[درة الاحساء]

الجـــــــــــــــزء ((الثـــــــــــالـــــــث ))

نشيت ع تسلل خيوط الشمس في الغرفة..جفت سارة بعدها راقده...سرت اتسبح..ظهرت من الحمام..وطلعت من جنطتي بروش وسحيت شعري..طلعت من الجنطة جوازي انا وسارة..والاوراق الرسمية..خذيتها احتياط عسب اذا استقرينا انا وسارة ادخل سارة في المدرسة..وانا ادور لي شغل....سرت اقعد في الصالة شغلت التلفزيون...تميت.أفر في القنوات...جفت سارة توها ناشة..
ابتسمت لها: صباااح الخير..
سارة : .....................<<مسوية طاااااف..خخ
يت وقعدت عدالي..
مها: حلفي انتي بس...سيري بدلي وشيلي هالكشة..بنسير السوبر ماركت..
سارة: ليش؟؟
مها: بنشتري اغراض البيت..
سارة: اهاا..
سرت اتريق انا وسارة....عقب لبست كندورة وسويت حمدانية...وظهرنا صوب السوبر ماركت..
في السوبر ماركت..
قعدت اخذ الاغراض اللي ابيها..وبالصدفة وانا اخذ جفت هااا..ولد جيرانا مادري شسمه..ممممم..سعيد مادري سالم...لالا اعتقد سالم..
جافني وياا صوبي..انا بسرعه صديت عنه..
سالم: السلااااام عليكم....((مد ايده بيسلم))
لكن سويت روحي ما جفته...اونه ارمس سارة..عقب حسيت به قفط ونزل ايده..افتريت صوبه اوني الحينة جفته<<خخخخخ
مها: اوووه...سالم...هلا..سوري توني انتبهت لك..شحالك؟؟
سالم: الحمدالله بخير...علومك؟؟ وعلوم الاهل؟؟
مها: والله الحمدالله كلنا بخير..
تمينا نسولف في مواضيع واايد....وشويه وانا مندمجه معه الا واسمع النحسه ساارووه تزقرني..
سارة من بعيد بصوت عالي: مهااااااااااااااااااا....
ماعرفت شو اسوي..انا قايلتلها ما تزقرني مها..وتقول محمد بس شو اسوي دامنها ما تفهم!!!!
شفت سالم يطالعني مستغرب..؟؟ سويت روحي انه مب انا اللي تزقرني..بس ساارة...لااااااا..ومااا زالت مستمرة بالنداء((وصوت عاااالي يبط الاذااان))<<مو كنه مبالغ شويه؟؟
سالم: محمد شكل الاهل يزقروونك؟؟
صديت صوب سارة والشرر يتطاير من عيوني..
مها: سااارة....ليش تصارخين جي؟؟منو تبين؟؟وين مها؟؟
سارة بغباء: انتي مهاا..!!
عااد انا هنييه تمنيت ان الارض تنشق وتبلعني...وفخاطري ما خليت سبه ولا دعاوي اللا ودعيت على سارووه الغبية...
تميت اطالعها واسوي حركات بعيني عل وعسى تفهم..وسالم ورايه..ومستغرب وقفتنا ..وبعد .. جهد جهيد فهمت الاستاذه سارة يوم جافت سالم
ورااي..<<الحمدلله والشكر تو النااس.
سارة: هههههههههه..هييييييييييييي يييييييه..صح نسيييييت...شو اسمج..لا اسمك.شو يااااربي...حمد؟؟لا محمد...هيه صـــــــــــح..مشالله علي ذكية<<ياا حاافظ
الله يفضحها...!!
حاولت اغطي ع الموضوع..
ضحكت بارتباك: هههههههههههه..الله يقطعج..ما تيووزين من المقالب..اقول سيري ازقري مها...قوليلها يلا بنسير..
سارت سارة..
طالعت سالم: ههه..هالبنت دووم تحب المقاالب..
سالم ابتسم ولو انه مبين انه ما فهم شي...
سالم: يلا محمد..انا بسير الحينة..تامر علي بشي؟؟
مها: سلامتك..
سالم: يلا مع السلامة..
مها: مع السلامة..
تميت اطالع فيه الين ما غاب عن عيوني..
عقب جفت سارة تطالعني من بين الرفوف..
طالعت فيها بحده: برااويج يالدبة..
سارة بوزت: مهاااااااااا..الحينة انا شو يخصني؟؟ما سويت شي...^ـــــــــــــــــــــ ـــــــــ^<<ياكبرها عند الله..جذب عيني عينك..!!
مها:آآآآآآآآآآآآه..شوو اسوي؟؟ انتف شعري؟؟ كنتي بتفضحيني..وخاصة انه ولد جيرااناااا..آآه الحمدالله انه بعده ما استوعب اللي صار.شكله غبي؟؟المووهيم ما بودييج وياايه مرة ثانية
سارة: هههههه..سوري والله مانتبهت..((وتتذكر شكل مها وهي مرتبكة وتنقع ضحك مرة ثانية)) ههههههههههههههههههههههههه ههههههههههه
مها مغيظة: شبلااااااااااااج...يعلها ضحكة بليااا ضروووووووس....
سارة وعيونها تدمع من الضحك: اتذكر شكلج وانتي مرتبكة..ولا وتضحكين من الخووف..هههههههههه
مها ضحكت وياها: هههههههه..مالت علييج ..ماعرفت شو اسوي...
سرت احاسب ع السريع...كنت شاله وياي فلوس..كان وياي 4000..وفي البنك 6000..يعني الحمدالله اقدر امشي فيها حالي الين ما القالي شغل..
ردينا البيت..
بعد اسبوعين....تقريبا استقرت اوضاعنا ...وتعودنا ع المكان..اليوم بسير اسجل سارووه في المدرسة..وبدور لي وظيفة.سجلت سارة في المدرسة وعقب سرت المطار يمكن يقبلوني...عطيتهم شهادة ثاني ثنوي..سويت اللي طلبوه مني...وقالولي اتريي اتصال مناا..رديت البيت الساعه 11 الظهر..قررت اسوي غدا مع اني ماعرف بس شريت كتاب للطبخ..سويت مجبووس..^^ رحت اتسبح عقب صليت..ويلست في الصالة اتريا سارة...سمعت صوت باص طالعت من الدريشة جفت سارة وبنية ثانية ينزلون من الباص..
دخلت سارة..
سارة: سلاااااام..
مها :وعليكم السلام...
يت وباستني ع خدي..
سارة: مممم ان يو....
قاطعتها: بدلي بسرعه بسير احط الغداا.
سارة: فدييييت اللي يفهمووني..((سارة وهي تشغل حاسة الشم عندها))آآآه في رييحة حلوة...اكيد من بيت الجيران..
مها وهي رافعه حياتها: احيييييييم..احييييم..كاني سمعت حد يمدحني؟؟
سارة: اوونه انتي طبختي؟؟لالا هذا شي من سابع مليون من المستحيلات..
مها تخصرت: لا والله وليش يعني مستحيل؟؟
سارة: انتي ما تدانين الطبخ...هذا واشك انج تعرفين شكل مطبخنا اللي في بيتنا...
مها: هاهاهاها..ما تضحكين.اقول سيري بدلي انا ميته يووع...
سارة سارت تبدل ع السرييع..سرت احط الغدا ..وتغدينا وتمت سارة تسولف ويااي عن المدرسة وعن ربيعتها اليديدة اللي هي بنت جيرانا..خلصنا اكل..عقب سرنا نغسل الموااعيين...سارووه سارت ترقد..وانا سرت انسدح في الصالة..شوي الا ويرن مبايلي.((سالم يتصل بك...) تذكرت اني عطيته رقمي يوم طلبه مني واستحيت ارده...عاد انتو تخيلوا اقول لا....خخخخ بيقول هاا من الحينة يسوي عداوة..خخخ ولا اقوله لااا عييب..>>قوية..
رديت عليه..
مها: مرحباااااا..
سالم: مرحبتييييين...شحالك حموود..
ياا سلاااام...في تطور عجييب((حموود))خلوني عليه الحينة بهزبه..<<هيييه شفييج انتي؟؟ بلا خبال..
انتبهت على صوت ساالم..
ساالم:آآآلوووو..وينك؟؟محمد. .انت معااي ع الخط؟؟
مها: هااه..سوري سالم....هيه ويااك...الحمدالله تماام..وانت شحالك؟؟
سالم: يسرك الحاااال..
مها: دوووم....
سالم:ويااك..حبيت اعزمك اليوم عندنا ع العشا..
مها:.لااا....أأأ
قاطعني:ماشي لااا...بتيوون يعني بتيوون الوالدة عازمتنكم كلكم..وبتزعل اذا ما ييتوووا...
قلت وانا متورطة: اوك..خلاص
سالم: يلا اجوفك بالليل..مع السلامة
مها: مع السلامة..
بندت من عنده....اووووووف...انا الحينة متورطة شوو اسوي؟؟ شكلي اليوم بنفضح...الله يستر..طنشت الموضوع ورقدت....
............................

سالم.. ...الحمدالله خلصت المذاكرة....احم احم...بعرفكم علي..انا سالم عمري 23 سنة..في الجامعه الحينة قسم ادارة واقتصاد..عندي اخو اكبر عني ومعرس..اسمه حمد وعنده ولد اسمه سلطون...على اسم ابوي سلطان الله يرحمه...واخواتي...سلامة..17 سنة..ونورة 13 سنة..والحينة كنت ادرس الامتحان اللي كان علي وخلصت المذاكرة....الحينة بسير ايلس ويه امي...
سرت الصالة جفت امي ونورة يالسين..سرت وقعدت عدال امي....
قلت: اقول يمه..ترا ولد ييرانا قال خلاص بيي بالليل..
ام حمد: حياهم الله..قلتله اييون كلهم؟؟
سالم: هيه...
ام حمد: امه بتيي؟؟
سالم: والله مادري عن امه..انا ما جفت غيره وغير اخته اللي قالتلي عنها نورة..
نورة: هيييه..ربيعتي اليديدة سارة..
ام حمد: انتي اصلا كل يوم لج ربيعة..
نورة: لا خلاص الحينة قررت الاستقراار..تعبت
سالم: الله واكبر...عيل ربيعاتج القدامى تركتيهم؟؟
نورة : والله على حسب..اذا جفت بنت وعيبتني اسير ارابعها واذا حسيتها مملة...طبعا بعد ما احصل ثانية اسير ويه الثانية...اما هااي فاخليها سبير..عسب اذا ما حصلت احد يتمشى وياي اخذها هي..يعني تقدر تقول على حسب المزااج..
سالم: ياا سلاااام..عيل بقول لمحمد ما يخلي سارة ترابعج...
نورة:لالالالالا...قلتلك خلاص استقريت..ومابا اتراجع عن قراري..
سالم: اهاا..بنجووف..
ام حمد: يلا سالم فديتك سير حط راسك شويه الين ما ياذن العصر...
سالم: هيه والله لاني مصدع من المذاكرة..
ام حمد: الله يوفقك اان شاءالله..
سرت حجرتي ورقدت..
...............................
مهاا...نشيت على ماي بااااارد انصب ع ويهيي...شهقت بصوت عاالي...ويلست بسرعه...بطلت عيني جفت سارووه ف ايدها غرشه ماي وتضحك...
سارة: يلا نشي صلي العصر الحينة بياذن المغرب..
جفت الساعة 6 ونص...اووه بياذن المغرب ..
مها: براويج بس خلني اصلي اول..
سرت اصلي..عقب اذن المغرب....وصليت..
بعدين زقرت سارة...
مها: سااروه...بعد صلاة العشا بنسير بيت جيرانا..
ساارة: منوو قوم سالم؟؟
مها: هيه..
سارة استانست: ونااسة بجوف ربيعتي نورة..
مها: اللي قلتيلي عنها؟؟
سارة: هيه..
مها : اهاا..
....
قبل اذان العشا بشويه..ٍسرت البس..كل ما اطالع روحي في المنظرة اظحك على شكلي العبيط بالكندوورة...تخيلو...الكندور ة وسيييعه واناا ضعييفه..يعني باختصار ضايعه فيها...رفعت شعري بعشر دبابيس..عسب ماتطيح ولا شعره..ولبست الغترة..
..............
الساعه 9 تقريبا ظهرنا انا وساروه...وسرنا صوب بيتهم...دقينا الباب..ظهرتلنا بنية.
مها: السلام عليكم..
سلامة: وعليكم السلام..
مها: سالم موجود؟؟
سلامة:هيه موجود حياكم تفضلوا....
رحت انا صوب الميلس..وانا خايفه...مادري اول مرة اتقرب من سالم جي...دوم يكون سلام...وانتهت السالفه..سارة سارت صوب الحريم..
يلست في الميلس بروحي....عقب شويه يو سالم واخوه الكبير على ما اعتقد او ابووه مادري..
سالم&حمد: السلام عليكم..
محمد(مها): وعليكم السلام..
حمد: مرحباااا بك محمد....شحااالك؟؟ وعلووومك؟؟
محمد: الحمدالله تمااام....وانت شحالك؟؟
حمد: مديم الحاال.....يسرك حالي..\
سالم: اعرفك محمد..هاا اخوي العوود حمد..وعنده ولد واحد اسمه سلطان...
محمد:والله مشالله...
سالم: محمد..يبت اهلك كلهم؟؟؟
محمد: هيه بس اختي الصغيره..
سالم: ليش؟؟ اانا قلت ييبهم كلهم حتى امك..
محمد: والله امي الله يرحمها ميته وماعندي غير سارة واختي التوام وهي الحينة ببيت خالتي..
سالم: ماعندك اهل غير خالتك...
مها بحزن: كان عندي عمي بس توفى الله يرحمه..
سالم: الله يرحمهم.وابوي انا بعد توفى...
مها طالعت فيه: والله؟؟ ما قلتلي..الله يرحمه....
سولفنا شويه عقب حطوا العشا واكلت...صراحه كان الاكل واايد لذييذ...كان من طبااخ ام ساالم...
وانا اتعشى كنت احس بهم يراقبوني..رفعت عيني صوبهم....
قلت: شفيكم؟
سالم:ليش تاكل شويه كل واايد..
مها: ههههه اسوي رجيم...
سالم: جووف انت بروووووحك عصااا..
مها بداخلها: الله يخلي الكندوورة...
كملت اكلي...عقب قمت..
مها: الحمدالله...والله الاكل لذيييذ يزاكم الله خيير..
سالم: تعاااال...ما اكلت شي..
مها: لا خلاص كفااية بطني بينفجر..
غسلت ايدي...ورديت يلست مكاني...حمد ظهر من عندنا قال بيي عقب..تمينا انا وسالم نسولف..
سالم: الا اقول محمد شو تشتغل..
مها: حاليا ما اشتغل..قريب ان شالله بشتغل....وانت تشتغل ولا تدرس؟؟
سالم: لا ادرس..في ثالث سنة في الجامعه...
مها: مشالله اي تخصص؟؟
سالم: ادارة و اقتصاد..
دخل علينا حمد وياه ولد صغير شكله ولده سلطان....يلس حمد..
حمد: هاا ولدي سلطوون...
مها: فديته..مشالله عليه..
كان شكل الولد كيووووت..لكن اذا طالعتوا فعيونه تجوفون فيها لمعه غريبة....
مها: عطني ياه..
عطاني سلطون وقعدته فحضني..
مها: ما يروم يمشي...؟؟
حمد: لا بس يحبي..
بسته على خده...وهو استانس..كنت العب وياه...وحمد وسالم يسولفون ويه بعض...وانا رافعه ها سلطوون...شويه الا ويسحب الغتره..وطلع نص شعري بس بسرعه غطيته وعدلت الغتره...وسلطوون يحاول يسحب الغترة وانا ابعده وما بي حمد وسالم ينتبهون زين انهم ما نتبهوا يوم طلع شعري....عاد سلطون عنييييد..توني اعرف سر اللمعه اللي فعينه...مسكته عدل..جفت سالم وحمد مندمجين في السوالف عاد انا استغليت الفرص قرصت سلطون في ريوله..قرصه قويه....هع
ثواني..
((وااااااااااااااااااااااا اااااااااااااااااااااااا اااااااااااااااااااع))
آآآآآآآآه....عنبووو مب صوت عليه...
انا بتمثييل: بسم الله شبلاه ..حبيبي سلطووون...شفيك؟
حمد قام وشله عني..ويسله فحضنه يحالو يسكته...
وسلطان يحك ريوله..<<خخخخ مجرمة
حمد جاف ريوله..
حمد: بسم الله ليش ريوله حمرااا..
انا هنييه افتشلت..
مها: اوونه اجوف...ممممم يمكن سمسومة قرصته...
حمد: حلييله هاا دووم تقرصه السماسيم..
انا بداخلي: دواااااه السبااال..
حمد وقف: خلاص انا بسير اوديه عند امه...
فكــــــــــــــه!!<<خخخ الحمدالله والشكر تحط راسها براس يااهل..
شويه.واستاذنت برد البيت..ظهرت براا اتريا سارووه ...جفت اخت سالم..اعتقد نفسها هي اللي بطلت الباب..تمت تطالعني استغربت..لكن ما اهتميت للسالفه..ردينا انا وسارة البيت وتمت تسولف ويااي عن نورة اخت سالم..
سارة: تخيلي اول ما دخلت عليهم كنت مستحييييية..امهم تمت ترحب فيني..وااااااااايد طيبة فديتها..آآآآه ياليت عندي ام شراتها...
صدمتني سارة.....صح يوم توفو اهلي صاحت بس عقب حسبتها تعودت..ماكنت ادري انها بعدها متاثرة لانها ما تبين لاحد..
قلت بحنان: ليش ساروتي؟؟ انا مب شرات امج؟؟
سارة تطالع فيني ...عقب قامت ويلست عدالي...وحطت راسها ع كتفي...
سارة: انا واااايد احبج مهووي...
مها: حتى انا واايد احبج..لانج انتي اللي بقيتي فحياتي..
سارة طالعت فيني وابتسمت..
مها: يلا الحينة سيري ارقدي..
سارة:لااااااا..بعده وقت..
وقفت وتخصرت : انا شووووو قلت؟؟
سارة بوزت: خلاص انزيين..انزيييين..
وسارت ترقد....
انا تمييت الين الساعه 12...عقب سرت ارقد...
نشيت الفير...صليت.وقومت سارة بعد تصلي..
عقب ردت ترقد..اما تميت اقرا قران الين الساعه 6...عقب سويت لسارة ريوق...وقومتها تتجهز حق المدرسة...الساعه 7 راحت سارة المدرسة وانا رديت ارقد...نشيت على صوت مبايلي يرن....رديت...طلع المطار قبلوني عشان اشتغل عندهم..استاااانست ..رحت بسرعه البس...عقب لبست عباتي وشيلتي وظهرت كانت الساعه 9 ونص...وانا ظاهرة..جفت ساالم....سويت روحي ماجفته اما هو ياا صووبي..اووهوو شو يبا الحينة؟؟
سالم : السلام عليكم..
مها: وعليكم السلام..
سالم: انتي اخت سالم صح؟؟
مها: هيه..بغيت شي اخويه؟؟
سالم: محمد موجود؟؟
مها: لا...ظهرمن الصبح....
سالم: اها..اوك خلاص مشكورة...مع السلامة
مها: مع السلامة...
وقفت تاكسي عقب سرت الشغل..
..................
سالم... بطلت السيارة..وشغلتها...سبحاان الله اخت محمد وااايد تشبهه!!...حركت السيارة...بسير الجامعه....انا بالنسبة لي ما عندي ربع..يعني ما احتك في الناس واايد..ومو اي حد يعيبني...لان هالزمن صعب انك تحصل ربع اوكيه..تقريبا اغلبيتهم طاايشين..بس مادري محمد اكثر وااحد ارتحت له...هاادي...ما يخصه فحد..وغير هذا حبووب..بس مادري ليش احسه ما يبا يحتك فيني...يمكن بعده مو متعود؟؟وصلت الجامعه...ونزلت ورحت الكلاس...
................
مها..رديت من الشغل الساعه 12 الظهر..كنت مستاانسة...وايد عيبني الشغل..سرت صليت الظهر عقب سويت الغداا..عقب تسبحت ..بعدين سرت اقعد في الصاله اتريا ساارة..هي بتيي الساعه 1 ونص..باقي ربع ساعه الين ما توصل..
فكرت في حالنا..يا ترى شو صار بخالتي وريلها؟؟ خخخخ اكيد بعدهم مقهورين ويدورنا عسب الاوراق المهمة اللي شليتهن....تذكرت سالم مادري ليش طرى ع بالي؟؟ حليله احسه طيب وع نياته..واحسه بعد يبا يحتك فيني..بس كيف ابعده؟؟؟
سمعت صوت باص ساارونه...طالعت من الدريشة..وقف الباص بس محد نزل..شويه وتحرك...ليييش؟؟ وين سارة؟؟قلبي وقف من الخوف..سرت بسرعه لبست عباتي والشيلة...وطيران ع بيت سالم...دقيت الباب ظهر اخت سالم..
مها: لو سمحتي نورة ردت البيت؟؟
سلامة: لااا..
عضيت ع شفايفي: اوك خلاص مشكوورة...
رحت بسرعه وقفت تاكسي وسرت مدرستهم...قالوا ما شي بنات كلهم راحوا...اناا خلاص..بموووت..والوساوس اللي فيني ما تهدا..اكيد خالتي وريلها لهم يد في السالفه...رديت بسرعه البيت..نفس الشي ما حصلتها تميت ادور في الشوارع شرات المينوونة....جفت سالم توه نازل من السيارة..ركضت صوبه ومسكته من كندوورتة وانا اصيييييييييح...
سالم: بسم الله ليش تصييحين؟؟
مها وانا احاول اهداا: سااااااارة.....سااارة..بعدها ما ردت البيت ..ومب في المدرسة..دورتها ف كل مكان ما حصلتها..
سالم: خلاص ..خلاص ..اذكري الله..ان شاءالله الحينة بنحصلها..
ظهرت ام حمد..وسلامة..
ام حمد: خلاص يا بنتي..استهدي بالله..اختج اكييد بخيير..
مها: انتوو ما تعرفوون شي...خا...
عضيت ع شفايفي..آآآآآخ...غببية انا شو كنت بقوول؟؟ كنت بفضح عمري..
سالم طالعني بشك: شو اللي ما نعرفه؟؟
مها: أأأ اقول..اخااف يصير فيها شي وبفقدها...
سالم: لا..ان شاءالله تكون بخير..
ام حمد: تعالي يابنتي ادخلي عندنا..وسالم بيسير يدورها هي ونورة..
هزيت راسي بقوة بمعنى لا..
مها: لااا..انا بسير ادورها بعد..
سرنا ندور مها وسارة انا وسالم....كانت فيني غصه ابي اصيح....بس لاااا مابا اصييح لازم اكون قويه..
مرت ربع ساعه ونحن ندور...خلااااص..سارة راحت مني...انا استويت وحييده...يلست ع الرصيف بياس..ونزلت راسي باسى...ودموعي تنزل ع الارض..
سمعت سالم يزقرني..بس ما رديت..عليه..

شو بيستوي ف سارة؟؟
كيف بتكون حياة مها؟؟
سالم بيكشف مها..ولا بتم فنظره محمد وبيقدر يكون ربيعه؟؟
انتظرووني..^^
>>>نهــــاية الجزء الثالث<<<