[لامارا]

ظلال الماضي 12

كانت تحاول أن تجعل أمها ترتاح قليلا وتعطيها دواء الضغط

هي : امي لا تعملي بحالك هيك أنا ما بستاهل حتى تبكي مشاني خلص انسي إني موجودة ح روح
الأم : أمسكت بيد ابنتها بقوة " اوعك تعملي شي اوعك لو باقية عليي ولو شوي لا تعملي شي ، أنا بخلي أبو وسام يستر عليك بس إنت اوعك تقولي أي كلمة فاهمة شو حكيت ؟ والله لو قلتي أي كلمة لأقتل حالي "
هي : خلص متل ما بدك امي " كانت تبكي وهي تتعهد لأمها بأن تلزم الصمت ولا تعترض على أي شيء "
وصلت رسالته إليها وهي تحلف لأمها بعدم الاعتراض
هي : شوفي رد أو
الأم : اتصلي فيه
هي : حاضر
اتصلت
هو: ايه احكي شو صار
الأم : أبو وسام أنا بدي ياك ما عندي أي حدا غيرك مشان تساعدني ، كرمال ندى وقف معنا
هو: خلص وصلتي شو ما بدك تحت أمرك أنا معك لا تخافي من شي
الأم : اتجوزها
هو: شو ؟
الأم : مافي غير حل داخلة عليك وحياة وسام ما تردني
هو: وينه أيمن ليش ما بدو يصلح غلطه ؟
الأم : هه وينه خلص طار شو مفكر واحد بيعمل هيك أكيد بتكون نيته عاطلة
هو: لا حول ولا قوة إلا بالله العلي العظيم شو عم تحكي يا ام ندى أنا شايفها متل وسام وإنت عم تقولي لي اتجوزها شو مفكرة الشغلة سهلة ؟
الأم : يا ابني والله مافي غير هيك حل مين ح يسترنا يا ابني بعد الله غيرك يا ابني خدها شهر اتنين وطلقها شو بدنا غير نستر عليها الله يخليك والله ما لي وش بس شو بقدر اعمل غير هيك ؟.
هي : صعبت عليها نفسها جدا وهي ترى أمها تترجاه أن يأخذها
قالت " لا تعملي بحالك هيك امي شو غصب "
الأم : نظرت إليها بغضب وأشارت لها أن تصمت
هو : يا ام ندى شو بدي قول أنا ما عم ارفضها بس أنا مو قادر اتخيل إنه اخت ندى ووحدة كنت حاسبها بنتي اتجوزها والله صعبة كتير على قلبي
الأم : يا ابني اسمعني انت هلأ ما ح تتجوزها لأنه بدك تتجوزها لا انت عم تنقذ حياتها يعني اسمع قول الله " فمن أحياها كأنما أحيا الناس جميعا " هي نفس وروح بين ايدك شو بدك تتركها لاخواتها يقتلوها ؟
هو: لا ما ح خلي حدا يقتلها أبدا
الأم : كيف بتقدر تحميها بغير هيك حل ؟
هو: ما بعرف بس
الأم : يا ابني ارحمني بكبرتي وانت رجّال أصيل وبتعرف شو يعني ادخل عليك
هو: تنهد وقال " حاضر متل ما بتريدي بس كيف بس بدي اطلبها من اخواتها ؟"
الأم : ما تهتم انت أنا بحكي معهم وبقنعهم وأصلا ما ح يقولوا لا ،خليك بمكانك وافرح مع ابنك وأهلك وأنا بحكي وبقنع اخواتها وكل شي ، انت ما تحضر غير كل شي جاهز لا تحمل هم تحكي مع حدا أنا بعمل كل شي
هو: خلص اعملي شو ما بدك أنا تحت أمرك يا ام ندى ولا تحملي هم بنتك بعيوني ولا يمكن خلي حدا ياذيها
الأم : ايه الله عالم إنك أعز من ابني وربي شاهد
هو: وإنت بعتبرك متل امي والله عالم .
أنهت الاتصال والبشر على وجهها
هي : شو امي تنازل أخيرا وقبل ؟
الأم : العمى بقلبك لسى شايفة حالك يا ريتك شفتي حالك ع الكلب اللي سلمتيه حالك
هي : امي يعني كتير ذليتي حالك
الأم : والله ما ذلني غير إنت يا حيوانة
هي : معك حق امي أنا ذليتك وذليت حالي شو بدي اعمل
الأم : ولك يا غبية ضحى مشانك لازم تشكريه وتحملي جميله فوق راسك مو هيك شايفة حالك
هي : ايه لأنه بيصح له ياخد وحدة قد ولاده ؟
الأم : ارتاحي بدو يطلق بس يتطمن إنك ما ح يصير لك شي
هي : شو بدو يطلق ؟ يعني ما بدو جواز يكمله أحسن أنا كان بدي قول هيك بس خفت تبهدليني أنا هيك أو هيك كنت خليته يطلق أصلا قد بابا
الأم : ايه قد أبوك بس رجّال محترم مو متل الحيوان اللي عمل هيك معك وهرب منك .
هي : ايه منشوف "قالت في نفسها يعني أبو وسام ح يوفرني وأنا ببيته ؟ أكيد ح يطالب بحقه الزوجي بس والله لذله متل ما ذلني ، أنا يشوف حاله عليي ويخلي امي تترجاه ؟ أنا بورجيك يا أبو وسام "
أخذت الأم التلفون واتصلت ب ابنها فادي
الأم : فادي تع انت وأخوك لهون ضروري
فادي : شو فيه احكي امي
الأم :اختك إجاها عريس
فادي : ايه خلص خليهم ينطروا لبعد الفحوص ومنشوفهم
الأم : لا اليوم لازم تجي انت وأخوك مشان احكي معكم
فادي : امي ولادي ومرتي اليوم معزومين عند أهلها يعني
الأم : فادي خلي مرتك وولادك عند أهلها وتع الموضوع ما بيتأجل لازم نحكي فيه مشان نشوف شو لازم نقول كلنا صدقني الموضوع كتير مهم
فادي : اسمعي امي خلص اصرفي الناس أصلا أنا فيه ابن عيلة أكابر بدو يناسبنا يعني هيك أو هيك ح نرفض بلا ما نحكي
الأم : اسمع فادي تع وانت ح تشوف إني فاهمة عن شو عم احكي وصدقني أنا فاهمة المصلحة
فادي : ماشي امي كرمالك هلأ بمرق على أخي ومنجي لعندك
الأم : ايه ابني الله يرضى عليك وسلم لي على ولادك
هي : خلص قررتي تبيعيني اله ؟
الأم : شو قلتي مو قلتي خلص ما عاد تحكي ولا كلمة بعد اللي صار أو بدك تجلطيني هلأ وتخلصي مني ؟
هي : لا خلص امي بعمل شو ما بدك خلص " وتخيلت كيف سيكون رد فعل فادي لو عرف ما قامت به وشعرت بالقشعريرة في بدنها تخيلت فادي يقطعها وهي تصرخ قبل أن تلفظ آخر أنفاسها " اهتز جسمها جزعا للفكرة
الأم : من هلأ بدي اسمع منك تعهد ما بتعملي شي يخرب علينا أنا وأبو وسام أو بدك تتحملي غضبي وموتي ح يبقى برقبتك .
هي : لا امي مين بقيان لي غيرك إنت ؟ بس حاسة حالي وسخة وأنا عم آخد أبو وسام شو ما كان هاد جوز ندى اختي ، امي كيف بدي اقدر بس يعني لو أي حدا بالدنيا غيره بيكون لسى أحسن
الأم : لا تفكري هيك هلأ اختك بدار الحق والله يتولاها برحمته صار لها شي تسع سنين وح تدخل بعد كم شهر بالعاشرة وابنها اسم الله صار شب وأبو وسام إذا ما أخدك هيك أو هيك ح يتجوز ويشوف حاله شو مفكرة وعموما هو مو حابب الفكرة متلك وأكتر الله يكون بعونه كان لازم يتجوز ويتهنى مو مشان يحل لنا مشكلة
هي : ايه لا تخافي عليه ح يتهنى شو مفكرة يعني " وهزت أكتافها علامة
أن لا حول ولا قوة "
الأم : وإذا اتهنى ؟ معه حق شو غلط يعني اوعك تكوني لئيمة معه هو خدمنا ووقف حدنا ولم شرفنا فلا تعملي شي يخزينا معه فاهمة أو والله ليكون آخر ما بيني وبينك هو زعله فاهمة ؟
هي : متل ما بدك " ودخلت غرفتها "
بعد ساعة حضر جمال وفادي
قبلا رأس أمهما
جمال : خير امي قال عندك عريس لاختنا بس أنا بشوف إنه بكير كتير
بعدها صغيرة و
فادي : لا صغيرة ولا شي شو انت التاني بدك ياها تروح ع الجامعة وتحب وتعشق دخيلك انت وأفكارك
جمال : يا عمي شو هالتفكير انت التاني خليها شو يعني كل البنات هيك بس أهم شي تحافظ على حالها وتعرف كيف تفهّم أي شب يتقرب منها إنها بنت محترمة
فادي : ولك انت صاير كيف بدي احكيها بلا شرف
جمال : اخرس ولاه
الأم : خلص خلص اسمع فادي وانت جمال هاد أبو وسام طلب ايد اختكم مني وكان بدو يحكي معكم بس أنا قلت له أنا بحكي معكم
جمال : يا عيب الشوم هلأ أبو وسام اللي كنا حاسبينه الأخ التالت الها هلأ صار بدو يتجوزها ؟ ليش ما يشوف وحدة من عمره شو بدو فيها ؟هي ولد
فادي : له له يا أبو وسام ليش هيك " وضرب كفا بكف "
الأم : اسمعوا أبو وسام كلفني دوّر له على عروس
وأنا اقترحت عليه اختكم هو بالأول قال لا بس أنا أقنعته
فادي : قدم جسمه وقال "وليش بقى؟ أفيدينا "
جمال : ايه والله امي ليش هيك أحرجتيه وأحرجتينا ؟
الأم : اسمع انت وهو يا هبل هلأ أبو وسام ما شالله حوله من يوم ما حط راسه بالتجارة وربي فاتحها عليه كل يوم ما شالله مشروع
فادي : ايه هو عن جد شاطر كتير وكسّيب ولو بدك الحقيقة مافي منه كتير كسّيب وايدو نضيفة
الأم : ايه وأنا ما حبيت كل هاد يروح لست تانية وولادها شو بها بنتي والرجّال منعرف طبعه وأخلاقه ولا عمره ح يعمل لها شي مؤذي ليش يروح لوحدة غريبة ؟
جمال : ايه وبنتك وشبابها بدها تحب شب من عمرها يلاعبها ويفهم عليها
فادي : لا امي معها حق ليش يروح كل هاد لبرا ونحنا نطلع منه
جمال : يا قلبي شو الك انت أول عن آخر يعني اتجوز اختك أو غيرها
فادي : إذا أخد اختك يا أهبل ما بتطالب بورتتها شو بك انت ؟
جمال : وليش بقى ما تطالب هاد حقها
فادي : ايه بس لما تاخد أبو وسام بيمنعها وح يقلّها خدي من عندي واتركي اخواتك أنا بفهم عليه
الأم : هلأ بغض النظر عن كل هاد انتوا بتضلوا خوال ولاده و الكم الأولوية بالصفقات وهيك إشيا شو قلتوا
جمال : امي أنا صح مو ملاك ولا بقول مو هاممني كل هاد بس لازم اسمع منها هي إنها موافقة
فادي : شو ح يفرق شب أو ختيار جمال النهاية كلها وحدة وبعدين أبو وسام قدي تقريبا بس متجوز بكير ، وأنا لسّاني شب واسم الله حولي
جمال : يا عمي خلص متفق معكم وأنا ما عندي أغلى من أبو وسام بس أول شي بدي اسمع شو بتقول هي
الأم : خلص حكيت معها وقالت ايه موافقة
جمال : أنا لازم اسمع منها وافهم
هي :كانت تستمع لكل ما يدور خرجت وقالت " أنا بدي أبو وسام أخي "
ودخلت غرفتها مسرعة
فادي : هه شفت مو قلت لك خلص خليه يجي ويحكي معنا مشان كل شي
الأم : ايه خلص بتعمل آخر فحص ومنعمل الجواز اليوم التاني ؟
فادي : ايه خلص .
لم ينتظر أي كلمة من أمه واتصل به ليبشره
هو: أهلين أخي فادي
فادي : كان يضحك " لا تقول أخي قول صهري عن جديد خلص البنت قبلانة جيب الشيخ وتعال يوم الاتنين الجاية
هو: ايه خلص متل ما بدك
فادي : تعال قبل مشان نحكي أكتر
هو: ايه إن شالله " كان يتكلم وهو يشعر أنه مجرد حلم ،
كان يحاول أن يستوعب ما حصل وكيف سوف يتصرف ويبلغ أهله ووسام وهو الأهم "
أغلق الخط ودخل إلى والده الذي كان يتحدث مع وسام وأبناء عمه عن أيام الماضي
هو: أبي ممكن احكي معك شوي فيه موضوع هيك
الوالد : أجّل موضوعك شوي خليني كمّل القصة اللي صارت مع جدك لما كان بالجهادية
هو: متل ما بدك " ولكن كان وجهه يظهر همّ قلبه "
الوالد : نظر إليه وشعر أن الأمر هام " قال" يلا يا ولاد روحوا هلأ بس
اتذكروا وين وقفنا مشان كمّل لكم القصة "
وسام : أنا متذكر جدو لا تخاف " والتفت إلى والده الذي كان في عالم آخر شعر وسام أن هناك خطبا في والده جعله على هذا النحو " قال في نفسه شو صار يا بابا ليكون صار شي لستي أو خالتو وما بدك تخبرني "
هو: دخل وجلس مع والده بعدما خرج الأولاد
" كان يفكر في كلمات ومقدمات لما سوف يقول ولكن قرر في النهاية أن يبدأ من النهاية " قال بعدما تنهد وأخذ نفسا عميقا " أبي قررت اتجوز "
وقبل أن يجيب والده على أي شي أكمل " البنت اللي بدي ياها بتكون اختها لندى "
طرقت الكلمات سمع وسام الذي قرر أن يعرف ماذا يخبئ والده وسمع ما قاله الآن وشعر بصدمة كبيرة فهو يتخيل وقد يحض والده على الزواج ولكن ليس خالته التي ينظر إليها بشكل مختلف لا يمكن أن تأخذ هي بالذات مكان أمه
وسام : لا بابا لا خالتو لا
التفت الكل إلى حيث يوجد وسام .

.............................يتبع