[لامارا]

" فارس "
[ بيتنا .. 3:00 العـصـر ]

( بـعد أسبــوع )

طالعت عيون .. كانت يالسة قبال التسريحة .. تحط لها ميك آب .. توها من يومين شوي بدت تخلي الأسـود .. بس الحينه شلون اقول لها ترد بيت أهلها لأني اليوم مسافر أودي شوق و ميثا .. و هي أصلاً حتى ما تعرف بـ سالفة اخواني .. و لا تدري ان عندي أخوات و حتى الي دعم مريم هو أخويه .. قطع عليّ تفكيري صوتها ..

عيون : فارس .. حبيبي شو فيك موب ع بعضك ..

نشيت عن السرير و يلست عدالها ..

همست : ما بي شـي ..!!
أبتـسـمت : تصدق فارس .. باجي بس شهرين و أولد .. بـ تصير أبو و انا أصير أُم ..

أكتفيت بـ ابتسامة .. عقدت حواجبها و زخت أيدي ..

عيون : حبيبي لا تخبي عليّ انت مريض .. فيك شي ..!!
فارس : ما بي شي .. لا تخافين ..
عيون : شو ما أخاف و انا أشوفك بـ هذه الحالة ..
فارس : انزين عيون " أخذت نفس " حبيبتي قومي شلي أغراضج ..
عيون : ليش ؟؟
فارس : بـ اوديج بيت أهلج .. عندي شغل لـ الشركة بـ اسافر و اذا رديت آخذج ..
عيون : تخليني و انا حامل ..
فارس : فهميني عيون الشغل مهم و ما يتحمل تأجيل ..

نزلت راسها و يلست تلاعب اصابع ايدي ..

عيون : حتى أهم منيّ ..

رفعت راسها ..

فارس : هو في شي في الدنيا أهم منج ..

أبتسمت لي .. وقفت .. و نزلت بـ صعوبة بـ تطلع الشنطة .. نزلت بسرعة و طلعتها ..

فارس : لا تعبين روحج ..
عيون : ليش شو فيها .. ما صارت شنطة ..
فارس : تحملين شنطة و انتي حامل و انا موجود أطالعج ..

ابتسمت و طلعت ثيابها و خلتهن في الشنطة .. ما توقعت انها ترضـى بسرعة جيه ..
طلعت من الغرفة .. و طلعت تلفوني .. اتصلت ع زياد ..

زياد : هلا فارس ..
فارس : شلونك زياد ؟؟
زياد : الحمدلله بخير .. انت شلونك ؟
فارس : بخير .. شوق و ميثا زاهبين ..
زياد : ايه زاهبين ..
فارس : قول لهن اني الحينه ياي لهن ..
زياد : ان شاء الله ..
فارس : الحينه أخليك ..
زياد : اوكيه .. مع السلامة ..
فارس : الله يسلمك ..

صكيته .. و احس ان عاصفة ياية في الطريج .. الله يستر ..

....

" رهــف "
[ بيتنــا .. 3:25 العـصـر ]

رهف : خالتيه ..

شالت فنجان القهوة عنها و خلته ع الأرض ..

ام سامر : آمري بنيتي ..
رهف : ما يامر عليج عدو .. الا دريتين ان عيون اليوم بـ تيي البيت ..
تتنهـــد : ايه دريت ..
رهف : شو قالت لما عرفت عن اخوان فارس ..
ام سامر : ما تدري ..

و شربت رشفة من الفنجان ..

رهف : شو ما تدري .. ؟؟
ام سامر : مدري والله .. فارس قال ما يباها تعرف ..
رهف : اوكيه .. ليش عاد ..
ام سامر : مدري لا تسأليني ..

صوت الجرس ..

رهف : انا بـ اشوف منو !!

وقفت ورحت لـ الباب .. فتحته شفت عيون جدامي .. لميتها و بستها في خدها ..

عيون : شلونج رهف ؟؟
رهف : بخير .. انتي شلونج ؟؟ شلون الحمل معاج ..؟
عيون : تعـباااانــة منه ..
رهف : ههههههههه .. انزين دخلي داخل .. الا وين فارس ؟
عيون : ينزل شنطتي ..
رهف : وين بـ يسافر ..؟
عيون : يقول كندا عنده شغل هناك ..
رهف : انزين دخلي ليش واقفة برى ..

أبتسمت لي .. دخلنا .. راحت لـ خالتيه .. سلمت عليها و باستها ع راسها .. يلست يمها ..

ام سامر : ما قالج كم بـ يبقى هناك ..

أبتسمت و حركت راسها بـ النفي ..

عيون : لا ما قال ..
ام سامر : الا وينه ؟؟
عيون : ينزل شنطتي ..

انفتح الباب و دخل فارس ..

فارس : السلام عليكم ..
الكل : و عليكم السلام ..

باس خالتيه ام سامر ع راسها ..

فارس : شلونج خالتيه ..؟؟
ام سامر : بخير .. الله يسلمك ..

طالعني ..

فارس : شلونج رهف ؟؟
رهف : الحمدلله .. يسرك الحال ..
فارس : عيل وين سامر ..
رهف : طلع ويا غفران ..

يلس يم عيون شويّ .. تكلمنا في مواضيع متفرقة .. بس ما يبنا طاري اخوان فارس .. لان عيون معانا ..

طالع ساعته ..

فارس : انا تأخرت ..

وقف ..

فارس : مع السلامة ..

.....

" عـيـون "
[ بيت ابويه .. أربع العصر ]

أحس قلبي انقبض .. شاكة ان فارس موب رايح لـ شغل ..
طالعته .. كان واقف بـ يمشي و يتكلم ويا أمي ..
قبل ما يمشي .. بدون أرادة وقفت و زخيت ذراعه ..

عيون : فارس .. بـ ايي معاك ..
فارس : بس انا مسافر شغل موب سياحة تيين معاي ..
صــحــت : الله يخليك فارس بـ ايي معاك .. ما اباك تروح بـ روحك ..

وقفت أمي و باعدتني عنه ..

ام سامر : بس عيون .. قال لج عنده شغل ما بـ يتأخر .. كلها كم أسبوع ..
رهف : عيون تعالي معاي الغرفة .. شكلج تعبانة ..
صحت شرات اليهال : ما ابااا .. أبا اروح معااه ..

بس فارس مشى .. شلت ايدي بسرعة و ركضت بـ اطلع من البيت ..

ام سامر : عـــــــيـــــون .. عـــيـــون .. بنيتي تعالي .. رهف .. نشي بنيتي اتصلي ع سامر خله ايي لـ أخته ..

فتحت باب الحوش .. و طالعت فارس بـ يركب سيارته .. زقرته و دموعي تطيح ..

عيون : فــــــــــــااااارس ..

وقف .. و طالعني .. نزل من السيارة و تقرب مني .. ركضت له و تناسيت حمليّ ..

عيون : فارس .. لا تخليني ..
فارس : وين أخليج .. هذا بيت هلج ..

صحت مرة ثانية ..

عيون : فارس انت ما بـ تروح لـ شغل صح ؟؟

طالعني جنه يباا يخفي ملامح ويهه ..

فارس : امبلى عندي شغل .. بـ اخلصه و بـ ارد ..

دفنت راسي في حضنه و انا أون شرات اليهال .. رفع ايده و ضمني لـ صدره ..

بس مسرع ما شالني عنه ..

فارس : عيون .. ما بـ أتأخر .. بـ الكثير شهرين ..
عيون : شهرين !!!!!!!! " صحت بـ صوت أعلى " شهرين بـ تودرني علشان شغل .. و الياهل أول ما يفج عيونه ع الدنيا وين أبوه ..

خلى ايده ع كتوفي ..

فارس : قلت لج بـ الكثير .. مع السلامة عيون .. " بـ حنية " أهتمي في روحج ..!

باسني في خدي و ع راسي .. جنه ما بـ يشوفني مرة ثانية و مشى ..
كنت بـ اروح له .. بس انهد حيلي و طحت ع الأرض .. لما شفته يختفي جدام عيني .. خليت ايدي ع الارض و عصيت ع ركبتي .. صرخت و انا اطالع اثر طيفه ..

عيون : فـــــــــــــــــــااااا اارس

بطلت عيوني .. " نشيت متروعة كل هذا حلم " بس لما شفت ويه أمي و رهف و اخويه سامر خايفين .. طاحت دموعي ..

عيون : وين فارس ؟؟

زخت امي ايدي ..

ام سامر : عيون .. حبيبتي لا تعبين روحج .. نامي ..
صـحـت : ما اباا .. ييبوا لي فـاااارس .. ابا فارس ..
سامر : فارس ما بـ يتأخـر .. بـ يرد .. عنده شغل .. بس انتي لا تسوين في روحج جيه ..

غمضت عيني و رديت نمت ..

.....

" أحــلام "
[ بيتــنا .. غرفــتــيه ]

يودت ريول بدر ولديه و انا احركها .. قلت بـ صوت مسموع ..

أحلام : يا ليتني أشوفك يوم تحرك هذه الريل بـ روحك .. تراكض في البيت و انا الحق وراك .. اقرك بدر بدر حبيبي تعالي أكل هذا .. أو تعال البس الجوتي .. " ابتسمت و غمضت عيوني أتخيل الدنيا بـ هذا الشكل " الحينه الي بـ عمرك يحبون ع ركبهم .. " طاحت دمعتي " بس ليش انت ما تمشي .. ليش ؟؟!

.... : لان هذا قدر ربج ..

طالعت ورى كان بشار .. تقرب مني و باسني في خدي ..

و يلس ع الكرسي الي عدالي ..

بشار : لا تسوين في روحج جيه ..
أحلام : ما اقدر .. ما تشوفه انت .. وده برى .. دور له أي علاج ..
بشار : قالوا لج ماشي فايدة .. برى لو في البحرين ..

طالعت بدر و صميته لـ صدري و انا أصيـح ..

.....

" هيفاء "
[ بيتنـا .. الصـالـة ]

باستني امي ع راسي ..

ام سلطان : الله يوفقج بنيتي ..

خليت راسي ع حضنها و هي تمت تمسح عليه ..

هيفاء : موب ناقصنا الا سلطان ..

حسيت بـ حرارة دموع أمي الي كانت تطيح ع راسي ..

ام سلطان : آآآآه .. وينك يا وليدي ..

شلت راسي ..

هيفاء : انا بـ اتصل بـ أحلام أبشرها .. الا تدرين بـ اتصل بـ عيون ..

طالعت امي الجهة الثانية و هي تمسح دمعتها ..

ام سلطان : عيون !! الله يعينها هـ البنت ..
عقدت حواجبي : ليش شو فيها ؟؟
ام سلطان : فارس مسافر علشان يودي اخواته لـ خالته ..
هيفاء : انزين .. و ليش شو فيها عيون ..؟؟
ام سلطان : ما تدري حتى بـ سالفة الاخوات ..
فجيت عيوني : مــا تـــدري !!!!!!!!!
ام سلطان : ايه ما تدري .. فارس موب راضي احد يقول لها ..
هيفاء : ليش ؟؟
هزت كتوفها : مدري ..

شلت تلفوني الي يمي ..

ام سلطان : لـ منو بـ تتصلين ..؟؟
هيفاء : لـ عيون ..
ام سلطان : لا تقولين لها ..
هيفاء : ايه ادري ..

رهف : الو ..
هيفاء : السلام عليكم ..
رهف : و عليكم السلام ..
هيفاء : شلونج رهف ؟؟
رهف : بخير .. انتي شلونج ؟؟
هيفاء : بخير ..
رهف : وينج ما تنشافين ..؟
هيفاء : كنت أسجل لـ الجامعة .. و نجحت في السياقة ..
رهف : صج .. الف مبروك .. شو سجلتي ؟؟
هيفاء : فنــون ..
رهف : صج .. مبروك ..
هيفاء : الله يبارك فيج .. الا وين عيون ؟؟
تتنـــهــد : نايمة ..
هيفاء : اوكيه .. سلمي لي عليها ..
رهف : يوصل ..
هيفاء : مع السلامة ..
رهف : الله يسلمج ..

طالعت أمـــي ..!

هيفاء : راقــدة ..
ام سلطان : ما قلت لج تعبانة ..
أخذت نفــس : الله يساعدهــا ..

....

" شــوق "
[ المطــار .. نسافر كنـدا ]

شوق : فارس ابا أروح الحمام ..
فارس : انزين .. نشي ..
ميثا : و انـا ..
فارس : شو بـ يصير لج .. ضلي هني دقيقتين و حنا رادين ..

وقف ..

فارس : يلا شوق .. بسرعة لأن نص ساعة و تطير الطائرة ..
شوق : اوكيه ..

وقفت بعد تردد ..

مشيت وياه .. و انا اشوف الكل جنهم يطالعوني .. زخيت فارس من ذراعه .. طالعني ..

فارس : شو فيج ؟؟
شوق : خايفة ..

طالعت الممر الي نمشي فيه .. شفت حرمة من شافتنا جنها انصدمت .. تكلمت ويا الحرمة الي يمها و ذيك طالعتنا منصدمة .. طالعت الجهة الثانية ..

.....

" عـيـون "
[ بيت أبـــويه .. الصالة ]

( بعد ثلاث ساعات )

عيون : يمه تعبااانة ..
ام سامر : قلنا لج .. روحي رقدي ..

طالعت الجهة الثانية ..

عيون : و شلون اييني رقاد و فارس موب معاي ..
رهف : ما عليه عيون .. كلها شهر .. لو شهرين ..
عيون : تشوفينها قليلة ..

تـيـن .. تيــن ..

" صوت الجرس "

رهف : انا بـ اشوف منو ..

وقفت .. شوي و ردت ..

رهف : عيون .. في بنت تبيج برع ..

وقفت بـ صعوبة ..

عيون : تبيني انا .. وينها ؟؟
رهف : دخلتها الميلس ..

مشيت لـ الميلس .. و انا حاطة ايدي ع ضهري من التعب .. فتحت الباب .. أبتسمت لما شفتها .. سلمت عليّ .. بستها في خدها ..

عيون : دانــة .. وينج من زمان ما شفتج ؟؟
دانة : شو نسوي مشاغل الدنيا ..
عيون : تفضـلي ..

يلست عدالها ..

دانة : ريلج وينه ؟؟
أستغربــت : ليش .؟ مسافـر ..
دانة : ويا منو ..
عيون : ليش تسألين ..
دانة : انتي جاوبيني ..
عيون : عنده شغل .. سافر بـ روحه ..
دانة : سافر بـ روحه .. " مدت لي تلفونها " عيل هذه منو الي معاه ..؟

يودت التلفون و ايدي ترتجف .. وقفت لما شفت الصورة .. فارس وياه بنت و مساكتنه من ذراعه .. كا عليها حجاب و لابسة قصير .. طاح التلفون من ايدي ..

دانة : حبيبتي عيون .. انا موب قصدي افرق بينج و بينه .. بس ييت انبهج ..
صرخت عليها : طلعــــي بــــرى .. ما ابــــــــا اشـــوف أحــــــــد هــنــي ..

حوطت ويهي بـ ايدي و يلست أصيـح ..