""""الجـــزء الثاني""""
أحبــــــــــك ليه انا مادري ..ليه اهواك انا مادري..لو مرت علي ذكراك..يفز النبض في صدري..
عاد هاذا الاسبووووووع مر بسرررعه....طبعا البنات كل يوم فالسوق عشان ايخلصن مستلزمات السفر..يعني نعال عشان العمره ..يشترن قطع عشان الاحرامات و ايفصلهن..شيل ..عبايا مسكره..يعني اتعرفون مستلزمات البنات وايد ما تخلص
++ أول مره بنسير من دون أخويه سعيد، فديته مادري ليش مكنسل كل ما نسأله ايقول بس.. المهم انه ابويه و سلطان اخويه بيوديكم، عاد هاذا بو عسكور اخويه له معزة خاصه في قلبي..مادري جيه دوم ايدافع عني و احسبه وايد يحن عليه من دون كل خواتيه، ليش مادري؟؟!! المهم تجهيزات السفر جاريه على قدم وساق...
في المطبخ التحضيري...دشت لطيفه و حبت راس امها
لطيفه: شمسيتي..بنت راشد؟
عفرا ( ام لطيفه) : بخير و نعمه...تعالي لطوف هاتي الجدر اللي هناك
لطيفه: و شعنه شوه تبينه؟؟
عفرا: بنشله ...في شوه بنطبخ فالعمره عيل؟؟؟
لطيفه: خليه امايه هالجدر عوود ما بيدش فالشنطه ...برايه بنشتري مناك.. هناك الاسواق وايد.
عفرا:هزرج؟؟؟
لطيفه: هيه ..عيل تبين ابويه و سلطان ايسحبون هالشنط اللي هالكبر فالمطارات؟؟؟...مافيه بويه على التسحيب
عفرا: عيل اقولج هاتي دلتين من الستور وحده حق القهوه و الثانيه حق الحليب
لطيفه: ان شالله
و دشت في هاللحظه عليهن عايشه.....محتشره
عايشه: امااااااايه؟؟؟؟ وين اللي بيوديني السوق؟؟؟؟
عفرا: خيبه اتخيب العدو ...نسيت ..عاد الحينه شوه بيفججني من حشرتها هاي....انزين انتي شوه تبين من السوق عنبوج البارحه يايه؟؟
عايشه: امايه تراني قلتلج شوه ابا... كم مره عاد بعيد؟؟؟
عفرا: انزين انا الحينه هب متفجيه لج ...سيري خلي سلطان ايوديج.
عايشه: سلطان محد ..
عفرا: و ابويه عليج انتي..الحنيه شايفه سيارته فالكراج
لطيفه: الخنفسانه اللي فالكراج...سلطان ساير ايودي سيارته النيسان الصناعيه
عفرا: في ذمتج؟؟؟؟ يا ويليه من هالولد محد بــيــــبليه الضغط غيره..اكيد انه ساير ايركبلها مكينه
عايشه: عاد هاذا سليطين يربع ورا الموت بريوله
لطيفه: عويش لمي ثمج...هب اتمين اتحطين الضو في فواد أمايه
عفرا: ادريبه يبا ايسير يسابقبها في العراقيب...شوه يباه مرعي هاذا كم مره قلتله انا لا تسيرعنده.. محد غيره مخرب الشباب مرعي هاذا يبا حد ايبلغ عليه الشرطه؟؟
لطيفه: ههههههه أمايه لا لا ...مررررررررعب ... مسابقة تل مرررررعب يعني عرقووب يتسابقون عليه الشباب و اللي يوصل سيارته فوق هوه اللي يفوز
عفرا: و ااااابووووويه...
عايشه: هيه امايه و اللي ما توصل سيارته فوق اتردبه نكس و الله يعلم عااااد وين ايوقع بها
عفرا و هيه حاطه ايدها على صدرها: في ذمتج؟
عايشه: و الله هاذا اللي انشوفه فالتلفزيون
عفرا: لطوووف..اربعي هاتي تيلفونيه من الحجره بسويله هاذا مسود الويه ..يبا اينفد عمره بعد
عايشه: شووووه امايه بتوديني ولا لا ؟؟
عفرا: يا من عاف حياته من هالبنات ...جنكن امرررره ماعندكن شي ..و الكباته اتزووع من الثياب سيري سوي حق مجيد خليه اييب السياره
عايشه: مجيد و السياره برا انا مسويتلهم من قبل
عفرا: ياااااي هااا جانكن ترامن ..سيري هاتي عباتيه و البوك
عايشه : يالله ....هب تبطين لاحقه عليه القشار.. ولا أقول خلي لطيفه اتحطه
دش عليهن سعيد في هاللحظه...
سعيد: و عنبوووه لطيفه بشكارتج تأمرين عليها....و الله اللي بيقول حق لطيفه شي بزواله
عايشه: و شوه مستوي عليها الاميره لطيفه ....
سعيد: جب جب عن هالرمسه اللي ما لها معنى و لطوف هب خادمتج ولا عبدتج تهبينها و تسندينها
طلعت عايشه متضيقه كالمعتاد...اي نقاش تكون فيه لطيفه لازم سعيد ايدافع عنها
عفرا: هلا الغالي فديتك متا ييت من بوظبي؟
سعيد: من شوي؟ عيل وينها حمده و العيال؟؟؟
عفرا: و الله يابويه حمده عند اهلها شله هيه ما قالتلك؟؟!!!
سعيد: مادري
عفرا: ابويه ...شي يعورك ؟؟ اشوفك و الله انك؟؟!!!
سعيد: لا لا ما شي بس راسيه يعورنيه ...
عفرا: فديتك يا بو عسكور...شي بلاها حمده؟؟ شي مستوي بينكم؟؟؟
سعيد: لاحوووووووووول...ردينا على طير يلللي...أميه فكيني من الصدعه الله يخليج
عفرا: فديتك يا بويه ... و الله اني ابا مصلحتك ..يا بوي هاي حرمتك و ام عيالك مب زين جيه ..كل يوم شاله العيال و رابعتبهم بيت اهلها...
سعيد: ذلفتها
عفرا: يابويه لا تقول جيه...لا تقطعليه فوادي
سعيد: اميه اميه ....ياي من بوظبي و تعبان و داير راسي و من هبطت استلمتيني... عنبوها حياة
و نش سعيد مضيق...شغل السياره و طلع من البيت...سعيد البجر في عايلت حمد..هذا بعد قصته قصه...
حكايه عمرها اعوام انا ما ودي اذكرها..ولا ودي ليالي الجرح ترجع لي و اسهرها
++ من خمس سنوات بعد...الله يغربل هذاك العام اللي نزلت فيه البلاوي علينا وحده ورا الثانيه...انا و سعيد اخويه انصدمنا بصدمات قويه ..دمرتنا ..هزت كيانا...و بالاحرى كرهنا فيها حياتنا...انا كنت صغيره و اي ضربه في حياتي ممكن انساها بسهوووووله ... بس اللي اكتشفته دمر حياتي ..غير مجرى حياتي..و خلاني اجتل احلام وايد كنت راسمتنها في خيالي..بس اتم القضيه اني بنت ..في حين انه سعيد اخويه ريال و اذا دمرت حيات ريال المفروض انه يوقف من يديد و ينسا...بس سعيد ما وقف بالعكس كل سنه عن سنه يطيح اكثر..و السبب بنت!!!!
من خمس سنوات تقريبا..سعيد اخويه كان شاب موقـــّف عن الدراسه لانه مب فالح فيها ..وصل ألين الثانويه العامه بس ما قدر يطلع منها عادها سنتين بس بعدين طبها...على قولته و في شوه بتفيدني الدراسه يعني..تراني عايش بها ولا بلاها و الحمدلله انا مب ناقصني شي...بس الشي اللي ما كان يعرفه انه هوه ناقص في عيون الناس..لانه لا درس ولا اشتغل يعني كان بطالي بعد..و سعيد في هاذيج الفتره مشاكله كانت وايد توصل مراكز الشرطه مرات..بس هاذا مب معناه انه انسان مجرم..يعني كان صايع اوكي...بس مب هاذيج المشاكل ..يعني مشاكل اي ولد ممكن ايسويها في سنه..
سعيد كان يحب مريم بنت عمي مبارك...و هاذا الشي كان واضح وضوح الشمس..ياليته لو كان حب عادي..شوه يوصفونه حب اسطوري ولا خرافي..مادري ...انا استغربت انه في ولد من عايلتنا اللي هي عوايل محافظه و قبايل ما قبايل ممكن ايحب بهالطريقه..يعني حب بجراءه..حب علني..و حب عذري..حب جلب المشاكل وراه..مشاكل لا لها اول ولا لها تالي..
في هاذيج الفتره كان اخويه سعيد يبات في بيت عمي مبارك لانه مطر ولد عمي تقريبا من نفس السن..بالاحرى كان بيت عمي هوه بيت سعيد اخويه.. ما كنا انشوفه ابدن فالعين من تيي الاجازه سيده سويحان..سعيد كان ييلس مع مريم بدون اي اعتبار للعادات و التقاليد..مادري كيف اهليه و عمي تغاضوا عن هالشي..يمكن كانو يعرفون انه مريم من نصيب سعيد و سعيد من نصيب مريم..كانوا عادي يسهرون ألين الصبح ايشوفون افلام طبعا مطر ولد عمي معاهم..يطلعون مشاوير مع بعض و كنت انا الرزه وياهم...لانه من سابع المستحيلات ايخلونهم يطلعون رواحهم..
أذكر مره كنت صغيره و شلنا انا و مريم بوظبي ايحوطنا..مشانا شوي على الكورنيش و شوي في شوارع بوظبي و بعدين خذنا عشا اتعشينا على الكاسر و ردينا..اي عشا الله يخليكم المغرب اتقولون دياي.. ذاك اليوم كنت ادعي ربيه انه يعدي على خير..مادري كيف ما فيهم مخوخ هالاثنينه و ايسوون سواياهم..ردينا ذاك اليوم و الله ستر انه محد فالبيت عمي وحرمته سايرين عزا عند ناس فالعين..و مطر كان ايودي سيارته الكراج ايصلحونها..ردينا البيت و كان فاضي..
لطيفه: الحمدلله الحمدلله محد فالبيت ...فديتك يا ربي لي نجيتنا
مريم: هههههههههههه..اسميج يا لطووف ديايه
لطيفه: ديايه ولا ديج...اتخيلي لو دروبنا ...ياويلي بيجتلونا
مريم: ههههههههههههههههههه...خليه� � يدرون يعني انتي طالعه مع اخوج و جيه خايفه عيل انا شوه اقول؟؟
لطيفه: مريووووم بس عاد من هالطلعات خلاص انتي حرمه و سعيد ريال شوه بيقولون عنكم العرب بينقدوونكم
مريم: خلي اللي يدري يدري ..و اللي ما يدري ايوطي راسه..ولدي عميه يعني شوه فيها..و بعدين ..
لطيفه: و بعدين؟؟؟ شوه
مريم: ماشي ما شي انتي صغيره على هالسوالف ..سمعي لطوف ان حد تخبرج و ين سرنا قوليلهم عند موزه بنت سالم اوكي؟
لطيفه: لا و الله تبيني اجذب...المعلمه اتقولنا الجذب حرام
مريم: ما عليه لا تجذبين ...انتي قولي انا سرت ويا مريووم و انا بتصرف
لطيفه: يعني انتي بتجذبين
مريم: اووهوووو... ياربي من هالبنت ..ماماتي لطوف نحن ماسوينا شي غلط..رحنا اتكشتنا و ردينا صح ولا لا؟
لطيفه: صح ...بس و الله اني اخاف من اخوج مطوور..
مريم: ماعليج منه انتي لاترمسين اوكي؟
لطيفه: انزين مريم
مريم: يا هي حاله شوه شكلنا اليوم ما بنخلص
لطيفه : انزين اخر سؤال؟
مريم: سألي
لطيفه: ليش سعيد اخويه ما يخاف
مريم: اممممم...سأليه شوه اللي في قلبه؟؟ و بتعرفين ليش ما يخاف
لطيفه: شوه في قلبه بعد دم احمر وشريان الارررررطططررري
مريم: شوه هاذا الاررطرري بعد؟؟
لطيفه: مادري درسونا في العلوم
مريم: خلاص ...انسير نيلس فالصاله انشوف اي شي
لطيفه: يالله
يعني انا كنت مقصه بينهم...او بالاصح شاهد حب..مادري...الطلعات و اليلسات بينهم كانت خطا في خطا..بس وربي الشاهد انه ما بدت زله منهم ...ولا كلمه ...ولا حركه..ولاغلطه..ألين ما صار ذاك اليوم...طلعو سعيد و مريم العزبه رواحهم...و ردوا العصر من دون لا يشلوووني معاهم..و يوم درا مطر عصب ...يالله الشرار يظهر من عيونه ...هـــــــــــدّ على مريم ...الا غسلها غسال...و حرم عليها الطلعات ويا سعيد تحريم..و منعها حتا اذا يا سعيد البيت عندهم انها تطلعله...بصراحه ما ينلام يعني شاب بو 22 سنه يطلع مع وحده19 سنه وين الصح اللي فيها...غلط في غلط..حتا لو ما صار شي بينهم..حتا لو عيال عم ..حتا لو لو لو لو لو ..اتم العادات و التقاليد سيدت الموقف!!!!
مطر: و الله و الله يا مريم ان شفتج ويا سعيد مره ثانيه لا تلومين الا عمرج..و ان يا لا تظهريله
مريم: انزين نحن ما سوينا شي غلط شوه فيها سرنا العزبه بس
مطر: جااااااااااااااب ولا كلمه....نصخج ماريد اسمعه
مريم: شوه هالحااااله...
مطر: مريم...لمثي ثمج دام النفس راضيه...و الرمسه اسمعيها و لا ترا الله بتشوفين شي ما شفتيه
ظهر مطر معصب و رقع الباب و راه و يلست مريم اتصيح.
بعد ما مر كمن يوم اتكلم مطر مع سعيد و لمحله على اللي صار
سعيد: ثرنا شوه سوينا نحن...مطر هاي بنت عميه و اللي ما يرضيكم ما بيرضيني انا قبل ...
مطر: ندريبك انك ريال ...ولا انه في خاطرك شي من صوبها بس يا سعيد ما فينا على رمسات الناس
سعيد: و ليش الناس ترمس اصلا.؟
مطر: بو عسكور العرب اتدور سبب على الرمسه و انته ما يرضيك انه حد يرمس في شرف مريم
سعيد: يخسون الا هم ...
مطر: المهم ...ظهرات مالها معنى طبها...و مريم بنت عمك و العالم كلها اتعرف انها من نصيبك.و انته شله مستعيل ؟؟
++ انتها الوضع بين مريم و سعيد على هالحاله..بعد هالرمسه سعيد ماحب انه يحط مريم في مواقف محرجه مع اهلها ولا حب انه الناس تتكلم على شعره من مريم..فحب انه يبتعد..وسيله الاتصال بينهم كنت انا...تخيلوا كنت مرسال الحب بينهم..مريم تمووت على شي اسمه أصيل ابو بكر و تموت على اغانيه فكانت اتسجل اغاني اصيل على شريط و تعطيني اياهن على اساس اوصلهن لسعيد..و اذكر مره نسيت الشريط اللي عاطتني اياه مريم لسعيد و كانت غنيت اصيل ( أحبك ليه انا مدري) جلسه بصوت اصيل.. و اول ما سألني سعيد و قلتله نسيت ..حشرني حشره و هزبني هزاب..و فهمته انه الاغنيه موجوده فالسوق روح و اشتر الشريط يعني لازم ايكون الشريط من أيد الشيخه مريم؟؟؟!!!! و طرشني بشريط ( ردي الزياره) جلسه بصوت اصيل.. و استمر الوضع على هالحال..رغم كل الظروف رغم كل البعاد تم الحب بينهم صامد ...بالعكس يمكن اقوى..و مادري بصراحه كيف كل واحد كان ايصبر عمره عن شوفت الثاني..مريم كانت اتقولي انها كل عيد تترياه ايي و تترشاني اني اقوله انه يروح سويحان حتا لو ما يكلمون بعض المهم انها اتشوفه..بس سعيد كان يرفض و كان ايقول انه عطا مطر رمسه و هوه ما بيرد فيها...
دارت الايام بسرعه و بعد مرور شهر ... طرشو اهل محمد بن سالم اللي هم اهل أم مريم..على شمسه بنت حمد اللي هيه اخت سعيد...كانوا يبون يخطبون شمسه حق اخو ام مريم( يعني خال مريم)..ماشالله ريال دارس برا و دكتور...شي غريب فالعايله انه يطلع منها دكتور..العيب الوحيد اللي في عبيد خال مريم انه شوي كبير فالسن على شمسه يعني شمسه كان عمرها 19 و عبيد كان عمره 34 ..بس عبيد ريال و ما ينعاب..ريال دارس و بشاهدته و يشتغل في احسن المستشفيات..بالفعل الكل استانس من الخطوبه و كانوا يبون ايشاورون البنت على اساس ياخذون موافقتها و خصوصا عقب ما عرفت انه اكبر عنها ... شمسه رفضت و حاولت منيه مناك بس ما شي فايده حمد ابوها عنيد و اصر انه يوزها رغم كل محاولاتها... و البنت عندها عيال عمه و مايصير ايوزونها من دون لا ياخذون مشورتهم...فالبدايه شمسه كانت راافضه لانه اكبر عنها بوايد..و شمسه البنت العوده اللي في عايلت حمد و شي طبيعي اتحس بالخوف لانها اول وحده بتعرس من خواتها...
حمد: السلام عليكم
بخيته: و عليكم السلااااام ..مرحبا مرحبا ببو سعيد..
حمد: امررحب لاهان ...و شحالج؟
بخيته: بخير الله يعافيك .. و شحالك بو سعيد؟
حمد: بخير و نعمه ...وين اشوفج يالسه اروحج؟؟ و ين البنات عنج عيل؟
بخيته: و الله ميلسه اروحي اجلب هالتلفزيون..و البنات يدرسن عليهن امتحانات ..
و قامت و حطت الدله و ملت الرطب جدام اخوها
بخيته: ها هبش من هالرطب خنيزي اليوم خارفنه عبدالحق من المزرعه
حمد: سلمتي...الله يغربل هالمدراس ما واحن توهن فاتحات و الحينه امتحانات و الله انها نشبه و البنات عقن عمارهن فيها
بخيته: ياخويه شوه بيسون يلوس فالبيت..خلهن يظهرن و يدرسن جاد الشهاده تنفعهن عقب
حمد: لا لا لا ما عندنا بنات يشتغلن يبن الدراسه ما عليه اما الشغل امررره ما بنخليهن..الوحده من اييها نصيبها بيوزها
بخيته: و حليلهن يا خويه بتفرصهن و هن بعدهن صغار؟؟
حمد: شوه بعد نفرصهن...هاي الحياه عيل بتحرسنهن انتي و عفرا طول عماركن...وين عيل عمير و أحمد؟
بخيته: أحمد ساير السوق..و عمير توه هنيه ألحينه بيي؟؟ خير بو سعيد عسا ما شر؟؟
حمد: ما شي شر الحمدلله...ألا شمسه بنتيه طرشو عليها قوم محمد بن سالم يبونها حق ولدهم عبيد..و ما يصير انيوز البنت قبل لا انشاوركم...انتو اهلها و ابدا بها ...جانكم مرخصينها بنيوزها و جان حد من عيالج يباها بنتعذر منهم...هاه شوه قلتي يا ختيه؟؟
بخيته: و الله يا خويه شوه اقولك..دام البنت يا نصيبها نحن ما بنوقف في طريجها
حمد: لا لا ...نحن العرب ألين الحينه ماردينا عليهم شوفي عمرج انتي وعيالج جانكم تبونها ترا أنتو اولى بها و جانكم مرخصينها تراه ....نصيبها ؟؟ شاوري عيالج و ردي علينا ولا تبطين تراه العرب يتريون..
و دش عليهم عمير في هاللحظه ...
عمير: السلااااام عليكم
حمد: و عليكم اسلاااام و رحمة الله ....و توايهو
عمير: شحالك خاليه؟؟؟ عساك بخير؟
حمد: بخير ما نشكي باس...و شحالك
عمير: بخيرو نعمه
حمد: عنبوه وين انتو امررره مالكم شووف ...من كبرتو غديتو ثيران..ماتقولون بنخطف و بنسلم؟؟
عمير: و الله يا خاليه الدوام تراه متا انتفجج منه ...هاذوه من تيينا الاجازه يالله يالله نقضي اشغالنا اللي هنيه
حمد: هييييييه..زين يا بويه و انته متا بتخلص هالكليه..كم باجي عليك؟
عمير: و الله يا خالي هاي اخر سنه...
حمد: هيه زين يا بويه الله يوفجك...و شوه بيخرجونكم
عمير: ان شالله ضباط..
حمد: ابويه ...تراه شمسه بنتيه طرشوا عليها عرب خطاطيب...و أنته ولديه شرات ما شمسه بنتيه..و الريال و نعم جان اتشوف عمرك انته و خوك مرخصينها ترانا بنقرببهم و جانكم تبونها انتو عيال عمتها و اولى بها..شوه الراي؟؟؟ و هالماضووع امره ما فيه زعل ..
عمير: و منوه هم العرب
حمد: محمد بن سالم ال......
عمير: اللي في سويحان
حمد: هيه نعم..شاور عمرك انته و خوك و امك و ردو علينا..و انا يا بويه ما جبركم على البنت ...بس احيده ابوكم سيف الله يرحمه دووم ايقول شمسه هب مرخصينها امرره يباها حقك ولا حق احمد..
عمير: و الله يا خاليه شوه اقولك؟؟
حمد: قوول اللي في خاطرك..و انته مب مجبور تاخذها جان اتشوف نفسك ما لك رغبه فيها
عمير: لا لا يا خاليه..انا شمسه من زمان اباها و لا حطيت في بالي انه حد بيخطبها قبليه ...قلت بخلص ان شالله كليه و بشتغل..و خلاف بنرمسكم فيها..لكن دام يا نصيبها و هيـــ....
و قطح بو سعيد رمست عمير
حمد: و شعنه يوم خاطرك فالبنت ما رمست
عمير: كيف تباني اخطبها و انا ارووحي ماروم اكد على عمريه و انا بصراحه ماباكم اتردونيه..لكن الحمدلله الحينه الوضع احسن و ان شالله اني بشتغل..
حمد و هو يحط ايده على جتف عمير: افاااااا يا عمير..يوم هاي رمستك..جيف انردكم و انتو عيالنا؟؟ و لو تباها شمسه امررره اليوم بنملج لا زهاب ولا صدعه و انتو عيال سيف الله يرحمه قبل لا تكونون عيال اختيه
عمير: تسلم و الله يا خاليه ... بس طالبنك طلبه..انكم اتشاورون شمسه بيني و بين ولد محمد ال.....
حمد: شوه انشاورها بعد ..امرره شمسه من اليوم من نصيبك لاانشاورها ولا غيره...بس عليها يوم بتظويك
عمير: الشيمه يا خاليه لا تغصبون البنت ..خلوها على راحتها
حمد: زين يا ولديه دام هاي رغبتك...و انتي يا ام عمير ما قلتي شي؟؟
بخيته: شوه اقول بعد..ما بحصل احسن عن شمسه حق عمير..شمسه حرمه و كل حرمه اتمناها حق ولدها
حمد:خلاص عيل ...اترخص انا..شِي في خطركم
ام عمير+ عمير: لا سلامتك
حمد: شي ناقصنكم و لا محتايين فلوس؟؟
عمير: طوّل عمرك يا خاليه..الخير وايد و ما شي قصيره
حمد: بخيته اييكم الروشن اللي انطرشه
بخيته: هيه نعم طول عمرك و ما قصرت... يعل خيرك دايم
عمير: يا خاليه لاتعبل بعمرك ما شا الله ريااييل و انروم انسد البيت
حمد: هاذا الواجب ..يالله عيل فداعت الله
عمير+ امه: الله يحفظك
و بالفعل..شاور حمد بنته شمسه و عطاها الحريه في انها تختار بين خال مريم...و ولد عمتها عمير..و بحكم انه عمير ولد عمتها و سنه قريب من سنها اختارت شمسه عمير..و من اهنيه ابتدت المشاكل..احتشرت ام مريم ليش ايردون اخويه؟؟؟ و شوه فيه اخويه البنت ماتباه؟؟!!! اخويه دكتور الف بنت تمناه..و نحن غلطنا يوم بغينا نناسبكم.. و كبرت السالفه و سوت من الحبه قبه...لدرجه انها صارت القطيعه بين العايلتين..بسبت شوه؟؟؟ بسبت عرس؟؟؟ حتا يوم عرست شمسه و خذها عمير ما حضرت ام مريم العرس...و بدت الخلافات تكبر بين العايلتين ..رغم انه شمسه عرست خلاص الا انه كل مره يعيدون فيها السالفه ترد من اول و يديد؟...بس مريم و سعيد ما كانو يعرفون انهم هم الضحيه لمشكله هم مالهم خص اصلا فيها..بعدت ما هدت السالفه و اطمئنت الامور..طلب سعيد من ابوه انه يخطبله مريم..و هوه كان شبه متأكد انه الخطبه مالها اي معنى..مجرد شكليات..او مجرد واجهه لتحديد يوم العرس..استانس بو سعيد بقرار سعيد..و كان متأكد انه مريم بنت اخوه مبارك هيه الانسب حق سعيد..و هيه الوحيده اللي بتحط عقله في راسه ...الكل كان فرحان بقرار سعيد..
++ كــــــيف ما نفرح و نحن انشوف اخويه العود قرر انه يعرس و يستقر..كيف ما افرح و انا اول مره في حياتي حسيت اني بستوي عمه..مادري شعور غريب..كنا انخطط من وين بنتزهبله و كيف و متا...و و و وايد اشياء ..كلنا كنا انحب مريم..فما بالكم بسعيد؟؟؟...تمت الخطبه..و ما توقعنا انهم بيردون علينا وبيقولون بيشاورون البنت ..بس سكتنا و قلنا مجرد شكليات..منوه ما يعرف انه مريم تريد سعيد؟ تريد و بس...الا تموت عليه و على طاريه..بس كانت الصدمه ...و يا مقساها من صدمه علينا نحن قبل سعيد اخويه...رفضونا...و ردوا سعيد..فالبدايه سعيد ما صدق لانه حجتهم انه البنت رفضت؟؟!!!! الكل يعرف انها حجه ..جذبه...سجين حاده انطعنت في صدر اخويه..و ليش رفضته لانه بطالي و ما يشتغل و ما عنده شهاده..اوكي مقتنعين ...كلامهم صح..بس مستحيل مستحيل انه مريم ترفضه..و عرفنا انه هاذا قرار ام مريم قبل لا يكون قرار مريم نفسها..بترفضنا مثل ما رفضت شمسه تاخذ اخوها..!!!!!
كلنا حسينا بالغصه ...مادري شعور كريه ..اما سعيد اخويه حس بعمره انه منبوذ ..عاف حياته و عاف العيشه..عاش و عيشنا معاه في جهنم الحمرا..الله لا يرويكم من ايام عدت علينا..مرات انحسبه شبح ياخذله بالايام ما يظهر من الحجره..و ان ظهر ما يرمسنا يطلع ..مانعرف وين ايسير ..ايغيب بالايام عن البيت..كلنا عرفنا انه اللي في سعيد حاله نفسيه ايمر بها اي شاب و مصيره انه ينسا..
بس المشكله كانت في امايه..عيشتنا حاله من الرعب..عفنا حايتنا...كله هم و خوف ..و كله كووم يوم ما يرد سعيد البيت كووم ..ما انساها يوم اتم اتصيح و اتعق بعمرها على الكرسي فالصاله و تلحف ويهها بالشيله..و اتصيح سعيد..( هاتوليه ولديه...هاتولي ضنايه)....( فديتك يا سعيد فديتك يا بو عسكور وينك مادريبك حي ولا ميت؟؟!!) و كلام من هاذا..حشا كنا انعيش كوابيس من امايه من خوفها المفرط علي سعيد..لدرجه اننا كنا نحس انه سعيد مات؟؟!!!
علاقتنا انتهت بالحب لك الله نسيت من كم عام.. انا ادري انه الامل رمد ماضينا نسانا و نام
بس سعيد سوا اللي ما كان في احلامنا نتوقعه يسويه...بالعكس عقب خمس شهور..طلب سعيد من امايه تخطبله..و اشترط انها ما تكون من العين ...و خطبتله امايه بنت وحده من معارفنا من دبي..اللي هيه حمده..و سجل مسائي في شهادة الثانويه العامه من دون لا يقولنا..و مادرينا الا بخبر نجاحه من واحد من ربعه بالصدفه ..نسبته صح مب عاليه بس ما توقعنا انه يعديها..ما توقعنا انه يدرس!!!...سجل في تقنيت بوظبي..درس فالتقنيه ثلاث سنين بحيث انه اول ما يتخرج يشتغل في ادنوك...و بالفعل هاذا اللي صار..كان يدرس و هو معرس يعني كان مستقر في بوظبي و ايي عند حرمته حمده فالويكند...هاذا هوه شريط حيات اخويه سعيد..مادري هل صدمته برفض مريم له هو السبب في كل هالتغيير...
اللحظه الاقسى في حيات سعيد...قبل عرسه بأسبوعين...شل سعيد بطايق العرس و طلع من البيت ..سار بيت عمي مبارك...دش سعيد البيت هوّد بس محد رد عليه
سعيد: وين ماماه؟
البشكاره: ماماه مافيه ..سير بيت حورماه تاني؟
سعيد: ماماه مريم فيه منيه؟
البشكاره: صبور انا بسير شوف؟
دش سعيد و يلس في الصاله...لقا دلة القهوه نش و صب لعمره فنيان و هوه يالس يشرب..دشت عليه روحه.دشت عليه اللي كانت رووح قلبه..نصخه..حس بطعنه قويه..
عسا ما يرجع لي خيالك يا حبيب الامس.. منين اعطيك اشواقي اذا قلبي طواه اليأس
++ اخ يا قلبي..مادري شعور كريه..تحس بشي يعصر قلبك..حد ماسك ايديك ..تريد اتسوي شي بس مب قادر..اخيس شعور هوه شعور الضعف..شعور اتحس فيه انك مظلوم بس ما تروم ترفع الظلم عنك..و دوامه اتدور في راسه: البنت رفضتك..البنت رفضضتك..رفضتك
مريم: السلام عليكم
سعيد: و عليكم السلاااااام و الرحمه...شحالج مريم؟
مريم: بخير الله يعافيك ..و من صوبك؟
سعيد: يسرج الحال..
مريم...كان قلبها يتقطع قطعه قطعه...
++ يا ربي ليش ؟؟؟ انا شوه سويت في هاذي الدنيا عشان اتعاقبني جيه..و الله اني احبه..و مانسيته ...سعيد حبك في قلبي ...اتعرف ولا لا ...كلام يطلع من عيون مريم ...كلام يعذب ..كلام الطير اللي مذبوح...بسجين محبوبه..بس اللي اشوفه في عيون سعيد شي مب طبيعي..شي غريب..الكره ...الحقد..مادري احس انه ايشوفني بطريقه احتقار..سعيد ..الغالي ارجوووك..كله ولا هالنظره ..تراني ما اقهر منك اي شي..حبيبي..و الله و الله ..اني احبك..و روحي تفداك
سعيد: مريم هاذيلا البطايق وزعوهن على معارفكم..شي منهن عليهن الاسماء..و اللي ما عليه طرشوه لعربانكم
مريم: بطايق شوووه؟
نش سعيد و طلع بطاقه من الكيس...و فرها بقو عدال مريم و ظربت في ايدها...استغربت مريم ...معقوله هاذا سعيد اللي اعرفه..مستحيل هاذا شكل سعيد بس ابد مب هوه ..مب سعيد اللي اعرفه..شلت مريم البطاقه و قرت مكتوب عليها أفراح ال.....، فجتها و طاحت عينها على
" تتشرف عايلت حمد بن سلطان ال......، بدعوتكم لحضور زفاف نجله سعـــــــــــــــــــــــ ــــيد على كريمت ...."
قرت مريم البطاقه مره و مرتين و ثلاث...
++ عايلت حمد بن سلطان هاي مفهوومه هاذا عمي ...بس نجله سعيد؟؟؟منوه...معقوله سعيد اللي جدامي...سعيد روحيه و غنات فواديه..سعيد اللي اشوف الحب في عيونه من يوم انا يااااهل ..لا لا لا مب معقوووله!!!!!
سعيد: اقول مريم لا تنسين تحضرين ...بــيــيب أصيل بوبكر ايزف العرووس و انا احيدج اتحبينه.. بخليه ايغنيلج ( احبك ليه انا مدري) جيه على الهوا مباشره لا تفوتينه..و نش سعيد من على الكرسي و سار صوب الباب
يالله ورايه خط العين ..فداعت الله
و ظهر سعيد من حيات مريم...ظهر و خلى وراه جرح ما يبرا... خلى حب ينبض في قلب انسانه ما فكرت في يوم من الايام انه حبها الكبير ممكن ايموت بهالطريقه..اتوقعت الاسوء..خصوصا بعد ما ضغطت امها عليها بأنها ترفض سعيد..بس هيه ما استسلمت..بس منوه اللي يسمع شكواها..من اللي يسمع رفضها..منوه يخبر سعيد بللي في قلبها صوبه..منوه يخبره بكل الحب اللي قلبيه..منوه يخبره بشووه احس... بالمووت يا سعيد اتعرف الموووت...ليش يا سعيد انا شوه ذنبي...ذنبي اني حبيتك..ليش ليش ليش...؟؟؟؟
لا يجمعنا لا موعد ولا فرحه ولا احلام..و لا يمكن في يوم انا نتلاقى مع الايام..لكن ذا قدر عمري