[لامارا]

الجزء السابع من روايتي

في مكان اخر وفي نفس الوقت الذي كان فيه ماجد يبوح بحكايته لامل كان فهد يفكر في ماجد والامر الذي يمسكه عليه

عااد من عمله مبكرا لانه احس بصداع رهيب لم يستطع معه الاستمرار فالعمل فاستاذن وعاد الى منزله .. دخل غرفته وجلس بتعب على سريره ..

فهد : يا ربيييييييه .. ليش طلعت فطريجي يا ماجد .. اعرف انك فهمت اللي صار غلط .. بس ما اقدر اقولك الصح .. ما اقدر افضح انسانه .. يا الله ( ومدها )

رن هاتفه .. المتصل ناصر ..

فهد : هلا والله بنويصر .. شحالك .. وشحال الاهل ؟

ناصر : تمام ومن صوبك يا فهيدان ؟

فهد : عساه حالن مديم ان شاء الله .. والله بخير ونعمه .. شو طاري اليوم عبالك .. والا شكلك مضيع بالرقم

ناصر : ههههههههههههههههههههههههه ههههااااااااااي لا مضيع ولا شيء .. بس لان باجر (باكر) طيارتي .. واريد اعزمكم الليله ع العشا ..

فهد : اممممممممممممم اذا عزومه شبابيه بيي ( ساحضر ) واذا لا .. اتعذر منك من الحين ..

ناصر : شبابيه لا تخاف .. هيه صح دريت بهندووه واللي سوته

فهد : ههههههههههههههههه والله هالبنت مب هينه .. هيه دريت .. ووصلني الايميل

بس والله فكرة حلوة انها تجمع شباب وبنات العايله فايميل قروب .. وناسه

ناصر : هيه .. بس عااد الاحلى لو تجمعنا كلنا فيوم عليه .. دخلت امس بس ما حصلت غير اختك مريم وهند وسعيد ولد عمتك .. ما شفت غيرهم

فهد : اللي فبالك لا تترياه ما بيدخل الحين ..

ناصر : هاااااااااااااااا .. شو تقصد ؟

فهد : ههههههههههههههههههه ولا شيء .. بس تراك مفضوح .. والكل يعرف باللي فراسك خخخخخخخخخخ

ناصر : حتى انت يا فهيدان .. شكلي بشرد ولا بردلكم الا عقب ما اتخرج ..لاااااااااا ويمكن اشتغل هناك بعد

فهد : اوووووووووف كل هذا لان عيونك تفضحك .. اسمع كلم اهلها قبل لا تسافر.. سنتين واايد ويمكن يسبقك حد عليها .. عقبها ما بتنفعك كلمة لو

ناصر : لا ما اقدر .. خلها لبعدين .. وربك يحلها ولو لي نصيب فيها باخذه

فهد : والله انا نصحتك ..

بدأ الخوف يغزو عقل وقلب ناصر من كلام فهد .. لا يريد ان يخسر حبه .. وهو متاكد انها تبادله نفس الشعور .. ولكن اذا سبقه غيره اليها فلن تستطع ان تعارض اهلها ..

.................................................. .............

نعود الى ماجد .. وحكايته مع شيخة التي لا نعرف حتى الان سبب اختفاءها من حياته .. كانت تستمع اليه والى حكايته الغريبة .. حزنت لحزنه ولدموعه التي يحاول ان يحبسها ..

ماجد: التقيتها فالمول فمحل موبايلات .. كانت تشتري موبايل وكنت انا رايح اشوف اخر اسعار الموبايلات اليديده بهالمحل .. ما انتبهت لي كانت تتفرج ع الموبايلات وعيبها واحد منهن .. بس يوم عرفت سعره حاولت مع البايع ينزل السعر بس ما رضا .. وقالت له بعدين انها ما تبي تشتريه .. وهي طالعه شافتني .. ابتسمت وقالت يزاك الله الف خير .. ما عرفت ارد عليها .. بس هي تكلمت وقالت عاادي اعزمك على شيء .. ما مانعت ورحت معها للكوفي اللي بالمول .. طلبنا كاباتشينو .. والغريب انها مدمنه عليه مثلي هههههه.. كانت مرتبكه حسيت عليها بس شخصيتها قوية .. سكتنا ولا تكلمنا بس بعد شوي قالت : ذاك اليوم .. انا اسفه صرخت عليك

ماجد : لا تعتذريين .. ما تنلامين

شيخة : شو تقصد ؟

ماجد : لا لا لا .. ما اقصد شيء .. بس ما تنلامين انج صرختي علي وخاصة عقب الجمله اللي قلتها

شيخة : كلامك ذاك اليوم غير في اشياء واايد .. ما تصورت فيوم اني اقابل شاب مثلك .. كل اللي يشوفوني تكون نيتهم شينه وبـ..

قاطعها ماجد : لان انتي السبب .. لباسج ومكياجج كل شيء فيج كان يخليهم يفكرون انج بنت سهله .. اسف ع الكلمه

شيخه : ادري .. بس انجبرت ع هالشيء .. الشغل يريد بنت جذي ..

ماجد : لو امووت يوع ( جوع ) ما اسوي شيء اغضب فيه ربي ..

ومنها بدت بينا قصة حب غريبه .. صرنا نتكلم بالموبايل .. وصرت ازورها فبيتها .. بتستغربين من هالشيء .. بس هذا اللي صار .. هي تعيش مع ابوها ولا تغبي عليه أي شيء .. عاش معنا قصتنا .. كانت تقولي لو بحب انسان بحبه فالنور مب من ورا اهلي .. تفكيرها غير.. الين ييا ( جاء ) ذاك اليوم .. يا ليتني ما شفت ذاك اليوم .. يا ليتني مت ولا عشت ذاك اليوم .. اللي دمر كل شيء بينا ..

امل : شو صار؟؟

وقف وقال : خلاص امل .. ما اريد اتكلم .. دخيلج خليني بروحي .. ما اريد اتذكر اكثر احس قلبي بيوقف

امل : سلامتك .. بس اذا تكلمت بترتاح .

ماجد : خليها لغير يوم .. ما قادر والله ...

لم تستطع ان تضغط عليه اكثر .. ولكنها احست بالراحة لان ماجد وثق فيها وبدأ يبوح لها باسراره ..

...........................................

راشد يكن اعجاب بحمده منذ اول مرة قابلها .. حمده ابنة ابو فهد من زوجته المغربية طلق زوجته بعد ان انكر عليها تصرفاتها وابتعادها عنه .. وفي الاخير اعترافها له بانها لا تشعر باي شعور نحوه .. عاشت معها حمده حتى سن 13 وبعدها اخذها والدها منها .. لا احد يعلم اين هي ام حمده الان فبعد ان تركت الامارات انقطعت اخبارها .. حمده اخذت من امها الجمال .. حين تكلم ابو راشد مع راشد عن موضوع حمده .. خفق قلبه بشده .. كم تمنى ان ياتي هذا اليوم .. ولكن حياءه منعه ان يقول لوالده او لوالدته ان يخطبوها له .. ولكن ها هما يختصران عليه معاناة الحديث معهم .. فرح ابو راشد لموافقة ابنه .. وقرر ان يكلم ابو فهد .. حتى لا يسبقهم احد ويتقدم لها .. وخاصة ان الكثريين سبقوهم ولكن لم يلقوا القبول .. بعد ان تناول طعام الغداء قال لاخته نورا انه يريدها .. احست حمده بانقباض في صدرها لا تعرف ما هو سببه. ذهبت نورا مع اخيها ابو فهد

ابو فهد : نورا .. انتي اقرب وحده لحمده .. وانا ييتج ( اتيتك ) ولا رحت لام فهد .. واريدج تقوليلها ان بو راشد اليوم كلمني ويباها لولده راشد .

نورا : بس

ابو فهد ( بعصبية ) : بس شو .. سمعي خبريها انها بتزوج راشد رضت والا ما رضت ..

نورا : الزواج مب بالغصب يا بو فهد ..وحمده ما تبي راشد

بو فهد : سمعي .. لا تيلسين تلعبين بعقلها .. انتي ما قدرت عليج .. بس هي بنتي وانا ادرى بمصلحتها .. وراشد ريال والنعم فيه .. ولو بو راشد ما طلبها له .. كنت بروحي قدمتها لهم .. روحي وخبريها باللي قلته لج .. وترا بو راشد مب مستعيل .. يعني خليها تفكر زين ..

ترددت نورا في اخبار حمده .. ومضى اليوم ولم تخبرها باي شيء ولكن حمده رأت تغير عمتها .. وشكت بالامر فاليوم الثاني ذهبت لغرفة عمتها .. طرقت الباب ودخلت قبل ان تاذن لها نورا بالدخول .. خافت ووقعت العلبة من يدها وانتثرت حبات الدواء على الارض ..

نورا : حمده !!!!

اخذت حمده تنظر لحبات الدواء المتناثره ولنورا التي تحاول جمعها برتباك . اقتربت منها وبدأت تجمعها معها ..

حمده : شو هالحبوب عموتي ..

نورا : مسكن .. تعرفين في الدورة وتتعبني .. ولازم اخذ مسكن عشان يروح الالم

حمده : بس الحبوب شكلها غريب ..

وضعت نورا العلبة فالدرج واغلقته .. ثم جلست على كرسي التسريحة وقالت : بغيتي شيء ..

جلست حمده على حافة السرير وقالت : امس .. شو كان يريدج ابوي .. الموضوع يخصني ؟

نورا : اخوي بو راشد كلم ابوج وطلبج لولده راشد

شهقت وشحب وجهها ونزلت دموعها بهدوء .. لم تنطق .. ولم تتحرك .. اقتربت منها نورا : حمده شفيج ..؟؟

نظرت بانكسار لنورا : انا ضعت .. انا ضعت .. عموتي ما اريد اتزوج .. اقتل عمري ولا اتزوج

نورا : حمده بتخبريني شو فيج .. والا شلون ؟

حمده : آآآآآآآآآآآآآآآآآآآآآه .. خلاص انا انتهيت .. ابوي ما بيخلي لي الا اني اقتل عمري

هزتها نورا بقوة .. وكلمتها بعصبيه : انتي شو تقولين .. شو تقتلين عمرج .. سمعي ما تبين تتزوجين لا تتزوجين .. بوقف معج ضد ابوج .. بس لا تقولين انج بتقتلين عمرج .. ولازم تقوليلي شو فيج .. شو اللي يخليج ما تبين تتزوجين .. انتي تحبين حد ؟

بكت بحرقة : يا ليت .. يا ليت .. كان هان كل شيء ..

بعدها خرجت بسرعة من غرفة عمتها وهي تبكي .. رأتها مريم ونادتها ولكنها تابعت طريقها الى غرفتها .. اما مريم فذهبت لعمتها لتستفسر منها ولكنها لم تجد أي شيء يروي فضولها ..

.................................................. ....................

مرت الايام سريعة .. وانتهت الامتحانات .. وبدأ الكل يترقب النتيجة .. لم تستطع النوم وهي تنتظر الغد .. خائفة فطموحها كبير .. اما هند فنامت دون ان تتعب نفسها بالتفكير نامت بعد سهر فانتظار ان يدخل وتتكلم معه .. لم تقم بعمل ايميل القروب الا لكي تتقرب منه .. اجل تتقرب من ناصر .. تحبه وتعشقه بصمت .. وتشعر انه يبادلها نفس الشعور .. لا يزال حرفها الذي رأته في دفتره مرسوم في مخيلتها .. يدخل المسن ولكن لا يبقى طويلا فقط يسلم على من يجده ويطمئن عليهم ومن ثم يخرج .. ارادت ولو مرة واحدة ان يكلمها خاص .. هي لا تستطيع طلبه لانه لا يضع هذه الخاصية .. امل منذ الصباح وهي تناظر النت وتبحث عن النتائج .. فزت من مكانها حين سمعت سلطان يناديها .. ركضت للخارج .. كان سلطان يحمل الصحيفة التي بها نتائج الثانوية العامة .. تصل اليه وتقف : شو .. بشر .. ما اريد اشوف لا تعطيني الجريده .. قولي سلطوون

سلطان : هههههههههههههههه والله انج تضحكين .. شكلج ما رقدتي ..

هوت على ركبتيها : سلطوون . وربي خلاص ريولي ما قادرة تشلني .. خبرني .. كم نسبتي ..

سلطان :الاولى ع منطقة ابوظبي التعليمية 99,7%

والثانية ع الامارات ..

من الفرحة سكتت .. ولكن دموعها عبرت بشكل كبير عن فرحتها .. ما ان استوعبت ما قاله سلطان حتى قامت واحتظنته وقبلته وبكت

سلطان : اموول ليش تصيحين

امل ( وهي في حضنه ) : ما مصدقة .. انت متاكد

يبعدها عنه : والله .. مبرووووووووووك والفال لي ان شاء الله

ركض وهو يقول : بروح ابشر امي .. وباخذ البشارة .. وابوي بشرته .. وعدني ببشارة عوودة ..

ضحكت امل على فرحة اخيها بنجاحها .. وهي واقفة اذا بماجد يدخل .. تجري نحوه تبشره .. وتقبله وتحتضنه ..

قال وقد بان عليه التعب : مبروووووك تستاهلين ..

وقبل ما يكمل كلامه ترنح في وقفته فامسكته امل بخوف

امل : مجوود شو فيك ؟

ماجد : ساعديني .. وديني حجرتي ..

سندته ومشت معه لغرفته .. ارتمى على السرير بتعب ..

امل ( بخوف ): ماجد شو فيك .. حراااام عليك اللي تسويه فعمرك

نهض بتعب وجلس : لا تخبرين حد .. وانا ما في شيء

امل : حرااام عليك .. والله حرااااام عليك .. شو ذنبنا اذا هي خلتك .. شو ذنب امي – بدأت تبكي وتتغير نبرة صوتها – شو ذنب ابوي اللي ما صرت تكلمه .. شو ذنب سلطان اللي يشوف اخوه جذي .. طحت من عينه باللي تسويه .. شو ذنبنا .. هي باعتك فليش تبيعنا .. شو ذنبي انا اخسر اخوي .. وين ماجد اللي ضحكته تارسه البيت .. وين ماجد اللي كل يوم الصبح يدخل حجرتي ويشلني وانا راقده ويصب علي الماي عشان اوعي .. وين ماجد اللي كل ليله يجمعنا ع سوالفه .. وين ماجد _ بكت بشدة اكثر – وينك .. وين اخوي اللي اذا تضايقت رحتله وصحت ع صدره

حرااااااااام عليك .. ضيعت فرحتي بنجاحي .. ..حرااا

لم تستطع ان تكمل بكت دون توقف .. قام واقترب منها وحضنها ..

ماجد : مالج ذنب .. الذنب ذنبهم اللي دمروني .. ما بسامحهم .. سامحيني امووله

اوعدج اني احاول ارجع مثل قبل ...

.................................................. ........................

تشجعت نورا وذهبت لتخبر ابو فهد عن رفض حمده لزواج من راشد .. طرقت باب غرفته واذن لها بالدخول .. كان جالسا يقرأ في الصحيفة .. وضعها جانبا وقال: هلا نورا .. حياج دخلي

كانت متوترة .. فهي تعرف ردت فعله .. تقدمت منه وقالت وهي لا تزال واقفه : بو فهد .. الزواج مب بالغصب .. حمده ما تفكر تعرس الحين ..

انتفض غضبا .. وقال : شو ما تفكر .. من وين يايبه هالرمسه .. وينها هي الحين

وقف وعيونه مليئة بالشر .. وخرج من غرفته وهو ينادي حمده .. دخل غرفتها مقتحما عليها هدوءها .. قامت مفزوعة .. وبالكاد تقف لان عيناه وغضبه جعلتاها مصدومة .. تقدم منها ومسكها بقوة من ذراعها اليسار وقال : سمعيني زين .. بتزوجين راشد يعني بتزوجينه .. ودلعج هذا خليه بعيد – دفعها على السرير – وخذي مني باللي يرضيج .. كلمة ثانية ما اريد اسمع .. وعرسج من راشد بيتم يعني بيتم .. رضيتي والا نرضيتي

حمده بخوف وصوت متقطع من البكاء : ابوي افهمني ..

بو فهد : شب .. ما اريد اسمع ولا كلمة .. كلمتي هي اللي بتمشي .. وان سمعت انج قلتي شيء لراشد والا لام راشد والا لاي حد اني غاصبنج ما بتشوفين شيء طيب ..وانتوا- يوجه كلامه لزوجته ولمريم وفهد ونورا الذين تجمعوا على صراخه- ما اريد أي كلمه توصل لبيت بو راشد من اللي سمعتوه .. والا ما بيحصل لكم خير

خرج من الغرفة وتركهم في ذهولهم مما شاهدوه ..اما حمده فدفنت نفسها في سريرها واخذت تبكي .. بقيت معها نورا تحاول ان تخفف عنها ..

نورا: سامحيني ما قدرت اسوي شيء

وهي بين شهقاتها : الله ياخذني .. الله ياخذني

قامت وجلست بانكسار : يا ليتني مت .. يا ليتني مت قبل ما صار اللي صار ..

نورا : شو اللي صار – بعصبيه اكثر- حمدووه بتخبريني الحين شو فيج .. ما بخليج الا الين تخبريني .. شو فيج

حمده : ما في شيء – وقفت – طلعي من حجرتي .. ما اريد اشوف حد

نورا ( وهي تمسك حمده بقوة من ذراعية ): حمدووة ما بخليج .. قوليلي شو فيج.. شو صاير معج .. يمكن اقدر اساعدج ..

حمده (بضحكة ساخرة): ههههه انتي .. ساعدي عمرج بالاول ..

نورا : تكلمي شو فيج ؟

بكت وبان انكسار وحزن غريبين في عينيها : بقولج بس لا تساليني كيف وليش ومن متى ..

نورا : ما بسالج .. اوعدج اني ما بسالج .. بس تكلمي ..

رمت نفسها على السرير وطأطأت رأسها وقالت : أنا .. أنا .. أنا مب بنت ...

.................................................. .................................

هل ستنكشف حكاية ماجد وشيخة ؟؟ وهل سيفي بوعده لامل ؟

من البنت التي يحبها ناصر والكل يعرفها ؟ هل هي هند ؟
ما سر الدواء ؟ وهل هو حقا مسكن؟


ماذا تقصد حمده بجملتها الاخيرة ؟؟

ستعرفون كل هذا واكثر فالاجزاء القادمه

اشوفكم ع خير .. ولا تنسوني من دعاءكم