[اسطورة !]

ساعدتها حتى تنزل من السيارة وكانت السيارة بجنب الفرشة تماماً وطالعت جهة الشباب ماكان حد منتبه منهم لانه كلهم معطينا ظهرهم
يعني وجيههم للبحر ما عدا ولد عمي
جراح هو الوحيد الي شافنا وكان يناظرنا بنظرات غريبة لا زم يفهم انه ما صار شي نزلتها ع الفرشة

مشاعل بخوف وهي ما سكة يد سارة : شفيك سارة شصاير ومع مين رجعتي اشبها رجلك ليش انفك كذا
سارة : على هونك خير كله خير
مشاعل : كيف خير ما انتي بشايفة شكلك كيف
سارة : عادي انتِ لا تشيلي هم انا كنت العب ويا البنات وطحت من الدباب
مشاعل : لا يكون
قطعت عليها سارة : لا موب كسر لا تخافي مجرد طيحة بس قوية شويتين
مشاعل : مع منو رجعتي
هنا تدخلت انا : انا شفتها طايحة حاولت اساعدها لكن هي ابد ما قدرت تمشي والطريق وايد طويل
مشاعل : وكيف حلا ما شافت هذا كله
رغدة : هي طاحت واحنا نتسابق وما شفناها وبعدين انا رحت اشتري من بسطة وقلت لحلا ترد لكم وانا بطريقي للبسطة حصلتها طايحة
وحصلنا طلال صديق مشاري وعرض علينا مساعدته وقبلنا لأننا بالفعل بحاجة لهاذي المساعدة
اجل ذاك مشاري اخ رغدة بس ليش بذاك اليوم محد كان بالمستشفى عند امها غيره غريبة محد جا يزورها : المهم الحمد لله على مساعدتك
ومشكورة يا رغدة ع المساعدة

رغدة : شدعوة تشكريني احنا اهل وما بيننا شكر
سارة : وين حلا
مشاعل : راحت ويا شهد وعذاري يتمشون
رغدة : شجونة وش فيك
شجون : نو كومينت
رغدة : شجون شجون شجون شفيك شفيها هاذي ولا كأني انا ديها
مشاعل : والله مدري حتى لما نسولف معاها ما هي بمعطيتنا وجه
سارة : اكيد في شي مزعلها
رغدة : مستحيل هاذي تزعل هاذي بس تضحك وتنكت وقلبها طيب ما يشيل على احد عشان تزعل
مشاعل غمزت لهم يعني اسكتوا الي فيها كا فيها ما انتوا بشايفين شكلها سكتوا البنات وجلسوا ينكتوا ويتكلموا كلام جانبي




رجعوا حلا وشهد وعذاري للبنات وعرفوا سالفة سارة

عذاري : اصلاً انتوا لا تقولوا له انه طلال الي رجعكم لأنه حتى لو شافكم جراح ما راح يفتن و بعدين جراح فري يعني عادي عنده
رغدة : بس هي حتى موب قادرة تمشي يعني كيف رجعناها
عذاري : عادي قوليله يا مشاعل انك شفتيها وساعدوك الثلاثي وانتهينا احسكم مرة معقدين الأمور
مشاعل : والله موب معقدين ولا شي بس انتِ ما تعرفي كيف ايهم غيور بشكل عجيب




عند الشباب :

جراح : خلاص يكفي شباب يلا نروح
مشاري : ايه والله حتى انا تعبت
ايهم : خلاص انا بتصل على خواتي وبقولهم يتجهزوا
اتصل ايهم على خواته وتجهزوا

ولما جات بتركب سارة السيارة ساعدتها مشاعل على الركوب
اول ما دخلوا السيارة باشرهم ايهم بالأسئلة كيف وليش ومتى
وهم حاولوا يقنعوه وبعد عناء طويل اقتنع


وصلوا الجميع لبيوتهم وبعد ساعة من رجوعهم اذن الفجر


في غرفة رغدة :

صليت الفجر و لبست مريولي و جزمتي ( اكرمكم الله ) احس انه سارة وشجون بيغيبوا سارة من شان رجلها وشجون لأنها متضايقة مدري من شنو
اما حلا اكيد بتحضر خليني احضر واشوف ابلة شيماء وحشتني يالبى قلبها

نزلت لتحت ولقيت امي :


رغدة : السلام عليكم
ام مشاري : وعليكم السلام ورحمة الله وبركاته يا يمه غيبي وش يوديك المدرسة
رغدة : عادي يم قدني مواصلة مواصلة خليني اروح المردسة ولما ارجع انام لين ما اشبع
ام مشاري : الله يرحم ايام اول كنت ما تصدقي نقولك غيبي و الحين ترفضين
رغدة : هههههههههه يمه صرت شاطرة
ام مشاري : دوم يارب نبي نتيجة حلوة
رغدة دقت على صدرها : ما عليك يمه دام رغدة بنتك كل شي مئة مئة
مشاري نزل بهاللحظة : وفول وطعميه من العجايب انك رايحة للمدرسة برضاك
رغدة : ما في شي مستحيل
مشاري : المهم يا ام مستحيل جاهزة
رغدة : ايه يلا مشينا
ام مشاري : وين مشيتوا تعالوا فطروا
مشاري : والله يومه اكلنا لين ما قلنا بس احس بطني بتنفجر
رغدة : بليز لما تنفجر علمني عشان اصورك وانشرها بالأخبار
مشاري : اقول تلايطي يا ام لسان
رغدة : انا ام لسان يا ام لسانين
ام مشاري : اسكتوا تضاربوا كأنكم بزران شوفوا وش طولكم
مشاري قرب من امه وباس راسها : مع السلامة يمه
رغدة قربت من امها وباستها : مع السلامة يالغالية
ركبوا اثنينهم للسيارة






وصلت للمدرسة قبل الطابور بشوي وظليت انتظر وانتظر على امل انه وحدة من البنات تحضر لكن ولا وحدة حضرت دق الجرس وطلعت للفصل
المعلمة اشواق : السلام عليكم ورحمة الله وبركاته
الطاالبات : وعليكم السلام ورحمة الله وبركاته
طالبة : ابلة اشواق موب انتي الي علينا علينا ابلة شيماء
المعلمة اشواق : متأكدة
الطالبة : ايه يا ابلة
المعلمة اشواق : روحي تأكدي منها لأنه بجدولي انا الي عليكم
الطالبة : ما اعرف مكتبها
المعلمة اشواق : مين تروح عند المعلمة شيم
ما لحقت تكمل الكلمة الا ردت عليها رغدة : انا يا ابلة اعرف مكتبها
المعلمة اشواق : طيب روحي يا رغدة ويا ويلك لو شفتك تفرفري مثل العادة
رغدة : لا ما راح افرفر



رحت وانا شوي وبطير من فرحي ما ادري ليش ارتاح لهاذي الانسانة دخلت قلبي واقتحمته
وصلت للمكتب طقيت الباب ودخلت وقفت عند مكتبها
رغدة : ابلة شيماء
المعلمة شيماء رفعت راسها وشافت رغدة : هلا برغودة بنيتي الشطورة
رغدة : اهلين ابلة انتِ علينا هاذي الحصة
المعلمة شيماء : لا يا حلوة تغير الجدول
رغدة : اها طيب شكراً

و مدري وش صار لي ظليت اناظرها بصراحة احس كل شي فيها جاذبني اول مرة احس انه في ابلة حنونة علي لهاذي الدرجة
استغربت من نظراتها بس خليتها ما ابي ازعجها بشي من يوم عرفت ان اسم صديقتها مطابق لاسم الحقير وانا ما ابي اضايقها بشي بالعكس
بحاول اكسب قلبها لين ما تعتبرني مثل صديقتها وتخبريني بكل شي بدون ما تحس

حسيت على نفسي وابتسمت لها قبل ما اخرج وبعدين خرجت رحت للفصل وخبرت ابلة اشواق