[اسطورة !]

سلمان: hi Smith ( هاي سميث )
سميث: hello Salman.. How are you man ( مرحبا سلمان، شو اخبارك؟)
سلمان: am fine how about you ( انا بخير وانت ؟)
سميث: fine as well, how is your family and friends(تمام اخبار اهلك وربعك؟
سلمان: they are all fine and Abdulhadi sending his greetings to you, we were talking about you a few days a go ( كلهم بخير، وعبدالهادي يسلم عليك .. كنا في سيرتك من كم يوم )
سميت يضحك: heheheh talking about me or gossiping ha, spell it out man ( ههههههههه .. تتكلمون عني ولا تحشون فيني ها .. اعترف يا ريال )
سلمان: wooow it’s been a long time since I last gossiped, man I miss those days some times ( وااااااااو .. مر وقت طويل وما حشيت .. اشتاق لذيك الايام احيانا )
سميث: I got news for you, guess what? ( عندي لك اخبار .. شو تتوقها ؟ )
سلمان: come on man shoot ( يا ريال هات ما عندك )
سميث: soon am getting out of the jail can you believe it, the guy I told you about died in a car accident last night, and I might visit you home ( قريب بطلع من السجن، لان الريال اللي قلت لكم عنه مات في حادث سياره امس، ويمكن ازوركم البلاد )
سلمان بوناسه: wooow that is the best news ever, man you’re going to be free again ( واااو، احلى خبر سمعته، يا ريال اخيرا بتصير حر)
سميث: I just can’t wait ( ما قدر انتظر )
سلمان: you are welcome home man for as long as you want ( حياك في بلادي وخذ راحتك )
سميث: thanks man, that I know you would do, kindness and good manners of you, ok man I got to go now, send my best regards to Abdulhadi and soon I shall meet with you both ( مشكور يا ريال، وادري انك قدها، من كرمك وعلو اخلاقك .. المهم انا لازم اروح الحين .. سلم على عبدالهادي وانشالله بنتلاقى عن قريب )
سلمان: ok my friend ( اوكي يا صاحبي )
سكر سلمان من سميث واتصل يبشر عبدالهادي ..

سلمان: السلام عليكم
عبدالهادي: هلا والله سلمان ..
سلمان: قول من اتصل فيني الحين ؟
عبدالهادي: ها يشر اكيد سميث
سلمان: اي والله .. ويسلم عليك
عبدالهادي: الله يسلمه .. طمني عليه
سلمان: خلاص بيطلع من السجن ..
عبدالهادي: coooool والله خوش خبريه
سلمان: والخبريه الاحلى .. انه ان شاء الله بيزورنا البلاد
عبدالهادي: ماشالله عليه .. مخلص هالانسان .. الله يهديه
سلمان: آمين ..
عبدالهادي: طمني عليك انت شمسوي؟
سلمان: والله لا جديد يا عبدالهادي .. وانت اخبارك
عبدالهادي: الحمدلله .. مرتاح بوجود الاهل حولي
سلمان: الحمدلله .. الا بقولك حياك عندنا يوم الاربعاء
عبدالهادي: انشالله ولايهمك يا بوخليفه
سلمان: ننتظرك الغالي ..
عبدالهادي: صار .. يلا مع السلامه
سلمان: سلااااام
سكر الخط وهو مبتسم .. وفجأه سمع صوت من وراه خوفه ..
هنادي: بوووووو ..
سلمان ارتعش من المفاجأه: هنوووووود يالمربوشه
هنادي ميته من الضحك: هههههههههههههههههههههه
سلمان ويسحبها من شعرها: على ايش تضحكين .. صرقعتيني ..
هنادي: هههههههههههه شعري خالي شعري
سلمان: لا والله وتضحكين بعد ..
هنادي: لا ماضحك بس شعري
سلمان: كأني شفتج تضحكين ..
هنادي وماسكه الضحكه: لالالا ما ضحك
دخل عليهم يوسف: ههاااااااااااااي
هنادي: ليش تضحك .؟
يوسف: لان خالي قطعج هههااااااااي
هنادي: خاااالي شوف يوسف ..
سلمان: عساج تخرعيني وتبيني ادافع عنج
هنادي او انها زعلانه: خاااااااالي ..
يوسف: هههههههه انا لو منج يا هنود .. ادفن راسي بالارض مثل النعامه من الفشيله ههههههههه
سلمان: ههههههههههههههههههههههههه ههه
هنادي: مو مشكله اوريكم انتوا الثنين ..
سلمان: شبتورينا ..
هنادي وهي ماشيه: صبروا علي ..
يوسف وسلمان: هههههههههههههههههههههههه
قعدوا سلمان يوسف فالحوش يسولفون .. وسلمان قال ليوسف خبر سميث .. يوسف استانس وايد
وتموا يسولفون مع بعض .. لين وقت متأخر ..

في نفس الوقت كان محمد حاط ايده على راسه .. و زوجته تتكلم ..
ساره: يا محمد شوف لك حل .. يا انا يا بنت عمك ..
محمد: انتي شو تبين منها .. منو قالج اني مستخف عليها .. انتي منو لعب بعقلج ؟
ساره: يوه .. لازم حد يلعب بعقلي .. انا مو ياهل
محمد: لو مو ياهل ماقلتي هالكلام .. انتي تظلميني يا ساره ..
ساره: يا الله عليك يا محمد تبي تطلع لي فيها البريء
محمد قام من مكانه: سمعي يا بنت الناس .. كلمه ثانيه ومايردج الا بيت هلج سمعتي ..
ساره بتحدي: يعني تهددني .. اصلا انا ماني قاعده لك ..
محمد: الله يحفظج .. بس عيالي ما راح يتحركون من هني ..
ساره بطلت عيونها من الصدمه: عيالي .. ماتحرك من دونهم ..
محمد: عيل قعدي بكرامتج ومسكي لسانج ..
ساره: لا مالي قعده معاك .. وعيالي باخذهم ..
محمد سحبها من ايده: لبسي عباتج .. وجدامي على السياره .. وملابسج بكره بجيبها لج ..
ساره والدموع تنزل من عيونها: لالالا .. عيالي ..
محمد بعصبيه: انتي جبتيه لنفسج .. خل ينفعج لسانج .. اخر عمري تشكين فيني ..
ساره: آآه
ركب محمد السياره وساره تتخبط بمشيتها من الصدمه .. ركبت وقعدت بصمت .. طول الطريق وهم الثنين ساكتين .. محمد قلبه معوره على حب حياته و زوجته ساره .. بس لازم يوقفها عند حدها عشان ما تتمادى .. و صل عند باب بيت اهلها .. وساره فتحت الباب بتنزل .. مسكها محمد من ايدها .. التفت عليه ..
محمد: ساره .. فكري فاللي سويتيه .. انا حبيبج محمد
ساره نزلت راسها وصاحت لما قالها حبيبج محمد .. ترك ايدها وطالعها وهي تنزل .. حس بالضيق والحزن .. سكرت باب السياره ودخلت .. ومحمد يراقبها لين دخلت البيت وسكرت باب البيت ..
محمد خذ نفس عميق" آه يا ساره .. ليش هدمتي كل اللي بنيناه .. فاطمه بنت عمي اللي عمري مافكرت فيها .. وفضلتج عليها .. وتقولين اني احبها .. " تم يطوف الشوارع ومو عارف وين يروح ..
لما فكر محمد انه يتزوج .. امه وابوه رشحوا له فاطمه بنت عمه .. بس هو ما بغاها لانه طول عمره يعتبر فاطمه مثل اخته .. ما عمره فكر فيها كزوجه .. وفاطمه تبادله نفس الشعور تعامله مثل ما تعامل اخوانها .. وساره كانت اختيار محمد .. شافها اكثر من مره برا .. وعرف كل شي عنها وتقدم لها .. وساره ما عليها زود .. بنت ناس اجاويد ومتربيه .. وايد جميله .. واخلاقها عاليه وهالشي اللي جذب محمد لها زود .. بس صدمة محمد فيها الحين مخليته ما يفكر في اي شي ..
وصل البيت ونادى على الريم ..
محمد: الريم اخذي نايف وناصر .. بينامون عندج الليله ..
الريم مبتسمه: ولا يهمك .. والريم على بالها ان ساره ومحمد بيطلعون يسهرون .. لانهم لو بيسهرون دوم يخلون عيالهم عند الريم ..
محمد: ولا تدرين .. انتي تعالي نامي في غرفتي معاهم احسن ..
الريم: وين ساره ؟
محمد: بيت اهلها .. وانتي طالعه نادي لي علوه يجيني الغرفه ..
الريم بصدمه: ان شاء الله ..
الريم تمشي صوب عرفة علي .. وكلام محمد يدور في راسها ..
الريم " شو صاير بينهم .. ليكون ساره زعلانه .. الله يهديهم " .. دخلت على علي ..
الريم: علي ..
علي مبتسم: هلا والله
الريم: محمد يبيك في غرفته ..
علي: محمد يبيني ..
الريم: ينتظرك ..
علي: خلاص جاي ..
طلعت الريم .. وعلي راح غرقة محمد ..
دخل على اخوه وشاف حالته .. كان منسدح على السرير ومغمض عيونه .. باين عليه الهم ..
علي: محمد .. شوفيك ؟
محمد فتح عيونه بتعب: هلا علي .. استريح .. مافيني شي .. اعتدل في قعدته وجابل اخوه
محمد: شوف يا علي .. انت غلطت على اختك .. وصار اللي صار .. وانت تدري ان الوالد زعلان منك ..
علي باحراج: اي نعم ..
محمد: وانت سويت العجيب يا ولد حمد .. شراب وبنات واماكن مشبوهه .. وختمتها بتسلطك على هلك واقرب الناس لك .. اسمع انا ما قول هالكلام اذلك او اهينك .. بالعكس انا اذكرك فيه عشان يحن قلبك وتتحسف على مابدر منك .. ابيك تصحح غلطتك .. تستمح من الوالد .. وتطلب رضاه
علي بحزن: بس ابوي ما راح يسامحني .. اعرفه بومحمد ..
محمد: ما عليك منه .. انا وخالد بنقعد معاه وبنكلمه .. بس انت صف النيه وتوكل على الله ..
علي: ولا يهمك .. بس متى انسب وقت اكلم فيه الوالد ..
محمد: اليوم المغرب بعد ما يرجع من المسيد .. انا وخالد بنكلمه وانت بعدين انزل له المكتب ..
علي: خلاص انتوا كلموه وادعوا لي انه يرضى علي .. بس تدري يا محمد ..
محمد: شو ؟؟
علي منزل راسه: وربي ما راح القى مثلكم يا هلي و عزوتي .. يعني اختي ريم على اللي سويته فيها وما سمعت منها الا الكلام الطيب .. وانت لما شديت معاك اول ما رجعت من المطار كبرت عقلك وسكت عني .. امي جنتي وناري على اللي سويته فيها وكل يوم تجي تقعد معاي وتطيب خاطري .. خالد وفاضل سلطان يتطمنون علي ويحاولون ينسوني همي .. على فكره ترا ابوي يمر علي بالليل يغطيني عدل ويطلع ..
محمد بصدمه: بومحمد بلحمه وشحمه !!!!
علي: اي والله .. كل يوم احس فيه .. وصرت اتعمد اني احذف اللحاف عني عشان يدفيني بجيته لي الغرفه ويغطيني .. والله العظيم يا محمد لو شو اقول بعد ما اوفي حقكم علي .. والله انتوا على راسي من فوق .. هلي و عزوتي .. بس طلبتك قول تم ..
محمد: تم من غير ماتطلب ..
علي: كلم ابوي عشاني .. مابيه يحسسني بالذنب .. كفايه الجحيم اللي اعيشه كل يوم ..
محمد: ولا يهمك .. انا وخالد بنقعد معاه اليوم وعلى الله يقتنع .. وانت صفي النيه مثل ما قلت لك
علي: ان شاء الله ..
محمد: زين قعدني قبل صلاة المغرب بنص ساعه ..
علي وهو طالع: ان شاء الله ..
طبعا محمد ماقدر ينام .. لاكثر من سبب .. اولهم هم ساره اللي ذابحه .. والثاني انه فاقد حسها في الغرفه .. فاقد قربها في السرير .. فاقد حضنها وصوتها .. غمض عيونه وهو يحاول انه ينسى ولو جزء بسيط من ساره .. بس كل شي يذكره فيها .. كفايه ريحتها في السرير .. ملابسها في الغرفه صورها اغراضها .. كل شي بالغرفه يذكره فيها .. قام وطلع من الغرفه .. دخل غرفة علي اخوه وحذف نفسه على السرير ونام بهدوء .. طبعا علي استغرب من اخوه .. لان هاي ثاني يوم له وهو ينام عنده ..

قرب يأذن المغرب .. راح علي عند محمد عشان يقعده للصلاه ..
علي: محمد .. محمد ..
محمد بتعب: ممممممم .. نعم
علي: يلا قوم ما بقى شي على الاذان ..
محمد بكسل: خلني انام خمس دقايق بس .. وبعدين قعدني
علي ابتسم: شو خمس دقايق .. يلا قوووووووم
محمد: زين .. بقوم .. قام بتعب وراح غرفته .. اول مادخل تضايق .. حس نفسه غريب كأنه اول مره يدخل هالغرفه .. المكان بدون ساره ممل وكئيب .. خذ له شور سريع وراح غرفة خالد عشان ينزلون مع بعض ويفتحون مع ابوهم موضوع علي .. طق الباب ودخل على خالد اللي كان سرحان بعالم ثاني ..
محمد: احم .. خالد
خالد مغمض عيونه: ........................
محمد" الولد هيمان": خالد ..
فتح خالد عيونه بهدوء: هلا محمد ..
محمد" احسدك على راحة بالك يا خالد": قوم خل نروح نكلم الوالد بخصوص علي .. انا وعدته ان انا وانت بنكلم ابوي قبل الصلاه .. وهو بينزل له بعد الصلاه يستسمح منه ..
خالد: ان شاء الله .. الحين بنزل وراك ..
طلع محمد من عند خالد .. قام خالد وتوضأ .. وهو في الغرفه يتمسح شاف نفسه في المرايه ..
خالد" ان شاء الله بكلم ابوي بعد عن مريم بنت عمي .. لازم اخطبها" .. ونزل المكتب عند ابوه ولقى محمد يتقهوى معاه .. وكانت اسماء في حظن ابوها .. قعد وصب له شاي وتم يناظر محمد ومتردد شلون بيفاتح ابوه بموضوع اخوه ..
محمد: يبه ..
بومحمد: لبيه ..
محمد: يبه علي ..
يقاطعه بومحمد بعصبيه: شو فيه هاذي ..
خالد: الله يهديك يا يبه .. علي يبي يستسمح منك ..
بومحمد بصراخ: نعم .. انا ماعندي ولد اسمه علي .. عن من تتكلم ؟؟
محمد: يبه اذكر بك وماله داعي هالكلام ..
خالد: علي غلط وغلطته كبيره .. بس مافينا حد منا كامل
محمد: صح يبه .. مافينا حد كامل ..
بومحمد: اولا مو انتوا تعلموني هالكلام .. ثانيا مافي نقاش في هالموضوع .. سكروا عليه
دخل عليهم علي ونزل عند ريول ابوه يبوسها: انا اسف يالغالي .. سامحني ..
بومحمد رفسه: اذلف .. قوم عني .. انا ماعندي ولد راعي حريم وشارب وخربطه مثلك .. عيال حمد ريايل بنشد فيهم الظهر .. ما تطلع مرايلهم على الحريم ..
علي بندم: والله الغالي كلامك صح .. بس زلة ابليس وسامحني فيها ..
بومحمد ويمشي بعيد عنه: قوم عني .. قوم انا ماعندي ولد مثلك .. ومابي ازيد في كلامي ارجع من وين ما جيت ..
اسماء وصاحت بصوت عالي: هئ هئ هئ .. بابا
بومحمد التفت عليها بخوف: ها يا بابا شو فيج ؟
اسماء وسط دموعها: حرام علي مسكين .. بابا حرام
خالد مسك اخوه من كتفه: قوم علي .. تعال اقعد عندي ..
بومحمد موجه كلامه لعلي: اطلع برا ..
اسماء وتضرب ابوها: ماحبك ماحبك .. انت تقول لازم نكون طيبين ونسامح الناس .. وانت ماتسامح علي اخوي .. حراااام .. تمت تصيح وراحت عند محمد
خالد: يبه الله يرضى عليك .. علي منك وفيك
بومحمد تأثر بكلام اسماء ودموعها .. وكلام خالد ومحاولة محمد لتصفية القلوب .. التفت على علي
بومحمد: انت اسمعني .. اقسم بالله اللي رفع سبع سماوات .. لو تكرر منك هالشي او اشوف عليك الزله لأمحيك من الدنيا .. علي راح وباس راس ابوه ويده .. بومحمد مسك نفسه ولا كان بيحضن علي من شوقه لولده .. بس ماحب يظهر مشاعره جدام عياله .. مسح على راس علي وطلع من المكتب .. خالد لا شعوريا حضن علي وهمس في اذنه ..
خالد" الله يقدرك على رضاه يا علي " طلع علي مع اخوانه وابوه وراحوا المسيد صلوا المغرب مع بعض .. بومحمد كان طاير من الفرحه لوجود علي معاهم .. بس مابين لهم هالفرحه .. بعد الصلاه تجمعوا الشباب عند ابوهم في المكتب ..
فاضل: الغالي .. ابي اغير الموتر ..
بومحمد ومندمج مع الكمبيوتر: ليش شو فيها سيارتك ؟
فاضل: الغالي .. موتر مو سياره
بومحمد: صج عاد .. بس انا بقول سياره
خالد: لا عربيه احسن
محمد: شدعوه صعيدي
الكل : هههههههههههههههههههههههه
خالد: زين ليش تبي تغير .. موترك نظيف
فاضل: خاطري في الرنج الجديد
محمد: يستاهل فاضل الرنج
خالد ضرب محمد عشان كلامه .. لان علي كان موجود .. وخاف ان هالكلام يجرحه .. محمد انحرج وسكت
بومحمد: ولا يهمك يالفضلي .. فالك طيب ..
فاضل .. لالالالالالالالالالالا
بومحمد استغرب: هااا ؟؟
فاضل: لين هني واسمح لي الغالي ..
بومحمد بتعجب: اسمح لك !!
فاضل: اي نعم .. الفضلي محد يقولها لي الا مريم بنت عمي .. واصلا محد يضبطها على الشفه الا مريم .. وحليلها ..
بومحمد: الله يرجك يا ولد .. خوفتني
في هاللحظه خالد كان وحده يخنق فاضل .. شلون يطري حبه مريم على لسانه .. قام عنهم من غير ما يتكلم .. الكل لاحظ بس ماعرفوا السبب .. الا فاضل .. ولام نفسه لانه من غير قصد قال اللي قاله ..
بومحمد: شو فيه اخوكم ..
محمد: مادري والله
بومحمد باستغراب" شو فيهم عيالي ؟؟ "
علي قام وطلع ورا اخوه .. ولقاه راكب السياره بيحرك ..
علي: خالد ..
خالد: هلا علي ..
علي: وين بو وليد ؟
خالد: متضايق شوي .. بطلع اتمشى
علي: حد ضايقك ؟؟
خالد: لا ولاحد .. بس ابي اطلع شوي ..
علي: اجي معاك ..
خالد: يسلم راسك الغالي .. ارتاح
علي: اللي تشوفه ..
رجع علي ادراجه الى مكتب ابوه مع الشباب .. وتموا يسولفون لين اذان العشاء ..

" لاتصدق بكره تندم .. وتلقى كل من حولك سراب .. من ووقف وياك وضحى في حياته وشال همك و صبر .. من لجل عينك تعنى لك تشوق وذاب في عيونه السهر "

فارس: محمد .. تصدق امس وانا اكلم مناف .. حسيت بشعور غريب ناحيتها ..
محمد: .....................
فارس: محمد .. شو فيك انا اتكلم ؟؟
محمد: ها ؟؟ اسف ما كنت معاك
فارس: وين وصلت ..
محمد منحرج: ولا مكان ..
فارس: علينا .. في من تفكر ؟
محمدبأحباط: محد يستاهل ..
فارس باستغراب: ها ؟؟ لا انت سالفتك سالفه .. علمني شو صاير ؟
محمد: شو صاير؟؟ مافي شي لا تهتم
فارس: حمودي .. مو علي انا .. هات من الاخر .. مزعل المدام وبتنام عندي الليله
محمد ابتسم: لا شدخل المدام
فارس: عيل شو اللي في بالك ؟
محمد: كل شي بوقته حلو ..
فارس: ولا يهمك حمودي ..
محمد: اطلب لي شيشه ..
فارس: الله واكبر .. شيشه مره وحده .. ولا يهمك ..
طلب فارس شيشه لمحمد .. وكان يتفكر فيه .. " شو فيه محمد .. مزاجه مو عاجبني .. شكل همه كبير كبير .. ايه عليك يا حمودي "
محمد " آه يا ساره .. شو اللي غيرج مره وحده .. حد لاعب في عقلج .. فاطمه بنت عمي بينت لها شي .. بس مافي بيني وبينها شي عشان ساره تشك .. لا اكيد حد لاعب في مخها .." وتم يشيش وهو سرحان .. اما فارس جاه اتصال من مناف ..
فارس: هلا والله ..
مناف: هلا فارس .. شحالك؟
فارس: طيب والحمدلله .. انتي اخبارج ان شاء الله النفسيه احسن الحين؟
مناف: انا اسفه على طريقة كلامي معاك امس ..
فارس" ولو انتي تمونين ": ولا يهمج يا مناف .. مقدر ظروفج ..
مناف باحراج: والله مفتشله منك يا فارس ..
فارس" يا ربي على الذرابه والادب": انا تحت امرج يا مناف .. لاتقولين مفتشله ولا غيره ..
مناف" وايد طيب": جزاك الله الف خيريا فارس ..
وهني نادى محمد على فارس ..
محمد: فروس .. شوف اللي واقفين هناك .. مو يوسف وعزيز اخوك ؟
فارس: لحظه شوي مناف .. والتفت على الشابين .. اي والله هاي بوسعود وبوخليفه .. وأشر عليهم من بعيد .. وهو نسى ان مناف على الخط .. وتم يسولف مع الشباب ومناف كان تنتظر على الخط يمكن حول 5 دقايق .. وتسمع سوالف فارس مع الشباب وتقول في خاطرها " الحين بيرد علي " وتنرفزت وسكرت التلفون .. وطرشت مسج لفارس ..
( مره ثانيه لو نطرت الناس على الخط .. لاتنساهم )
وصل المسج لفارس .. ولما قراه حس بالذنب والفشيله لانه نساها على الخط .. اتصل لها يستسمح منها .. بس هي كانت تشوف رقمه وماترد .. طرش لها مسج اعتذار ..
( انا اسف .. وربي اني لهيت مع الشباب .. ارجوج ردي على التلفون )
مناف قرت المسج ولا ردت عليه .. وفارس تم يتصل وهي ماترد .. قامت وسكرت الجوال .. وفارس وايد زعل ولام نفسه .. كمل سوالفه مع الشباب .. لين وقت متأخر من الليل ..

الساعه 11 ونص بالليل في بيت بوفارس .. فارس قاعد مع فاطمه اخته يسولفون في موضوع لطيفه صديقتها ..
فارس: جزاج الله خير يا فطيم .. عقبال مانفرح فيج ..
فاطمه: فديت عمرك يا فارس .. ان شاء الله نفرح فيك انت .. كم عمرك الحين ؟
فارس يحك راسه: توني 22 سنه ..
فاطمه: ههههههههههه .. شوف انت و ولد عمك .. لاتسون اعماركم كتاكيت .. كل واحد يقول انا 18 ولا 22 .. اسمع عاد .. من بكره باشتغل لك خطابه .. بشوف لك ذيك المزيونه اللي على ذوقك ..
فارس: لا على كيفج يالخطابه فاطمه .. لا يبه انا باخذ وحده مافي مثلها ..
فاطمه: سلامي عليك .. ومن تكون هاذي الوحده؟؟
فارس: للحين ماعرف من تكون .. لما اقابلها بقولج .. وطرت على باله مناف ..
فاطمه: انا على بالي وحده من اللي تعرفهم ..
فارس يدز راسها: شو بعد من اللي اعرفهم ..
فاطمه: ههههههههههههههه ..
فارس: اللي اقولج عنها للحين ماعرفها .. بس قلبي في يوم من الايام بيقول لي من تكون ..
فاطمه: اخوي وايد رومنسي ..
فارس: صج عاد .. تستخفين دمج ..
فاطمه: لا بس كلامك كله حب و رومنسيه ..
ودخل عليهم عبدالعزيز: منو الرومنسي ..؟
فاطمه: يا حيالله هالويه ..
فارس: عزوز .. لاتصدقها .. توها تقولي انت اكثر واحد احبه من بين اخواني ..
فاطمه: افا يا عزيزان .. تصدق كلام العذال ..
عبدالعزيز: انا اصدق قلبي ..
فاطمه وفارس: ياااااااااااا قلبك ..
الكل: ههههههههههههههههه
عبدالعزيز: بسألك فارس .. كم سعر المكينه من الوكاله ...؟؟
فارس: من الوكاله تجيك اغلى .. حول 3000 وشي .. بس مضمونه .. لو خذتها من شركات ثانيه ممكن تكون مغشوشه .. بس التجاري نص السعر ويخرب بسرعه ..
وتم عبدالعزيز يسأل وفارس يجاوب .. وفاطمه ضايعه بينهم ..
فاطمه: يلا يا جماعه تصبحون على خير ..
فارس: وين رايحه اختي ؟
فاطمه: خلكم مع السياير احسن ..
فارس وعبدالعزيز: ههههههههههه
راحت فاطمه غرفة امها .. ولقت خواتها قاعدين .. وتمت معاهم .. اما عبدالعزيز طلع يحوط فالشوارع مع يوسف .. وفارس تذكر مناف واتصل لها .. حصل جوالها مسكر ..
فارس" هالبنت اللي فيها مكفيها .. وانا ماكنت اقصد الطعها على الخط .. ياربي منها .. بحركاتها ودلعها بديت التعلق فيها .. وانا مابي هالشي يصير " .. طرش لها مسج ..
( مناف .. ارجوج لاتزعلين .. وربي ما كنت قاصد الحركه اللي صارت .. اتمنى تراجعين نفسج واول ماتقرين هالمسج اتصلي لي .. عشان خاطري اتصلي "