينتهد من ضيقته شلون يجيبها له ..!
شلون ينبض قلبها له ؟!
لحظه وتمنى بس تبتسم له يكفيه هالشي لانه تعبان منها للآخر ..
أخذها للندن لاجل يبعدها عن الكل ويحتويها ..بس عكست كل حيكه ولاقدر عليها ومشت اللي تبيه هي ..!
شاف التاكسي توقف ونزلوا منها وقف سيارته ونزل وهو يمشي بين الناس ويناظرها وعينه كلها بتركيز تام عليها وعلى تصرفاتها ..
حطوا كفوفهم ببعض وهن يمشن على النهر ..
سلطانه : ياااه جمميل جداً شوفي اشلون انعكاس المباني على النهر ..
رتيل : تبين نركب باص مائي راح تشوفين أششياء اجمل ..
سلطانه : وينه ذا ؟
رتيل ابتسمت : تعالي .. ركبته من قبل أكثر من مره
وصلوا وركبوا للباص ..
رتيل : شوفي الجمال الحين .. لو تعدل المود تنعشى في أحد المطاعم هنا ..
سلطانه: آوككي ..
رتيل : شوفي الناس شلون ..
ضحكت سلطانه : شوفي هالطفل يجنن ..
رتيل : حححيل ..
سلطانه تسألها : رتول سبق وفكرتي بالحمل ؟
لحظات مرت وهي تناظر سلطانه وسؤالها المفأجى وفكرت بججد بهالشي : يممه لو آحمل راح يجيني شي ..
سلطانه : ماتبين عيال منه ..؟
رتيل بذهول : لا ومستحيل .. ييياااه آكرهه شلون آجيب منه عيال..
سلطانه شافت تأزمها من السالفه شلون وضح جلياً عليها وضمتها من كتفها لها : خلاص ريتو ..
لمتها أكثر وهي توريها أشياء تشد آنتباهها في النهر والمعالم اللي حوله ..لحظات وسهت بمكان كانت فيه مع طارق وبنفس هالوقت ..
المكان اللي لقانا فيه
ياااما
إحتواه الغيم !
صار ب غيابك
يتيم .!
صار يشكي لكل من مرَّه
يصوت:
آآه يالعهد القديم
آآه يالعهد القديم
آآه يالعهد القديم
شوف بس !
منهو غيرك لا رحل ..
يرتجف صدري بْ غيابه
وألقى إحساسه | يبس !
منهو غيرك بس يقدر .. يمسك القلب بيديه
ويرمي كل نبضه وراااه ../ ويرجع ينادي | عليه !
منهو غيرك لا نساني
أنسى نفسي مع زماني .. وأقعد أرسم كل ديرة ..
فيها مرّينا الشوارع ..و منها بعثرنا الحنين .
.
.
.
الرياض ..
بيت آهل مساعد ..
الحوش ..
مساعد كان واقف مع أنسابه وحب يكلم فهد على انفراد بدأ يتكلم معه وهو يقوله: تكفى خلها معي اتروكها لي بطيح اللي براسها ..
ابتسم فهد لكن كانت آبتسامه غرابه : ترضاها لـ فجر يزعلها عبدالعزيز وتعتزي فيكم وتغدرونها ..!
سكت ..
فهد حط يده على كتفه : مقدر لهفتك لها لكن الخطأ كبير يامساعد ..
مساعد : البيت بديت بالبناء فيه وتقاولت مع شركة وراح تخلصه بـ حدود شهرين إلى 3 شهور .. وبديت معهم من حول الاسبوعين ..
فهد : أنت واثق بهالشركة ؟
مساعد : آيييه هي اللي تعامل معها نسيبي ..
فهد : وشلون المبلغ ؟
مساعد : صراحة مرتفع بس خبرك مافيه شي سعره معقول هالايام .. والآهم بأنهم راح يسلموني مفتاح البيت عقب الشهرين آو ثلاثه ..
فهد : الله يحعله منزلاً مبارك ..
مساعد : آمييين .. طيب ها فهد ..؟
ابتسم فهد : ادخل لها وتكلم معها ..
شوي شافهم يطلعون آهله ..
ابتسم فهد : طلعوا ..
مساعد : بكلمها ..
فهد بعده مبتسم : خذ راحتك ..
تقدم مساعد وتكثرت له عمته بالخير وركبت قدام بسيارة فهد .. وأسيل ركبت مع أخوانها عبدالعزيز وعزام ..
مسك كفها وفهد واقف لانها ماسكه بثوبه ومبتسم آوضاعهم صعبه ..
: اجلسي معاي ولك اللي تبينه ..
ابتسم فهد خاصة بأنها تبي تحط الغطا لان مافيه غير مساعد وأخوانها ومساعد ماتركها وهي تشد بثوب أخوها ..
قربت أكثر من أخوها شكثر تحس بالامان وفهد قربها .. حولها عينه عليها .. آمان ماتحس به غير بوجوده ..
:لا ..
مساعد يترجاها: طلبتك لمار .. تكفين خلاص انسي كلها كم شهر ويخلص بيتنا ..
حست شوي وبتصيح وفهد حس بهالشي ..ولافاتت مساعد عيونها اللي تبي تحقق مطلبه وقلبها وعقلها اللي متقاسمين حول هالرأي .. وكان الاتنصار واضح لـ عقلها ..
بضيق مجنون : خلاص لمار روحي ..
فهد : خلاص آبوي اركبي السيارة فتح لها الباب ركبت وصك ..
رجع حط يده على كتف ولد عمه : ترى معها موعد عقب كم يوم للحمل كان تبي تجي توديها ..
للحظه تغير ضيقه آهم شي فهد تقبل بأنها تطلع معه وبعد يبي يراجع معها للدكتورة ..
: متى الموعد بالضبط ؟
فهد : منب متأكد لكن الظاهر عقب باكر .. وسمعتها تقول راح تقدمه لبكره ..
ابتسم : الساعة كم ؟
فهد : الصباح على الثمان ..
ابتسم : ماراح آنسى لك هالخدمة ..
ابتسم فهد : يلا عن آذنك ..
مساعد : الله معاكم ..
ركب فهد سيارته وحرك ..
امه : وش كان يبغى ولد عمك ؟
فهد يأخذ مطب بهدوء قبال بيت عمه وناظر آمه للحظه : ابداً يبي الغالية تجي معاه وتنتهي السالفة ..
امه : هالمساعد مافيه مثله لكن الشيطان الله يخزيه يدخل بين الحليلين (الزوجين)..
فهد ابتسم : وش رايك يمه بالسالفه ؟
آمه : ودي ترجع له .. الليلة لو شفته كل شوي يجي لنا ويناديها وأختك قامت مره والمرات الثانية ماطاعت الله يهدي بنات هالوقت من عنادهن ..
ابتسم لامه وسوالفها ..ولافاته اللي وراه وشكلها تبكي : لمورتي عيون أخوك دامك ماتبين ترجعين منتيب راجعه ..
امه : الله يصلحك ي فهد ..
ضحك : الله يخليك لي يمه ..
ضحكت آمه : ويخليك لامك عزوه وسند .. لكن أختك لين راسها ترجع لـ رجلها ..
: إن شاء الله ماطلبتي شي ..
ضاقت لمار من تلبيه فهد للطلب ..وسكتت وهي مقرره تكلمه وتحكي له كل شي عن شخصيه مساعد وخوفها من هالشي الغريب ..
طلع فهد جوالها لما وقف قبال آشاره ودق على عبدالعزيز : هلا وينكم ؟
عبدالعزيز : بندخل البيت ..
فهد : الله يهديكم من اللي يسوق ؟
ابتسم عبدالعزيز : عزام ..
فهد : الله يهديه تركدوا عن هالسرعه ..شوي وبنجي ..
عبدالعزيز يضحك : فهد ترى عزام قطع إشاره
ضحك وهو يسمع هواشهم كالعاده ..: بجي وبتفاهم معه هالولد ..
ضحك عبدالعزيز وصك الجوال وهو يحرك مع فتحتة الاشاره ..
.
.
.
بريطانيا ..
كانوا واقفات على قبال السياج المطل على النهر ويناظرون ..
رتيل : ي الله شوفي هذاك شكل حاله مثل حالنا وأردى ..
سلطانه : اللي لابس تشيرت وحاط الجاكيت جنبه ؟
رتيل : آييه ..
: الله يعينه .. محد خالي من الهم ..
كانت تناظر وضعه وهو يتأمل النهر : يؤ رتيل ذا مصعب ..
تأكدت أكثر : الا مصعب ..
رتيل : ي قلبي سوس روحي له ..
سلطانه بنظره: ليه إن شاء الله ؟
رتيل تناظرها بقهر : سوس ترى هالانسان نعمه لاترفسين النعمه بيدينك ورجولك..
سكتت ولفت تناظر للنهر ..
رتيل : روحي له حرام شكله متضايق ..
سلطانه : ريتو خلينا نروح نتعشى ..
رتيل بقهر : سخيفه
ضحكت ومشوا ..
رتيل : طيب ترى حرام
سلطانه : ماغلطت بحقه ..وبعدين يمكن بيي يجلس وحده
رتيل : واضح عليه متضايق وأكيد يبيك تكونين معاه .. سوس لما كنت اتضايق كان طارق يجي وبرغم شي خارجي بأني ودي اجلس وحدي بس بداخلي كنت افرح بـ اهتمامه فيني ..
سلطانه : تونا مملكين وشوله آقط الفيس عنده .. خليه براحته وبعدين هو اختار البحر متنفس له وأكيد دامه جا لـ هنا يبي يكون وحده ..
رتيل : عمرك ماراح تقتنعين ..
ضحكت : احترمه جداً بس حالياً خليني آقدر عزلته واتركه براحته..
دخلوا للمطعم وجلسوا ..
سلطانه: الحين تتعشين فاهمه
ضحكت: آوكككي ..
رتيل ناظرت للحظات : آععع عساف هنا يتعشى ..
سلطانه: جد
رتيل : آيييه .. متأكده كان يراقبني
سلطانه بغرابه : لا عاد شدعوه
رتيل بحسره : تفكيره كذا .. قومي نغير المطعم انفاسي تختنق
وقفت سلطانه وطلعوا ..
نزل الملعقه بضيق وكلم سواقه لاجل يجهز السيارة ..حط الحساب وطلع ..
ركب السيارة وصك الباب : حرك للفيلاً
صرخ من الالم براسه ولف السواق والمرافق ..
المرافق بخوف : طال عممرك ..
عساف يشد على آطراف راسه وراص على راسه : مافيني شي ..
سكت وكل شوي يناظره ..
وصلوا للفيلاً وطلع لـ جناحه أخذ حبوب علها تخفف هالصداع ..
وقت طويل مر عليه وهو يحاول يتماسك من الالم ويشد عليه بالمخده لاجل يخف ماقدر ولاله قدره بالتحمل .. مسك جواله وهو يدق على دكتوره الخاص .. شوي وجاه عطاه أبره ولحظات وهو يترخي ونام عقب آجهاد عصبي ونفسي واضح عليه..
.
.
.
الرياض ..
بيت آهل لمار ..
دقت الباب : آدخخل
فهد وهو يعلق ثوبه ويلبس ثوب النوم ابتسم لاخته : هلا لمور ..
ابتسمت لاخوها : آهليين ..
جلس على الصوفا وجلسها قبالها : مانمتي للحين غريبه ؟
حطت المخده بحضنها وهي متردده : بسولف معاك ..
ابتسم : أبرك الساعات .. سولفي لي ..
:مم عن مساعد ..
ب اهتمام : شفيه ؟
لمار : مدري فهد بس شخصيته فيه شي غريب ..
ب استغراب أكبر خالطه خوف : شلون ؟ فهميني عن السالفه ..
وهي تفرك أصابعها وبضيق وتناظر آخوها : مم لما نكون بالشقه وحدنا يكون مرآ طيب معي وحبوب بس لما ننزل لاهله تتغير شخصيته تماماً ..
: شلون ؟
لمار: يعني يصير يكلمني بعصبيه ونظرات بعضها تدل بأني ولاشي .. ويتأمر بأني آقوم آسوي واساعد خواته حتى لو توني جالسه يعني مساعده خواته ..
فهد : يعني معاك الرجال حمل وديع وقبال آهله وحش
ابتسمت غصب على تعليق أخوها : يب ..
فهد تنهد : طيب ليه ماعطيتيي خبر من قبل ؟
لمار : مدري على بالي راح يتغير لان هالشي من بداية زواجنا ..
فهد : والليلة قلتي لي لاجل مارجعك له ..؟
: يمكن من ضمن الاسباب هالاسباب
فهد : مشكلته مشكلة وأنا أخوك ..
لمار : تعبت معه ي فهد آوقات كثيره ماقدر آنام الليل من تفكيري بهالشي..
: أفداك نامي واطمئني بشوف مشكلته ..
لمار ترددت بهالسؤال : مممم طيب فهد افهم بإن مساعد مايعاني من آنفصام شخصيه ..
: لالا .. ترى هالمشكلة منتشره بمجتمعنا خبرك فرض الشخصيه قبال الاهل مهم للرجل خاصة لما يكون يبي يثبت شخصيته قبالهم ويلاقي ضغوط ..
لمار : لافي يقهر دائما لما نجي نطلع آسمعه يكلمه ويقول لا تعال اطلع معاي ..
عصب فهد : وش يحس به لافي يومه يتدخل ومساعد ليه يطاوعه.. خليهم ي أخوك علي أنا ..
لمار : الله لايحرمني منك ي فهد ..
لعيونها ابتسم : ولامنك يالغاليه .. تدرين اتفقنا على ملكة عبدالعزيز ....
مامدى يكمل الا جوال لمار يدق : غريبه فجر ..
استغرب وهو يشوف الساعه متأخره : عساه خير ..
ردت عليها ..كانت تبكي وواضح عليها متضايقه ..وتتكلم مع لمار عقدت حواجبها بغرابه : ماتبين عزوز لييه ؟!
فجر : السبب يخصني وحدي .. بليز لمار خلي عبدالعزيز يكلم أخواني ويقول بأنه مايبني ..
لمار بضيق : فجر معليش راح تحرجين عبدالعزيز كذا مع أخوانك ..ماعتقد راح يوافق الا يجي الرفض من جهتك وقبال أخوانك ..
فجر تبكي : مساعد رفض لانه يقول السبب تافه ..
لمار : طيب وش السبب لاجل آقوله لـ عبدالعزيز ..
حست للحظه بالسبب التافه بس بعيونها لا مهوب تافه لان شافت معاناه لبعض البنات بخصوص هالشي : أخوك جميل جداً وأنا موب مثله ابداً ..
ماتوقعت هالسبب لاهي اللي لامتها ولاهي اللي ماحملته شوي من اللوم : فجر وش هالتفكير توقعتك تمزحين لما قلتي هالحكي ببيتكم ..
كان فهد يناظر وساكت يبي يعرف وش السالفه لكن استهدى بالله إلين تخلص لمار من مكالمتها ..
فجر : لا مامزح .. بليز بلغي أخوك ماترضين لي أكلم أخوك واقوله هالحكي ..
لمار : خلاص فجر راح آشوف السالفه بس ترى بالحيل مستهينه بنفسك .. ولو ماعجبتي أخوي كان رفضك بنفس المجلس وانتهت السالفه ..
فجر : بلغيه بليز ..
لمار : إن شاء الله .. صلي الوتر لاجل تهدين شوي وتبعدين هالتفكير عنك ..
فجر : إن شاء الله .. مع السلامه ..
صكت منها ..وقالت لـ فهد اللي سألها ..
ضحك : مهيب صادقه ..
لمار : مدري طيب عزوز شلون آقوله ..
فهد بحيره : صحيح عبدالعزيز يوزن الامور بعقلانية ..لكن هالامر جارح له ولاينلام ولو إن السبب بصالحه ..
دخلت أسيل وهي تبكي وقف فهد بسرعه لها : أسييل شفيك ؟
بكت أكثر وهي تحط راسها على صدر أخوها : جابت لي صديقتي نسبتي ومو حلوه
فهد ضاق وهو يلمس شعرها بحنان : وشلون جابتها على آخر الليل
تبكي من لهجه حنانه أكثر : آمها بالمدرسة معنا وكانت تدق من العصر بس كنت مشغولة والحين قالت لي بالمسن ..
لمار ضاقت : طيب كم ؟
أسيل وهي على صدر أخوها مسحت دموعها : 90
عزام كان واقف ويضحك لانه كان معها يبي يأخذ السماعات من عندها : طيب جبت بثاني ثانوي 87 وثالث 90
فهد : وفرحان فيها
ضحك : دخلتني للجامعه والا ؟
فهد : الا دخلتك للجامعة لكن للقسم اللي تبيه ؟
عزام : ماقد حطيت قسم معين براسي ..
فهد ترك عزام وباس راس أخته : نسبتك حلوه ..
تبكي : لا أنت تقول تبي فوق 95 %
فهد : صح كنت آبيها لكن تونا .. والترم الثاني بأذن الله تشدين حيلك أكثر وتجيبين فوق 95 %
مسح دموعها : لاتبكين فديت دموعك وأسيل اللي همها أخوها لايزعل..
دخل فيها لـ للحمام بغرفته وغسل وجهها وهو يمازحها ..
عزام : بنات آخر زمن ..
فهد يبعد شعر أخته عن وجهها وناظره : تعال هنا ورى هالسرعه وقاطع آشاره ..
عزام تروع : ها
فهد : اللي سمعته .. تراها سيارة وأنا أخوك ..
عزام : طيب .. تصبحون على خير
فهد : بكرة الصباح بصحيك لاجل تجي معي للشركة
عزام فتح عيونه زود وهو ماسك السماعات : ليييه
فهد فيه الضحكه عليه وماسكها : أبيك معاي كم شغله وأبيك تتطلع عليها ..
عزام بتذمر : طيب متى ؟
فهد : على 8
عزام برفض: لا سلامات .. شف الحين كم الساعه قريب 2 الفجر وبشوف فليم راح يخلص قبل الفجر وبصلي وبنام .. مايمدي
فهد : فليم .. استح على وجهك والصباح بصحيك ..
: خلها عقب باكر
فهد : لا بكره ..
عزام : طيب وين عبدالعزيز .. خل يروح معاك ؟
فهد : عنده بكره شغل خارج الشركة ..
عزام : ي ليل .. خلاص طيب
مشى وهو يتحلطم ..
ضحك فهد : الله يصلحه ويبعد عنه عيال الحرام ..
لمار: آميين ..
أسيل فيسها أحمر من البكا : فهد موب زعلان ..
فهد باس خدها : لا .. لانك بذلتي الجهد والله كتب هالشي ولالنا على المكتوب اعتراض ..
طلع معها ومع لمار ..
لمار : تصبحون على خير ..
فهد |أسيل : وانتي من اهله ..
دخل أسيل لغرفتها : وضي وصلي الوتر الحين وبأذن الله تنجلي كل ضيقه ..
أسيل : آوكي ..تصبح على خير ..
باست راسه وهو مبتسم لها ..
صك باب غرفتها وطلع لغرفتها وهو بـ هم جديد سالفة شخصيه مساعد وسالفة عبدالعزيز ورفض فجر ..
حط راسه واستعاذ بالله من الشيطان الرجيم لعله ينام ..
.
.
.