[لامارا]

في بيت بوعبدالعزيز وتحديدا بقسم عبدالعزيز فالطابق الثاني كانت خلود قاعده والدنيا ضايقه فيها قرب منها عبدالعزيز وقال بحب: شفيج حياتي ليش مبوزه؟
خلود والدمعه حايره بعينها: عبدالعزيز انا تعبت من العلاج
عبدالعزيز: بس ياحبي مالنا الا الصبر شنسوي مب انتي تبين عيال؟
خلود التفت عليه وبعيونها نظرة امل يوافق: نزييين عزيز شرايك نتبنى بنوته حلوه والله خاطري في بيبي
عبدالعزيز الي رافض الفكره من الاساس: خلود انتي تعرفين رايي بالهموضوع وكم مره قلت لج مابيج تفتحينه
انسيه
خلود في محاوله منها تقنعه: بس هذا اجر ياعزيز ومحد مايبي الاجر
التفت لها عبدالعزيز وقال: محد يقول غير هالكلام ياخلود بس انتي ماتدرين هل تضمنين عمرج بتدومين لها والا هل تضمنين ان محد بيجرحها ؟؟ والا انج تقدرين تحسنين فيها لانها بتكون برقبتج
سكتت خلود ومسحت دمعه كانت بتخونها وتنزل .. قرب منها عبدالعزيز وحط يده على كتوفها الصغيره وقال: ياخلود لاتظنين اني ابي اضايق او ارفض لج شي انتي خاطرج فيه بس هذي مسؤليه كبيره واحنا الحين نعالج وان شاءالله الله بيرزقنا بعيال وبنات يترسون علينا حياتنا وبتربينهم وبتفرحين فيهم قوي ايمانج بالله وخلج قريبه دوم من ربج ادعي ربج بكل صلاه استغفري ربج دوم وربي ماراح ينساج ان شاءالله
التفت له خلود بأبتسامه من ورا الدموع وقالت: الله يرزقنا الذريه الصالحه ياعبدالعزيز


فالصاله تحت كانت تماضر تقرا مجله وامها جنبها تشوف التلفزيون نزل عليهم عبدالعزيز : السلاام عليكم
ام عبدالعزيز: عليكم السلاام هلا بعزيزاان
ضحك عبدالعزيز وقعد جنب امه: هلا بج يالغاليه شحالج؟
ام عبدالعزيز : بخير يعلني فداك الا وينها خلود ياوليدي مانزلت معاك
عبدالعزيز: يعني يمه ماتعرفينها ست الحسن والجمال لازم تتكشخ قبل ماتنزل عاد قلت لها انا بنزل وانتي لحقيني
ام عبدالعزيز: بتروحون مكان يمه؟
عبدالعزيز: لا والله بس عندها غرض بتوديها بيت صديقتها وعقب بنزلها بيت اهلها وبروح شفتي شلون؟ كل هالكشخه عشانها بتشوف صديقتها 5 دقايق عند الباب وبتروح هههههه
ام عبدالعزيز: اييي عدله وزينه بنت راشد ماعليها قصور

شوي الا خلود الي كانت جايه عالدرج وتسمعهم: فديتج عمتي عيونج الحلوه .. دنقت عليها تحب راسها
تماضر : ياااااي خلود شهالعبايه الكشخه
خلود: هذي الي قلت لج مسويتهم في الامارات
تماضر: فضيييعه والله شكلي بستعيرهم منج يوم
عبدالعزيز: اخيرا نطقت الانسه تماضر من الصبح موجود ماكلفتي نفسج تبطلين حلجج تسلمين علي
تماضر: توني شايفتك الظهر ومسلمه عليك عزوز كم مره تبيني اسلم؟
عبدالعزيز: عزوز في عينج يالسوسه مابي سلامج .. حتى سلامج تشحين فيه يالزطيه
تماضر سكرت المجله وشوي وبتصيح: عزيييييز شفيييييك
ام عبدالعزيز: بس ياعيال كله نجره وهواش














فليل بعد ماظلم الوقت ع الساعه 7 اجتمعـوا كلهم
في بيت بومحمد كانوا الجده ام سلطان وام محمد وام عبدالعزيز وعمتهم ساره وبناتهم مجتمعين
البنات قاعدين في زاويه قريبه من التلفزيون والحريم قاعدين بروحهم ..
جواهر : الحين الجو حلو ليش مايودونا العزبه؟؟
تماضر: جدي كل يوم يرووح
جواهر : حلووو خلاااص من بكرره جهزوا عمركم كلنا بنروح مع جدي
اضحكوا البنات .. وشوي ويدخل غانم كان مستعجل
كانت تماضر ونوره وريم وخلود منزلين شيالهم وبسرعه البسوها ... ابتسم غانم وفنفس الوقت انحرج
سلم على جدته واستأذن بيروح غرفته ياخذ له غرض ويطلع ... لحقته جواهر : غنوووم
غانم بعصبيه: شتبييين
جواهر: شفيييك؟؟
التفت غانم: الحين انتي لاحقتني من تحت عشان هالسؤال؟
جواهر بخوف : أي
فتح غانم باب غرفته وقال: ماعندج سالفه ...
خافت جواهر قربت الا سكر الباب في وجها فتحته ودخلت غنوم تكفى قول ابوي فيه شي والا حمود؟
التفت غانم وضحك بصوت عالي .. استغربت جواهر وبنفس الوقت عصبت : شفيك انت عندك انفصام بالشخصيه؟؟؟
غانم: والله الي يسمع انتي شتقولين غصب بيصير فيه انفصام فالشخصيه.. لاتفاولين على ابوي ومحمد مافيهم الا العافيه بس جاي باخذ سويك الجت سكي مالي وبروح !
تنهدت جواهر بأرتياح وبنفس الوقت عصبت على غانم وقالت: بس انت اسلوبك ونظراتك كانت تبين ان فيه شي
توه بيتكلم غانم الا قاطعته جواهر وقالت وهي تصرخ تبين انها معصبه: بس خلاص ... انا بنزل تحت .. توها بتروح الا سحبها غانم من شعرها وقال: لما اتكلللم يالسوسه ماتستكين وثااني شي ماتصرخين علي ماني اصغر عيالج .. فاهمه؟؟
وجواهر الي كانت تصارخ من قوة قبضة يده على شعرها ويجرجره: آآه آآآآي غنوم .. خلاص فهمت
هده بقوه وقال: انقلعي تحت ... والا اقول تعالي تعالي روحي افتحي كبتي الي فالزاويه وطلعي لي شورت وتيشيرت بسرعه حطيهم في هالشنطه .. انا بروح اجيب كيمرتي من الدرج رديتيها مكانها؟؟؟
جواهر : ايي
راحت جواهر وحطت له تيشرت وشورت فالشنطه وطلعت من الغرفه ..
















فالبحر كانوا الشباب مجتمعين وكان الجو باااااارد وحلو بنفس الوقت الي يشوون والي يلعبون بسكوتراتهم فالبحر
والي عايشين الجو وقاعدين على السيف ويتفرجون على الي فالبحر ... راح خالد صوب سيارة غانم وطلع الكيمرا من الشنطه وشغلها وقعد يصور لقطات شوي وفجأه قطع عليه الشريط خلص !
فتح الشنطه يدور فيها مالقى شريط التفت بيدور غانم لقاه بعييد وفالبحر .. قال امسح أي شي من التسجيل الي قبل واصور شغل الكيمرا .. وعاد الشريط من البدايه وشغله استغرب غرفة وتدل على انها غرفة بنت والتفت الكيمرا وصورت البنتين الي كانوا قدام التسريحه الي تكحل والي تحط لها روج استغرب خالد ماكان يبي يكمل بس الفضول ذابحه وفي نفس الوقت استغرب .. هذي ريموه بنت عمتي !!! وهذي من الي معاها !!! انا شايفهااا يوم الغدا بس ماعرفتها للحين من وقف التصوير شوي وركب فالسياره وسكرها عليه وقعد يشوف التفت جواهر الي كانت تكحل عينها للمنظره وهي تبتسم وكانت تكلم الي تصور ( تماضر ) مع ان شكلها مبهدل بس كان حلو شعرها ناعم وطويل بيضا شفايفها ورديه وعينها مكحله بطريقه حلوه رموشها حلوه وطويله وعينها وسيعه كان شكلها روعه كانت لابسـه بدي جبانيز ابيض وجينز .. خالد كان مب مصدق الي يشوفه شهالملاك الي بصورة انسان التفت يشوف حوالي السياره لحد يشوف ورد يشوف الكيمرا خاطري اعرف من هذي الحلوه ...قربت جواهر من الكيمرا واخذتها من يد تماضر الي كانت تحاول تتصد من الكيمرا وجواهر تلحقها ويضحكون وصوت الاغاني شال المكان وريم تستعرض رايحه جايه وكل مره تطلع بزي وتسوي حركات ... ثبتوا الكيمرا في مكان مناسب وراحوا كلهم غرفة الملابس كل وحده سوت لها ستايل غريب عجيب وطلعت ويستعرضون قدام الكيمرا وكل وحده تضحك عالثانيه .. ابتسم خالد وهو يشوفهم وفجأه بند التصوير البطاريه فضت ..قطها فالشنطه وطلع للشباب وفي خاطره يعرف البنت الحلوه من ؟















أشرقت الشمس معلنه عن بداية يوم جديد .. يوم مخبي في ثناياه مفاجأت الله اعلم تكون سارّه او حزينه !
يوم الجو كان فيه ولا اروع .. بروده خفيفه مع نسايم هوا باارده تهب بكل لطف تداعب اغصان الشجر .. توعت جواهر ع الساعه 7 وغسلت بسرعه وجهزت نفسها مستعده تروح لبيت جدها وتشوفه اذا بيروح للعزبه بتروح هي والبنات معاه يغيرون جو ويستمتعون في هالجو الحلو ... اخذت شنطتها بيدها وشاف من صوف بيدها الثانيه وطلعت بعد ماستأذنت من امها الي كانت بالصاله وراحت لبيت جدها الي مايفصل بينهم الا شارع بس والباب على الباب .. دخلت الصاله و كان الجد بوسلطان فالصاله يتقهوى ومعاه زوجته ام سلطان دخلت عليهم حفيدتهم جواهر وحبت راس جدها وجدتها وصبحت عليهم بالخير وقعدت جنب جدها وقالت: جدي
الجد: يالبيه
ابتسمت جواهر وقالت: لبية حاج .. بتروح البر؟
الجد: أي بتروحين معاي؟
جواهر: ايييييي انا وريم وتماضر
الجد: حياكم الله زهبوا اعماركم 7 ونص بنطلع
جواهر وهي تقوم: خلاص بروح اكلم البنات فالصاله الثانيه وبجيكم ... راحت جواهر
ودقايق ويجيهم خالد الي كان توه واعي : صباح الخير
الجد + الجده : صباح النور
الجد بوسلطان: خالد جهز عمرك ترى انت الي بتوديني العزبه
خالد يالله صباح خير .. : ليش وين دريولك؟
بوسلطان: موجود بس دام البنات بيروحون معاي ابيك انت تودينا
خالد : اييي بس يبه انا عندي اشغال ابي اخلصهم
بوسلطان: معليه نزلنا ورد خلص اشغالك وارجع لنا
خالد: تعب جدي الطريق طويل مب قريب على خبري يعني .. بعدين انا نسيت الطريق مادل
بوسلطان: معليه انا ادليك
سكت خالد مافي مفر ... : اوكي اوديك خل اروح اجهز ..
الجده ام سلطان: تعااال تريق ياخالد
خالد وهو يأشر بيده : مااشتهي .. انسدت نفسه مايبي يروح وياهم العزبه بس شيسوي
مأمور !!





البنات ماكذبـوا خبر دقايق وهم جاهزين واركبوا مع جدهم فالسياره .. الي كان فرحان بجيتهم معاه بيونسونه وبيضيعون عليه الوقت .. تماضر: جدوووو
الجد: لبيه
تماضر: لبى قلبك .. متى بنرد؟
الجد: مستعجله عالجيه يابوج؟ هههههه الظهر ان شاءالله
ريم: بنتغدا هناك والا فالبيت؟
الجد: والله يابناتي انا كل مره ارجع اتغدا غالبيت بس اذا تبونا نتغدا هناك مابه خلاف
تماضر حست ان جدها اريح له يتغدا فالبيت قالت: آآ نزين مب مشكله جدي نرد قبل الغدا
ضربتها جواهر بكوعها عالخفيف وقالت: لا انا ابي اتغدا فالبر مب كل يوم بنطلع
ريم قالت بصوت عالي عشان يسمع جدها: أي صح نبي نتغدا بس هالمره فالعزبه دام كلنا طالعين ..
الجد: ان شاءالله ... وينه هذا اخرنا صارت 8 الا ربع
شوي الا خالد جاي .. كان لابس ثوب كحلي وعاصم راسه بغتره حمرا ولابس نظارات شمسيه كان شكله حلو .. قالت ريم بصوت واطي للبنات عشان مايسمعهم جدهم: شكله عذاااب
تماضر: اييي تصدقين محلو اكثر ..
وجواهر تسمع وتشوف بس بدون ماتعلق ماتدري ليش ماتبلعه ! قالت بينها وبين نفسها " صحيح شكله حلو بس شخصيته مب حلوه وش يفيد الحلا دام الشخصيه نفسها مب حلوه " .. ركب خالد السياره : السلام عليكم
البنات والجد: عليكم السلام ..
ضبط خالد المنظره الي فوق وهو يرفعها شاف وجه جواهر بسرعه يحس قلبه بيوقف .. هذي معانا فالسياره آآآه ياليت اقدر التفت مالت علي وانا جاي ماشفت من موجود ياااربي شسوي ابي اشوفها .. آآآخ ليتني مارفعت المنظره فوق آآآآآآخ ... وبعد تفكير سريع .. بسسس لقيتها .. توه بيشغل السياره الا فتح الباب ونزل التفت عليه جده: شفيك ياولد؟؟؟
خالد: دقيقه وجاي .. راح داخل سوا نفسه نسى شي ورجع عشان لما يرجع يشوفها ... وفعلا وهو راجع كان يشوفها وماخذ راحته وشاف تماضر وريم من تحت النظارات محد درا فيه وجواهر الي كانت قاعده بلوسط متنرفزه ولا حتى التفت عليه .. ابتسم وركب السياره وشغلها ... فالطريق كانوا البنات يسولفون بينهم وبين بعض ... قال خالد عشان يكمل الخطوه ثانيه : آآآ ماعرفت من الانسات الي قاعدين ورا؟
ريم: طبببعا الجميله رييييم
تماضر: والحلوه تماضر
وسكتـوا ينتظرون جواهر تكلم بس ماتكلمت لان الجد كمل وقال:...........


يتبع.......