[اسطورة !]

سيف : والله اقوله . . يدي انا دوم ارمسه ويقولي لاحق لاحق لاحق . . انا اصرف ع بيت عايله . . اخواني وعيالهم كلهم في بيتنا . . وانته تعرف المصاريف يدي كيف تكون . . هيه ماتفهم ولا تبا تفهم . . بس تعيد وتزيد انت ما تباني وانت تقص علي . . ماتوقف معاي حتى

انا : انا ماوقف معاك ؟؟ عقب كل شي بينا تقول لي انا ماوقف معاك . .

يدي : خلاص . . حد ياي . .

دشت عمتي وعيالها الـ 4 . . : السلام عليكم . .

قام سيف وسلم على عمتي وعقبها قمت اانا وسلمت عليها . .

عموه عليا : شخباركم ؟

سيف بضيج واضح : بخير . . من وين يايه عموه ؟

عموه : موديه اليهال يلعبون . . ضاجو من البيت

سيف : منو مودنج . .

عموه : بروحي !!!

سيف : عميمممه كم مره قلتلج لا تسوقين ولا تطلعيييين بروحج . . تبين شي ازقريني انا بوديج لاخر الدنيا بعد . .

يدي : سيف انا بعدني عايش وهيه عايشه عندي والي انا اقوله يمشي مش انت

سيف : على عيني وراسي يدي ما قلت شي . .

عموه عليا : كل واحد لاهي بحياته سيف . . وانا ادري كيف تنشغل انت ويادوب ترتاح فالويكند . . وقلت اليوم الخميس بخليك ترتاح من كرف ابوك شويه . . ولا ادريبك الغالي ما بتقصر

سيف يبتسم : عميمه بعدج حلوه اغار عليج والله . . ادريبهم يغازلونج ويلاحقونج . .

ابتسمت عموه وصدت صوبي شافتني سرحانه . . اطالعت سيف : بلاها ؟

سيف : نفس كل مره . .

لاحظت ان سيف سحب عميمه لبعيد وقعدو يرمسون بس اختفى الصوت وماقمت اسمع شي !

يدي : مهره ؟

مسكت جتف يدي : ها يديه . .

يدي : سيري دوريلي دوا لونه اخضر ملفوف بقرطاس . .

قلتله : وين يدي حاطنه

يدي : مادري يدتج وين حاطتنه بس اكيد صوب الصندوق العود

سرت صوب الصندوق العود وتميت ادور ! والصوت صار واضح لسوالف عميمه وسيف ! فديتك يا يدي . .

سيف : ماتحسسس ماتحسس . . قسم بالله مافيها احساس . . تتحراني اقدر وقايل لا

عموه عليا : انزين بنت ما تنلام . . . لين متى بتم تترياك . .

سيف : تخيلي تهددني . . تقول لي لو ما يييتني هالاسبوع باخذ غيرك . .

عموه عليا : ههههههه ما تسويها . .ماتقدر

سيف : ماتعرفينها يوم بتعاند بتسوي كل شي

عموه عليا : ماتسويها . . البنت تعشق عيونك وين تروم تاخذ غيرك

انقهرت من عموووووه انقهرت وايد ماكنت اباها تقول جيه علشان ما يصدق روحه وايد ويكبر راسه علي ويتاخر اكثر واكثر . . كنت اباها تعصب وتقول صدقها وبتسويها علشان يخاف ويتصرررف . .

اتضايقت وعرفت ان اصلا ماشي دوا اخضر ويدي بس بغاني اسمع ورجعت عند يدي وانا منقهره . .

يدي : حصلتيه ؟

قلتله بنبره ضيج : لا . .

يدي يبتسم : الصبر زييين . .

اتنهدت بضيج : انا بروح يديه . .

يدي : توكلي على الله . .

سرت ادور يدوه عشان اشل الولد عنها . .

كانت تصلي العصر والولد يلعب بمزهريه فيها بطاريات وخراخيش . .

تحجبت عدل وشليته وهو يرافسني . .

اانا : صصقوووور بضربك . .

تم يضربني ويمط ويهي . .

ماسويت له سالفه وتحركت وحسو فيني عميمه وسيف اني طالعه . .

عموه عليا : وين رايحه ..

قلتلها بدون ما اطالعها : البيت

يدي يزاعق : سيف . .

سيف يزاعق : ها يديه

يدي : وصلها البيت عن يتغافلها صقر ويروح الشارع

سيف : ان شاء الله . .

عميمه تطالعني : مهور

اطالعتها : هاه . .

عميمه تبتسم : تعالي عقب بسولف وياج

قلتلها : بجوف . .

لاحظت ان سيف يلحقني وانا امشي صديت له بسرعه بدون نفس : لا تلحقني . . ادل الدرب

سيف يطالعني بنظره جاده : امشي . .

قلتله بحاجب مرفوع : قلتلك ادل الدرب . .

ومشيت عنه والولد يضربني ع ويهي مضايج مني ما يبا يرجع . . تجاهلته وتم يضربني ويضربني لين .!!!

انا : ااااااااااااااااااااااااا ه . . " نزلته من ايدي "

سيف تقرب : شفييييييج

تميت اتلوى من الالم وانا حاطه ايدي على عيني

سيف بغا يمسك ايدي ويوخرها عن عيني لكنه تراجع .

سيف : نشي لبسي عباتج بوديج المستشفى . .

قلتله : ما يحتاي . .

سيف شل الولد عني : يالله بسرعه ادخلي داخل لبسي عباتج وانا بنزل صقور وبسير ازقر عميمه وبقرب السياره وبوديج . .

قلتله وانا بعدني حاطه اييدي على عيني : قلتلك مابروح مكان . .

سيف بهدوء يذبح : اسمعي الرمسه لاتخليني اعصب عليج . .

وصلنا البيت ودخلت داحل . .

اميه كانت توها يايه من السوق وتفصخ عباتها ولمحتني : بلاج شو فيها عيييينج حمرا . .

انا : صقور ضربني بقوه عليها وظفره طويل قرمشني داخل العين . . سيف برع . . طرشي الخدامه تشل الولد عنه . . بيشلني المستشفى ويا عميمه عليا

امي : يالله بسرعه بسرعه سيري

ورحت عنها لبست عباتي وتميت اشوف عيني . . جد تعورني وشكلها احمر بشكل مش طبيعي ! وحتى مش قادره ابطل عيني من الحرق والالم . .

طلعت بدون نفس . .

امي : يوم بتوصلين دقيلي على طول خبريني شو بيستوي سمعتي

قلتلها : ان شاء الله

.

.

البارت الثاني . .

.

.

.

طلعت من البيت وشفت سياره سيف صافه عند باب بيتنا . . كنت بركب وراه . .لكن غيرت رايي وركبت ورى عميمه علشان ما يطالعني من الجامه بعد . .

عميمه : من عصبيتج واستعيالج شوفي شو صارلج . .

سيف يصد يطالعني : تعورج؟

قلتله بدون ما اطالعه : لا . .

لاحظت ان عميمه تضحك وتهمس وانقهرت . . وتميت صاده صوب الجامه ومتجاهلتنهم على الاخر . .

سيف كان يحاول يفتح باب حوار وباب رمسه لكن ادريبه متوتر وخايف علي ومش عارف شو يسوي

سيف يصد : بخبر الدكتور يعطيج اجازه علشان ترتاحين من الكليه كم يوم . .

عميمه : باجر اليمعه سيف

سيف يرد يصد يطالعني : بسويلج واسطه برتبها لج

قلتله بنظرة جاده : شوف الدرب بتدعم

سيف يرجع يصد ويبتسم : لو قاعده ورايه جان ما صديت

عميمه : اصطلبو . .

انا : قوليله ينطب ويسكت ومايرمسني

سيف : قوليلها ما بسكت

عميمه : قلتلكم اصطلبو بس عاد . . مخليني طوفه عبيطه . . جب يلا بلا مصاخه

ابتسمت على تعليقها وابتسم سيف بعد . . وحزتها وصلنا المستشفى . .

عميمه : استغفر الله

سيف يطالعها : بلاج . .

عميمه : ييايه بزنوبة . .

ضحكت لا ارادي وسيف ابتسم : لا تفكرين تنزلين ولا بتبرا منج . .

عميمه : مابببببببببنزل . . يالله نزلو خلصو بسرعه

سيف صد : يالله . .

نزلت وكنت متوتره . . اول مره احس بهالتوتر من قربي له . . حسيت بشعور ما ينوصف . . لاحظت ان هو مرتبك من ايدينه . . كان يلعب باصابعه بطريقه تبين التوتر . .

صدلي بنظرة عصبيه خفيفه : دخلي شعرج . .

دخلت شعري من دون ما اصد له . .

مشينا لين قسم العيون . .

سيف : عطيني بطاقتج

طلعت له بطاقتي وعطيته من دون لا المس ايدينه . .

سيف : اقعدي اهني لين ما ارجع . . لاتروحين مكان . .

قلتله : انزين

مشى شوي و رد رجع : ياويلج لو تحركتي من اهني . .

قلتله وانا عاقده حياتي : قلتلك انزين َ!!

سيف : ترى ما تخوفني الا الانزين . . قولي ان شاء الله ولا ماتعرفين؟

صدت حرمه اطالعت سيف بنظرة خلته يقفط . . ابتسمت حزتها ورحت اقعد وهو مشى عني . .

سرحت بافكاري بعيد ونسيت عوقي . . متى يا سيف بمرض وبتيبني المستشفى وانت ماسك ايديني؟ وانت تمسك ويهي وتحط ايدك على عيني وتدعيلي اني اصير زينه . . متى تصير حلالي ؟ ليش كل بنت تحب لازم تنتظر . . مايصير البنت تحب وحبيبها يكون جاهز لها ! ليش قانون الحياه جذي . .

قطع افكاري صوته : في شو تفكرين . .

حطيت عيني ف عينه وانا جد مرتبكه . .

سيف خلا بينا كرسي وقعد فالانتظار معاي . . مع انه انتظار للحريم بس !! لكنه طنش

سيف : قبلج 4 . . انتظري شويه

مارديت عليه . .

سيف : زعلانه مني ؟

اطالعته : شرايك !

سيف : انزين انا شو ذنبي . . شو بايدي شو اقدر اسوي خبريني بسوي

اطالعته : املج علي ع الاقل . .

سيف : منو بيوافق على ملجه طويله خبريني وانا مستعد

صديت عنه

سيف : شفتي . . بروحج تعرفين

تمينا ساكتين فتره . .

قلتله : لا تتصل بي . .

سيف يطالعني . .

قلتله : انا مابا اغلللط . . واكبر غلط سويناه ان كلمنا بعض

سيف : وكيف بطمن عليج