[اسطورة !]

مشى عبدالعزيز بخطوات تايهه في ممرات المستشفى .. يسأل عن اخوه
عبدالعزيز: السلام عليكم اختي
الممرضه: عليكم السلام .. شلون اقدر اساعدك ؟
عبدالعزيز: ابغي اشوف جاسم محمد
الممرضه وادور في سجلاتها: جاسم محمد .. عمره 8 سنوات
عبدالعزيز: اي .. هاي اخوي
الممرضه: بس اسمحلي اخوي هالمريض الدكتور مانع عنه الزيارات 24 ساعه .. بكره المغرب تقدر تشوفه ..
عبدالعزيز بتوسل وعيون حزينه: تكفين خليني اشوف اخوي .. بدخل بروحي محد معاي ..
الممرضه: اسفه اخوي .. هاي اوامر الدكتور .. بس اللي اقدر اسويه اني بفتح لك ستارة الغرفه وشوفه من الجامه .. هاي اللي اقدر اسويه لك ..
عبدالعزيز استسلم: امري لله .. جزاج الله خير .. بس اكحل عيوني بشوفة اخوي .. مشى ورا الممرضه لين الغرفه وشاف اخوه بس حس المسافه اللي بينهم بعيده بالرغم من انها قريبه ما تتعدى المترين .. بس حالة جاسم ماتسر دمعت عيون عبدالعزيز وهو يتأمل جاسم المرح اللي مسوي لهم جو بالبيت ..
عبدالعزيز وحاط ايده على زجاج الجامه: جسوووم ... الجسمي قولي من بيقعدني للصلاة كل يوم .. من بيقعدني للدوام ,, منو اللي بنقوله فديت طولك .. جسوم الغالي احس الكون كله كبير عليك .. فديت قلبك يا جاسم الله يقومك لنا بالسلامه .. يالله السرير كبير ولا هو صغيرون .. الله يعين امي وخواتي .. شلون برجع البيت من دونك .. سكت وتم يتأمل جسم اخوه الممد على السرير والوايرات في جسمه الصغير .. طالع ريوله المغطيه باللحاف .. وايده الصغيره اللي بوفارس دوم يبوسها .. يا قلبك يا يبه .. جاسم هو المفضل عندك .. يا رب تكتب لاخوي جاسم عمر ثاني .. يا رب العالمين امين .. مسح دموعه ورجع ادراجه لغرفة الانتظار وقف عند الباب يناظرهم .. راح عند ابوه بدون ما يحس بنفسه وهو يصيح مثل الطفل وتم في حضن ابوه .. وبوفارس حضنه وتم يصيح معاه

وصل فارس البيت ونزل امه واخته ونزل معاهم عشان ياخذ له شور سريع ويرجع المستشفى .. وكان في استقبالهم ايمان وفاطمه بدموعهم .. ارتمت ايمان في احضان امها واختها مريم وتموا يصيحون .. دخلوا داخل وفاطمه كانت واقفه عند باب الصاله تنتظر فارس يقولها عكس الكلام اللي سمعته .. شافها فارس وحضنها لصدره بقوه ..
فاطمه: فارس قولي جاسم يبجي مع ابوي وعبدالعزيز .. قولي
فارس: اذكري ربج يا فاطمه ..
فاطمه بصراخ: لالالالالا .. اخوي راح .. جاسم راح .. شمعة البيت انطفت ..
فارس: فطومه حبيبتي .. ادعي له الله يشفيه ... انتي اقوى من هالدموع .. فطوم حبيبتي انت اقوى ..
قامت فاطمه ادز فارس وتضربه لا شعوريا: اكرهك .. اكرهك .. ليش تقول جي عن اخوي .. ابي اخوي .. ابي جاااااااااااااااسم .. لا لا لا لا
فارس مسكها من كتوفها بقوه: حياتي انتي فطوم .. ارجوج اهدي .. انتي الكبيره لازم تكونين اقوى وحده بين خواتج .. قعد على الارض واخته في حضنه حضنها وتم يمسح دموعها ويمسح على شعرها ويهديها .. غمضت عيونها وهي ماسكه اخوها بكل قوتها .. لما هدت فاطمه شلها فارس وخذها لغرفتها .. حطها على السرير ولحفها وتطمن عليها وطلع من الغرفه .. راح يتطمن على باقي خواته وامه .. وشاف ان مريم متماسكه اكثر من فاطمه كانت قاعده مع امها تواسيها وتصبرها .. اما ايمان وايد تأثرت بس ماتبين مشاعرها للغير كانت وايد هاديه .. وصاحت في غرفتها عشان محد يشوف دموعها .. تذكرت انها كانت دوم تهاوش جاسم وهو يموت فيها ويسامحها وكان يدور رضاها ويدافع عنها لو كانت بعد غلطانه .. تمنت لو الزمن يرجع ورا وتغير اللي صار .. تمنت لو ماكانت تهاوشه تمنت لو ما شافت دموعه لما تهاوشه ..
ايمان: ليتني ما هاوشتك يا جسووم .. انت اكبر قلبي فالبيت .. ياليت الزمن يرجع ورا بس عشان اصحح غلطاتي .. فديت قلبك يا جاسم .. وقامت تصلي ركعتين وتدعي لاخوها ... و وعدت نفسها انها ما نزعل جاسم ولا تخلي اي حد يزعله .. فتح فارس باب غرفتها وشافها رافعه ايدينا للسما وتدعي .. سكر الباب بهدوء وراح خذ له شور سريع وطلع الصاله وشاف ايمان قاعده
ايمان: هلا فارس
فارس: اهلين .. زين حبيبتي ما وصيج على فطوم لانها منهاره .. ديري بالج عليها
ايمان: انشالله .. وارجوك فارس طمنا اول ماتوصل
فارس قام ومسح على راح اخته: انشالله حبيبتي
وصل المستشفى ولقى الكل على نفس الحال .. مثل ما تركهم لقاهم .. سلطان دخلوه غرفه عشان يرتاح عطوه مهدء وخالد قاعد عنده .. فاضل مغطي ويهه بيدينه ... وعبدالعزيز في حضن ابوه ..
محمد يمشي في غرفة الانتظار مو قادر يقعد من التفكير .. وبومحمد كان يصلي ..

كان يركض بحريه في جنه خضراء والنهر يجري من حوله .. والاشجار المثمره والخير والجو الحلو .. قعد على العشب الاخضر يتأمل الطبيعه ويتفكر في هالجمال الرباني .. استلقى على الارض وحط ايدينه ورا راسه يطالع السماء الزرقاء والغيوم البيضه .. وفجأه شاف واحد واقف على راسه يطالعه ويبتسم .. اعتدل في قعدته وقعد الشخص جنبه ..
جاسم: انت مين؟
الشخص: شو رايك بالجنه ؟
جاسم: ما احلاها .. روعه
الشخص: شفت هالمراعي والجبال والانهار والجو الحلو ..
جاسم: اي ماشالله ... شي ماعرف كيف اوصفه
الشخص: شو اسمك؟
جاسم: اسمي جاسم .. وانت ؟
الشخص: والنعم يا جاسم .. وانا اسمي عبدالرحمن
جاسم: والنعم ..
عبدالرحمن: جاسم .. تدري انا من متى هني ؟
جاسم: من متى ؟
عبدالرحمن: من 9 سنين ..
جاسم: زين و اهلك وين؟
عبدالرحمن: هلي هناك .. واشر له بعيد في الافق .. بس جاسم مافهم قصده
جاسم: زين ليش ما تروح لهم ..؟
عبدالرحمن: هني مرتاح
جاسم: ما تشتاق لهم .. وتم يفكر شوي وبعدين رد عليه .. انا اذا ما شوف هلي وخصوصا ابوي ازعل واتضايق .. شلون عيل انت من 9 سنين ما شفتهم ؟
عبدالرحمن اكتفى بابتسامه .. وجاسم احتار من كلامه .. بعد فترة صمت
عبدالرحمن: جاسم شو فيها ريولك ؟
جاسم: بالغلط دش فيها الرمح
عبدالرحمن: سلامات .. الحين تعورك ..
جاسم: الحين ماحس بألم .. ماتشوفني امشي عادي .. بس اول مادش الرمح تعورت ونزل مني دم وايد ..
عبدالرحمن ميبتسم: ما تشوف شر يا جاسم .. زين الحين انت روح عند هلك وانا بروح في دربي
جاسم: انشالله .. بس انت طيب يا عبدالرحمن .. ليش ماتجي معاي اهلي وايد طيبين ..
عبدالرحمن حط يده على كتف جاسم وابتسم: انت اللي طيب يا جاسم .. واعرف ان اهلك طيبين مثلك بس لازم تروح عند اهلك انت .. الله يحفظك
جاسم: مع السلامه ..

فتح عيونه بتثاقل .. حس ببروده في جسمه .. وكان يشوف ضباب قدام عيونه .. ما قدر يميز الاشكال شاف ضلال وحاول يركز عليه .. بس ماقدر يميزه .. فجأه حس بقطرات دافيه على خدوده .. سمع شخص يهمس قريب من اذنه .. فديت عيونك اللي فتحتها .. الحمدلله رب العالمين .. يا نظر عيني يا بعد كلي فديتك يا جاسم .. جاسم من سمع حس ابوه ابتسم له و وضحت الرؤيا جدامه وكحل عينه بشوفة ابوه .. اللي يحبه واللي دموعه دفت خدوده ..
جاسم بتعب: ابوي .. حبيبي يا ابوي ..
بهدوء حط بوفارس صبعه على فم جاسم عشان ما يتكلم .. وباسه على جبهته ..
بوفارس: يا عيون وحياة ابوك انت .. لا تقول شي ارتاح يبه .. دخل عليه فارس وماصدق اللي يشوفه .. قرب من السرير ومسح على راس اخوه بعدين سجد وتم يصيح ويحمد ربه على سلامة اخوه
فارس وهو ساجد ويصيح: الحمدلله رب العالمين .. احمدك واشكرك يا رب على سلامة اخوي جاسم .. ورفع راسه وتم يصيح من الفرحه
اتصل بوفارس البيت: السلام عليكم
ايمان: هلا بابا
بوفارس: حياة بابا انتي .. يلا تعالوا المستشفى .. اخوج قعد بلغي امج والباقي .. وتم يصيح
ايمان تصيح: وااااو بابا جاسم قعد فديته .. الحين بطير فوق .. وسكرت من ابوها اللي معور قلبها لان لها 5 ايام ما شافته دومه مع جاسم بالمستشفى ..
ايمان: هييييييييييييي ... ماما .. فطوم ... عزوز .. مريامي ... الحقوا
عبدالعزيز طلع من الغرفه متخرع: هاا شو صاير ؟ ومسك ايمان وهي تركض صوب غرفة امها .. تعالي شو صاير ؟؟
ايمان: الجسمي وتاخذ نفس .. قام الجسمي قااااام .. بابا توه متصلي يقول تعالوا .. وركض عبدالعزيز قبلها لغرفة امه يبشرها ويطمن قلبها ... كانت ام فارس قاعده تقرى قرآن
عبدالعزيز: امي .. الغاليه حطي عباتج على راسج .. تعالي اوديج تكحلين عيونج بشوفة جاسم الغالي وارتمى في احضانها يصيح من الفرحه ..
اما فاطمه ومريم وايمان انضموا لعبدالعزيز في حضن امهم .. وام فارس تصيح معاهم من الفرحه .. راحوا المستشفى وام فارس بخطوات سريعه تمشي تبي توصل بسرعه..
عبدالعزيز: الغاليه شوي شوي لاطيرين ...
فاطمه تضحك: عزوز .. اسكت عن امي ...
مريم: واااي فديته جسوم .. الحمدلله على سلامته
ايمان وتمسح دموعها: اي والله الحمدلله على سلامته .. ماما انا لو منج اركض مو امشي بسرعه بس
ضحكت عبدالعزيز: ايمانو لسانج يبيله قص
ام فارس تضحك: الله يقطع سوالفج يا ايمان
وصلوا الغرفه .. وام فارس ترددت فالبدايه انها ادش .. بس عبدالعزيز فتح لها الباب ولما دشت شافت جاسم في حضن ابوه والدكتور يفحصه ويسولف معاه .. تلاقت عيونها بعيون جاسم وغصبن عنها نزلت دموعها ..
ام فارس: السلام عليكم
بوفارس+ الدكتور+ فارس: عليكم السلام .. وقام باس امه على راسها
فارس: تستاهلين سلامة الغالي ..
ام فارس تحضن ولدها: الله يسلمك .. كلكم غالين عندي .. فديتكم الله لايحرمني منكم .. مشت عند السرير وشافت الجسمي يطالعها ومبتسم .. وعلى طول فتح ذراعينه لها .. قربت منه وحضنته بدفى وحنان وتمت تبوس جاسم وتقرى عليه ..
ام فارس: مو مصدقه عيوني .. فديتك يا جاسم الحمدلله على سلامتك .. يا عمري والله .. وتمت تصيح وحاضنته
ام فارس: ها يبه شو يعورك ؟ اشوه ريولك .. ما تتألم منها ؟
جاسم وخانقته العبره: امي ... سكت وحضنها .. وهمس في اذنها .. وحشتيني يمه لا تخليني .. ابيج ابيكم كلكم .. والله احبكم وماستغنى عنكم
ام فارس: عيون يمه انت .. انا هني ماخليك بروحك .. ابوك وخوانك وخواتك هني مانخليك يبه .. وكانت ام فارس مستغربه من كلامه ..!!
فاطمه حضنت جاسم: حبيبي جسوم ... الحمدلله على السلامه ..
جاسم مبتسم وحاضنها: الله يسلمج فطومه وحشتوني .. آآآآه
مريم: فطوم بسج ابي ابوس اخوي ..
بوفارس يضحك: ههههههه وحليلكم يا بناتي .. وكان مستانس على لمة عياله وسلامة جاسم
مريم: جسوم .. فديتك يالنتفه .. الحمدلله على سلامتك
جاسم: الله يسلمج مريامي .. والله احبكم اموت فيكم .. وام فارس متعجبه من كلام ولدها ..
اما ايمان اللي كانت متوتره: جاسم .. وتمسح دموعها .. فديتك
جاسم يصيح: ايماني .. حبيبتي .. وحضنها وتموا يصيحون ... فارس ماتوقع حب جاسم لايمان مع انها دوم تهاوشه ..
ايمان: سامحني يا جاسم والله ما رفع صوتي عليك .. سامحني ياخوي .. الكل استغرب من كلام ايمان
جاسم يصيح: والله مازعل منج .. وبهمس يكمل .. انتي اكثر وحده احبها ..
ايمان: فديت اخوي والله .. وانا اموت فيك يا جسوم
مسحوا دموعهم وجى دور عبدالعزيز: الحمدلله على السلامه بوالشباب ..
جاسم: الله يسلمك عبدالعزيز ..
عبدالعزيز: طالع لي فيها مأدب .. او انك
جاسم: فديتني انا الادب كله ... وانتوا وارثين هالادب عني ..
عبدالعزيز والكل: هههههههههههههههههه
دخل الدكتور وطلب يشوف بوفارس برا الغرفه ..
في هالاثناء .. فاطمه التفت لفارس وتلاقت عيونهم .. وعلى طول نزلت عيونها ... فارس استغرب من اخته ..
فارس: فطامي .. شو فيج ؟
فاطمه ومنزله راسها: تعال فارس ابيك برا شوي ...
ايمان بغلاسه: اوه فارس او مره بتعرف شي احنا منعرفه هههههه
الكل: ههههههههههههههه
فارس: صج والله ... تستخفين دمج يعني ..
ايمان: روح فطامي تنتظرك عند الباب .. ولاتفوتك السالفه
فارس ويدز راسها: حسابج معاي بعدين
ايمان: ههههههههههههه
برا الغرفة فاطمه تنتظر فارس ...
فارس: هلا فطامي .. شو فيج ؟
فاطمه منزله راسها: فارس .. انا ... وسكتت ..
فارس: فطوم .. شو فيج ؟
فاطمه وتمسح دموعها: فارس انا اسفه ..
فارس مستغرب: اسفه .. على شو تتأسفين ؟
فاطمه: لاني قلت اكرهك .. وهاوشتك .. وعصبت عليك بشي مالك ذنب فيه ..
فارس ويطالع اخته بحنان: فطوم انتي تدرين شكثر انا اموت فيكم .. يعني مستحيل ازعل منج .. وكنتي في حالة غضب وانا مقدر هالشي .. فديتج مازعل يا اختي .. مسحي هالدموع .. تراها غاليه
فاطمه مبتسمه: فديتك يا فارس .. والله كنت وايد متضايقه من نفسي .. شلون سمحت لنفسي اني امد ايدي عليك .. واصرخ ... آآه يا فارس
فارس: عيون فارس .. ولا يهمج .. بس بسألج فطوم ..
فاطمه: هلا ..
فارس: انتي تشيلين حديد ؟
فاطمه باستغراب: ها ؟ ليش ؟
فارس بعبط: كسرتي ضلوعي وانتي تضربيني ههههههههههه
فاطمه بدلع: فاررررس ...
فارس: فديت الدلع انا ..
فاطمه منحرجه: ما اتدلع انا ..
فارس: اللي بياخذج بيموت على دلعج فطوم
فاطمه بتموت من الحيا: ........................
فارس: فديت اللي يستحون .. يلا نروح داخل لا تنبط اذن اختي وهي تتسمع عند الباب
فاطمه: من؟
فارس: ايمانو تتصوخ الكلام .. وتعيب علي تقولي اموت لو ماعرفت السوالف ..
وكانت ايمان وافقه وحاطه اذنها عند الباب .. واول ماحست انهم بيدخلون ... ركضت عند امها او انه السالفه مو لها كلش
فارس: شو لقطتي من السالفه ايمانو
الكل: ههههههههههههههههههههههههه هههههههههه
نرجع لبوفارس مع الدكتور ..
الدكتور: الحمدلله على سلامة غاليك يا بوفارس
بوفارس: الله يسلمك الفضل يرجع لرب العالمين ولكم يادكتور ..
الدكتور: والنعم بالله ..
بوفارس: متى بترخصون الولد ؟
الدكتور: بنخلي جاسم عندنا كم يوم يرتاح .. ونكمل له نقل الدم ..
بوفارس: انشالله .. احسنت يادكتور .. وجزاك الله خير
الدكتور: الله يسلمك ..
بوفارس: من رخصتك ..
الدكتور: مع السلامه
رجع بوفارس غرفة الجسمي .. ولقى الكل تجمع عنده .. اخوانه وعيال عمه .. استانس بوفارس على لمتهم .. وحمد ربه على سلامة الجسمي .. راح يصلي ركعتين شكر لربه على سلامة ولد .. وهو طالع من المصلى .. شاف امه وابوه واخته هيا
بوفارس: هلا والله بالغالين
الجد سلطان: هلا والله بوفارس .. تستاهل سلامة الصغير
بوفارس ويحب ابوه على راسه: الله يسلمك .. الفضل لرب العالمين .. وباس امه على راسها ويده ..
الغاليه ليش متعبه عمرج .. الله يهديج
الجده: لا تعب ولا غيره ... هاذي الغالي ولد الغالي ..
بوفارس: لا هنتي .. الغاليه على راسي والله
هيا وتسلم على بوفارس: الحمدلله على سلامة الغالي يا خوي ..
بوفارس: الله يسلمج
دخلوا بوفارس وامه واخته وابوه الغرفه .. وشافوا الحشره اللي فيها ..
الجد: حيالله ذا الولد النشمي .. القرموش .. وباس جاسم على جبهته .. وسلمت عليه جدته ..
اما هيا استقبلته بدموعها .. لان جاسم المفضل عندها .. وتموت فيه
هيا: واي فديت هالشوف .. وفديت هالعيون .. الجسمي ويهك منور يا فديت ويهك ...
جاسم بفرح: عميمه حبيبتي .. وحضنها وتم في حضنها مو راضي يبتعد عنها .. ومغمض عيونه جاه احساس غريب ... تذكر عبدالرحمن اللي شافه في منامه وقعد معاه .. بس مو عرف ليش عميمه هيا ذكرته فيه .. ؟
هيا: حيبي .. اخبار ريولك تعورك ؟
جاسم: اي شوي ... بس الحمدلله
هيا وتبوس ريوله اللي تعوره: مووح .. سمالله عليك
جاسم: الحين ماتعورني ...
فارس: جسوووم لوتي بعد
الكل: هههههههههههههههههههههه
هيا: فديته خلوه ..
جاسم يتدلع: عميمه .. هاوشي فارس
فارس: يالله عليك .. دلوع
هيا: فارس .. تعال اهاوشك .. لاتقول عنه دلوع .. وبعدين وش لك فيه .. خله يدلع ..
فارس: ياختي عليك الجسمي ... دلوع انته ..
هيا وتضرب فارس على كتفه: لا تعيب على ولدي فديته ..
فارس: اي عميمه .. هاي كله عشان هالنتفه ..
جاسم وبابتسامة نصر: هههههههههه عميمه ضربتك .. تستاهل
وهني نقزت ايمان: اوعى يا فارس .. لا تهاوش الجسمي وتغربله .. ترا تعرفني ..
الكل: ههههههههههههههههههههه
فارس او انه زعلان: محد يدافع عني .. شعليك الجسمي .. الحريم كلهم صوبك ..
فاطمه: عاد كل شي ولا فارس .. ترا ماعرفتوني ..
مريم: اي الا فارس عاد ...
ايمان: خفوا علينا عاد ..
بوفارس مسك ايمان من رقبتها: ملسونه ...
جاسم: لا ابوي لاتعورها عاد ..
ام فارس: فديت اللي قلبه على اخته
وتموا يسولفون ويضحكون .. والتفت فارس على اخته فاطمه وطاحت عينه على الريم بنت عمه .. لقاها سرحانه فيه .. استغرب وصد عنها .. وهي حست ان فارس انتبه لها .. وانحرجت .. هي ماعرفت ليش سرحت فيه .. ودخل عليهم سلطان
سلطان: الريم .. بنات عمي .. مرت عمي .. ايديده .. لو سمحتوا روحوا استراخة الحريم .. احمد بيدش يسلم على جاسم ..
فاطمه والبنات ضحكوا عليه: انشالله .. وفاطمه تموت على سلطان لما يسوي جي ..
دخل احمد .. وسلم على جاسم وقعد مع الشباب .. وفارس يطالع احمد بفخر .. ماشالله عليه .. راعي واجب .. الله يكمله بعقله انشالله ..

*****************

وهذا باااااااااارت طوووووويل
****************************

قعد جاسم في هالغرفه يومين وبعدين انقلوه في غرفه مع واحد ثاني بينهم ستاره .. وهالغرفه المشتركه يسمونها غرفة النقاهه والعلاج .. يرتاح فيها المريض لمده معينه ولازم يكون معاه مريض ثاني عشان نفسية المريضين ترتاح ..
بوفارس: ها يبه مرتاح هني ؟
جاسم: اي ابوي .. الحمدلله
بوفارس: تبي اكلم الدكتور يوديك غرفه بروحك ..
جاسم: لا ابوي الغرفه هني زينه .. الدكتور قالي لازم يكون معاك مريض ثاني عشان نفسيتك ترتاح
بوفارس: اللي تشوفه يبه ..
الشخص اللي كان مع جاسم بالغرفه اسمه تركي عمره 25 سنه .. مسوي حادث وانكسرت ريله .. وبقى له كم يوم ويطلع .. تعرف على جاسم واهله ..
تركي يفتح الستاره: السلام عليكم
برفارس قام من مكانه يفتح الستاره كامله: هلا يبه .. وعليكم السلام
جاسم: عليكم السلام ..
تركي: شخباركم .. انا تركي ..
بوفارس: والنعم يا تركي .. انا محمد بوفارس .. وهذا جاسم اصغر عيالي
تركي: تشرفنا الغالي .. شحالك جاسم ؟
جاسم منحرج: الحمدلله طيب .. وانت علومك
تركي: يسرك الحال .. عسى ماشر يبه .. وش جابك المستشفى .. وبوفارس كان مستانس ان جاسم يتكلم مع تركي بحريه .. بالرغم انه باين عليه انه مستحي ..
جاسم: كنت اشيك على فرد الصيد .. وبالغلط دش الرمح في فخذي
تركي: لا حول الله .. ماتشوف شر عساك اشوه الحين ..؟
جاسم: اي الحمدلله .. جاسم كان يبي يسأل تركي عن سبب دخوله المستشفى بس كان مستحي
بوفارس شاف جاسم وضحك: وانت يا تركي يبه .. شو جابك ؟
تركي: مسوي حادث وانكسرت ريلي
بوفارس: الله هديكم يالشباب
تركي منحرج من بوفارس: قضاء وقدر ياعمي
جاسم: شلون سويت الحادث ؟
تركي: كنت دايس وطلعت سياره في ويهي .. ولفيت بدون ما سوي بريك وقلبت بس الحمدلله جات في ريلي ..
جاسم: شو كان شعورك وانت تنقلب ؟ شو اللي حسين فيه ؟
تركي: حسيت ظهري في بطني .. وخشمي في رقبتي .. حالتي حاله .. حسيت جسمي تلخبط على بعضه .. كرهت نفسي .. الحمدلله على كل حال .. بس تعلمت الدرس .. في هالاثناء دخل عليهم يوسف صديق تركي ..
يوسف: السلام عليكم
الكل: عليكم السلام
تركي: هلا يوسف .. ما بغيت توصل .. تاخرت وايد
يوسف: اسمح لي زحمه برا .. مادري شصاير ؟
تركي: بعد شصاير .. دروا انك جاي لي قالوا نسوي له درب
الكل: هههههههههههه
تركي: يوسف اعرفك بجاسم وبوفارس
يوسف ومد ايده سلم عليهم: هلا بوفارس شحالك ؟ وسلم على جاسم .. مرحبا جاسم .. عسى ماشر
بوفارس: مرحبا يبه ..
جاسم: دش الرمح في فخذي .. وقاله اللي صار
يوسف بحنان ومسح على راس جاسم بحنان: ما تشوف شر يبه .. انت صغيرون وش لك بهالعباله ؟
جاسم: كنا بنروح نصيد
يوسف: ولا يهمك .. تطلع من المستشفى وانا اعلمك الصيد على اصوله ..
جاسم بفرح: والله .. ابوي شو رايك؟
بوفارس: فالك طيب .. بس تاخذ سلطان واحمد معاك
جاسم بصوت واطي: فشله .. اخاف الريال ما يرضى
يوسف او انه ما سمع جاسم: جاسم شاور ابوك ورد علي وانا مستعد اوديك اي وقت
بوفارس: ولا يهمك .. انت باين عليك ولد ناس عرفوا يربون ..
يوسف مبتسم: من طيب اصلك يا عمي .. جاسم بناخذ سلطان واحمد معانا
جاسم وحد ايده على فمه: ووووي سمعني .. فشله
الكل: ههههههههههههههه
تم بوفارس يسولف مع تركي ويوسف واستانس على يوسف وايد ..
بوفارس" هاليوسف يدخل القلب .. ويهه منور .. ماشالله عليه ذرب ومحترم .. " في هالاثناء دخل عليهم عبدالعزيز وشاف اليلسه شي ..
عبدالعزيز: السلام عليكم ..
الكل: وعليكم السلام
باس ابوه واخوه .. وسلم على تركي ويوسف وبوفارس عرفهم على بعض
عبدالعزيز: مرحبا تركي .. سلامات عسى ماشر؟
بوفارس: طيش شباب .. هو انكسرت ريله يا عبدالعزيز
عبدالعزيز: قضاء وقدر يا بوفارس ..
تركي: هههههه ايوه قضاء وقدر ..
يوسف كان يطالع عبدالعزيز وقلبه يدق بسرعه .. يالله شو هالعيون .. اليد .. الحركات .. يالله
قطع عليه تفكيره عبدالعزيز: شحالك يوسف؟
يوسف مرتبك: اهلين يسرك الحال .. وانت اخبارك؟
عبدالعزيز يطالع عيون يوسف: طيب الله يسلمك
تموا عبدالعزيز ويوسف يناظرون بعض فتره .. والباقي مو منتبهين لهم
" يا ترى شو سر هالنظرات .. و شو قصد يوسف لما تفكر في ملامح عبدالعزيز؟ "

في بيت بوفارس .. فارس نازل من فوق ينادي امه وخواته ..
فارس: امي .. امي .. امي .. يلا تاخرنا ..
ام فارس في المطبخ تجهز لجاسم الكيكه اللي يحبها: ها يمه .. اصبر شو وراك ؟ اصبر الله يرضى عليك
فارس: اوهووو ... للحين ما جهزتي .. يلا تاخرنا
ايمان: شو فيك ياخي .. خل ماما على راحتها
فارس: امرنا لله .. بننتظر شو رانا غيركم ..
ايمان قعدت جنب فارس: فارس توديني المجمع فالليل .. لازم امر اخذ عبايتي .. لانها جاهزه في المحل ..
فارس: شو فيها عبايتج .. زينه
ايمان: اي هاي زينه بس ...
فارس: درينا .. هاي لزوم الكشخه
ايمان: ههههه ماشالله عليك تفهمها وهي طايره ..
فارس: اي اكيد افهمها لكن لي بغيت اعرف السوالف ما فهمها صح ..
ايمان تضحك: ههههههههههه اما في هاذي صج ماتفهمها ..
ودخلت مريم: صح كلام ايمان ههههههههههه
فارس: ايوه تجمعوا علي البنات حق التقطع .. وينك ياعزوز تنقذني انت وخلود وحمد .. وينكم ؟
مريم تغير لونها من نطق فارس اسم خالد .. سرحت ..
ايمان: مريامي .. هالو
فارس يسحب شعرها ..
مريم: آآآي شو فيكم ؟
ايمان + فارس: ههههههههههههه
فارس: خربنا الكشه ..
مريم: اففف منكم .. وتمت تحذف عليهم المخدات .. وتموا الحبايب يلعبون ويضحكون لين قطع عليهم جوال فارس الوناسه
فارس: صبروا شوي ... مرحبا
......... : مرحبتين
فارس: من معاي ؟
........ : انت فارس ؟
فارس طالع خواته وقام عنهم يتكلم في الحوش
مريم وايمان طالعوا بعض ...
ايمان: منو يكلم ؟
مريم: تحسين تغير ويهه ؟
ايمان: اي صح
مريم: ليكون اخوي يحب ؟
ايمان: لا مستحيل .. لو يحب كان شفتيه هيمان مثل خالد ولد عمي .. كله يفكر وفي عالم ثاني
مريم انصدمت من كلام ايمان ... خافت انها تعرف شي
مريم بخوف وربكه: شو فيه خالد ؟
ايمان: مريوم شوفيه كله مسبه وسرحان .. يقعد معانا بس عقله بمكان ثاني .. باين عليه الحب .. يا ويل حالي على ولد العم
مريم " يعني انا الغبيه من بينهم .. كلهم ملاحظين هالشي الا انا .. شو انا ماعندي احساس" .. افففف تضايقت مريم من نفسها وفضلت السكوت ..
ايمان: مرايم .. فكرج فارس من يكلم ؟
مريم مغمضه عيونها: ..............................
ايمان: مريوم خلج معاي
مريم على نفس الحال: ايمانو سكتي عني ..
ايمان: شو فيكم اليوم .. شكلكم كلكم تحبون فهالبيت .. وقامت من مكانها ..
مريم فتحت عيونها .. وتمت اطالع اختها لين اختفت في نهاية الممر .. استغربت وشكت في نفسها
دخل عليها فارس و ويهه متغير .. حست فيه مريم
مريم: فارس شو فيك ؟
فارس ويتنفس بصعوبه: ولا شي .. بس قومي اعتدلي في قعدتج
مريم: شوفيها قعدتي زين ؟ .. وكانت شبه منسدحه
فارس: يا بنت قومي .. سمعي الكلام
اعتدلت في قعدتها وهي مستغربه من اخوها
مريم: فارس شو مضايقك ؟
فارس بهدوء: اسف مريم .. بس هالمكالمه اللي جاتني قلبت كياني ..
مريم: عسى ما شر فارس ؟
فارس: مابي اضايقج فديتج .. لا تهتمين .. قولي لي وينها ام كشه ؟
مريم: راحت فوق
فارس: زين شوفي امي .. يلا وايد تاخرنا
مريم: انشالله
" يا ترى شو سر هالمكالمه اللي قلبت كيان فارس ؟ ومن المتصل؟ "




" راجع بشوقي ولهفتي من غربتي .. راجع لربعي وديرتي ومحبوبتي .. "

رجع علي من السفر فرحان .. بس انصدم باللي صار ..
على: محمد شلون انا اخر من يعلم ؟
محمد: امي حلفت علي ما وصل لك ولا خبر ..
علي: ليش ؟؟ وانا مو واحد منكم وفيكم .. ولا شو انا منسي .. ما عاد لي وجود بينكم
محمد: على اذكر ربك .. وحاول تفهم .. امي ما حبت تشغل بالك معانا .. عشان تركز في دراستك ولان هاذي اخر سنه لك .. افهم ياخي
علي: على العموم لما اوصل البيت لي كلام ثاني معاكم ..
محمد ما عجبه كلام علي بس سكت عنه: على خير .. انا الحين قريب من المطار ..
علي بدون نفس: مع السلامه .. وسكر من غير ما ينتظر رد اخوه
محمد: هاي شو فيه ؟؟ ما حشمني .. !! معليه معذور
وصل محمد المطار وقد نسى الحوار اللي دار بينه وبين اخوه
محمد فاتح ذراعه عشان يحضن اخوه: هلا والله بو حسن .. الحمدلله على السلامه
على مد يده و رد من غير نفس: الله يسلمك .. وين السياره عشان يودون الاغراض
محمد سلم على اخوه وهو مصدوم من الحركه: حياك السياره هناك .. مشوا هم الاثنين لين السياره بدون ما يتكلمون .. محمد انجرح من اخوه بس حط له عذر .. انه راجع من السفر ومتضايق من اللي صار .. لخوه خالد و ولد عمه جاسم ومحد بلغه .. بس محمد قال " انا الكبير ولازم اسامح " ركبوا السياره ومحمد حاول يلطف الجو المشحون
محمد: علوه .. شو اخبار مصر ؟
علي: .....................
محمد: علوه .. هي نحن هنا
علي او انه كان سرحان: ها .. شو تقول ما سمعتك
محمد عداها له: اقولك شو اخبار مصر
علي: الحمدلله بخير ..
محمد: متى بتطلع النتايج ؟
علي: اففففففف
محمد رفع حاجب: وليش افففففف؟
علي: يا خي ما تحس اني زهقان .. اكرمنا بسكوتك ..
محمد استغرب من علي: زين ليش تتكلم بهالطريقه ؟
علي: محمد ارجوك مافيني اعور راسي
محمد فضل انه يسكت لانه لو شد مع اخوه عادي عنده يوقف نص الشارع ويشوته برا السياره .. بس كبر عقله وحط لخوه اعذار مو عذر .. تموا ساكتين لين وصلوا البيت وكان في استقبالهم ام محمد
ام محمد: يا هلا .. الحمدلله على سلامتك يبه .. تعال اشم ريحتك
علي وانفجر في ويه امه: الحين خالد يصير له اللي صار ومحد يعطيني خبر .. وجاسم ولد عمي كان بيموت ومحد قالي .. خلاص سافرت عنكم تغربت تخشون علي ... سويتوني غريب بينكم ..
ام محمد انقلب ويهها: يت يبه انا موصيتهم ما يقولون لك ابيك تهتـــ ..... قطع كلامها وهو يصارخ عليها ..
علي: لا والله .. شو يهمكم بدراستي .. انا باخذ الشهاده مو انتوا
دخل محمد الحوش وكان ينزل الشنط من السياره وسمع الصراخ
محمد: شو فيكم ؟
ام محمد وخانقتها العبره: ولا شي .. خذ شناط اخوك ودهم داخل يبه
علي: لا خليه يسمع .. ليش ولا شي .. تتكلمين بلساني وانا موجود
محمد سكت علي بصرخه هزت البيت: خلاص .. انت شو فاكر نفسك .. ما حشمتني وعذرتك .. لكن امي المتلهفه عليك جي تستقبلها .. الله يلعن هالغربه اللي غيرتك .. مابي اسمعك تعاتب حد ولو عندك مخ بتفهم ليش بتفهم ليش ما حبينا نضيق عليك في غربتك ..
علي ومنزل راسه: انا راح غرفتي
ام محمد ارتمت في احضان ولدها .. آآآه يا علي .. شو اللي غيرك ؟ ليش جي وانا امك .. ليش ؟
محمد وزعلان على دموع امه: اعذريه الغاليه .. حتى انا في السياره كان معصب علي .. عاد تعرفين علوه لي عصب .. بس قلبه كبير
ام محمد وتمسح دموعها: الله يهديه .. فديت عمرك يا محمد .. مافي مثلك .. قلبك علينا
محمد: الغاليه .. انتوا مني وفيني .. وعمر الظفر ما يطلع من اللحم ..
ام محمد: تعال يبه نروح داخل .. عشان اجهز الغدا لخوك
راح علي غرفته يرتاح .. لقاها مثل ما هي .. ماتغير فيها شي .. حذف نفسه على السرير وتم يفكر في الاحداث اللي صارت له .. كيف انه رد على امه واخوه بالطريقه الوقحه .. دخلت عليه اسماء اخته ..
اسماء: علوه .. رجعت
علي: اهلا اسامي .. شو اخبارج ؟
اسماء: طيبه .. وين كنت ؟
علي: كنت مسافر والحين رجعت خلاص ما سافر بعد
اسماء: امي كل يوم تصيح .. وتقول فديت علي ولدي ..
علي ابتسم لها: وحليلج اسومه .. زين يلا خليني اروح اتسبح وارتاح
اسماء: لا بقعد عندك ..
علي: لا .. روحي عند امي .. يلا
اسماء: عاد علوه .. خلني اقعد
علي عصب: قلت طلعي برا .. ماتفهمين
اسماء خافت منه وتمت تصيح: هئ هئ هئ هئ .. يمه .. هئ هئ .. سحبها من ايدها وطلعها من الغرفه وسكر الباب ..
علي: اففففففف .. ناقص ازعاج انا
طلع خالد من غرفته على صياح اسماء
خالد: افااا .. اسامي ليش هالدموع ؟
اسماء: علوه .. هاوشني هئ هئ هئ .. وكانت تمسح دموعها
خالد عوره قلبه عليها: فديت دموعج انا .. الحين بنروح انا وانتي نضربه ..
اسماء: مابي اروح غرفته .. حتى ما حبه
خالد استغرب من ردة فعل اسماء وحركة علي .. راح غرفة علي بس ما لقاه لانه كان ياخذ شور
خذ اسماء ونزل معاها تحت لقى امه ومحمد
خالد: مرحبا .. ونزل اسماء اللي راحت تركض عند امها وصاحت زياده
ام محمد: ويه ويه .. فديت هالدموع .. ليش ماما تصيحين ؟
اسماء مو قادره تتكلم من الصياح: علـ .. علـ .. علوه .. هئ هئ هئ
خالد: تقول علي مهاوشها ..
ام محمد ما ستغربت: الله يهديه ..
خالد مستغرب: شو السالفه ؟؟
محمد: من رجع وهو معصب على الكل .. عشان محد قاله عنك ولا عن جاسم .. امي وصتنا ما نقوله .. خافت انه يهمل دراسته ويحاتي .. لكن اخوك مو كفو حشيمه
خالد: بل .. ليش عاد ؟ شوي شوي عليه
محمد: انا هد فيني وبلعناها .. اول ما صلنا البيت امي تكلمه وفش خلقه فيها .. ورقع صوته عليها مادرى عنه بو محمد والا قبضه الباب ..
ام محمد بخوف: وغلاتي عندك ما تقول لابوك شي
محمد: وليش ما قوله ؟
خالد: احسن عشان يتأدب .. ما هقيت علي جي .. صج لي عصب ما يفتكر في حد .. بس ما يرفع صوته عليج .. وضرب ايده على الارض من القهر ..
ام محمد بتوسل: فديت قلبك يا محمد وانت يا خالد .. لا يطلع هالكلام لابوكم ..
محمد + خالد: انشالله
خالد: بس عشان خاطرج بنعديها له .. والا كنت انا اللي بقبضه الباب .. لا يتمادى زياده عن اللزوم كلنا نعصب وتمر علينا ايام ما لنا خاطر حتى نكلم حد .. بس نراعي غيرنا .. وهالعلوه انا بسنعه
محمد: عندك اياه ..
خالد: صدمتني يا محمد بعلوه ..
محمد: اقولك انقطع ويهي في السياره اكلمه ولا يرد علي .. عذرته وقلت راجع من غربه والمفروض انه يعرف بمشاكل البيت .. بس هو ما قدر خوفنا عليه
خالد: ولا يهمك يا بو نايف .. امسحها فيني .. بعد الغدا بشوف شو سالفته

" حزين على حالي .. يا حالي انا .. مشتني هالدنيا .. فدروب العنا "
يوسف: خالي متأكد من اللي تسويه ؟
سلمان: يوسف .. كم مره .. ويقاطعه يوسف
يوسف: خالي .. مابيك تنجرح
سلمان بعفويه: ما عاد للجرح مكان
يوسف بحزن: الله يعينك .. على العموم انا هني انتظرك
سلمان: مو نازل معاي؟
يوسف: حلفت برحمة ابوي مادش هالبيت
سلمان بتوتر: الله يهديك يا يوسف .. قلبت كياني ..
يوسف: انت قدها .. بس لو تتراجع عن قرارك
سلمان: يوسف .. خلاص انا نازل
يوسف: الله وياك
نزل سلمان و وقف يتأمل الحوش اللي عاش فيه طفولته .. ما تغير فيه شي .. نفسه البيت الكبير اللي كان ماليه الحب .. رجعت به الذكريات لورا .. لما طاحت عينه على زاويه من زوايا البيت الكبير .. شاف بيت الطين اللي بناه هو واخوه راشد وابوهم .. تذكر لما ابوهم شافهم يبنون وساعدهم وشجعهم
واخته المرحومه لولوه "ام يوسف" كانت تسوي لهم السندويشات وتجيب لهم العصير وتعطيهم رايها في بيتهم الصغير .. سلمان كان عمره 12 سنه و راشد كان 15
بوسعيد اللي هو ابو سلمان: يعطيكم العافيه ..
سلمان: الله يعافيك يبه
راشد: شرايك في بيتنا يبه
بوسعيد: دامكم انتوا عليه .. اكيد حلو
راشد: يبه تعال شوف غرفتي وغرفة سلمان
بوسعيد: بعد كا واحد له غرفه .. ماشالله عليكم
سلمان: يبه .. يبه هاذي غرفتي
بوسعيد: انت مخك نظيف يا سلمان طالع على ابوك
راشد: صوبنا شوي ..
بوسعيد: عاد انت يا راشد ماشالله عليك رفعت الاساس بقوتك .. دخل بوسعيد البيت وكان صغير وايد على احجامهم مسوينه ولكل واحد غرفه متر في متر .. واو انهم مسوين صاله
بوسعيد: يلا .. انا مستعد اساعدكم نرفع الطوفه ونركب السقف ..
راشد فرحان: والله يبه .. سلمان تعال .. ابوي بيساعدنا ..
سلمان: الله .. مشكور يبه ..
دخلت عليهم لولوه: وانا وين غرفتي ؟ السلام عليكم .. شلونك يبه
بوسعيد: عليج السلام بنيتي .. شخبارج؟
لولوه: الحمدلله .. يعطيكم العافيه شباب
راشد + سلمان: الله يعافيج
لولوه: راشد وانا وين غرفتي ؟ وين بنام ؟؟
راشد لاوي بوزه: ما سوينا حسابج
سلمان ببرتءه: اخذي غرفتي لولو ..
لولوه: وبنتي الجوهره وين بتنام ..؟
سلمان: اخذي البيت كله ..
بوسعيد: الله يخليكم ذخر لاختكم
راشد: احلف سلمانوه .. يعني نتعب وهي تاخذ على الجاهز
لولوه: ول عليك يالزطي .. مابي خلاص
بوسعيد كان يشوف نقاشهم مع بعض ومستانس
سلمان: يه رشود .. خلها في غرفتي وانا بنام في الصاله
راشد: اففففف .. كيفك
لولوه: ريلي بيسافر وبجيكم مع عيالي ..
سلمان: بفرح: الله .. هي هي هي
وقطع عليه شريط ذكرياته صوت بنت صغيره
منيره: شتسوي في بيتنا ؟
سلمان التفت على الصوت: انتي من ؟
منيره: انت من ؟
سلمان: وين ابوج ؟
منيره: اول قولي انت من ولا بصارخ
سلمان شللي بيخلصني من هالمصيبه .. هالبنت نسخه من رشود اخوي .. وملسونه مثله
منيره وراحت تصارخ: بابا حرامي .. بابا الحق .. حرامي
سلمان: هيييي ... تعالي يالمينونه والله بلشه هالياهل
طلع راشد يركض: وقف مكانك .. هي .. وفجأه وقف راشد مكانه وبطل عيونه
سلمان: مستغرب !!!؟
راشد تغير لونه: وينك طول هالسنين ؟
سلمان: بنتم واقفين وايد هني
راشد: السموحه .. حياك البيت بيتك
سلمان: لا .. البيت بيتنا .. يا راشد
دخلوا الميلس ورفع سلمان راسه وشاف ان البيت تغير من داخل .. دخلت عليهم منيره بنت راشد
منيره: بابا .. هاذي الحرامي
راشد: عيب هذي عمج
منيره: بس عمي سعيد .. منو هاذي ؟
سلمان: الله يالدنيا .. حتى عيالكم ما يعرفون ان عندهم عم اسمه سلمان .. انمحيت من حياتكم ..
راشد يرقع: الله يهديك يا سلمان .. شهالكلام
سلمان: الله كريم .. طمني على اخبارك واخبار الاهل .. ؟
راشد: الحمدلله بخير
سلمان: الا سعيد وينه ؟
راشد: لاهي في مكتبه
سلمان: وين مكتبه ؟
راشد وصف لسلمان مكتب سعيد
سلمان: شخبار عيال لولوه ؟ صج اللي سمعته ؟
راشد بدى يعرق: هاا .. لولوه عطتك عمرها من 7 سنين .. انت ماتدري؟
سلمان بأستهزاء: الله يرخمها .. وعيالها ماتوا معاها ؟
راشد وماعرف بإيش يرد على اخوه: عيالها بخير ..
سلمان: وينهم عندكم فالبيت ؟
راشد وتمنى الارض تنشق وتبلعه: لا مو عندنا في بيت ابوهم .. قلنا لهم تعالوا عندنا ما بغوا
سلمان: اها .. عيل بروح ازورهم في بيت ابوهم واشوف اخبارهم
راشد وقام من مكانه: لا .. تعشى اول بعدين روح لهم
سلمان عرف من ردة فعل اخوه انه مرتبك فسوى نفسه مايعرف شي
سلمان: انت كريم وانا استاهل
راشد: ...........................
سلمان: وين رحت ليكون ما ستاهل ؟
راشد: لا لا تستاهل
سلمان: على العموم انا رايح مكتب سعيد الحين
راشد: اقعد يا ريال .. عشاك علينا
سلمان: بنات اختي ما يقصرون .. ويوسف ينتظرني عند الباب مابي اخليه ينتظر اكثر .. طلع سلمان خايب الظن .. تمنى لو سمع كلام يوسف .. وطلع من البيت الكبير بكل احباط وحزن وركب السياره مع يوسف
سلمان: السلام عليكم
يوسف: عليكم السلام .. وماحب يزيد ضيقة خاله وتم ساكت لين وصلوا البيت
نزل سلمان .. وراح غرفته على طول .. اما يوسف راح ياخذ له شو .. تم سلمان يفكر ... وعلى طول نزل تحت ينادي على يوسف
*************