[اسطورة !]

" الحين خل نرجع لورا شوي .. لما فهد طلع نص الليل الحوش ولحق القطوه وذبحها .. شو كان السبب ورا تصرف فهد؟!"

فهد: من انتي؟؟
........ : انا اللي شافها اخوك خالد ..
فهد: شو تبين فيه ؟؟
........ : ما يخصك .. بس ابيه وباخذه منك وباخذ مريم معاه ..
فهد يتوسل: الله يخليج لا تاخذين حد .. لو تبين اخذيني انا ..
........ : ما بيك انت .. انت حتى ما تتكلم ..
جرحته بكلامها ..
فهد: بس انا اتكلم معاج الحين .. وصوتي حلو
........ : انت تتكلم لاني انا ابيك تتكلم ..
فهد: الله ياخذج .. ويقطج بالنار ..
........ : ههههههههههههههههههههههههه ههههههههه
قعد فهد من النوم متخرع .. وكان معرق وقلبه يدق بقوه .. على طول طلع من الغرفه وراح غرفة الريم .. طق الباب وكان يصيح من الخوف .. طلعت له الريم
الريم: شو فيك فهود ؟؟ فهد حضنها ودموعه على خدوده ..
الريم: تعال فديتك .. فرشت له على الارض ونام بهدوء .. وحس بالامان عند اخته
لما قعد اليوم الثاني .. ترجى الريم انها ماتقول لاحد انه نام عندها .. والريم حاولت تفهم سبب خوفه .. بس كان خايف انه يتكلم ..
الريم: وهاي كل اللي صار يبه .. وتكرر هالشي اكثر من مره يبه .. يجيني نص الليل خايف وينام عندي .. وامس انصدمت باللي سواه .. واصلا يجيني الغرفه ميت من الخوف .. شلون تجرأه يطلع من البيت ويركض في هالظلام .. ؟!!
بومحمد: امس لما شلته وحضته .. كنت احس بدقات قلبه على صدري من الخوف والروع اللي فيه مادري شو فينا .. اعوذ بالله من الشيطان الرجيم ..
ام محمد: وانا اسبحه كان يتفلت حوله وخايف .. لما خذته للسرير ينام ما تركني الا لما غط في النوم ..
الريم: يبه نجيب مطوع المسيد يقرى عليه احسن ..
بومحمد: بكلم محمد يشوفه .. لاحول ولا قوة الا بالله .. وفجأه حس بومحمد بيد ضغيره على كتفه التفت وكان فهد واقف ورا ابوه ويطالع امه واخته بخوف وقعد في حضن ابوه ..
فهد: يبه .. انا ذبحتها .. الحين خلاص ماتقدر تسوي شي لخالد اخوي او مريم بنت عمي ..
الكل متعجب: مريم ؟؟
فهد: اي .. الجنيه اللي تطلع لاخوي خالد .. طلعت لي .. وخلت لي صوت .. وكان صوتي حلو يبه وكلمتها .. وهي قالت لي انا باخذ خالد اخوك ومريم بنت عمك .. وانا اللي اخليك تتكلم .. وانا قلت لها تاخذني انا بس قالت مابيك لانك ماتتكلم .. وانا احتريت عليها وقلت لها الله بياخذج وبيقطج بالنار .. وكنت اشوف قطوه سوده واقفه عند الدريشه بعد ما اقوم من النوم .. اطالعني وتقولي .. باخذهم وتضحك يبه صوتها يخوف .. وامس الحمدلله اني ذبحتها وحتى ما حلمت فيها كلش .. انذهلوا الموجودين بكلام فهد .. ام محمد تمت تصيح .. وبومحمد مو عارف شو يرد على ولده .. اما الريم ما قدرت تحبس دموعها وتمت تصيح في حضن امها ..

" يا دمعة الليل الطويل .. يا سر احزاني .. شايل معاي المستحيل .. والصبر عنواني .. سيف الصبر ذبحتني يا سيف الصبر .. غربه وغدر .. آآآآه من الغدر "

نزلت مناف مع اخوها فيصل من سيارة فارس .. وقفت عند باب البيت ومو قادره تتحرك .. ومو قادره توقف دموعها اللي انهمرت على خدودها مثل الشلال .. فيصل كان ماسك يد مناف بقوه ومنزل راسه .. نزل فارس من السياره ..
فارس: شو فيج؟؟ دخلي البيت ...
مناف رفعت راسها وتلاقت عيونها بعيون فارس .. قرت الحزن اللي بعيونه .. شافت حزنهم في عيونه .. وتأثره بموت اخوها نايف .. وقرت شي ثاني بعيون فارس .. وبسرعه نزلت راسها ..
اما فارس فشاف فعيونها الحزن وكان وده يمسح دموعها .. وكان يشوف خوفها في عيونها من مواجهة امها ..
فارس: ادخلي يا مناف .. لو ما قلتي لها الحين بتقولين لها بعدين .. ومردها بتعرف .. لا تهربين من واقعج .. ما نقدر نهرب من اقدارنا المكتوبه لنا ..
مناف منزله راسها: صح كلامك .. مسحت دموعها .. وجزاك الله خير يا فارس ..
فارس: يلا يبه .. روحوا داخل الحين .. وانشالله العصر بمركم بعد الصلاه .. تآمرني على شي ؟
مناف: لا مشكور ..
فارس: الله يحفظكم .. التفت على فيصل وناداه ..
فيصل: نعم ..
فارس: اسمعني يا فيصل .. خلك قوي انت المسؤل عنهم الحين .. ارجوك لاتضعف جدامهم ..
فيصل: انشالله ..
دخلت البيت بخطوات ثقيله .. وكان فارس يراقبها واخوها فيصل لين دخلوا البيت وسكروا الباب .. كان فارس متماسك جدامهم .. خاف انه ينهار من هول الموقف اللي عاشه معاهم ومن الموقف اللي بتعيشه مناف مع امها واخوها الصغير فالبيت .. اول ما ركب السياره ساق بسرعه وابتعد عن بيتهم .. وقف السياره وحط راسه على السكان .. وكان يستعيد الاحداث اللي مرت عليه .. كان يشوفها مثل الفلم .. نفس التفاصيل والاحداث .. تنفس بعمق وغمض عينه .. تم فتره مغمض ويحس يرعشه بجسمه .. استجمع قواه وحرك وراح البيت ..
اما مناف وفيصل اول ما دخلوا البيت كانت امهم في استقبالهم بعيون تايهه تدور على نايف ..
ام مناف: ها مناف يمه .. وايد تأخرتوا ..
مناف منزله راسها: ................. فيصل روح داخل ارتاح .. راح غرفته و وقف عند باب الغرفه يراقب امه واخته ..
ام مناف تسأل وهي عارفه الجواب: وين اخوج يمه ؟؟ ..
مناف بخوف: يمه .. نايف .. نايف ..
ام مناف قربت من مناف ومسكتها من كتوفها: خلاص يعني .. راح نايف راح .. نزلت دموعها وهي تتكلم .. نايف شمعة البيت .. نايف اللي ما ينام الا بحظني .. نايف اللي ما شاف ابوج .. نايف اللي كل يوم اشيله على كتفي والاعبه .. ويرسم لي طيور و ورد .. نايف ما بسمع حسه فالبيت .. خلاص ناااايف .. وقعدت على الارض تصيح ولدها .. وتضرب نحرها من الهم .. نزلت لها مناف تهديها ..
مناف: يمه الحمدلله على كل حال .. الحين نايف مرتاح عند ربه .. والله موته احسن له من العذاب اللي عاشه في هالدنيا .. ام مناف تماسكت جدام بنتها وحضنتها ..
ام مناف: آه يا مناف .. كنت حاسه انه مب راجع معاكم ..
مناف تصيح: يمه راح نور البيت .. راح نايف .. آه يا نايف
فيصل كان واقف يطالعهم ويصيح بهدوء " امي كبيره وتحملت الموقف .. بس عبود شبيسوي "
ام مناف قامت ومسحت دموعها: قومي مناف يمه .. قومي ارتاحي بغرفتج .. من امس ما نمتي .. فيصل يبه تعال نام مع اختك.. مناف عجبها تماسك وقوة امها .. وقامت مع امها وراحوا غرفتها وانبطحت على السرير وغطتها امها .. وتمت تمسح على راسها وتقرى عليها لحد ما نامت مناف نزلت عند فيصل اللي كان جامد وايد جدام امه .. وقعدت جنبه تواسيه وتكلمه ..
ام مناف: فيصل ابوي .. اخوك الحين مرتاح عند رب العالمين .. اخوك من طيور الجنه .. والحمدلله انه ارتاح من العذاب اللي كان فيه .. ورب العالمين له حكمه في موت اخوك .. انت انسان عاقل ومتربي علي الدين .. صح يا فيصل ..
فيصل حابس دموعه: اي .. اي صح
ام مناف: لازم نرضى بقضاء الله وقدره .. ونحمد ربنا على كل شي .. عشان الله يفرجها علينا و يوفقنا ويسهل علينا امورنا .. فيصل انفجر في ويه امه ما قدر يحبس دموعه ..
فيصل: يمه حراااام نايف صغير .. يمه كان السرير كبير عليه .. لو شفتي ويهه كان ابيض حلو ومبتسم .. اول مره اشوف نيوف حلو جي يمه اول مره .. وكان خفيف يوم كنا شايلينه و دفناه ..
وحضن امه وتم يبكي ..
ام مناف تسمع كلام فيصل وكان مثل السكاكين اللي طعنت قلبها .. بس تماسكت جدامه ..
ام مناف: الحمدلله على كل حال يا ولدي .. شفت شلون رب العالمين يحبه مات وهو مبتسم الحمدلله الحمدلله .. يلا يمه حط راسك ونام ارتاح الله يرضى عليك .. انبطح فيصل ونام على طول .. مسحت ام مناف الدموع اللي على خدود ولدها وباسته وغطته عدل تأملت ملامح فيصل اللي وايد يشبه نايف طلعت من الغرفه .. وراحت غرفتها بسرعه .. انهارت وتمت تصيح بصوت عالي على ولدها الصغير .. اللي ما تخيلت انها في يوم بتفقده وهو صغير .. وتمت تصيح وطلعت اللي بخاطرها من هم وحزن .. بعدين قامت وصلت ركعتين وقعدت تقرى قرآن .. خلصت من القرأه .. وخافت المواجهه الكبيره مع عبدالله .. لبست عباتها وطلعت من البيت .. وراحت آخر الشارع تنتظر باص المدرسه .. العاده تنتظره ونايف معاها .. وصل باص المدرسه ودقات قلبها تسارعت من قرب الباص .. نزل عبدالله وابتسامته البريئه ما فارقت ويهه ..
ام مناف فاتحه ذراعينها لولدها: هلا والله عبادي .. حبيب امك تعال .. وطوقته بذراعينها بحنان
عبدالله: ههههههه .. ماما وين نيوف ؟؟
ام مناف تمت حاضنه ولدها وما ردت عليه ..
عبدالله: ماما .. نيوف للحين تعبان ..
ام مناف شلت عبدالله ومشت لين البيت .. وعبدالله مستغرب هدوء امه .. دخلت البيت .. ونزلت عبدالله ونزلت لمستواه ..
ام مناف: عبود حبيبي .. نايف راح فوق عند الله .. وأشرت بأيدها للسماء ..
عبدالله تم يطالع امه فتره .. وفجأه صاح بصوت عالي ..
عبدالله: آآآآآآه .. نيوف .. قعد على الارض وغطى ويهه يبده وتم يصيح بحزن ..
ام مناف قطع قلبها منظر عبدالله وهو يصيح متأثر .. بموت اخوه ..
ام مناف: ابوي انته .. دزها عبدالله وحضن ريوله بأيدينه ونزل راسه يصيح وكان يشهق من فرقى اخوه الصغير .. شلته امه وخذته الغرفه .. بدلت له ملابسه وطلعت كتبه عشان ادرسه بس عبدالله حذف الكتب وقعد في زاوية الغرفه يصيح ببرأه ..
عبدالله: مابي اسوي شي .. ابي نيوف بس .. آآآآآآآآه
ام مناف: يا ولدي تعال الله يرضى عليك ..
عبدالله: مابي .. مابي ..
ام عبدالله بصوت واطي: صياحك مابيرجع نايف .. تعال يا يبه تعال ..
مشى عبدالله عند امه وحذف نفسه في حضنها ودموعه بللت رقبتها .. قعدته في حضنها ومسكت يده .. وتمت تكلمه وتهديه ..
ام مناف: يا عبود .. الله يحب نايف ..
عبدالله: وانا ليش الله ما يحبني ..
ام مناف: الله يحبك يالغالي .. ويحب كل الناس .. وبعدين انت كنت تشوف شلون نيوف كان كله تعبان ويصيح وما يقدر ينام فالليل .. وتمت ام مناف تكلم عبود لين نام في حضنها .. حطته على السرير .. وفتحت الكبت تشوف ملابس نايف وتشم ريحتها وتحضن ملابسه وتصيح في صمت ..

عائلة بوفارس كانوا يتغدون بس بدون نفس .. وخاصه ام فارس وفاطمه .. من كثر ما كانوا شايلين هم فارس ..
ايمان: ماما .. ابي اروح عند صديقتي اليوم ..
ام فارس: من هاذي بعد ؟؟
ايمان" بل شكل الوالد مالها مزاج اليوم": ماما .. خلاص مابي اروح .. غيرت رايي ..
ام فارس"يكون احسن بعد": على راحتج ماما ..
عبدالعزيز: فطيم ..
فاطمه: نعم ..
عبدالعزيز: تجين معاي اليوم ..
فاطمه: وين فديتك ؟
عبدالعزيز: ابي اخذ ازره وعطورات .. وماحب الا ذوقج ..
فاطمه ابتسمت: انشالله .. الساعه كم بنروح ؟
عبدالعزيز: عندج شي اليوم ؟
فاطمه: لا بس بنروح المستشفى ..
عبدالعزيز: حلو .. نصلي العصر .. ونروح وبعدها نطلع المستشفى ..
فاطمه: خوش كلام بوالزوز .. انا على الوعد ..
عبدالعزيز: فديت قلبج والله
قامت ايمان من السفره: الحمدلله .. تسلمين الغاليه على هالطبخه
ام فارس: يمه ما كلتي شي
ايمان: مالي نفس على الاكل اليوم ..
ام فارس: سمالله عليج يمه فيج شي ؟؟
ايمان مبتسمه: لا ماما .. بس الحمدلله شبعت
ام فارس: بالعافيه حبيبتي ..
قاموا من الغدا .. وكلن توجه لغرفته يقيل .. اما فاطمه بدون مقدمات .. طرى على بالها يوسف .. حطت ايدها ورا راسها وغمضت عيونها وتمت تفكرفيه .. تذكرت لما خبط فيها .. تذكرت ريحة عطره .. صوته .. نظراته .. واذن العصر .. قامت وصلت ولبست ونزلت تنتظر اخوها يرجع من المسيد .. رجع عبدالعزيز وراحوا المجمع .. دخلوا محل رجالي ..
فاطمه: ممكن اجرب هالعطر الاسود لو سمحت ..
البايع: تفضلي مدام ..
فاطمه: مممممم ريحته وايد حلوه .. شمها ..
عبدالعزيز: حبيبتي انتي اختاري وانا بدفع ..
فاطمه: هههههههههه .. اوكي .. لو سمحت بناخذ هالعطر .. واختارت لاخوها 3 عطورات .. وبعدين راحوا قسم الازره والاقلام .. واختارت له قلم وزرار مناسبين لبعض .. وهم رايحين يدفعون رن جوال عبدالعزيز ..
عبدالعزيز: هلا والله بوخليفه
يوسف: شحالك بوسعود؟
عبدالعزيز: طيب الله يسلمك .. بشرني عنك ..؟
يوسف: الحمدلله .. الا وينك ؟؟
عبدالعزيز: والله اتشرى شوية عطورات ..
يوسف: بس تشتري لك يعني .. صوبنا شوي شدعوه
عبدالعزيز: عاد خلاص دفعت وطالع من المحل .. راحت عليك .. لو متصل قبلها بـ 5 دقايق كنت لحقت علي ..
يوسف: يالزطي .. هههههههههههه
عبدالعزيز: هههههههههههههههههه .. افا عليك يا بوخليفه انت تامر امر .. لو تبي المحل ما يغلى عليك ..
يوسف: امزح معاك يالغالي .. عليك بالعافيه .. وماتقصر خيرك سابق .. بس قولي اليوم الساعه كم بتروح المستشفى؟؟
عبدالعزيز: اخلص من هني ورايح ..
يوسف: حلو .. موعدنا الساعه 9 فالمستشفى ..
عبدالعزيز: صار ..
سكر عبدالعزيز من يوسف وقال لفاطمه ترجع معاه قسم العطورات ..
عبدالعزيز: فطيم ابيج تختارين عطر لبوخليفه على ذوقج .. بس ابي ريحه ادوخه ..
فاطمه: منو بوخليفه؟
عبدالعزيز: اللي كنت واقف معاه ذاك اليوم بالمستشفى .. يوسف ..
فاطمه سمعت اسم يوسف .. وغابت في عالمها الخاص ..
عبدالعزيز: يلا نروح قسم العطورات
فاطمه"اسمه يوسف .. ماشالله عليه اسم على مسمى": انشالله اخوي .. واختارت له عطر قديم بس ريحته رهيبه .. واستخف عبدالعزيز على الريحه وخذ له وحده وليوسف وحده .. راحوا المستشفى وفاطمه كانت في عالم يوسف والعطر اللي اختارته له بعنايه ..

الساعه 3 وربع .. اذن العصر .. وعلي كان يقعد محمد اخوه ..
علي: محمد .. محمد .. يلا اقعد اذن العصر ..
محمد فتح عيونه: الساعه كم الحين ..
علي: الساعه 3 وربع .. وتوه مأذن
محمد: خلاص بقوم الحين ..
علي: ماتبي تاكل شي ؟
محمد: لا .. بقوم اصلي وبطلع على طول ..
علي: اوكي .. على راحتك .. وراح علي يطالع التلفزيون
قام محمد بتعب .. وصلى في غرفة علي .. لبس ثوبه .. وطلب من علي دهن عود ..
محمد: بوحسن .. عندك دهن عود زين
علي: اي فالدرج الاول ..
فتح محمد الدرج وتطيب بدهن العود .. التفت على اخوه وهو طالع ..
محمد مبتسم: مشكور .. ريحته رهيبه ..
علي ابتسم: عليك بالعافيه ..
طلع محمد من غرفة علي .. وهو طالع شاف ساره ولا التفت عليها .. ماتت قهر من حركته .. ركب سيارته واتجه لبيت عمه .. وهو على الدرب اتصل على فارس ..
محمد: هلا فروس .. انشالله احسن الحين ..
فارس: هلا محمد ..
محمد: فروس .. مو شي تقولي محمد .. ما تعودتها منك ..
فارس: هههههههه وانا بعد يا حمودي ..
محمد ضحك" اي خلك جي .. زين انا جايك الحين .. نطلع سيارتك ولا سيارتي ؟
فارس: انا بركب معاك ..
محمد: خلاص صار .. وصل محمد بيت عمه وطلع له فارس .. واتجهوا بيت مناف .. وعلى الدرب مروا الجمعيه والمطعم .. خذوا لهم اغراض للبيت وغدا .. وصلوا عند البيت واتصل فارس لمانف ..
فارس: السلام عليكم
مناف بتعب: وعليكم السلام
فارس: اخبارج ؟ واخبار هلج فالبيت ؟
مناف: الحمدلله كلنا بخير ..
فارس: فيصل وينه؟ ممكن اطرشينه لي عند الباب ؟
مناف: انشالله بروح اشوفه .. واطرشه لك .. راحت غرفة فيصل ولقته قاعد يقرى قرآن
مناف: فيصل ..
فيصل سكر القرآن: صدق الله العظيم
مناف: فارس عند الباب يبيك
فيصل: من فارس؟؟
مناف: ولد الحلال اللي كان معانا بالمستشفى ..
فيصل: اسمه فارس ..
مناف: اي .. يلا روح له عند الباب ..
فيصل: انشالله
طلع وشاف فارس واقف عند الباب وشاف واحد فالسياره واستغرب منه ..
فارس مد يده يسلم على فيصل: السلام عليكم فيصل .. شحالك؟
فيصل: الحمدلله .. واخبارك انت ؟
فارس: الحمدلله طيب .. فيصل محمد ولد عمي ..
سلموا على بعض ومحمد كان شوي ويصيح من اللي شافه .. بيتهم المكسر .. وضعهم الصعب .. موت اخوهم .. الفقر اللي هم فيه .. واللي ذبحه ابتسامة فيصل رغم الحزن اللي فيه .. راح فارس ونزل الاغراض من السياره ..
فارس: فيصل فديتك .. شل الاغراض و ودهم داخل ..
فيصل بطل عيونه: شنو هاي كله ..
فارس: هاي لكم فديتك .. ( فارس ما كان حاس بنفسه وهو يتفدى فيصل )
فيصل خنقته العبره: والله انك طيب يا فارس .. ونزل راسه من الاحراج
حط فارس ايده على كتف فيصل: ولا يهمك يا فيصل .. انت مثل اخوي الصغير .. وانا مسؤل عنكم من اليوم .. ومسح على راس فيصل ..
محمد شل الاغراض وقربها عند الباب .. وفيصل كان يدخل الغراض داخل البيت ويرجع لهم ياخذ الباقي ..
محمد: هاك ابوي .. هاي غداكم
فيصل شل الغد وراح داخل .. تم محمد منصدم من كل شي .. طالع فارس ..
محمد: فروس .. ماتوقعت ان اللي تكلمت عنهم جي .. يالله شلون عايشين .. فروس مو قادر استوعب .. قلبي يعورني .. آآه يا فارس .. شو عيشتهم .. لاحول الله .. ركب السياره وغطى رجع براسه على ورا وتكى على الكرسي وغمض عيونه يفكر في حال اهل مناف .. تم فارس ينتظر فيصل عند الباب ..
طلعت ام مناف الحوش وشافت الاغراض ..
ام مناف: فيصل .. شنو هاي؟؟ وطلعت مناف من غرفتها وشافت الاغراض باستغراب
فيصل طالع مناف وماعرف بشو يرد على امه ..
ام مناف: فيصل ابوي رد علي .. شنو هالاغراض ؟
فيصل: هاي .. هاي من عند رفيجي ..
ام مناف مستغربه: ومن رفيجك ذي ..
فيصل: يمه هاذي تقابلت معاه بالمستشفى .. وراح معانا المقبره يوم صلينا على نايف اخوي ..
ام مناف: كم عمره؟؟
فصيل: يمه ريال كبير ..
ام مناف: وينه الحين ؟
فيصل: عند الباب يمه ..
راحت ام مناف مع فيصل عند الباب .. ومناف كانت خايفه ان امها تهاوش فارس .. وراحت وراهم .. وقفت ام مناف عند الباب وشافت فارس واقف ومحمد كان فالسياره ..
ام مناف من ورا الباب: السلام عليكم .. وفيصل طلع و وقف جنب فارس
فارس: عليكم السلام يمه .. عظم الله اجركم
ام مناف: الله يرحم والديك .. بس من ولده انت يا فارس .. وليش مكلف على نفسك ومتعني .. احنا ما نطلب شفقه من الناس .. الحمدلله على كل حال ..
فارس انصدم من كلامها: يمه انتوا ما تطرون وانا ما اشفق ولا اتصدق عليكم .. بس معزتكم من معزة هلي .. ومن اليوم ورايح انا مسؤل عنكم باللي تامرون به ..
ام مناف انحرجت من كلام فارس: السموحه منك يا الاجودي .. بس مانبي نكلف عليك .. بندبرها انشالله والحمدلله على كل حال ..
فارس: انتي مثل امي .. ومثل ما اخدمها بعيوني اخدمج بعيوني والله ..
ام مناف: عزيز وغالي ..
فارس: الله يسلمج يمه .. انا اترخص الحين .. ولو بغيتوا شي انا حاضر واي وقت
ام مناف: ما قصرت يا ولدي .. جعله في ميزان حسناتك .. دخلت ام مناف وشافت الاغراض .. وشافت الغدا صاحت ودعت لفارس .. اما مناف حست نفسها ضايعه من بينهم .. ومو مستوعبه اللي يسويه لهم فارس ..
عند الباب فارس ومحمد كانوا يسولفون مع فيصل ..
فارس: اسمعني يا فيصل .. بكره بجيب لك جوال وخط وبعطيك رقمي عشان تكلمني اي وقت تعتاز شي .. كلمني ..
فيصل: الله .. بيكون عندي جوال مثل كل الاولاد اللي معاي بالمدرسه .. كان محمد يشوف الفرحه بعيون فيصل .. محمد وايد كان مستاء من الحزن اللي عاشه في ذيك اللحظه .. فارس ضحك لفيصل ..
فارس: يلا انت روح داخل الحين .. وبكره بمرك باذن الله .. و مثل ما وصيتك انت ريال البيت لاتضعف ..
فيصل: انشالله .. ودخل بيتهم ..
ركبوا محمد وفارس السياره وطول الطريق ومحمد مو قادر يوصل لفارس اللي بداخله من الحزن على اهل مناف ..
محمد: يا رب ترزقهم من فضلك يا رب .. فارس شلون عايشين .. لاحول الله
فارس: وتلومني .. تخيل من الفقر اللي هم فيه .. لما كلمتني مناف اول مره قالت لي باعطيك اللي تبيه .. انت متخيل ..
محمد: يالله الفقر جبرها يا فارس .. انت شفت حالتهم .. لاتلومها ..
فارس: الله المستعان .. لما كلمتني انا قلت يمكن مقلب من الشباب .. ولما دخلت منطقتهم قبل البيوت .. قلت يمكن معتازه المبلغ مؤقت .. بس لما شفت بيتهم انصدمت .. واللي صدمني لما قالت لي تمر عليهم ايام مايذوقون فيها العيشه .. انا هالكلمه صحتني .. وعتني يا محمد .. الله يعينهم ..
محمد: صدقت .. الله يعينهم ..
فارس: بس احس اني ارتحت شوي يا محمد ..
محمد: شلون ؟؟
فارس: يعني لما شفت ابتسامة فيصل .. وكلام امه .. حسيت براحه شوي ..
محمد: والله جزاك الله خير يا فارس .. انت شخص نادر ومن يسوي سواتك ..
فارس: والله اسوي هالشي لوجه الله ..
محمد: ونعم بالله ..
توجهوا الى المستشفى .. واول ما دخلوا ام فارس وخواته استغربوا دخولهم .. اما بوفارس فكان يطالع فارس بنظرات غريبه حيرت فاطمه اللي انتبهت لنظرات ابوها لاخوها ..
فارس ومحمد: السلام عليكم
الكل: عليكم السلام ..
طاحت عيون محمد على فاطمه بنت عمه .. تم يطالعها وهي ابتسمت له وهو ما قدر يشل عيونه من عليها .. انحرجت فاطمه ونزلت راسها .. ركضت اسماء عند محمد ..
اسماء: محمد ..
محمد: هلا والله بأسامي .. وباسها
اسماء وتهمس في اذن محمد: انا احب جاسم .. بس لاتقول لحد هاي سر ..
محمد: هههههههههه فديت اللي يحبون انا ..
اسماء وحطت يدها على فم محمد: اششششش .. لاتقول جدامهم .. اقولك سر
محمد: ولا يهمج ماقول لحد .. وركضت اسماء عند ابوها وقعدت في حضنه ..
اسماء: يبه انا بس قلت لمحمد .. وامي .. وفاضل .. والريم .. وانت .. بس هاي سر محد يعرف عنه ..
بومحمد: هههههههههه .. هالسر كلهم يعرفونه ..
اسماء: يبه محد يعرفه
بومحمد: زين .. محد يعرفه

فاطمه كانت تتفكر في نظرات محمد ومستغربه منها .. رفعت راسها وشافت ابوها يطالع فارس بنظرات غضب .. وفارس ما كان منتبه لابوه ..
فاطمه" ليش بابا يطالع فارس بهالنظرات ؟؟ ومحمد وفارس شو الشي اللي بينهم .. وشكل محمد احسن عن الصبح .. يعني اللي يشوفه الحين ما يقول هاذي اللي كان عندنا الظهر ومكتئب وحزين وليش محمد يطالعني بنظرات غريبه .. والله امرهم غريب ..؟؟! "
قطعت ام فارس على فاطمه حبل افكارها ..
ام فارس: يلا يا بناتي .. تاخر الوقت ولازم نمشي .. عشان اخوكم يرتاح والولد ( قصدها تركي ) ياخذ راحته مع ربعه ..
فاطمه: انشالله ماما .. يلا خواتي ..
طلعوا البنات ورا امهم .. وهم طالعين فاطمه شافت يوسف من بعيد .. كان يناظرها وعلى ويهه ابتسامه تاخذ القلب .. نزلت راسها وهي مبتسمه ..
يوسف "يا حي ذا الشوف .. يا ارض احفظي ما عليكي .. يا ويل حالي يا ويل "
فاطمه "ياربي شلون يطالعني .. شو هالنظرات شو هالوسامه الله يحفظه لشبابه .. وانشالله يعجبه العطر اللي خذته على ذوقي .. يالله مو راضي يشل عينه من علي .. الله على اسمه .. يوسف .. والله مزيون هالولد "
مرت من جدام يوسف وهم طالعين من البوابه الرئيسه للمستشفى .. عاشوا حب صامت .. وتكلموا بقلوبهم كلام ماقدروا يوصلونه لبعض ..
راح يوسف لغرفة الشباب وسلم عليهم وقعد معاهم لين الساعه 11 بالليل ..
يوسف: عن اذنكم يا جماعه .. تاخر الوقت
بوفارس: بدري يا ولدي ..
يوسف: الساعه صارت 11 وجاسم نام .. ولازم اروح لاهلي فالبيت
بوفارس: ماشالله مر الوقت ولا حسينا به ..
يوسف: امنتكم الله ..
الكل: مع السلامه .. وطلع عبدالعزيز ورا يوسف وعطاه كيس العطر ..
يوسف: شنو هاي بوسعود؟؟
عبدالعزيز: ما هان علي اطلع من غير ما اخذ لك معاي ..
يوسف منحرج: افا والله بوسعود .. كنت امزح معاك ..
عبدالعزيز: ولو انت تمون يا بوخليفه
يوسف خذ الكيس: مشكور بوسعود .. بس لاتعودها عاد .. بزعل ترا .. كلفت على نفسك
عبدالعزيز: يا ريال ما بينا زعل والحلال واحد .. انت توكل الله يحفظك وبكره لنا لقاء ..
يوسف: ههههههههه .. شدعوه افتح يا سمسم
عبدالعزيز: ههااااااااي .. باي حبيبي ..
يوسف: مع السلامه
ركب يوسف سيارته وهو طول الدرب يفكر في عبدالعزيز .. وجى له احساس اول ما طاحت عينه على الكيس .. ماعرف شو الاحساس بس حس انه بيستانس .. وصل البيت ولقى خاله قاعد بروحه فالصاله .. سلم عليه وقعد معاه
يوسف: شحالك خالي ؟
سلمان: هلا والله .. طيب الله يسلمك .. وشو هالكيس ؟
يوسف طالع الكيس وابتسم: الله يسلمك .. اليوم متصل في بوسعود .. كان برا يتشرى .. وكنت امزح معاه واقوله صوبنا شوي .. الا الحين جايني بهالكيس .. وحليله
سلمان: زين افتح الكيس خل نشوف
يوسف: اوكي .. وفتح الكيس ولقى علبة العطر .. فتح العلبه وطلع العطر وطاحت ورقه من العلبه ولا انتبه لها ..
سلمان: وشو هالورقه .. ؟؟؟
يوسف: اي ورقه .. شم العطر ريحته رهيبه ..
سلمان: وااااو .. ريحته عجيبه والله ذوق رفيجك ..
يوسف خذ الورقه اللي طاحت من العلبه وفتحها .. وتم ساكت ..
سلمان التفت عليه: يوسف .. وين رحت ؟؟
يوسف التفت على خاله وخبى الورقه في جيبه بسرعه ..
يوسف: معاك خالي .. بس وش رايك بالريحه ؟
سلمان: ماشالله عليه ذوق .. وايد حلوه الريحه ..
يوسف: فنان العطر .. المهم خالي انا استأذن بروح ابدل وراجع لك .. وقام من مكانه وهو رايح ..
يوسف: خالي .. الا البنات وينهم ؟؟
سلمان: جوجو تسوي شاي .. وهنوده فوق نادها وانت نازل ..
يوسف: انشالله خالي .. راح غرفته بسرعه وتم يقرى الورقه مره ومرتين وثلاث .. شم ريحتها وحط الورقه صوب قلبه وغمض عيونه ..


( يا ترى شو سر الورقه .. وشو مكتوب فيها؟!!؟ )

في الجزء اللي قبل .. اخر جزئيه كانت عن الورقه اللي دوخت يوسف .. والكلام اللي كان مكتوب فيها ..
وكانت الرساله كالتالي ..

فتح عيونه مبتسم .. وتم يتحسس الورقه باصابعه .. قرب الورقه من خشمه .. واستنشق ريحتها ..
يوسف" يا قلبي على ريحة عطرها .. فاطمه .. يالله على اسمج روعه ذوقج روعه انتي على بعضج روعه .. وهالمفاجأه احلى مفاجأه منج يا قمر انتي .. "
قطعت عليه هنادي حبل افكاره ..
هنادي: يوسف .. يوسف ..
يوسف: ها .. هلا هلا هنود
هنادي: شفيك متسبه وسرحان .؟؟
يوسف ارتبك: ما ما مافيي شي ..
هنادي: شنو هالورقه اللي تمشها من مساعه ؟؟
يوسف صار ويهه احمر: اي ورقه .. وحط الورقه في الكيس بسرعه ..
هنادي: علينا .. الورقه اللي في الكيس ..
يوسف: زين شتبين مني الحين ؟
هنادي" يغير الموضوع": يقولك خالي تعال تحت ..
يوسف: اوكي الحين ببدل وبانزل ..
هنادي بخبث: خش الورقه لحد يقراها .. ههههههههههههه وطلعت عنه ...
يوسف" هاذي من متى واقفه ؟!!؟ "
نزل يوسف عند الباقي .. وقعد يسولف معاهم .. حس ان نظراتهم له غريبه .. وكان منحرج منهم
راحوا البنات ينامون .. ويوسف قعد مع خاله في الحوش يسولفون .. وكانت الساعه 12 ونص بالليل ..
سلمان: شسالفة الورقه يوسف؟؟
يوسف ارتبك: ورقه .. اي ورقه؟؟
سلمان: لا تسوي نفسك او انك ماتدري .. منو مطرشها لك ؟؟
يوسف: اي ورقه تتكلم عنها ؟؟
سلمان: ليكون في شي بينك وبين عبدالعزيز .. ؟؟
يوسف بطل عيونه: خالي شهالكلام ؟!!!
سلمان: لا تعصب .. انا سألتك .. ما قلت لك في شي بينكم
يوسف: وش اللي خلاك تفكر هالتفكير ؟؟
سلمان: علاقتك بعبدالعزيز ..
يسوف: الله يهديك يا خالي .. انا قلت لك سالفة اخته صح ولا لأ ..
سلمان: اذكر .. بس فكرت يمكن عزيز يكن لك شي في قلبه .. حنان مفتقده .. حب .. عاطفه من اي نوع ؟.
يوسف: اذكر ربك يا خالي .. وخل عنك هالافكار السوده .. لاتظلم الولد .. عزيز اكبر من هالكلام اللي تقوله .. وما اسمح لك تقذفه ..
سلمان: عيل انت اعترفت له بحبك لاخته ؟؟
يوسف: مستحيل .. انا مو مينون اقوله هالكلام .. بيذبحها قبل ما يذبحني ..
سلمان: لان هنود تقول انك كنت هيمان حدك فالورقه ؟؟
يوسف: دام هيمان فالورقه .. مو معناته ان عزيز اللي كاتبها لي .. خالي مستحيل انتكس على فطرتي .. هالافعال تهز عرش الرحمن .. وانا ماتربيت على المعصيه .. عندي خوات اخاف عليهم .. واخاف ربي قبل ما افكر في هالشي .. لاتتسرع في حكمك علي ..
سلمان منحرج: والله احرجتني يا يوسف .. انا آسف .. اعذرني ..
يوسف: ولا يهمك يا خالي .. انا ما زعلت بس دافعت عن نفسي وعن ولد الناس .. وهنود انا اوريها .. على لقافتها ..
سلمان: زين قوم روح نام .. تأخر الوقت
يوسف: الساعه كم الحين؟
سلمان: وحده الا ربع ..
يوسف: والله تأخر الوقت ..
مشوا هم الثنين .. رايحين داخل .. وكل منهم توجه لغرفته .. سلمان حس بالذنب كم الكلام اللي قاله ليوسف .. تحسف على كل كلمه قالها .. بس وايد انبهر برد عبدالعزيز .. وكبر في عيونه اكثر ..
ناموا وكلن في باله شي شاغله .. اما يوسف اللي ماقدر ينام وهو كل شوي فتح الورقه وقراها وابتسم .. وكلام خاله ولا جى على باله .. لانه واثق من نفسه واللي يسويه .. نام وهو محتضن الورقه ومبتسم ..

الساعه 10 ونص بيت بوفارس .. رن جوال عبدالعزيز وكان الجد سلطان المتصل .. وعزيز مسميه في الجوال " الكشخه "
الجد: صح النوم ..
عبدالعزيزرد وهو مغمض عيونه: هلا والله
الجد: قم .. يلا قم .. ورانا موعد .. ولا نسيت ؟؟
عبدالعزيز مبتسم: لا مانسيت .. نص ساعه وبكون عندك ..
الجد بصراخ: شو ؟ نص ساعه .. الموعد الساعه 11 ومافي وقت متى بنوصل ؟؟
عبدالعزيز: خف علينا بو الشباب .. باقي وقت
الجد: لو ماجيت خلال ربع ساعه بحرك عنك
عبدالعزيز" وهقنا هالشيبه": زين الحين بقوم .. قام وكشخ حده ونزل الصاله .. وشاف امه تخيط ملابس ايمان .. وايمان قاعده معاها وتسولف ..
عبدالعزيز: حيالله الغاليه
ام فارس مبتسه: هلا والله يبه ..
عبدالعزيز: شخبارج الغاليه ..
ام فارس: الحمدلله يبه .. بس هالكشخه كلها حق من ؟؟
عبدالعزيز: ههههههه .. رايح مع يدي ..
ام فارس: عزوز .. ليكون رديتوا حق سوالفكم
عبدالعزيز يضيع السالفه: اي سوالف .. زين انا استأذن.. ماقدر اتاخر عنه بيحشرني .. سلاااااام وطلع بسرعه ..
ام فارس" يالله من هالشيبه بيخرب الولد علي .. ما درى عنهم بوفارس"
وصل عبدالعزيز عند يده .. اول مادخل الحوش الا يشوف يده واقف عند الباب ينتظره .. كان عبدالعزيز يبي ينزل يسلم على يدته وعمته ..
الجد: سكر الباب .. اركب اركب .. يلا تاخرنا
عبدالعزيز: زين باسلم وبرجع .. مايصير جدامي وماسلم عليهم .. الله يهديك يا يدي ..
الجد متواكل: خل عنك السوالف يا عزوز .. عطلتني .. يلا يلا
عبدالعزيزخاضع لاوامر الجد .. طلع يده من السياره وأشر لعمته ويدته .. وحرك بسرعه من كثر ما كان يده يحن عليه ..
وصلوا المجمع وصفوا في المواقف .. الا الجد يطلع دهن العود ويتطيب به .. ويمسح به تحت اذنه .. ويحط على شنبه وحط في يده ومسح ايدينه ببعض .. بعدين طلع عطر بخاخ بريحة دهن العود وتعطر منه .. وطالع نفسه بالمرايه رتب الغتره ويطالع ويهه .. وعبدالعزيز يطالعه مستغرب .. ويقول في نفسه" والله كشخه يدي .. يتعدل ويتعطر هاي كله لها .. لو بتشوفك مادري شو بتسوي .. بتشوفني انا .. كل شي قطه على راسي .. بس مادروا عنك الجماعه فالبيت .. "
الجد: احم احم .. يلا انزل افتح لي الباب ..
عبدالعزيز مبطل عيونه: نعم !
الجد: سمعتني .. يلا بسرعه .. شوف الغراشب اللي هناك .. ابيهم يلحقون علي وانت متكشخ فيني
عبدالعزيز ضحك على يده: ههههههههه .. امري لله .. نزل وفتح له الباب .. ودخلوا من البوابه الرئيسيه للمجمع .. وتمشوا لين وصلوا الكوفي شوب .. قعدوا ينتظرون القمر يطلع لهم ..
الجد: واحد من اثنين .. يا انك مأخرنا وراح علي القمر .. او القمر نفسه متأخر يتغلى علينا ..
عبدالعزيز: اي لازم بتتغلى عليك القمر .. مدلعها ..
الجد يضرب عبدالعزيز على كتفه: اسكت .. اسكت .. شوف هالغرشوبه اللي داخله
عبدالعزيز: يالمغازلجي .. ما كفاك القمر .. بس مادرت عنك تتغزل فالرايحه والجايه
الجد: يود لسانك لاتودينا في داهيه ..
عبدالعزيز: احم احم .. عاد بكم ؟
الجد باستغراب: شو اللي بكم ؟
عبدالعزيز: ثمن سكوتي .. تدري طال عمرك ما في شي ببلاش هالايام ..
الجد طالعه بتحدي: شفت هالخيزران ..
عبدالعزيز ببراءه: شو فيه؟
الجد: بيجي على ظهرك .. هاي ثمن سكوتك
عبدالعزيز: ههههههه .. وايد متوتر يا يدي .. معذور
رن تلفون الجد والمتصله كانت صاحبة الموعد
الجد: يا حيالله هالصوت
البنت: هلا والله
الجد: يا قلبي .. وين انتي الحين؟
البنت: الحين بدخل الكوفي شوب ..
الجد: وانا اقول هالنور من وين جاي ؟؟
البنت: ترا اصدق بعدين
الجد: ايه عليج بس .. يلا انتظرج تنورين المكنا
البنت بدلع: يلا باااي
الجد: يا ويل حالي .. بوسعود يلا دورك
عبدالعزيز: حاضرين .. تجهز عبدالعزيز وخذ موقعه ..
دخلت الكوفي وحده باين عليها في الثلاثين .. التفت وشافت عبدالعزيز يطالعها ومبتسم .. وهي مفتكره ان اللي يكلمها عبدالعزيز ماتدري انه الجد .. قعدت على طاوله في الزاويه .. واتصلت له رن تلفون الجد .. وعبدالعزيز سوا نفسه هو اللي رد .. او انه يكلمها .. والجد حاط سماعه في اذنه ويكلمها ويراقبها من غير ماتشوفه ..
البنت: وش هالجمال والوسامه
الجد: كله من ذوقج
البنت: بس شكلك مايدل على صوتك؟ شكلك وايد صغيرون؟
الجد" صادوه": كل اللي يشوفني يقول نفس الكلام ..
البنت: متأكد .. يعني اللي يشوفك يعطيك 24 سنه اكثر شي ..
الجد " قطيعه هاذي تعرف كل شي ": ههههههههه .. بس بعد من ذوقج
البنت تأشر على عبدالعزيز من بعيد .. وعبدالعزيز منحرج ومنزل راسه
البنت: ليش منزل راسك ؟؟ مستحي ؟ انا ماستحيت كثرك
الجد: من جمالك ماقدر اشوفج .. اخاف احسدج ..
البنت: ههههههههه .. دمك عسل مثل ماتعودت عليك
رفع عبدالعزيز راسه وابتسم لها .. وفجأه الا واحد يخبطه على كتفه ..
يوسف: بوسعود .. هلا والله
عبدالعزيز تخرع .. والجد تلخبط .. وانكشفوا جدام البنت
البنت انصدمت وسكرت التلفون .. مشت لعند الطاوله
البنت بعصبيه: طيح الله حظكم .. ومشت عنهم وهي معصبه
الجد منصدم .. عبدالعزيز ميت من الضحك .. ويوسف ضايع من بينهم .. مايدري شو سالفتهم
الجد: على شو تضحك .. خربت السالفه
عبدالعزيز مو قادر يتكلم من الضحك: ههههههههههه
يوسف: السموحه .. بس اي سالفه؟؟
الجد: قال ليوسف السالفه .. ويوسف كمل على عبدالعزيز ومات من الضحك .. وتموا ثنينهم يضحكون ..
الجد: اي ضحكوا .. شعليكم خربتوا السالفه ..
عبدالعزيز: آه يدي .. اللي يشوفك بهالكشخه .. يقول معرس
الجد: يلا قم .. خل نروح الله يغربل بليسك من ولد
يوسف: وين يا جماعه ؟؟
الجد: انا ابي اعرف .. انت شلون مرافج هالخبل عزوز
يوسف: هههههههههه
عبدالعزيز: يدي .. والله مو انا اللي اكلت مقلب حلو اليوم هههههههه
الجد مشى عن عبدالعزيز: يلا يا اسود الويه الحقني
يوسف: بوسعود .. يدك ذي شي شي شي
عبدالعزيز: ايه عليه .. بس شي.. الا اشياء
يوسف: بصراحه .. ماقصرت على العطر .. ذوقك روعه
عبدالعزيز: ولو .. انت تمون يا بوخليفه
يوسف: في عرسك انشالله انا اللي بعطرك على ذوقي
عبدالعزيز: آمين .. وقريب انشالله .. وفجأه سكت وحس باحساس غريب وتضايق
يوسف: انشالله .. وانت تستاهل يا بوسعود