[درة الاحساء]

~| الهمســــة الحـــــــادي عشـــرة |~



\


بدر البدور


،


بقيت انتفض بين يديه..احسسته يضمني اليه بشدة..

همس: لا تخاافين..انتي فـ اماان..


ارتعبت عندما همس لي بكلامات لم افهمها..

تمنيت لو اني بقيت هناااك في ركني المظلم..او ان أمووت...!!

،

شعرت بنفسي انزل على الارض...ومن ثم سمعت خطواته تبتعد..

تحسست المكان بيدي.زحفت ..وانزويت في ركن من اركانه..

،


: حيااااك دكتوور تفضل..


سمعت بخطوات تقترب من المكان..احدها خطوات ذلك الشخص..اما الاخرى لم اتعرف عليها..

انكمشت على نفسي..

: بدوووور...؟ بدوور ويينج..؟!

الدكتور: يمكن شردت ..؟

: لااا ماظن..هي واايد تخااف..( اشار بسرعه الى مكان بدور ) هذي هي..


,

حمل بدر البدور بين يديه..ووضعها على السرير..

اقترب الدكتور وبيده حقيبته التي تحمل اغراضه الطبية..


الدكتور : كم تووقع عمرها الحينة...؟

...: مممم اظن 13 سنة..!

الدكتور: الحينة بشل الربطة من عيونها...لازم نخليها تشوف الضوء تدريجيا..المدة اللي انحبست فيها في الظلام مب قصيرة..واحتمال يكون عندها قصر نظر..


نظر الى الطبيب باهتمام..وهو ينزع الرباط ع عينيها..

ما ان ازاله عنها...اغمضت عينيها بشدة..و من ثم بدات بفتحها تدريجيا...

اقترب منها الطبيب ليفحص عيناها..

ولكنها فاجاته بصرااخها الشديد..

نطقت بعبرات غير مفهوومة..

وانكمشت على نفسها بقوة وهي تصرخ وتصرخ وتصرخ لعلها تمنعه من الاقتراب..!

اقترب الاخر ليهدىء من روعها..لكنها ايضا رفضته..

حاول الطبيب مرات ومرات محاول الاقتراب منها..لكنها رفضته وبقوة..

نظر الى الطبيب باستغراب..يريد منه تفسيرا..


الطبيب وهو يعدل من وضعية نظارته: شكل عندها اضطرابات نفسية وخوف ورهبة من الناس..ووو....احتماال..تكون فقدت قدرتها على النطق..لكن تعرف لازم بعد اسوي لها فحوصات في المستشفى عشان نتاكد..


هز راسه متفهما..ونظر اليها باسف...

شعرها الطويل والاشعث..

ملابسها الممزقة والرثة..

اظافرها الطويلـــة..

عينها الزائغه من الخوف..


الطبيب : يبالها اهتماام..ولازم اتييبها عندي افحصها..

...: ان شاءالله بوصي من يهتم فيها...وبييبها عندك في اقرب فرصة ..


حمل الطبيب حقيبته وخرج..



\


فجــر..

،


كــــــــــــرهت كل شي في الدنيااااااا..!

من عقب ما قالتلي شهرزاد عن اللي سووه في امها..كرهتهم اكثر واكثر واكثر..!

يالله احس كل ماذكر يوم كانت تقولي شهرزاد عن اللي صار..احس اتييني غصــه..!

ما اتمنى ابدن اكوون فـ موقفها....

انا انضرب..اتكفخ..يذبحووني..يحول وني من بنية لولد...كله بالنسبة لي يهوووون ولا انهم يسوون شي فـ اهلي..!

،

مستحييل اصلن اكوون في قوة شهرزااد..

هي قدرت تتمرد..اناا..مااقدر..مااقدر.. اخااااااف.. كم مرة حاولت اتمرد على ابراهيم ويوسف..ومصيري كان الجلد...!

,

شهرزاد نفس ما قالت بتسكن عندي مؤقت..ردت لشغلها...وانا هاليومين بعد اتمرن في النادي..وفريقنا كله يحاول يشد حيله لان ورانا دوري..

علي..يوميا يمر عليينا في شقتي ..يطمن على اخباارنا..

بصرااحه انساان مافي مثله..منوو بيدخل في مشاكل غيره ويحاول يحلها..؟

لو غيره..كان فضحنا..ولا ..ولا كانه يعرفنا..

صدق..صديق وفي..!


،


الحينة خلصت من تمارين النادي..

برد البيت عقب بروح الصالة قبل ما اتاخر ع الكابتن يوسف ..


،


الساعه 10 ونص بالليل..


،

خلصت من تدريبااتي ويا الكابتن يوسف..

رديت البيت..

وفي المدخل التقيت بشهرزاد اللي توها يااية..

دخلنا داخل ويا بعض..

كانت تسولف عن شغلها..وعن اللي سوته اليوم..

مع هذا كانت حزيينة..من الخااطر..!

كل شوي تسرح..وتم سااكته..

،

قالت بشرود : ابي اسير اشووف اخواني..شصار فيهم.؟! شوو سوو بعد ما راحت امي عنهم.؟ منوو عندهم.؟ منوو يهتم فيهم.؟!!!!


تدرون..نسييت سالفة اخواانها..؟!!! صح شصاار لهم..؟


قلتلها مستغربة : ليش ما سرتي عندهم..؟!!

قالت بانكسار : علي منعني..قال اكيد سليمان مشدد المراقبة على بيتنا.!

قلت بتاييد: هييه اكيييييد..!

,

كل وحده سرحت ...فــ عالمها...ما ندري شو بيكون مصيرنا في النهاية..!


،


سمعنــــا صوت حشرة بـــرا...


شهرزاد مستغربة: انا من ييت هنــي وانا اسمع هالحشرة براا.؟

قلت: هيه..هذيلاا اليهـــال.."ابتسمت" حلييلهم..كل يوم تقريبن يطلعون فوق السطح يلعبون..

شهرزاد باستنكار :يلعبون في السطح.؟!! وبالليل.؟ مب خطير عليهم وهم بروحهم.؟

قلت: حتى انا استغربت..وفكرت اكلم اهلهم..بس مرة ضحكت عليهم..يحسبون في فوق السطح وحش..واونهم بيخوفوونه..


شفت شهرزاد تبتسم بحزن...اكييد تذكرت خوانها..!

وقفت : بسير اردهم عند اهلهم..


هزت راسها توافقني..

ظهرت..صعدت لفوق السطح..كانت فيه غرفة او مستودع قدييم..

شفت اليهاال يضربوون البااب ويصاارخوون..!

بصراح انا بنفسي خفت..الاضاءة واايد خاافته..استغربت كيف ما يخاافون.؟؟؟


رحت صووبهم...حاولت اسكتهم...

وبعد ما هدوو..تجمعووا حولي..

قالولي اسمهم : خالد..حموود..رشود..نورة..

قلت : شوو تسوون انتوو هنــي بروحكم...؟؟ ما تخاافون.؟

خالد : نخوف الوحش..

قلت بهدوء: حبيبي..هني ماشي وحش..اصلن مافي وحووش ابدن..

صرخ رشود : مااماا تقول هني في وحشه..روحو خوفوها عشان تتادب..!


كنت بضحك ع برائتهم..


بس ابتسمت : لا حبيبي..مافيه..

نورة: انا ثمعت ثووته..يحــوف..! ( انا سمعت صوته..يخوف )


طالعتها..كانت لاصقة فــ اخوها..

حمود: هيه والله..حتى انا سمعته..!


حطيت ايدي ع خدي : وشو قاال.؟

خالد بانفعال: طلع صوت نفس صوت الوحش..!


هـنـــي..ماقدرت امسك نفسي..ضحكت علييهم...وعلى خياالهم الوااسع

شفتهم عاقدين حواجبهم..ليش اني ما صدقتهم..


سحبني رشود من ايدي..

وقفت جدام الباب..


رشود: انتي دقي الباب بقووة..وهي بتصاارخ..


طالعت في الباب..اللي لونه رااح وعليه خدووش...هههه من كثر ما يضربونه..!

حسيت شكلي بيكون غبي لو ضربت الباب..بس شو اسوي..لازم عسب يقتنعون..

حاولت افتح الباب..بس كان مقفل..

شفت تحت في الباب فتحة على شكل مربع..

نزلت تحت على مستواها..حاولت افتحها ماقدرة..عليها قفل..!


خــالد: هالفتحه مقفلة..المفتاح عند خدامتنا..

طالعته مستغربة: وليش هالفتحه.؟

حمود: عشان الخدامة تفتحه وتعطي الوحشه اكل..


زااادت حيرتي..؟!!!

شو الساالفه.؟ وليش الخدامة تحط اكل هني.؟ ولا كل هالكلام اليهال ظهروه بروحهم.؟


اعتدلت فـ وقفتي..

قلتلهم: يلا يا شطوورين..الحينة بننزل تحت..ما بصير تتطلعون بروحكم مرة ثانية..

خالد: بس امي تقول عادي رووحو..

حطيت ايدي ع خالد: خالد انت شاطر وكبير..لا تخلي اخوانك يطلعون..يمكن حد يطيح من السطح..او يصير له شي..يعني هالمكان مب حق الصغار نفسكم..

لا تلعبون هني..العبوا تحت......يلا الحينة تعاالو وياي بنزلكم تحت..


استغربت من اللي يقولونه عن امهم..؟ معقولة تكون بهالاهمــال.؟

مسكت يد نورة..ونزلت وياهم تحت..


خالد : فاارس..انت لاعب كوورة صح..؟

ابتسمت : هييه..

خالد : انا احب الكورة..ويوم اصير كبير بستوي لاعب شراتك بعد..

حمود: وانا بعد..

رشود : وانا بعد ابا اكون الكابتن..

ابتسمت: ان شاءالله..كلكم تصيرون اقوى لاعبين..


وصلنا تحت.....بس فجاة شفت خدامتهم ظهرت جدامي ووياها صينية فيها اكل..وشكلها كانت بتطلع فوق..ارتبكت..

طالعت في الاكل..كان بس البقايا..احترت..!


رشود صاح بانفعال: شفتي..فيي وحش..الحين جوليا بتعطيه اكل..


ارتبكت خدامتهم اللي اسمها جوليا..


سالتها: وين مدام.؟

قالت: د..دد..داخل...مدام..موجود داخل..الحينة ينادي..


ردت بسرعه لداخل..

شويه وظهرت لي وحده....لابسة جينز رااص..وبدي..وترمس في المبايل..وتطالع اظافرها الطويلة المصبوغه بالاحمر..وشعرها الاشقر ع كتوفها..


ام خالد: هييه...لاااا..حلـــفي..؟!! " ضحكت بمياعه "..حبييبتي والله..اوكي حياتي عقب برمسج..الحينة مشغولة شوي..يلا بــاي..


جفتها تبند مبايل..و طالعتني اخييرن..جفتها رافعه حواجبها..


قلت : احــم...ام خالد..؟

قالت برقة زايدة : سميرة..اسمي سميرة..لا تزقرني ام خالد..بسم الله علي..احس رووحي كبيرة بهالاسم وانا بعدني شباب..


انصدمت..ما توقعت انها امهم..قلت يمكن اختهم..؟ عمتهم..خالتهم..اي حد يقربلهم..

بالله هاا شكل ام..؟


قاطعت تفكيري : آآآآآمر...؟

قلت بسرعه : لا بس شفت عيالج كل يوم يطلعون للسطح بروحهم..وحبيت انبهج عليهم..لانه مب زين يصعدون بروحهم وبالليل بعد..!

قالت بدلع: لايكون يزعجونك كل يوم..بس ما تبا تقوول..

قلت ابرر: لاااا..بس..همــ


قاطعتني..وطالعتني بنظرة صارمة خفت منها..


قالت: ما بخصك فـ عيالي..انت بس ساكن هني..مو يعني تدخل في كل شي..فااااهم..


بــــــل..!!

مادري شوو سويت..

طالعتها منصدمة..


قالت : احم..ع العمــوم..حبيتـــ

قاطعتني بعد وهي تاشر بايدها اني اسير..


قالت: بـــس...بـــس..اجلب ويهك وريحنا من فلسفتك..


استنكرت تصرفها..بصراحه.........وقحة..!

صديت..وصعدت الدري..وقفت جدام الباب قبل ما ادخل..افكر في اللي يصير من حولي وانا مب حاسه..شوو يعني تصرف اليهال..؟ خدامتهم.؟ وامهم..؟ والمستودع اللي فوق.؟يمكن فيه حيوانات..؟لالا ماظن..لان مافيه دريشة او شي يدخل الشمس..

،

سمعت صوت خطوات ع الدري..

ما عرفت شو اسوي..!

فتحت الباب ودخلت بسرعه..

خليته شوي مفتوح..

شفت الخدامة نفسها ووياها الصينية..


شهرزاد من وراي: فجر شوو فييج.؟

حطيت صبعي ع شفايفي : اششششش..


رديت اشوف الخدامة اللي طلعت فووق..


قلت لشهرزاد: تريي هني..الحينة بيي..


ظهرت..و صعدت فوق ورا الخدامه..من دون ما تحس..

شفتها راحت صوب مكان معين قريب من المستودع اما انخشيت في مكان مظلم عسب ما تشوفني..

شفتها شلت شي..واضح انه مفاتيح لاني سمعت اصواتها..

بطلت القفل اللي في فتحة الباب المربعه..

عقب يابت الصينية ودخلت الاكل..

وردت قفلت..وردت المفتاح مكانه..

مشت بتنزل..لكن انا ظهرت فـ ويهها..


كانت بتصرخ بس حطيت ايدي ع فمها اسكتها..


قلت بهمس: لا تخاافين..لا تخاافين..ما بسوي شي.


طالعتني برعب..

سحبتها من ايدها..وديتها مكان معزول ع السطح..


قلتلها: الاكل هذا لمنووو..؟


كانت ترتجف..وخاايفة..


قلت: جووليا..ما بسوي لج شي..قوولي هالاكل حق منو.؟ لا تخافين ما بقول لحد..


تلفتت يمين ويسار..

عقب قالت بصوت مرتجف..


جوليــا: هازا مال وهش..

قلت وانا ارص ع ضروسي محاولة اني اخوفها: قلتـــلج قوووولي..هذا مال منوو..لا تقصين علي...

بلعت ريجها وقالت: انا بيقول..بس الله يخلييك..مافي يقول لمداام..بعدين مدام بيودي انا بلاد..

قلت بهدوء اطمنها: اوكي..انا ما بقوول.انتي قولي الحينة...

قالت: انا اشتغل من سنة ونص في هازا بيت..مدام كل يوم يقول ودي هازا اكل..فوق..

كدامة " خدامة" قبل يشتغل هني..قالت فوق هني في صغير..هازا صغير خمسة سنة موجود,,

كل يوم كدامة يعطي هو اكل..مدام يقول اللي مافي يقول حق حد..مسكينة هازا صغير..


انا طوول الوقت مصدوومة من اللي اسمعه..معقوولة..؟ صدق اللي اسمعه.؟

مع انه كل شي يثبت لي..

الاكل..

الصوت اللي سمعوه اليهال..؟

هالبييت غرييييب..!


قلت: خلاص رووحي..ولا تقولين لحد انج قلتيلي فااهمة..!


هزت راسها بسرعه..وعقب راحت تركض تحت..

نزلت عقبها..

شافتني شهرزاد...وسالتني شو السبب اللي خلاني اظهر بسرعه..

ما قلتلها..بس قلتلها عن اليهال..وعن امهم الغريبة؟



\

\


في اليوم التالي،،


،


شهــرزآد..


،


بعـــد ما خلص دوامـــي..رحت قســم ثانــي..قسم التبرعات والاعمال التطوعية..

من فترة لفترة اروح هني واتبرع..باسم " فاعلة خير "

,

شهرزاد : السلام عليكم..

الموظف ابتسم: وعليكم السلام.. اختي فاعلة خير..


طلعت المبلغ اللي بتبرع فيه

شهرزاد : هالمبلغ ***** كله بتبرع فيه..


عدالي ريّال واقف..من قلت المبلغ اللي بتبرع فيه طالعني..


الموظف باعجاب: والله مب غريبة عليج..ان شاءالله يكون فـ ميزان حسناتج..

،

خلصت الاجراءات بسرعه...

وظهرت من المكان..

,,


نظر الرجل الى الموظف..: هذي دووم تتبرع هني..؟

الموظف مبتسم : هيــه..مشاءالله عليها..

...: ومنوو تكوون..؟

الموظف : والله مادري..بس دوم تسجل التبرعات بفاعلة خير..

..: ودووم تتبرع بنفس هالمبلغ..؟

الموظف : ما تتبرع الا بمبالغ كبير...الله يبارك لها فـ حلالها..


,,


ردييت لبيت فجر بعد ما خذيت لنا غدا..بس ما كانت موجوودة..ما لحقت عليها...اكييد راحت الصاله..

مالي نفس آآكل...حطيت الاكل في المطبخ..

وسرت غرفة فجر اللي صارت غرفتي المؤقته بعد..

عقيت عبااتي...و ارتمييت فوق السرير ارتآآآآآح..

واطلقت العنان لدمووعي..

يقولون احيانن الدموع تخفف الهم..

،


\


المســـآء


،


فجــــر..


،


تونــي خلصت من تمااريني..

بسرعه ظهرت من الصاله ركض صوب البيت....

اليوم بظهـــر وياا الشباب...عازميني ع العشاا..

تاخرت عليهم..!

,

وصلت البيت...

شفت شهرزاد قلتلها اني ما بتاخر..

وبسرعه خذت شاور سريع ولبست بدلة وظهرت..

دقيت لـ علــي اقوله اني خلصت..

وخمس دقايق وكان واقف جدامي..

ركبت ..


فجــر: تاخــرت وااايد..

علي ابتسم : لا عاادي..اليوم فهد بيعزمنا لازم ما تفوت هالفرصة...


ابتسمت..اليوم كلهم متوعدين لفهد..هههه بيخسرونه..ما يسوى عليه يوم عزمهم..

,

نحن مشتركين في دوري كاس البلاد..

واليوم كانت اول مباراة لنا..والفريق اللي لعبنا وياه كان ضعييف..وقدرنا نفوز عليه..طبعن مب لانه ضعيف بس..فريقنا بعد واايد تطورت مهاراته..بفضل التدريب المكثف الاياااام الماضية..

وبمناسبة فوزنا..

قرر فهد انه يعزمنا..

وطبعن الشباب هم من اختاروا المطعم...

,

والحينة رايحين المــول اللي فيه الشباب متجمعين..


\


فـــي مركز التسوق..

تحديدا عند المواقف..

,

نزلت من السيارة مع عائلتها..

الام بامر : يلااا ريـــم..انتبهـــي لاخووج عدل..ياويلج اذا ضاع..

ريم بتذمر : مااابا..ليش ما تقولين لعويش.؟

عائشة تنظر الى نافذة السيارة وتعدل من هيئتها..: بس..بس..اللي تقولج امي سمعيه ونفذيه وانتي ساكته..


امسكت بيد اخيها وقد كشرت بوجهها علامة لضيقها..


الاب: يلا تحركوا..انا وامكم بنتسوق بروحنا..اما انتوا اذا خلصتوا دقوا علينا..

عائشة : ان شاءالله بااباتيه..


ذهب الاب مع زوجته لوحدهما...وبقيت عائشة وريم واخيهما الصغير..


عائشة : سمعي ريموو..انا ابي اتسوق واتمشى ع راحتي..انتي انتبهي لسعّوودي..يلااا سي يوو..


نظرت الى اختها بغيض..


تكلمت بغضب : ريييم..ريييم..ريييييم..كله ريـــــــــــم..! لازم اهتم فـ سعّودي..ولازم اللي اسوي للي هم يبونه..ولازم ما اتحرطم.....وكل هذا...لييش.؟ لانه ( ريــم انتي الكبييرة )

وهالخسفة عويش راحت تتمشى وتاخذ راحتها ..لانه محد يقولها شي..اففف..والله سخاافه..


انتفضت عندما سمعت صوت من خلفها..


....: حليــــــــــــــــــلج والله..!!! سمعتها منصور شو قال...؟

....: ههههههه عورت قلبــي ياخي..


نظرت لهم باحتقآآر..


.....: اووه محمد شووف كيف تطالعك...!


دنا منها الاخر..ليصبح قريب وبشدة منها..


....: لااا افاا ليش هالنظرات...ما سوينا شي..؟


ارتبكت من قربه الشديد..وماكان عليها الى ان تشد قبضتها على حقيبتها وتضربه بها بكل قوتها..

امسكت بيد اخيها و اسرعت الى داخل مركز التسوق واختفت بين الناس..

اما هو..فقد بقي متصنما في مكانه...وكانه لم يستوعب ما قد حدث له منذ لحظات..!


منصور منصدم هو الاخر : ضربتك..!!!!!!!

نظر اليه بعينين مفتوحتين..

محمد: تخيّــــل..!!

منصور: والله قويـــــــة...!!

محمد : مستحيــل أعديها لها..!


امسك بهاتفه المحمول..ظغط على ازراره بسرعه..


محمد: آآلوو...ارسلي مجموعة رقم 76 الحـــينة...!

منصور يخرج سيجارة ويشعلها : الله يعيــــنها..!

محمد: الحينة بنفترق..اذا لمحتها..اعطي اشارة للمجموعة..!


هز رآسه موافقا....

وافترقـــآ..


\


علـــي..


،


وصلنا المول اللي بنجتمع فيه..

نزلنا انا وفجــــر..

ودخلنا لدآآخل..

,

رحنا للمطعم اللي اتفقنا عليه...شفنا خليفة و جاسم بس اللي هناك..


علي: ويين بااقي الشبااب..؟

خليفة: راحوا يتحوطون..بعد ربع ساعد بيكون الاكل جاهز وبيجتمعون..

علي: خلاص عيل..حتى نحن بنتحوط..عقب بنيي..

جاسم : بس رجاااءن ما نباا تاخيير..لاني يوعاان مووووت..

فجر: ههههه وانت من متى مب يوعآآن..

علي: هههه وانت شوو حارنك..خلييه يآآكل..لين ما يستوي ع حجم المرمى..وما يقدر حد يسجل اي قوول..


شفت جاسم يطالعنا بنظرة بدون ما يرد...ههههه شكله من صدق يوعاان..

,

مشيت انا وفجــر...و شفنا الشباب يمشون ويا بعض..

انضمينا لهم..

وطوول الوقت..

ســـوالف وضحك وطنــآآزة ...طالعت فـ فجر..اللي تضحك على فهد اللي حالف ما يدفع حق اكثر من وجبة للشخص الواحد..

ابتسمت..غيرت جوو ويانا..

,

كنت اسولف ويا سالم..

بس التفت بسرعه لصوت اشياء تطيح..

كانت اغراض..

رفعت راسي..شفت فجر ماسكة ايد البنت اللي كانت بتطيح ويا اغراضها..شكلها اصدمت فـ فجر..

مريم : آآ آآآآسفة..ما نتبهت..

فجــر: لااا عاادي...


شفت فجر نزلت تجمع الاغراض اللي طاحت..

وقفت وعطتها البنيــة...اللي كانت منزلة راسها من الاحرااج..

رفعت راسها مريم : مشكووور ما قصــ ( قطعت كلمتها وتمت تطاالع فـ فجر )


شفت فجر اللي تطـــالعها وشكلها مصدوومة بعد..

سمعت البنية تهمس ومحد سمع الا انا وفجر..

مريم : فجــــــــــــــر.....؟؟!


عقب شفتها تهز راسها كانها تنفض الافكار..

قالت بسرعه : مم مشكور..والسموحه...


ومشت عنـــا بسرعه..!!



\


~| نهـــــــاية الهمســة الحادي عشرة |~