[درة الاحساء]

(7)

جويل تقربت من سعود : انطر اروح اغسل ويهي وايي لك ..

سعود بخجل : لا عادي روحي برتب مب مشكلة..

جويل ابتسمت : لا تسكر جنطتك قبل ما ارد ..



ظهرت من الحجرة وحصلت عاملة التنظيف،

خبرتها انها راعية الحجرة عشان تعطيها المفتاح ..

وما استوت دقايق الا وهي فاتحتلها الحجرة ..

/

سعود من الطرف الثاني سكر شنطته بدون ما يقفلها ..

وقرر يختار الهروب السريع من هالورطة اللي هو طاح فيها،

قال بيترياها شوي ..

اذا يت كان بها .. واذا ما يت مشكلتها هو مب مستعد يتريى اكثر .. !!



مرت ربع ساعة، من عقبها دخلت جويل وعلى راسها الفوطة ..

جافها سعود بصدمة وهو مستغرب من شكلها ..

ابتسمت جويل : اشفيك تطالعني جذي ؟؟ معجـب ؟؟!

سعود صد عنها : لا ماشي ماشي .. انا لازم اسير الحين ..

جويل : مو قبل ما تعلمني اشحطيت في الجنطة ؟؟

سعود بملل : جــــويــــل ..!!!!!

جويل توجهت للشنطة : انت شكلك ما تيي الا بالعين الحمرا ..

(فتحت الشنطة)

Yuk سعـــود اشحاط انت ؟؟؟

سعود باستغراب : ملابسي بعد شو ؟؟

جويل : سعود هالملابس كلها لازم تتخلص منها ..

سعود : أتخلص منها ؟؟ وشو ألبس بعدين ؟؟

جويل: آنا شريتلك جم t-shirt على جم بنطلون jeans بـألوان مختلفة، البسهم ..

سعود بعدم اقتناع : انا ماحب البس الا على ذوقي ..

جويل: لااااااا انت شكلك تبغي الناس يحسبون انك اكبر عن عمرك .

سعود بملل : جويـــل !!

جويل برجاء : بليز سعود طيعني لو بس this time...

سعود : انا مستعيل يا جويل وانتي يالسة تضيعين وقتي ع اللبس والخرابيط .. شو ها!!!

جويل : مالي شغل .. ع الأقل غير اللي انت لابسه الحين ..

سعود غيظ : جويـــــــل لا تحاولين أكثر عن جيه ..قلت لج مابـا !!

جويل بتحدي: خلاص ماكو طلعة الا لما تلبس اللي انا اخترته لك ..

سكت سعود، وهو فـ قرارة نفسه منقهر منهـا ..

حب يسايرها مدام هالمرة بتكون الأخيرة لـ لقائهم ..

فضل فيها إنه يحتفظ ببعض الود بينهم ..



"أضحك كثيراً على نفسي وأنا اشاهد لبسي العجيب!!!، لأول مرة ألبس الجينز مع قميص ذو أشكال وعلامات غريبة على شخصيتي، والفضل لجويل التي لم تشأ أن تتركني أذهب وشأني هكذا، وفضلت أن أبقى طيلة الوقت بهذا اللبس الهجين علي أكثر من لبس المضيفين ذاك"


جويل باندهاش : سعود آنا ما توقعتك وسيم بالحيل جذي ..

سعود وهو حاس انها تجامله : شكراً .. يلا ممكن تعطيني تصريح الخروج ؟؟

جويل ابتسمت : سلامتك حبيـبي ..

ابتسم سعود مجاملـة لها : يلا مع السلامة ..

/

فـي بيـت أم سالم ..

ام سالم : ويديه وين سايرة ومخلتني روحي ؟

خلود : سايرة أسجل في المعهد وياية .. عطيني نص ساعة بس ..

ام سالم: عيال اخوج ما يسكتون الا عندج .. ما يتوالمون ويايه ..

خلود : اميه مطور راقد ومريومة التلفزيون بيسكتها .. والله نص ساعة ورادة .. المعهد جريب الا عشر دقايق درب ..

ام سالم : لا حول ولا قوة الا بالله .. انزين ترخصتي من سعود ؟؟

خلود ابتسمت : هيـه ترخصت وبطلاع الروح رضى ..

ام سالم : الحمدلله انه رضى .. بعدين تعالي متى رمستيه يالعيارة ؟؟

خلود : امس رمستـه .. وحليله اميه ساير حق مشروع الدوام وظلمناه ..

ام سالم : قال لج سالم لا تظلمينه .. بس انتي عنيدة وراسج يابس ..

خلود : المهم انه طاع ..

ام سالم : انتي اتصلتيله ..

خلود : هيه .. بس ما كان موجود .. ومن عقبها اتصل فيه ورمسته ..

ام سالم : وحليله ولدي والله افتقدته .. والثاني عمليته اليوم والله العالم بحاله ..

خلود بخبث : أميه ..انتي تحبين سعود أكثر عن سالم صح ؟؟

ام سالم : كلهم عيالي .. عن العيارة خلود ..

خلود : بس احسه سعود غير صح ولا لا ؟؟

ام سالم ابتسمت : كلهم واحـد ..

خلود : ما بخبرهم ما بخبرهم قـووولي!!

ام سالم : سعود طلع يشبهني وفوق ها اسمه على ابويه .. لازم يكون غـير ..

خلود : بخبر سالم ..

ام سالم : حتى سالم أحبه وتراه بجري وسندي .. ولا تستوين فتانة انتي بعد ..

خلود : ههههههههههه انزين .. يلا انا اترخص ..

ام سالم بحيا : خلود ..

ابتسمت خلود بخبث : ادريبج تبين ترمسين سعودو، خلاص بخليج ترمسينه وانا بظهر عنج عشان تاخذين راحتج ..

ام سالم : الله يحفـظج ..

/

عنـد خليفـة !

طالعه بنظرة : ما عندنا وظايف ..

خليفة : يا بوك مابا وظيفة .. بس اباك ترمس المدير انه يطيع يخليني اتجول فـ أقسام الفندق..

الريال : انزين اصبر ..

(اتصل بالمدير وخلص)

خليفة : ها.. بشـر ؟؟ دو دو دو دوووووو

الريال باستنكار : نعم ؟؟

خليفة ضحك : هههههههههه لا قصدي دعاية شركة (Du) .. اسمحلي كنت اتمصخر هههههه

الريال باحتقار : ما يضحك .. سير ادخل عنده احسن لك ..

خليفة استقوى : تعال وكلني بعد ..



مشى عنه ودق باب غرفة المدير ..

المدير : ادخـــل ..

خليفة : السلام عليكم ..

المدير : وعليكم السلام ورحمة الله .. خير ان شا الله بغيت شي .؟؟

خليفة: الله يسلمك أنا موظف في فندق ...... ومطلوب منا اننا نسوي مشروع يخص قطاع الضيافة وانا فكرت اقارن بين مستوى فندقنا وفندقكم .. وكم فندق من فنادق البلاد .. والفندق المفندق يفندق في فندق فلان وعلان ..

المدير بدون ما ينتبه ع كلامه : فكرة حلوة انك تفكر في هالمشروع، لكن أتوقع إن تفكيرك يمكن يسبب لك مشاكل خاصة مع بعض الفنادق اللي ما ترضى الا انك تتكلم عن خدمتها بالزين .. واللي ما أقدر أخفيه عنك اني أنا أول واحد ما أرضى إلا إنك تكتب شي زين عن الفندق اللي أنا أديره ..

خليفة ابتسم : شو رايك تخليني أسوي استطلاعي بصورة كاملة.. ومن بعدها انته تجوفه اذا كان يحتاي أي تعديل ؟؟

المدير : موافق، بس لازم توقع على العقد ..

خليفة باستغراب : أي عقـد ..؟؟

المدير: عقد تتعهد فيه انك ما بتمس سمعة الفندق بأذى خلال بحثك ..

خليفة وهو يفكر بطريقة درامية : كم بتدفع ؟؟

المدير تفاجأ : نعــــــــــم ؟؟

خليفة انحرج : ههههههههههه .. اتمصخر .. (بجدية) وين العقد عشان أوقعه ؟؟

/

وفـي إحدى فلل دبـي ،،

صدت أميرة بملل صوب أمها : اميييييه خلينا نظهر ..

ام اميرة : لا بويه انا عازمة حريم وما روم أظهر .. جان تبين اظهري روحج ..

اميرة : انتي تدرين اني ماحب أظهر بروحي

ام اميرة : سيري ويا وحدة من ربيعاتج ..

اميرة بوزت : ما عندي ربع وانتي تدرين بعد !!!

ام اميرة باندهاش : انتي ... أميـــرة بنت بو سلطان .. وما عندج ربع ؟؟

أميرة بحزن : محد يرضى يرابعني ..

ام اميرة : خلهم يولون اشعليج منهم ..

اميرة : خلود كانت آخر وحدة وانتي قضيتي عليها .......!!!!

ام اميرة : بف بـاف جدامـج يعني ؟!!!

اميرة : امييييه خلنا نكون جادين شوي !!!

ام اميرة : سعود ما يصلح لج انتي .. انتي اميرة .. بنت التاجر ......

اميرة تقاطعها : اللي يسمع الحين ابويه سمعته مقطــــــعة ..

ام اميرة : يعني اذا مب مشهور معناته تاخذين هالحافي المنتف ...؟؟؟

اميرة : والله هو الوحيد اللي دش قلبي !!!

ام اميرة باستهزاء : هيـــه عشان جيه سرتي وقلتي ماباه ..

اميرة : تراكم انتوا قلتولي ياينج واحد احسن عنه وعنده المال والجاه وكل شي ..

ام اميرة : ونحن صاجين .. ولين الحين الريال شارنج بس انتي اونج تتغلين ..

اميرة : بس ما قلتولي حزتها انه الريال قد ابويه ويمكن اكبر عنه ..

ام اميرة : السن مب عيب .. يكفي انج بتعيشين الخير والنعمة ..

اميرة : يمكن .. بس في نفس الوقت مستحيل أستوعب اني اكون زوجته..

ام اميرة : والله بطرانة .. الريال يتريا ردج من شهور والدليل انه عند ابوج في الميلس بعد..

اميرة برفض حاد : ما اقدر اتقبله خاصة انه هو أبو سعود اللي خاطبني .. يا امييه وين استوت هاي .. الأبو والولد اثنيناتهم يخطبوني ؟؟؟

ام اميرة : ليش انتي شو ناقصنج تراج بنت التاجر بوسلطان ..

اميرة بملل : اذيتينا ويا هالتاجر اللي ما عنده الا أسهمه وهالفيلا ..

ام اميرة : ع الأقل عنده ولا جان هالبورش ما سقتيها ..

اميرة بغيظ : الله والبورش عاد بالأقساط لا وبعد ذاليني وذالين طوايفي فيها ..

ام اميرة : انا مــا عندي سـالفة يالسة وياج .. اسير أعابل المطبخ واجوف شو اللي ناقص حق العزيمة احسن من مجابل ويهج ..



وسارت عنها ..

تنهدت أميرة بقهر .. وطفرت دمعة من عينها ..

نشت من مكانها وتوجهت لأقرب دريشة ويلست تتأمل الوضع برع،

ردت صدت ع القنفات ويلست ع وحدة منهم ..

تنفست بعمق وهي تقول فـ خاطرها :

والله اني عمري ما كرهت سعود ولا كان حتى قصدي اني أهينه وأطرده، أدري اني فـ لحظة غباء مني قلتله ماباك .. بس محد يدري كيف هاك اليوم صحت وحسيت عمري ضـــــايعة من دونه.. مع انه ما كان يشكل أي أهمية فـ حياتي كوني لا أكلمه ع التلفون ولا ألتقي به، لكني كنت أحس اني مرغوب فيه ومب شرات ما الكل يقول عني كريهة وأخلاقي بايخة، وفوق ها جمالي عادي وما فيه شي يميزني، والله ما كنت أدري ان ابوك هو نفسه اللي ياي يتقدم لي، وهاللي خلاني أجوف عمري وانسى الكلام البايخ اللي انقال لي، افففففففف والله متضااااايجـة .. !!!!!



نشت من مكانها وتوجهت لميلس الرياييل،

كانت في هناك بوابة زجاجية تفصل غرفة الطعام عن ميلس الرياييل، بحيث إن اللي ف غرفة الطعام يقدر يجوف اللي في الميلس في النهار والفليل يوم يولعون الليتات يستوي العكـس ..



تأملت اللي يالسين،

كان بو سعود وأبوها ..

أبوها كان شكله متونس على بوسعود خاصة ان سوالفه كلها تضحك وكلها مغامرات،

أما بو سعود ..

فلأول مرة تركز ع ملامحه ..

ما كان سعود يشبهه فـ أي شي ..

صح انه وسيم .. بس سعـود أوسم بواااااااايد ..

سعود فيه نظرة غريبة تجبر الناس انهم يحترمونه، فيه ملامح حادة وتقاسيم ويهه ياما عذبتها مثل ما عذبتها حالته الاجتماعية، وانه لو كان أغنى شوي جان انحلت كل المشاكل..

ركزت ع ويهـه أكثر لقت ان سالم اخو سعود هو النسخة الأصلية من هالشخص، حست بالقهر وهي تتذكر أيـام مضت عليها وقضتها مع عايلة سعود كلها وعرفتها وعرفتهم، ويوم استخبرت ان سعود هالوسيم حاط عينه عليها، أدركت ان سعود لقى فيها شي غير الجمـال، وإلى الآن ما عرفت شو هو..

ردت على ويه بو سعود وركزت فيه أكثر ..

لقت ان سعـود خذ منه بس هالغمازات والابتسامة الصافية،

غمضت عينها وتساءلت في قرارة نفسها ..

بو سعـود وابتسامته الصـافية،، هل تدل على صفاء نيـته ؟؟؟؟!!!