[لامارا]

.~.~.~.~.~.~.~.~.~.~.~.

ظل جسوف مشتاق لها يبي يشوفها محتار وش يسوي بالاخير قرر يطلع من الفندق افضل

راسيل دخلت الفندق عدت الدرج و مشت ناحية الغرف
وقفت على باب غرفته
لابسة جينز اسود و قميص ابيض عليه جاكت باللون الاسود فاتحة اول زرارين من القميص شعرها اللي لين كتفها عاملة فرق بالنص و خصلات الغرة على اليمين و اليسار بشكل مرتب
ضربت الباب بخفة
سرمد فتح الباب
شافها استغرب من وجودها و بين من ملابسها انها ما كانت في الفندق
ارتبكت و ما تكلمت
تنحى عن الباب قليل بمعنى تدخل
دخلت و تقدمت شوي و وقفت
سرمد كان لابس جينز ازرق مع قميص اسود
لفت له ببطئ بيدها شنطتها طالعته ظلت عينها بعينه
بهدوء : ممكن تجلس
سرمد جلس على الكنب و قال : اتفضلي
راسيل بهدوء : ما له داعي ممكن اتكلم معاك
سرمد ابتسم : اكيد ممكن بس مو و انتي واقفة
راسيل استبعدت كلامه و ركزت بعينه
راسيل بصوت هادئ : ليش ما قلت لي ان سميرة مو امك
استغرب سرمد اشلون عرفت
سرمد : اشلون عرفتي ؟
راسيل بعتب : عرفت و مو منك
عرف سرمد انها تعاتبه
سرمد وقف و عينه بعينها : جيت لج اكثر من مرة رفضتيني
فهمت قصده انه متخلي حتى عقب جيتها له و يعاتبها انها ما سمعته
لفت و مشت للباب و طلعت
طلعت من الفندق بعدم تصديق
" رفضج راسيل رفضج ليش رحتي له ليش نزلتي نفسج له ليش
ليش رحت ليش يا ليتني ما رحت و ما شفت نظرة الرفض بعيونه
الله لا يسامحج يا سميرة الله لا يسامحج "
راحت البيت قعدت مع امها و هي تفكر و بالها مشغول
راحت تنام من وقت بحجة التعب
و نزلت دموعها لاول مرة
كانت تعتبر نفسها قوية و تتسلح بالقوة
إلا ان هالشي اضعفها رفضه لها اضعفها
" مفكر اني ميتة عليه لا و الله
العتب علي كنت رايحة له استسمح منه ظلمته
إلا انه رفضي طيب يا سرمد طيب لا تفكر اني بجيك و بذل نفسي علشانك لا تفكر
انت مو احسن مني صحيح اني غلطت و ما سمعتك
بس رفضك وعاني و لو كنت الاول ابيك الحين ما ابيك و مصرة
منت احسن مني ماني رامية نفسي عليك يا ولد ابوك
و لا تظن ما لي احد و برجع لك لا .. اقدر اطلب مساعدة خالي صحيح خالي اخ امي من جهة الام
و ما يجينا غير بالمناسبات بس ما بيبخل علي بمساعدته يطلقني منك "

(( ابو سرمد تزوج سميرة إلا انها ما انجبت و تزوج ام سرمد و انجبوا سرمد
طبعا ام سرمد واجهت مشاكل مع سميرة المتسلطة إلا انها كانت تصبر نفسها علشان ابو سرمد
صار عمر سرمد 20 و توفت امه و ظل بالبيت مع ابوه و سميرة
كان يعاني من تصرفات سميرة اللي ما تخلص إلا انه يتجاهلها
لما تملك على راسيل تظاهرت سميرة بالطيبة قدام راسيل
و وضحت لها انها امه سرمد ما حب يقول الى راسيل من بداية ارتباطهم
ان سميرة مو امه و ما بنيته يخبي عليها إلا انه انتظر فترة ما تتعدى الشهر و بعد دخولهم الشهر الثاني
سميرة بدأت بالاكاذيب ضد سرمد و راسيل تناقشت معاه إلا انها ماسمعته و رفضت اي فرصة كلام بينهم
حاول اكثر من مرة إلا انها رفضته و اشتغلت بالفندق .. صادفها هناك و رجع لبيتهم يطلبها للكلام و التفاهم
إلا انها رفضت و طلبت الانفصال ))


في بيت ابو مزون
انضرب الباب
راحت مزون عند الباب تشوف من
مزون بصوت هادي : من
طارق بابتسامة من صوتها : انا طارق ابو مزون موجود ؟
مزون ارتبكت من صوته و من زيارته
بدون ما ترد عليه راحت الصالة لقت ابوها طالع من غرفته بعد صلاته
ابو مزون : يا بوج شفتي من عند الباب ؟
مزون بارتباك : اي شفته هذا طـ طارق يبيك يبه
ابو مزون : اشوفه يا بوج ادخلي انتي
مزون : ان شاء الله
مزون المطبخ راح تجهز عصير

بالمجلس
ابو مزون : حياك يا ولدي حياك تفضل
طارق باحترام : الله يحيك يا بو مزون زاد فضلك
طارق نزل اللي بيده من حلويات على الطاولة و جلس

احتارت مزون و ما عرفت وش تسوي اتصلت بلياج
ضحكت عليها لياج و هداتها

ابو مزون : و الله يا طارق انت تآمر الله يعلم انك مثل ولدي
طارق باحترام : تسلم يبه و ما تقصر ما يآمر عليك عدو
و الله اليوم جاي و كلي منى انك تقبلني انا جاي اطلب يد بنتك مزون
استغرب ابو مزون : و الله يا بوك انك ما تنرد و الله الشاهد
إلا ان بنتي توها صغيرة و ما دخلت 18 حتى
طارق : عارف يا بو مزون إلا اني مو رايد لي غير مزون
و اذا ما علي قصور و شايفني مناسب لبنتك لو ما تبي الحين
عزة الله ما آخذ غيرها لين ما تشوف نفسها جاهزة
ابتسم ابو مزون : و الله يا بوك ما تنرد و رجال ما عليك قصور
لو علي زفيتها لبيتك بملابسها الليلة
بس يا بوك الراي و الشور عندها امهلني يومين آخذ ما برايها و ارجع ارد لك خبر
طارق : يبه يكفيني قبولها علي لو من الحين
ابو مزون : الله يسوي اللي فيه خير


.~.~.~.~.~.~.~.~.~.~.~.


جسوف ظل سهران طول الليل
وحشته و يبي يشوفها مشتاق لها
لصوتها لرجفتها و هو قربها
لملامحها الخجلانه منه

و بالمثل

كانت لياج ظلت سهرانة
تفكر بحالها و نتيجة اللي سواه ابوها
اشلون تشوفه اشلون تقابله و وش تقوله اصلا لو شافها
و امها اشلون تقول لها اشلون تفتح الموضوع
تبي تتخلص منه ما تبي تشوفه

و بالمثل

كانت مزون تفكر باللي قاله لها ابوها
استحت من ابوها و هو يكلمها و المفروض اللي تكلمها امها مو ابوها
كاهي متزوجة و تاركتنها عند ابوها
ابوها لما شاف سكوتها قال لها تفكر و راح يرجع يكلمها بقرارها
لانه يعرف ما بتجي تكلمه منها و من نفسها
محتارة بعدها صغيرة و وراها جامعة و دراسة
بس هي تميل الى طارق و تهتم لامره
راح تستخير و الله يسوي اللي فيه الخير

و طارق
يفكر بموافقتها من عدمها
و راح ينتظرها و لو استعذرت بصغر سنها

اما راسيل
المتوجعة النادمة
ايضا ظلت سهرانه طول الليل
نادمة على تصرفها السريع لما راحت له
نصحتها لياج تهدأ يومين إلا انها تسرعت
و هذي النتيجة
حياتها تسرع في تسرع
تسرعت بالحكم عليه و ظلمته و رفضته و النتيجة طلع مظلوم مو ظالم
تسرعت و راحت تستسمح منه و تراضيه و النتيجة رفضها بقوة
وعدت نفسها تكون اقوى منه و من ظروفها
و الحياة ما توقف على واحد

اما سرمد
كان له تفكير ثاني إلا انه متضايق علشان ضيقتها اللي يدري انها تضايقت بعد طلعتها


ليلة طويلة كئيبة مرت على ستة الاشخاص بالضيق و التفكير


.~.~.~.~.~.~.~.~.~.~.~.

بالصباح

ام لياج : متاكدة ما راح تجي
لياج : يمه توكلي انتي فيني صداع باخذ بندول و برتاح
ام لياج : ما ابيج تظلي بروحج
لياج : يمه وش راح يصير ما بفتح الى احد الباب إلا لما تجي
ام لياج : اكلي زين و بعدها اخذي باندول و ارتاحي انا كل شوي راح اتصل لج
لياج بابتسامة و هي تقبل راس امها : ان شاء الله يمه تآمرين
ام لياج : راح ادخل اتجهز


راسيل رمت شنطتها و بعدها فكرت
" و ليش ما اروح ؟ ليش اتهرب ؟ راح اروح وش راح يصير يعني يظن راح اخاف منه
لا و لا يهزني شي ليش الدنيا واقفة عليه "
و اخذت شنطتها و طلعت


مزون ضربت باب بيت ام لياج
لياج : من ؟
مزون : انا مزون
لياج فتحت الباب : دخلي تفضلي
مزون : مشكورة
لياج تمشي للصالة : دخلي اشفيج واقفة
و راحوا للصالة و جلسوا
مزون : قلت لابوي يوصلني عندج و يروح الفندق و انا اجي معاكم بس ابيج بموضوع
لياج : قولي حبيبتي اشفيج
مزون بخجل : امس طارق جى لبوي و طلبني
لياج بفرح : احلفي و الله
مزون : لياج و الله محتارة و خايفة اروح الدوام و اشوفه
و انضرب باب البيت
لياج : انتظري هذه راسيل ثواني افتح لها
< لان راسيل بمثل منطقة لياج تجي مع لياج و امها و نادر >
لياج فتحت الباب الى راسيل
دخلت راسيل شافت مزون : مزون يا هلاا و الله
لياج قعدت : اجلسي
راسيل : ليش انتي ما لبستي منتي جاية
لياج : لا و ربي تعبانه و مصدعة و باخذ راحة اليوم
مزون : راسيل اجلسي ابيج بموضوع
راسيل جلست و هي تتطالع مزون و لياج
راسيل :وش صاير
لياج بفرح : طارق امس خطب مزون
راسيل بفرحة : احلفي و اخيرا سمعنا خبر يفرح
و طالعت مزون
راسيل : و انتي اشفيج زعلانة و مني فرحانة
مزون : ابوي قالي استخيري و يردي لي خبر , و انا مستحية اشوفه اليوم مو عارفة اشلون بتعامل معاه احرراج
راسيل : انتي تبينه او لا
مزون : ما ادري احس اني بعدي صغيرة و وراي جامعة
راسيل : اذا يبيج ينتظرج اما اذا انتي ما تبينه هو بالذات هذا شي ثاني
مزون بحياا : ما ادري آااآآ ما ادري
لياج بابتسامة : يا اختي قولي ابيه بس متسحية
راسيل مبتسمة : انتي استخيري اول و بعدين لو وافقتي و تملكتوا الحين خلوا الزواج بعدين متى ما زجهتوا انتوا الاثنين
مزون : مستحية اليوم اروح و ربي مستحية اشوفه
لياج : يتراوى لي انتي على طول مستحية منه مو بس اليوم لانه امس خطبج
راسيل :ههههههههه
مزون : مو وقتكم انتوا الثنتين ما ابي اروح اليوم خلاص برجع البيت ما اقدر
راسيل : ما بتداومين لان مستحية ما تبين تشوفينه روحي شوفيه عادي مثل كل يوم و حتى لو رفضتيه الاحترام بينكم وين المشكلة
لياج : اي صح فشلة ما تروحين بيحس بيقول لاني خطبتها ما جات
و راحوا البنات بعد ما حاولوا في لياج تجي إلا انها استعذرت بالصداع و التعب و الحقيقة انها ما تبي تروح تشوف جسوف بعد اللي صار و اللي قاله لها و ما تدري لمتى بتهرب .. لما عرف نادر بصداعها و ما بدوام شافها و وصاها ترتاح و ما تفتح الى احد الباب .. و راح مع ام لياج و راسيل و مزون ....


بالمطبخ
بعد دخول الجميع
طارق بهمس : تعال انت اشلون جاية معاكم ؟
نادر يبي يقهره : و انت شكوو
طارق : نادر مو وقتك الحين اشلون معاكم او صادفتوها مع ابوها برى ؟
نادر بضحكة : يا اخي هد شوي لا تطيح علينا , اساسا كانت عند لياج لما مريت عليهم
طارق : اها
نادر : اشوف عاد لا تقعد تمصخها و نظرات و ما ادري شنو
طارق : انت وين و انا وين صدق ما عندك سالفة
نادر : هههههههههههه
طارق : إلا تعال لياج مو جاية
نادر : لا و الله عندها صداع خفيف بترتاح
طارق : ما تشوف شر

و بعد فترة

راسيل ترسل الطلبات و ترجع
صادفت سرمد في الحديقة و ما طالعته و تجاهلته تجاهل تام
و سرمد حاس و عارف
و وقت صعوده غرفته صادفته بوقت نزولها على الدرج و ما طالعته و تجاهلت جهته و نزلت بثقة


في بيت ام لياج
لياج جالسة عند التيفي و بالها بعيد و تفكر
كانت لابسة لبس سبورت
بنطلون سماوي مع تيشرت ابيض
و فوقه جاكت البجامة باللون السماوي و فاتحة سحابه للبطن
و يبين التيشرت الابيض
شعرها البني المايل للكستائي مفتوح بنعومه و كعادتها مخلية فرق على جنب و غرتها نازلة
سمعت الباب ينضرب
خافت محد بيجيهم هالوقت فكرها على طول راح له
وقفت عند الباب
بنعومة : من
ابتسم بشوق لصوتها : جسوف
اخترعت لما قال اسمه ارتبكت و فكرت ما تفتح الباب

< بيت ام لياج مو كبير إلا انه مو صغير جدا
البيت بباب واحد
اول ما ينفتح الباب على جهة اليمين باب غرفة الضيوف و اليسار هي الصالة
و في ممر متوسط الضيق فيه ثلاث غرف
غرفة ام لياج و غرفة لياج فيهم كل وحدة دورة مياه
على يمين الممر في المطبخ و دورة المياه العامة
ابو لياج حوله الى اسم ام لياج و قالها و سافر >

جسوف شافها طولت
جسوف ببحة : ما راح تفتحي الباب
لياج بخوف : لا روح ما بفتح
جسوف مبتسم و بهمس : طيب تبيني ادخل من الدريشة مثلا
لياج بخوف و صوت مرتبك : روح الناس وش بتقول و انت واقف على الباب روح الله يخليك
جسوف : افتحي خليني ادخل دام الطريق فاضي سيارتي عند الطريق العام مو عند الباب افتحي
لياج : طيب مو الحين اذا جات امي تعال
جسوف تصنع العصبية : افتحي اشوف لا ادخل غصب
لياج خافت و باستسلام تعودت عليه الفترة الاخيرة فتحت الباب و هي وراه
جسوف شاف محد عند الباب عجبته حركتها كونها ورى الباب
كان لابس جينز ازرق و قميص مخطط بالعرض و الطول باللون الرصاصي
مفتوح اول زاررين ثاني الاكمام بالمنطقة ما بين الكوع و المعصم
بساعة جلدية باللون الاسود و بيده جواله
نظارته على شعره الطويل قليل بشكل جذاب
دخل مسك الباب و سكره و انقفل طالعها بنظرة شوق


انتهى الجزء الخامس
اختكم : هذيان صمت