[لامارا]

(الجزء الرابع)

رجعوا من المزرعه اليوم والعنود مع اهلها وهي سرحانه لانها للحين ماكلمت وليد ولاكلمها ومن كثر ماتسرح تأكدت شكوك ام عبدالعزيز ان بنتها فيها شي.
ام عبدالعزيز/ امي العنود وش فيك؟؟
العنود / هلا مافيني شي يالغاليه.
ام عبدالعزيز/ لابالله فيك شي ..
العنود وهي متضايقه/ ابد يمه مع هالحمل صايره مااتحمل شي انتم بتسافرون بعد اسبوعين والدكتوره مانعتني من السفر ووليد مضغوط هاليومين بالشغل
قلت اريحه مني شوي ولي يومين ماكلمته واحس اني زودتها معه .
ام عبدالعزيز وهي ماسكه يد بنتها وبحكمه قالت/ امي الحياة لو كلها راحه وانبساط ملينا ولو انها دايم العكس تعبنا بس الله سبحانه اخبر بتصريف الاحوال
والحين قومي وكلميه و استسمحي منه وخليه يجي يشوف بنته ويشوفك ولو مارحتي معه اليوم ماعليه. واذا تبيني اجلس انا وابوك ماعندنا مانع انت تدرين
ماعاد لي بالروحات حاجه.
العنود ضمت امها لانها ارتاحت من كلامها وقالت/ لا يالغاليه ان شاء الله ماتجلسين من شر .
ام عبدالعزيز/ هذا الواجب وانا امك كلها كم شهر تحملي والله الله بوليد يستاهل.
العنود حبت راس امها وارسلت لوليد رساله لانها مستحيه تكلمه محتواها (هلا وليد اذا تقدر بكره تجي لبيت اهلي بنتك مشتاقه لك)..
وليد وصلته الرساله وعرف ان اللي براسها طاح بس تكابر وهو عاذرها لان نفسيتها مع هالحمل متغيره رد عليها (ان شاء الله بكره المغرب اجي اشوفها)..
الساعه 12العنود بغرفتها مع بنتها ..
الجوري / ماما بابا متى يجي نروح للبيت؟؟
العنود/ بكره بيجي ان شاء الله يله ماما ننام.
الجوري/ ابي قصه.
العنود/ من عيوني.

يوم جديد المغرب العنود اخذت بنتها ولبستها ولبست نزلت وكان وليد بالمجلس مع بنته وينتظر العنود دخلت معها القهوه وحطتها على الطاوله وسلمت..
وليد بمزح/ هاه عنوده طاح اللي براسك؟؟
العنود مبتسمه/ طاح بس اذا ماعندك مانع نجلس عند اهلي لبعد ملكة خالد وريم..
وليد ماوده انها تجلس اكثر بس مايبي يضايقها / اللي يريحك بس ليش وجهك شاحب؟؟
العنود/ على بالك مرتاحه من رحت للمزرعه؟؟
وليد مسك يدها / حياتي انا قلت لك قبل لاتنزلين للمزرعه اذا ارتحتي كلميني انا مابي اكبر السالفه لانك كنت متضايقه وانا مقدر وضعك..
العنود حطت يدها الثانيه على يده/ انت ماقصرت القصور مني انا كثر خيرك اللي متحملني هالفتره..
وليد بمزح/ شي انا السبب فيه لازم اتحمل ابوه بعد.
العنود بأمتنان لطيبة قلبه/ الله يخليك لنا.
وليد بمحبه/ ويخليكم لي.

يوم الاثنين دخلت نورعلى اهلها مع ولدها حمودي وزجها علشان تجهيز ملكة اخوها وريم..
الكل يستعد لهذا اليوم والبنات مقسمين الشغل بينهم الكوافيره والكوشه والمصوره وdj والفساتين طبعاً اهم شي فستان العروسه ..
كل هالاستعداد انتهى مع تعاون البنات وتقسيمهم للشغل والملكه باقي لها يومين وبتكون في قصر الجد..
يوم الاربعاء فهد وهيفاء وصلوا لان فهد ماعنده اجازه وكان فيه عشاء في بيت ابوفهد والكل موجود الا العروسه ماجت حتى العمه الجوهره جت من لبنان
بدون زوجها لانه ماقدر يجي وراح ترجع مع اهلها ان شاء الله ..
تعشوا بدري وتفرقوا لان بكره عندهم يوم مهم دخل فهد وخالد بعد مالكل راح للصاله وكان مافيه الا خواتهم وهيفاء بس..
نور/ هلا والله تعالوا مافيه احد.
فهد/ هلا بك اكثر اخبارك نور؟؟
نور/ تمام الحمدلله .
خالد وهو ياخذ فجر من نوف قال/ هلا هيفاء اخبارك؟؟
هيفاء/ بخير الله يسلمك.
نور / يله شد حيلك وهات لنا وحده مثل فجر علشا يطب ويختار ولدي.
فهد/ افاااا نور قبل فجر والحين تبين غيرها.
هيفاء / مو على كيفها بنتي اللي ماتبي ولدها قالت تلحق عمرها وتشوف لها غيرها.
الكل/ ههههههههههههه.
خالد / والله هو الخسران من يلقى فجر ويختار غيرها. وينه هو اصلاً؟؟
نور/ نايم يستعد لبكره.
خالد/ههههه لايكون المعرس وانا مدري.
نور/ ياحلوه متى ماصار معرس . بشر بس كيف استعدادك لبكره.
خالد/ والله كل شي تمام وانتم ان شاء الله كل شي خالص.
فرح بمزح/ تسئل عن احد معين ولا كلنا.
خالد فاهم انها تقصد ريم/ تفهمينها وهي طايره انا اسئل عن المهم فالأهم.
كل الموجودين/هههههههههه.
كملوا سوالفهم وانتهت السهره وكل واحد طلع لغرفته ينام ..

اليوم الملكه واللي بيجي بس صديقات وبعض الاقارب وبيت ابو فارس لانهم ماحبوا يكبرونها وفيه زواج كبير ان شاء الله بعد العيد.
كل شي جاهز من كوشه لورد طبيعي لكيكه بس باقي العروسه تنزل البنات فوق والكوافيره تزين ريم لان الكل خالص بس اللي يساعدها واللي يجيب لها عصير
واللي تطلع فستانها خلصت العروسه ووقفت قدام المرايه بفستانها ومكياجها وتسريحتها طالعه روووووعه ماشاء الله..
فيصل كلم رغد يبي ريم علشان التوقيع وقالت له انهم نازلين نزلت ريم وسلم عليها فيصل وعطاها بوسه على جبينها وبارك لها ووقعت وهي ترجف.
فيصل مسك يدين ريم بعد ماوقعت/ وش دعوى ريم.
ريم/ فيصل من جدك والله خايفه.
فيصل/ هههههه ترا بقوله انك خوافه.
ريم ابتسمت/ اكيد يدري فرح ماخلت شي ماقالت له.
فيصل مبتسم/ شكلها جايبه خبرك المرجوجه.
ريم/ ماتتخيل قد ايش مهبله فيني.
فيصل/ ماعليك منها والله يوفقكم.
ريم وهي مستحيه/ امين.

المعازيم كانوا بالصاله الخارجيه المخصصه للعزايم الكبار والبوفيه برا والكوشه داخل البيت بأحد الغرف راحت العروسه وجلست بمكانها وراحت فرح
للصديقات تناديهم ودخلوا وباركوا لها واخذوا معها كم صوره الكل يبارك لريم ومبسوط ..
جاء وقت دخول خالد لريم وزاد توترها لان الكل طلع علشان الرجال بيدخلون معه وهم(الجد - ابو فهد - ابومحمد - محمد - فيصل - وعمانها عبدالله ونايف)
اول شي دخل ابوها مع خالد ابو محمد سلم على بنته وبارك لها وطلع وخالد منبهر بجمال ونعومة ريم قرب ومسك يدها وطبع بوسه على جبينها.
خالد وهو مبتسم/ مبروك الريم.
ريم بصوت واطي وهي مستحيه/ الله يبارك فيك.
شوي ودخلوا الرجال وسلموا وباركوا واخذوا بعض الصور معهم وطلعوا..
طلعوا الرجال من هنا ودخلوا خواته وامه وامها وعماتهم واهم شي الاطفال بطلب منه باركوا واخذوا معهم صور واحلى صوره وهو شايل فجر..
طلعت ام محمد الشبكه وحطتها على الطاوله الكبيره اللي قدامهم وفتحتها وطلعوا كلهم علشان ياخذون راحتهم الا المصوره طبعاً..
خالد له يومين يتعلم كيف يفتح العقد ويقفله هههههههههه..
اول شي اخذ الدبله ولبسها وباسها على يدها وريم حدث ولا حرج من الاحراج وبعدين هي لبسته وبدء هو يلبسها العقد وبعدين الخاتم والاسواره والحلق
لانه شغلانه اخذته هي ولبسته بعد ماشالت اللي عليها..
خالد وهو مبتسم/ عليك صار احلى.
ريم وهي مستحيه ومنزله راسها/ تسلم من ذوقك.
المصوره ماقصرت فيهم طلعت روح ريم بالحركات وخالد مبسوط ولا عنده مانع بأي حركه وقصوا الكيكه وكل واحد اكل الثاني والعصيروهي شغاله تصوير
خلصت وطلعت وماباقي الا خالد وريم بالغرفه..
خالد ماصدق المصوره تطلع قرب من ريم ورفع راسها / ابي اشوف وجهك حرام عليك .وضاع خالد في عيونها.
ماردت عليه ريم من الحيا مسك يدها وقال/ دلوعتي ماتغيرت ملامحها كأنها ماغابت عن عيني لحظه .
انحرجت ريم لان هذا دلعها عنده من كانت صغيره (دلوعتي) ونزلت راسها خالد رفع راسها وقال بمزح/ اذا تبين يدي ثابته هنا ماعندي مانع.
رفعت ريم راسها وهي مبتسمه من كلامه وقالت/لا خلاص برفعه.
خالد وهو سارح ملامحها / ولا اقولك نزلي راسك حلوه وتبتسمين بعد عذااااااب.
زاد من توترها وقالت بصوت قصير / تسلم.
خالد/ لمين؟؟
ريم وهي مستغربه/ وشو اللي لمين؟؟؟
خالد بمزح/ انت تقولين تسلم اسلم لمين؟؟
ريم فهمت قصده واستحت/ لنا .
خالد استلمها/ ومن انتم؟
ريم بنعومه/ خاااالد.
خالد حب اسمه من طريقة نطقها له/ عيونه. بس لمين؟
ريم بعد جهد/ لأهلك ولي.
خالد ابتسم/ صعب الجواب؟
ريم ردت له الابتسامه/ لا
جلس خالد مع ريم قرابة الساعتين ولماجاء يطلع قال انتظري مكالمه الليله وعطاها بوسه بين عيونها وطلع للشباب بعد ماودعها.
كلم خالد فرح علشان تجي لريم لانه طلع راحت فرح لها وجننت ريم بالاسئله من مازاد خجلها واخيرا طلعوا للمعازيم الللي برا..
طللعت على صوت البنات بأتفاق مع فرح / الف الصلاة والسلام عليك ياحبيب الله محمد. واشتغلت الزغروطات ههههههههههه..
راحت ريم وسلمت على جدتها وعلى باقي المعازيم اللي ماشافتهم ورقص لين قاموا للعشاء..
تعشوا ورجعوا للرقص بعد ساعه راحوا المعازيم وماباقي الا البنات برا على كراسي البوفيه ورند جالسه جنب ريم وماسكه يدها..
فرح تدري ان رند متعلقه في ريم قالت/ رند حياتي اليوم بتنام عندكم بس ملكه ماراح تروح عنكم.
رند/ ادري بس مبسوطه انها صارت عروسه علشاني احبها.
ريم عطت اختها بوسه على خدها / وانا احبك اكثر حياتي.
فرح/ الله ريم صرتي زوجة اخوي رسمي.
رغد بمزح/ شاطره مبسوطه اخذتوا اختي .
فرح/ لاتلمحين تبين ادعي لك بالزوج الصالح.
رغد مبتسمه/ والله مافيه مانع اكون شاكره لك.
غاده/ ماشاء الله ريم طالعه شي بصراحه اليوم.
رغد/ جد والله والطقم شي ثاني ماشاء الله.
ريم وهي مبتسمه/ الله يسلمكم.
نور تناظر ريم ومبتسمه/ ترا والله ذوقه صح انا وامي معاه بس هو اللي اختاره.
نوف بمزح/ الله يهنيك ويعينك على ذوقه هذا حلو وهذا مش ولابد.
ريم/هههههه وش دعوى.
فرح تأيد كلام اختها/ جد والله وبتشوفين بعينك.
هيفاء/ اهم شي الله يوفقكم.
ريم وهي مبتسمه/ اااامين.
دخلوا البنات لان الكل بيروح لبيته باركوا لها الحريم من جديد ودعوه من هنا ودعوه من هنا ..
في بيت العم عبدالرحمن الساعه3 الكل نايم الا البنات في غرفة ريم..
رغد/ ماشاء الله اذا الطقم جد ذوقه.
ريم مبتسمه/ تقوله نور.
رند بطفوله/ اكيد ذوق اغلب ملابسه ماركات. بس المشكله بياخذك من بيتنا.
ريم/ رند حياتي بكون عندكم قريب.
وسوالف لين ماسمعوا نغمة جوال ريم.
رغد بمزح/ عادي ريم نجلس؟؟
ريم ماردت عليها لانها للحين مو مستوعبه انها عادي تكلمه طلعت رغد ورند كل وحده لغرفتها ووقفت النغمه وريم ماردت..
شوي وجاها رساله(هلا ريم انا خالد اذا ماعرفتيني اخذت رقمك من فرح) صح انه رقم وريم للحين ماسجلته بس متوقعته ثواني وتسمع النغمه مره ثانيه..
ريم وهي مستحيه وبنعومه/ الوو.
خالد ابتسم /احلا الو سمعتها بحياتي.ليش مارديتي ماتوقعتي انه انا؟؟
ريم/لامتوقعه بس كانوا رغد ورند عندي.
خالد بمزح/ ريم لايكون تصريفه.
ريم ابتسمت/ لاوالله جد.
خالد/ان شاء الله مرتاحه.
ريم/ الحمدلله مشكور خالد الطقم بجد ذوق.
خالد مبسوط/ اهم شي اعجبك.
ريم/ كثير حتى البنات اعجبهم.
خالد بمزح/ ماعلي من البنات اهم شي يعجبك انت وبعدين تستاهلين اكثر.
عرف خالد انها استحت وحب يغير الجو شوي..
خالد بمزح/ يقولون عن دلوعتي للحين خوافه؟؟
ريم /هههههه اكيد فرح قالت لك؟
خالد انسدح على السرير بالعرض بعد هالضحكه واخذ نفس/ دوووم هالضحكه يااارب لا مو فرح محمد.
ريم اخذت راحتها/ افاااا حتى محمد.
خالد مبسوط لانها بدت تاخذ وتعطي معه / ايه لانه مسجلك بجواله الرسامه وقلت له يغيره قال اسكت لا اسميها الخوافه.
ريم مبتسمه/ تدري اول مره ادري انه مسجلني الرسامه اللي يشوفني يقول ليوناردو دافنشي.
خالد/هههههه عندي احسن بس يكون بعلمك لازم اشوف رسوماتك اذا جيتك يوم ان شاء الله.
ريم بنعومه/ ان شاء الله ماطلبت بس لاتتحمس مجرد هوايه.
خالد/ادري بس احب اعرف كل صغيره وكبيره عنك بالعشر سنوات اللي ماشفتك فيهم مع انك ماغبتي عن بالي.
المكالمه استمرت ساعه شوي غزل من خالد واذا شاف ريم منحرجه حول للمزح هههههه واتفق خالد مع ريم انه راح يزورها بعد كم يوم..
بعد ماقفل من ريم ارسل لها رساله ..

ابتدى عمرى بشوفك يابعد كل العمر
كل يوم قبل اشوفك ما انحسب من زمانى
يااجمل احساس بحياتى اه يا احلى قدر
امنياتى فى غرامك مابعدها امانى
كيف بقدر اتصور ساعة من دونك تمر
فى حضورك ياحياتى فيك تحلى الاغانى
قلبى لك يشتاق زاير ينتظر احلى خبر
انت وحدك نور عينى مالى بالحب ثانى
اخذت ريم الجوال وبعد ماشافت الرساله ضمت الجوال بين يدينها وسرحت شوي اخذتها الافكار لحد مانامت والجوال بيدها..

اليوم الجمعه بدايه يوم جديد على ابطالي خالد وريم وبهذا اليوم كلهم في بيت الجد لانهم متعودين كل جمعه بعد الصلاة يتجمعون ويتغدون..
بعد العصر فهد وهيفاء توجهوا للشرقيه ونور وزوجها لجده..
العمه الجوهره/ هاه ريم قلبي ان شاء الله مبسوطه.
ريم وهي مستحيه وبنعومه/ الحمدلله عمتي.
العمه الجوهره/ الله يوفقكم.
ريم وهي مبتسمه / امين.
الجوهره/ هاه العنود اجل هالصيف مافي سفر؟؟
العنود مبتسمه/ وش اسوي غصب علي والله يصبر وليد علي .
الجوهره/ ماقصر بعد كل هالاسبوع وانت عند اهلي الله يخليه لكم.
العنود/ ااااامين.
نوف/ عمتي بشري عن لبنان؟
الجوهره وهي مبتسمه/ ماعليها تسئل عنكم وتنتظركم.
ام محمد/ الله يعين لبنان عليها قد ماهي مشتاقه لها.
نوف/ ليش ماماتي الله يعينها وانا احبها.
رغد/ نوف تحبين لبنان؟؟
نوف/ اكييييد.
رغد بمزح/ اجل تزوجيها.
الكل/هههههههههه.
فرح مبسوطه/ حلووووه رغوده.
نوف / تحاولين تنكتين انت وياااها بس اذا جاني لبناني ماعندي مانع.
ام محمد/ بعد مابقى الا هي نور بجده غصب علينا بتروحين انت ابعد.
نوف للبنات بصوت واطي علشان امها ماتسمع/ لو يجي ماقلنا لاااا.
البنات كلهم/هههههههههههه.
الجده/ وش عندها قالت لكم شي اكيد؟؟
فرح/ لاجدتي تقول متى بس نروح لبنان ملينا.
ام محمد/ ماعليك منهم خالتي اجل متى نروح تضحك؟؟
فرح/ والله ماماتي فاهمتنا.
الكل/ههههههههههه.
نغمة وصلت لريم(حياتي والله لو تسوين لي مفاجأه وتجين لصالة الطعام اكون شاكر لك )
رفعت ريم جوالها وشافت المكتوب وابتسمت وردت عليه(لا واللي يخليك لاتحرجني وش يفكني من فرح)
فرح وهي متوجهه لريم وبمزح/ ريم بشري وش مكتوب ولا عطيني انا اشوف .
ريم/ فرح ارتاحي الفاتوره.
فرح/ اشوفك مبتسمه ليش قالوا بنسدد عنك .
رغد/ حلوه بس لاتعيدينها احرجتي اختي.
غاده/ الله يعينك ريم ماتضيع عليها.
الكل/هههههههههه.
ام فهد/ ريم امي تعالي عنها والله ماتفكك.
ريم راحت لام فهد وقالت وهي مبتسمه/ انا بحماية خالتي الحين.
نوف/ كذا بتستسلم لانها تخاف امي تعلم خالد.
ريم حبت خالتها مع راسها وجلسوا سوالف لحد ما الكل راح لبيته ومنهم العنود رجعت مع وليد والجوري كاانت مشتاقه لابوها ولبيتهم وغرفة العابها..
في السياره الجوري/ بابا متى نوصل للبيت؟؟
وليد/ شوي بابا.
الجوري/ من زمان مارحت لغرفتي والعابي.
وليد/ ماعليه بابا كنت مشغول. ليش ماكنت مبسوطه عند جدو.
الجوري/لامبسوطه بس بعد احب غرفة العابي واحبك وماما بعد احبها..
العنود ضمت بنتها لانها حست انها تتكلم عنها لانها اشتاقت لكل شي بالبيت وصاحب البيت..
وصلوا للبيت الجوري على طول طلعت فوق لغرفة العابها وتركت امها وابوها تحت وهذا افضل لان اكيد عندهم كلام كثيررر..
وليد/ كل شي بالبيت مشتاق لكم.
العنود/ حتى انا مشتاقه له ولصاحبه.
وليد/ وصاحبه كان ينتظركم على احر من الجمر بس حب يتركك على راحتك.
استحت العنود لانه متحمل وصابر عليها ووليد كان يناظر بطن العنود وقرب منها .
وليد/ اخبار السبب .
العنود ابتسمت/ ماعليه بس مدري ليش هالمره غير عن حمل الجوري.
وليد بمزح/ تدرين افكر يكون اخر ولد.
العنود/ههههه وين اللي يبي 6.
وليد/ مدري تراجعت اذا مثل كذا بيحرمني منك مابي.
العنود ضمته/ الله لايحرمني منك فتره وتعدي وبعد سنتين تقول اشتقت لبيبي.
وليد قربها زياده لصدره/ اكيد اذا انت امهم بشتاق لبيبي.
العنود جلست على الطاوله وواجهت وليد ومسكت يده/ وليد اسفه على الايام اللي راحت وضيقت فيها صدرك.
وليد حب اعتذارها واعترافها بالغلط لان مهما كان هو عادي يصرخ على بنته بس عذرها وانتظرها تبادر ولا خيبت ظنه.
وليد مبتسم/ عادي حياتي بس اشتقت لكم.
وجلسها على حظنه العنود باسته على خده وعلى طول قامت خافت بنتها تجي ..
العنود/ تشتاق لك العافيه بس وش يفكني من بنتك لو شافتنا صايره مثل ضرتي.
ضحك عليها وليد وكملوا سوالفهم وهي تحس انها ارتاحت بعد ماتأسفت لوليد وهو مبسوط انها رجعت العنود اللي يعرفها نتركهم لانهم اكيد مشتاقين لبعض.
نرجع لقصر الجد هدوءءء لان الجد والجده ناموا من فتره ومافيه الا الجوهره ونوره وغاده ونايف برا بحديقه القصرعلى كراسي وبينهم طاوله ومعهم شاهي..
الجوهره/ نايف لمتى يعني.
نوره/ والله عجزت عنه يالجوهره علشان امي.
نايف/ واذا صارت مثل اللي قبلها انا جربت حظي مره وخلاص.
الجوهره/ هذا كلام غيرك انت اكبر من كذا وتدري ان اصابعك مو سوى.
نوره/ انا خلاص صرت مااتكلم معه بالموضوع علشان مااضيق صدره وصدرأمي.
نايف/ ادري بس ماعاد لي خاطر حتى بالتجربه مره ثانيه.
الجوهره وهي تناظر غاده/ جرب انت واذا ماتثق بأختيارنا ندخل غدوو بالموضوع.
غاده ابتسمت لخالها/ خالتي والله ودي يتزوج بس اهم شي راحته.
نايف رد لها الابتسامه وقال/ وش دعوى الجوهره انتم الخير والبركه ومن الحين اقولك اذا بتعجب غاده ماعندي مانع لانها اكيد راح تعجبني..
قال هذا الكلام علشان يريحهم ولا هو بعد زواجه الاول مايفكر بالزواج برأيه تجربه تكفي ومأجل الفكره لبعدين ..

مريومين على ابطالي طبعا مكالمات خالد وريم مستمره وريم كل يوم عن يوم ترتاح لخالد اكثر وتاخذ راحتها بالكلام..
وابو محمد كلم ابو فار س بموضوع محمد ورد عليه ان لهم الشرف بس البنت مخطوبه ومثلك عارف (خطبه على خطبه مايجوز)..
الخبر ضايق ابو محمد مع انه مايدري وش الخيره فيه بس خاف من ردة فعل محمد وقال لام محمد الموضوع وسكتوا عليه..
بعدها بيوم محمد جالس مع امه وابوه تحت بالصاله..
محمد/ ابوي كلمت ابو فارس بالموضوع.
ابو محمد/ ايه كلمته وانا ابوك.
محمد وهومبسوط / بشر يالغالي؟؟
ابو محمد/ والله يقول لي الشرف بنسبكم بس يقول مخطوبه ولابعد ردت علي للحين وخطبه على خطبه مايجوز وانا ابوك.
محمد تضايق/ هذا اللي انا كنت خايف منه وصار.
ام محمد/ ماتدري وانا امك وش الخيره فيه.
محمد/الله يعين يله انا طالع توصون شي؟؟
ابو محمد وام محمد/ سلامتك.
طلع محمد وهو جد متضايق لانه من شافها يوم تركب معه وهو يفكر فيها بس ماكل مايتمناه المرء يدركه تأتي الرياح بما لاتشتهي السفن..
اليوم خالد بيجي لريم في البيت استعدت ريم لبست وتعطرت ونزلت وكان خالد بالمجلس بعد ماسلم على عمه وعيال عمه وطلعوا علشان ياخذ راحته..
دخلت ريم وهي مستحيه من خالد وبقلبها(جد الشوفه غير الكلام) ..
خالد سلم على ريم وعطاها بوسه بين عيونها وطول شوي ريم انحرجت وهو حس فيها اخيراً مسك يدها وجلسها جنبه بنفس الكنبه..
خالد مبتسم/ ادري المكان كبير بس احساس حلو ودلوعتي جنبي مثل زمان.
ريم انحرجت/ طيب بس بجيب القهوه.
خالد مسك يدها / بدري على القهوه انتظري شوي ماشبعت من شوفتك.
طبعاً ريم من احراج في احراج خالد ابتسم وقال/ تصدقين قلبي نفس الحركات من كنت صغيره اذا انحرجتي .
ريم ابتسمت/ تدري خالد المكالمه اسهل من الشوفه.
خالد مبسوط/ههههههه وتدرين انت ان اسمي معك غير. ومن كلامك معي قلت اكيد اليوم غير الملكه.
ريم انحرجت/ حتى انا توقعت كذا.
خالد مبتسم/ عادي قلبي شوي شوي تتعودين .
ريم/ ان شاء الله طيب الحين اجيب القهوه.
خالد مبتسم/ ماراح ترتاحين لحد ماتجيبين القهوه روحي هاتيها.
راحت ريم وجابت القهوه وسوالف ساعتين وحس ان ريم اخذت راحتها معاه وهو مبسوط معها وفيها ..
اخذ خالد كيس من الكرسي اللي جنبه وعطاها ريم..
خالد/ ان شاء الله يعجبك.
ريم مبتسمه/ تسلم كان ماكلفت على عمرك.
خالد مسك يدها/ لو يحصل لي اجيب لدلوعتي العالم كله ماقلت لا.
ريم انحرجت من كلامه وودها تتجرأ شوي بس هذا اللي قدرت عليه/ الله يخليك لها هذا اللي تبيه.
خالد طمع في اكثر وقال بمزح/ لو يجي بعد الله يخليني لها كلمه حلوه تصير احلى.
ريم ابتسمت وتجرأت صدق هالمره لانه يستاهل/ الله يخليك لي ياعمري .
خالد انبسط من الكلمه/ حلو الواحد يسمع كلام حلو تحرميني من هالشعور؟؟
ريم وهي مبتسمه/ لاان شاء الله مااحرمك بس اصبر علي شوي.
خالد /هههههه تسلمين لي امزح معك اصبر كثير خوذي راحتك.
فتحت ريم هدية خالد حلق المااااس روووعه وعطر..
ريم ابتسمت/ مشكور خالد ماقصرت.
خالد بمزح/ لاتجاملين ادري انه نفس عطرك.
ريم تفاجأت وابتسمت/ اهم شي انه هديه منك.
خالد/ طيب الحين روحي هاتي عطرك الاول ابيه.
ريم مستغربه/ ليش؟؟
خالد ابتسم/ ابي كل ماشميته تذكرتك حتى وانت بعيده عني . يله انا بطلع برا انتظرك علشان اشوف رسوماتك وامشي.
راحت ريم علشان تجيب العطر وتجيب مفتاح الغرفه الللي برا فيها رسوماتها ترسم فوق وتنزل لهذي الغرفه بعضها معلق والبعض مسند عالجدار..
نزلت ريم وشافت خالد برا قدام الغرفه ينتظرها فتحت الغرفه ودخلوا..
خالد مبتسم/ كل هذا وتقولين مجرد هوايه..
ريم انبسطت انه اعجبه/ والله مجرد هوايه من كنت صغيره وانا احب الرسم.
خالد/ اذكرك بس على بالي كل الاطفال يحبون الالوان . كمل خالد وهو يناظر رسمه لريم/ هذي الرسمه حلوه وغريبه جايه الالون متداخله..
ريم ابتسمت/ كل رسمه لها وقتها تدري هذي الرسمه قبل لاارد على ابوي بالموافقه.
خالد قرب ومسك يد ريم/ يعني كنت مثل الالون في الرسمه لهدرجه كان قرار الموافقه صعب ما حملتي اي ذكرى حلوه من ايام زمان.
ريم اول مره تحط عينها بعين خالد وللحين يدها بيده/ خالد انت تدري كيف كنت متعلقه فيك بس كبرنا والزواج حياة كامله والحين الله لايحرمني منك.
ابتسم خالد وقرب يدها وباسها / ولا يحرمني من دلوعتي انا بطلع قبل لااطمع بأكثر من كذا.
فهمت قصده ريم وانحرجت ونزلت راسها وهي مبتسمه ومشت معه لحد الباب واخذ منها الكيس اللي فيه عطرها ودعها وطلع من بيت عمه ..

وهنا ينتهي هذا الجزء على امل اللقاء في الجزء الخامس..