[لامارا]

الجــ 10 ــزء
الاخيــر




راحت فاطمه فوق وخلتني يالسه بروحي تحت يلست اقلب القنوات في التلفزيون ماعجبني شي قمت ورحت غرفتي فوق كان بداخلي اشياء ابي

اقولها بس للأسف محد يفهمني غير خالد خالد اهو الي يحس فيني اهو الي يعرف شفيني قبل لا اتحجى بس وينه الحين وينه
على طول رحت فتحت المسنجر وطرشت له رساله كتبت له كل الي في خاطري وترجيته ان يرد علي لو بس هالمره بس كالعاده مالقيت منه ولا رد

قمت من ع الاب توب وكلي خيبه لاني مالقيت رد من الغالي
رحت لسريري وحطيت راسي في هذي الايام كان محمد دوم في بالي خصوصا يوم تقولي امل ويوم يقول لها يعني لازم تقولين تبينها تروح مني
انا بالاصل مو له انا لخالد وحتى لو خالد راح قلبي مابيقبل بغيره لو شنو يصيرحطيت راسي المخده وطردت الافكار كلها مابي اتذكر شي ابي ارتاح

لو شوي ورقدت ماقعدت من هالرقده الا قبل صلاة الظهر بشوي قعدت مرتااحه ونشيطه ع الاخر تغسلت وصليت وبدلت ثيابي ونزلت تحت شفت

نواف كلمني بس ماعطيته ويه وتجاهلته ورحت المطبخ شفت فاطمه تعابل تبي تسوي غدا
قلت لها من وراها : صباح الخير
فاطمه بابتسامه : صباح الظهر
نوره : هههههههه والله تعب
فاطمه بتنهد : عيل انا شتقولين من راحت خالتي شيخه والتعب زايد
نوره : ماعليج احنا ثلاث في هالبيت بنتساعد
فاطمه : توني اكتشف طيبة قلبج
اخجلني كلامها وسكت
سألتها : وين اشجانو ماشفتها
قالت : طلعت مع خالي بيروح بيت خالتي شيخه اليوم
فز قلبي من يوم مايابت طاري محمد مو حباً فيه بس من اتذكر اسمه اتذكر سالفته ويعورني قلبي
فاطمه : نوره الله يخليج نظفي الديايه تلوع جبدي استغفر الله
ابتسمت لها : ولا يهمج
تقربت من الديايه انا بروحي تلوع جبدي وفي نفس الوقت ماعرف شلون ينظفونها بس تذكرت سميه يوم كنا مسافرين وفي نفس الوقت لاعت

جبدي هالمره مو من الديايه الا من طاري سميه
نظفت الديايه وحطيتها في صحن
قلت حق فاطمه : شنو بتطبخين
فاطمه : تصدقين والله ماعرف بس شفت كتاب الطبخ الي مناك محطوط على الطاوله فيه اكلات خليجيه
قلت لها : امممممم انا اعرف طريقة المجبوس تعلمتها يوم كنا مسافرين
فاطمه : حلو شرايج تطبخين
قلت مبوزه : خوفي يعتفس وتدزونه في جبدي بعدين
فاطمه : خخخخخخخخخ افا عليج انتي طبخي ولا عليج
نوره : ان شاء الله
فاطمه : انا بروح انظف الصاله وغرفة خالي وبرجع لج بسوي السلطه
نوره : اوكي
ابتديت اطبخ وتقريبا بعد ساعه ياتني فاطمه وسوت السلطه وشوي ويات امل وفي يدها تلفونها
امل كلم فاطمه : شنو الغدا
فاطمه : مجبوس نوره طابخه اليوم
سمعتها تتكلم في التلفون: يعني ننطرك بتيي
اوكي يالله باي
وصكته
سألتها فاطمه : من خالي
امل : اي من سمع ان نوره طابخه قال بيي يتغدى
وغمزت لي
كان ودي افلعها بالملاس هي وحركاتها السخيفه
خلصنا شغلنا كامل ونظفنا المطبخ بس باقي ننطر ابوي وخالهم
يلسنا في الصاله نطالع مسلسل في البحرين
سمعنا صوت ابوي نازل من فوق
شفت امل وفاطمه قامو يسلمون عليه
قمت وراهم بعد انا وسلمت عليه
تغير شكل ابوي صار واحد ثاني صج الحب يعذب
طرت بأفكاري لي تزوجت خالد ومت بيصير فيه جذي
وعيت من افكاري يوم سمعت حس محمد يسألني : شلونج نوره
طالعته ببلاهه : ها .. اي بخير
فاطمه : يالله نحط الغدا
وقمنا انا وامل وفاطمه وحطينا الغدا واتفقنا ويا امل ان هي الي تغسل المواعين بما انها ماسوت شي
يلسنا ع السفره كنا كلنا موجودين حتى نواف ويانا
كنت ميته من الخوف اخاف يطلع مالح والا مب حلو ويتمون بيوعهم
بس استانست يوم سمعت محمد يقولي : تسلم يدج نوره خوش طبخه
تشققت ابتسمت ابتسامه عريضه اهم شي عرفت اطبخ عشان بعدين اطبخ حق خالد
خلصنا غدا وقمنا نلم السفره سمعت نواف يقول حق ابوي بيتزوج طاح القلاص من يدي
قالي محمد : الله شفيج عسا ماتعورتي
كنت ساكته عنه من يوم مادخل وكنت ارد عليه لكن كلشي وله حدود انا ماخون خالد لو شنو هديته يولي ومشيت
رجعت بشيل الباقي سمعت ابوي المتشتت الضايع من غير زوجته : سو الي يعجبك
صدمني كلام ابوي شلون يسمح حق نواف يتزوج ومرته ماصار لها شهر
رحت حق فاطمه لانها الوحيده الي تدري بالسالفه نقزتها وقلت لها
قالت لي بعصبيه : شفيه ابوي استخف
قالت امل من صوب المغسله لانها كانت تغسل المواعين بفضول : شفيه ابوي شبيسوي
فاطمه : مو شغلج انتي
وطلعت منالمطبخ معصبه راحت حق ابوي الصاله
فاطمه : يبه شلون تخليه يتزوج وامي توها اسبوعين وشي يعني شهر ماصار
شفتها يطالعها بنظرة حزن :اذا احنا حزنانين على فراق امج ليش نحرمه من فرحته
قامت فاطمه : انا وحده مو حاضره العرس
قال نواف : اصلا مافي عرس بس بلبسها الدبله وبس وتصير زوجتي
حسيت ان نواف قاعد يستفز فاطمه الي راحت فوق الظاهر مو قادره تستحمل سخافة نواف مثلي بالضبط
نواف : بس يبه تدري اني توني متوظف وماعندي امكانيه حق زواج
بقيت عيوني لان نواف قام يدخل بالمواضيع الكبيره بيكلم ابوي عن بيعة البيت
كمل كلامه وبلا مبالاه : فـ انا قررت ابيع البيت
ابوي بعصبيه : شنو تبيع االبيت هو على كيفك
نواف : عيل عطني حل انا بتزوج يعني بتزوج
محمد يبي يهدي الوضع : خلاص انا بشتري البيت
تدخلت : بس انا مابي ابيع
قرب صوبي نواف : اوعدج والله بعطيج نصيبج ماباكله
نوره : وانا وين اروح شسوي في نصيبي شبي بالفلوس انا
سمعت محمد ينادي نواف وراحله نواف وطلعو برا في الحديقه اقصد شبه الحديقه الي في بيتنا
وانا رحت حق فاطمه فوق بشوفها
دخلت عليها الغرفه شفتها تصيح
نوره : فاطمه ارجوج لاتصيحين ماعليج من نواف صدقيني استخف
فاطمه : هو يلعب ويسوي سوالفه وتلي يحن يبي يتزوج وجان زين في وقت مناسب
قلت لها وانا امسح دموعها : ماعليج محد بيحضر خله يولي يعابل في عرسه بروحه اهو والجلبه سميوه ظهرت عقرب رمل تصدقين فاطمه بس

خايفه من شي
انهبلت انا شقاعده اقول تذكرت ان فاطمه ماتدري عن سالفتي انا وخالد شلون اقولها الحين
فاطمه : شنو
نوره : هـا لا ولا شي اقولج بروح غرفتي اريح شوي يمكن امون تيي العصر
فاطمه : اي والله توسع صدرنا شوي والله تمللنا من قعدة البيت
نوره : اوكي بتصل فيها بقول لها
رحت غرفتي يودت تلفوني اتصلت في امون واتفقت وياها انها تيي بيتنا وطبعا ماعارضت لان امها تحبني اصلا وماترد لي طلب
رجعت فتحت المسنجر بسلي عمري بس لقيت الي يضايقني او شي مالقيت رد من خالد ورجعت جيكت ع الحظر والحذف لقيته للحين حاظرني

وحاذفني
يات في بالي فكره رجعت وسويت له اضافه من نفس الايميل لاني ادري وواثقه مليون بالميه ان خالد مايقدر يفارق النت لو على شنو
يلست احوس في المنتديات لي ما اذن العصر قمت صليت ونزلت تحت شفت نواف ومحمد يالسين في الصاله وشفت اشجانو تلعب في وسط الصاله

كانت شوي بعيد عنهم قمت العب وياها شوي لي مارن جرس بيتنا وكانت امون خذتها ورحنا غرفتي فوق
سألتني : شخبار خالد
تنهدت بقوه : لا حس ولا خبر
امون : احسن انسيه
نوره : امون شنو انسى حب سنتين انساه الحين
امون : وخير ياطير سنتين في غيرج حبو 8 سنوات وبالاخير نسو بعض
نوره : هذي غيري مو نوره
امون : والله انج هبله وعلى فكره ترى اسلوب خالد لعاب ينعرف
استحمقت عليه : غيري السالفه تكفين بس لا تعورين راسي واصلا خالد يحبني انا وبس
امون : انزين خلج معشمه روحج وبنشوف النهايه
نوره : صح ماقلت لج
امون : شنو
نوره : نواف بيعرس
امون : ويييي خطيبي بيعرس
ضحكت عليها للحين عايشه الدور مسكينه لان من قبل وانا اقولها انتي خطيبة اخوي وعاد امونه ماصدقت خبر
نوره : ويهج صج والله استخف هالاخو
امون : ومن تعيسة الحظ الي بتاخذ واحد مايشتغل
نوره : لا هالشهر بيداوم ولو اقولج من بيباخذ بتنصدمين
امون : من لا تقولين خولوه
((خولوه : وحده كانت ويانا في المدرسه كانت تتلصق فيني عشان نواف يازعم تحبه ))
نوره : لا شفتي ذيج الي كلمتج عنها يوم كنا مسافرين كنت كله وياها
امون : هذيج الي قلتي انها بيتهم يدورونها وماكانت راقده في البيت
نوره : اي اي عليج نور هذي ماغيرها
امون : وشيبي فيها اخوج وحده ماعندها اخلاق ولا تربيه جان قلتي له عن سوالفها
نوره : للأسف قلت له بس تدرين شنو رد علي
امون بفضول : شنو
نوره : كانت راقده وياه بشقتنا
حطت يدها على حلجها : وييي صج استخف اخوج
نوره : وفوق هذي يبي يبيع البيت عشان مهر لها
امون عصبت : طل في عينها بعد قدرها ربيه
نوره : هههههههههههههههههه اعصابج كل هذي غيره
كفختني على خفيف : ويهج عاد مادري شابي فيه اخوج دام هذي سوالف
سمعنا طقت الباب كانو امل وفاطمه واشجانو كانت منخشه ورا فاطمه مستحيه من امون يازعم وهي لسانها شطوله
فاطمه تكلمين : لشي ماقلتي انها يات
قلت بخجل : والله نسيت خذتني السوالف ويلست وياها
فاطمه : معذوره من لقى احبابه نسى اصحابه
قلت : هههههههههههههههههه الحين هذي حبيبتي
امون : يحصلج عاد مالت عليج
التفتت شافت اشجانو
امون : وايه عليها تينن هذي اختكم
فاطمه : اي
قامت امون راحت لها وذبحتها من التحبب زين الي ماكفختها اشجانو لان ماتحب احد يحببها جذي
ويلسنا نسولف مده طويله عن المدرسه وسوالفها ويلست تقول لنا فاطمه عن الجامعه ومقرراتها الصعبه اذا احنا في ثنوي ونتذمر عيل لو نروح

الجامعه شبنسوي


ومــر هاليوم عادي مثل كل يوم
قعدت اليوم الثاني الصبح هاليوم عكس امس بالضبط يلست بكسل ونزلت تحت شغلت التلفزيون ويلست اطالع شوي ودش نواف وفي يده ظرف

وكان مستانس ع الاخر
قالي : باركيلي بتزوج
طالعته وصديت عنه بروحه قارهني الا يبيني ابارك له من زين الي بياخذها
نواف : ترا باجر مسافر وان شاء الله ع الاسبوع الياي بنيي انا وسميه بنعيش هني
قلت له : قصورها بعد تيلس ويانا في نفس البيت تبيها روح وياها جهنم الي تاخذكم
اول مره ادعي على نواف جذي
قمت عنه ورحت غرفتي فتحت المسنجر لقيت خالد
ياني تشققت حسيت بفرحه ماتتصورونها شوي وكنت اطير من الوناسه كلمته بشوق وحب
السلام عليكم
رد علي : وعليكم السلام
ليش حذفتني
مالقيت رد منه
كتبت : خالد ليش حاذفني
خالد : توقعتج تستقبليني بشوق ولهفه وحب هذا شهر وانتي ماتدرين عني
صدمني كلامه صج اني مشتلقه له بس مو بالاول يبرر موقفه يقولي ليش حاذفني في شنو غلطت عليه
نوره : صج اني ميته شوق لك بس ليش حذفتني والله عذبتني خالد والله
خالد : حذفتج صح بس باقيه بقلبي وكنت اردج اجوفج اذا اون او لا واقرا رسايلج بس مارد عليج
نوره : ليش تسوي جذي فيني انزين شنو ضريتك فيه انا
خالد : كنت ابي انساج بس ماقدرت وفي نفس الوقت خفت اظلمج
نوره : تظلمني في شنو ياخالد
خالد : اخاف تكونين صج تحبيني وانا اتخلى عنج
يوم قال هالكلام صج نزلت دمعي دومه يجرح بكلامه دومه قاسي ويجرح فيني
نوره : يعني انا ماحبك
خالد : لي كلمتج اشوف شي ولي رحتي اشوف شي ثاني
نوره : شنو الي الثاني الي تشوفه
خالد : اشوف انج تخونيني
نوره : انا اخونك بذمتك
ويلست اتكلم واكتب حجي له اول ماله اخر بس الاكيد في الاخر انا مالقيت رد منه
وشفته فجأه طلع
يلست انطره قلت يمكن فصل النت وبيرجع يدخل بس مالقيته دخل
قمت عن الاب توب بخيبة امل ورحت ع السرير يلست اصيح بشكل هيستيري بس سكتني صوت تلفوني شلته شفت رقم دولي من نفس ديرة خالد

توقعته اهو لاني ماعرف احد من هناك غيره
رديت وقلت بصوت مبحوح من كثر الصياح : الو
مالقيت رد
رجعت كررتها مره ثانيه
هم مالقيت رديت كل الي لقيته ان قفلو الخط في ويهي
توقعته خالد لان محد يسوي هالحركات غيره
رجعت حطيت راسي ويلست اصيح لي ماشبعت بعدها تغسلت وصليت الظهر ونزلت تحت مالقيت احد رحت حق فاطمه غرفتها
طقيت الباب وبعدين بطلته