[فيتامين سي]

آلـ ج ــزء آلـ خ ـآمس وآلـ ع ـشرون ~



كان واقف قدامـها وملاحظ توترهـا
سحب نفس عميـق .. وهو يفكـر كيف ممكن يقول لها !
ووش بتكون ردة فعلهـا
خصوصا وانه في كل موقف يجمعهم تكون ردة فعلهـا دايمـا الضد ..

قال بصوت هادي جدا .. وهو يراقبها بنظراته : بالنسبه للعرس .. انا كنسلت الفرقه سواء للحريم والا الرجال .. لكن حجز القاعه موجود .. يعني بيكون عرس بدون طقطقه ! عشاء كبير والسلام !!!
بلعت نوره ريقهـا وهي مازالت تشوف طرف ثوب سعود تحت ..
حارت الدمعه وسط عينهـا
مهمـا يكون هي بنت حالها حال باقي البنـات
تمنى تكون ليلة عرسها احلى ليله
يكون عرسها مثل اعراس البنات كلهم
كل بنت تحلم لهالليله وتخطط لها
ويوم صار الجد .. وتحدد الموعد
يتكنسل جزء مهم فالعرس !
صحيح ماتكنسل العرس كامل
بس الجزء الي انلغا منه جزء كبير
شتقدر تقول؟؟
ماتقدر ترفض حتى !


سعـود يشوفها ينتظر ردة فعلها !
وصله صوتهـا الاشبه للهمس : الي تشوفـه ( وهي مازالت تشوف تحت )
مد سعود يده لتحت ذقنها يرفع وجهها ناحيته وانصدم لما شاف عيونها متجمعها فيها الدمـوع ..
كانت تحاشى تشوفـه
سعود حس بأنه بينهار .. مايستحمل يشوفها بهلمنظر قال بهدوء : انتي متأكده من قرارج؟
بلعت نوره ريقها .. وهي تهز راسها له بالايجاب : أي
ابتسم سعود : اهم شي التوفيق .. ( ابتعد عن طريقها عشان تقدر تدخل ) .. تفضلي داخل
مرت نوره من جنبه وهي ميته من الاحراج
راحت على طول فوق
وعيون سعود تتبعهـا بكل حب ..
عدل غترته وراح ..


:
:



عند نوف بالمستشفى
كانت امها عندها وام حمد والجازي وساره الي دخلت عليهم من شوي
قعدت ساره جنب الجازي وهي تسألها عن اخبارها ..
وبعد السـوالف والقهـوه قامت ساره
وشالت حمني الصغيـر من سريره .. طبعت بوسه بكل رقه على خدوده المتورمه من الولاده
وراحت تقعد جنب الجازي .. وهي كل شوي تعلق مع الجازي على يده الصغيره
على نومته كل شي فيه صغيـر
كانت تشوفه بكل حب .. وكأنه ولدها مب ولد اختهـا
وعيون نوف تراقبها وقلبها يتقطع مليون قطـعه .. هي اكثر انسانه بهالدنيا تحس بمعاناة اختها الصغيره
لما تزعل ساره تلجأ لنوف
لما تضايق تلجأ لنوف
اذا حبت انها تفضفض عشان ترتاح تلجأ لنوف
نوف تعرف كل خطوه بحياة ساره
وتحس بمعاناتها .. بفرحهـا
بحزنها بضحكهـا
بكل شي ..

هي متأكده الحين ان اختها تمنى لو تشيل بين احضانها ولدها
الي من قطعة كبدهـا
دنقت نوف وهي تدعي في خاطرها ان الله يرزق اختها الذريه الصالحه ولايحرمهـا


نظرة ام عبدالله لبنتها كانت غيـر
مهما كانت نوف تحس بمعاناة اختها اكثر من امهـا
لكن قلب الام غير !
ضناها لو مااشتكى هي تعرف شفيه من غير مايتكلم !!!
كانت تشوف بنتها ساره شايله ولد اختها بين احضانها
بكل حب تحظنه وتبوسه ..
وقلبها يتفتفت .. ربي يرزقج يابنتي ولايحرمـج
ربي يعوضج عن معاناتج ويفرح قلبـج ..
برقت دمعه بوسط عينهـا قدرت تخفيها ببراعه دون محد يشوفهـا




:
:


دخلت لقت امهـا على سجادتهـا
بيدها المسبـاح تسبح .. واجواء الغرفه شبه مظلمـه
عشان لحد يشوف دموعهـا الي ماجفت عيونها من بعد مافقدت الغالي ..
عاشت معاه سنين طويلـه تزوجته وهي صغيره وربـوا عيالهم لين ماكبروا وعيالهم جاووهم عيال
وربوا عيال عيالهم لين ماصاروا كبـار وعلى وشك يصيرون اباء وامهـات ..
العشـره ماتهون على الواحد لو هي بسيطـه
كيف لو كانت عمر !
هذي حال الدنيـا تفرق اليوم هم معانا وبكره هم تحت التراب
ممسحت دمعتها وهي تلف تشوفهـا بنتها وضحى الي دخلت وشغلت الليت : يمـه قاعده؟
ام عبدالرحمن وهي تنزل برقعها على وجهها : أي يمه
وضحى : ام سعـود توها جايتنا الحين حياج عندنا .. تقهوي وسولفي وغيري جو شوي
بصعـوبه ام عبدالرحمن قامت بمساعدة بنتهـا .. وراحت للصاله سلمت على ام سعـود
واقعـدوا يسولفون ويتقهـون .. شوي طلعت من الجو الي كانت فيـه


:
:


دخلت المهـا غرفتهـا لقت نوره قدام التسريحـه كل شوي تفتح شعرها وترجع تلمه وهي تشوف شكلهـا فالمنظره
واول مادخلت المهـا نطت لها وهي ماسكتها من جيبهـا بقهر : انتي ماتتوبين من حركاتج هذي؟
خافت المهـا وبققت عيونها في نوره : شفيج ؟؟
نوره ودها تذبح المهـا على تفهيها : تسوين نفسج ماتدرين؟؟؟ ( هدتها وراحت تقعد عالسرير ) اسمعيني الشيخه مهـا حركات الفخوخ هذي الي تسوينهـا .. تعالي محد فالبيت ومادري شنو !!! خليها تولي الحين انا في وضع مايسمح لي اطيح في مقالب بايخه مثلها !!
قعدت المها جنبها وقالت : والله يوم اكلمج محد خالي ماجد مودي امي السوق .. بعدين امي للحين ماجات على أي اساس شفتيه؟؟؟
تكتفت نوره وهي تصد عنها : مب خالج الي شفته !!!
المها : لاتقولين لي سعود ؟؟؟ لان سعود مستحييييييل يكون موجود هالحزه فالبيت !!!!
لفت لها نوف وهي معصبه: امبلا سعود !! ( كملت بقهر ) مهوي ان دروا اهلي عن هالحركات والله مايخلوني اجيج ولااعرفج
المها برطمت بضيق: والله نوره اني مادري انه فالبيت ومب قاصده والله .. لان سعود كل يوم هالحزه مايكون موجود عنده دوره !!
سكتت نوره بدون ماترد على المهـا
كملت المهـا ببراءه مغلفـه بنظرات خبث : بعدين شفيها اذا شافج؟؟ تراه زوجج على سنة الله ورسوله
وللللع وجه نوره من الاحراج واضربتها على كتفها بقوه : مالت عليج اقـول ..
المها وهي تقوم وتسحب نوره معاها: قومي قومي تراني مسوية لج ذاك الكرك .. عشانج بس دشيت المطبخ !
سحبت نوره يدها وهي تدز مها قدامها : روحي بس قالت عشاني داشه المطبـخ انتي اصلا 24 ساعه فالمطبخ تبلعين !!
المها وهي تتخصر بدلع : حبيبتي مادري من الي معششه فالمطبخ ( وترقص لها حواجبها )
ضحكت نوره ومرت من قدامها وهي تنزل الدرج : كلن يتكلم عن نفسه
المها بضحكه : قلتيها ياللوتيه كلن يتكلم عن نفسه ومالج خص فيني ...
لفت لها نوره بضحكه : يعني صدق انتي 24 ساعه فالمطبخ؟؟؟
صرخت المهـا في وجهها وهي تضحك : جبببب ولاكلمـه

ونطت عليها بتضربهأ
راحت نوره تركض والمهـا تلحقهـا
:
:



مر اليـوم بدون احداث تذكر
اليـوم الثـاني العصـر




كانت المهـا طالعه مع خالها ماجد للسوق تبي تستعد لعرس اخوهـا الوحيد
راحت لفيلاجيو
وقف ماجد وهو يقول للمهـا ويأشر لها : حدج هالممر بس واذا خلصتي منه اتصلي لي .. انا بروح كافيه لونوتر الي في نهاية الممر
هزت المهـا راسها بالايجاب : ان شاءالله
ماجد وهو يبتعد عنها : لاتأخرين
المهـا وهي تدخل المحل الي جنبها : ان شاءالله ..

دشت المحـل تشوف الفساتين المعروضـه
بدون ماتنتبه للموجدين فالمحل ..






راح ماجد للكافيـه واختار له طاوله على زاويه تطل عالممر الي فيه المهـا
طلب له كوفي وهو يشـوف الناس الرايحه والجـايه
شوي ويرن تلفونـه

مرحبا بوفالح
طلال بضحكه : هلا وغلا في ذمتي شحالك؟
ماجد وهو يعدل غترته : طيب طاب حالك .. شحالك انت؟؟
طلال : بخير ربي يسلمك .. وين يالحبيب؟؟
ماجد : والله طالع مع الاهل
طلال : وين؟؟؟
ماجد : تحقيق هو؟؟؟؟؟ فيلاجيو !
طلال: هههههههه ياحلوك لما تعصب .. المهم اطلب لي معاك كوفي
ضحك ماجد وهو يدور بعيـونه طلال .. ولمحه جايه من بعيد وهو يسكر تلفونـه
سلم عليه وطلب له كوفي .. واقعدوا يسـولفون مع بعض ...








عند المهـا
كانت تشوف صندل راقي عجبها شكلـه ماوعت الا بصوت من وراها
هالصوت مآلوف ..
مها؟؟

لفت لها لقتها ابتسمت بفرحه : هلا وغلا .. ( سلمت عليها )
آمنـه : اهلين شهالصدفه الحلوه؟؟
المهـا : شفتي شلون
آمنه : حد معاج؟
المهـا تذكرت الموقف الي صار بين امنه وماجد قالت بأبتسامه من روا النقاب : خالي .. السوري جات معاج؟؟
آمنـه بأبتسامه : لا ماجات .. انا جايه مع عمتي وبناتها .. هم يبون شي وانا ابي شي ثاني اتفقنا عقب مانخلص نلتقى عند بوابة كارفور
المهـا : شكلج تدورين فساتين نفسي !
آمنه : أي
المها : حلو عجل تعالي لقيت كم فستان وابي رايج فيهم













عند مـاجد وطلال
طلال بأبتسامه : متى ناوي تزوج؟
ابتسم ماجد وهو يشوفه رافع حاجب ومنزل حاجب : شهالسؤال؟؟ .. انتظرك لين حضرتك تزوج عشان اتزوج انا !!!
ابتسم طلال : انا قريب ان شاءالله
ماجد : من جدك؟
طلال : اييي
ماجد : من تعيسة الحظ ههههههه
طلال : يابختها فيني بس ..
ماجد : امها داعيـه عليها هذي ..
طلال بجديه في نبرة صوته : خلنا نفرح فيك قريب
ماجد وهو يلعب بأكياس السكـر قدامها : ان شاءالله .. الله يكتب الي فيه الخير
وقف طلال وهو يسلم على ماجد بيـروح ..
ماجد : وين؟؟
طلال: بروح الاهل طرشوا لي مسج اخلصـوا
ابتسم ماجد : متفقين انا وياك كل واحد جايب اهله هههههه
طلال: شنسوي بعد لهم حق علينا .. خلاص اشوفك بعد صلاة العشاء في مجلس خليفه
ماجد : خلاص ان شاءالله نلتقي هناك
راح طلال ..

وعيون ماجد تتبعـه
صد ماجد للجهه الثـانيه لمح المهـا
ومعاها وحده !!!
لاشعـوريا حس بشي بداخله ..
ابتسم وهو يدنق تحت يتذكر كلام طلال له ...
ورن تلفـونه : هلا المها
المهـا وهي تشوف الفستان الي تأشر عليه آمنه : طولت عليك؟؟ صح؟؟
ابتسم ماجد : اخذي راحتج .. ( كمل بنبرة واطيه ) بسألج من الي معاج؟؟
ابتسمت المهـا بخبث وقالت بعياره : محد معاي !!!
ماجد : مهوي مب وقت ملاغتج الحين
المهـا : مب انت قلت لي ماتحتاجني في شي هذيك المره ؟؟؟
ماجد يتصنع العصبيه : اقول تعالي يلا بنروح انتي مب وجه احد يكرمج ويجيج تسوقين
ضحكت المهـا وقالت بصوت واطي : بقولك بعدين ماقدر الحين ...
ماجد : نزين لاتطولين

:
:



في بيت بوحمد ( زوج ساره )

كانت ام حمد قاعده وساره .. دخلت عليهم اسمـاء
بغنجها ودلعهـا وحركاتها الي تلفت النظر ..
تضايقت ساره من اول ماشافتهـا .. سلمت عليهم وقعدت بدلع وهي تحط رجل على رجل
سألتها ام حمد عن احوالها واهلها .. وردت بغنج وهي تسبل بعيـونها وتسرق النظر لساره ..
لفت اسمـاء بدلع لساره : سوسو شخبارج؟
ساره تتغصب الابتسامه : بخير الله يسلمج .. شخبارج انتي؟
اسماء وهي تبعد شعرها عن كتفها: بخير الحمدلله .. ( لفت على عمتها ام حمد ) عمتي آمون وينها؟؟
ام حمد : آمنه رايحه السوق مع عمتهـا ..
اسماء : بدلع : بتطول ؟؟
ام حمد: لايابنتي من عصر وهي رايحه قدهم بيجون ذالحين ..(لفت على ساره ) ساره يمه قهوي اسماء
وقفت ساره على مضض .. وصبت لها استكانة شاي .. ومدت لها صينية الفطـاير وهي تحس بروحهـا مخنوقه

في هاللحظـات
دخل حمد !!!

زادت ضيقة ساره .. ليتك مادخلت الحين ياحمد
كانت تشوف نظرات اسمـاء الي بتاكل حمد بعيـونها
وحمد مب معطيها أي اهتمام غير انها بنت خاله ومتعود عالمزح معاها وبس !!
اسمـاء بغنج : شحالك حمد ؟
حمد وهو يعدل غترته وياخذ من الفطاير: بخير الحمدلله .. شحالج انتي؟؟ وشحال خالي وخالتي ام فهد؟
اسماء بدلع وهي تعدل شيلتها الي ماتغطي الا جزء بسيط من شعرها: بخير الحمدلله ..
حمد بأبتسامه : شخبار الدراسه؟؟
اسمـاء : تمام الحمدلله .. باقي لي كورس واتخرج
حمد: بالتوفيق ان شاءالله

لمح حمد ساره وهو يشرب الشاي ..
كانت تشوف اسمـاء شلون تكلم .. وواضح انها منقهره منها
نزل استكـانة الشاي وهو يوقف : يلا انا استأذن بطلـع الحين .. ( ولف لجهة ساره ) ساره تعالي شوي ابيج
راحت ساره وراه

وقف حمد ولف لها يشوفها
ابتسمت ساره بأستغراب : خير حمد شفيك؟
حمد وهو يدقق بملامحها : شي يعورج؟
نزلت ساره راسها : لا الحمدلله ..
ضمها حمد وطبع بوسه بين عيونها : تامريني بشي يالغاليه؟
ابتسمت بحب: سلامتك


طلع من عندهـا وباله مشغـوله عليها !
فالفتره الاخيره تغيرت واجد وصارت هاديه بشكل يحير
وغير هذا نظرة الحزن بعيـونها تنحر فؤاده نحر !


:
:

فليل السـاعه 1
غرفة المهـا




كانت شابكه النت متربعه على سريرها واللاب قدامهـا
دخل ماجد بعد ماطق الباب .. وانسدح عالسرير جنبها : شتسوين؟
المهـا وهي تسولف مع وحده ربعها عالمسن : شوفة عينك داشه النت
ماجد : آآمممم مهوي !!
المها : هلا
ماجد : شرايج في آمنه ؟؟
المهـا : من أي ناحيه؟
ماجد : جميع النواحي
ابتسمت المها وسكرت اللاب وهي تلف لماجد تكلمه : شوف بقـولك آمنـه بصراحه بنت محترمه وهاديه وعاقله ورزينـه .. توني عارفتها من فتره واحس اني اعرفها من سنين .. بسرعه اندمجت معاها
بس ......
قعد ماجد على حيله : بس شنو؟؟؟
المهـا : بس تراها مطلقه !!!
انصدم ماجد .. مطلقه !!!!!!
تكلم بهدوء : شسبب الطلاق؟؟
المهـا وهي تشبك اصابعها ببعض : ماعرف بالضبط .. بس الي اعرفه هي طلبت الطلاق منه
ماجد بهدوء : ملكـة والا دخل عليها؟؟
المهـا: لا ملكه بس !!!
تنفس ماجد براحه : ابيج تجيبين لي سبب طلاقها !!!
المها : وش يهمك فيه؟؟؟
ماجد : لاني بصراحه حاب اتقدم لهـا .. بس اول اعرف سبب طلاقها !!!
المها: ودام انك بتقدم لها .. شبيفيدك فيه السبب؟؟
ماجد : يهمني اعرف ..
المها: واذا ماقدرت اجيبه؟
ماجد : بتقدرين ان شاءالله .. اسألي ساره بنت عمج اكيد تعرف !
هزت المها راسها بالايجاب : اوكي .. انت جاد بكلامك؟
ماجد بثقه: أي نعم كلمتي كلمة رجال .. وانا كلمت امج بهالموضوع بس صار الظرف الي صار وماقدرنا نسوي شي ... وبعد فتره برجع اكلمها مره ثانيه واتقدم لها
ابتسمت المها بفرحه وضمت خالها بحب : الله يوفقك يامجووودي
ضربها ماجد بالخفيف على كتفها وهو يضحك : اصغر عيالج مجودي؟؟ ههههههههههههه


:
:


مرت الايـام مثل البـرق ..
يوم يجر يوم ..

المهـا سعت في موضوع خالهـا .. وجابت له سبب طلاق آمنـه دون علم آمنه طبعا !
وهالشي كان عن طريق ساره الي فرحت لما درت بأن ماجد بيتقدم لهـا ..


ناصر بعد ماحب انه يتم فتره بعدين يروح يخطب المهـا
جاته دوره عن طريق الشغل .. في فرنسـا لمدة 3 اشهـر
وتضايق لانه مب قادر يحضر عرس اخته .. ورفيقه سعود !!
وأنه كان ناوي يخطب المهـا في هالفتـره .. وحالت بينه وبينهـا الظروف ...




ونوره كانت تستعد وتجهـز لعرسهـا
وخوات سعـود وامـه كانوا يستعدون لعرس اخوهم ..


:
:


لفت بفستانها الابيض ..
الانيـق والراقي جدا .. تشوف المهـا والجازي والبنات كلهم حولهـا يبدون اراءهم بأعجاب بشكلها
كانت قمه في الروقي والانـاقه ..
كانت مثل الملاك بالابيض
أميـره بمعنى الكلمـه

صـوروا معاها البنـات
وشغلـوا المسجل عندها داخل يرقصـون لهـا شوي عن خاطرهـا
فرحت وادمعت عينهـا بفرحه لما شافت الفرحه بعيـونهم
قربت منها ام سعود وضمتها بحب .. نوره بنتها قبل لاتكون مرت ولدهـا
تحبها مثل ماتحب بناتها ... اتسعت فرحتهـا اكثر
اطلعت نوره على كوشتهـا
شغلت لها زفه هي اختارتهـا عشان تطلـع ..
والمصـوره تلتقط لها احلى اللقطات ..
والبنات حولهـا فرحانات لهـا
ومرت الاجـواء حلوه عليهم كلهـم ..


لحد مااتصل سعود بالجازي وقال لها انه عند باب القاعه .. ومعاه صالح
حاولت فيه امه يدخل القاعه لكنـه رفض !
دخل صالح اخوها صور معاه .. وبعدها اخذها بيدهـا .. عشان تروح مع سعود
كانت دقات قلبها كل مالها وتعلى تحس ان كل الي بالقاعه يسمعون صوتها !!
وتوترها صار ملحوظ بشكل يوتر
صالح وهو يضغط على يدها قال بصوت اشبه للهمس : شفيج ترتجفين ؟؟ بردانه في عز الصيف؟؟
سكتت نوره ومادرت عليه متوترهـا
ابتسم صالح وهو يتذكـر هاللحظات له مع لطيـفه لما حط يدهها بيده ليلة زواجهم كيف كانت ترتجف خوف وتوتر ...
تغطت عدل وساعدها تركب السيـاره
وركب صالح مكان السـواق ..وحرك متوجهين للفندق
وهو يخفي ابتسامته
عم الهـدوء اجوء السيـاره ..
سعود بنفسه متـوتر !!
اذا ذيك المره يوم الملكـه كان بيفقد اعصابه وبيتهـور من زود ماهي آسرتـه
كيف الحين وهي عروس وبالفستان الابيض ؟؟
كان يحاول يتخيل شكلهـا


وبنفس السيت
كانت نوره تلتزم الصمت ...
لكنهـا من الداخل .. كانت خايفه ودقات قلبها تدق بشكل غريب ..
تحس انها مب قادره تنفس من زود ماهي متوتره
ودها لو ترجع مع اخوهـا خلاص
!!!







وصلهم صالح للفندق
وقف مقابلهم وهو يوصي سعود على اختـه : سعود الله الله بنوره !
ابتسم سعود : بعيوني لاتوصي حريص
صالح : تسلم عيـونك ( سلم عليها بالخشم ) يلا الله يوفقكم ويبارك لكم .. اذا قمتوا الصبح اتصلوا بي
سعود وهو يشوف صالح يبتعد عنهم : ان شاءالله ...


سكر الباب ولف ورا بأبتسامه حلوه ..
انصدم !!!
هذي وين راحت؟؟؟
هز سعود راسه بآسى .. شكلي بتعب معاها هالبنت


راح للغرفـه : نوره !
لقاها قاعده عالكرسي وتفرك اصابعها ببعض بتوتر ...
سعود : شفيج؟؟؟؟؟
ماردت عليه نوره !!!
ابتسم سعود وهو يقـول فخاطره .. وين اللسان الي يلعلع علي قبل ...
نزل بشته وعلقـه .. ورفعه غترته ترمبـه وراح قعدت جنبها عالكرسي .. ولاحظ ان توترها زاد
حط يده الدافيه على اصابعها الي صايره قوالب ثلج !! وقال وهو يشوفها بحب : شوفيني ...
وقفت نوره عن الحركـه
وتحس كل شي بجسمهـا توقف عن الحركـه ..
وتحس ان من زود ماهي ميته من الحـر على هالتوتر .. صارت تدخن !
بدون ماترمش ولاترد عليـه .. بلعت ريقها وهي ساكته
رفع سعـود يده لذقنهـا .. ولف وجهها ناحيتـه .. والتقت شفتهم ببعض
وبحركه سريعه ابتعدت نوره عنه وراحت توقف بتوتر .. مب قادره تستحمل الاحسايس الي تحس بهـا
صارت تنفس بسرعه
سعود حس انه تهـور .. وضغط عليها بالبدايه ..
وقف وراح لداخل يبدل وهو يلعن السـاعه الي يفقد فيها السيطره على نفسـه ..






لآتحرموني من ردودكم
وتوقعآتكم آلحلوه ~
آختكم
{ زآآهي آلكحل ~~

*******