الجـــــزء السادس ~
يّأٌ قُسّوُة بَعِضً أًلًبّشِرِ
كنت في غرفتي اليوم ماعندي محاضرات و هنادي مداومة يا بعدي تتعب مع طالباتها ومع ذلك تحبهم فارس في المستشفى و معاذ و دانية في مدارسهم ابوي كان عنده شغله طلع لها
و امي اتوقع انها على التلفزيون تتفرج بعد قلبي قلت بروح لها فديتها اسولف معها طلعت من غرفتي كنت بنزل تحت بس لمحت التلفزيون شغال في الصالة اللي فوق رحت ولقيتها سلمت عليها وقعدت معها
: ورآتس ما دآومي يمه يعورتس شي فيتس شي ؟
شروق : لا يمه بس اليوم محاضراتنا وحده اعادة و الثانية معتذرة قلت ارتاح بالبيت
ام فارس : ورا يمه لو انتس رايحة تجددين معلوماتس
شروق : هماني قلت لتس يمه اليوم اعادة وانا مآحب التكرار تعرفيني بنيتس
ام فارس : الله يوفقتس و يوفق اخوانتس يا رب
شروق : آمين ، الا يمه وينه الوالد ماشوفه
ام فارس : راح يخلص شغله وبيرد ماهو بمطول
شروق : يمه وش السالفة اللي لكم فترة تحكون فيها ومن هي اللي ابوي مايبي يرتاح دامه مايعرف وينهي وفارس يدور عليها
ام فارس : وش اقولتس بس يا يمه هذي سالفة طويلة لها سنين الله يعين ابوتس
شروق : خوفتيني يمااه قوليها لي تكفين
ام فارس : قبل سنوات وقبل لا تنولدين انت كنت حامل باختس هنادي يوم جاني خبر هزني عمي الله يرحمه اللي هو جدتس طلب من ابوتس انه يتزوج بنت صديقه
الحرمه كانت مطلقة وقته امها متوفيه وابوها متزوج عشان كذا ماحب يترك بنته وحيده وهي ماعندها ولد ولا اخ فخطبها لابوتس من ابوه و هو ماحب يرد صديقه
و اجبر ابوتس انه يتزوجها وفعلا تزوجها بس تعرفين الناس وكلامهم اللي ما يرحم احد ولا يترك احد في حاله كان يآصلنا كلام من كل مكان انها مو كويسة ولها حركات ومن تسذا
لدرجة انها سببت جلطة لابوها وبعدها بفترة توفى ، ابوتس ما يقدر يخليهها لانها حآمل و الكلام مثل السم يآصل وهي ما تحكي ولا تحآول تبرئ نفسها وتبكي احيان
واحيان تصدقين من تصرفاتها لين مره جا لأبوتس خبر عنها واثباتات عليها استغفر الله وان الجنين اللي ببطنها مو لابوتس .. ما كلمت كلامها لان دموعها خانتها وقعدت تبكي
شروق متأثره مررة شوي تنزل دمعتها : يمه هدي الله يخليتس
ام فارس تشهق : والله الشي ما يتصدق انا ما كنت راضية بزواج ابوتس منها بس عاد شي وصار وقتها انقهرت عليه كثير
شروق : ايه يمه وش صار بعده ؟
: أنا بحكي لتس وش صار !
لفوا لمصدر الصوت كلهم ، ابو فارس دخل عليهم وباين انه متأثر حيل : ما تركتها لحظة وحده ولا رحمتها طلقتها ورميتها بالشارع كانت تبكي وتبكي وانا قلبي صخر ما لان لها ولا للي ببطنها
اللي ممكن باي لحظة تولد ماعررفت اي خبر عنها ارسلت ورقتها لبيت مرة ابوها وانقطعت اخبارها عني ، بعد تقريبا سنة جات لي في الشركة بحضنها بنت كانت تترجاني تبيني اسمع لها
بس انا ماتركت لها مجال طردتها مرة ثانية وراحت ولا رجعت اختفت من كل حياتي مرت الايام و السنوات جيتي انت و معاذ و دانية و الصغار كبروا و اللي مات مات ومنهم هي !
شروق بتفاجأ : مآتت !! وبنتها وش صار عليها وش دنياها ؟
ابو فارس : هي اللي ادور عليها هي اللي ما برتاح لين القاها اتمنى من ربي ما يقبضني لين القاها
ام فارس : اسم الله عليك بتلقاها ان شاء الله
شروق : ليش تبي تلقاها يبه ؟
ابو فارس : لانها اختس !
شروق : اختي !! انا عندي اخت غير هنادي و دانيه ؟
ام فارس : ايه يا يمه ايه عندتس و اكبر منتس بعد
ابو فارس : الله يعلن الشيطان الله لا يوفق اللي كان السبب ظلموها وخلوني اظلمها معهم وظلمت بنيتي اللي عمري ما ناظرت بوجهها عمري ما حملت لها عاطفة وهي بنت صلبي
قآم مستاء كثير و طلع لغرفته وأنا كلي استفهامات و تعجب وامي بجنبي محزنه وبشوف دموعها مخي قفل عن التفكير وش هالصدمات يا رب معقول معقول انا عندي اخت معقول فيه ناس
ناس بدم ولحم وقلب يسوون هالامور ليه لييييه وش مصلحتهم ؟؟ يا رب رحمتك يا رب انا اسمع القصة احسني بموت كيف مرت ابوي اللي صار معها كيف بنت ابوي اللي هي اختي وينها
وكيف عايشه وش مسويه بدنياها ما لقيت الا اني ادعي لها بقلبي الله ييسر عليك يا فارس و تلقاها وتجيبها لنا يا رب
***
الحمد لله نجحت العملية الدكتور فارس ما شاء الله عليه شاطر الله يوفقه و يسهل امره طيب هالدكتور على انه شاب صغير بس ما عنده حركات مثل سعود استغفر الله
طلعت من غرفة العلميات بدلت و رحت ارتاح بصراحة تعب العملية وقفت كثير مدري هي طولت ولا انا تعبانه رحت ارتاح في غرفتنا عشان برجع اسير على مرضاي بعده بخلي رائد يعملي اذن اطلع البيت ارتاح كنت ماشيه لقيت الدكتور فارس اللي طلع قبلي وكانت تمشي وراه رؤى قربت منه : مبرووك دكتور وان شاء الله من نجاح لنجاح
د.فارس : الله يبارك فيك غالية وانت ما قصرتي ونعم فيك
غالية : طيب دكتور كم بنقعد نراقب الحالة في المستشفى
د.فارس : على حسب الاستجابة بعدما يصحى من البنج انا بقعد اليوم لين اتطمن انت تقدرين تنصرفين فيه ممرضة بدالك خليتها للحالة
غالية : مشكور دكتور ما تقصر
د.فارس : العفو نقدر الكفاءات اللي مثلك
رؤى كانت توزع نرها بينا ! تناظرني و تناظر فيه نظرات عميقه ما فهمت عليها ثم سمعتها تقول بغيرة : دكتور فارس متى تدخلني معك عملية ودي اوريك اني بعد شي مو بس غاليه
ابتسم لها وناظرني : يوم تكونين مثل غاليه ، اوعدك لو ما اخذتي مكانها بتصيرين على الاقل جنبها
نزلت راسي بحيا لان واضح اعجاب الدكتور بشغلي ؛ رن جواله استئذن وراح
رؤى : غالية و غالية وغاليو وهم غالية ودي اعرف وش فيك من زود !
غالية : بتروحين الغرفة ولا عندك مرضى ؟
رؤى : لا عيوني من اليوم رجلي على رجلك وبعرف شلون اتغلب عليك
غالية : لا تقلديني تقدرين تصيرين احسن مني
رؤى بقهر : ايه تفلسفي علي وقولي الغاز ما فهمها
ضحكت لا شعوري : لا يا عيوني ماتفلسف بس انت اثبتي شخصيتك لا تقلدين شخصية غيرك !
رؤى : اقول غالية اليوم مزاجك اووك تسولفين وضحكتي بعد وش الطاري ما خبرتك كذا
مر سعود وقتها و رمى كلمته ومشى : وش عليها نآمت في العسل امس !!
يمه منه اسم الله علي كيف عرف اني نمت احلى نومه امس : .......
رؤى : الله يخلف عليه بس الولد بيموت وانت معطيته طناش
غالية : انا تعبانه تعالي نرتاح
مشينا بصمت و رؤى كانت ناشبه فيني مثل الطفل في زحمة ناس يخاف يضيع امه ! دخلنا الغرفة ورحت على طول اشغل الغلاية ابي شاهي لفيت لقيت رؤى واري تناظر
استغربت منها حيل يوم قالت : غلو تصدقين عيونك نسخه من عيون الدكتور
زاد استغرابي : انا ! اي دكتور
رؤى : فارس من اليوم اناظر فيكم نفس العين نفس الرسمة كل شي حتى طول وكثافة الرموش لو اني ماعرفكم كنت قلت اخوان لا توم بعد
غالية : الله يكملك بعقلك من شوي تقولين تبين تآخذين مكاني وهذا تفكيرك عيون ورموش
رؤى حست بشي تافه قالت باحراج : يعني حرام نشطح
غالية : لا ابد مو حرام اصلا وش دراك يمكن يكون نسختي بس الذكوريه !
حسيت رؤى ودها تصكني بالكوب في الوقت اللي اكتيفت بابتسامة ورجعت اصلح لي كوب شاهي
***
انتهى دوام رائد وقعد ينتظرني ستغربت منه بس اللي زاد استغرابي سعود تصدقون اليوم ما قعد يتأملني ولا سوا شي غير كلمته لرؤى عني كان مختفي تماما حتى عند المرضى ما شفته
يا جعله دووم كنت بطلب اذن خروج من رائد بس انشغلت مع البنات سولفنا وضحكنا خصوصا اليوم الحالات مو بذاك السوء الحمد لله و الفلبينيات قايمين بالمهمة ..
اليوم سولفت مع غالية يالله يا ناس بنت شفافة وراقية في تعاملها وصريحة كنا مآخذين عنها فكرة انها معقدة وشي من كذا بس بالعكس طلعت غير ويمكن هذا نقطه في بحر
حسيت بألم في نبرة صوتها يعني هي ما تفرق شي عني انا وياسمين ورؤى وحسيت رؤى مررة قاطه الميانه معها وحسيتها مررة قريبة منه حتى تقوم وتقعد معها استغربت كثير
بوريها رؤى الكلبة ذي خاينة تكون صداقات من ورانا أما ياسمين حسيت بفرحه في عيونها مدري كانت كل شوي تناظر ساعتها وراها شي ما قدرت امسك لساني
: اقول سوس وش فيك تناظرين الساعة و شكلك ينطبق عليه اللي على راسه بطحا والغريب احس بسعادة و غيرة في الغرفة هنا لاول مرة الله يتممها ويديمها علينا
رؤى بلقافة حتى اسرع من ياسمين : ايه ما دريتي بتروح مع ابوها لبيته اليوم بعد الدوام
هند بابتسامة : جد حياتي ليش ما قلتي لنا حتى نبارك لك !
ياسمين : والله مدري وش صاير بس احسني فرحانه لمجرد كلام ابوي مدري هو يبيني اقعد عنده على طول ولا بس زيارة ويرجعني
هند : تعالي ابوسك يا كلبة ولا تعلميني مبرروووك وان شاء الله فاتحته خير
ياسمين بحب : عقبالك يا قلبي
حسيت ان هند تأثرت من كلام ياسمين وغالية تناظر بصمت حبيت الطف الجو : بنات اليوم اكتشفت شي خطير
قبل لا البنات ينطقون بحرف طق الباب تغطينا كلنا بسرعة : تفضل
فتح الباب وقف عنده : السلام عليكم
كلنا سوا : وعليكم السلام
د.فارس : اعتذر عن ازعاجكم بس بغيتك غالية تعالي شوي
قامت غالية وراحت له : آمر دكتور
د.فارس : ما يآمرك ظالم ... كان يكلمها في حاله المريض في غرفة 16 السرير الثاني طلب منها ورقه وقلم لانه احتاج يكتب و عطته غالية قلمها
د.فارس : زين انت حرصي عليه و عاينيه الصبح اول ما تجين واكتبي لي تقرير وصف للحالة
غالية : ان شاء الله ، طلع من الغرفة ومعه قلمها اللي استحت غالية انها تطلبه منه رجعت تسولف مع البنات والباب لا زال مفتووح
هند : ايه رورو قولي وش اكتشافك الخطير حمستيني
ياسمين : لا يكون اكتشاف طبي بنصدم صراحة
رؤى : هههههههههه لا تخافين مو غالية انا
ياسمين : اجل
رؤى : اليوم كنت اناظر في الدكتور فارس و في غالية سبحان الله نفس العيون جحم وكبر ورموش وكل شي وربي لو ما كنت اعرفهم كنت اقول اخوان لا توأم بعد !
اللي محد كآن متوقعه ان فارس رجع يعطي لغالية قلمها وسمع الاكتشاف بلم في مكانه ثم استوعب عطاها اعتذر ومشى
مشى ومخه مشغول في غالية و اكتشاف رؤى اللي عمره ما فكر يحط و1% انها في مكان عمله حاول يشيل الفكرة من باله بس عجز !!!
رؤى : وش فيه اسم الله عليه تقولين مسه سكني
هند : جد وش فيه قلب توه يحكي ويسولف ومبتسم
ياسمين : غريب هالانسان
غالية وصلها مسج من رائد ( يلا انزلي 5 دقايق بكون مقابل الباب ) اسئتذنت على طول من البنات وقامت بدلت و طلعت متجهه للسيارة
سعود فضل يراقب من بعيد لبعيد كان يراقب رائد و غالية اللي ركبت سيارة رائد بحركة خفيفة محد انتبه لها و اللي محد داري عنه ان البنات واخيرا شافوا من يوصل غالية ~
رؤى مصومة وساكته بينما ياسمين ما قدرت تمسك لسانها : معقولة معقول اللي شفته غالية مع رائد ! كيف وليش ومتى ماتوقعتها آخر وحده توقعتها تسوي كذا
هند ما تدري وش تقول : .. ياسمين اهدي عيوني ما عليك كل شي بيبين لا تتهمين احد بمجرد نظرة يمكن فيه شي
رؤى بعصبية : اي شي ما شفتي شلون تسحبت يوم وصلها مسج شلون ركبت السيارة ولا معاملتها هي ورائد من قبل مو معقول
طلعت وتركتنا استغربت من حركتها و ردة فعل ياسمين و من الاساس فعلة غالية بس عمري ما اتهم احد بشرفه ارجع و اشوف نفسي بالاول !!
***
عارفة بجدول و نظام البيت حتى غالية متى تداوم و متى ترجع و متى رائد يجي و كم يقعد وش يصير بينه وبين غالية ، كل معلوماتها اللي تجمع توصلها بشكل تقرير يومي ؟؟
ناتالي : OK she is arrives now " سوف تصل قريباً "
... : OK you can go , keep your quiet and continue in your job " حسناً يمكنك الذهاب ، حافظي على هدوئك و واصلي عملك "
ناتالي : please I'm so tired " أرجوك أنا متعبة جداً "
... : خلصي اشغالك و لا تتشكين ، قفل في وجهها !!
ناتالي : لو ماكنت مضطرة ما قعدت هنا دقيقة وحده ،، رحمتك ربي
من هذا وش مصلحته يعرف باللي يصير في بيت غالية ؟
ناتالي ليش توصل له اللي يصير بشكل يومي ؟
تم الجزء السادس
|