[rola2065]

ايه المناقشات الروعة دى
استمتعت جدااااااااااااااااااااااا اااااااااااااااااا وانا بقرأ مناقشاتكم حياة وخلود وتوتة
طيب ممكن اقول راى متواضع كده معاكم
حياة لما اتكلمت عن استعدادنا المبكر لحب البطل وتقبله باخطاءه لاننا عارفيين النهاية السعيدة
انا فعلا معاكى ان افلامنا بتميل دايما للنهاية السعيدة حتى لو كانت غير منطقية او واقعية فى بعض الاحيان وده فعلا بيخليكى مهياه مستقبلا انك تسامحى وتغفرى للبطل زلاته
بس هرجع واقول انه ده مش دايما يكون صح يعنى انا كتير بيستفزنى انهم يطلعوا البطل حرامى ظريف ودمه خفيف ويفلت بكل جرايمه والمفترض انه نسامحه ونتعاطف كمان معاه كرمال خفة دمه ؟؟؟؟!!!!!!!!!!
مش بقتنع بكده لانه بالنهاية الرسالة اللى بتوصل للمشاهد انك ممكن تفلت باخطائك وزلاتك لو كانت شخصيتك مرحة وظريفة لكن لو كنت جاد بزيادة او مش مرح بدرجة كافية لاكتساب قلوب الناس انسى لازم تتعاقب حتى لو انت معملتش حاجة كفاية انك دمك تقيل ؟؟
القصة او الرواية بالاخر ومهما كانت ممتعة لازم يكون ليها رسالة توصلها المتعة اكيد مطلوبة علشان حتى تقدرى تنسجمى وتكملى قرايه او مشاهدة بس بالاخر الرسالة هيه الاهم لانها بتظل جواك حتى بدون انتباه منك فمينفعش تكون الرسالة انك تسامحى وتغفرى للبطل كل حاجة علشان هوه البطل او هو الشخص المرح فى الموضوع
انا لو شخص مليان اخطاء وافعاله منيلة بس شايفاه بيقف مع نفسه ويحاسبها يلوم حاله بعترف بزلاته ويحاول يقومها حتى لو بالنهاية لقيته بينيلها زيادة بس بالاخر يكفى انه بيحاول بشوف فيه جانب الانسانى الضمير اللى لسه صاحى ويعاتب ويلوم ويقوم مرة يحسن وممكن 10 يخطا لكن بالنهاية بيحاول وما بيياس
وزى ما قلت انا حتى الان لسه ما شفت هالجانب من نديم كله رؤية من طرف فارديا فمش عايزة اظلمه بحكم مسبق لكن حتى الان كانت كله تصرفات بالجانب المظلم من شخصيته لسه ما بان لينا الجانب الاخر اللى يخلينا نحكم عليه ككل
طيب المسامحة والغفران وايه الفرق
انى اسامح نديم على افعاله ممكن لو ندم واعترف بغلطة اوكيه هسمحه مش هنساه لكن لما اعرف ظروفه ممكن اسامح لكن معتقدش ممكن اغفرله الغفران يتطلب ان امسح له اللى فات من عمايل منيله بستين نيله طب همسح ايه ولا ايه ده كل عامله انيل من اللى قبلها
فيه واحدة حصلها اللى حصل من نديم ممكن تغفر ومش بقول تسامح بقول تغفر يعنى تمسح هالصفحات السودا نهائى مش بس من ذاكرتها وحياتها لا من قلبها اللى انجرح بدل المرة عشرة وعشرين وميه كمان ماهى الامور مش بتنقاس بس بعدد المرات قد حجمها لان فيه غلطات والام بتساوى الف غلطة والف الم
وازاى اقدر اعيش مع انسان جوايا لسه فاكرله اهاناته وجرحه المتكرر ليا السماح فى هذه الحالة غير كافى لاستمرار الحياة الزوجية لان الامر فيه حياة كاملة ومعاشرة
انا شايفة الموضوع كتير صعب مش هقول مستحيل علشان انا بكره الكلمة دى ومش بقتنع بوجودها لانها بتتغير مع الوقت والظروف فالمستحيل من 30او 40 سنة مثلا اصبح واقع ملموس الان لينا فى عدة نواحى
نديم مع كل جرح وكل الم كان بيتعمد الاهانة والتجريح والتقليل منها وده اللى بيخلى الامر شخصى اكتر منه انتقام هيه دخلت فيه خطا بالنص وده اللى خلانى افكر فى موضوع كونه بينتقم من امانى فيها هيه لانى حسيت الاهانة والتجريح موجهه لفارديا شخصيا مش مجرد امر بيوصله لشخص اخر مش عارفة اكيد انطباعى ده صح ولا خطأ بس كل مادا بحس الامور بتاخد الشكل الشخصى وبتبعد عن صلاح وعمه يمكن يكون ده علشان نديم متاثر بفارديا وبيقاوم التاثير ده عن طريق افعاله المنيلة دى وده اللى بيخلينى حاسة انه الموضوع اصبح شخصى بينهم هما الاتنين مش عارفة اكيد الصورة محتاجة تبان اكتر علشان يكون الحكم صحيح
بس كل ما بتكون الامور والاهانة شخصية كل ما بيكون الغفران اصعب لانك ممكن تغفر لانسان خطا غير مقصود لكن لما يكون متعمد وبشكل شخصى كمان ساعتها الغفران فعلا بيكون محتاج قوة وطاقة هائلة من الحب والتسامح صعب انها توجد لدى البشر
بس هوه فعلا قابلية المسامحة والصفح والغفران بتختلف من شخص لاخر واللى ممكن انا اسامح عليه فيه اشخاص اخرى لا يمكن تقبله ولا تعديه
مش بس كده العلاقة الزوجية كمان بيكون ليها طبيعة خاصة بتخلى المسامحة والغفران ليهم شكل مختلف بعيدا عن العلاقات العادية
يعنى بيحصل انى اضايق كتير لما حد من اصحابى او قرايبى يحكولى عن مشكلة بينهم وبين زوجهم ومكونش متخيلة ازاى بكلمة منه عدت الامر وسامحته بس هيه عبارة سمعتها اكتر من مرة من اشخاص مختلفين (اللى بينا غير ما انتى او اى شخص من بره شايفة واكبر من موقف ولا خطا اخليه يهدم حياتنا ومستقبلنا سوا ) بيكون بينهم لحظات ومواقف خاصة ممكن تسمح انه يكون عند الطرف الاخر رصيد للمسامحة والغفران مش موجود فى العلاقات الاخرى
ورغم اننا يمكن ماشفناش هالجانب فى زواج فارديا ونديم بس من فارديا حاساه موجود موجود فى رقة تظهر منه فى لحظاتهم الحميمة سوا
موجود فى تذكرها سهره بجوارها لحظة انهيارها على وفاة ابوها ورغم انه ممكن اكون مش متقبلة للرصيد ده لانى شايفة انه وراه انتقام وذل لكن هثق مؤقتا بانه ممكن يكون اعمق من كده
لكن حتى الان لو لو فرضت انى ممكن اسامح نديم انا بالنسبة ليا الغفران ليه كتير صعب جداااااااااااا
بالاخر وبعد ما طولت عليكم حبيت اجبلكم هالمقارنة بالمعانى

• العَفُو: هو إسقاط العقوبة بدون إسقاط الذنب. فمن عفا عن أحد فقد امتنع عن العقوبة مهما كانت إلا أن المؤاخذة عن الذنب لا تسقط. أصل العَفو هو المَسح والذهاب بسبب القدم، فسميّ كذلك لأن العقوبة تمسح عن المذنب.
• المُسَامَحَة: هو إسقاط المؤاخذة واللوم بغض النظر عن إسقاط العقوبة عن المذنب، فالمسامح يترك المؤاخذة واللوم ويتصرف كأن شيئا لم يكن إلا أن المذنب قد يكون عوقب وانتهى أمره. أصل المسامحة هو السماح، أي الجود، فالمُسَامِح قد جادَ على المذنب بأن ترك المؤاخذة.
• الصَفْح: هو التجاوز عن المذنب تماما بترك مؤاخذته وعقابه. أصل الصفح هو إبداء صفحة جميلة من الوجه ومنه قلب الصفحة أيضا. فالصفح أعلى من العفو والمسامحة.
• الغُفْرَان أو المَغْفِرَة: هو إسقاط العقوبة والمؤاخذة ولكنه يزيد عن الصفح بأن الغفران يوجب الثواب للمغفور له وثوابه بأن يستر أو يخفى ذنبه. أصل الغفران هو الإخفاء والستر.