[درة الاحساء]

(8)

مر على طاري أميرة ذكريـات وايـد .. أهمها ذكرياتها ويا صديقة العمـر "خلود"

مشت صوب الصالة ومن بعدها ركبت الدري عشان تتوجه لحجرتها ..

كانت مصدعة من كثر التفكير والضيج اللي هي حطت نفسها فيه ..

تذكرت موقفها ويـا خلـود في يوم مـا ..

أميرة : انتي دوووم تكلميني عن أمج وعمرج ما كلمتيني عن أبوج ..

خلود : شو اقولج يعني عنه ؟؟

اميرة : أي شي .. دومج انتي تحبين تتكلمين عن عايلتكم .. كلمتيني عن اخوانج وامج .. بس ابوج عمرج ما طريتيه .. لهالدرجة هو كريـه ؟؟

خلود : هههههههه كريه مرة وحدة ؟؟ الصراحة أنا ما عشت ويا ابويه عشان اعرف اذا هو كريه او لا.. بس اللي اعرفه ان ابويه تزوج وحدة ومن بعد ما ماتت استوى كل يوم يتزوج حرمة .. وما رسى مع ولا وحدة .. اللي يسمع هو موجود بس عشان يتزوج تخيلي !!!

اميرة : اويه يعني كم حرمة عنده ؟؟

خلود : اميه لين الحين في ذمته وما رضى يطلقها عشان عنده عيال منها .. اما الباجيات من يمل من وحدة منهم يطلقها وياخذ له وحدة ثانية ..

اميرة : والحريم هاييل مغفلات عشان يرضون يتزوجون أبوج وهم يدرون ان آخر شي بيطلقهم ؟؟

خلود : والله مادري !! .. بس تدرين يا اميرة .. نحن صح عايشين ع قـد حالنا .. بس ابويه تاجر عود وعنده فلوس والله أنعم عليه ..

اميرة : ما تمنيتي فـ حياتج انج تكونين عايشة وياه ..

خلود : تمنيـت وايد .. بس الأيام المعدودة اللي جفتها فيه خلتني استانس اني ما عرفه ..

اميرة : يعني دمه ثجيل ؟؟؟

خلود : بالعكس دمه خفيـف ويسولف ويضحك.. بس تخيلي بعد كل زيارة أجوف أمي تتعذب وأحياناً تمرض من زود الحزن .. (بنبرة حزينة) أميرة أمي تـمـوت على هالإنسان اللي يسمونه أبويه .. تموت ع طاريه .. تموت يوم تجوفه يضحك ويبتسم .. الحب اللي هي عايشتنه صوبه مب طبيعي موليه ..

اميرة : عيل ليش انفصلوا جيه ..

خلود : انا ماعرف كل شي .. بس اميه قالتلي انها زخته ويا وحدة .. ومن يومها انصدمت فيه وانعزلت عن هلها حتى ..

اميرة : وابـوج رضى انه ينفصل عنها ؟؟

خلود : والله ما ادري .. شو رايج اتين بيتنا وتسإلين اميه احسن ههههههههههههه



STOP..

لهالحوار وبـس ...

تنهدت وهي الفضـول يحاصرها في محاولة معرفة أسباب الانفصال الجزئي ..

هل ممكن تقبل بمتزوج وعنده عيال اكبر عنهـــــا !!!!

/

مع مـرور شبـه يـوم ،،

وفـ الطيارة ..

المضيفة سنـاء : كيفـك سعـود هلأ ؟

ابتسم سعود : الحمدلله .. سنـاء ممكن سؤال ؟

سناء : شو هوي ؟

سعود : عندج اقتراحـات لي عشان أنفذ المشـروع ؟؟ أنا كملت أسبوع وبعدني ما بديت في المشروع موليـه ..

سناء ابتسمت : ممممممم طيب رح فكر معك ..



"كانت سناء رقيقة جداً معي، وذات أسلوب بسيط ومرح، ارتحت لها بمجرد ان أخبرتني انها متزوجة، والأفضل أن زوجها هو مساعد الطيـار حمد، استسمحت منها على ما بدر مني في رحلة ألمانيا ظناً مني أنها تحاول التقرب إلي، أعلم أني خدعت نفسي حين ظننت أن كل النساء ينجذبن نحوي!!!"



لحـظ سعود ،، كانت الكيمرة الديجيتـال فيها خلل غريب ما عرف له،

ولهذا ما قدر يصور، واتضح بعدين ان الـMemory احترق داخل الكيمرة وخرب الكيمرة وياه..

تبرع له الطيـار حمد بكيمـرته، واللي كانت أدق وتصويرهـا روعـة،

وتبرع له مضيف بجنسيـة هندية إنه يصور بعض مشاهد الفيديو بالكيمرا عشان يوثق هالعروض في مشروعه "العالمي" ..

تصور تقريباً مع معظم المضيفين والطيار حمد وطاقم الطيـارة اللي تونسوا عليه وعلى حركاته في الصور،



كانت من اقتراحات سنـاء انه يسوي استطلاع بسؤال واحد ويسأل الركاب عن خدمات الطيارة، أو عن أي شي يخص الضيافة الفندقية،

وتبرعت هي المسكينة مع كمن مضيفة ثانية انهم يسإلون الركاب، بينما سعود فرحان بالتصوير وتهاويله ..



سعود بفرحة : والله ما عرف كيف أشكركم ع هالخدمة اللي سويتوها لـي ..

الطيار حمد : افا عليك يا سعود انته واحد منا وفينا .. ومهما كان لازم نساعدك عشان تنجح فـي مشروعك وترفع راسنـا وياك ..

سعود : تصدق أنا احس ان المشروع اكتمل .. (يأشر ع الأوراق) جوف .. اكثر من استطلاع، والكتيبات اللي عطيتوني اياها، والصور والفيديو، حتى الفيديو أنا أساساً ما فكرت فيه ..

حمد : لا يا سعود انته لازم تسوي شي تخليهم ينبهرون بـه ويسكتهم اذا اعترضوا على فكرتك او أي شي ..

سعود : تصدق انا زايغ شوي انهم ما يتقبلون مشروعي..

حمد : انته ما خبرتهم ؟؟

سعود : انا أصلاً سجلت مشروعي بإسم " استطلاعات عن الضيافة" بدون ما أوضح له أكثر ..

حمد : ان شا الله بتكون مفاجأة لهم لا تحاتي انته ..

ابتسم سعود : ان شـا الله ..

دخلت المضيفة سناء : سعود انته هون وانا عم دورك ؟؟

سعود انحرج : خير ان شا الله ؟؟

سنـاء : الرحلة الجاية راح تضيف ركاب الدرجة الأولى، معناتو راح يكون في تقدم بمشروعك ..

سعود : الحمدلله انا خلصت المشروع تقريباً ..

سناء : لا بعدو سعود شكلك راح تطول ...

سعود : افا ليش؟؟

سناء : ما تصورت مع الركاب لحد هلأ ...

سعود صد على حمد : يعني عادي بيرضون اتصور وياهم ؟؟؟

حمد حرك راسه بمعنى انه ما يدري : انته جرب !!!



مشى سعود بتردد صوب غرفة الركاب،،

كان حاس بشعور رهبة غريب أكثر من الرهبة اللي مرت عليه يوم دخل مكتب شركة طيران الإمارات،

جاف راكب أجنبي مع حرمته يالسين جدام ،،

سار صوبهم بحيا : hi sir,..

رد الريال برحابة: hi ..

سعود : can I take a photo with you?...

الريال ابتسم : sure, why not??..

وتصور وياه واللي صورتهم حرمته،

ومن بعدها تصور ويا الحرمة الأجنبيه وريلها اللي صورهم ..

وسعود كان في قمة إحراجـه من الوضـع الـfree اللي يجوفه ..



التقى بويه مب غريب عليه،

واستنتج فيما بعد انه هو نفسه (أحمد) ولد خال أمـه..

لمح وياه كذا حرمة وشكله كان يزاعج ومغيظ عليهم..

حس انه من الخطر انه يتقرب صوبهم لأن في حال تعرف عليه بتستوي مصيبة أكبر ..

تحاشـاه وتوجه لغرفة المضيفين،

كانوا يالسين وكل واحد فـ حاله الله العالم بها ،،

اللي تعبان واللي يـاكل، طبعاً كل ها من أثر الرحلة ووقتها كان الفجـر !!



دق جرس المضيفين وولع الليت إشارة بأن الكرسي رقـم E-52 يطلب المضيف ..

لمح سناء مبوزة وتحاول تنش غصب عنها عشان تسير تجوف طلب الراكب ..

ابتسم سعود لها : ما عليه يلسي انا بسير ..



ما اتريى ردها، وسار عند الراكب اللي أذى الخلق بطلباته ..

سار صوبه وانصدم كونه (أحمد) نفسه : Yes sir?..

أحمد صد ع اللي وراه : هكوه يا قولي له شو تبين ؟؟ (يرمس سعود)go there they need some thing...

مشى سعود للكرسيين اللي ورى ..

كانت هناك وحدة منتفخة والثانية كـول عادي ..

خلنا نسميهم (المنتفخة) & (كول)

كول : هـا ياج المضيف قولي شو تبين ..

المنتفخة بغيظ : عندك حبة تموّت ؟؟

سعود يود ضحكته : what mum??..

المنتفخة: I want a wine..

سعود انصدم : what????...

المنتفخة صدت على (كول) : هذا شبلاه ما يفهم ؟؟

كول : والله لو يسمعج أحمدو ينتفج ..

المنتفخة : انا اباه يسمعني عسب يحس .. والله قهر والله انه ما يحس ..

سعود تم سـاكت.. كان مستغرب منو هالثنتين اللي ويا أحمد ؟؟

كول : عن السخافة .. صلوح بيي وحلي المشكلة ولا جنه استوى شي ..

المنتفخة : هالكريه ان يا ماليزيا بيجـوف الويـل والله لأدبه ..

كول تهمس لها : ايـه حصــووو فضحتينـا هالريال يسمع ..

حصـة (المنتفخة): اوووه خله يسمع اشعليه منه الا هندي مكحكح ..

سعود تنرفز منها وتكلم بصوت عالي : yes mum? What do you want??..

صد أحمد : انتوا الثنتين تكلموا شو كنتوا تبون أذيتوا خلق الله ..

حصة بلا مبالاة : ما نبا شي الا غصب تطلعون في خاطرنا شي .. عفــاااااانا الله

أحمد : انجبي بس .. اميه قالت انا شدراني ..

ام أحمد اللي كانت يالسة حذال أحمد رمست : ويه ويه .. انا امتى قلت على كيفك ؟؟

أحمد انحرج من سعود : sorry for losing your time, you can go now..

سعود : no problem sir...

مشى شـوي ..

سمع أم أحمد : صـبّر صبّر انته ايـه ..

صد سعود ولا إرادياً : نعـم ؟؟

شهقت ام احمد وصد احمد والبنتين اللي وراه بمفاجأة : هـا من ويـن ؟؟

سعود يبا يتدراك الوضـع : آنا من إنديا ماما..

ام احمد عفست ويهها : ويه ويه اجلب ويهك يا المقرود حتى برع البلاد لاحقينا ..

تكلمت حصة بجرأة : تراج سايرة بلادهم .. حشميهم ع الأقل ..

ام أحمد : والله لولا الحاية والعلاج جان ما طبيت بلاد هايـيل ..

سعود: do you need anything mum??..

أحمد افتضح في الريال : No thanks a lot..



مشى سعود عنهم وهو يحمـد ربـه مليـون مرة ان شغلة المضيف هاي مب شغلته الأصلية !!!

/

في دبـي "

خليفة : لا لا لااااااه والله ما يستوي جيه يا اميـه ..

ام سهيل : ويديه شو اللي ما يستوي ؟؟

خليفة : شقايل سهيل يسافر روحه .. انتي تدرين انه بطلاع الروح خلص الثنوية ولا بعد دور ثاني.. شقايل يسافر وهو الانجليزي بالخص مب فالح فيـه ..

ام سهيل : والله المنحة يته .. نرفس النعمة ؟

خليفة تفاجأ : أي منــــحة ..

ام سهيل : هاي منحة اللي يتخرجون يسفرونهم نيوزلندا ولا استراليا ..

خليفة : لا واللــه ؟؟ والمنحة يت لسهيل ؟؟؟

ام سهيل : شبلاك حاقد عليه .. عشانه حصل المنحة هاي ؟؟

خليفة : أي حاقد الله يهديج .. بس مسألة المنحة هاي مب داشة مخي ..

ام سهيل : والله روح واسأله ..



دخل سهيل عليهم : ما يحتاي ايي ويسالني .. خير خليفة شو عندك ؟؟

خليفة: صج بتسـافر ؟؟

سهيل : هيـه ..

خليفة : على وين ان شا الله ؟

سهيل : لنـدن ..

خليفة صد على ام سهيل : توج تقولين نيوزلندا واستراليا ..

ام سهيل : ويديه سهيل مب توك قلتلي هالكلام ؟

سهيل بتجاهل : لا اميه انتي ما فهمتي عليه ..

خليفة عقد حواجبه : ويا منو ان شا الله ؟؟

سهيل : وهذا بشو يهمك ؟؟

خليفة باستهزاء : عشان اعرف المنحة وصلت منو ومنو ؟؟

سهيـل : خليفة ماله داعي تستهبل (بدلع) اعترف انك تغار ..

أم سهيل : هيـه غيران منك ومبين عليه بعد ..

خليفة هز راسه بمعنى ان ما في فايدة من هالكلام : كيفكم .. بس انا من الحين اقولك هالسفرة انا مب مرتاح لهـا .. وسالفة انك حصلت منحة تراها ما تمشي عليه شرات ما مشت على أمايه انزين ...؟؟

وسـار عنهـم ..

سهـيل بغيظ أشبه بدلع البنـات : اوووه .. يعني انا جذاب ؟؟

ام سهيل ركضت له بتحضنه : ويـه فديت روحك انا انته ما تجذب بس هو غيران منك

/

في بيـت غـريب !!

...... : وويـنه الحين ؟

نجلا: شدراني وين ؟ اقولج حاولت اعرف بس ما قدرت ..

...... : انزين عيل كيف بتبدين خطتج يوم انه محـد ؟؟

نجلا : بتريا سالم يرد وبجـوف شو بسوي .. انتي ما تعرفيني يا ليلووو عدل..

ليلى : لا بويه اعرفج واعرف انج شيطان في لبس انسان ..

نجلا تدعي البراءة : وحلييييييلي والله ..

ليلى : تعالي وين عيالج ؟؟

نجلا : خلاص راح زمن الذل وويع الراس.. خلهم ينزرعون في بيت ابوهم احسن ..

ليلى : زين سويتي .. ولا اذا بنتج سمعتنا ونحن نرمس يا ويلنا ويلاه .. اكيد بتوصل الخبر لاهل ريلج ..

نجلا: هي اووف وبالخص هاي خلود تعرف كل شي عنا بسبة هالسوسة ..

ليلى : اضربيها انزين عشان تصطلب ..

نجلا: لا بويه انا ما اضرب .. انا اعذب بس ..

ليلى : هي شو دراها انج تعذبينها ؟

نجلا : ببساطة ما اعطيها اكلها .. ما أبدل ملابسها .. ما أرمسها .. على عكس مطور ..

ليلى : مطـر ما ظهر يشبه ابوه شرات مريومة

نجلا : هيه فديت روحه ما تجوفيني احبـه ..

ليلى : انزين امج وابوج ما يدرون انج مب مرتاحة ويا سالم ..

نجلا : سكتي دخيلج .. قالولي تحمليه عندج عيال منه ..

ليلى : يا هالعيال اللي أذوا الخلق بهم .. (بخبث) انزين تعـالي .. سالم شو بلاه مسافر ..

نجلا : فيه الخبيث هههههههههههههههههه ..

ليلى انصدمت : حلفي ..

نجلا : شدراني فيه كليته مادري شو بلاها ..

ليلى : ما رمستيه؟؟

نجلا : ما عندي سالفة ارمسه واعور راسي بسوالفه ..

ليلى : لهالدرجة ممل ؟؟

نجلا : مادري .. بس عمري ما حبيته .. انتي تدرين ان فرق السن بيننا واايد ..

ليلى : ممممم الا 6 سنين !!

نجلا : والست سنين هاي شوي ؟؟؟

ليلى : تبين واحد قدج يعني ؟؟

نجلا : ابا ع الاقل واحد اكبر عني بسنة ولا سنتين ..

ليلى : لااااا مب شي ..

نجلا : لا حلاته والله .. (تنهدت) ويـكون عمره بعد 25 ولا 26 يـااااااااااااي ..

ليلى : ههههههههههههههه شكلج تقصدين المحروس ؟؟

نجلا : وفديت رووووح هالمحروس والله ..

ليلى : لهالدرجة مخبلنج ويا هالفيس

نجلا : اف اف اف شو مب مخبلني .. مخلني اسهر الليل واهاذي به ..

ليلى : لو يدري عنج مادري شو كنتي بتسوين ..

نجـلا بتحدي : بيدري ان شـا الله .. كل شي فـ وقته حلو !! يا حلـو ..

/

فـي بيـت أم سالـم ،،

خلود وهي نازلة من الدري : بلاج اميـه تزاعجين ..

ام سالم بفرحة : نشي ودخني البيت .. سالم بيرد الليله ..

خلود :اونــــه !!! الله كشخة ..

ام سالم : وسيري اتصلي بحرمته خلها اتي و ترتب حجرتهم ..

خلود : والله يوم انه هو ريلها المفروض يخبرها انه راد ..

ام سالم : هو ما قال شي بس انا اقولج سيري وخبريها

خلود بتحدي : ما بخبرها .. وانتي يا حبج حق المشاكل وعوار الراس !!!!

ام سالم : مب عوار راس يا خلود .. بس يعني فرضاً سالم حاط ف باله ان نحن بنخبره ..

خلود بغيظ : بطرش لها مسج وامري لله ..

ام سالم : لا لااااا روحج اتصليبها تدرين هاي حيه رقطة وبتقول محد طرش لي شي ..

خلود : لا حول ولا قوة الا بالله العلي العظـيم .. انزين انتي كلميها (فكرت وبوزت) خلاص بكلمها وامري لله ..



تنهدت ام سالم ع الحال اللي وصل له بيتها من بعد ما دخلت نجلا فيـه ..

سالم خطبها من بد كل البنات لانه اعجب فيها وفـ جمالها ..

ظن انه بيتم سعيد فـ حياته طالما هالجمال كله وياها ..

نجلا ما كانت عادية .. كانت جميـلة ..

بس شو فايدة الجمال اذا كان بدون أخلاق ؟؟

أمه وخلود رفضوا فكرة زواجه من هالخقاقة ..

لكن مع اصراره رضخوا له ..

وقالوا عل وعسى الله يهديها بعد الزواج ..

وتمت على حالهـا ..

حملت في مريومة .. واستبشروا انها بتتغير ..

وتمت على حالهـا ويمكن اردى ..

ونفس الحالة في مطـر ..



خلود كان كرهها لهالانسانة مب نابع من عدم ..

لكنها فضلت انها تتم ساكته عن تسوي فتن بين سالم وحرمته ..

كانت من وجهة نظرها تجوف ان سالم يستاهل وحدة أحسن عن هاي ..

لكنها رغبته .. اللي بلش نفسه فيها .. وبلش كل فرد في البيت وياها!!



خلود : الـووووو!!

نجلا : ويهـد ان شا الله !!!

خلود : صج ما تستحين ..

نجلا : خلصيني شو تبين ؟؟

خلود : كلمتي سالم ؟

نجلا : وانتي شو يخصج ؟؟

خلود باستهزاء : هيه صح نسيت انج ما تدانين شيفته حتى ..

نجلا : انتي شو تبين تراج صدعتيني !!!!

خلود : سالم بيرد الليلة ..

نجلا : شو أسوي يعني أرقص ؟؟ يروح ولا يرد ياكل خـراه !!

وصكـت التلفون فـ ويه خلود ..

خلود غيظت : صج هاي قليلة أدب ... (تفكر) بس ما بقول حق اميه انها صكت فـ ويهـي عشان ما تيلس تقولي اتصليبها وخبريها ورمسيها بالزين ومادري شوووه!!



مشت للصالة وجافت امها تولع الفحم حق المدخن ..

ام سالم : ها رمستيها ؟

خلود : هيه قلتلها سالم بيي اليـوم ..

ام سالم : قلتيلها اتيي ؟

خلود عصبت أكثر : اميه يعني بالعقل ريلها بيي اليوم يعني ما اتي ؟؟

ام سالم : خلاص بلاج كلتيني !!! وين العود ما يبتيه وياج ..

خلود : ما قلتيلي اييبه ..

ام سالم : سيري حجرتي وفجي الكبت اللي صوب الحمام بتحصلين غرشة صغيرة فيها عود سايل ..

خلود بملل : انزيـن !!

/

بو اميرة باندهاش : رضيــتي ؟!!!

اميرة بضيج : مب انته يا بويه قلت لي أفكر ؟؟ تراني فكرت ..

بو اميرة : يعني موافقة ؟

اميرة : لالا مب موافقة بس ابا اجوفه وايلس ويـاه عقب بقرر ..

بو اميرة : انزين هو ياي في الدرب وبنجـوف شو بيقول ..



تنهدت اميرة وتوجهت لحجرتها وهي الضيج محتل كل ذرة في جسمها ..

وكل صرخة فـ اذنها تصرخ : انا ماباه .. بس محد بيرضى فيه .. سعود وشرّدته بإيديه .. والحين دور أبـوه !!! آااااااه يا القهر .. انا اميرة يستويبي جيه ؟؟



دخلت امها وهي مندهشة : صج الكلام اللي قاله ابوج لي من شوي ؟؟

اميرة : هيه .. مب انتي قلتي ان الريال شارني ؟؟ ابا اعرف اذا هو شارني صج ولا لا ..

ام اميرة : من الحين قوليلي انتي شو تبين فيه عشان تجوفينه ..

أميرة بقهـر ودمعة طفرت من عينها : ابا اعرف كل شي عنه ..

ام اميرة باستغراب : كل شي عنه !!!! شو قصدج ؟؟ وشحقه تصيحين ؟؟

اميرة وصوتها ممزوج بدموع دخيلة : وضعـه وحياته وعايلته اللي مودرنهـا !!

ام اميرة صرخت : وانتي شو يخصج فـي هله ؟؟؟

اميرة صارخت بنفس نبره صراخ امها : سعـود ولده يا اميـــه !!!!!