[لامارا]

الجــــ 2 ـــزء




بطلت شيخه الباب وطاح من يدي القلاص
صرخت بأقوى ماعندي : آآآآآي
بس سمعت صوته من وراي : سلامات
حسيت بقشعريره ورحت ركضت بسرعه لغرفتي وانا اتألم مو قادره اركض
وصلت الغرفه يلست على السرير وعيوني متروسه دموعه من شدة الالم
طالعت رخام غرفتي شفت خطوات ريلي مطبوعه ع الرخام بالدم ويلست اصيح مره ثانيه
انا بروحي اخاف من الدم نزلت راسي اشوف ريلي شفت قطعه زجاج متوسطه شلتها وانا اتعصر ألم قطيها

بالكساله بقهر ورحت الحمام اغسل ريلي
غسلتها وحطيت عليها مطهر ولزقه خف الالم شوي
يلست افكر من يكون هالي مايستحي على ويهه فتحت باب غرفتي سمعت حسه تحت بالصاله يلعب ويا

اشجان تجاهلت كلشي يوم سمعت الاذان رحت توضيت وصليت العشا
وصلني صوت اشجان من ورا الباب
اشجان : نوروووه تقولج امي نزلي تعشي
فتحت الباب بسرعه ورحت صوبها وانا كلي فضول
قلت لها وانا اتقرب منها : شجونه حبيبتي تبين حلاوه
حطت يدها على راسها تفكر : امممم اي
قلت لها بلطف عشان اشبع فضولي لا اكثر بالاصل اصلا اكره عيال مرت ابوي : تعالي دشي بعطيج
دشيت الغرفه وسألتها : من تحت
اشجان بملل لانها تنطر الحلاوه : محد
قلت لها بأصرار: الا من كنتي تلعبين معاه الحين
اشجان : اووه انتي قلتي بتعطيني حلاوه ماقلتي بتسأليني
قلت :جاوبي بعطيج الحلاوه
انا بروحي كنت اجذب ماكان عندي حلاوه
اشجان : امي ماترضى
قلت لها عقب ماطفرت منها : ذلفي انتي وامج
وطردتها من الغرفه
قالت لي بتهديد : بقولها
صكيت الباب وقلت : بالطقاق انتي وامج
تذكرت العشا عدلت شوي من نفسيتي من عقب ماقهرتني بنتها ونزلت بخطوات متثاقله ريلي تعورني بس

مابي اقولهم اخاف يقطوني بالمستشفى وماياخذوني (( كنت متأثره بمسلسل دمعه عمر يوم قط امه عند

المستشفى وخلاها لان عادي مرت ابوي تقول حق ابوي خلها ويخلوني))
وصلت السفره سألني ابوي : شفيها ريلج
ردت مرت ابوي بسرعه : شافت محمد اخوي واختبصت الي يقول بيختطفها
عصب ابوي : محمد اخوج سوا بريلها جذي
مرت ابوي وهي تمد الخبز حق عيالها : استريح زين مادري شيبي فيها
قلت بخاطري يعني قليل الادب يطلع اخوها انا شلون راحت عن بالي هو قليل ادب وشيطان يعني اكيد اخوها

لانها اهي شيطانه بس حرام شيخه اختها طيبه
رجعت لواقعي يوم سمعت اشجان تتكلم وهي تطالعني : يمه نسيت اقولج
عرفت ان بتقولها عن الي قلته تداركت الموقف بسرعه لان مافيني شده ع الصياح كفايه اني كل ساعه

اصيح : وين فاطمه
ردت مرت ابوي : مو شغلج في بناتي
طالعتها بنظره خبث وفي يدي السجين : لا تنسين انهم خواتي
حسيتها خافت عبالها بذبحها قمت اضحك بخاطري شكلي بستخدم هالسجين سلاح عشان تعدل اسلوبها

وياي
ردت علي وهي لاصقه في ابوي : صج مينونه
قلت في قلبي والله محد مينون غيرج والا الحين لاصقه في ابوي تحسبينه بينقذج
تأفأفت امل بملل :يعني مابتخولنا نتعشى شبعت من هواشكم
وقامت بتروح غرفتها
نادتها امها خلتها تتيبس في مكانها اعوذ بالله مسويه رعب حق عيالها
قالت لها : مدي يدج واكلي
وقعدنا ناكل بهدوء بدون ازعاج وارتحت اكثر يوم تداركت موقف اشجان والا جان الحين انا اصيح بغرفتي
خلصت عشا غسلت يدي ورحت غرفتي
كانت الساعه 8 ونص تقريبا
يعني موعد رقادج يانوره رحت عند سريري وفتحت السده طلعت تلفوني اشوف خالد غريبه ماكلمني اليوم
طالعت التلفون شفته مقفول على طول تذكرت سالفه نواف تنهدت وانا اضغط الرقم السري عشان افتح

التلفون واول مافتحته وصلني مسج توني بفتحه الا خالد يتصل ارتعش جسمي وابتدت معركه كل يوم
هلا
خالد : ليش قافله تلفونج
قلت بتردد لاني بجذب:لاني كنت راقد وامم اسفه ع المسج
خالد : جذابه اعترفي من نواف هالي واحشج هالكثر وانا الي انطرج بالساعات مو معطتني ويه بالكثر ربع

ساعه وتطلعين عني
قلت له وانا مستعده حق الصياح : نواف اخوي
خالد : اخوج ياخوانه
بلعت صيحتي وقلت له : خالد احترم نفسك
خالد : تهدديني .. لو انتي متربيه جان ماكلمتيني وانا شلون راحت عني كلمتيني انا اكيد بتكلمين غيري
هني هلت عبرتي وبديت اصيح بمراره
خالد : ماتردين يابنت الاصول
قلت وانا اشاهق من الصياح : ليش ماتصدقني ليش
خالد : شلون تبيني اصدق وحده تكلمني من ورا اهلها
قلت له :بس انت تدري اني احبك وهذي السنه الثانيه وياك يعني مو تونا
خالد :وجم واحد تكلمين في اليوم
قهرني اسلوبه الاستفزازي صكيته في ويهه وحطيت التلفون يمي
شفته يتصل اكثر من مره بس حذفت تلفوني بالسده ورقدت وانا غرقانه بهمومي ومشاكلي
قعدت الساعه 4 ونص حق صلاه الفجر توضيت وقعدت اقرا قرآن لي ما اذن قمت صليت ورجعت بخلص

رقادي
فتحت السده قبل لا ارقد بقيت عيوني هذي للحين يتصل مايأس
بست التلفون يوم شفت اسمه ظاهر لي
وعقب رديت
قلت له وانا مسويه روحي قويه : نعم
خالد بصوت مبحوح وتعباان : حرام عليج نوره ليش تسوين فيني جذي ع الاقل رديتي بتفاهم وياج
اتعبني صوته يوم شفته جذي تعبان : انا آسفه
قالي : مايحتاي تتأسفين معذوره انا زودتها وياج
رديت: لا عادي
قالي بمزح : يعني عادي اقولها مره ثانيه
اكتفيت بابتسامه
رد كررها : عادي اقولج مره ثانيه
قلت له : لاموعادي
ضحك وقالي : انزين لا تعصبين
قلت له : ماعصبت
رجع قالي : بعدين تعالي انتي يرضيج انتي راقده وغايصه في احلامج وانا اتصل فيج وانتي ماعطتني طاف
نوره : لانك قهرتني
خالد : بس انتي ماتفاهميتن على طول طخ صكيتيه في ويهي
نوره : حتى لو تفاهمت بتطلعني الغلطانه وانا الي اخون
سكت شوي وقالي : من نواف
قلت له : قلت لك انه اخوي
خالد : اها
قلت : ليش مو مصدق
خالد : لا مصدقج ... امممم نوره مكن طلب
قلت له بحب : عيوني لك
خال : تسلملي هالعيون وصاحبة العيون
وسكت
قلت له : شفيك
قالي : ابي اجوفج
انا هني تيبست كأنه صبوا علي ماي بارد كلشي كنت حاسبه له الا هذي انه يجوفني واجوفه
قالي : شفيج سكتي
قلت له : اعذرني ماقدر على طلبك
خالد : ليش خايفه مني
قلت : مو عن جذي
خالد : انا من سنتين اكلمج واحبج ولا شفتج
ابي اغير السالفه سألته : شنو الي خلاك تحبني
خالد :المفروض تعرفين
قلت له : اصلا ادري بس اتدلع
ضحك وقال : فديت الدلع والله
ضحكت عليه : ان شاء الله دوم هالضحكه مو كله معصب علي
قالي : اعصب عليج بس احبج
نوره : فديتك والله
رد علي : يلا قلبي انا بطلع بروح الدوام
قلت له :الله يعطيك العافيه
قالي : ربي يعافيج وتحملي بروحج
رديت : ان شاء الله
خالد: احبج
وصكه قمت ابوس التلفون واقول : احبه والله احبه
وبعدها حطيت راسي ورقدت وانا مرتااحه



اليوم الثاني الصبح ع الساعه تسع
قعدت من الرقاد كالعاده صخه مرت ابوي تلاقونها سهرانه وماتقعد الا مع صلاة الظهر وعيالها مثلها
دشيت المطبخ سويت لي حليب وطالعت القلاص تذكرت امس وتذكرت ريلي راح الالم قلت في خاطري

بخوف جان مايقصون ريلي راح منها الالم ماحس فيها رحت بسرعه فوق فتحت الزقه الي حاطتها شفت

الالم راح والدم وقف شكيت زود قمت ولمست الجرح وعورني من قلب بس استانست ان ريلي بعدها طبيعيه

بدلت اللزقه ورديت تحت حق الحليب الي خليته فوق الطاوله
رحت المطبخ شفت اشجان بكشتها يالسه ع الكرسي وتشرب في الحليب
قلت لها وانا معصبه : ليش شربتي حليبي
قالت لي : هذي امي مسويته لج
كان ودي اسحبها من كشتها كلشي لي لازم ياخذونه
رحت له بسرعه مطيت القلاص من يدها وكتيته
قامت تصيح وتقولي : حماره كريهه
يريتها من شعرها بالعدال مو بالقوه مهما كان لي قلب : طلعي روحي قعدي امج من الرقاد وقوليلها تسويلج
رفعت راسي الا اجوف مرت ابوي مرتزه لي
قالت لي : تستقوين على بنتي يوم جفتني راقده
قلت لها وانا امشي عنها : والله محد قالها تشرب حليبي
قالت : انا قلت لها
سكت عنها

الا تقولي : قاعده في بيتي و
قبل لا تخلص كلمها رديت عليها : بيتج طل هذي بيتي انا وزين مني سامحه لج انتي وريلج وعيالج

تعيشون عندي
حسيتها تغيرت ملامحها تحسبني ما ادري ان هالبيت بيتي على بالها هبله وبتطوف علي
البيت الي احنا عايشين فيه كان بيت امي الله يرحمها وابوي كان مأجر شقه حق هالعله وعيالها بعد

ماتوفت امي يابها هي وعيالها وسكنها هني
شوي شفتها اختفت من انظاري هي وبنتها الظاهر راحت تقعد ابوي عشان تقوله
يلست اطالع التلفزيون رن جرس البيت الساعه 10 وربع
قلت في خاطري من هالي ياينه من صباح الله خير اكيد اهل هالعله مايعرفون السنع
نزل احمد اخوي الي عمره 13 سنه من فوق
قلت له: اطلع شوف من
ماطالعني وراح
شوي والا داخله علي وحده هبله وتصرخ
مبروووووك نجحتي
صديت عنها ما ابي اكلمها عقب الي سوته فيني
قربت مني وحبتني : يالله عاد نوروه يايبه لج هالبشاره وبعد مابتحاجيني
قلت لها : جم نسبتي
ضحكت : طراره وتشرط اهم شي انتي ناجحه
سالتها وانتي : الحمدلله نجحت
رفعت حاجبي : بس تونا امس مخلصين الامتحاانات شلون طلعت النتايج ماتوبين بعد بتجذبين
حسيتها زعلت قالت لي : بالواسطه
كانت بتقوم بتروح بيتهم بس سحبتها وخذتها الميلس
قالت لي : شفيج
نوره : تدرين انج قاهرتني على حركتج بس ماقدر افارقج مالي الا انتي
امينه :والله قلت له رايج بس اهو ماصدقني قال كلام النسوان كله جذب وراح كلم ابوج حتى امي ماتدري
نوره : لودرت مرت ابوي جان الحين انا معرسه وقاعده في بيتكم
قالت وهي رافع يدها للسما : جان زين
قلت لها : سخيفه
ردت علي : علاقل اخوي احسن من هالخالد الي ماتدرين هو صادق والا يلعب عليج
عصبت عليها : لا تقارنين خالد باحد
قمت اسولف وياها وشنو سوو بالحفله شوي والا انفتح باب الميلس
كانت مرت ابوي عاد هي كلش ماتداني امون
قامت امون : يالله نروه اخليج ولا تنسين الحلاوه
قلت لها: ماطلبتي لو تبين عيوني عطيته اياها
وطلعت بسرعه قبل لا تبتدي اسطوانه مرت ابوي
قالت مرت ابوي بقهر : لو تبين عيوني بعطيج اياها
ضحكت عليها الظاهر محتره مشيت عنها وطلعت بروح ابشر خالد
وصلت غرفتي وعلى طول طرشت له مسج
(باركلي حبيبي نجحت )
تميت شوي ورد علي
(الف مبروك وعقبال التخرج ان شاء الله )

فتحت الكمبيوتر
ودشيت اتصفح ودخلت جم منتدى شفت اغلب المواضيع متكرره ومليت وطلعت
فكرت ادش ايميله بس بعدين هونت
صكيت الكمبيوتر ورحت انزل تحت اشوف التلفزيون ابرك لي
وصلت عند الدري سمعت حسه الامسي قهرني ورجعت بسرعه غرفتي بس قبلها دعمت في فاطمه
قالت لي : شفيج متخرعه
ماعطيتها ويه
قالت لي : هالكثر خالي يخوف
قلت بخاطري مالت عليج وعلى خالج قليل الادب
ضحكت بخبث وقالت لي : تراج دشيتي قلبه وهو صعب اي احد يوصله
طالعتها مصدومه
كملت كلامها : خالي لو يبي الشي بياخذه بالغصب لو على موته
ومشت عني خلتني بمكاني متيبسه مو قادره استوعب الي قالته


انتظر رايكم وردودكم