اصبح الصبح وكان عليان وابوه توهم يدخلون البيت
تلقاهم ياسر
ها عسى افتكيتو منها
عليان مافيه يتكلم للحين عظامه تتنافض
سجد سجود شكر على ارض الحوش البارده
: الحمد لله الحمد لله
ابو عليان : بنت الحرام ذبحت نفسها بغرفة الحجز
ياسر انصعق : انتحرت
هز ابو عليان راسه بتعب
ياسر : موتت الكلب الاجرب الحمد لله اللي حفظكم
طلع ابو عليان بيلحق ينام قبل صلاة الجمعه
وعليان مافيه يتكلم اشر لياسر بالسلام ودخل عند امه
فرش تحت سريرها ونام
وقمرا وعليا ولا كلمنه طلعت عليا لغرفتها ووخالتها معها
انسدحت عليا وبجنبها خالتها
جافاها النوم ماهي قادره
وقمرا حاسه فيها
:عليا
: هلا خالتي
قمرا: انا عندي كلام كثيير بس بختصر لس يا بنتي
ياسر وانتي تكفين . . . .
بدت تتغير ملامح عليا اعتراض
قمرا كملت : تكفين لا ترديني يا بنتي تكفين
انا عارفه انس عايفته ويمكن تكرهينه
بس يا بنتي انتي تكرهين ياسر اللي زمان
تكرهين اللي كان يضربس وينكافس
عليا امتلت عيونها دموع
: يا خالتي ماهو اختياري ماهو بموافقتي
وانتي المفروض اول وحده ترفضين هذا الارتباط
انتي جربتي الغصب وجربتي نتيجته
قمرا سكتت ثواني
: انا يا بنتي رافضه فكرة زواجي كلها
ما كان اعتراضي على ابو ساري
انا اعتراضي على الزواج نفسه
اما انتي ا ن شا الله بتتزوجين
واعتراضس على ياسر زمان
والله انه تغير ماهو ياسر الاول
حتى انتي يا عليا تغيرتي تقدرين تنكرين؟
سكتت عليا وما يجاوب عنها الا دموعها
قمرا: عليا حبيبتي عطي نفسس فرصه
وعطي ولدي فرصه
تخيليه واحد غريب وتوه متقدم
وانتي بتفكرين وتستخيرين
اوعديني يا قلبي
عليا : طيب ياخالتي هو كلمس وطلبس تكلميني
قمرا تفاجأت من سؤال عليا : بصراحه لا
عليا : طيب يمكن بعد هو مايبيني ليه تجبرونا على بعض
صدقيني ياخالتي الكره شعور متبادل بيننا
قمرا :حنا وش اتفقنا يا عليا انتي بتعطين نفسس فرصه
وتعيدين التفكير في الموضوع
وانا بكلم ياسر وهو ما يرد لي طلب
عليا بصرخه خفيفه : لاااا لا تكفين ياخالتي
حلفتس بالله ما تنبهينه ولا تسالينه
وانا اوعدس اني افكر واستخير
تبسمت قمرا : طيب ابشري حبيبتي
ما بكلمه وما تدرين يمكن هو يجي يكلمني قريب
والحين خلينا ننام
عليا : المهم انتي ما تكلمينه ابد
*********
وقعت فايزه على عقد النكاح
وانهارت تبكي
حاولت امها تهديها : بالمبارك والله يجمع بينكم على خير ويرزقكم الذريه الصالحه
ويجزاس خير الجزا يوم كفلتي عيال اختس الله يرحمها
ركظت فايزه لغرفتها
من اعلنت عن موافقتها وهي تحاول تكون متماسكه
ضغطت كثيير على اعصابها والان وقت الانهيار
شهقات متواصله مرااره جفاف
حاسه انها مو قادره تسحب انفاسها
دخلو عليها عيال اختها الثلاثه
لابسين ومترتبين ولدين وبنت منال وماجد وفراس
عشر سنوات و8سنوات
ماجد يضخم صوته : خالتي ابوي يقول اذا جاهزه اطلعي
فراس نظراته وتعابيره نظرات التايه محتار : خالتي انتي بتجين معنا للبيت
فايزه حاولت تكون طبيعيه
مسحت دموعها ومسحت على راسه
: أي ياحبيبي بكون معاكم في البيت
ابتسم بتردد : ابوي يقول انكم تزوجتم
فايزه بغصه ك أي يا حبيبي
لبست عباتها واخذت شنطة يدها وطلعت مع اولاد اختها
وسلمت على امها وابوها
اخذها ابوها من يدها ووصلها لعند
سند الواقف في حوش البيت
نزلت راسها فايزه كارهه نفسها وكارهه سند
وكارهه موقفها هالحين
غرقت دموعها غطا وجهها
ابو فايزه برجا لسند : فايزه امانه بين ايدينك عطيتك الغاليه
حطها بين عيونك
سند موقفه بعد صعب اجبر نفسه على هالزواجه
يبي عياله معاه ويبي زوجه ما تضر عياله
ومافي افضل من خالتهم
بجمود : بنتك يا عمي على راسي وفي الحفظ والصون
ماجد شايل منال وفارس واقفين ويتابعون الحوار بين جدهم وابوهم
اخذ سند منال من ماجد : يالله يا عمي اسمح لنا بنروح لبيتنا
ابو فايزه لازال ماسك يد فايزه : حا فظكم ربي
ومشى معاها لين وصلها لباب السياره
جت بتركب في الخلف بس ابوها فتح لها الباب الاول
بجنب سند
ركبت مع عيال اختها وزوج اختها
منال تفلتت من حضن ابوها تبي حضن خالتها فايزه
مسكها سند وفايزه تلقفتها وتلامست ايدينهم بعفويه
واخذت منال وكشت ولصقت في باب السياره
وسند حرك السياره متوجهين لبيتهم
************
قراءه ممتعه لكم وردود حلوه
|