[اسطورة !]

سلموا على بعض ويوسف ما انتبه على عبدالعزيز .. رجع يوسف لخاله وخواته وقالهم سالفة عبدالعزيز ويده .. وضحكوا عليهم.. اما عبدالعزيز لحق يده وكان يحاول يفسر هالضيقه اللي جاته من طرى العرس .. ركب السياره ويده طول الوقت يعلق على الموضوع .. وعبدالعزيز ولا يدري شو يقول يده .. وصل يده البيت ورجع البيت .. واول شخص لجأ له كان ابوه ..
اتصل فيه وقاله عن احساسه ..
عبدالعزيز: يبه مادري ليش فجأه جاني هالاحساس ؟
بوفارس: لا يبه .. هاي مو خوف .. بس توتر لان الموعد قرب
عبدالعزيز: يمكن اكون متوتر .. بس هالاحساس انا متاكد منه .. وباثبت لك ..
بوفارس: شلون ؟
عبدالعزيز: فطيم ..
بوفارس: شو فيها اختك؟
عبدالعزيز: يبه .. انا وهي دوم نحس بنفس الاشياء .. مو احنا توأم
بوفارس: الله يرضى عليك يبه .. اشغل نفسك ولا تفكر في الموضوع وايد وانت ادرى برد البنت .. بس كلها كم يوم ويرخصون اخوك .. و وعد مني اني اكلم امك على الاسبوع الجاي ونروح لهم ..
عبدالعزيز كان يجامل ابوه عشان مايخليه يحاتيه اكثر ..
عبدالعزيز: خلاص ولايهمك الغالي ..
وسكر من ابوه وهو مو قادر يفكر من الضيقه اللي فيه .. راح على طول غرفة فاطمه اخته .. بس مالقاها .. سأل امه عنها ..
ام فارس: يمه اختك في الجامعه ..
عبدالعزيز: الساعه كم ترجع؟
ام فارس: على حسب .. اليوم احنا الثلاثاء
عبدالعزيز: اي
ام فارس: اختك هاليوم تكون اخر حاضره عندها الساعه 4 ..
عبدالعزيز: افففف .. 4 العصر .. واحنا 12 الظهر .. عيل بتصل فيها احسن
ام فارس: شو فيك يبه ؟؟ شو تبي من اختك؟
عبدالعزيز: ها .. بس ابي اسألها عن شي ..
ام فارس: اعتقد انها خلصت محاضرتها الساعه 12 الا ربع .. شوفها الحين .. لان عندها محاضره الساعه 1 ونص ..
عبدالعزيز: ماشالله عليج يمه .. حافظه جدولها كامل ..
ام فارس: هههههههه شاسوي ياولدي .. ذاك اليوم افخت راسي وهي تشرح لي نظامهم ومحاضراتهم ومادري شو ..
عبدالعزيز ابتسم لامه واستأذن من امه وراح الغرفه ..
اتصل على اخته .. وردت عليه ..
فاطمه: عزوز شو فيك ؟؟
عبدالعزيز: آه يا فطيم .. محد حاس فيني الا انتي
فاطمه: عسى ماشر .. قلبي يدق ..
عبدالعزيز: كنت اسولف مع رفيجي عن العرس وفجأه حسيت بضيقه من جبت هالطاري .. وقالها سالفة صديقة اختهم مريم اللي يبي يخطبها ..
فاطمه: انا بعد فجأه حسيت بضيقه وقلبي يدق بسرعه .. بس ابوي قالك ان البنت موافقه صح
عبدالعزيز: اي قالي .. بس مادري ليش قلبي قارصني من الموضوع
فاطمه: حتى انا .. الله يستر بس ..
عبدالعزيز: اي والله الله يستر .. فطوم انتي حاسه باليي حاس فيه ..
فطمه: انهم بيرفضونك ؟؟
عبدالعزيز: اي
فاطمه: الله لا يقولها .. ولو مابغتك المنه عليها .. مابتلقى احسن منك ...
عبدالعزيز: الله يستر .. زين خلاص انتي انتبهي لمحاضراتج ولي رجعتي نتوسع في الموضوع ..
فاطمه: تنكت حضرتك .. هههههههههه
عبدالعزيز: هههههههههههه .. مع السلامه اختي ..
فاطمه: مع السلامه ..
سكر منها عبدالعزيز وحس براحه شوي لانه لقى من يفهمه ويشاركه نفس الاحساس ..

قرب موعد خروج جاسم من المستشفى .. والكل كانوا مستانسين وينتظرون طلعة جاسم بالسلامه .. بوفارس كان ناوي يسوي عشى ويعزم الاهل وربعهم كلهم بمناسبة سلامة الجسمي .. في المستشفى بعد ما سكر بوفارس من عبدالعزيز تضايق من كلام ولده وتشأم ..
بوفارس" اعوذ بالله من الشيطان الرجيم .. الله يستر من اللي جاي .. من مكالمة عبدالعزيز قلبي مو متطمن للموضوع .. اخاف يصير اللي مخوف ولدي ويتعب نفسيا .. لانه هو اللي بغاها .. بس مرايم اكدت لي موافقة البنت .. الله يستر ويسهل الامور لي ذاك اليوم "
جاسم: يبه ..
بوفارس: نعم ..
جاسم: ملل بدون تركي ..
بوفارس مبتسم: هو وعدك يزورك .. وانشالله بيجي العصر مع الشباب ..
جاسم: زين قولي .. انت مو متملل لانه مو موجود ؟
بوفارس: ههههههههههه . اي والله مكانه مبين
جاسم: احلى شي لي تجمعوا الشباب حق الضحك والوناسه
بوفارس: وانت ما بقى لك الا كم يوم وانشالله بتطلع
جاسم: يبه ..
بوفارس: عيونه ..
جاسم: بعد ما اطلع من المستشفى .. بيتم تركي صديقي .. ويوسف وسلمان خال يوسف وباقي الشباب ..
بوفارس مبتسم: انشالله بيتمون ربعك .. لانهم ماشالله دوم مع اخوانك ..
جاسم بوناسه: يس .. yes
بوفارس: وحليلك يالجسمي والله كبرت ..

كان نايف منسدح على بطنه ورافع ريوله في الهو ويمررهم عكس بعض .. وعبدالله قاعد جنبه وفيصل مجابلهم يحل واجباته ..
نايف: عبود شنو تبي ارسم لك ؟
عبدالله: ممممممم .. المدرس قالي نرسم حديقة ورود ..
نايف: زين .. بس اللون الاحمر خلص ..
عبدالله: زين لون لي الورد بالاصفر والباقي لاتلونهم عاد انه لونهم ابيض ..
نايف: اووووهو .. مب حلو جي .. عبود جيب لي احمر
فيصل: هاك قلمي الاحمر لون فيه
نايف: فصول احسن منك عنده لون احمر .. يا سلام
عبدالله: ليش احسن مني .. عشان عنده لون احمر .. زين يلا ارسم لي عشان اودي الرسمه حق الدرس بكره ..
نايف: زين لاتلعوزني ..
بعد 20 دقيقه خلص نايف الرسمه ..
نايف يحك راسه: هاك عبود ..
فيصل: الله حلو رسمك يالبوكيمون ..
عبدالله: والله حلو نيوف .. ياليت اعرف ارسم مثلك ..
قعد نايف بين عبدالله وفيصل: جوعاان .. ابي اكل شي
فيصل: جوعان .. زين اصبر خل اشوف الشوكلاته مالت امس في شنطتي .. وتم يدور بس ما لقى شي ..
عبدالله بحزن: لا تدور . .امس عطتني الشوكلاته
نايف بيخبة امل: كلتها عبود .. زين بروح اشرب ماي .. وراح صوب المطبخ وعلى طريقه شاف مناف ..
مناف مبتسمه: نايف حبيبي شو فيك ؟
نايف: مناف جوعان ..
مناف طالعت اخوها بحزن: نايف حبيبي .. اصبر بكره بجيب لك من الجامعه
نايف: بطني يعورني .. بكره بعيد ..
مناف تتكلم مخنوقه: صح بكره بعيد .. نايف حبيبي ... بكره بجيب لك اليوم ماعندنا شي ..
اوعدك بكره اجيب لك الكرواسون بالجبن اللي تحبه ..
نايف حضن اخته وتم يصيح: هئ هئ هئ .. والله جوعان مناف .. ابي اكل .. وحضن اخته بقوه
مناف تمت تصيح معاه: نايف فديتك .. لاتعور قلبي بصياحك ..
دخلت ام مناف وقطعت عليها شريط ذكرياتها المؤلمه .. شافتها حاضنه صورة نايف ودموعها تسبح على خدودها .. حست ام مناف بألم و معاناة بنتها ..
ام مناف: مناف يمه .. قومي قعدي مع الحريم ..
مناف تمسح دموعها: انشالله يمه .. حطت صورة اخوها على السرير وطلعت ورا امها ..
دخلت على الحريم وكانوا يطالعونها بشفقه ..
ام محمد: عظم الله اجركم
مناف: الله يرحم والديج ..
ام محمد: تصبري يا بنتي الله بيعوضكم ..
مناف طالعتها: !؟! ..
قعدت مناف في طرف الصاله اللي مافيها غير مخدات والزوليه متنتفه من الاطراف .. كانوا الحريم يطالعونها ويتكلمون بصوت واطي بالنسبه لهم بس مناف كانت تسمعهم .. اما ام مناف كانت رايحه تسوي شاي .. مناف تمت تناظر الحريم باستغراب ..
ام محمد: ماشالله عليها كبرت .. وجمالها طبيعي شوفيها ..
ام خالد: حرام كل هالجمال وعيشه في الفقر ..
ام محمد: ههههههههه .. الله يغربل بليسج . واحنا مب احسن منهم ..
ام خالد: الا احسن منهم .. على الاقل احنا عندنا من يصرف علينا .. بس هم حتى العيشه مايذوقونها بالايام ..
ام محمد: على قولتج .. الا لي فاض اللي عندنا طرشنا لهم ..
وفجأه وقفت مناف وبعصبيه: والله احنا ما نطر من عندكم هالفايض .. الله الغني عنكم .. ولا طقينا باب البيت نترجاكم تتكرمون علينا بالفايض من اكلكم .. الحمدلله والشكر .. الله لايعوزنا لكم ولغيركم انشالله .. مشت عنهم وهي تصيح من القهر .. تموا الحريم يشوفون بعض باحراج .. طلعت مناف وشافت امها طالعه من المطبخ ..
ام مناف: مناف يمه شفيج ؟
مناف ركضت غرفتها وسكرت باب الغرفه من غير ماترد على امها ..
ام مناف باستغراب: شفيها بنتي ؟! خل اروح عند الحريم .. بعدين بروح اشوفها فديتها ..
سكرت باب الغرفه و وقفت ورا الباب .. نزلت على الارض وغطت ويها بايدينها .. وتمت تصيح وهي تتذكر كلام جاراتها ..
مناف" يالله على هالناس اللي ماترحم .. احنا في حاله وهم يعايرونا .. مافي شي لوجه الله .. يعايرونا بالفايض اللي يطرشونه لنا .. ياربي متى اخلص الجامعه واشتغل واعتمد على نفسي بدل ما يذلونا الناس .. ارحمني يا ربي من الناس .. ارحمني .. آآه .. تمت تصيح بحزن على حالهم ..
رن تلفونها وكان المتصل فارس .. شافت شاشة التلفون وقالت " هالاتصال جى في وقته "
فارس: السلام عليكم ..
مناف بصوت حزين: وعليكم السلام فارس ..
فارس: شو فيج مناف .. ليش تصيحين ؟
مناف: ما صيح ..
فارس: ادري انج زعلانه على اخوج .. وتنهد تنهيده مسموعه .. وكمل .. ابيج اقوى يا مناف ..
مناف انفجرت صياح: آآآآآه يا فارس .. قمت الناس تعايرنا .. وتمت تصيح
فارس مستغرب: الناس تعايركم .. على شو ؟؟
مناف وهي منهاره قالت لفارس موقفها مع جارتهم وكلامها .. فارس حس بالحزن ..
فارس: مناف يا قلبي ( ولا حس بنفسه لما قال يا قلبي ) كفايه ردج سكتها .. وكلامج بين لها عزة نفسج .. ولا تزعلين نفسج افا عليج ..
مناف وكلمة فارس ترن في اذنها" يا قلبي": بس احنا ما طلبنا منهم شي .. آآه يالقهر ..
فارس: لا تقتهرين ولا تفكرين في كلامها .. انتي اقوى منها .. انتي عندج كبريأج وعزة نفسج .. وخلي دموعج غاليه ماتنزل الا لغالي .. وابيج تكونين اقوى من دموعج .. ترا دموعج غاليه علي
مناف مسحت دموعها: الله يجبر بخاطرك يا فارس .. احس ارتحت الحين ..
فارس: ولا يهمج يا مناف انا حاضر لج اي وقت ..
مناف: فارس ..
فارس: هلا والله ..
مناف: بخصوص الاغراض اللي جبتها امس ؟؟
يقاطعها فارس: انشالله مانقصكم شي ..
مناف باحراج: والله ماقصرت احرجتني ..
فارس: افا عليج بس .. انتي اشري بس ..
مناف: تدري لما امي سألت فيصل .. توهق وتم يطالعني .. ماعرف شنو يقول لأمي ..
فارس: بعد ما دخلت امج .. قالي فيصل انه توهق .. وشو قالها عني
مناف: بس ما له داعي كل اللي تسويه ..
فارس: مناف انتوا صرتوا تعنون لي شي .. احسكم جزء مني .. ماقدر اشوفكم بالوضع اللي انتوا فيه واسكت ..
مناف: ارجوك فارس لاتشفق علينا .. بتدبر ان شاء لله ..
فارس بعصبيه: اي شفقه يا بنت ! مابي اسمع هالكلام منج سمعتي ..
مناف استغربت: وليش معصب ؟؟
فارس: لاني ما اشفق عليكم .. انتي اقصد انتوا جزء مني .. فهمتي الحين
مناف ببرأه: زين لاتصرخ علي .. وصاحت ..
فارس متفاجأ: مناف .. شو فيج .. لاتصيحين انا آسف .. ما كنت اقصد اصرخ
مناف وهي تصيح: لاتعصب وتهاوشني مره ثانيه ..
فارس: آسف يا قلبي .. بس لاتصيحين ولاتقولين هالكلام .. غصبن عني تنرفزت .. لاني مو مثل ماتقولين .. زين خلاص عاد
مناف: شنو خلاص عاد ..
فارس: يلا مسحي دموعج ..
مناف: مابي .. وتمت تصيح
فارس" دلوعه" : مناف ..
مناف: ..................
فارس: ردي علي يا بنت
مناف بعصبيه: شتبي ..
فارس: يه يه .. تعصبين ليش بعد ..
مناف: ما عصب مثلك واهاوش ..
فارس: هههههههههه .. زعوله .. قلت لج حقج علي ..
مناف: مب زعوله ..
فارس" دلوووعه": زين قومي غسلي ويهج .. وكلمني ..
مناف: بقوم اغسل ويهي .. بس مابي اكلمك
فارس" بتذبحني": زين وقت مابغيتي كلميني ..
مناف: يصير خير ..
فارس: زين يا زعوله .. انا تحت امرج
مناف: مع السلامه
فارس: هههههههه .. بس انتظر اتصالج .. مع السلامه .. وسكر الخط
سكرت مناف وتمت تفكر في كلمه وحده قالها فارس .. ( يا قلبي ) ما قدرت تشيلها من بالها .. هالكلمه حركت مشاعر مناف ناحية فارس .. بس مناف قطعت حبل افكارها لخوفها من المستقبل ..
قامت وغسلت ويها وراحت غرفة فيصل .. ولقته مع عبدالله .. تمت اطالعهم بحزن .. امس كان نايف معاهم واليوم قاعدين بدونه .. بدون حسه في البيت .. بدون رسوماته اللي ماليه البيت .. بدون ضحكاته في البيت .. خيم حزن على البيت بدون نايف .. صمت قاتل ما ينسمع فيه غير صدى الجدران .. واي صوت بيطلع من الجدران ؟!؟ وقفت عند الباب واخوانها قاعدين جنب بعض ولا واحد فيهم التفت عليها او رافع راسها ناحيتها .. عبدالله يسمع صوت نايف في راسه .. وفيصل يتذكر جمسه الممد على السرير .. كل واحد فيهم كان يفكر بعالم فيه نايف وبس ..