[اسطورة !]

الجــــزء الخامس ~


كنت جالسة متمللة من الحياة و كل تفكيري في حياتي وش بسوي والدتي في بلد وانا في بلد ماعندي اخ ولا اب ولا خال اعمامي تبروا مني بعدما اكلوا حقي وحق امي ورمونا في الشارع
رائد اللي طلع لي فجأة ما صارت لي مواقف معاه بس شكله طيب وحبوب مررة بس انا ليش اخربط كذا واحد مثله مستحيل يناظر لي يالله وش فيني انا وش صاير لي فجأت لمحت هند
كانت تأشر لي تنبهني بوجودها : وين وصلتي رورو
: أبد هنا معك
هند : مو علي دوري غيري
رؤى تنهدت بعمق : كنت افكر فيني وفي وضعي والدتي وش بيصير علينا كيف بعيش حياتي بعد وش مخبى لي و لها
هند : اللي الله كاتبه بيصير لاتتعبين عمرك عيشي يومك وانت كل اجازة تروحين لامك ومامنك قصور رايتك بيضاء الله العالم بظروفك وليش انت هنا وهي هناك
رؤى : تصدقين احيان كثير افكر ودي اروح لعمي اللي الظاهر انه نسى هالشي يرجع لنا حقنا انا وامي بس اتردد كثير
هند : خلي ببالك ان الظالم عمره ما بيتهنى ودامك مظلومة بيجي يوم الله سبحانه بينصرك
رؤى : والله تعبت انا في مكان وامي في مكان ولا هي تعبانه ماعندي مشكلة القى وظيفة لو نص راتبي الحين بس اكون بجنبها يوم تحتاجني اسوي لها اللي تبي بس موبيدي
هند تمسح على ظهر رؤى اللي نزلت دموعها بلا حساب
رؤى من بين شهقاتها : يا رب رحمتك يا رب
دخلت عليهم ما كانت واعية تفكيري شارد تماما ولا حسيت باللي يصير قدامي كل اللي في بالي كلام فؤاد لي وش قصده وش معنى فتح معي هالموضوع الحين
لازم اعرف بس بنتظر الوقت المناسب لفتني صوت هند اللي تصرخ : انتم وش فيكم اليوم يوم الشرود العالمي كل وحده شفتها وهي بعالم ثاني
ياسمين : ولا شي
هند : مو علي خلصينا وش فيك
نزلت دمعتها ياسمين : ابي اشوف ابوي واخواني اشتقت لهم
تأثرت حيل هند وقام ضمتها في الوقت اللي ما قدرت رؤى تسيطر على نفسها اكثر انفجرت باكية وراحت ضمتهم لين هدأوا كلهم وانسحبت منهم هند لغرفتها !
**
***

كنت واقفة عند المرايا بعدل لمسات مكياجي الاخيرة رائد بيجي ، فجأة حسيت بألم أسفل بطني شكيت يا رب مو صح بس لازم اتاكد دخلت الحمام ( تكرمون ) طلعت و كل أنواع الالم فيني مو عشاني عشان رائد : لا يا ربي مو وقته و الله يذبحني رائد وش اقوله بيقول اكيد متعمده الحركة ذي عاد هو ما يتفاهم يا رب وقف معي وارحمني
ما قدرت ابدل ولا اشيل كشختي طلعت الصالة متألمة بالموت مشيت ابي مسكن قعدت على الكنبة ناديت ناتالي
ناتالي : yes " نعم "
غالية : I'm not OK give me panadol " انا لست بخير احضري لي بنادول "
ناتالي : but we don't have it " لكنه نفذ لدينا "
غالية : you can go to buy it for me but quickly and be careful " يمكنك الذهاب لشرائه لي لكن اسرعي و تمهلي "
ناتالي : OK " حسناً "

طلعت ناتالي من البيت مع السواق متوجهة للصيدلية تجيب لي بنادول أنا ما قدرت الا اني انكمش على نفسي في انتظارها ربع ساعة كانت كافية انه يكون عندي
قدمته لي ورجعت لشغلها في الوقت اللي انا استرخيت على الكنبة و تبعثر شعري حولي حسيت براحة وغفيت يمكن 10 دقايق بعدها قمت بس مو من نفسي
بعد بوسة رائد إللي طبعها على خدي اليسار اللي كان بارز له قمت بارتباك اناظر فيه ثم نزلت عيوني للأرض
رائد : صح النوم حبي .. وش الجمال و الحلاوة ذي كل هذا لي !! حتى انت نايمة تقطرين حلآ !
غالية : ـــــــــــ
رائد : ساكته يا قمر ما عليه مو لازم تحكين تعالي بس اقربي
غالية بتردد : رائد ابقولك شي بـ ...
رائد : اششش اقربي مو وقت الكلام الحين
غالية : بس لازم تسمـ ...
ما عطاني فرصة اكمل كلامي ضمني لحضنه بسرعة ، وهذا اللي ما يعجبني فيه يحسبني جاهزة له اربع وعشرين ساعة ماعندي اعذار !
فكيت نفسي منه بقوة هو استغرب تصرفي : وش فيك مو وقتك تعالي
غالية : رائد أنا مافيني ابقى معك و لا اعطيك
رائد بدأ يعصب : وليش إن شاء الله فيني جرب ولا فيني مرض تعالي اخلصي
غالية : لا انت ما فيك أنا اللي فيني ما اقدر بطني يمغصني
شفته وقف قدامي و وجهه متغير وبكل هدوء : هي جتك .. تكلمــــي جتك ؟
أومأت براسي ايه لا شعوري : والله ما كنت عارفه هي مو منتظمة عندي و المفروض انها تجي الاسبوع الجاي مو الحين
رائد : بصراخ وليش مسويه في نفسك كذا هااا تكلمي ناوية تعذبيني ليش ما دقيتي علمتيني عشان لا اجي اشوف هالوجه ولا ناوية تنتصرين لنفسك تشوفين العذاب اللي فيني بنفسك
غالية ببكى : والله مو قصدي كذا توها جتني بعدما تجهزت آلمتني وخذيت بنادول غفيت وقمت على حسك
شفته قعد بعيد شوي عني يمسح على وجهه ولا نطق بحرف وأنا دموعي تنزل بصمت وراسي على الارض مرت نص ساعة وأنا على حالي و احس فيه
وهو يلف يناظرني ثم يرفع عينه عني خفت كثير يوم رفع يده ومدها لي كنت أناظره مرعوبة و اناظر في يده ماتطمنت لين لمحت شبح ابتسامه عليه قمت وقفت اناظر
رائد بحنان : يعني راح تتمين واقفة ما راح تجين
قربت منه مشيت شوي شوي وفاجأتني حركته يوم اخذني لحضنه وباس خدي همس في اذني : فزتي هالمره
رديت له بهمس كله هدوء : سامحني
ضمني لصدره وشد علي وهو يمسح على شعري بصراحة كنت مستغربة كثير من حركته اول مرة يكون رائد معي بهالحنان يا عساه دووم تعبي نسيته يوم شفت رائد
بس ارتحت كثير وانا بحضنه استلمت للنوم ~ ورحت في نومه كآنت الاجمل من سنوات !.

***

الساعة 5:21 الفجر ، كنت احوس في البيت اتجهز للدوام بعدما صحيت سيدات الحسن تعرفون لازلنا نبي نعرف سر غالية خلصت ورجعت لهم القاهم داخلات جو في النوووم
انفجرت فيهم فجأة : قومي انت ويآها جعلكم للي مانيب قايلة اصحو البنت داومت وانتم تشاخرون هنا يلا تحركي انت وهي
رؤى : يوووه مو لازم نشوفها اليوم بكرة تعرفين ما نمنا الا متأخر !
ياسمين : روحي تكفين نبي ننام
هند وهي تقرب تشيل اللحاف : نامت عليكم طوفه اصحي يلا خلصيني
ياسمين : خلاص خلاص قمت اووووف
رؤى قامت على الصامت وعيونها مقفلة تجاه الباب وصقعت رجلها في طرف الطاولة وقعدت متألمة
ربع ساعة كانت كافية لنا اننا نجهز ونفطر بعد ؛ كيف لا و هند على رؤوسنا ! وصلنا لسى ما داومت وهذا الشي خلانا نخف على هند يعني فيه امل نشوفها اليوم ونخلص
و الغريب ان الساعة الحين 6:18 و غالية ما وصلت ! وش صار معها تتوقعون ؟!

***
الجازي كانت على السفرة تنتظر افرادها كالعادة جا ابوها و لين بعد فترة
ابو سعد : اخوك وينه من غدا امس ما شفته ؟
الجازي : والله مدري يبه دقيت عليه العشاء قال انه بيتعشى برا و لا عاد رد من دقيت عليه ثم صار مقفل
ابو سعد : ولا رجع للبيت ؟
الجازي : لا ما رجع !
كنت آكل بهدوء و أنا اسمع لهم ولا كنت اناظر لهم
ابو سعد : أنا طالع للشركة
الجازي : ما كأنه بدري اليوم
أبو سعد : صح بس عندي اشغال لازم اخلصها
الجازي : عساك على القوة يبه
ابو سعد : الله يسعدك يا روحي ، الحمد لله تبون شي يبه
الجازي : سلامتك يبه
لين لازالت خايفة ابوها يتزوج : سلامتك ارجع بدري على الغداء
ابو سعد فهمها وابتسم : ان شاء الله
مشى خلانا لفيت عليها لقيتها تآكل كأن اللي احد غاصبها : وش فيك تآكلين بدون نفس ؟
لين : أبد ولا شي بس قاعده آكل
الجازي : أدري انك تاكلين بس كانه مو عاجبك
لين : لا ارتاحي عاجبني قامت عن الكرسي : بس اليوم وراي اختبار مالي خلق المادة الكئيبة
طلعت وخلتني وانا عارفه ان اللي في بالها اكبر .. اكبر بكثير ، أخذت سماعة التلفون أدق على رائد اللي ماعرف اخباره من قبل العشاء امس ؛ بس لازال ما يرد !

***

الساعة 6:45 وداومي الفعلي يبدأ 7:00 بس أنا لازلت نايمة الغريب ان رائد صاحي .. ولا صحاني !
لفيت اتحرك بعدل جهتي فتحت عيوني وطآحت على الساعة قمت بسرعة مخترعه لفيت لقيته يشرب قهوة الصبح بهدوء ويناظرني : صباح الخير
رديت : صباح النور ليش ما قومتني تأخرت كثير على الدوام
ترك كوبه وقرب مني و طبع بوسه على جبيني : ما راح يضر غياب يوم بسوي لك اجازة مرضية و اوقعها واختمها من عندي
استغربت تصرفه و استحيت حيل قمت ابي اصرف الوضع : لا انا مافيني شي بداوم وانا امشي رايحه اتجهز للدوام : روح لبيتكم اكيد ...
قبل لا اكمل جملتي رن جواله كالعادة انا التزمت الهدوء بس ما تحركت جتني حالة من حالات اللقافة اللي تصيب البنات اتوقع ان الاتصال من بيتهم
كان يرجع لقهوته بيقعد ورد : هلا يمه .. ايه لا تخافين علي ........ والله جد امس كانت عندي شغلة ضرورية ولا قدرت ارجع ... خلاص بس ارجع اقولك .... يايمه قلت لك خلاص
ايه برجع على الغدا ...... طيب طيب .... مع السلامة
رفع راسه ناظرني انا خفت من نظرته دخلت بسرعة سمعت صوته و هو يستعجلني : اخلصي بسرعة أنا بوصلك اليوم
ما حبيت اعلق وتبون الصراحة فرحت كثير .. أول مرة في حياتي احس اني ...... متزوجة !!

***
ام فارس : انتبه على نفسك وسوق شوي شوي طيب
فارس : ان شاء الله يمه
ام فارس : وش تبيني اطبخ لك اليوم لى الغداء وش نفسك فيه
فارس : يمه اي شي من يديك حلو بس تكفين انا متاخر اليوم
ابو فارس : خلي الولد بحاله كل يوم يعني على نفس الموال ؟
فارس : تكفى يا يبه تفاهم معها يلا اناطالع
مشيت بسرعة قبل لا تذكر الوالدة سؤال وانا طالع لقيت صالح ولد جيرانا واقف عند باب البيت قال وش ينتظر الباص لأخته لا يروح عليها !! ماحبيته هالولد ابد
تركته ومشيت للدوام همي اوصل في اقرب وقت لأني متأخر اليوم ناظرت في الساعة لقيتها 6:48 ان شاء الله يمديني اوصل تقريبا معي 10 دقايق مشيت باقصى سرعتي
واختصرت طرق وقطعت اشارتين .. وصلت ولله الحمد ناظرتي ساعتي لقيتها 6:59 اليوم انا في صراع مع الزمن 7 لازم اوقع ورحت طيران وسجلت حضوري
ابتسمت ابتسامة عريضة حسيت بالانتصار فجأة حسيت احد يمون طقني على كتفي : دكتور فارس كيفك اليوم احس بسعادة في وجهك اسعدنا معك
د.فارس : ابد بس وقعت في 7 تمام اليوم متأخر عن الدوام
ياسر : اليوم غريب بصراحة !
د.فارس : ليش وش صاير ؟؟
ياسر : والله يا دكتور كل العالم متلخبطة جداولهم الا انا يمكن عشان كذا لاحظت
فارس : وضح !
يا سر : الممرضات هند وشلتها جايات بدري ومرابطات تحت اكيد وراهم شي لازم اعرفه و سعود جاي بدري اليوم على غير العادة و اللي خالف العادة وغير نظام المستشفى غالية !
فارس : وش فيها غالية ؟!
ياسر : انت عارف يا دكتور هذي اول وحده تداوم في الشفت و آخر وحده تطلع من الدوام !!
د.فارس : طيب
ياسر : للحين ماجت مع ان الشفت بدأ !!
د.فارس : غريبة اليوم هي معي و عندي جراحة المفروض من بدري تحضر المريض
ياسر اقشعر جسمه من طاري الجراحة وحس فيه فارس : هااه اشوف تغيرت معالمك توك مسويلي مكتشف ومدري وش
ياسر : لا لا سلامتك بس تذكرت عندي جوله على المرضى في قسمي
د.فارس : الله يعين المرضى رح لا تتأخر وتبلشني
مشى ياسر و خلفه فارس اللي كان يضحك عليه لان يخاف من العمليات و تصيبه حالات اغماء !!

خلصت اموري وتجهزت بسرعة وما رضى رائد نطلع الا وحنا فاطرين .. وش عليه دوامه 8 مو انا اللي متاخره حيل !
كنا طالعين للسيارة سوا بس رن جواله باتصال غريب كالعادة هذا اكيد من سلسلة الاتصال اللي تجيه عمري ما فكرت اعرف لأني و ببساطة اخاف من ظله
كيف ادخل في خصوصياته بيذبحني لا محال ، أشر لي اسبقه للسيارة ركبت وكنت اناظر في ملامحه اللي جمدت فجأة وكأنه رجع رائد الشري وبصراحة خفت يوم رجع لي معصب
ولا هو طايقني من شوي وش زينة معي شكله حظي العاثر دوم ما تكمل فرحتي !!
***
في المستشفى ::
د.نواف يطلع على ملف المريض : عطيه Normal saline 0.09 وخليك مراقبته عنده انخفاض واخاف يدخل في complication
ياسمين : حاضر دكتور ..
د.نواف : وين غالية اليوم غريبة ما شفتها ؟!
ياسمين : مدري يا دكتور واضح انها ما وصلت الى الان !
د.نواف : خير ان شاء الله انتبهي على المريض واي شي يصير للمريض عطيني خبر فورا
ياسمين : ان شاء الله
د.نواف : بلغي زميلاتك هند و رؤى اني ابيهم في مكتبي الحين بسرعة
ياسمين بلقافة واضحة : خير يا دكتور صار شي ؟
فهم عليها وابتسم : لاتخافين مو شي ضروري بس تقارير لهم من امس كانت ناقصة لازم افهم وش صاير معهم ولا عندك رأي ثاني انتِ ؟
ياسمين : آهااا أبد .. راح ابلغهم الحين
طلع وتركها وهي بدورها خبرت البنات اللي تركوا المراقبة وراحوا للدكتور ......

كآن سعود مدآوم بدري على غير العادة بس شكله كأنه كاره عيشته مطفش من الدنيا و حالته صعبة لدرجة انه داوم بدري بس على غير سنع قعد جنب سيارته في المواقف يدخن !
: أنا وش ابي فيه بنت الكلب ليش فارض نفسي عليها اللي ما تبيني و اضح انها مو راعية هالحركات صادق يزيد انا لازم اشيلها من بالي بس كيف كيف انا حبيتها ايه حبيتها هذا التفسير الوحيد لحالتي حسبي الله عليك يا غالية عذبتيني جننتيني
كان يدخن بكل قوته حتى انه اوشك على انه يخلص باكيت كامل في جلسته ذيك .. بس صدمه الموقف اللي شافه ، سيارة يعرفها زين كيف لا وهي سيارة رائد
بس الصدمة كانت يوم وقف في المواقف القريبة منه معقولة رائد هنا و هالتواضع شدني ان باب الراكب انفتح و نزلت منه وحده ايه وحده أنا متأكد منها هي اللي خذت قلبي و عقلي
غالية ! معقولة هذي انت يا غالية هه توني كنت اقول انها مو لذي الحركات بس طلعت داهية بنت كلب عرفت من تختار ايه وش عليه هذا رائد ولد الـ .. مو حنا عيال حيا الله شي
بس وش الوقاحة اللي فيها جاية لدوامها ونازلة من سيارته عيني عينك هين يا غالية ان ماجبت راسك ماكون سعود وانت بعد يا رائد لازم تدفع ثمن سرقتك لغالية مني !
***
كان في مكتبه يخلص اشغاله قبل الاجتماع اللي بيسويه للموظفين الجدد .. وشاغل فكره الفرع الجديد اللي بيفتحه للشركة وبيحط مسؤوليته على من ؟!
رن جواله بمكالمة دولية : هلا يبه شلونك
سعد : أنا بخير يبه طمني عنك وش مسوي
ابو سعد : الحمد لله كل شي تمام .. ها بشرني كيف الشغل عندك
سعد : الحمد لله عال العال الامور في تحسن و المدخولات صايرة اكثر و اكثر و طلعت نسبة ارباح بفائض
ابو سعد : الحمد لله زين ما نويت تزورنا اشتقنا لك
سعد : والله ودي يبه عمرك طويل انا داق طالبك في اجازة اشتقت لك و للبنات ورائد والرياض و اهل الرياض
ابو سعد : زين تسوي حياك باي وقت وبعد ابي شورك في امور بسويها هنا
سعد : ارسل لي ايميلات بكل شي وانا بخلصه من عندي قبل لا ارجع
ابو سعد : لا هذي امور ثانية انت تعال ويصير خير ان شاء الله
سعد : ان شاء الله بكون عندك باقرب فرصة
ابو سعد : زين ما اطول عليك انتبه لنفسك وزوجتك وبوّس احفادي
سعد : ان شاء الله فمان الله
قفل من ابوه وراح باتجاهها كانت معطيته ظهرها تناظر من البلكونه ضمها من الخلف وباسها في خدها : خلاص هانت كم يوم بنروح
صرخت بفرحة : really من جدك حبيبي ما تمزح
سعد : من متى مزحت معك في سفرة
بعدت عنه ولفت تناظره : لا جد ماعمرك مزحت بخصوص السفر
ناظرها بنظره خجلتها : بس هذا اللي طلع معك مافي بوسة شي
ساره بتصريفة : امممممم فواز و عبد الإله يسبحون برووح اشوفهم
سعد قرب منها وبهمس : نادي لهم لوسي وانت خليك هنا ...

***

خلصت من المريض اللي في الملاحظة و بصراحة تعبت صح انا اتعذّر بالتعب دووم عشان ارتاح بس هالمرة بجد انا بحاجة للراحة استئذنت و شلت نفسي رآيحه غرفتنا اريح
انا ماشية طلعت جوالي ادق على وحده من البنات عشان لا ابقى لحالي بس اللي فاجأني رن و الرقم غريب و تبون الصراحة انا مو متعقدة من الارقام الغريبة يعني عادي عندي ارد
بس ما حبيت ارد وانا ماشية انتظرته قفل .. دقيت على رؤى لان هند مافي امل !
ردت علي ما طولت اما انها طفشانه او تبي تنحاش عاد اليوم دكتورها نواف قالت بصراخ : يا كلبة وينك من اليوم توك تذكريني
أنا ماستغربت حالتها : وش صاير بعد من حآبسك ؟
رؤى : نوافووه التبن نزلني قسم الاطفال واحد منهم فتح حجابي و خلاني اضحوكة لا و الثاني جايني كله دم ويرافس ويسب بعد قسم ودي اسطره على نافووخه
ياسمين تخفي ضحكتها : فديتك تعالي طيب انا بغرفتنا
رؤى : زين بجي بس بخلص ضماد ابو سيقان ذاك
ياسمين بضحكة : طيب
كنت اكلمها وانا ماشية وصلت الغرفة وحطيت الجوال على الطاولة رجع رن رنتين ولا كمل الثالثة الا وانا ارد : نعم
جآني صوت رجال غريب وهو يتكلم حسيت بهيبة الشخص اللي معي : ياسمين .. أنا ابوك
ابوي ! انت ابوي يالله كم اشتقت اناديك يا .. : يبه ! هلا يبه كيفك ؟
ما دققت كثير في كلامه مشاعري راحت لمكان ثاني : .... انت وينك الحين
ياسمين : مداومة في المستشفى آمرني يبه
خالد : بجي آخذك معي للبيت اليوم
ياسمين : إن شاء الله انتظرك
خالد : طيب في امان الله
قفل مني وانا مو مستوعبة معقولة يا بشر هذا ابوي ابوي يا عالم كلمني وبياخذني بيته ظليت سرحانه افكر وافكر وانا ابكي فجأة نطقت وعلقت بالكلمة اللي ما قلتها
لي زمن : يبه يبه يبه ..!!

***

كنت في غرفتي اليوم ماعندي محاضرات و هنادي مداومة يا بعدي تتعب مع طالباتها ومع ذلك تحبهم فارس في المستشفى و معاذ و دانية في مدارسهم ابوي كان عنده شغله طلع لها
و امي اتوقع انها على التلفزيون تتفرج بعد قلبي قلت بروح لها فديتها اسولف معها طلعت من غرفتي كنت بنزل تحت بس لمحت التلفزيون شغال في الصالة اللي فوق رحت ولقيتها سلمت عليها وقعدت معها
: ورآتس ما دآومي يمه يعورتس شي فيتس شي ؟
شروق : لا يمه بس اليوم محاضراتنا وحده اعادة و الثانية معتذرة قلت ارتاح بالبيت
ام فارس : ورا يمه لو انتس رايحة تجددين معلوماتس
شروق : هماني قلت لتس يمه اليوم اعادة وانا مآحب التكرار تعرفيني بنيتس
ام فارس : الله يوفقتس و يوفق اخوانتس يا رب
شروق : آمين ، الا يمه وينه الوالد ماشوفه
ام فارس : راح يخلص شغله وبيرد ماهو بمطول
شروق : يمه وش السالفة اللي لكم فترة تحكون فيها ومن هي اللي ابوي مايبي يرتاح دامه مايعرف وينهي وفارس يدور عليها
ام فارس : وش اقولتس بس يا يمه هذي سالفة طويلة لها سنين الله يعين ابوتس
شروق : خوفتيني يمااه قوليها لي تكفين
ام فارس : قبل سنوات وقبل لا تنولدين انت كنت حامل باختس هنادي يوم جاني خبر هزني .................

تم الجزء الخامس

وش توقعاتكم في علاقة رائد و غالية وليش مخبينها ؟

هند وش سالفتها ؟

ومن هي اللي ام فارس تحكي عنها لشروق ؟؟


شاركووني