[لامارا]

...:::][ الجزء الخامس ][:::...


_____________
بيت الريم .. الساعه : 5:30
_____________


**الريم **

جالسه امشط شعري .. صار لي ساعه .. يااارربي .. مشبك كله في بعضه .. تعبني .. ياليت شعري مثل رهـف .. ناعم مره .. مايبيله هالقعده .. وهالوقت .. انا صحيح الحمد الله .. شعري مو خشن ..شعري ناعم ومموج .. بس انا افكه لا جيت انام .. وتبدا عملية تداخل الشعر مع بعضه البعض ..
اوكي .. شعري حلو الحين .. لميت شعري وكنت بنزل افطر .. وقبل ما اطلع من الغرفه .. رجعت .. وحطيت يدي تحت المخده .. اخذت جوالي وفتحت المسج اللي امس .. هذي رساله من شخص اعرفه .. ايه صح .. بنت خالتي بسمه .. قالت لي قبل امس .. انها راح ترسل لي رساله .. من رقمها الجديد .. اكيد ميه بالميه هذي هي .. راح عن بالي

يوم طريت بسمه غمضت عيوني ..اتذكر اللي صار قبل امس ..

.
.
.

شافتني سرحانه ومتضايقه

قالت لي : وش فيك

قلت لها: رهف

قالت لي بقهر : وش فيها رهف بعد

قلت لها .. والضيق يملا عيوني : صرنا الحين بعاد عن بعض .. مو مثل اول .. صحيح حنا قراب لبعض بالقلوب .. بس

قاطعتني : انتي مايملا حياتك الا رهف .. وحنا وين رحنا

.
.
.

فتحت عيوني .. صحيح مايملا حياتي الا رهف


كنت برجع الجوال .. تحت المخده .. بس جاني مسج من رقم غريب .. فتحته .. كان



^*^
/
\
/
\
/
\
/
\
/
^*^


ابعتذر باسم الشعر

والقــوافــــــي

ان كان في حقك عن

الوصل قصـرت

لوهي بكيفي الذي

مايشــــــافــي

لانقل لك الفرحه هوى

وين مارحـت

ولكن وعد مني اناانسان

وافـــــــــــي

تبقى اعز انسان

ان جيـت وان رحـت

( ريوم انا بسمه هذا رقمي الجديد o.k )



^*^
/
\
/
\
/
\
/
\
/
^*^


اوووه هذي بسمه .. اجل اللي قبل مين .. اصلاً مو مهم اعرف .. وحده من البنات .. خل ادق على رهووفه .. اشوفها راحت المدرسه اولا ..,,.. ماترد اكيد نايمه .. او راحت المدرسه بدري ..

حطيت الجوال تحت المخده .. واخذت شنطتي .. وخليت كتاب الفيزياء بيدي .. لان عندنا امتحان ..اجلس اذاكر اكثر بالسياره .. احسن من اجلس فاضيه اشوف من الدريشه اللي رايح واللي جاي

فتحت الباب امي .. حطت يدها على فمها ..وقالت لي :يوووه ريووووم .. بعدك هنا .. مارحتي المدرسه

قلت لها : ليه وش فيك .. الساعه كم الحين

قالت لي وهي تناظر للساعه اللي بيدها : الساعه سبع

قلت لها وانا خايفه : ليه ماجيتي شفتيني .. رحت المدرسه او لا .. ليه

قالت لي : مدري والله يابنتي .. اخوك فارس .. قال جا الغرفه .. وماشافك .. قال انك .. اكيد رحتي مع رهف اليوم .. وكان مستعجل لان

قلت لها : لان اكيد مستعجل .. يبي يطلع .. حطها على رهف .. وبعدين مو قلت لكم .. رهف تزوجت خلاص

قالت لي : والله يروح عن بالنا .. طيب روحي بسرعه .. شوفي اخوك خالد راح اولا ؟.. بدال الكلام الزايد

اخذت العبايه .. وطلعت من الغرفه بسرعه .. فتحت باب غرفة خالد .. ياربي مو هنا .. اكيد مابيجلس للحين بالبيت .. اصلاً خالد الغبي .. صار له اسبوع .. مايوديني المدرسه .. وشهو السبب مدري .. المهم طلعت من الغرفه .. ونزلت تحت .. لبست العبايه .. وكنت بطلع .. بس امي ماخلتني

وقفت عند الباب وقالت لي : وين بتروحين

قلت لها : يمه .. بروح المدرسه بعد وين

قالت لي : من بيوديك

قلت لها : ياربي .. بروح .. بمشي

قالت لي بخوف : لا وش تمشين .. مافيه .. المدرسه بعيده .. والشارع يخوف .. غيبي

قلت لها : ما ابي اغيب .. عندي امتحان فيزياء

ماخلتني اروح .. والوقت بيضيع .. اضطريت اكذب عليها كذبه بيضا .. بما انها بسرعه تصدق

قلت لها : يمه على بالك بروح لحالي .. لا فيه بنت معانا بالصف وبيتهم قريب من بيتنا .. دوم تتاخر .. الحين تروح المدرسه.. بمر عليها وبنروح مع بعض

قالت لي : متأكده .. روحي معاها .. لا تروحين بروحك .. فاهمه

قلت لها : فاهمه

وطلعت من البيت ..تصدقون .. الشارع .. لا كان يخوف ولا شي .. بالعكس .. اللي رايح دوامه .. واللي يغسل سيارته .. يعني الوضع عادي .. لفيت عند بيت ابو يوسف .. لقيت الباب مفتوح .. وسياره شغاله عند الباب.. وكان سعد .. عند السياره .. ماسك عصا .. يلعب فيها بالرمل ..غريبه سعد للحين بالبيت .. الظاهر ما بيروح المدرسه .. او متاخر ..شافني واقفه عند الباب ..جاني بسرعه

قال لي : كيف حالك الريم

نزلت .. عشان اصير بطوله .. قلت له تمام .. نحمد الله .. وانت

قال لي : زين

قلت له : ليه مارحت المدرسه للحين

قال لي وهو منزل راسه : بروح المستشفى .. عشان سنوني

مسحت على خده وقلت له : ليه وش فيها سنونك .. تعورك

قال لي : لا .. ماتعورني .. عندي موعد .. والحين مودي .. بيوديني .. اشتري كوره

قلت له : من مودي ؟

قال لي : اخوي محمد

اهااا .. يعني محمد اللي بيوديه .. شوي الا وطلع محمد ..وكان يتلفت هنا وهناك .. الظاهر يدور .. سعد .. جالس يناظرنا .. يعني شافه .. ركب سيارته .. وجا عندنا .. نزل الدريشه وقال لي : السلام عليكم .. صباح الخير

قلت له : وعليكم السلام .. صباح النور

قال : يللا سعود حبيبي .. تعال اركب

راح سعد وركب .. رفع الدريشه وحرك .. مشيت اناشوي .. لقيته يرجع السياره على ورا .. وقفها بجنبي .. ونزل الدريشه مره ثانيه

قال لي وهو عاقد حواجبه :وين بتروحين ..قصدي يعني .. ليه تمشين

ياربي ..محمد بيضيع علي الوقت اكثر .. قلت له وانا مستحيه : بروح المدرسه .. بمشي

قال لي : لا .. وش تمشين لحالك .. ماتخافين على عمرك انتي

سكت .. وش تبوني اقول له يعني

قال لي : اركبي .. بوصلك

مجنون هذا .. اركب معه لحالي قلت له : لا مشكور .. لا تتعب حالك

قال لي وهو مبتسم : لا تعب ولا شي .. وترا سعد معانا

قلت بدون ما احس : حتى ولو

قال لي : لا تخافين .. بركبك فوق السياره .. وانا وسعد بنصير تحت ههههههههه

قال سعد وهو ميت ضحك: تخيل محمد .. سيارتك طابقين

وجلسوا يضحكون .. لا اكيد فاضين هذيلا .. انا ابي اروح المدرسه

لف محمد على سعد ..وقال له : سعد انت رجال صح

ضرب سعد على صدره ..وقال : صحين

قال له : اجل يللا .. انزل وصل الريم للمدرسه .. وبعدين انا بجي اخذك من هناك

قال طيب .. ونزل مستانس .. انا ماقلت شي .. يمشي معي سعد .. احسن من امشي لحالي .. المهم مشينا انا وسعد .. وكان سعد يسولف .. ويسولف .. مايشبع كلام هذا .. بس تراه يضحك ههههههههه .. خلاص قربنا للمدرسه .. وانا امشي .. لقيت واحد يمشي معانا ..طنشته .. وكملت مشي بسرعه وانا خايفه .. لا قصدي مو خايفه .. الا بموت من الخوف .. لكن كله منك ياريموه الله ياخذك ولا يوفقك .. تستاهلين ماجاك .. اوف لو انا سامعه كلام امي وغبت .. وش جابني مشي .. وهذا لمتى بيلاحقنا

قال لي بتميلح : ليه الغزال مايعبرنا

ياربي وش اسوي .. لازم اهدا ما ابيه يلاحظ اني خايفه واتراجف

قال له سعد .. بصوت طفولي : اقول .. انت رح مناك .. مو فاضيين لك

طنش سعد .. وقرب مني .. طلع ورقه .. ومدها لي وقال : طيب وقعي لي

من جد فاضي هذا .. على باله انا نانسي عجرم .. عشان اوقع له

قال له سعد : انت رح .. يللا رح

قال لسعد : اسكت .. يا البزر انت

سمعت صوت احد موقف سيارته .. قريب منا ..جا ومسك رقبت اللي يلاحقنا ويقول له بصوته الرجولي : خيرر انت .. وش عندك تكلم اختي .. تبيني اذبحك

هذا مـــحــمــد ..حسيت بارتياح يوم جا .. الله جابه

قال له : مدري ان هي اختك ..اتركني .. خلاص بروح

قال له محمد : يللا انقلع .. الله يقلع وجهك .. صحيح ناس فاضيه .. وماتستحي على وجهها .. عندك خوات انت ؟ اكيد لا ... يللا طس

ما صدق على الله قال له محمد طس .. على طول راح وهو خايف

قال سعد لمحمد : وشلون عرفت ان حنا هنا .. وفي حالة خطر .. لا تكون سوبر مان

قال محمد : اسكت بس لا اطلع طرزان .. يالدب .. مصدق انت بخليك تمشي مع الريم .. لحالك .. كنت امشي وراكم .. بالسياره

لف علي محمد .. وقال بجديه : الريم .. هذي المدرسه قريبه .. يللا بسرعه روحي

رحت على طول .. وكنت افكر .. يعني محمد .. يخاف علي .. ماخلاني اجي لحالي ..لفيت ورا .. لقيته للحين واقف هو وسعد .. لفيت بسرعه .. وكملت طريقي .. ودخلت المدرسه .. طبعاً حصلت بعض الكلام الفاضي .. من المديره .. طلعت من الاداره .. ورحت الفصل ..دخلت .. وعطيت المدرسه ورقة اذن من المديره .. عشان تدخلني .. بما اني متاخره مره .. رحت وجلست على الكرسي .. الا ورهف تقول لي بمرح : اسفرت وانورت .. واستهلت وامطرت .. والمديره فحطت ههههههه

قلت لها .. وانا اعدل شنطتي .. واطلع كتب الماده : ايه المديره فحطت فيني قبل شوي

ضحكت بصوت خفيف وقالت : تصدقين .. جواهر .. قالت لي تبي تجي تجلس مكانك .. بجنبي .. بس انا قلت لها .. عندي احساس انك بتجين .. شفتي احس فيك

ابتسمت وقلت : الصداقه وماتسوي

قالت لي : وش فيك متأخره .. والله لو كنتي بتغيبين .. كان بيصير .. يوم الغياب العالمي ..اخوي محمد مابيروح الدوام .. وسعد غايب

قلت لها : ادري

قالت : وش دراك ؟

ضيعت الموضوع وقلت : الا ماقلتي لي اخبارك انتي .. وزوجك

قالت لي بدون لا تبتسم ولا شي : الحمد الله

قلت لها : مستانسه انتي بزواجك

قالت لي : اكيد .. لو ماكنت مستانسه .. بقول .. مابخبي عليك .. انتي صديقتي واختي

ما اتوقع ..تقولين ..مدري ليه ..رهف ماتحب تسولف لا لي .. ولا للبنات .. عن زوجها .. ولا عن زواجها .. صارت رهف غريبه

قلت لها : صح انتي .. كم قلتي لي عمر .. زوجك

سكتت شوي وقالت لي : 30

شهقت وقلت لها :والله جد .. كبير شوي

قالت لي بأندفاع وبقهر: وليه اصلاً اخذ واحد صغير .. مايفهم شي بالحياة .. لعاب ولا عنده تجارب ..ولا شهادات ولا شي .. على الاقل زوجي .. دارس ..فاهم ..عاقل .. مدير لأحسن شركه

وش فيها هذي انفعلت .. انا وش قلت لها الحين .. شوي وبتاكلني

كملت كلامها : وتجربته بالزواج قبل .. خلته اعقل واذكى ..مو واحد جاهل بالحياة .. مايدري وين الله حاطه

قلت لها وانا مو مصدقه : زوجك متزوج قبل .. لا تمزحين

قالت لي : ايه متزوج .. وزوجته ماتت .. وصارت من طي النسيان .. صحيح عنده بنت .. بس تحبني واحبها .. وانا مرتاحه بزواجي

لان صوت رهف كان عالي شوي .. صرخت علينا المدرسه وقالت لنا : من بداية الحصه .. وانتوا تتكلمون .. ماتبون تفهمون خلوا غيركم يفهم .. يللا اوقفي يا الريم مو كفايه انك متأخره .. وانتي بعد رهف اوقفي


طول ما انا واقفه .. افكر باللي قالته رهف .. انا صحيح ملقوفه .. دام انها مرتاحه بزواجها .. انا وش يخصني .. اكيد انقهرت مني .. ما كان لازم اقول لها زوجها كبير .. هو يمكن مو كبير .. بس بالنسبه لها .. لفيت اناظر فيها .. كانت منزله راسها .. وتلعب بشعرها .. فاكه شعرها .. ولامه منه شوي بشريط وردي .. وشعرها طويل وطايح على عيونها .. طالع مره يجنن .. وش فيني انا اليوم .. ادقق بالشعر .. بس والله حرام وحده بجمال وسن رهف .. تاخذ واحد اكبر منها بكثر لا وعنده بنت .. هي مو مجبوره .. لايكون احد اجبرها .. لان زواجها غريب والله غريب ..لفيت على المدرسه .. وهي تقول لنا في اي عالم انتوا : وحده سرحانه ..والثانيه تلعب بشعرها .. ماتبون الحصه اطلعوا بره .. هذا وشاطرات بعد .. وش خليتوا لباقي البنات
__________________
بيت مشعل .. الساعه :1:00 مساءً
___________


**مشعل**

رجعت اليوم .. من الدوام .. الساعه 12 ونص..احس بملل .. صار لي نص ساعه جالس بالصالة .. ورهف مارجعت من المدرسه .. احس بجوع ..جاتني رغد .. اللي كانت تلعب بره

قالت لي : بابا متى جيت

قلت لها : توني من شوي

جات وجلست بجنبي .. قالت لي : ميته جوع

قلت لها : حتى انا

قالت لي : اجل وش نتتظر

قلت: رهف .. شوي وبتجي من المدرسه

انقهرت وقالت لي : في كل شي رهف .. في كل شي رهف .. اووووف

قلت لها : وش فيك

تكتفت وقالت لي : ما احبها

قلت لها : لا حبيبتي .. كذا مو صح .. وش السبب اللي يخليك ماتحبينها

قالت لي :لانها تسوي نفسها .. طيبه قدامك .. بس من وراك .. شي ثاني

ماكنت مستغرب ان رغد ماتحب رهف ..بالعكس الا متوقع هالشي

قلت لها : اسمعيني يابنتي .. انا ابيك تعتبرين رهف .. مثل .. مثل ..

صح تعتبرها مثل وشو .. امها مثلاً .. ما احس انها تجي ..رهف صغيره .. بس المنطق يقول كذا

فكملت كلامي : تعتبريها مثل امك

وقفت منقهره وقالت : وشلون امي كبري .. وتروح المدرسه

قلت لها : مو لازم امك .. خالتك .. اختك الكبيره .. اي شي

رمت اللعبه اللي كانت بيدها .. على الارض .. وصرخت علي : ماابي .. ماابي

كانت بتروح .. بس انا مسكتها ..وقلت لها : خلاص حبيبتي .. موغصب هو .. بس تعالي نتغدا .. هزت لي راسها .. يعني طيب .. بصراحه انا احس بالجوع .. ورغوده بعد تبي تتغدا .. ما اقدر انتظر رهف اكثر .. تروح لي هالمدارس وماترجع الا متأخر .. بدال ماتجلس في بيت زوجها ..مثل باقي الحريم

.
.
.

تغديت وخلصت .. قمت غسلت يدي .. وكنت بركب فوق .. سمعت صوت احد يفتح باب الصاله .. لفيت ولقيتها رهف

ابتسمت لي وقالت : السلام عليكم

قلت لها : وعليكم السلام .. كيف كان اليوم

قالت وهي تناظر فوق .. كانها تفكر : اممممم يوم عادي ..بركب بسرعه ببدل.. ثواني ونازله .. عشان نتغدا .. بموت من الجوع

اخذت الشنطه من عندها .. وقلت لها : حنا تغدينا ..تغدي انتي

اخذت الشنطه من عندي .. وقالت لي : طيب

اخذتها من عندها .. مره ثانيه : وقلت لها .. مابتتغدين

اخذتها من عندي .. بس بقوه هالمره .. وقالت وهي تركب الدرج : الا .. بروح ببدل ملابسي



...............................


___________
بيت مشعل .. الساعه :1:30 مساءً
___________


** رهف **

كنت اركب الدرج .. وانا مقهوره .. ومعصبه .. هالبيت مو معتبرين لي اي اعتبار ..ماعندهم ولا ذرة احترام .. معقوله فيه ناس كذا .. الظاهر نسوا ان فيه وحده .. عايشه بذا البيت .. اسمها رهف ..مالي اي قيمه عندهم .. يوم كنت في بيتنا .. لو اتاخر .. للساعه 2 .. ارجع وهم ينتظروني ..لكن هين يامشعل .. وصلت للغرفه .. دخلت وقفلت الباب .. مع اني اعرف ان مشعل وراي ..حطيت الشنطه على السرير ..دخل مشعل الغرفه .. وجلس على السرير .. طلعت لي ملابس من الدولاب .. ودخلت اتروش .. طلعت ولقيته للحين جالس .. مشطت شعري .. ولميته .. وصليت .. خلصت .. وانسدحت على السرير .. من انسدحت سألني : وش بتسوين

قلت له بدون ما اناظره : بنام

قال لي : مابتتغدين

قلت له : لا

مسوي فيها .. يهتم فيني تغديت اولا ..غطيت نفسي

سحب الغطا وقال لي : مافيه تنامين .. قومي تغدي

قلت له وانا ضاغطه على اسناني :ما ابي مشعل .. مو غصب

قال لي وهو ماسك الغطا .. عشان لا اسحبه منه : بس انتي قلتي قبل.. انك بتموتين من الجوع

قلت له .. وبدا صوتي يعلى : ايه هذا انت قلتها .. قلت لك قبل ..الحين ما احس بأي جوع..ابي انام

عطاني نظره .. مدري وش تقصد وطلع .. بصراحه انا ماكنت نعسانه .. ظليت منسدحه على السرير نص ساعه .. تذكرت ان الساعه 4 بيجون لي .. اهلي والريم وامها واختها نوره .. بقوم بتلبس .. وببخر البيت .. قمت وبدلت .. لبست بدله .. حلوه كانت قطعتين .. تنوره طويله .. مفتوحه للركب من الجهتين .. وفيها حزام طويل .. من الكرستال والخرز .. وبلوزه كمومها طايحه .. وفيها كرستال وخرز .. ولبست معاهم طقم ذهب .. وشعري فكيته وحطيت على راسي شريطه بنفس لون البدله .. الوردي والبنفسجي .. وحطيت لي مكياج بعد بنفس الالوان .. تعطرت .. ونزلت .. رحت ابخر المجلس .. دخل علي مشعل

وقال لي : الله تبخرين البيت

قلت له : ايه .. مشعل بيجون اليوم .. اهلي .. وبيت جيرانا

قال لي :الله يحييهم .. بس من زمان ماشميت ريحة بخور .. من راحت امي مع اختي نجود مصر

جلست وقلت له :ايه .. امك واختك متى بيرجعون .. ابي اشوفهم

جلس بجنبي وقال لي : والله مدري .. صار لهم شهرين هناك .. مايملون من مصر هذيلا

قلت له : واختك ماتدرس

قال لي : لا اختي تخرجت من الجامعه

سكتنا شوي .. كان يناظرني قال لي : حلوه عليك هالالوان .. على طول البسي بنفسجي ووردي

قلت له : بتمل

قال لي وهو يلعب بشعري : لا افاا .. وش هالكلام .. ما امل منك انا

قمت عنه على طول .. ايه قول لي كلام حلو .. عشان تنسيني انك تغديت عني ..قول وش عليك ..جات الخدام وقالت لي .. ان اهلي وصلوا .. رحت مبسوطه .. اخوي محمد ويوسف .. راحو مجلس الرجال .. وسعد معاهم طبعاً .. معتبر نفسه رجال هههههههه.. والريم وامها ونوره وبنتها وامي كانو معي بمجلس الحريم
.. جلسنا شوي .. بعدين وريتهم البيت.. طبعاً مافيه ولا كلمه حلوه ماقالوها لي عن البيت والريم تقول انها بحياتها ماشافت بحلا هالبيت .. وانا ما انكر اني انبسطت بمدحهم للبيت .. بعد ماوريتهم اياه رجعنا المجلس .. جلسنا نسولف ونضحك .. تصدقون .. امي تقول .. صارت تحسني حرمه كبيره ..وسالت عن رغد .. تبي تشوفها .. قلت لها نايمه .. لانها طول الوقت بغرفتها ماطلعت منها ... والريم طول ماهي جالسه .. جوالها ماوقف .. ولا الف مسج جاها ..لايكون لقت لها صديقه غيري ؟.. المهم ماطولوا.. من اذن المغرب .. راحوا.. حاولت فيهم عشان يجلسون .. يتعشون معي .. بس قالولي مره ثانيه ..الحين الساعه 9 وربع .. وانا جالسه بالغرفه لحالي .. فتح مشعل الباب ..وقال لي : البسي عبايتك

قلت له : ليه

قال لي : بنطلع نتعشا برا

يبي يصلح غلطته ويطلعني.. على طول سمعت الكلام .. ورحت لبست العبايه .. لاني كنت ابي اطلع .. وثاني شي بطني يوجعني من الجوع .. ماتغديت

طلعنا سوا من الغرفه نزلنا تحت .. لقيت رغد بالصاله .. لاوية لي فمها ..

قال لنا مشعل: يللا مشينا

المهم وحنا بالسياره .. سالني مشعل : اي مطعم تبين

قلت له : مدري كيفك

قالت رغد وهي تقلد صوتي : مدري كيفك .. وش عرفها هذي تسالها

لف عليها مشعل

وقال لها : رغــــــــــــــد .. وعطاها نظره

سكتت على طول .. ولفت تناظر بالدريشه

.
.

ايه احسن .. تستاهلين .. محد قال لك تطولين لسانك

.
.

ودانا مشعل مطعم على كيفه .. كان المطعم فخم وحلو .. جلسنا بأحد الطاولات اللي فيه .. كنا ساكتين ونناظر بالمنيو

تكلم مشعل وقال : هااه .. وش تبون تتعشون

قلت انا ورغد في نفس الوقت : لازانيا

لفت وناظرتني بحقد .. وقالت : لا لا .. ما ابي لازانيا .. بغير

قال لها مشعل بحده : وليه تغيرين .. رغد قلبي .. خلاص انتي تبين لازانيا

يالليل الليل ..قلت لمشعل : خلاص انا ابي ستيك .. وعصير برتقال

صرخت رغد : انا كنت بغير وبقول ستيك وعصير ليمون

نفخت خدودها .. وكتفت يدينها .. وقالت :اي شي ابيه .. هي تقول تبي مثلي .. اوووووف انا ما ابي اتعشا خلاص

الله يطولك ياروح ..هذي ليه اصلاً جات معانا .. تخرب العشا ولا وشو بالضبط

مسك يدها مشعل وقال لها : بابا لازم تتعشين ..ولا عاد كلنا ماراح نتعشا ..

هذا اللي بيموتني قهر .. بدال ماتطقها .. وتاخذ هالشوكه اللي قدامك .. وتبط عيونها ..تجلس تدلعها لي

قالت رغد : انا بتعشا بشرط .. تاخذ هي اللازانيا .. وانا ابي الستيك

من القهر قلت لها : لا من جد تعرفين تنكتين حبيبتي.. هو هذا اللي بيصير .. عاد تشرطتي اولا

ردت علي : لا هالشي مابيصير .. الا لاني قلت .. وغصب عنك .. انتي تاكلين وتشربين بفلوسنا

وقفت بسرعه .. ولفيت لمشعل .. قلت له : مشعل بروح الحمام ( يكرمكم الله ) خلصو طلب .. شوي وبجيكم

طلعت على طول .. ماسمعت رد مشعل .. قليلة الادب هذي ..مستحيل بجلس اتكلم .. وارد على بزره .. انا اعقل واكبر من كذا .. وما ابي اخرب طلعتنا .. فأسكت عنها احسن لها ولي

قبل ما ادخل الحمام .. مسك يدي مشعل اللي لحقني .. وقال لي : ماعليه رهووفه .. رغد صغيره .. ولا تاخذين بكلامها .. وانتي اكيد.........

قاطعته .. وقلت : لا لا .. حصل خير .. وبالنسبه لي انا عادي

سحبت يدي ودخلت .. هديت نفسي و طلعت .. ورجعت لطاولتنا اللي كنا فيها .. جلست .. ووصل الطلب

شوفوا الغبيه .. اخذت الستيك .. وعصير البرتقال .. وهي طالبه عصير ليمون ..قسم بالله عله .. انا ما احب عصير الليمون بس يللا

قال مشعل : لحظه .. رغد كانك قلتي .. تبين عصير ليمون

قلت انا : عادي .. مو مشكله

قال مشعل : بس رهف .. قلتيلي قبل انك ماتحبين عصير الليمون

انا سكت .. وهي شربت شوي من عصير البرتقال .. وقالت : حتى انا ما احبه

حط مشعل يده على راسه وقال : وليه ماقلتي من اول

قالت له : نسيت .. ولا هي تاخذ العصير اللي تحبه .. وانا اجلس كذا ما اشرب شي .. احسن مني هي يعني

صرخ عليها مشعل : رغـــد .. بلا عناد .. انتي تحبين عصير الليمون

حطت راسها على الطاوله .. وجلست تبكي .. ,, لا الوضع هذا ماينسكت عنه .. راسي يوجعني .. ما اكلت شي من الصبح ومالي خلق ,,

وقفت وقلت له : مشعل خلاص .. راسي يوجعني خلنا نرجع البيت

قال لي : لا رهف مايصير .. ماتعشــ

قاطعته : ميخالف .. مره ثانيه .. ابي ارجع البيت ..

قال لي بعد ماتنهد تنهيده طويله : طيب

لان مافيه حل ثاني .. هذيك تبكي .. وانا راسي يوجعني .. وهو مقهور



طــلعــنا مــن المــطــعــم ركبـــنــا الســيـــاره ورجـــعنـــا البـــيـــــت

^*^
/
\
/
\
/
\
/
\
/
^*^



**** نهاية الجزء الخامس ****
__________________