[فيتامين سي]

::::الجزء الرابع::::

ام محمد:ناصر يله يمه قوم مابقى على اقامه الصلاة شئ يله يمه...وسكرت الباب
ام محمد وهي تنزل من الدرج طلع عليها خالد:صباح الخير يا ست الكل...وباس راسها
ام محمد تتصنع العصبيه:اي صباح خير حنا بالضحى وتقول صباح يله يمه رح اكلك لقمه قبل ماتروح للصلاة ..
خالد بابتسامه:ان شاءالله اوامرك على راسي من فوق ...ونزلوا تحت وحصلوا ابو محمد جالس بالصاله ينتظر ام محمد تجيب له البخور..
ابو محمد بعصبيه:وينك يانورة مابقى على الصلاة الا نص ساعه وين بخورك خليني الحق على الصلاة
ام محمد مستغربه:هذا انت قالتها باقي نص ساعه يعنى فيه وقت..اعوذبالله دايم انت عجل بكل شئ
وراحت ام محمد للمطبخ تشوف الجمر وتجيبه لزوجها...
ابو محمد:خالد شووف ناصر قام والا لا..ورح لغرفتي جب العلبه الحمراء فوق التسريحه تحصلها
خالد واقف:ان شاءالله..طلع خالد فوق ودخل غرفه ناصر حصله بالحمام ياخذ له دش ودخل غرفه ابوه حصلها شبه مظلمه لان مانفتحت الستاير وكانت ريحه الغرفه تجنن ولما وقف خالد قدام التسريحه اخذ عطر عطر عشان يدور على العطر اللي فايح بالغرفه ولما حصله قراء اسمه ورجعه مكانه واخذ العلبه الحمراء وطلع..
وهو نازل سمع ابوه يتكلم عن جمعتهم وعن تغير الخطه الى صارت كل جمعه بعد صلاة الجمعه
ام محمد:عشان كذا ودي اغدي اخوني من زمان ماغديتهم مابعد زواج محمد وابيك توصي لنا على خروف زين من اللي تعرفه ومانبيه خروف كبير لانبيه طلي صغير وش قالت..
ابو محمد وياخذ العلبه من خالد:ان شاءالله مايصير خاطرك الا طيب..على طاري محمد بيجي مع مرته اليوم..؟
ام محمد وتعطيه المدخنه:يوه وش فيك نسيت كل جمعه يجون يتغدون عندنا والخميس تروح عند اهلها
خالد حب يمزح مع ابوه:هاه ابو محمد شكلك كبرت وخرفت..غمز لامه
ابو محمد بعصبيه ويقوم عشان تبخره زوجته:الله يغربل ابليسك من ولد انا كبرت وخرفت..سمعتي كلام ولدك...
ام محمد تمزح:صادق ولدي ماكذب اجل تنسى جيات محمد هو صح مايجي كثيرمن جمعه لجمعه..
ابو محمد:هذاك انتي قلتيها من كثر جياته مايجي الا من جمعه لجمعه
ام محمد:بس المفروض ماتنسى يوم الجمعه بالذات عشان ولدك الكبير يجيك..
ابو محمد:طيب وليش مايجي وسط الاسبوع لازم الجمعه..
ام محمد تاكد كلام ولدها:صدق انك مخرف انت وش فيك قمت تنسى نسيت البنت تدرس ومسكينه وين تحصلها دراسه ولا بيت ولا زيارات ..
ابو محمد يعطيها المدخنه:اقول لايكثر هرجك ويله ياخالد عجل مابقى وقت انتظرك برا فمان الله وطلع ابو محمد يحب يروح مع واحد من عياله كل جمعه للمسجد اول كان دايم مع محمد بس الحين خلاص تزوج وتركهم والحين يروح مع خالد وناصر قليل مايروح لان اخر شخص يقوم ..
ام محمد:فمان الكريم...وحطت المدخنه على الطاوله تنتظر ولدها يخلص من الفطور عشان تدخنه
وبالوقت نزل ناصر..خالد قام وراح يغسل
ناصر:صباح الخير يمه...حب راسها
ام محمد:اي صباح انت الثاني تعال اكلك شئ..وجلس ياكل عالسريع ويشرب شاهي..جاء خالد وامه كانت تحط له عود عشان تبخره وجلست تبخره وهي تبتسم ولما خلص مشى يبي يطلع
ام محمد:يمه خالد تعال احط البخور تحتك..استحى خالد هذي مو اول مرة تحطه تحته بس استحى من شئ ثاني لانه من اول ماتخرج ومايسمع غيره
ام محمد بابتسامه وتحطه تحته:عساني ابخرك معرس ان شاءالله واشوف زوجتك تبخرك قدامي..
خالد يحاول يكون طبيعي:بحياتك وبحياه ابوي ان شاءالله..
ام محمد تقترح:الحين انت خلصت دراسه وتشتغل وش ناقصك..غير العروس هاه ابدء اشتغل خطابه لك..وتبتسم
خالد:لايايمه مو الحين خليني اتنفس وبعدين لكل حادث حديث يالله فمان الله...حب راس امه وطلع مايبي يسمع اي تعليق منها..

حاولت تفتح عيونها من حره النوم..اقتلبت للجهه الثانيه ورصت على عيونها مرة تسترجع احداث امس في بيت عمتها ومع وليد ومشويرهم من بعد مااشترلها اللي تبيه ودخلوا على بنده يشترون لهم كم غرض وتمشووا على شوارع العليا ومروا على الفيصليه والمملكه .. فتحت عيونها وعرفت انها ماكانت تحلم وانه واقع حدث فحمدت ربها على كل شئ ولفت تبي تشوف اخونها شافت حماده لسه نايم وريمي جالسه تحاول تصحيه بنعومه ....
هديل بصوت كله نوم:ريمي ...التفتت عليها...صباح الخير ليش ماقيمتيني..
ريمي تأشر على حماده:اده..نام (حماده نايم)..باستها هديل وعالطول قامت ودخلت الحمام اخذت لها دش وطلعت عشان تروش اختها وتنزل وبتخلي حماده براحته..
نزلت تحت وماحصلت غير ابوها واخوانها يفطرون فراحت عندهم..
هديل:السلام عليكم...
الكل:وعليكم السلام..جلست وجلست اختها بجنبها واعطتها خبز ممسوحه بجبن..
ابو وليد:ابوي هديل..حطيلنا جمر نبي نتدخن..
هديل:ان شاءالله يوبه..وراحت هديل للمطبخ وحصله الشغاله تقطع السلطه ..
هديل:ستي خلي هذا الحين وحطي فحم على النار..واذ خلص ناديني وطلعت من المطبخ
الشغاله:تيب .... رجعت عندهم و قبل ماتجلس ..
ابو وليد:هديل ماتدري متى جت شيخه من الزواج؟ .... "هديل تعرف متى جت لانها بعد ماصلت الفجر عالطول راحت للسريرها وبنفس اللحظة انفتح باب غرفته وتظاهرت و كانها نايمه لان عرفت مين دخل عليها من ريحه البخور ومن فستانها اللي مع كل حركه يطلع صوت صحيح ماسوت شئ بس كانت تبي تطمن انهم موجودين يعنى تبي تشوف هديل موجوده او جلست عند احد عماتها وطلعت بهدوء مثل مادخلت..
هديل وتحاول ماتناظر ابوها:مدري..
وليد:هديل الله لايهينك عطيني خبز..واعطته وهي تفكر وسرحانه
عبدالله يبتسم:هديل .....هديل...وفجاءه ضرب رجلها بخفه وهي عالطول قمزت
هديل بخوف:هلا عبدالله وش تبي خبز...ضحك عبدالله ووليد بصوت واطي عشان ابوهم فيه وهي اكتفت بتنزيل عيونها..
عبدالله يبتسم:شوفي ستي تناديك...قامت للمطبخ تشوف وش عندها الشغاله
هديل بضيق:هاه سيتي وش تبغين..
ستي:انتي قووول كلص فحم نادي انا والهين كلص...اخذت المدخنه وحطت الجمر فيها وطلعت للصاله واعطت ابوها المدخنه وراحت تجيب علبه العود من المجلس..اعطت ابوها العلبه وجلست توكل ريمي و اكتفت بالحليب..
خلصت من الصلاة ويله تقوم من ظهرها وجلست بالمجلس عشان كل بعد صلاة جمعه يجونها عيالها
الجده:صفيه...صفيه ..تعالي افتحي التلفزيون خلينا نشوف خطبه الجمعه..وجت صفيه وفتحت التلفزيون وحطتلها على الحرم(مكه)عشان تشوف الخطبه وعلت على الصوت وقامت..
الجده:صفيه...جيبي القهوة والشاهي الحين العيال بيجون
الشغاله:تيب ماما..وراحت ..ودخل عليها ولدها عبدالعزيز ومعه سلطان وفيصل..
ابو سلطان:السلام عليكم يمه..شلونك وشلون صحتك ..وحب راسها
الجده:هلاوالله وغلا بوليدي بخير عساك بخير انت وشلونك وشلون عيالك وبناتك.؟
ابو سلطان يجلس عند امه:كلهم بخير يسالون عنك وعن احوالك..
سلطان:وشلونك يمه عساك بخير؟
الجده:ياهلاومسهلا..وحطت ايدها على جبينها تبي تشوف اي واحد من عيالها..؟
سلطان يجلس:انا سلطان ولد ولدك عبدالعزيز ..يضحك
الجده:هلا بولدي ولد الغالي وشلونك وشلون عيالك؟
سلطان:كلنا بخير يا وجه الخير..
فيصل يحب على راس امه:شلونك يمه عساك بخير.؟
الجده تحاول تشوف مين هو:هلا والله بوليدي بدر وشلونك ؟
فيصل يضحك على جدته:لايمه انا فيصل..وشبلاك يمه بديتي تخرفين؟؟
الجده بعصبيه:انا عارفه انك فيصل الظاهر انت اللي مخرف انا اسال عن بدر ماشفته معكم
الكل يضحك على تصريف العجيز وعلى عصبيتها ..
ابو سلطان:الله يهدك يايمه ترى منتي صغيره ....
الجده مفوله:هاه يا وسيع الوجه الحين تقول ذا الحكي قدام عيالك ماقول الا خسارة تربيتي فيك ياولد ابوك..وصدت للجهه الثانيه ابو عبدالعزيز متوفي من زمان بس غلاته للحين بقلبها...
ابو سلطان يحب راسها:كل شئ ولا زعل الغاليه ام عبدالعزيز ترى مو انا قايله هالكي هذا فيصل بس الظاهر ان نظرك وسمعك بدء يضعف هاليومين...
الجده متنرفزة:سمعي ونظري احسن منكم واعرف افرق بينكم واعرفكم باصواتكم بس ماقول الله يخلف على تربيتي فيك ..
ابو سلطان يبي يلطف الجو:عسى ربي يحفظك ويطول بعمرك ان شاءالله ويعطيك القوة والصحه انتي تعبتي وربيتي وطلعت رجال وانا ماقالت انتي كبيرة يعنى خلاص راحت عليك انا اقولك كبيرة بعقلك وقلبك الوسيع..شاف ملامح امه تلين على كلامه الحلوو...
الجده فرحانه:عسى يوفقك ياوليدي ويفتحها بوجهك وبوجه عيالك ويستر عليك..ودخلوا عليهم صالح وولده حمد وجلسوووا يسلموا على بعض وياخذون علوم بعض..الجده منيرة تسكن ببيت لوحده مع شغالتين وسواق ومارضت تعيش مع واحد من عيالهم لان بيتها فيه ذكريات زوجه وانتم تعرفون العجايز والرومانسيه الزايده اللي تطلع معهم باخر اعمارهم..
دخلت هديل المطبخ وشايله معها صينيه الفطور ووراها ريمي اللي تشرب الحليب بكاس خاص للاطفال
وهي تحرك راسها يميل وشمال كانها ترقص بشعرها شافتها هديل وابتسمت لها وعالطول طلعت من المطبخ وشافت مرة ابوها نازله وباين اثار النوم في وجهها وبنفس اللحظة دق التلفون..
ام وليد:الووووو
...:السلام عليكم..شلونك ام وليد؟ ..ام وليد استغربت من الصوت الناعم وتحاول تستوعب وتعرف من هو صاحب الصوت..
ام وليد بحيرة:وعليكم السلام..مين معي؟
شذى:انا شذى صديقه هديل ..؟ شذى صديقه هديل من يوم كانوا باول صف لين اخر سنه دراسيه بس هي كملت دراستها الجامعيه..ومازالت على اتصال معها ومع الجوهرة اللي بنفس التخصصات(احياء)وتعرف مشاكل هديل مع مرت ابوها وام شذى جيران ام شيخه وتعرفها عز المعرفه بنفس الوقت تصير عمتها نورة مرت عمها..
ام وليد:هلا والله بشذى عاش من سمع الصوت وشلونك وشلون امك؟
شذى:عاشت ايامك بخير نسال عنكم..
ام وليد:تسال عنكم العافية..وين امك غاطسه مانشوفهم كذا مرة نجتمع مع حريم الحارة ولاتجي عسى ماشر..؟
شذى:ماشر بس امي حصة(جدتها)متنومه بالمستشفى وامي معها..
ام وليد بخوف متصنع:يوه سلامتها ماتشوف شر وش فيها؟..ماقد اجتمعت مع الجده حصه اساس لانها ام رجلها....
شذى:الله يسلمك بس السكر نازل عليها وان شاءالله كم يوم وتطلع..
ام وليد:تطلع لكم بالسلامه..
شذى:امين..اجل وين هديل؟
ام وليد تناظر هديل اللي وقفت لما سمعت اسم شذى:لحظة....كلمي شذى
هديل بابتسامه فرح:السلام عليكم..هلا شذى عاش من سمع الصوت وش اخبارك واخبار الاهل؟
شذى بنفس النبرة:وعليكم السلام هلا هدوووووله وحشتيني موووت انا بخير وكلنا بخير انتي طمنيني عنك وعن احوالكم؟
هديل تتجنب نظرات خالتها:الحمدلله كلنا بخير وانا مشتاقه لك اكثر..وش اخبارالدراسه واخبار الجوهرة..؟؟
شذى:والله ماشيه والحين نستعد للاختبارات الفصلي..لاتبخلين علينا بدعواتك والجوهرة بخير مشتاقه لك بس تخاف تدق وتتصرف وانتي ابخص عاد..تضحك
هديل:اهااااا طيب سلميني عليها وقوليلها له وحشه الدبه..
شذى حست بصوت هديل وانها تسرعت بكلامها:ان شاءالله معليش هديل دقيت عليك بذا الوقت اذ مسببه لك احراج ..قاطعتها هديل
هديل:وش ذا الحكي شذى لا احراج ولا شئ عادي وكويس انك دقيتي وسمعت صوتك واخبارك..
شذى براحه:طيب وش اخبار ريمي هاه بدت تمشي ولا لسه؟
هديل تناظر اختها:ريمي بخير صارت حرمه بسم الله عليها ..تضحك على اختها اللي استحت
شذى:الله يخليها لكم ايه على فكرة امس دقيت عليكم ماحد شاله ؟
هديل وتناظر خالتها ونزلت عيونها عالطول:ايه كنا عند عمتى سارة مجتمعين كلنا
شذى بفرحه:اخيرا طلعتي وغيرتي جوا..طيب هدووووله انا لازم اقفل الحين ولاتقاطعين
هديل بحزن:طيب الله معك وسلمي على الاهل..وسكرت منها
ام وليد بتفحص:وش عندها شذى..؟
هديل:كل خير..ومشت عنها تتهرب من اسئلتها المعتاده
ام وليد:وش اخبار جمعتكم ؟
هديل ومعطيه ظهرها لخالتها:الحمدلله بخير يسالون عنك و..قاطعتها ام وليد
ام وليد وهي تمسك طرف قميصها من الكتف:بلا كذب وقولي كل شئ من الالف الى الياء
هديل بخوف:والله ياخالتي ماكذبت عليك..
ام وليد بعصبيه وهي تهز هديل:مين كان فيه وش سويت....
هديل ترتجف:الكل فيه الا مرت عمي و...قاطعتها
ام وليد:وينها..تكلمي بسرعه قاعده اسحب منك الكلام سحب
هديل:معزومه بزواره من طرفهم...
ام وليد:ومرت عمك عبدالعزيز وبناته ؟؟
هديل:بس مرت عمي وبنتها منال وبناتها ماجوا..
ام وليد تترك هديل:اسمعي يا هديّل هذي اخر مرة تروحين عند عماتك سامعه..وراحت عنها وهديل خانقتها العبرة وطلعت فوق بسرعه لان سمعت اخونها جووا من الصلاة ولاتبيهم يشفونها..
نوف بصوت عالي:طيب ان شاءالله يمه الحين بجي..رجعت تكلم منال..هاه وش اسوي وربي مو قصدي اجرحها كنت امزح..
منال وكانت مبعده السماعه من صوتهاالمزعج:اعوذبالله عليك صوت اللهم ياكافي يا بنتي فيه شئ اسمه حطي ايديك على السماعه مو باذني تصارخين.
نوف بعصبيه:يوووووه منك وبعدين هذا جزاتي اتصل عليك واقولك ابي حل..
منال بهدوئها المعتاد:It wasn't my fault(ماهي غلطتي)
نوف بنرفزه:تدرين عاد الشره مو عليك على اللي يستنجد فيك طسي عني..وقفلت بوجهها
منال تبعد السماعه:Crazyوقفلت السماعه وسمعها ابوها عبدالعزيز اللي توه داخل من برا ..
ابو سلطان يبتسم لبنته ويحط يده على كتفها:مين الـCrazy ؟
منال بزعل مصطنع:Your niece
ابو سلطان وقف مكانه عشان يفهم كلام منال:هاه وش قلتي نيس وش نيس بعد يطلع..؟
منال بدلع:هذا يطلع ياطويل العمر نوف بنت اختك..برطمت مثل الاطفال
ابو سلطان يضحك:هههههههههههههههههه نوف وش فيها
منال:سكرت التلفون بوجهي..
ابو سلطان يضحك على هبال البنات:هههههههههههههههه نوف تسوي كذا لاماصدق نوف اكبر من الحركات هذي الا اذ انتي رفعتي ضغطها بحركاتك ..
منال بجديه:لا والله يوبه الحين انا ارفع الضغط وهي مسبعه من الكوثر لالالا هذي بنت اختك ماحد يقدرلها واسال عمتي عنها وش سوت امس مع هديل اللي بغت تموت بسبت حركاتها
ابو سلطان وهو يجلس:وش سوت لها يله سمعيني عن اخبار بنت اختي ..وقالت له سالفه هديل والبسه(القطوة)وسالفتها والكلام اللي انقال لها وصد هديل عنها..
ابو سلطان وهوفاطس عليها:ههههههههههههههههههه� � الله يهديكم ان شاءالله ونوف تدري ان هديل خوافه وليش تخوف هالمسكينه هههههههههههههههههههه
منال:نحاسه ومنقهره منها..ام لسان طويل صادق فواز المفروض ماماشيها اخاف تعديني بالسانهاااا..وابوها فاطس ضحك عليهم
ابو سلطان:وحتى فواز على اخته المسكينه هههههههههههههه الله يهديكم ويصلحكم
منال:طيب يوبه وش رايك بالكلام اللي قالته نوف لهديل..منال تحب تاخذ وتعطي مع ابوها لانه من بعد ماتقاعد وهو جالس بالبيت ماغير يسمع بناته ويسمع شكاويهم مع ازواجهم يعنى مصلح اجتماعي
ابو سلطان بجديه:غلطانه والغلط راكبها من راسها..الحين من زمان ماشفتوا هديل ولا تتكلمون معها مثلك انتي ونوف المفروض تقدرون شعورها بعد مو عشانها بنت عمي او بنت خالي اطيح الميانه البنت مسكينه الواحد لازم يراعي ظروفها حتى لو هي اختي..منال تفكر بكلام ابوها ولقته صحيح المفروض نراعي شعورها مو نزيدها..
ابو سلطان:منوووووله وين امك؟
منال بدلع:بالمطبخ بروح اشوفها..وقامت عن ابوها اللي يدعي لها بالهدايه والتوفيق
جتهم نوف وهي متضايقه من برود اعصاب منال وهي على نار فجلست بعصبيه
ابو نواف:وشفيك نوف عسى ماشر ليش عابسه هالوجه؟
نوف بعصبيه:مافي شئ يوبه؟
ام نواف:انا اعرف وش سوت اكيد مافي غير لسانها تبراء منها مثل كل مرة ..
نوف تناظر امها بعصبيه من غير ماتعلق شئ لانها صادقه بكل اللي تقوله..
فواز يبتسم:مين الضحيه هالمرة يا ام لسان طويل ههههههههههههههههههههههههه ههههههههههههه
نوف بعصبيه:فووووزوووه وربي مو رايقه لك ترى احط الحرة فيك..
ابو نواف بعصبيه:نووووف...اذ ماحترمتي اخوووك اقل شئ احترميني انا وامك مافي اي اعتبار
نوف:اسفه يوبه بس ماتشوفه وش يقوووول ..
ابو نواف يوجه الكلام لفواز:فووواز خل عنك اختك كل يوم هواش خاطري يوم اشوفكم ماتتناقرووون تجلسون بهدوء من غير هواش..
فواز انحرج من كلام ابوه:ان شاءالله يوبه بس خلها تبعد عن البنزين شووووي ترى البنزين والنار يؤدي الى الاحتراق ...يغمز لاخته
نوف بنرفزة:شفت يوبه شفت اني مظلومه وتحطون كل شئ على..شافت ابوها يهز راسه وكانه مل من الديباجه الطويله العريضه كل يوم..
ام نواف تسكتها:انتي اسكتي واخليه عنك ماكان ظلمناك زي ماتقووولين..نواف يبي يلطف الجوا
نواف:يمه وين الدقوس اللي من عمتي نورة..
ام نواف:يوه نسيته تلقاه على طاوله المطبخ..قام ولدها يجيب الدقوس ..هات صحنك فهد..مد صحنه لزوجته..وجاء نواف ومعه الدقووس
ام نواف:اقووول فهد ترى اختي نورة عازمتنا يوم الجمعه اللي تجي عندهم ووصتني ابلغك
ابو نواف:يالله تلحقنا خير اذ جاء الجمعه لكل حادث حديث..وبعدين وش المناسبه
ام نواف:والله تقول من زمان ماغدت اخواني وتبي تجمعهم ما نشوف الواحد بالسنه مرة وخلينها غدا بعد صلاة الجمعه يصير الكل مجتمع احسن وراح تبداها هي ...
ابو نواف ويرفع كاس اللبن:يعنى بتكنسلون جمعتكم كل خميس..ويشرب
ام نواف:ايه تقول الجمعه احسن ووصتني اقولك واكدت على جيتك بعد
ابو نواف:ان شاءالله يصير خير...
الساعه 3باقي على صلاة العصر نص ساعه وهديل مثل ماهي ماتحركت من فراشها وكانت شبه منسدحه وبين يدينها دفتر خواطرها وتمسح دموع نزلت من غير ماتحس وهي تكتب خاطرتها...
وليد يطق بابها:هديل ....هديل ...هدووووله
هديل وهي تمسح دموعها وتركت الدفتر على السرير وناظرت نفسها بالمرايا وحمدت ربها ماكان باين عليها اثار الصياح فعدلت من شعرها وفتحت الباب وحصلت وليد وحاط يده على الباب متسند
وليد بابتسامه:ممكن اعرف الغاليه ليش ماتغدت معنا..؟
هديل منزله راسها:مالي نفس ..ورفعت عيونها لخوها اللي يناظرها بكل اهتمام
وليد:مالك نفس او...زعلانه
هديل تحاول تكون طبيعيه:لا مو زعلانه بس جد مالي نفس..
وليد بجديه:والسبب....؟
هديل تحاول تقنع اخوها:عندي صداع ذابحني ...
وليد بخوف:من متى؟وليش ماقلتي؟
هديل تطمن اخوها:من ساعتين تقريبا والحين الحمدلله بدء يخف..نزلت عيونها ماتبي تنفضح
وليد:لالالا البسي عباتك وانا انتظرك بالسيارة ..ومشى عنها بس هديل عالطول مسكته ماتبيه يروح
هديل بابتسامه:ماله داعي وليد قلتلك الحين بدء يخف بعد ما اكلت بندول لاتكبر السالفه وهي ماتسوى
وليد بنظرة جديه:متاكده انه بدء يخف او تضحكين علي..
هديل منزله عيونها:قلتلك خلاص اكلت بندول والحين بيروح ولاتشغل نفسك..تناظر اخوها وتبتسم
وليد براحه:طيب انا بروح اريح شوي قبل صلاة العصر تامرين شئ...يبتسم
هديل نفس الابتسامه:سلامتك ...وراح عنها وليد ودخل غرفته عشان يرتاح مثل مايقول وانسدح على السرير وفجاءه سمع طق باب غرفته وقال ان الباب مفتوح وطلت من الباب هديل وهي مستحيه وباين عليها تردد فعدل وليد نفسه
وليد بحيرة:هلا هدووووله تبغين شئ ..؟
هديل منزله راسها ومتردده:اممممممممم ممكن ....اخذ رايك بشئ؟
وليد مبتسم:افاااااا عليك انتي تامرين امر تفضلي تعالي..دخلت وسكرت الباب وراها وجلست على كرسي الكمبيوتر وماهي عارفه وشلون تبدء تحس بخوف وباحراج ففضلت السكوت..
وليد بعد ماطال سكوتها:هاه هدووووووله وش عندك كل اذان صاغيه..يبتسم لها وهي رفعت عيونها
هديل متردده:احم احم ......وليد......انا......خلاص انسى...
وقامت عالطول تبي تطلع بس وليد اسرع منها ومسك الباب عشان ماتطلع ووقف مقابلها
وليد باهتمام:هدووووووله وش فيك..قووولي اللي بخاطرك من غير اي خووووف الا اذ انتي ماتحبيني ..برطم مثل الاطفال
هديل:لاتقول كذا وليد بالعكس انت وعبدالله اللي اعزكم ..نزلت راسها
وليد مبتسم:طيب دامك تعزينا قولي اللي بخاطرك وش تطلب الغاليه؟
هديل منزله راسها تخاف يعصب عليها:اخاف تعصب علي ...
وليد:هديل وش فيك تكلمي قولي طلعي اللي بداخلك والله ماراح اتكلم اللين ماتخلصين كلامك و شيله فكرة اني اعصب عليك انا وليد مو حي الله ...يغمز لها ويضحك
هديل مبتسمه:ابغى..اشترك..في..منتد� �....نزلت راسها وليد ماقل شئ غير يناظرها
هديل بخوف:خلاص وليد انسى اللي قلتلك وفتحت الباب تبي تطلع بس وليد وقفها
وليد بجديه:لحظه هديل..في اي منتدى تبغين تشتركين؟؟ناظرت له هديل وشافت الجديه بوجه
هديل:مدري...بس قلتلك انسى خلاص هونت اصلا...
وليد:سؤال واحد مو اثنين ..!هديل بنظرة خوف
وليد:من اللي شجعك او دخل الفكرة براسك؟؟
هديل باحراج:منال..وقالت راح استفيد منه وخاصه ان عندي مواهب وحرام ادفنها وقالت انه مافيه شئ اقرأ مواضيع او ارد اواشارك من غير ماحد يعرف اني بنت او ولد وعندها كم منتدى مشاركه فيه وتقول اسالك اذ عندك خلفيه...نزلت راسها
وليد مبتسم:ابشري يا هدووووووله ماطلبتي شئ انتي خوذي المنتدى وراح تحصلين اللي يسرك كم هدوووله عندي...ابتسم
هديل براحه وفرح:مشكووور وليد ماقصرت انا الحين بدق عليها واخذ المواقع عشان تشوفهم
وطلعت عالطووول لغرفه عبدالله اللي يلعب بلاستيشن2...
هديل بفرح:عبوووود طلبتك..؟
عبدالله ويوقف اللعب:وشو هديل....؟
هديل:اقولك طلبتك تقووولي وشووو.....برطمت
عبدالله يضحك:تـــــــــــــــــم... .ويحرك راسه مثل الهنود
هديل مبتسمه:ممكن استخدم جوالك لمده لاتتجاوز 10دقائق..؟؟؟؟
عبدالله ويعطيها الجوال:اخذي راحتك فيه لو ان شاءالله ساعه تدرين شلون حلال عليك الجوال واللي فيه..ابتسم
هديل بفرح:لا مايطوعني قلبي اخذ شئ مو لي المهم بس 10دقايق ويرجع لك سالم..
اخذت هديل الجوال وعالطول راحت لغرفتها عشان تطلع النوته اللي كاتبه فيهم ارقام اللي يعزون عليها ودقت رقمها وكلمتها واخذت المواقع وشكرتها ورجعت جوال عبدالله سليم مثل ماقالت وراحت لوليد واعطته الاسماء وعرف 2منهم ونصحها تختار الاحسن وسوا لها ايميل عشان تستقبل الرسايل فيه وعلمها عن كل شئ في المنتدى كيف ترد وكيف تكتب موضوع ..وغيرها الين ماصارت تعرف كل شئ وقالها كل ماتحب تدخل وتشوف غرفته وصاحب الغرفه تحت امرها ماعليها من احد تدخل وتسوي اللي تبي وارتاحت هديل اقل شئ لقت اللي بيشغلها ونزلت اول مشاركاتها بقسم الخواطر وحصلت مدح كبير وثناء لايوصف وحست ان الدنيا تضحك لها من جديد ....

*

الساعه7 الصباح جهزت الفطور لزوجها وعياله جلست وهي متضايقه من خالد والقرار اللي سمعته وماصارت تتكلم معه الا باشياء بسيطه هو صحيح الزواج مو غصب وهذا الشئ مو مزعلها اللي مزعلها رده فعل خالد والكلام اللي قالت له دليل على ان كلامها كان بمحله وماكذبت فيه..
((انا مو من حقي افرض عليك رايي لاني بكل بساطه مو انا امك الحقيقه انا بس رشحتلك البنت ولك الاختيار هذي حياتك ومافي اي احد يضغط عليك حتى لو انا اللي اكتشفت اني زوجه اب فقط
ولاتحسب اني بزعل لا ..انا بس متحسفه انك ضيعت جوهرة..يمكن ماحد فيكم يستاهل الثاني وهذا نصيب ولااحد يقدر يغيره بس اللي صدق ضيقني مالي وجه اقابل هديل مرة ثانيه بعد ماعرفت قرارك كان لي امل انك توافق..والله يوفقك يايمه واذ بغيت او فكرت انك تتزوج عندك خالتك ساره او عماتك واذ تبيني اخطبلك انا تحت امرك..وطلعت وتركته))هذا الحوار اللي دار من 4ايام يوم كانت نورة عند خالد..واكتفى يسمع من غير اي كلامه يعنى موافق على كلامها ومن يومها متضايقه.. نزل ابو محمد وجلس على الطاوله ونزل وراه ناصر..
ناصر:صباح الخير..وباس راس امه وابوه
الكل:صباح النور..
ام محمد:هاه يمه تبي حليب بشاهي او شاهي لحاله..
ناصر ياكل:لاشاهي لحاله..وين خالد مانزل
ام محمد :مدري عنه مامريت عليه؟؟؟...
ناصر ويشرب الشاهي:لا مامريته..ونزل خالد باللحظة
خالد يبوس راس امه وابوه:صباح الخير...سمع ابوه وناصر وشاف امه اللي مانطقت بشئ وجلس بجنب اخوه وبنظرة سريعه لقاها ماهي امه نورة اللي يعرفها....
ابو محمد:اقول خالد وش صار على مشروع المجمع السكني ؟؟؟؟..
خالد بضيق:الى الحين تحت الدراسه..مين داخل معنا بالمشروع؟
ابو محمد:داخله شركتين مقاولات من احسن الشركات..
خالد:طيب قبل ما نتشارك اسال عنهم اخاف يكونون شركات صغيرة وبعدين يصير المشروع
كله على روسنا..
ابو محمد يطمنه:لاتخاف اخوك محمد احرص مني ومنك..يالله تامرون شئ بمشى
ام محمد:سلامتك ايه ابو محمد بروح لامي الضحى اذ ماعندك مانع ..
ابو محمد مستغرب:عسى ماشر وش فيها خالتي..؟؟
ام محمد:تقول شغالتها مدري وش فيها وحابسه نفسها ماتبي تطلع ..
ابو محمد:خلاص اجل دقي على خالد يجي يوديك انا مقدر اطلع من الشركه عندي مع ابو سعد اجتماع وفوق كذا بنطلع للمشاريع اللي ماسكينها..فمان الله
الكل :مع السلامه..
ام محمد تكلم خالد:مايحتاج تطلع خلك بشغلك اختي بتمر على
ناصر:ليش تمر وانا موجود ..!!!
ام محمد باستغراب:ماعندك جامعه..؟ ..وخالد يناظر امه اللي متلوم على نفسه
ناصريقوم من مكانه:ماعندي الا محاظرة وتخلص الساعه 11 بس عشان ست الكل اقدر اعتذر
ام محمد براحه:خلاص اذ خلصت تعال وتلقاني جاهزة لك..
خالد:لامايحتاج تعتذر انا اجي واوديها..وناظر امه عالطول وحصل نفس تعابيرها
ام محمد ببرود:مايحتاج تجي انت عندك شغل انا اقول اختي تمر علي وانتهينا لاتجي وتعطل شغلك ولا تعتذر من محاظراتك...عالطول نزل عيونه وقام باس راسه وطلع ونفس الشئ سوا ناصر وجلست متضايقه "انا وش اسوي مايبغى يتزوج بكيفه هو حر بس ياليت ياخالد قلت اني غلطانه بكلامي ولاخليتني اكتشف الشئ من نفسي"....
من بعد ماقالت لها عمتها وهي ماتعرف تنام تفكير يسحب تفكير مدري كيف تفكر..اقتلبت للجهه الثانيه شافت اخوانها نايمين ومسحت على شعر ريمي وهي تفكر بخالد وبكلام عمتها اسال وليد عنه ضحكت وهي تتخيل الموقف وانا اسال اخوي عن خالد ...جلست على السرير وشافت الساعه كانت 8 الصبح يالله معقوله ماجاني النوم...ابغى اناااااااام
فتحت درجها وطلعت دفترها اللي يشاركها احزان وبدت تكتب فيه وبعد ماخلصت سكرته وعالطول رجع لها التفكير..خالد ولد عمتي اقصد اللي ربته عمتي وشلون شكله حلوة والا لا..يووووه وانا وش همني بشكله اهم شئ نفسيته وقلبه..عمتى تقول قلبه طيب بس عصبي..عقدت حواجبها..عصبي اخاف يكون مثل مرت ابوي بعصبيتها..غطت وجهها وجلست تفكر انا لازم اشاور احد اكبر مني اقل شئ اعرف رايهم بخالد مافي غير عمتي سارة لالالالالالا اخاف تفهم غلط وعمتى تقول لامن شاف ولا من عرف مين ياربي مين نوف لا منال لا ايه شذى مافي غيرها شذى بنت عمه واكيد تسمع عنه من اخوانها بس وشلون اسالها وخالتي ماتخليني على راحتي...ايه مافيه غير اروح لنوف او منال واتصل عليها من هناك.."وضحكت على افكارها"بس ان شاءللله خالتي توافق وتخليني اروحومن كثر التفكير ماحست الا وهي بسابع نومه


مرت الايام مثل ماهي على خالد وامه.."امي تحاول تكون طبيعيه معي بس من داخلها زعلانه انا لازم اراضيها بس شلووون مافي غير خالتي سارة تنقذني ودق عليها"...
ام نواف بفرح:هلا والله بولدي خالد شلونك وشلون اهلك؟؟
خالد مبتسم:هلا خالتي بخير عساك بخير انتي شلونك وشلون ابو نواف والعيال؟
ام نواف:كلنا بخير نسال عنكم وينك مانشوفك ولا تجي تسلم لازم اعزمك والا احلف عليك يعنى..
خالد:لا والله ياخالتي بس مشاغل وانتي تدري وخاصه الحين ماسكين مشروووع وش اقول غير الله يعينا..
ام نواف:امين يمه ويعين الجميع..طيب وش رايك تجي تتقهوى معي مافي غيري وفواز وبعد شوي يجي نواف..هذاني اعزمك عشان ماتقول مشاغل
خالد:مايحتاج عزيمه ياخالتي ليكون نسيتي ان البيت بيتي..
ام نواف:ايه والله صادق البيت بيتك انت الداخل وحنا الطالعين..
خالد:تسلمين ماتقصرين اقووول خالتي ابغاك بموضوووع وابي مساعدتك..
ام نواف باهتمام:امرني ياخالد وش بغيت..؟
خالد:مايامر عليك عدوو..انا بجيك الحين وبقووولك السالفه كلها بس بيني وبينك
ام نواف بخوف:ابشر يا ولد اختي بتحصل اللي يسرك اول ماتجي تحصلني بالملحق
خالد براحه:ان شاءالله..مع السلامه
ام نواف:الله يسلمك..سكرت منه وعالطول راحت للملحق ترتبه وجلست تنتظر خالد....
دق تلفون البيت وماكان فيه احد غير منال ونوف اللي تنتظرها بالحوش لان نواف حرص عليها ماتدخل وانتم تعرفون اذ دخلت تجلس وتنسى روحها..وعلى دخله منال للصاله دق تلفون بيتهم..
منال:الووووووو
...:............
منال بعصبيه:الوووووووووووووووو
..:شوي شوي لاتدفين هههههههههههههههههههه
منال بنرفزة:نــــــعــــــم
ناصر:الله ينعم عليك..ياربي وش النفس عليك ....
منال بجديه:نعم اخوي اي خدمه...
ناصر اللي انبسط عليها:ايه ياطويله العمر انا عندي كذا خدمه بس ياليت تحنين علينا شوووي..
منال مفوله بصدق:صدق انك ماتستحي على وجهك..قفلت السماعه بوجهه ومشت شوي الا ويدق
منال بعصبيه:انت وبعدين معك..وش تبغى؟؟
ناصر كاتم ضحكته:من ناحيه ابغى فانا ابغى وابغى وابغى ههههههههههههههههههههههههه هههه
منال بتوتر:الظاهر اهلك ماعرفوا يربونك زين..وسمعت ضحكته وسكرت عالطوووول..ورجع يدق وهي خايفه ومتردده..الين مانقطع ورجع يدق مرة ثانيه
منال ترفع السماعه تصارخ بعصبيه:انت وبعدين معك ماعندك محارم تغار عليهم..سكتت فجاءة
سحر صديقتها:منال وش فيك ؟؟...
منال تداركت الوضع:هاه....هذا واحد ...فاضي قاعد يزعج...تبلع ريقها
سحر بخبث:مايلام سمع الصوت الناعم قال خليني اشبك معها ههههههههههههههههههههه
منال بعصبيه:والله انك فاضيه اقول اسكتي دام النفس عليك طيب ..وش بغيتي ؟؟؟
سحر بغرور مصطنع:يوه انا سحر تقولين وش ابغى مالت عليك..هذا جزاي اسال عنك ليش غايبه؟
منال تضحك:ههههههههههه سحوره شوي وادق عليك بنت عمتي تنتظرني الحين OK..
سحرon't Late.....See you
منال:Me too ..... Bay سكرت عن صديقتها وعالطول طلعت فوق تجيب الكاتلوج وبعد مااعطتها وسمعت كم تهزيئه من نوف اللي ماتترك طبعها دخلت للصاله وهي طالعه
الدرج عشان تتصل على صديقتها دق التلفون فوقفت مكانها وهي تتأفف وتقول هذي البنت عمرها ماصبرت ....
منال:الوووووو..
ناصر:اذ اهلي ماربوني زين اعرفي وابصمي مليون %ان اهلك بعد ماربوك زين..
منال انصدمت وكان احد صب عليها مويه بارد هذي الجمله سمعتها بس وين ومين قالها...ايه تذكرت سمعتها يوم كنا ببيت امي منيرة بس ماعرفت من هو..معقوله يكون هو ايه صح هذا صوته كيف ماركزت ياربي وش قلت ووش سويت...قطع عليها
ناصر بجديه:خالي عبدالعزيز موجود؟؟؟..
منال مندهشه يقول خالي يعني ولد عمتي بس مين هو اي واحد لالالا ماظن يكون نواف..نواف قبل شوي هنا وفواز اعرف صوته معقوله يكون من عيال عمتي نورة ياربي فشيله...
ناصرلما طال سكوت منال:الوووووو..الوووووو
منال بصوت مرتجف:الــ.....الـ...الوووو
ناصر:خالي عبدالعزيز موجود....ابتسم عليها "شكلها عرفتني"
منال بحياء:لا مو موجود.....
ناصر:طيب اذ جاء قوليله مبارك زوجه اخته اتصل عليه وخليه يكلمه اوكيه....مع السلامه وقفل الخط ...
ومنال مو مستوعبه اللي قاعد يصير معقوله يكون زوجه عمتها بس اصغر منها لالالالا مو معقول
وبعدين قال من الاول خالي يعنى واحد من عيالها..وسكرت السماعه وطلعت فوق وهي تفكرفيه ماتعرف مين هو خالد او ناصر...
دخلت هديل بيت عمتها ساره بعد ماقنع وليد امه ان فيها صداع..اول مادخلت الصاله ماحصلت احد وفجاءة ينزل فواز من فوق ..
هديل مبتسمه:شلونك فواز..؟؟؟
فواز:بخير شلونك انتي...
هديل:بخير امممممم فواز وين عمتي ونوف؟
فواز بحيرة:امي شفتها تدخل الملحق اكيد ترتبه بس نوف راحت لمنال تقول تبغى تجيب كتالوج منهااستريحي هديل الحين يجووون...
هديل تجلس:اهااااا ونوف لها زمان طالعه..
فواز:لا لها ساعه بس هي على وصووول تبيني ادق عليها ..
هديل:ياليت تدق وانا بروح اشوووف عمتي...
قامت هديل تبغى تشوووف عمتها اللي بالملحق واول ماصلت سمعت صوت عمتها تتكلم بعصبيه..
ولما مشت تبغى ترجع وقفها صوت رجال ..موعشان صوت الرجال لا الكلام
اللي سمعته عرفت انه خالد ....
خالد:خالتي افهمني اقولك امي زعلانه علي وابيك تكونين لي عون طلعتي فرعون..
ام نواف بعصبيه:ماتلام امك اجل ترفض هديل احد بالعالم يرفضها الكل يتمنى اشاره منها وانت تجيك جاهزةوتقول لا...هديل ماقدرت تتحمل وعالطووول ركضت للصاله عشان ماحد يشوووفها ماتعرف وش تسوي تتصل على وليد وتقوله يجي؟ حطت ايدها على راسها محتارة وش تسوووي..
خالد:خالتي الله يخليك افهميني انا ماقلت مابي هديل انا قلت مابغى اتزووووج..
ام نواف:نفس المعنى ياولد اختي نفسه ماجبت شئ جديد..
خالد:خالتي والله العظيم ثم والله العظيم اني مو رافض هديل انا رافض الزواج حاليا
ام نواف:دامك رافض الزواج ليش خليت امك تفاتح البنت وتاخذ رايها تشوفها زينه بحقها..
خالد ظل ساكت لانه غلطان المفروض يرفض من الاول مو الحين..
ام نواف تتنهد:شووف خالد مو عشاني عمه هديل وانت ولد اختي بقولك اخذها الزواج مو بالغصب واذ حصل صدقني ماراح يستمر اختي وانا اعرفها زين مو زعلانه عشان ماتبغى هديل زعلانه من شئ شوف انت وش سويت لها واستسمح منها ولاتفكر ان اختي من النوع اللي مايرضى الين ماياخذ الا اللي اشرت عليه..انا عارفه ماتبي فكرة الزواج حاليا وهذا شئ يرجعلك ....
خالد يبي يطمنها:اذ تبوني اخذ هديل ماعندي مانع بس الزواج مو الحين يعنى احجزوها الين مااقولكم اذ هذا يرضيكم..
ام نواف :ليش شايف بنت اخوووي سلعه احجزها واذ جاء وقت تقديمها اخذها لا ماراح تحجزها..
هي حرة الين مايجي رزقها فاذا هي من نصيبك بتاخذها لو هي بالمريخ واذ ماهي من نصيبك الله يعوضك احسن منها بس نسد طريق البنت لامايجوز يمه ..
خالد :طيب وامي ياخاله...
ام نواف:انا قلتلك اختي مو زعلانه على شئ مو مكتوب..اعرف اختي زين هي اكيد زعلانه على شئ انت قلته او سمعته وانت ابخص فيها شوووف امك ليش زعلانه وراضيها..
خالد يقوم يبي يطلع:ان شاءالله مشكورة خالتي يله مع السلامه..
ام نواف بحزن:الله يسلمك..ياليتك موافق مو عشان امك عشان المسكينه اللي تتحسر كل يوم..وقامت قفلت الملحق ودخلت الصاله وشافتها قاعده وقعدت معهاودخلت نوف وجلسوووا يسولفون وبعد ساعتين جاء وليد وراحت للبيت من غير ماتتصل على شذى من بعد اللي سمعته شالت الفكرة عالطووول واخذوا كم علاج واغراض من الصيدليه عشان تصدق ام وليد انهم راحوا المستوصف اللي كان عنده زحمه ولخبطوا بالاسماء عشان كذا تاخروووا هذا كلام وليد لما شاف امه مفوله عليهم و اقتنعت وجلست هديل بغرفتها تفكر بالكلام الليسمعته "ياربي لما حسيت ان الدنيا فتحت ابوابها بوجهي مرة ثانيه تتقفل شكل مكتوب علي اتعذب طول عمري مع مرة ابوي ياربي وش اسوووي "وتنهدت تنهيده طويله ونامت تبغى تنسى اليوم بطوله.
مر على سالفه رفض خالد الزواج شهر وحالته مع امه كماهي وكل ماحاول يتكلم معها يخاف تصده الين مارح وكلم اخوه محمد لان يحب يسمع رايه بالبدايه تضايق مرة من اللي سمعه فقاله"غلطان ليش يسمع الكلام من غير مايقول شئ بالعكس حسسها انها مو امهم انها زوجه اب فقط" تضايق خالد من كلام اخوه ولقى فعلا انه غلطان وشار عليه محمد يروح يكلمه ترى مهما كان هذي امهم..هي صحيح ماولدتهم بس يكفى ربتهم وطلعتهم رجال الكل يمدح فيهم ولو ان امهم الحقيقيه عايشه ماراح تسوي كثر اللي سوته ارتاح خالد من كلام اخوه محمد وقرر يكلم امه حتى لو تقوله انت مو ولدي..نورة كانت جالسه مع زوجها بالمجلس و عندهم اسماء زوجه محمد ..
ام محمد:مبارك عطني البشاره ...تناظر اسماء اللي مستحيه من خالتها.
ابو محمد:البشاره جاهزة بس خير وش عندك؟..
ام محمد:اسماء حامل...
ابو محمد مبسوطه:الله يبشرك بالخير اجل سواها زين زين مو يقول مأجلين..مبروك يا اسماء
اسماء بحياء:الله يبارك فيك خالي..
ابو محمد:الله يتم عليك وهالله هالله بروحك لاتجهدين نفسك..
اسماء:ان شاءالله...عالطول دخل محمد
محمد مبتسم:السلام عليكم....وحب راس امه وابوه وجلس بجنبه
الكل:وعليكم السلام...
ابو محمد بفرح:مبروك يابومبارك عسى يجعله من الذريه الصالحه
محمد:الله يبارك فيك وبايامك وماراح يشيله الا انتي وبس
ام محمد بزعل:الحين ابوك هو الوحيد يشيله وانا لا..تدري شلون مابي ولدك ولا ابي اشوفه هالافطس ....الكل ضحك على كلام نورة ..
محمد يهديها:ههههههههههههه افاااا عليك يمه وش عرفك انه افطس عاد انا احلى خشم اخواني لاتنكرين واسماء بعد خشمها حلو من وين يطلع افطس هااااه هههههههههههههههههههه
ام محمد صاده عنهم:طالع وجه العنز واحلب لبن....الكل ضحك عليها
خالد سمع ضحكهم وراح للمجلس اللي هم فيه وقبل مايدخل تنحن ...
خالد:السلام عليكم...وراح باس راس امه وابوه..
الكل:وعليكم السلالالام ..وعالطوول قامت اسماء لانها منحرجه وبيتكلمون عن الحمل..
ابو محمد بفرح:اخيرا يا خالد انبسط بتصير عم
خالد بفرحه يناظر اخوه:والله مبروك الله يتم عليكم..
محمد:الله يبارك فيك عقبالك شد حيلك واعرس....
ابو محمد مايدري بسالفه:ان شاءالله قريب بيعرس بس خلنا نخلص من المشروع عشان يصير كل شئ رسمي ونفرح بخالد وهديل........الكل سكت
ام محمد ببرود:لحقين عليهم خالد يبي يكون نفسه وهديل صغيرة على الزواج..
ابو محمد:وشو..يبي يكون نفسه وهي صغيرة وش الكلام يا نورة يوم ماصدقنا الولد موافق تجين تخربين كل شئ ماهقيتها منك والله.....
ام محمد مستغربه:وش اخرب انا اقول الصدق هديل صغيرة على مسؤوليه الزواج وخالد توه متخرج وماكون نفسه خله يتنفس شوي......تضايق خالد لما نطقت بالاخيرة
ابو محمد:اي ماكون نفسه ماشاءالله تبارك الله خالد ماعليه قصووور وكل شئ متوفر واذ على هديل صغيرة كثير بنات تزوجوووا وهن صغار ولاتنسين زمن اول من سن كم يزوجون بناتهم و
اهالينا ماقالوا صغيره..
ام محمد تهدي الوضع:خلاص لاتكبر السالفه بس نصبر شوووي الين ربي ييسر الامور..سكتت وقامت عنهم لانها مفوله على زوجها اللي مو راضي يقتنع...

خلصت صلاة المغرب وجلست تدعي ربها يفرج عليها مصيبتها ويصبرها وفجاءة انفتح باب غرفتها
ام وليد بتوتر:هديل اللبس وتعدلي وانزلي للبيت الشعر فاهمه..تبي تسكر اللباب
هديل بحيرة:ليش خالتي......جتها عالطول ووقفه بوجهها
ام وليد:اسمعي الكلام من غير اساله ولاتنسين تلبسين طرحه على راسك..وراحت عنها
هديل استنكرت طلبها ياربي وش ناويه عليه وش عندها بعد انا ناقصني الحين ....
نزلت ام وليد وهي مستعجله ودخلت ببيت الشعر بسرعه..
ام وليد بتوتر:انت الظاهر تب توهقني مع ابوها تعال اخطبها رسمي وشفها واذ ماصلحت افسخ الخطوبه كل الناس تسوي كذا وبعدين ماظن ابوها يرفض حقك بالشوف..
ماجد بابتسامه خبث:وش فيك انتي خايفه بشوفها مو ماكلها بشوف اللي قالت عنها امي اذ صلحت تقدمت واذ ماصلحت كان شئ لم يكون..
وقفت هديل عند اخر الدرج خايفه قلبها مو مطمنها شكل خالتها مايريح وش تبغى فيني وتنهدت خوف
"الله يستر..يارب اوقف معي يارب"..وبلعت ريقها ومشت بتردد لين ماوصلت للمدخل فتحت الباب وقلبها كان يدق بقوة وصلت للخيمه لمحتها خالتها وعالطول جت وسحبتها داخل الخيمه وسكرت بابه وهديل تناظر فيها وكان الخوف باين على عيونها بس هديل ماشافت الرجال اللي يناظر لها
هديل بخوف وهي تناظر خالتها:خير خالتي فيه شئ..وقمزت بخوف لما سمعت صوت الرجال..
ماجد مبتسم:هديل كيف حالك..؟ انصعقت باللي قاعده تشوفه تحس بجسمها بشلال كامل مو راضيه تتحرك وتناقلت نظراتها بينه وبين خالتها اللي جالسه بالزاويه وتطل من الشباك..
ماجد بنفس الابتسامه:ماشاءالله تصدقين يا شيخه امي عرفت تختار تعالي هديل اجلسي شوي
هديل لفت تبي تطلع بس كان اسرع منها ومسك الباب :وين رايحه اقل شئ سمعيني صوتك..
مو قادره تحرك لسانها ولاقادرة تنظق بحرف..وشوي وانفتح عليهم الباب والمصيبه كانت اعظم
انصدم لما شاف اخته وخاله بالخيمه ولا انتبه على امه وكان الشر راكبه من راسه...
وليد يصارخ بعصبيه ويمسكها من يدها:انتي وش تسووووين هنا...؟
هديل بخوف وترتجف:وليد انا .....انا......انا......سكتت
ماجد تدخل عالطووول:وليد وش فيك شوي شوي على اختك...
وليد:وانت وش تسووووي معها ..ويناظر باخته...هذا اخرتها ياهديل اخر شئ اتصور اختي يطلع منها كل هذا...
هديل بصوت خايف:انا.......انا......انا......
وليد يصارخ:انتي وشو انتي وشو..انتي ولا شئ سامعه...عالطووول دفعها بقوة خلها تطلع من الخيمه...
وليد يمسك خاله من ياقه ثوبه:ليش ياخالي ليش مالقيت غير هديل...
ماجد يحاول يفهمه ويهديه:وليد لايروح بالك بعيد الله يهديك..وليد انا ابغى اخطب اختك بس قبل اشوفها اذ تجوزلي او لا..
وليد بتريقه وعصبيه:وعسى انشاءالله جازت للاستاذ المحترم ..
ماجد بدء يعصب:اسمع صدقت بكيفك ماصدقت اشرب من مويه البحر ماعندي استعداد ابرر للبزارين مثلك..هنا عصب وليد عالاخر وكانه بدء بمعركه الا لما سمع امه من وراه واندهش اكثر وبنفس الوقت حس راحه لان هديل ماكانت لوحدها..
وليد بنرفزة:انتي بعد فيه وساكته عاجبك يعنى اللي صار... ..
ام وليد بتوتر:وليد انا امك وكلمني زين وبعدين مافيها شئ اذ خالك شاف اللي ناوي يخطبها ..
وليد مفول على كلامها:اللي يبغى يخطب يدخل الباب مو من الشباك مثل ماسوا المحترم..يناظرله بشمئزاز ومن فوق لتحت الا لما حس ضربه قويه على خده ..
ام وليد بخوف:الظاهر ماعرفت اربيك زين...
وليد ببرود ويحط يده على خذه:مشكورة يمه بس بقولك شئ حطيه ببالك زين ترى الدنيا دواره وماتدرين وش تسوي فيك او فينا ولاتنسين ان عندك بنت وش راح تسويلها الدنيا..وطلع ماقال هالكلام الا حس ان امه وراء السالفه كلها وهديل مالها ذنب بس حز بنفسه عشان ماسمعها..وطلع عالطووول من اول ماطلعت من الخيمه عالطووول راحت فوق تبغى تستنجد باحد او بالاحرى تبغى تنقذ نفسها تخاف وليد يضربها عالطووول دخلت غرفتها وقفلت الباب وهي ترتجف وخايفه وكانت متسنده على الباب الين ماجاء عبدالله وطق باب غرفتها يبغى يسالها اذ تبغى شئ لانه بيطلع وماحصل جواب وقبل مايمشي سمعها تصرخ من وراء بابها خاف عليهاطق الباب وحاول يكلمها ويهديها وقال بينادى وليد بس طلبت منه جواله وفتحت الباب واخذت وسكرته وكلمت عمتها نورة لانها حافظه رقمها عن ظهر غيب ...
طلع خالد يلحق امه عشان يكلمه ويفهمها وجه نظرة..فدخلها بغرفته وقفل الباب


ام محمد ببرود:هاه..خالد وش بغيتني فيه وش السالفه اللي ماتحتمل التأجيل؟
خالد يجلس بجنب امه على السرير:يمه انا اسف..اذ زعلاتك بشئ وانا مااقصد..يمه قولي انك سامحتيني والله يايمه اني ماقصد ولاتحسبيني اني مبسوط على وضعي والله اني الوم نفسي كل يوم اتمنى نظرة منك او ضحكه عشان اكون مرتاح وتكونين راضيه علي يمه اذ يرضيك اتزوج هديل والله اليوم نروح ونخطبها بس ارضي علي وارجعيلي..انا فقدت ام ماعرفتها والحين تبغيني افقد اعظم شئ بحياتي وانا اعرفها يمه..باس راسها..سامحيني
ام محمد تتنهد:خلاصت كلامك..تناظر لولدها اللي هز راسه بالايجاب
ام محمد:يمه ياخالد طول عمري مازعلت منك ولا من واحد من اخونك واذ على زواجك انت رجال وتعرف مصلحتك اكثر مني ولاتحسب اني زعلانه عشانك ماتبي بنت اخوي لا شيل الفكرة من راسك انا زعلانه لاني اكتشفت مكانتي عندك واكيد عند اخوانك وبعدين يايمه الزواج بالغصب مكروه وشلون تبيني اغصبك على شئ ماتبيه عشان النتيجه تكون اعظم ولانقدر نحلها بعدين انا اخترت لك هديل لانها هي الانسب لك واذ ماتبي هديل انت حر فيه مليون بنت احلى منها واحسن منها بس انا كنت ابي افرح فيك وابغى اخلصها من ظلم مرت ابوها وانت ياولدي مسموح والله يعلم ان قلبي مو شايل عليك ولا شي بالعكس ابغالكم التوفيق والسعاده ..
قام خالد لوى عليها:الله يخليك لي يايمه ولا يحرمني منك..انا ماعندي اي مشكله بهديل بالعكس
انا....انا.......نزل عيونه ..انا ابغى هديل تكون الزوجه اللي اخترتها امي .....ولانها عاجبتني...
ام محمد تبعد عن ولدها:وشلون عاجبتك وين شفتها..؟
خالد يضحك على عصبيه امه:ههههههههههههههههههههه� �هه صدفه
ام محمد:وشلون صدفه تكلم زين ؟
خالد:اقولك بس مايطلع الكلام...؟
ام محمد نفذ صبرها:بسرعه قووول والكلام بيني وبينك..قالها خالد سالفه هديل ونوف مع البسه
(القطوة)..
خالد يلوى على امه مرة ثانيه:هاه ام محمد راضيه علي؟
ام محمد مبتسمه:اكيد يمه راضيه عليك طيب تعال دامها عاجبتك ليش مأجل ؟
خالد بحياء:عشان كذا ابيك بسالفه...ابغاك تحجزينها لي الين مايجي الموعد
ام محمد بتريقه:ومتى ان شاءااله يجي الموعد مثل ماتفضلت..؟؟
خالد:قريب يايمه والله قريب بس خليني اكون نفسي مثل ماقلتي قبل شوووي ونخلص من المشروع اللي ذابحناو اقولك روحي اخطبيها لي.. وش رايك بعد .......يبتسم
ام محمد بجديه:اجل ليش رافضها من الاول ؟
خالد:والله العظيم مو رافضها انا رافض الفكرة فكرة الزواج بس لما استخرت ارتحت عشان كذا اقولك تحجزينها الين ربي يكتب اليوم الموعود..
ام محمد:كان قلت من الاول ولاتسبب لي التعب والضيقه تدري لي شهر ماكلمتها مالي وجه وربي اقابلها بس دام هذا رايك ابشر بكلمها مرة ثانيه واشوف رايها
خالد باستغراب:ليش ماردت عليك للحين..
ام محمد تبغى ترفع ضغطه:الا ردت بس بتاكد انه ردها النهائي
خالد بخوف:وش قالت..؟
ام محمد تلعب باعصابه:اخاف اقولك واصدمك لالالا خليني اتاكد وبعدين اقولك..وفجاءة يدق جوالها وتشوفه الا رقم عبدالله ولد اخوها
ام محمد باهتمام:الووووو...الوووو....ه ديل ....هديل.....وش فيك تبكين
انتبه خالد على امه ووقف عندها ...هديل يمه اهدي لاتبكين عشان افهم عليك..اسمعيني
انا بجي الحين لاتطلعين من الغرفه الين اجي ولاتفتحين لاحد سمعتي..اهدي وسمي بالرحمن خلاص يمه لاتبكين انا جايه الحين مع السلامه...سكرت منها
خالد باهتمام:وش فيها يمه عسى ماشر..؟
ام محمد بخوف طالعه من غرفته:مدري مافهمت منها ولا شئ..انا بروح لها
خالد:انا بوديك تلقيني تحت...نزل عالطول وركب سيارته و جت امه وركبت معه..
جالس بالصاله مع اخوه محمد وزوجته ويسولف عليهم وهم يضحكون اسماءعادي تداخل مع ناصر لانه بعمراخوها سعد عشان كذا تجلس عادي معه مو مثل خالد تستحي منه ..ويدق تلفون البيت ويشوف الرقم..
ناصر:هلا والله وغلا بالصوت اللي يسدح شباب الرياض كلهم...يضحك اخوه وزجته عليه
منال تبلع ريقها هذا نفس الصوت ياربي كل شوي ينط بوجهي وش ذا الاحراج
ناصر بعد ماطال سكوتها:الوووووو...خالتووووو وه..وين رحتي اللي ماخذ عقلك...يضحك
منال بتوتر:احم ...احم....السلام عليكم...."الله يزين ضحكته تذووووب"
ناصر عدل جلسته وانبسط لما عرفها:هلاوالله...وعليكم السلام...
منال بتوتر:عمتي نورة موجوده....عضت على شفايفها
ناصر يستهبل:قبل شوووي كانت موجوده والحين شفتها اخذ عبايتها وراحت ..
منال بنرفزة:طيب...مع السلامه
ناصر يوقفها:لحظه ...لحظه....اذ جت مين نقولها
منال :منال..وخلها تتصل على جوالي او على بيت عمتي
ناصر:اصلا انا عارف ههههههههههههههههههههههههه ...
منال بخوف:وش عارف..؟
ناصر بخبث:انك منال بنت خالي عبدالعزيز اللي تدرس بالجامعه وتخصصها انجليزي..
"وش عرفه فيني ؟ووش عرفه بتخصصي ياربي هو يعرفني وانا ماعرفه "....
منال بتردد:انت مين...خالد او ناصر...؟؟؟
ناصربخبث:يهمك تعرفين....
منال اللي وجهها صار اشاره مروور وحمدت ربها ان محد عندها والا راحت فيها..
ناصر مبتسم:الوووو....الوووووو.. Are you on the phone
منال اللي ماتت قهر من طريقته:خــــيـــر وش تبي؟
ناصر ماسك ضحكته:لاسلامتك مابغى شئ بس اعتقد انتي تبين شئ...
منال بنرفزة: Yes..I'want my aunt
ناصر اللي جازله الوضع:Your aunt is not hear هههههههههههههههه
منال بغرور:OK.....bay
ناصر مبتسم:Excuse me..What's your number
منال مندهشه على جرائته:لييييييييييييييييي� �ييش؟؟
ناصر يبتسم:كنت بقدملك خدمه عشان اعطيها امي اخاف ماعندها رقمك ..
منال:مشكووور خل خدماتك لنفسك...باااي عالطووول سكرت وناصر فاطس عليها
محمد بجدبه:انت ماتستحي على وجهك تكلم بنت ماتعرفها..؟
ناصر يضحك:والله بنت خالي هذي فله هههههههههههههه وبعدين لايروح فكرك بعيد ترى سمعتها من سمعتي لاتخاف ههههههههههههههههه بس مدري ليش احب اطفشها...
اسماء:عاد منال مشاءالله عليها ادب واخلاق وماشفت منها الا كل خير وحرام عليك تطفشها ترى ماتستاهل تصدقون افكر اخطبها لخوووي سعد والله البنت ماتتعوض وش رايك محمد..تضايق ناصر لما سمع اللي قالته وحاول يكون طبيعي
محمد:انتم يالحريم ابخص وبعدين بنت خالي مثل ماتقولين مااسمع عنها الا كل خير مو نوف الا اسمع الا لسانها...ضحكوا الا ناصر...
اسماء:حرام عليك والله البنت جنااان بس الله يهديها لسانها متبرئ منها بس والله البنت ماعليها كلام
محمد انتبه لناصر:ناصر وش فيك..؟
ناصر قام :مافيني شئ تذكرت صديقي بيمرني ولازم اكون جاهز...سلالالام
وقفت سيارة خالد عالطووول ونزلت ام محمد منها وهي تدق الجرس فجاءة جاء اخوها وشافها تدق الجرس بعصبيه ورح لها ...ميزة ابو وليد يعرف يميز الشخص عالطووووول
ابو وليد :نورة..عسى ماشر وش فيه؟
ام محمد بعصبيه:افتح الباب بسرعه مابغى اتكلم بشارع..عالطوول فتح باب .....
ابو وليد هو اخر اخوان نوره بما ان نورة الكبيرة يحب يسمع كلامها وياخذ برايها ..
اول مافتح الباب عالطووول نورة راحت لغرفه هديل اللي شافت بطريقها شيخه جالسه بالصاله ولا كأن شئ لم يكن..طلعت فوق وطقت على بابها ولما سمعت صوت عمتها حست براحه وعالطووول فتحت الباب ورمت نفسها عليها وصاحت صياح يقطع القلب وابوها كان وراء اخته خاف على بنته ماهن عليه يشوفها بالحال ويسكت عالطووول راح لها ومسح على راسها..
ابو وليد بنظرة عطف:بسم الله عليك هديل وش فيك احد مزعلك قولي..هديل اول ماسمعت صوت ابوها خافت عالطووول وبعدت عنه وعن عمتها ورجعت وراء ترتجف تخاف يسويلها شئ..
ام محمد تتقرب منها:يمه هديل تعالي يمه..تمد يده لها..هديل انا عمتك نورة تعالي....اماهديل فكان عيونها على ابوها ووشافت اخوها بحزن..
ام محمد:معليش اخوووي خلني انا وياها يمكن تبغى تقول شئ ومستحيه منك..
ابو وليد:قصدك خايفه...ابوي هديل ترى مافي اب بالدنيا يرضى يشوف بنته تصيح ولايسوي شئ..بس عشان عمتك بخليكم ...ناظره بحنان وطلع منهم و جت عمتها واخذت بيد هديل اللي قاعده تصيح وتحاول تهديها وتعرف منها القصه بس مافيه فايدة مستحيل تتكلم وهي بذي الحال
بعد نص ساعه وهديل على هالحال وشوي ويدق جوالها
خالد بخوف:هلا يمه بشري..؟؟؟ .......ويسمع صياحها
ام محمد تتنهد:وش ابشر..ماهي راضيه تتكلم..انت وينك يمه؟
خالد بضيق:انا تحت انتظرك..تبغين تجلسين واجيك بعد ساعه او ساعتين؟؟
ام محمد بتعب:لايايمه انا نازله الحين...
خالد:يله اجل انتظرك...مع السلامه سكرت وقامت تبغى تروح عالطووول مسكت يدها وجلستها عندها...
هديل بين دموعها:وين عمتي...الله يخليك لاتخلين لحالي...صاحت
ام محمد بحنان:طيب يايمه تكلمي فهميني ...ذبحتي عمرك بالصياح....
هديل بين دموعها:تكفين عمتي اخذيني معك...تكفين لاتتركيني هنا...تكفييييين
وحطت يدينها بوجهها وتصيح ام محمد ماقدرت تتحمل نفسيه بنت اخوها وعالطووول قامت وفتحت دولابها وطلعت كم غرض لها ....
ام محمد بعصبيه:جهزي نفسك دام السالفه وصلت اني اخذك معي..انا اعرف وشلون اتصرف مع العقربه..عالطووول قامت وحطت اغراضها ولبست عباتها ونزلوا ...
ام محمد بصوت عالي:شووف ياخوي انا اعزك واحبك بس اشوف بنتي تتعذب وتنذبح قدامي ماراح اسكت..باخذ هديل لبيت امي منيرة كم يوم الين ماعرف سالفتها مع العقربه زوجتك..تناظر فيها..اعتقد من حقي اطلب هالطلب..ابو وليد ماقال شئ عشان بنته اللي مايعرف وش قصتها من زمان ماتتشكى من شئ..
ام محمد تقطع افكار اخوها:هديل انا اعرفها كثرك وماتبكي بسبب تافه تبكي لانها ماعندها استعداد تتحمل وتصبر عشان كذا بعد اذانك ...باخذها الين ماتهدى وبعدين لكل حادث حديث..
ومشت عنهم ...
ام وليد بتحدي:على وين يانورة لاتحسبين داخله بوكاله من غير بواب..
ام محمد بنفس التحدي:لا انتي الصادقه ببيت اخوووي اللي مايرضى بالغلط ويسكت..ومشت
ام وليد وقفت بطريقها:تبغين تمشين مع السلامه اما تخذين هذه..تأشر على هديل باصبعها..فلا
ام محمد بصوت عالي:ومين انتي عشان تمنعين دام ابوها عايش وراضي انتي تسكتين ولا تتكلمين فاهمه...ومشت واعترضت طريقهم مرة ثانيه بس نورة مايهمها احد وخاصه من النوع اللي يشبه شيخه فابعدتها بقوة عنها وكملت طريقها...

منسدح على السرير ويتذكر كلام مرت اخوه تبغى تخطبها لاخوها..ياربي راح اموت اذ تزوجت غيري والله البنت تنحب بحاول اقول امي تخطبها لي ماعندي استعداد اخسرها..
رهيبه البنت عليها براءه ماشاءالله بس ودي اعرف شئ واحد ياليتني سالتها الربطه اللي على راسها دوووم تحطها ولا بس ذاك اليوم..الصراحه محليتها كانها من الهنود الحمر..عقد حواجبه..اذ امي رفضت الخطبه انا لازم اوصلها قبل ماتروح علي لازم تفهم اني ابغاها زوجه لي بس شلون..شلون..شلون..شلون..ايه مافي غيرها..والله اثريني داهيه وانا ماعرف يضحك على نفسه وقام يتجهز للطلعه اللي ينتظر صديقه مثل ماقال لمحمد
منال اللي بعالم ثاني سرحانه وتلعب بخصله من شعرها بهالانسان اللي قلب موازينها فوق تحت..ياربي مين هو خالد والا ناصر..افففففففففف بيضرك يعنى اذ قلت اسمك..دامك تعرفني وتعرف كل شئ ريحني وقل من انت..دخلت عليها نوف بصينيه الشاهي وهي تناظرها سرحانه بعالم ثاني..
نوف بصوت عالي:اسفرت وانورت واستهلت وامطرت...ضحكت على بنت خالها اللي قمزت وباين انها خافت ..
منال بعصبيه:انتي ماتستحين احد يهلي بضيوفه بالطريقه الهمجيه ذي..
نوف تبتسم:وش اسوي فيك انت بعالم ثاني..كم قطعه سكر..
منال:نص قطعه......
نوف:من سمنك عاد تاخذين نص سكر..المهم متى قالوا يطلعون للبر...عطتها الشاهي
منال:على مخططات ابوي وعمي الخميس الجاي ومايدورن عن الباقين
نوف:الله ونااااااسه من زمان ماطلعنا للبر تتوقعين هديل تطلع ..؟؟
منال تشرب:اكيد دام عمي ابراهيم بيجون اكيد تجي...
نوف:طيب منوله وش راح تلبسين..بنطلون او تيور او قميص مثا امهاتنا..؟؟
منال بغرور:ودي يبغالها كلام of course....trousersوماانتبهت الا وساده الكنب على وجهها..
نوف بعصبيه:انا كم مرة اذ صرتي معي لاتتكلمين عنقريزي مفهوم...
منال متضايقه:اعتقد في اسلوب وطريقه احسن من كذا افرضي لو اني معي البياله وانكبت علي وش اسوي هاه...
نوف مبسوطه:احسن عشان تتعدلين معي..دخلت ام نواف عليهم
ام نواف:وانا كل مادخل عليكم الا هواش اعوذ بالله..وبعدين دامكم مجتمعات ليش ماقلتوا لهديل؟
نوف:والله كلمت عليهم وقالي عبدالله انها طالعه مع عمتي نورة ؟؟
ام نواف بحيرة:غريبه وين رايحين؟؟ماسالتيه..؟
نوف:الا سالته..قال خلي عنك اللقافه وطواله اللسان ...وقفل بوجهي..
ام نواف مبسوطه:بعدي ولد اخوي زين سوى افشى غليلي..
نوف بزعل:يمه حرام عليك وش سويت لكم الكل منتقدني...
ام نواف بجديه:الكل مو منتقدك منتقد تصرفاتك..ماقول الا الله يهديك..قامت عنهم تشوف العشاء
منال بصوت واطي:نوف بسالك سؤال ذاك اليوم اللي صارت عندكم الجمعه ببيتكم اخر جمعه ..
نوف تهز راسها:ايه ايه ايه اخلصي وش عندك..
منال:لما نزلتي بالصاله وشفتي رجال جالس تعرفين مين هو؟؟
نوف بنظرة شك:وليش تسالين.؟؟؟
منال بتوتر:هاه......لا.....بس كذا....حبيت اعرف....
نوف:انتي اصلا ماشفتيه وشلون تعرفينه..بس بيني وبينك مادري والله هذا مين...
منال مستغربه:معقوله ماتعرفين عيال عمتي ؟؟يعنى ماقد شفتيهم..؟؟؟
نوف:لا ماعرفهم الا محمد اما خالد وناصر ماقد شفتهم اسمع فيهم بس ماحصلي الشرف للحين..تبتسم
منال بتفكير:صح كلامك محمد ماعرفانه ولا قد شفناه الا بزواجه يوم يزفونه على اسماء ولو انه
ماتزوج كان احتارت صدق واموت قهر الين اعرف مين هو....قالت اخر مقطع وهي سرحانه
نوف قمزت عليها وجلست بجنبها:مين اللي مخليك محتارة ولا عرفتي مين هو...
منال مكبره عيونها وخافت من طريقتها:بسم الله الرحمن الرحيم..انتي وشو..بفهم ادميه والا لا..وبعدين وش قاعده تخربطين وربي الشره على اللي جايك..وعالطووول اخذت جوالها وتبغى تدق على امها ترسلها السواق بس نوف اسرع منها وخذت الجوال
نوف:اكيد ادميه من لحم ودم وعظم بعد..يله بلا هبل مين اللي محير الاميرة منال بسرعه تكلمي والا بالجوال اكسر سنونك ..
منال خايفه تنفذ تهديدها:بنت اعقلي وش تقووولين انتي لاتتبلين على وتقولين شئ ماقلته..
نوف:انا مو صمخه مااسمع..ترىسمعي 1000على 1000 تتكلمين او...
منال صرخت تستنجد عمتها:عمتي سااااااااااااارة....عمتي سااااااااااااارة..وحطت نوف يدها على فمها تبغاها تسكت..جت ام نواف طايرة لهم ونوف عدلت من جلستها
ام نواف بحيرة:وش فيكم..وش فيك يمه منال..؟؟
منال خايفه منها وجلست بجنبها وتنبها اذ تكلمت بتقرصها:لامافيه شئ بس كنت بقولك اني بمشي الحين ..
ام نواف:وين تروحين تو الناس اجلسي تعشى وتوكلي..وبغت تمشي عنهن
منال قمزت :عمتي بجي اساعدك ..تناظر نوف اللي حطت يدها على حلقها
(العنق) تهددها بالذبح ولاتنسووون تطليعه اللسان.. منال خايفه من ذي البنت وشلون اماشي سفاحه وراحت مع عمتها وهي تتلفت وراها تخاف تكون نوف وراها وتسحبها او تسوي فيها شئ..